ୱାହେ ଗୁରୁ ଜୀ କା ଖାଲସା.. ୱାହେ ଗୁରୁ ଜୀ କୀ ଫତେହ!!
ଦେଶର ଭିନ୍ନ ଭିନ୍ନ କୋଣରୁ ଏଠାରେ ଉପସ୍ଥିତ ଆପଣମାନେ ସମସ୍ତ ମହାନୁଭବମାନଙ୍କୁ ମୁଁ ସ୍ୱାଗତ କରୁଛି । ଆପଣମାନଙ୍କୁ ସମସ୍ତଙ୍କୁ, ସମଗ୍ର ଦେଶକୁ ଲୋହରିର ମଧ୍ୟ ଅନେକ ଅନେକ ଶୁଭକାମନା । ବିଶେଷ କରି ମୁଁ ମୋ ଦେଶର ଅନ୍ନଦାତା ସାଥୀମାନଙ୍କ ପାଇଁ ଫସଲ ଅମଳର ଏ ଋତୁ ଅନନ୍ତ ଖୁସି ନେଇ ଆସିଛି, ସେଥିପାଇଁ ମଙ୍ଗଳକାମନା କରୁଛି ।
ସାଥୀଗଣ, ଆଜି ଗୁରୁ ଗୋବିନ୍ଦ ସିଂ ମହାରାଜଙ୍କ ପ୍ରକାଶ ପର୍ବ ଦେଶ ପାଳନ କରୁଛି । ଖାଲସା ପନ୍ଥର ସ୍ରଷ୍ଟା, ମାନବତାର ପାଳନକର୍ତ୍ତା, ଭାରତୀୟ ମୂଲ୍ୟବୋଧ ପ୍ରତି ସମର୍ପିତ, ଗୁରୁ ଗୋବିନ୍ଦ ସିଂଙ୍କୁ ମୋର ଶ୍ରଦ୍ଧାପୂର୍ବକ ପ୍ରଣାମ । ଗୁରୁ ଗୋବିନ୍ଦ ସିଂଙ୍କ ପ୍ରକାଶୋତ୍ସବରେ ଆପଣ ସମସ୍ତ ସାଥୀମାନଙ୍କ ସହିତ,ଦେଶ ଏବଂ ସାରା ବିଶ୍ୱରୁ ଶିଖ ପନ୍ଥ ସହ ଜଡ଼ିତ ଏବଂ ଭାରତୀୟ ସଂସ୍କୃତି ଲାଗି ସମର୍ପିତ ଜନସାଧାରଣଙ୍କୁ ମୁଁ ଅନେକ ଅନେକ ଅଭିନନ୍ଦନ ଜଣାଉଛି ।
ସାଥୀଗଣ, ଗତ ବର୍ଷକୁ ଆମେ ଗୁରୁ ଗୋବିନ୍ଦ ସିଂ ମହାରାଜଙ୍କ 350ତମ ଜନ୍ମଜୟନ୍ତୀ ବର୍ଷ ଭାବେ ପାଳନ କରିଥିଲୁ । ଶିଖ ପନ୍ଥର ଏହି ଗୁରୁତ୍ୱପୂର୍ଣ୍ଣ ଅବସରକୁ ଆହୁରି ସ୍ମରଣୀୟ କରିବା ଲାଗି କେନ୍ଦ୍ର ସରକାରଙ୍କ ପକ୍ଷରୁ ମୋତେ ଗୋଟିଏ 350 ଟଙ୍କାର ସ୍ମାରକୀ ମୁଦ୍ରା ଦେଶବାସୀଙ୍କୁ ସମର୍ପିତ କରିବାର ସୌଭାଗ୍ୟ ମିଳିଛି ।
ଏମିତି ତ' ଗୁରୁ ଗୋବିନ୍ଦ ସିଂଙ୍କ ମୁଦ୍ରା ଆମମାନଙ୍କ ହୃଦୟକୁ ଶତାଧିକ ବର୍ଷ ଧରି ପ୍ରଭାବିତ କରି ଆସିଛି ଏବଂ ଆଗକୁ ମଧ୍ୟ ଅନେକ ଶହ ବର୍ଷ ପର୍ଯ୍ୟନ୍ତ ଚାଲିବ । ସେଥିପାଇଁ ଯାହାର କୃତିତ୍ୱ ଏକ ମୂଲ୍ୟ ହୋଇ ଆମ ଜୀବନରେ ଚାଲିଆସିଛି, ଆମମାନଙ୍କୁ ପ୍ରେରଣା ଦେଇଆସିଛି, ତା'କୁ ସବୁବେଳେ ମନେ ରଖିବା ପାଇଁ ଆମେ ଏକ ଛୋଟ ପ୍ରୟାସ କରୁଛୁ । ଏହା ତାଙ୍କ ପ୍ରତି ଆଦର ଏବଂ ଶ୍ରଦ୍ଧା ବ୍ୟକ୍ତ କରିବାର ଏକ ଛୋଟ ପ୍ରୟାସ ମାତ୍ର ଏବଂ ଏଥିପାଇଁ ଆମେ ସମସ୍ତେ ଏକ ପ୍ରକାରେ ସନ୍ତୋଷ ଅନୁଭବ କରିପାରୁଛୁ ।
ସାଥୀଗଣ, ଶ୍ରୀ ଗୁରୁ ଗୋବିନ୍ଦ ସିଂଙ୍କ ବ୍ୟକ୍ତିତ୍ୱ ଅନେକ ପ୍ରତିଭାର ସଂଗମ ଥିଲା । ସେ ଗୁରୁ ତ' ଥିଲେ,ଭକ୍ତମାନଙ୍କ ମଧ୍ୟରେ ବି ଶ୍ରେଷ୍ଠ ଥିଲେ ।
ସେ ଯେତେ ଭଲ ଯୋଦ୍ଧା ଥିଲେ ସେତେ ଚମତ୍କାର କବି ଏବଂ ସାହିତ୍ୟକାର ମଧ୍ୟ ଥିଲେ । ଅନ୍ୟାୟ ବିରୋଧରେ ତାଙ୍କର ଯେତେ କଡ଼ା ଆଭିମୁଖ୍ୟ ଥିଲା, ଶାନ୍ତି ପାଇଁ ସେ ସେତିକି ଆଗ୍ରହୀ ଥିଲେ ।
ମାନବତାର ରକ୍ଷା ନିମନ୍ତେ, ରାଷ୍ଟ୍ରର ରକ୍ଷା ନିମନ୍ତେ, ଧର୍ମର ରକ୍ଷା ନିମନ୍ତେ, ତାଙ୍କର ସର୍ବୋଚ୍ଚ ବଳିଦାନ ବିଷୟରେ ଦେଶ ଏବଂ ଦୁନିଆ ପରିଚିତ ।
ଇନ ପୁତ୍ରନ କେ କାରନ, ୱାର ଦିଏ ସୂତ ଚାର ।
ଚାର ମୁଏ ତୋ କ୍ୟା ହୁଆ, ଜୀବିତ କଇଁ ହଜାର । ।
ହଜାର ହଜାର ସନ୍ତାନଙ୍କ ରକ୍ଷା ଲାଗି ନିଜ ସନ୍ତାନମାନଙ୍କୁ, ନିଜ ବଂଶର ହିଁ ବଳିଦାନ ଯିଏ ଦେଇଥିଲେ । ରାଷ୍ଟ୍ରର ରକ୍ଷା ଲାଗି, ଧର୍ମର ରକ୍ଷା ଲାଗି, ତ୍ୟାଗ ଏବଂ ବଳିଦାନର ଏହାଠାରୁ ବଡ଼ ଉଦାହରଣ ଆଉ କ'ଣ ହୋଇପାରେ ।
ସାଥୀଗଣ, ବୀରତ୍ୱର ସହିତ ତାଙ୍କ ଠାରେ ଯେଉଁ ସ୍ଥିରତା ଥିଲା, ଧୈର୍ଯ୍ୟ ଥିଲା, ତାହା ଅଦ୍ଭୂତ ଥିଲା । ସେ ସଂଘର୍ଷ କରୁଥିଲେ କିନ୍ତୁ ତ୍ୟାଗର ପରାକାଷ୍ଠା ଅଦ୍ଭୂତ ଥିଲା । ସେ ସମାଜର କଳୁଷତା ବିରୋଧରେ ଲଢ଼ୁଥିଲେ । ଉଚ୍ଚ-ନୀଚ ଭେଦଭାବ, ଜାତିବାଦର ବିଷ, ଏହା ବିରୋଧରେ ମଧ୍ୟ ଗୁରୁ ଗୋବିନ୍ଦ ସିଂ ସଂଘର୍ଷ କରିଥିଲେ । ଏ ସମସ୍ତ ମୂଲ୍ୟବୋଧ ନୂତନ ଭାରତ ନିର୍ମାଣର ଆଧାରରେ ରହିଛି ।
