ମହାମାନ୍ୟ ରାଷ୍ଟ୍ରପତି ଇରଫାନ ଅଲ୍ଲୀ
ପ୍ରଧାନମନ୍ତ୍ରୀ ମାର୍କ ଫିଲିପ୍ସ
ଉପରାଷ୍ଟ୍ରପତି ଭାରତ ଜଗଦେଓ
ପୂର୍ବତନ ରାଷ୍ଟ୍ରପତି ଡୋନାଲ୍ଡ ରାମୋଟାର
ଗୁଆନା କ୍ୟାବିନେଟର ସଦସ୍ୟମାନେ
ଭାରତ-ଗୁଆନା ସମୁଦାୟର ସଦସ୍ୟମାନେ
ବନ୍ଧୁଗଣ!
ନମସ୍କାର!
ସୀତାରାମ!
ଆଜି ମୁଁ ଆପଣମାନଙ୍କ ସହ ଥିବାରୁ ବହୁତ ଖୁସି । ପ୍ରଥମତ ଆମ ସହ ଯୋଗ ଦେଇଥିବାରୁ ରାଷ୍ଟ୍ରପତି ଇରଫାନ ଅଲ୍ଲୀଙ୍କୁ ଧନ୍ୟବାଦ । ମୁଁ ଆସିବା ଦିନରୁ ମିଳୁଥିବା ଭଲପାଇବା ଓ ସ୍ନେହରେ ମୁଁ ଅଭିଭୂତ । ରାଷ୍ଟ୍ରପତି ଅଲ୍ଲୀ ତାଙ୍କର ଘରର ଦ୍ୱାର ମୋ ପାଇଁ ଖୋଲିଥିବାରୁ ଧନ୍ୟବାଦ । ଦୟାଳୁ ଭାବନା ଓ ଉତ୍ସାହ ପାଇଁ ତାଙ୍କ ପରିବାରଙ୍କୁ ଧନ୍ୟବାଦ । ଆତିଥେୟତାର ଆତ୍ମା ଆମ ସଂସ୍କୃତିର ହୃଦୟରେ ରହିଛି । ବିଗତ ଦୁଇ ଦିନ ଧରି ମୁଁ ତାହା ଅନୁଭବ କରିପାରୁଛି । ରାଷ୍ଟ୍ରପତି ଅଲ୍ଲୀ ଏବଂ ତାଙ୍କ ଜେଜେ ମା’ଙ୍କ ସହ ଆମେ ଏକ ବୃକ୍ଷରୋପଣ କରିଛୁ । ଏହା ‘ଏକ ପେଡ଼୍ ମା କେ ନାମ୍’ ତଥା ‘ମାଆଙ୍କ ନାମରେ ଗୋଟିଏ ଗଛ’ ଅଭିଯାନର ଅଂଶବିଶେଷ । ଏହା ଏକ ଆବେଗିକ ମୁହୂର୍ତ୍ତ ଥିଲା ଯାହା କି ସର୍ବଦା ମୋର ମନେ ରହିବ ।
ବନ୍ଧୁଗଣ,
ଗୁୟାନାର ସର୍ବୋଚ୍ଚ ଜାତୀୟ ପୁରସ୍କାର ‘ଅର୍ଡର ଅଫ ଏକ୍ସିଲେନ୍ସ’ ଗ୍ରହଣ କରି ମୁଁ ଅତ୍ୟନ୍ତ ସମ୍ମାନିତ ମନେ କରୁଛି । ଏହି ସଦଭାବନା ଲାଗି ମୁଁ ଗୁୟାନାର ଜନସାଧାରଣଙ୍କୁ ଧନ୍ୟବାଦ ଜଣାଉଛି । ୧୪୦ କୋଟି ଭାରତୀୟଙ୍କ ପାଇଁ ଏହା ଏକ ସମ୍ମାନ । ୩ ଲକ୍ଷ ଭାରତ-ଗୁୟାନା ସମୁଦାୟ ଏବଂ ଗୁୟାନାର ବିକାଶରେ ସେମାନେ ଭୂମିକାକୁ ଏହି ସମ୍ମାନ ସ୍ୱୀକୃତି ଦେଉଛି ।
ବନ୍ଧୁଗଣ,
