কৃষক কল্যাণ শক্তিশালী কৰা আৰু আত্মনিৰ্ভৰ ভাৰতৰ দৃষ্টিভংগীক আগুৱাই নিয়াৰ দিশত এক গুৰুত্বপূৰ্ণ পদক্ষেপ হিচাপে, প্ৰধানমন্ত্ৰী শ্ৰী নৰেন্দ্ৰ মোদীৰ অধ্যক্ষতাত অৰ্থনৈতিক পৰিক্ৰমা বিষয়ক কেবিনেট কমিটীয়ে কপাহ ঋতু ২০২৩-২৪ৰ বাবে ভাৰতীয় কপাহ নিগম (চি চি আই)ক নূন্যতম সমৰ্থন মূল্য (এম এছ পি)ৰ পুঁজি ১,৭১৮.৫৬ কোটি টকা প্ৰদানত অনুমোদন জনাইছে। এই পুঁজিৰ লক্ষ্য হৈছে সমগ্ৰ দেশৰ কপাহ কৃষকসকলক প্ৰত্যক্ষ মূল্য সমৰ্থন প্ৰদান কৰা।
নূন্যতম সমৰ্থন মূল্যৰ কাৰ্য্যকলাপসমূহ কপাহ কৃষকসকলৰ স্বাৰ্থ সুৰক্ষিত কৰিবলৈ গ্ৰহণ কৰা হয়, বিশেষকৈ সেই সময়ছোৱাত যেতিয়া বজাৰৰ মূল্য নূন্যতম সমৰ্থন মূল্যতকৈ কম হয়। এই পদক্ষেপসমূহে কপাহৰ মূল্য স্থিৰ কৰা, সংকটপূৰ্ণ বিক্ৰী প্ৰতিৰোধ কৰা আৰু কৃষকসকলক লাভ নিশ্চিত কৰাত গুৰুত্বপূৰ্ণ ভূমিকা পালন কৰে। কৃষি বজাৰত অন্তৰ্ভুক্তি বৃদ্ধি কৰি, নূন্যতম সমৰ্থন মূল্য কাৰ্য্যকলাপে কপাহ উৎপাদনকাৰী সম্প্ৰদায়ৰ অৰ্থনৈতিক সুৰক্ষাত গুৰুত্বপূৰ্ণ অৰিহণা যোগায়।
ভাৰতৰ আটাইতকৈ গুৰুত্বপূৰ্ণ নগদ শস্যসমূহৰ ভিতৰত কপাহ অন্যতম হিচাপে বিবেচিত হৈছে, যিয়ে প্ৰায় ৬০ লাখ কৃষকৰ জীৱিকা বৰ্তাই ৰাখিছে আৰু সংসাধন, বাণিজ্য আৰু বস্ত্ৰকে ধৰি আনুষংগিক কাৰ্যকলাপত নিয়োজিত ৪০০-৫০০ লাখ লোকক সহায় কৰিছে।
২০২৩-২৪ কপাহ ঋতুৰ সময়ত খেতিৰ অধীনত থকা এলেকা ১১৪.৪৭ লাখ হেক্টৰ বুলি অনুমান কৰা হৈছিল, য’ত উৎপাদনৰ পৰিমাণ আছিল ৩২৫.২২ লাখ বেলছ, যি বিশ্ব কপাহ উৎপাদনৰ প্ৰায় ২৫ শতাংশ আছিল। ভাৰত চৰকাৰে কৃষি ব্যয় আৰু মূল্য আয়োগৰ (চি এ চি পি) পৰামৰ্শৰ ভিত্তিত বীজ কপাহৰ বাবে নূন্যতম সমৰ্থন মূল্য নিৰ্ধাৰণ কৰে।
চৰকাৰে কপাহৰ নূন্যতম সমৰ্থন মূল্য কাৰ্য্যকলাপৰ বাবে ভাৰতীয় কপাহ নিগমক কেন্দ্ৰীয় নডেল সংস্থা হিচাপে মনোনীত কৰিছে। চি চি আয়ে কৃষকৰ পৰা সকলো ন্যায্য গড় মানৰ (এফ এ কিউ) কপাহ ক্ৰয় কৰে, যেতিয়াই বজাৰৰ মূল্য নূন্যতম সমৰ্থন মূল্য স্তৰতকৈ কম হয়, এনেদৰে কৃষকসকলক এক নিশ্চিত সুৰক্ষা বেষ্টনী প্ৰদান কৰে।
ইয়াৰ প্ৰস্তুতিৰ অংশ হিচাপে চি চি আয়ে ১১ খন কপাহ উৎপাদনকাৰী প্ৰধান ৰাজ্যৰ আটাইকেইখনতে এক শক্তিশালী ক্ৰয় নেটৱৰ্ক স্থাপন কৰিছে, ১৫২ খন জিলাত ৫০৮ টাৰো অধিক ক্ৰয় কেন্দ্ৰ কাৰ্য্যকৰী হৈ আছে, যি কৃষকসকলৰ বাবে নিৰন্তৰ আৰু সুলভ ক্ৰয় নিশ্চিত কৰে।
তদুপৰি চি চি আয়ে নূন্যতম সমৰ্থন মূল্য কাৰ্য্যকলাপৰ দক্ষতা আৰু স্বচ্ছতা বৃদ্ধিৰ বাবে কেইবাটাও প্ৰযুক্তি-চালিত আৰু কৃষক-কেন্দ্ৰিক পদক্ষেপ গ্ৰহণ কৰিছে। ইয়াৰ ভিতৰত আছে নূন্যতম সমৰ্থন মূল্য-সম্পৰ্কীয় তথ্য প্ৰচাৰ কৰা, বেল আইডেণ্টিফিকেচন এণ্ড ট্ৰেচেবিলিটি ছিষ্টেম (বি আই টি এছ) ৰূপায়ণ কৰা আৰু ‘কট-এলি’ মোবাইল এপ মুকলি কৰা, যিয়ে কৃষকক উন্নত প্ৰসাৰ আৰু সেৱা প্ৰদান কৰাত সহায় কৰে।
हमारी सरकार किसान भाई-बहनों का जीवन अधिक से अधिक आसान बनाने के लिए कोई कोर-कसर नहीं छोड़ रही है। इसी दिशा में आज कपास सीजन 2023-24 के लिए MSP फंडिंग को मंजूरी दी गई है। हमारे इस कदम से देशभर के कपास किसानों के हितों की रक्षा सुनिश्चित होगी।https://t.co/PAf5eSM2o3
— Narendra Modi (@narendramodi) March 18, 2026
