ନମସ୍କାର!
କୋନ୍ନିଚିବା ।(ହେଲୋ)
କେମ ଛୋ (କେମିତି ଅଛନ୍ତି)
ଜେନ୍ ଗାର୍ଡେନ୍ ଏବଂ କାଇଜେନ୍ ଏକାଡେମୀର ଲୋକାର୍ପଣର ଏହି ମୁହୁର୍ତ ଭାରତ ଜାପାନ ସମ୍ପର୍କର ସାବଲୀଳତା ଏବଂ ଆଧୁନିକତାର ପ୍ରତୀକ । ମୁଁ ବିଶ୍ୱାସ କରେ ଯେ ଜାପାନି ଜେନ୍ ଗାର୍ଡନ୍ ଏବଂ କାଇଜେନ ଏକାଡେମୀର ସ୍ଥାପନା ଭାରତ ଏବଂ ଜାପାନର ସମ୍ପର୍କକୁ ଅଧିକ ମଜବୁତ କରିବ, ଆମ ନାଗରିକଙ୍କୁ ଆହୁରି ଅଧିକ ନିକଟତର କରିବ । ମୁଁ ହ୍ୟୋଗୋ ପ୍ରି-ଫେକ୍ଚରର ନେତାମାନଙ୍କର, ମୋର ଘନିଷ୍ଠ ବନ୍ଧୁ ଗଭର୍ଣ୍ଣର ଶ୍ରୀ ଇଦୋ ତୋଶୀଜୋଙ୍କୁ ଏହି ସମୟରେ ବିଶେଷ ଭାବରେ ଅଭିନନ୍ଦନ କରୁଛି । ଗଭର୍ଣ୍ଣର ଇଦୋ ନିଜେ ୨୦୧୭ରେ ଅହମ୍ମଦାବାଦ ଆସିଥିଲେ । ଅହମ୍ମଦାବାଦରେ ଜେନ ଗାର୍ଡନ ଏବଂ କାଇଜେନ୍ ଏକାଡେମୀର ସ୍ଥାପନାରେ ତାଙ୍କର ଏବଂ ହ୍ୟୋଗୀ ଅନ୍ତର୍ଜାତୀୟ ସଂଗଠନର ବହୁମୁଲ୍ୟ ଯୋଗଦାନ ରହିଛି । ମୁଁ ଗୁଜରାଟର ଭାରତ-ଜାପାନ୍ ମୈତ୍ରୀ ସଂଘର ବନ୍ଧୁମାନଙ୍କୁ ମଧ୍ୟ ଅଭିନନ୍ଦନ ଜଣାଉଛି । ସେମାନେ ଭାରତ-ଜାପାନ୍ ସମ୍ପର୍କକୁ ସୁଦୃଢ କରିବା ପାଇଁ ନିରନ୍ତର ଭାବେ ଉଲ୍ଲେଖନୀୟ କାର୍ଯ୍ୟ କରିଆସିଛନ୍ତି । ଜାପାନ୍ ସୂଚନା ଓ ଶିକ୍ଷା କେନ୍ଦ୍ର ଏହାର ଏକ ଉଦାହରଣ ।
ବନ୍ଧୁଗଣ,
ଭାରତ ଓ ଜାପାନ ବାହ୍ୟ ପ୍ରଗତି ଓ ଉନ୍ନତି ପାଇଁ ଯେତିକି ସମର୍ପିତ ରହି ଆସିଛନ୍ତି, ଆଭ୍ୟନ୍ତରିଣ ଶାନ୍ତି ଓ ପ୍ରଗତିକୁ ମଧ୍ୟ ସେତିକି ମହତ୍ୱ ଦେଇଛନ୍ତି । ଜାପାନୀ ଜେନ୍ ଗାର୍ଡେନ ଶାନ୍ତିର ଏହି ଅନ୍ୱେଷଣର, ଏହି ସରଳତାର ଏକ ସୁନ୍ଦର ଅଭିବ୍ୟକ୍ତି । ଭାରତର ଲୋକମାନେ ଯୁଗ ଯୁଗ ଧରି ଯୋଗ ଓ ଆଧ୍ୟାତ୍ମିକତା ମାଧ୍ୟମରେ ଯେଉଁ ଶାନ୍ତି, ସହଜତା ଓ ସରଳତା ଶିଖିଛନ୍ତି, ବୁଝିଛନ୍ତି, ତାହାର ଏକ ଝଲକ ସେମାନଙ୍କୁ ଏଠାରେ ଦେଖିବାକୁ ମିଳିବ । ଆଉ ଏମିତି ବି, ଜାପାନରେ ଯାହାକୁ ଜେନ୍ କୁହାଯାଏ ଭାରତରେ ତାକୁ ହିଁ ଧ୍ୟାନ କୁହାଯାଏ । ବୁଦ୍ଧ ଏହି ଧ୍ୟାନ, ଏହି ବୁଦ୍ଧତ୍ୱ ସଂସାରକୁ ଦେଇଥିଲେ । ଏବଂ କାଇଜେନର ପରିକଳ୍ପନା କଥା ବିଚାର କଲେ ଜଣାଯାଏ ଯେ ଏହା ବର୍ତମାନ ଆମ ଲକ୍ଷ୍ୟର ଦୃଢତାର ନିରନ୍ତର ଆଗକୁ ବଢିବା ପାଇଁ ଆମ ଇଚ୍ଛାଶକ୍ତିର ଜୀବନ୍ତ ଉଦାହରଣ ଅଟେ ।
ଆପଣମାନଙ୍କ ମଧ୍ୟରୁ ଅନେକ ଜାଣନ୍ତି ଯେ କାଇଜେନର ଆକ୍ଷରିକ ଅର୍ଥ ହେଉଛି ଉନ୍ନତି, କିନ୍ତୁ ଏହାର ଅନ୍ତର୍ନିହିତ ଅର୍ଥ ଆହୁରି ମଧ୍ୟ ଅଧିକ ବ୍ୟାପକ । ଏହା କେବଳ ଉନ୍ନତି ନୁହେଁ, ନିରନ୍ତର ଉନ୍ନତି ଉପରେ ଗୁରୁ୍ତ୍ୱ ଦେଇଥାଏ ।
ବନ୍ଧୁଗଣ,
ଯେତେବେଳେ ମୁଁ ମୁଖ୍ୟମନ୍ତ୍ରୀ ହେଲି, ତାର ଅଳ୍ପ ସମୟ ପରେ କାଇଜେନକୁ ନେଇ ଗୁଜରାଟରେ ପ୍ରଥମଥର ପାଇଁ ଗୁରୁତର ପ୍ରୟାସ ଆରମ୍ଭ ହୋଇଥିଲା । ଆମେ କାଇଜେନର ବିଧିବଦ୍ଧ ଅଧ୍ୟୟନ କରାଇଥିଲୁ, ତାହାକୁ ଲାଗୁ କରାଇଥିଲୁ ଏବଂ ୨୦୦୪ ମସିହାରେ ପ୍ରଥମ ଥର ପାଇଁ ପ୍ରଶାସନିକ ତାଲିମ ସମୟରେ କାଇଜେନ୍ ଉପରେ ବେଶ ଗୁରୁତ୍ୱ ଦିଆଯାଇଥିଲା । ପୁଣି ତା ପରବର୍ଷ ୨୦୦୫ ମସିହାରେ ଗୁଜରାଟର ବରିଷ୍ଠ ପ୍ରଶାସନିକ ଅଧିକାରୀଙ୍କ ସହ ମନ୍ଥନ ଶିବିର ଅନୁଷ୍ଠିତ ହୋଇଥିଲା, ସେଠାରେ ଆମେ ସମସ୍ତଙ୍କୁ କାଇଜେନ୍ର ପ୍ରଶିକ୍ଷଣ ପ୍ରଦାନ କରିଥିଲୁ । ପୁନଶ୍ଚ ଆମେ ଏହାକୁ ଗୁଜରାଟର ଶିକ୍ଷା ବ୍ୟବସ୍ଥା ପର୍ଯ୍ୟନ୍ତ ନେଇ ଯାଇଥିଲୁ, ଅନେକ ସରକାରୀ କାର୍ଯ୍ୟାଳୟ ପର୍ଯ୍ୟନ୍ତ ମଧ୍ୟ ପହଂଚାଇଥିଲୁ । ଯେଉଁ ନିରନ୍ତର ଉନ୍ନତି କଥା ମୁଁ ଏଠାରେ କହୁଥିଲି, ତାହା ମଧ୍ୟ କ୍ରମାଗତ ଭାବେ ଜାରି ରହିଲା । ଆମେ ସରକାରୀ କାର୍ଯ୍ୟାଳୟରୁ ଗଦା ଗଦା ଅନାବଶ୍ୟକ ସାମଗ୍ରୀ ବାହାର କଲୁ, ପ୍ରକ୍ରିୟାରେ ସଂସ୍କାର ଆଣିଲୁ, ଏବଂ ସେଗୁଡିକୁ ଆହୁରି ସହଜ କଲୁ ।
ଏହିପରି ସ୍ୱାସ୍ଥ୍ୟ ବିଭାଗରେ ମଧ୍ୟ କାଇଜେନର ପ୍ରେରଣାରେ ଖୁବ ବଡ ବଡ ସଂସ୍କାର ଅଣାଯାଇଥିଲା । ହଜାର ହଜାର ଡାକ୍ତର, ନର୍ସ, ଡାକ୍ତରଖାନା କର୍ମଚାରୀଙ୍କୁ ଏହି କାଇଜେନ୍ର ମଡେଲ ବିଷୟରେ ତାଲିମ ଦିଆଗଲା । ଆମେ ଭିନ୍ନ ଭିନ୍ନ ବିଭାଗରେ ବାସ୍ତବ କର୍ମଶାଳା ଉପରେ କାର୍ଯ୍ୟ କଲୁ, ପ୍ରକ୍ରିୟା ଉପରେ କାମ କଲୁ, ଲୋକଙ୍କୁ ନିୟୋଜିତ କଲୁ, ସେମାନଙ୍କୁ ଏହା ସହିତ ସାମିଲ କଲୁ । ଶାସନ ଉପରେ ଏସବୁର ଖୁବ ସକରାତ୍ମକ ପ୍ରଭାବ ପଡିଥିଲା ।
ବନ୍ଧୁଗଣ,
ଆମେ ସମସ୍ତେ ଜାଣୁ ଯେ ପ୍ରଗତିରେ ଶାସନର ଭୂମିକା ବେଶ ଗୁରୁତ୍ୱପୂଣ୍ଣ୍ର୍ ଅଟେ । ବ୍ୟକ୍ତିର ବିକାଶର କଥା ହେଉ ବା ସଂସ୍ଥାର, ସମାଜ ବା ଦେଶର ବିକାଶ ହେଉ ଏସବୁରେ ଶାସନ ବହୁତ ବଡ ଗୁରୁତ୍ୱପୂର୍ଣ୍ଣ ଉପାଦାନ ଅଟେ । ଏବଂ ଏଥିପାଇଁ, ମୁଁ ଯେତେବେଳେ ଗୁଜରାଟରୁ ଦିଲ୍ଲୀକୁ ଆସିଲି, ସେତେବେଳେ କାଇଜେନରୁ ମିଳିଥିବା ଅନୁଭବଗୁଡିକୁ ମଧ୍ୟ ନିଜ ସହିତ ଆଣିଥିଲି । ମୁଁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଏବଂ କେନ୍ଦ୍ର ସରକାରଙ୍କ ଅନ୍ୟ ବିଭାଗଗୁଡିକରେ ମଧ୍ୟ ଏହାର ପ୍ରାରମ୍ଭ କରିଥିଲି । ଏହି କାରଣରୁ ଅନେକଗୁଡିଏ ପ୍ରକ୍ରିୟା ଆହୁରି ସହଜ ହୋଇଯାଇଥିଲା, ଅଫିସଗୁଡିକରେ ଅନେକ ସ୍ଥାନକୁ ଆମେ ବ୍ୟବହାର ଉପଯୋଗୀ କରିଥିଲୁ । ଆଜି ମଧ୍ୟ କେନ୍ଦ୍ର ସରକାରଙ୍କ ବହୁ ନୂଆ ବିଭାଗ, ସଂସ୍ଥା ଓ ଯୋଜନାରେ କାଇଜେନକୁ ଆପଣାଯାଉଛି ।