ଦୁଇ ଦଶନ୍ଧି ତଳେ ଆପଣଙ୍କ ଦେଶ ଭ୍ରମଣ କରିଥିବାର ସ୍ମୃତି ଏବେ ବି ମୋ ମନରେ ଉଜ୍ଜୀବିତ ରହିଛି । ସେତେବେଳେ ମୁଁ କୌଣସି ସରକାରୀ ପଦବିରେ ନ ଥିଲି । ମୁଁ ଜଣେ ପର୍ଯ୍ୟଟକ ଭାବେ ସମ୍ପୂର୍ଣ୍ଣ ଜିଜ୍ଞାସାରେ ଗୁୟାନା ଆସିଥିଲି । ଏବେ ଅନେକ ନଦୀର ଏହି ଦେଶକୁ ମୁଁ ଭାରତର ପ୍ରଧାନମନ୍ତ୍ରୀ ଭାବେ ପୁଣି ଆସିଛି । ସେ ସମୟ ଏବଂ ବର୍ତ୍ତମାନ ମଧ୍ୟରେ ଅନେକ କିଛି ପରିବର୍ତ୍ତନ ହୋଇଛି । କିନ୍ତୁ ମୋ ଗୁୟାନା ଭାଇ ଓ ଭଉଣୀମାନଙ୍କ ଭଲ ପାଇବା ଓ ସ୍ନେହ ସେହିପରି ରହିଛି! ମୋ ଅନୁଭବ ଏହା ସିଦ୍ଧ କରୁଛି କି ଜଣେ ଭାରତୀୟକୁ ଆପଣ ଭାରତ ବାହାରକୁ ନେଇଯାଇପାରନ୍ତି, କିନ୍ତୁ ଜଣେ ଭାରତୀୟ ପାଖରୁ ଭାରତକୁ ନେଇପାରିବେନି ।
ବନ୍ଧୁଗଣ,
ଆଜି ମୁଁ ଭାରତ ଆରାଇଭାଲ ସ୍ମାରକ ପରିଦର୍ଶନ କରିଛି । ପ୍ରାୟ ଦୁଇ ଶତାବ୍ଦୀ ପୂର୍ବେ ଆପଣଙ୍କ ପୂର୍ବପୁରୁଷ ମାନଙ୍କ କଷ୍ଟଦାୟକ ଯାତ୍ରାକୁ ଏହା ଜୀବନ୍ତ କରୁଛି । ସେମାନେ ଭାରତର ଭିନ୍ନ ଭିନ୍ନ ସ୍ଥାନରୁ ଆସିଥିଲେ । ସେମାନେ ସେମାନଙ୍କ ସହ ବିବିଧ ସଂସ୍କୃତି, ପରମ୍ପରା ଓ ଭାଷା ନେଇ ଆସିଥିଲେ । କାଳାଦିକ୍ରମେ ଏହି ନୂତନ ଭୂମିକୁ ସେମାନେ ନିଜର ଘର ଭାବେ ବାଛିନେଲେ । ଆଜି ସେହି ଭାଷା, କାହାଣୀ ଓ ପରମ୍ପରା ସମୃଦ୍ଧ ଗୁୟାନା ସଂସ୍କୃତିର ଅଂଶବିଶେଷ ପାଲଟିଛି ଭାରତ-ଗୁୟାନା ସମୁଦାୟର ଏହି ଉତ୍ସାହକୁ ମୁଁ ସାଲ୍ୟୁଟ କରୁଛି । ଆପଣମାନେ ସ୍ୱାଧୀନତା ଓ ଗଣତନ୍ତ୍ର ପାଇଁ ଲଢ଼ିଥିଲେ । ଗୁୟାନାକୁ ଦ୍ରୁତି ଅଭିବୃଦ୍ଧିଶୀଳ ଅର୍ଥନୀତି ମଧ୍ୟରୁ ଅନ୍ୟତମ ଦେଶରେ ପରିଣତ କରିବାକୁ ଆପଣମାନେ ଉଦ୍ୟମ କରିଛନ୍ତି । ବିନମ୍ର ପ୍ରାରମ୍ଭରୁ ଆପଣ ଶୀର୍ଷରେ ପହଞ୍ଚିପାରିଛନ୍ତି । ଶ୍ରୀ ଛେଦି ଜଗନ ଏକଦା କହିଥିଲେ, “ଜଣେ କିଭଳି ଭାବେ ଜନ୍ମ ହୋଇଛି ତାହା ଗୁରୁତ୍ୱପୂର୍ଣ୍ଣ ନୁହେଁ, କିନ୍ତୁ ସେମାନେ କଣ ହେବାକୁ ଚାହୁଁଛନ୍ତି ତାହା ଗୁରୁତ୍ୱ ରଖେ” । ସେ ମଧ୍ୟ ଏହି ନୀତିରେ ବଂଚିଥିଲେ । ଏକ ଶ୍ରମିକ ପରିବାରର ପୁଅ ହୋଇ ମଧ୍ୟ ସେ ବିଶ୍ୱସ୍ତରୀୟ ନେତା ହୋଇପାରିଥିଲେ । ରାଷ୍ଟ୍ରପତି ଇରଫାନ ଅଲ୍ଲୀ, ଉପରାଷ୍ଟ୍ରପତି ଭରତ ଜଗଦେଓ ଏବଂ ପୂର୍ବତନ ରାଷ୍ଟ୍ରପତି ଡୋନାଲ୍ଡ ରାମୋଟାର, ଏମାନେ ସମସ୍ତେ ଭାରତ-ଗୁୟାନା ସମୁଦାୟର ରାଷ୍ଟ୍ରଦୂତ । ଭାରତ-ଗୁୟାନା ବୁଦ୍ଧିଜୀବୀଙ୍କ ମଧ୍ୟରେ ଅନ୍ୟତମ ଯୋଶେଫ ରୁହୋମନ, ପ୍ରଥମ ଭାରତ-ଗୁୟାନା ସମୁଦାୟର କମି ରାମଚରିତାର ଲାଲ୍ଲା, ପ୍ରସିଦ୍ଧ ମହିଳା କବି ଶାନା ୟାରଦାନ, ଏଭଳି ଅନେକ ଇଣ୍ଡୋ-ଗୁୟାନିଜ ବ୍ୟକ୍ତ ଶିକ୍ଷା, କଳା, ସଂଗୀତ ଏବଂ ଔଷଧ କ୍ଷେତ୍ର ଉପରେ ପ୍ରଭାବ ପକାଇ ପାରିଛନ୍ତି ।
ବନ୍ଧୁଗଣ,
ଆମର ସାମଞ୍ଜସ୍ୟତା ଆମର ବନ୍ଧୁତ୍ୱରେ ମୂଳଦୁଆ ପକାଇଛି । ବିଶେଷ କରି ତିନୋଟି ପ୍ରସଙ୍ଗ ଭାରତ ଓ ଗୁୟାନାକୁ ଗଭୀର ଭାବେ ଯୋଡ଼ିଛି । ସଂସ୍କୃତି, ଖାଦ୍ୟ ଏବଂ କ୍ରିକେଟ । ମୁଁ ନିଶ୍ଚିତ, ଏଇ କିଛି ସପ୍ତାହ ତଳେ ଆପଣମାନେ ଦୀପାବଳି ପାଳନ କରିଥିବେ । ଆଗାମୀ କିଛି ମାସ ମଧ୍ୟରେ ଭାରତ ଯେତେବେଳେ ହୋଲି ପାଳନ କରିବ, ଗୁୟାନା ଫଗୱା ପାଳନ କରିବ । ଚଳିତ ବର୍ଷ ଦୀପାବଳି ସ୍ୱତନ୍ତ୍ର ଥିଲା, କାରଣ ୫୦୦ ବର୍ଷ ପରେ ରାମଲାଲା ଅଯୋଧ୍ୟାକୁ ଫେରିଛନ୍ତି । ଭାରତର ଲୋକମାନେ ଏହା ମନେ ରଖିଛନ୍ତି ଯେ, ଅଯୋଧ୍ୟାର ରାମମନ୍ଦିର ନିର୍ମାଣ ପାଇଁ ଗୁୟାନାରୁ ପବିତ୍ର ଜଳ ଓ ଶିଳା ପଠାଯାଇଥିଲା । ଦୁଇ ଦେଶକୁ ସମୁଦ୍ର ଭାଗ କରୁଥିଲେ ମଧ୍ୟ ତୁମର ସାଂସ୍କୃତିକ ସମ୍ପର୍କ ଭାରତ ମାତା ସହ ଗଭୀର । ଆଜି ଯେତେବେଳେ ମୁଁ ଆର୍ଯ୍ୟ ସମାଜ ସ୍ମାରକ ଓ ସରସ୍ୱତୀ ବିଦ୍ୟା ନିକେତନ ସ୍କୁଲ ଭ୍ରମଣ କଲି ଏହା ଅନୁଭବ କରିପାରିଲି । ଉଭୟ ଭାରତ ଓ ଗୁୟାନା ଆମର ସମୃଦ୍ଧ ଓ ବିବିଧ ସଂସ୍କୃତିକୁ ନେଇ ଗର୍ବିତ । ଆମେ ବିବିଧତା ଦେଖୁଛୁ ଯାହାକି କେବଳ କହିବା ପାଇଁ ନୁହେଁ ବରଂ ଉତ୍ସବରେ ପରିଣତ । ଆମ ଦେଶମାନେ ଏହା ପ୍ରମାଣ କରିଛନ୍ତି କିପରି ଆମର ସାଂସ୍କୃତିକ ବିବିଧତା ଆମର ଦୃଢ଼ ଶକ୍ତି ।