ସାଥୀଗଣ, ଗୁରୁ ସାହେବ ଜ୍ଞାନକୁ କେନ୍ଦ୍ରରେ ରଖି ଗୁରୁ ଗ୍ରନ୍ଥ ସାହିବର ପ୍ରତ୍ୟେକ ଶବ୍ଦକୁ ଜୀବନ-ମନ୍ତ୍ର ଭାବେ ଗ୍ରହଣ କରିଥିଲେ । ସେ କହିଥିଲେ ଯେ ଏବେ ଗୁରୁ ଗ୍ରନ୍ଥ ସାହିବ ହିଁ, ଏହାର ପ୍ରତ୍ୟେକ ଶବ୍ଦ,ଏହାର ପ୍ରତ୍ୟେକ ପୃଷ୍ଠା ଆଗାମୀ ଯୁଗ ଯୁଗ ପର୍ଯ୍ୟନ୍ତ ଆମକୁ ପ୍ରେରଣା ଦେଇଚାଲିବ । ପରବର୍ତ୍ତୀସମୟରେ ଯେତେବେଳେ ପଞ୍ଚ ପ୍ୟାରେ ଏବଂ ଖାଲସା ପନ୍ଥର ସୃଷ୍ଟି ହେଲା, ଏଥିରେ ମଧ୍ୟ ସାରା ଭାରତକୁ ଯୋଡ଼ିବା ଲାଗି ତାଙ୍କର ପ୍ରୟାସ ରହିଥିଲା ।
ଖାଲସା ପନ୍ଥର ବିକାଶ ଗୁରୁ ସାହେବ ଦୀର୍ଘ ସମୟର ଗଭୀର ଚିନ୍ତନ-ସ୍ମରଣ ଏବଂ ଅଧ୍ୟୟନର ପରିଣାମ ଥିଲା । ସେ ବେଦ, ପୁରାଣ ଏବଂ ଅନ୍ୟ ପ୍ରାଚୀନ ଗ୍ରନ୍ଥର ଜ୍ଞାତା ଥିଲେ । ଗୁରୁ ସାହେବଙ୍କୁ ଗୁରୁ ନାନକ ଦେବଙ୍କଠାରୁ ଆରମ୍ଭ କରି ଗୁରୁ ତେଗ ବାହାଦୂରଙ୍କ ପର୍ଯ୍ୟନ୍ତ ଶିଖ ପନ୍ଥର ପରମ୍ପରା, ମୋଗଲ ଶାସନର କାଳରେ ଶିଖ ପନ୍ଥ ସହ ଜଡ଼ିତ ଘଟଣାର ବ୍ୟାପକ ସୂଚନା ତାଙ୍କୁ ଜଣାଥିଲା । ଦେଶ-ସମାଜରେ ଘଟୁଥିବା ପ୍ରତ୍ୟେକ ଘଟଣା ଉପରେ ସେ ନିଜର ବିଚାର ରଖିଥିଲେ ।
ସାଥୀଗଣ, ଆପଣମାନଙ୍କ ମଧ୍ୟରୁ ଅନେକ ଲୋକ "ଶ୍ରୀ ଦଶମଗ୍ରନ୍ଥ ସାହେବ'କୁ ପଢ଼ିଥିବେ । ଭାଷା ଏବଂ ସାହିତ୍ୟ ଉପରେ ଯେଉଁ ନିୟନ୍ତ୍ରଣ ତାଙ୍କର ରହିଥିଲା ତାହା ଅଦ୍ଭୂତ ଥିଲା । ଜୀବନର ପ୍ରତ୍ୟେକ ରସର ବ୍ୟାଖ୍ୟାନ ସେ ଏପରି କରିଥିଲେ ତାହା ସାଧାରଣରୁ ସାଧାରଣ ବ୍ୟକ୍ତିକୁ ମଧ୍ୟ ଛୁଇଁ ଯାଉଥିଲା । ଅଳଙ୍କାର ହେଉ, ପଦଶୈଳୀ ହେଉ, ଛନ୍ଦ ହେଉ, ପ୍ରବାହ ହେଉ, ମନ୍ତ୍ରମୁଗ୍ଧକାରୀ ଥିଲା । ଭାରତୀୟ ଭାଷାକୁ ନେଇ ତାଙ୍କର ଜ୍ଞାନ ଏବଂ ତାଙ୍କର ମୋହ ଅତୁଳନୀୟ ଥିଲା ।
ସାଥୀଗଣ, ଗୁରୁ ଗୋବିନ୍ଦ ସିଂଙ୍କ କାବ୍ୟ ଭାରତୀୟ ସଂସ୍କୃତିର ପ୍ରତ୍ୟେକ ବିନ୍ଦୁ, ଆମ ଜୀବନ ଦର୍ଶନର ସରଳ ଅଭିବ୍ୟକ୍ତି ଅଟେ । ଯେପରିକି ତାଙ୍କର ବ୍ୟକ୍ତିତ୍ୱ ବହୁମୁଖୀ ରହିଥିଲା, ସେପରି ତାଙ୍କର କାବ୍ୟ ମଧ୍ୟ ଅନେକ ଏବଂ ବିବିଧ ବିଷୟକୁ ସମାହିତ କରି ରଖିଥିଲା । ସାହିତ୍ୟର ଅନେକ ବିଦ୍ୱାନ ତ' ତାଙ୍କୁ ସାହିତ୍ୟିକମାନଙ୍କ ପ୍ରେରଣାଦାତା ଏବଂ ପୃଷ୍ଠପୋଷକ ବୋଲି ବିବେଚନା କରିଥାନ୍ତି ।
ସାଥୀଗଣ, କୌଣସି ଦେଶର ସଂସ୍କୃତି ତାର ମହିମାକୁ ଉଜ୍ଜ୍ୱଳ କରିଥାଏ । ମାର୍ଜିତ କରିଥାଏ । ସଂସ୍କୃତିକୁ ସମୃଦ୍ଧ କରିବା ଏବଂ ଏହାର ପ୍ରଚାର-ପ୍ରସାର କରିବା ସବୁବେଳେ ବିଶ୍ୱର ଶକ୍ତିଶାଳୀ ସଭ୍ୟତାଗୁଡ଼ିକର ପ୍ରାଥମିକତା ଭାବେ ରହିଆସିଛି । ଏହି ପ୍ରୟାସ ଗତ ସାଢ଼େ 4 ବର୍ଷ ଧରି ଆମ ସରକାର କରୁଛନ୍ତି ।
ଭାରତ ନିକଟରେ ଯେଉଁ ସାଂସ୍କୃତିକ ଏବଂ ଜ୍ଞାନର ଐତିହ୍ୟ ରହିଛି, ତା'କୁ ବିଶ୍ୱର କୋଣ ଅନୁକୋଣରେ ପହଁଚାଇବା ଲାଗି ବ୍ୟାପକ ପ୍ରୟାସ କରାଯାଉଛି । ଯୋଗଠାରୁ ଆରମ୍ଭ କରି ଆୟୁର୍ବେଦ ପର୍ଯ୍ୟନ୍ତ ନିଜର ପ୍ରତିଷ୍ଠାକୁ ପୁନଃସ୍ଥାପିତ କରିବାରେ ଦେଶ ସଫଳ ହୋଇଛି । ଏହି କାମ ନିରନ୍ତର ଜାରି ରହିଛି ।
ସାଥୀଗଣ, ବୈଶ୍ୱିକ ଆରୋଗ୍ୟ, ସମୃଦ୍ଧି ଏବଂ ଶାନ୍ତିକୁ ନେଇ ଆମର ଋଷି, ମୁନି ଏବଂ ଗୁରୁମାନେ ଯେଉଁ ବାର୍ତ୍ତା ଦେଇଛନ୍ତି ସେ ବାର୍ତ୍ତା ଦ୍ୱାରା ବିଶ୍ୱ ଲାଭାନ୍ୱିତ ହେବ, ଏହାର ପ୍ରୟାସ କରାଯାଉଛି । ଗୁରୁ ଗୋବିନ୍ଦ ସିଂ ଜୀଙ୍କ 350ତମ ପ୍ରକାଶ ପର୍ବ ତ' ଆମେ ପାଳନ ତ' କରୁଛି, ଏବେ ଗୁରୁ ନାନକ ଦେବଜୀଙ୍କ 550ତମ ଜନ୍ମ ଜୟନ୍ତୀ ସମାରୋହର ପ୍ରସ୍ତୁତି ମଧ୍ୟ ଜାରି ରହିଛି । ଏହା ଆମ ସରକାରଙ୍କ ସୌଭାଗ୍ୟ ଯେ ଆମକୁ ଏବେ ଏସବୁ ପବିତ୍ର ଅବସର ସହ ଯୋଡ଼ି ହେବାର ସୌଭାଗ୍ୟ ବିଶେଷ ଭାବେ ମିଳୁଛି ।
ସରକାର ନିଷ୍ପତ୍ତି ନେଇଛନ୍ତି ଯେ ଏହି ପ୍ରକାଶୋତ୍ସବ ଦେଶର ସମସ୍ତ ରାଜ୍ୟ ଏବଂ କେନ୍ଦ୍ର ଶାସିତ ପ୍ରଦେଶରେ ତ' ପାଳନ ହିଁ କରାଯିବ, ସାରା ବିଶ୍ୱରେ ଥିବା ଆମର ଦୂତାବାସରେ ମଧ୍ୟ ଆୟୋଜିତ ହେବ ।