ବନ୍ଧୁଗଣ,
ଏହି କାର୍ଯ୍ୟକ୍ରମ ସହ ଜଡିତ ହୋଇଥିବା ଆମର ଜାପାନୀ ଅତିଥିଭାବେ ଜାଣିଛନ୍ତି ଯେ ବ୍ୟକ୍ତିଗତ ଭାବରେ ଜାପାନ ସହ ମୋର କେତେ ଘନିଷ୍ଠତା ରହିଛି । ଜାପାନବାସୀଙ୍କ ସ୍ନେହ, ଜାପାନବାସୀଙ୍କ କାର୍ଯ୍ୟଶୈଳୀ, ସେମାନଙ୍କ କୌଶଳ, ସେମାନଙ୍କ ଅନୁଶାସନ ସର୍ବଦା ପ୍ରଭାବିତ କରିଆସିଛି । ଏବଂ ଏଥିପାଇଁ ମୁଁ ଯେତେବେଳେ ବି କହିଛି – ମୁଁ ଗୁଜରାଟରେ ଛୋଟ ଜାପାନ ସୃଷ୍ଟି କରିବାକୁ ଚାହେଁ, ତା ପଛରେ ଯେଉଁ ପ୍ରମୁଖ ଭାବନା ରହିଛି ତାହା ହେଉଛି, ଯେତେବେଳେ ମଧ୍ୟ ଜାପାନବାସୀ ଗୁଜରାଟ ଆସିବେ, ସେତେବେଳେ ସେମାନଙ୍କୁ ସେହିଭଳି ଉଷ୍ମତା ଅନୁଭବ କରନ୍ତୁ, ସେମାନଙ୍କୁ ସେହିଭଳି ଆତ୍ମୀୟତା ମିଳୁ । ମୋର ମନେ ଅଛି ଭାଇବ୍ରାଂଟ ଗୁଜରାଟ ସମ୍ମିଳନୀର ପ୍ରାରମ୍ଭରୁ ହିଁ ଜାପାନ ଏକ ଅଂଶୀଦାର ଦେଶ ଭାବେ ସେଥିରେ ସାମିଲ ହୋଇଥିଲା । ଆଜି ମଧ୍ୟ ଭାଇବ୍ରାଂଟ ଗୁଜରାଟ ସମ୍ମିଳନୀରେ ଯେତେ ବି ବଡ ବଡ ପ୍ରତିନିଧିମଣ୍ଡଳୀ ସାମିଲ ହୁଅନ୍ତି, ସେଥିମଧ୍ୟରୁ ଯେମିତି ହେଲେ ଗୋଟିଏ ଜାପାନରୁ ହିଁ ହୋଇଥିବ । ଏବଂ ଜାପାନ ଗୁଜରାଟ ମାଟିରେ ଏଠାକାର ଲୋକଙ୍କ ସାମର୍ଥ୍ୟ ଉପରେ ଯେଉଁ ବିଶ୍ୱାସ ଭରିଦେଇଛି, ତାହା ଦେଖି ଆମ ସମସ୍ତଙ୍କୁ ଆତ୍ମସନ୍ତୋଷ ମିଳିଥାଏ ।
ବନ୍ଧୁଗଣ,
ଜାପାନର ଅନେକଗୁଡିଏ କମ୍ପାନୀ ଆଜି ଗୁଜରାଟରେ କାର୍ଯ୍ୟ କରୁଛନ୍ତି । ମତେ କୁହାଯାଇଛି ଯେ ଏମାନଙ୍କ ସଂଖ୍ୟା ପ୍ରାୟ ୧୩୫ରୁ ବି ଅଧିକ । ଅଟୋମୋବାଇଲଠାରୁ ବ୍ୟାଙ୍କିଙ୍ଗ ପର୍ଯ୍ୟନ୍ତ, ନିର୍ମାଣଠାରୁ ଫାର୍ମା ପର୍ଯ୍ୟନ୍ତ ସବୁ କ୍ଷେତ୍ରର ଜାପାନୀ କମ୍ପାନୀ ଗୁଜରାଟରେ ନିଜର ମୂଳଦୁଆ ପ୍ରତିଷ୍ଠା କରିଛନ୍ତି । ସୁଜୁକି ମୋଟର୍ସ ହେଉ, ହୋଣ୍ଡା ମୋଟର ସାଇକେଲ ହେଉ, ମିତସୁବିସି ହେଉ, ଟୋୟୋଟା ହେଉ, ହିଟାଚି ହେଉ, ଏଭଳି ଅନେକ କମ୍ପାନି ଗୁଜରାଟରେ ନିର୍ମାଣ କାର୍ଯ୍ୟ ଜାରି ରଖିଛନ୍ତି । ଏବଂ ଏହା ଗୋଟିଏ ଭଲ କଥା ଯେ ଗୁଜରାଟର ଯୁବକମାନଙ୍କ ଦକ୍ଷତା ବିକାଶରେ ଏହି କମ୍ପାନୀଗୁଡିକ ବହୁ ମାତ୍ରାରେ ସହାୟକ ହେଉଛନ୍ତି । ଗୁଜରାଟରେ ତିନିଟି ଜାପାନ ଇଣ୍ଡିଆ ଇନଷ୍ଟିଚ୍ୟୁଟ ଫର ମାନୁଫାକଚରିଂ ପ୍ରତିବର୍ଷ ଶହ ଶହ ଯୁବକଙ୍କୁ ଦକ୍ଷତା ତାଲିମ ପ୍ରଦାନ କରୁଛି । ଗୁଜରାଟର ବୈଷୟିକ ବିଶ୍ୱବିଦ୍ୟାଳୟ ଏବଂ ଆଇଟିଆଇ ସହ ଅନେକ କମ୍ପାନି ଅନୁବନ୍ଧିତ ହୋଇଛନ୍ତି ।
ବନ୍ଧୁଗଣ,
ଜାପାନ ଏବଂ ଗୁଜରାଟର ସମ୍ପର୍କକୁ ନେଇ କହିବାକୁ ଏତେ କଥା ରହିଛି ଯେ ସେଥିପାଇଁ ସମୟ ମଧ୍ୟ କମ୍ ପଡିଯିବ । ଏହି ସମ୍ପର୍କ ଆତ୍ମୀୟତା, ସ୍ନେହ ଏବଂ ପରସ୍ପରର ଭାବନାକୁ, ପରସ୍ପରର ଆବଶ୍ୟକତାଗୁଡିକୁ ବୁଝିବା ଦ୍ୱାରା ଆହୁରି ସୁଦୃଢ ହୋଇଛି । ଗୁଜରାଟ ସର୍ବଦା ଜାପାନକୁ ବିଶେଷରୂପେ ଗୁରୁତ୍ୱ ଦେଇଆସିଛି । ଏବେ ଜେଟ୍ରୋ ଯେଉଁଭଳି ଏହି ଅହମଦାବାଦ ବ୍ୟବସାୟ ସହାୟତା କେନ୍ଦ୍ର ଖୋଲିଛି, ସେଥିରେ ଏକସଙ୍ଗରେ ୫ଟି କମ୍ପାନୀକୁ ପ୍ଲଗ ଆଣ୍ଡ ପ୍ଲେ କାର୍ଯ୍ୟସ୍ଥଳୀ ସୁବିଧା ଯୋଗାଇଦେବାର ବ୍ୟବସ୍ଥା ରହିଛି । ଜାପାନର ଅନେକ କମ୍ପାନୀ ଏହାର ଲାଭ ଉଠାଇଛନ୍ତି । ମୁଁ ଯେତେବେଳେ ବି ପୁରୁଣା ଦିନଗୁଡିକ ବିଷୟରେ ଚିନ୍ତା କରୁଛି, ସେତେବେଳେ ଅନୁଭବ କରୁଛି ଯେ ଗୁଜରାଟବାସୀ ମଧ୍ୟ କିଭଳି ଛୋଟ ଛୋଟ କଥା ଉପରେ ମଧ୍ୟ ଟିକିନିଖି ଧ୍ୟାନ ଦେଇଛନ୍ତି । ମୋର ମନେ ଅଛି, ମୁଖ୍ୟମନ୍ତ୍ରୀ ଭାବେ ମୁଁ ଥରେ ଜାପାନ ପ୍ରତିନିଧିମଣ୍ଡଳୀ ସହ କଥାବାର୍ତା କରୁଥିବା ସମୟରେ ଅନୌପଚାରିକ ଭାବେ ଗୋଟିଏ ବିଷୟ ଉଠିଥିଲା । ଏହି ବିଷୟଟି ଖୁବ୍ ରୋଚକ ଥିଲା । ଜାପାନବାସୀଙ୍କୁ ଗଲ୍ଫ ଖେଳିବା ବହୁତ ପସନ୍ଦ କିନ୍ତୁ ଗୁଜରାଟରେ ଗଲ୍ଫ କୋର୍ସର ସେତେଟା ପ୍ରଚଳନ ନଥିଲା । ଏହି ବୈଠକ ପରେ ବିଶେଷ ଭାବେ ପ୍ରୟାସ କରାଗଲା ଯେ ଗୁଜରାଟରେ ଯେପରି ଗଲ୍ଫ କୋର୍ସର ମଧ୍ୟ ବିସ୍ତାର ହେଉ । ମୁଁ ଅତ୍ୟନ୍ତ ଆନନ୍ଦିତ ଯେ ଆଜି ଗୁଜରାଟରେ ଅନେକ ଗଲ୍ଫ କୋର୍ସ ରହିଛି । ଏଭଳି ଅନେକ ରେସ୍ତୋରାଁ ମଧ୍ୟ ରହିଛି, ଜାପାନୀ ଖାଦ୍ୟ ପ୍ରସ୍ତୁତି ଯେଉଁମାନଙ୍କର ବିଶେଷତା । ଅର୍ଥାତ୍, ଗୁଜରାଟରେ ରହିବାବେଳେ ଜାପାନବାସୀଙ୍କ ମନରେ ନିଜ ଘରେ ରହିବାର ଭାବନା ସୃଷ୍ଟି ହେଉ ସେହିଭଳି ଏକ ପ୍ରୟାସ ରହିଆସିଛି । ଆମେ ଏହି ବିଷୟ ଉପରେ ଅନେକ କାମ କରିଛୁ ଯେ ଗୁଜରାଟରେ ଜାପାନୀ ଭାଷା କହୁଥିବା ଲୋକଙ୍କ ସଂଖ୍ୟା ମଧ୍ୟ ବୃଦ୍ଧି ପାଉ । ଆଜି ଗୁଜରାଟର ପେଶାଦାର ଦୁନିଆରେ ଏଭଳି ଅନେକ ଲୋକ ଅଛନ୍ତି ଯେଉଁମାନେ ସହଜରେ ଜାପାନୀ ଭାଷା କହିପାରନ୍ତି । ମତେ କୁହାଯାଇଛି ଯେ ରାଜ୍ୟର ଏକ ବିଶ୍ୱବିଦ୍ୟାଳୟ, ଜାପାନୀ ଭାଷା ପ୍ରଶିକ୍ଷଣ ଦେବା ପାଇଁ ଏକ ପାଠ୍ୟକ୍ରମ ମଧ୍ୟ ଆରମ୍ଭ କରିବାକୁ ଯାଉଛି । ଏହା ଏକ ଉତମ ପ୍ରାରମ୍ଭ ହେବ ।
ମୁଁ ତ ଚାହିଁବି ଯେ ଗୁଜରାଟରେ ଜାପାନର ବିଦ୍ୟାଳୟ ବ୍ୟବସ୍ଥାର ଏକ ମଡେଲ ମଧ୍ୟ ତିଆରି ହେଉ ।
ଆଧୁନିକତା ଓ ନୈତିକ ମୂଲ୍ୟବୋଧକୁ ଗୁରୁତ୍ୱ ଦିଆଯାଉଥିବା ଜାପାନର ବିଦ୍ୟାଳୟ ବ୍ୟବସ୍ଥାର ମୁଁ ଜଣେ ଖୁବ ବଡ ପ୍ରଶଂସକ । ମତେ ଜାପାନର ତାଇମେଇ ସ୍କୁଲକୁ ଯିବାର ଅବସର ମିଳିଥିଲା ଏବଂ ସେଠାରେ ବିତାଇଥିବା ସମସ୍ତ ମୁହୁର୍ତ ମୋ ପାଇଁ ସ୍ମରଣୀୟ । ମୁଁ ଏକଥା କହିପାରିବି ଯେ ସେହି ସ୍କୁଲର ପିଲାମାନଙ୍କ ସହ କଥାବାର୍ତା, ମୋ ପାଇଁ ଆଜି ମଧ୍ୟ ଏକ ଅମୂଲ୍ୟ ମୂହୁର୍ତ ହୋଇ ରହିଛି ।
ବନ୍ଧୁଗଣ,
ଆମ ନିକଟରେ ବହୁ ପ୍ରାଚୀନ ସାଂସ୍କୃତିକ ସମ୍ପର୍କର ସୁଦୃଢ ବିଶ୍ୱାସ ଏବଂ ଭବିଷ୍ୟତ ପାଇଁ ସମାନ ଲକ୍ଷ୍ୟ ମଧ୍ୟ ରହିଛି । ଏହି ଆଧାରରେ ଗତ କିଛିବର୍ଷ ଧରି ଉଭୟ ଦେଶ ନିଜର ସ୍ୱତନ୍ତ୍ର ରଣନୈତିକ ଏବଂ ବିଶ୍ୱ ଭାଗିଦାରୀକୁ ନିରନ୍ତର ଭାବେ ସୁଦୃଢ କରିଚାଲିଛୁ । ଏଥିପାଇଁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ ମୁଁ ଜାପାନ-ପ୍ଲସର ଏକ ବିଶେଷ ବ୍ୟବସ୍ଥା ମଧ୍ୟ କରିଛି । ଜାପାନର ପୂର୍ବ ପ୍ରଧାନମନ୍ତ୍ରୀ ଏବଂ ମୋର ବନ୍ଧୁ ଶ୍ରୀମାନ ସିଞ୍ଜୋ ଆବେ ଯେତେବେଳେ ଗୁଜରାଟ ଆସିଥିଲେ, ସେତେବେଳେ ଭାରତ-ଜାପାନ ସମ୍ପର୍କକୁ ନୂଆ ଗତି ମିଳିଥିଲା । ବୁଲେଟ ଟ୍ରେନ୍ ପ୍ରକଳ୍ପର କାମ ଆରମ୍ଭ ହେବାକୁ ନେଇ ସେ ବେଶ ଉତ୍ସାହିତ ଥିଲେ । ଆଜି ମଧ୍ୟ ତାଙ୍କ ସହ ଯେତେବେଳେ କଥାବାର୍ତା ହୁଏ, ସେତେବେଳେ ସେ ନିଜର ଗୁଜରାଟ ଗସ୍ତକୁ ଯେମିତି ହେଲେ ବି ମନେ ପକାନ୍ତି । ଜାପାନର ବର୍ତମାନର ପ୍ରଧାନମନ୍ତ୍ରୀ ଶ୍ରୀମାନ ୟୋସିହିଦେ ସୁଗା ମଧ୍ୟ ଜଣେ ପରିପକ୍ୱ ବ୍ୟକ୍ତିତ୍ୱ । ପ୍ରଧାନମନ୍ତ୍ରୀ ସୁଗା ଏବଂ ମୋର ଏହି ବିଶ୍ୱାସ ଯେ କୋଭିଡ ମହାମାରୀର ଏହି ସମୟରେ ଭାରତ ଓ ଜାପାନର ମୈତ୍ରୀ, ଆମର ଭାଗିଦାରୀ, ବୈଶ୍ୱିକ ସ୍ଥିରତା ଏବଂ ସମୃଦ୍ଧି ନିମନ୍ତେ ଆହୁରି ଅଧିକ ପ୍ରାସଙ୍ଗିକ ହୋଇଉଠିଛି । ଆଜି ଆମ ସମ୍ମୁଖରେ ଯେତେବେଳେ ଅନେକ ବୈଶ୍ୱିକ ଆହ୍ୱାନ ବିଦ୍ୟମାନ, ସେତେବେଳେ ଆମର ଏହି ମୈତ୍ରୀ, ଆମର ଏହି ସମ୍ପର୍କ ଦିନକୁ ଦିନ ଆହୁରି ସୁଦୃଢ ହେଉ, ଏହା ହିଁ ସମୟର ଆହ୍ୱାନ ଅଟେ । ଏବଂ କାଇଜେନ୍ ଏକାଡେମୀ ଭଳି ପ୍ରୟାସ ନିଶ୍ଚିତ ରୂପରେ ଏହାର ଅତି ସୁନ୍ଦର ପ୍ରତିଫଳନ ଅଟେ ।
ମୁଁ ଚାହିଁବି ଯେ କାଇଜେନ୍ ଏକାଡେମୀ ଜାପାନର କାର୍ଯ୍ୟ-ସଂସ୍କୃତିକୁ ଭାରତରେ ପ୍ରଚାର ପ୍ରସାର କରୁ, ଏବଂ ଜାପାନ ଓ ଭାରତ ମଧ୍ୟରେ ବାଣିଜ୍ୟିକ ସମ୍ପର୍କ ବୃଦ୍ଧି କରୁ । ଏହି ଦିଗରେ ପୂର୍ବରୁ ଯେଉଁ ପ୍ରୟାସ ଜାରି ରହିଛି, ଆମକୁ ସେସବୁକୁ ମଧ୍ୟ ନୂଆ ଗତି ପ୍ରଦାନ କରିବାକୁ ପଡିବ । ଠିକ୍ ଯେପରି ଗୁଜରାଟ ବିଶ୍ୱବିଦ୍ୟାଳୟ ଏବଂ ଓସାକାର ଓତେମୋନ୍ ଗାଇକୁନ୍ ବିଶ୍ୱବିଦ୍ୟାଳୟ ମଧ୍ୟରେ ଭାରତ-ଜାପାନ୍ ଛାତ୍ର ଆଦାନ ପ୍ରଦାନ କାର୍ଯ୍ୟକ୍ରମ ରହିଛି । ଏହି କାର୍ଯ୍ୟକ୍ରମ ଦୀର୍ଘ ୫ ଦଶନ୍ଧି ଧରି ଆମର ସମ୍ପର୍କକୁ ସୁଦୃଢ କରିଆସୁଛି । ଏହାକୁ ଆହୁରି ଅଧିକ ପରିବ୍ୟାପ୍ତ କରାଯାଇପାରିବ । ଦୁଇ ଦେଶର ଅନ୍ୟାନ୍ୟ ସଂସ୍ଥାଗୁଡିକ ମଧ୍ୟରେ ବି ଏହିଭଳି ଭାଗିଦାରୀ ଆରମ୍ଭ କରାଯାଇପାରିବ । ମୋର ବିଶ୍ୱାସ ଅଛି ଯେ, ଆମର ଏହି ପ୍ରୟାସ ଏହିଭଳି ନିରନ୍ତର ଭାବେ ଆଗକୁ ବଢୁ, ଏବଂ ଭାରତ-ଜାପାନ ଏକାଠି ହୋଇ ବିକାଶର ନୂତନ ଶିଖର ହାସଲ କରନ୍ତୁ । ମୁଁ ଆଜି ଏହି କାର୍ଯ୍ୟକ୍ରମ ମାଧ୍ୟମରେ, ଜାପାନକୁ, ଜାପାନର ଲୋକମାନଙ୍କୁ ଟୋକିଓ ଅଲିମ୍ପିକ୍ସର ଆୟୋଜନ ପାଇଁ ମଧ୍ୟ ଅନେକ ଅନେକ ଶୁଭକାମନା ଜଣାଉଛି ।
ଆପଣ ସମସ୍ତଙ୍କୁ ବହୁତ ବହୁତ ଧନ୍ୟବାଦ ।