ବନ୍ଧୁଗଣ,
ଯେଉଁଠାକୁ ଭାରତୀୟମାନେ ଯାଆନ୍ତି ସେମାନେ ଏକ ଗୁରୁତ୍ୱପୂର୍ଣ୍ଣ ଜିନିଷ ସେମାନଙ୍କ ସହ ନେଇ ଯାଇଥାନ୍ତି । ତାହା ହେଲା ଖାଦ୍ୟ! ଇଣ୍ଡୋ-ଗୁୟାନିଜି ସମୁଦାୟର ମଧ୍ୟ ଏକ ସ୍ୱତନ୍ତ୍ର ଖାଦ୍ୟ ପରମ୍ପରା ରହିଛି ଯାହାକି ଉଭୟ ଭାରତୀୟ ଓ ଗୁୟାନିଜି ଜିନିଷରେ ପ୍ରସ୍ତୁତ । ମୁଁ ଜାଣିଛି ଡାଲ-ପୁରୀ ଏଠାରେ ଲୋକପ୍ରିୟ । ରାଷ୍ଟ୍ରପତି ଅଲ୍ଲୀଙ୍କ ଘରେ ମୁଁ କରିଥିବା ସାତଟି ତରକାରୀର ଭୋଜନ ଅତ୍ୟନ୍ତ ସୁସ୍ୱାଦୁ ଥିଲା । ଏହା ଏକ ସ୍ୱତନ୍ତ୍ର ସ୍ମୃତି ଭାବେ ମୋର ରହିବ ।
ବନ୍ଧୁଗଣ,
କ୍ରିକେଟ ପ୍ରତି ଥିବା ଭଲ ପାଇବା ମଧ୍ୟ ଆମ ଦୁଇ ଦେଶକୁ ସଂଯୋଗ କରୁଛି । ଏହା କେବଳ ଏକ କ୍ରୀଡ଼ା ନୁହେଁ । ଏହା ଏକ ଜୀବନଶୈଳୀ ଯାହାକି ରାଷ୍ଟ୍ରୀୟ ପରିଚୟ ସହ ଯୋଡ଼ି ହୋଇ ରହିଛି । ଗୁୟାନାର ପ୍ରୋଭିଡେନ୍ସ ନ୍ୟାସନାଲ କ୍ରିକେଟ ଷ୍ଟାଡିୟମ ଆମ ବନ୍ଧୁତ୍ୱର ଏକ ପ୍ରତୀକ ଭାବେ ଛିଡ଼ା ହୋଇଛି । କହ୍ନେଇ, କାଳୀଚରଣ ଏବଂ ଚନ୍ଦ୍ରପଲ ଆଦି ନାମ ଗୁଡ଼ିକ ଭାରତରେ ବେଶ୍ ଜଣାଶୁଣା । କ୍ଲାଇବ ଲଏଡ଼ ଏବଂ ତାଙ୍କ ଟିମ୍ ଅନେକ ପିଢ଼ିର ପସନ୍ଦ ଥିଲା । ଏହି ଅଞ୍ଚଳର ଯୁବ ଖେଳାଳିମାନଙ୍କର ଭାରତରେ ଅନେକ ପ୍ରଶଂସକ ଅଛନ୍ତି । ସେହି ମହାନ୍ କ୍ରିକେଟରମାନଙ୍କ ମଧ୍ୟ କେତେକ ଏବେ ଆମ ସହ ଅଛନ୍ତି । ଚଳିତ ବର୍ଷ ଆପଣମାନେ ଆୟୋଜନ କରିଥିବା ଟି-୨୦ ବିଶ୍ୱକପ୍କୁ ଆମର ଅନେକ କ୍ରିକେଟ ପ୍ରଶଂସକ ଉପଭୋଗ କରିଛନ୍ତି । ‘ନୀଳ ଜର୍ସିର ଦଳ’ ଗୁୟାନାରେ ଖେଳିବା ବେଳେ ଆପଣମାନ ଯେଉଁ ଚିୟର୍ସ ଦେଉଥିଲେ ତାହା ଭାରତରେ ମଧ୍ୟ ଶୁଭାଯାଉଥିଲା ।
ବନ୍ଧୁଗଣ,
ଗୁୟାନାର ସଂସଦକୁ ଉଦବୋଧନ ଦେବାର ସମ୍ମାନ ମୋତେ ଆଜି ମିଳିଥିଲା । ଗଣତନ୍ତ୍ରର ସୃଷ୍ଟି ହୋଇଥିବା ଦେଶରୁ ଆସିଥିବାରୁ କାରିବିୟାନ ଅଞ୍ଚଳର ଅନ୍ୟତମ ଉତ୍ସାହୀ ଗଣତନ୍ତ୍ରରେ ମୁଁ ଆତ୍ମାର ସମ୍ପର୍କ ଅନୁଭବ କରିପାରିଛି । ଆମ ଇତିହାସର ସମ୍ପର୍କ ଆମକୁ ରଜ୍ଜୁରେ ବାନ୍ଧି ରଖିଛି । ଔପନିବେଶବାଦ ବିରୋଧରେ ସଂଗ୍ରାମ, ଲୋକତାନ୍ତ୍ରିକ ମୂଲ୍ୟବୋଧ ପ୍ରତି ଭଲପାଇବା ଏବଂ ବିବିଧତା ପ୍ରତି ସମ୍ମାନ ଆଦି କ୍ଷେତ୍ରରେ ଆମ ମଧ୍ୟରେ ସାମଞ୍ଜସ୍ୟତା ରଖିଛି । ଆମେ ମଧ୍ୟ ଏପରିକ ଏକ ସଂଯୋଗିତ ଭବିଷ୍ୟତ ଚାହୁଁଛୁ । ଅଭିବୃଦ୍ଧି ଓ ବିକାଶର ଆକାଂକ୍ଷା, ଅର୍ଥନୀତି ଓ ଇକୋଲୋଜି ପାଇଁ ପ୍ରତିବଦ୍ଧତା ଏବଂ ସମାବେଶୀ ବିଶ୍ୱ ନୀତି ପ୍ରତି ବିଶ୍ୱାସ ଏଥିରେ ଅନ୍ତର୍ଗତ ।
ବନ୍ଧୁଗଣ,
ମୁଁ ଜାଣେ ଗୁୟାନାର ଜନସାଧାରଣ ଭାରତର ଶୁଭେଚ୍ଛୁ । ଭାରତରେ ହେଉଥିବା ବିକାଶ ଉପରେ ଆପଣମାନେ ଭଲ ଭାବେ ଦୃଷ୍ଟି ରଖିଛନ୍ତି । ବିଗତ ଏକ ଦଶନ୍ଧି ମଧ୍ୟରେ ଭାରତର ଯାତ୍ରା ଗତି ଓ ଶତତ ବିକାଶର ଏକ ସମାହାର । ମାତ୍ର ଦଶ ବର୍ଷ ମଧ୍ୟରେ ଭାରତ ଦଶମ ବୃହତ୍ତମ ଅର୍ଥନୀତିରୁ ପଞ୍ଚମ ବୃହତ ଅର୍ଥନୀତିକୁ ଉନ୍ନୀତ ହୋଇପାରିଛି । ଅତିଶୀଘ୍ର ଆମେ ତୃତୀୟ ବୃହତ୍ତମ ଅର୍ଥନୀତି ହେବୁ । ଆମ ଯୁବପିଢ଼ି ଆମକୁ ବିଶ୍ୱରେ ତୃତୀୟ ବୃହତ୍ତମ ଷ୍ଟାର୍ଟ-ଅପ ଇକୋସିଷ୍ଟମ କରିପାରିଛନ୍ତି । ଭାରତ ଇ-କମର୍ସ, ଏଆଇ, ଫିନଟେକ୍, କୃଷି, ଟେକ୍ନୋଲୋଜି ଏବଂ ଏପରି ଅନେକ କ୍ଷେତ୍ରରେ ବିଶ୍ୱସ୍ତରୀୟ ହବ୍ ହୋଇପାରିଛି । ଆମେ ମଙ୍ଗଳ ଓ ଚନ୍ଦ୍ରରେ ପହଞ୍ଚିପାରିଛୁ । ହାଇ-ୱେରୁ ଆଇ-ୱେ, ଏୟାରୱେଜ ରୁ ରେଲୱେ ପର୍ଯ୍ୟନ୍ତ ଆମେ ସ୍ୱଦେଶୀ ଜ୍ଞାନକୌଶଳ ବ୍ୟବହାର କରୁଛୁ । ଆମର ସେବା କ୍ଷେତ୍ର ବେଶ୍ ଦୃଢ଼ । ନିର୍ମାଣ କ୍ଷେତ୍ରରେ ଏବେ ମଧ୍ୟ ଆମେ ଦୃଢ଼ ହେଉଛୁ । ଭାରତ ଏବେ ବିଶ୍ୱରେ ଦ୍ୱିତୀୟ ବୃହତ୍ତମ ମୋବାଇଲ ଫୋନ୍ ନିର୍ମାତା ହୋଇପାରିଛି ।
ବନ୍ଧୁଗଣ,
ଭାରତର ଅଭିବୃଦ୍ଧି କେବଳ ପ୍ରେରଣାଦାୟକ ନୁହେଁ ବରଂ ସମାବେଶୀ । ଆମର ଡିଜିଟାଲ ପବ୍ଲିକ ଇନଫ୍ରାଷ୍ଟ୍ରକଚର ଗରିବଙ୍କୁ ସଶକ୍ତ କରୁଛି । ଆମେ ଲୋକମାନଙ୍କ ପାଇଁ ୫୦୦ ନିୟୁତ ବ୍ୟାଙ୍କ ଆକାଉଣ୍ଟ ଖୋଲିପାରିଛୁ । ଆବଶ୍ୟକ ଥିବା ଲୋକମାନଙ୍କ ପାଇଁ ଆମେ ୩୦ ନିୟୁତରୁ ଅଧିକ ଘଣ ନିର୍ମାଣ କରିଛୁ । ମାତ୍ର ଗୋଟିଏ ଦଶନ୍ଧିରେ ଆମେ ୨୫୦ ନିୟୁତ ଲୋକଙ୍କୁ ଦାରିଦ୍ର୍ୟରୁ ବାହାର କରିପାରିଛୁ । ଏପରିକି ଗରିବମାନଙ୍କ ମଧ୍ୟରେ ଆମ ଯୋଜନା ମହିଳାମାନଙ୍କୁ ବେଶୀ ଫାଇଦା ଦେଇଛି । ଲକ୍ଷ ଲକ୍ଷ ମହିଳା ଉଦ୍ୟୋଗୀରେ ପରିଣତ ହୋଇ ନିଯୁକ୍ତି ଓ ସୁଯୋଗ ସୃଷ୍ଟି କରୁଛନ୍ତି ।
ବନ୍ଧୁଗଣ,
ଯେତେବେଳେ ଏହି ବ୍ୟାପକ ଅଭିବୃଦ୍ଧି ହେଉଛି, ଆମେ ସ୍ଥିରତା ଉପରେ ମଧ୍ୟ ଗୁରୁତ୍ୱ ଦେଉଛୁ । ମାତ୍ର ଗୋଟିଏ ଦଶନ୍ଧିରେ ଆମ ସୌରଶକ୍ତି କ୍ଷମତା ୩୦ ଗୁଣା ହୋଇପାରିଛି! କଳ୍ପନା କରିପାରୁଛନ୍ତି କି! ପେଟ୍ରୋଲରେ ୨୦ ପ୍ରତିଶତ ଇଥାନଲ ବ୍ଲେଣ୍ଡିଙ୍ଗ ସହ ଆମେ ସବୁଜ ଗତିଶୀଳତା ଆଡ଼କୁ ଆଗେଇ ଚାଲିଛୁ । ଜଳବାୟୁ ପରିବର୍ତ୍ତନର ମୁକାବିଲା କ୍ଷେତ୍ରରେ ଆନ୍ତର୍ଜାତିକ ସ୍ତରରେ ଅନେକ ପଦକ୍ଷେପରେ ଆମେ ମଧ୍ୟ କେନ୍ଦ୍ରୀୟ ଭୂମିକା ନେଇପାରିଛୁ । ଗ୍ଲୋବାଲ ସାଉଥକୁ ସଶକ୍ତ କରିବା ଦିଗରେ ଆନ୍ତର୍ଜାତିକ ସୌର ମେଣ୍ଟ,ବୈଶ୍ୱିକ ଜୈବିକ ମେଣ୍ଟ, ବିପର୍ଯ୍ୟୟ ନିରୋଧୀ ଢାଞ୍ଚା ପାଇଁ ମେଣ୍ଟ ଆଦି ଅନେକ କ୍ଷେତ୍ରକୁ ଆମେ ବିଶେଷ ଗୁରୁତ୍ୱ ଦେଇଛୁ । ଇଣ୍ଟରନ୍ୟାସନାଲ ବିଗ୍ କ୍ୟାଟ ଆଲିଆନ୍ସରେ ମଧ୍ୟ ଆମେ ଅଗ୍ରସର ହୋଇଛୁ । ଜାଗୁଆର ପାଇଁ ପରିଚିତ ଗୁୟାନା ଏଥିରୁ ଫାଇଦା ପାଇପାରିବ ।
ବନ୍ଧୁଗଣ,
ଗତବର୍ଷ ପ୍ରବାସୀ ଭାରତୀୟ ଦିବସରେ ମୁଖ୍ୟ ଅତିଥି ଭାବେ ରାଷ୍ଟ୍ରପତି ଇରଫାନ ଅଲ୍ଲୀଙ୍କୁ ଆମେ ଆତିଥେୟତା ପ୍ରଦାନ କରିଥିଲୁ । ଆମେ ମଧ୍ୟ ପ୍ରଧାନମନ୍ତ୍ରୀ ମାର୍କ ଫିଲିପ୍ସ ଓ ଉପରାଷ୍ଟ୍ରପତି ଭରତ ଜଗଦେଓଙ୍କୁ ଭାରତରେ ସ୍ୱାଗତ କରିଥିଲୁ । ଅନେକ କ୍ଷେତ୍ରରେ ଦ୍ୱିପାକ୍ଷିକ ସହଯୋଗ ପାଇଁ ଆମେ ମିଳିମିଶି କାମ କରିଛୁ । ଏହି ସହଯୋଗକୁ ଶକ୍ତିରୁ ଉଦ୍ୟୋଗ, ଆୟୁର୍ବେଦରୁ କୃଷି, ମୌଳିକ ଢାଞ୍ଚାରୁ ନବାଚାର, ସ୍ୱାସ୍ଥ୍ୟସେବାରୁ ମାନବ ସମ୍ବଳ, ଅନ୍ନଦାତାରୁ ବିକାଶ ଆଦି କ୍ଷେତ୍ରରେ ବୃଦ୍ଧି କରିବାକୁ ଆମେ ଆଜି ସହମତ ହୋଇଛୁ । ଆମ ସହଭାଗିତା ବ୍ୟାପକ ଅଞ୍ଚଳରେ ଗୁରୁତ୍ୱ ରଖେ । ଗତକାଲି ଅନୁଷ୍ଠିତ ହୋଇଥିବା ଦ୍ୱିତୀୟ ଭାରତ-କାରିକମ୍ ଶିଖର ସମ୍ମିଳନୀ ଏହାର ଉଦାହରଣ । ଜାତିସଂଘର ସଦସ୍ୟ ଭାବେ ଆମେ ବହୁପକ୍ଷୀୟ ସୁଧାରବାଦ ଉପରେ ବିଶ୍ୱାସ ରଖୁ । ବିକାଶଶୀଳ ଦେଶ ଭାବେ ଗ୍ଲୋବାଲ ସାଉଥର ଶକ୍ତି ଆମେ ବୁଝିପାରିଛୁ । ରଣନୀତିକ ସ୍ୱୟଂଶାସନ ଓ ସମାବେଶୀ ବିକାଶକୁ ସମର୍ଥନ ଆମେ ଚାହୁଁ । ଶତତ ବିକାଶ ଏବଂ ଜଳାବାୟୁ ନ୍ୟାୟ ଆମେ ଚାହୁଁ । ଆଲୋଚନା ଏବଂ କୂଟନୀତି ମାଧ୍ୟମରେ ବୈଶ୍ୱିକ ସମସ୍ୟାର ସମାଧାନ ପାଇଁ ଆମେ ଆହ୍ୱାନ କରୁଛୁ ।
ବନ୍ଧୁଗଣ,
ମୁଁ ସର୍ବଦା ପ୍ରବାସୀ ଭାରତୀୟଙ୍କୁ ଆମର ରାଷ୍ଟ୍ରଦୂତ ଭାବେ ବିବେଚନା କରିଆସିଛି । ଜଣେ ଆମ୍ବାସଡର ଜଣେ ରାଜଦୂତ, କିନ୍ତୁ ଆପଣ ସମସ୍ତେ ମୋ ପାଇଁ ଜଣେ ଜଣେ ରାଜଦୂତ । ମା’ର କୋଳ ଠାରୁ ଖୁସି ଆଉ କିଛି ନାହିଁ ବୋଲି କୁହାଯାଏ । ଇଣ୍ଡୋ-ଗୁୟାନିଜ ସମୁଦାୟ ଉଭୟ ଆଡ଼ୁ ଆଶୀର୍ବାଦ ପାଇଛନ୍ତି । ଗୁୟାନାକୁ ଆପଣମାନେ ମାତୃଭୂମି ଭାବେ ପାଇଥିବା ବେଳେ ଭାରତ ପୈତୃକ ଭୂମି ଭାବେ ରହିଛି । ଭାରତ ଏବେ ସୁଯୋଗର ଭୂମି ହୋଇପାରିଥିବାରୁ ଆପଣମାନେ ଦୁଇ ଦେଶକୁ ଯୋଡ଼ିବା କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବେ ।
ବନ୍ଧୁଗଣ,
ଭାରତକୁ ଜାନିୟେ କ୍ୱିଜ୍ ଆରମ୍ଭ କରାଯାଇଛି । ଅଂଶ ଗ୍ରହଣ କରିବାକୁ ମୁଁ ଆପଣମାନଙ୍କୁ ଆହ୍ୱାନ ଦେଉଛି । ଗୁୟାନାର ବନ୍ଧୁମାନଙ୍କୁ ମଧ୍ୟ ଏଥିପାଇଁ ଉତ୍ସାହିତ କରନ୍ତୁ । ଭାରତକୁ ଏବଂ ଏହାର ମୂଲ୍ୟବୋଧ, ସଂସ୍କୃତି ଏବଂ ବିବିଧତାକୁ ବୁଝିବା ପାଇଁ ଏହା ଏକ ଉତ୍ତମ ସୁଯୋଗ
ବନ୍ଧୁଗଣ,
ଆସନ୍ତା ବର୍ଷ ଜାନୁଆରୀ ୧୩ ତାରିଖରୁ ଫେବୃଆରୀ ୨୬ ତାରିଖ ପର୍ଯ୍ୟନ୍ତ ପ୍ରୟାଗରାଜରେ ମହାକୁମ୍ଭ ଅନୁଷ୍ଠିତ ହେବ । ପରିବାର ଓ ବନ୍ଧୁମାନଙ୍କ ସହ ଏଥିରେ ସାମିଲ ହେବାକୁ ଆପଣମାନଙ୍କୁ ଆହ୍ୱାନ କରୁଛି । ଆପଣମାନେ ମଧ୍ୟ ବସ୍ତି ଓ ଗୋଣ୍ଡା ଯାଇପାରନ୍ତି, ଯେଉଁଠାରୁ ଆପଣମାନଙ୍କ ମଧ୍ୟରୁ ଅନେକ ଆସିଛନ୍ତି । ଅଯୋଧ୍ୟାର ରାମମନ୍ଦିର ମଧ୍ୟ ଆପଣମାନେ ପରିଦର୍ଶନ କରିପାରନ୍ତି । ଆଉ ଏକ ନିମନ୍ତ୍ରଣ ରହିଛି । ଏହା ହେଲେ ଆସନ୍ତା ଜାନୁଆରୀ ମାସରେ ଭୁବନେଶ୍ୱରରେ ପ୍ରବାସୀ ଭାରତୀୟ ଦିବସ ପାଳନ କରାଯିବ । ଯଦି ଆପଣମାନେ ଆସିବେ ତେବେ ପୁରୀର ମହାପ୍ରଭୁ ଜଗନ୍ନାଥଙ୍କ ଆଶୀର୍ବାଦ ନେଇପାରିବେ । ଏବେ ଅନେକ କାର୍ଯ୍ୟକ୍ରମ ଓ ନିମନ୍ତ୍ରଣ ଥିବାରୁ ଆପଣମାନଙ୍କ ମଧ୍ୟରୁ ଅନେକଙ୍କୁ ଶୀଘ୍ର ଭାରତରେ ଦେଖିବାକୁ ପାଇପାରିବି ବୋଲି ଆଶା କରୁଛି । ପୁଣିଥରେ ମୋ ପାଇଁ ଆପଣମାନଙ୍କ ଦେଇଥିବା ଭଲପାଇବା ଓ ସ୍ନେହ ପାଇଁ ଧନ୍ୟବାଦ ।
ଧନ୍ୟବାଦ
ବହୁତ ବହୁତ ଧନ୍ୟବାଦ
ଏବଂ ମୋ ବନ୍ଧୁ ଅଲ୍ଲୀଙ୍କୁ ସ୍ୱତନ୍ତ୍ର ଭାବେ ଧନ୍ୟବାଦ । ବହୁତ ଧନ୍ୟବାଦ ।