କେବଳ ସେତିକି ନୁହେଁ, ଆପଣମାନେ ଏହା ଭଲ ଭାବେ ଜାଣନ୍ତି ଯେ ଏବେ କେନ୍ଦ୍ର ସରକାର ନିରନ୍ତର ଏବଂ ଅଭୂତପୂର୍ବ ପ୍ରୟାସ ଦ୍ୱାରା କରତାରପୁର କରିଡର ନିର୍ମାଣ ହେବାକୁ ଯାଉଛି । ଏବେ ଗୁରୁ ନାନକଙ୍କ ପ୍ରଦର୍ଶିତ ମାର୍ଗରେ ଚାଲୁଥିବା ପ୍ରତ୍ୟେକ ଭାରତୀୟ, ପ୍ରତ୍ୟେକ ଶିଖ, ଦୂରବୀକ୍ଷଣ ବଦଳରେ ନିଜ ଆଖିରେ ନାରୋବାଲ ଯାଇପାରିବ ଏବଂ ବିନା ଭିସାରେ ଗୁରୁଦ୍ୱାରା ଦରବାର ସାହିବର ଦର୍ଶନ କରିପାରିବ ।
ଅଗଷ୍ଟ 1947ରେ ଯେଉଁ ଭୁଲ ହୋଇଥିଲା, ଏହା ତାହାର ପ୍ରାୟଶ୍ଚିତ ଅଟେ । ଆମ ଗୁରୁଙ୍କ ସବୁଠୁ ଗୁରୁତ୍ୱପୂର୍ଣ୍ଣ ସ୍ଥଳ କେବଳ କିଛି କିଲୋମିଟର ଦୂରରେ ହିଁ ଥିଲା, କିନ୍ତୁ ତା'କୁ ମଧ୍ୟ ଆପଣ ସାଥୀରେ ଆଣିପାରିଲେ ନାହିଁ । ଏହି କରିଡର ସେହି କ୍ଷତିକୁ କମ କରିବା ଲାଗି ଏକ ପ୍ରାମାଣିକ ପ୍ରୟାସ ଅଟେ ।
ସାଥୀଗଣ, ଗୁରୁ ଗୋବିନ୍ଦ ସିଂ ହୁଅନ୍ତୁ କିମ୍ବା ପୁଣି ଗୁରୁ ନାନକ ଦେବ, ଆମର ପ୍ରତ୍ୟେକ ଗୁରୁ ନ୍ୟାୟ ସହିତ ଛିଡ଼ା ହେବା ଲାଗି ଶିକ୍ଷା ଦେଇଛନ୍ତି । ତାଙ୍କର ପ୍ରଦର୍ଶିତ ମାର୍ଗରେ ଚାଲି ଆଜି କେନ୍ଦ୍ର ସରକାର 1984ରେ ଆରମ୍ଭ ହୋଇଥିବା ଅନ୍ୟାୟର ପର୍ଯ୍ୟାୟକୁ ନ୍ୟାୟ ପର୍ଯ୍ୟନ୍ତ ପହଁଚାଇବାରେ ଲାଗି ରହିଛି । ଦଶନ୍ଧି ଧରି ମା'ମାନେ, ଭଉଣୀମାନେ, ପୁଅ-ଝିଅମାନେ, ଯେତେ ଲୁହ ଗଡ଼ାଇଛନ୍ତି, ତା'କୁ ପୋଛିବାର କାମ, ସେମାନଙ୍କୁ ନ୍ୟାୟ ଦେବାର କାମ ଏବେ ଆଇନ କରିବ ।
ସାଥୀଗଣ, ଆଜି ଏହି ପବିତ୍ର ଦିନରେ ଗୁରୁ ଗୋବିନ୍ଦ ସିଂ ମହାରାଜଙ୍କ ପ୍ରଦର୍ଶିତ 11 ସୂତ୍ରୀୟ ମାର୍ଗରେ ଚାଲିବା ଲାଗି ପୁଣିଥରେ ସଂକଳ୍ପ ନେବାର ଆବଶ୍ୟକତା ରହିଛି । ଆଜି ଯେତେବେଳେ ଭାରତ ଏକ ସଶକ୍ତ ରାଷ୍ଟ୍ର ରୂପରେ ପ୍ରତିଷ୍ଠିତ ହେବାର ମାର୍ଗରେ ଚାଲିବା ଆରମ୍ଭ କରିଛି, ସେତେବେଳ ଭାରତର ଭାବନାକୁ ଆହୁରି ସଶକ୍ତ କରିବାର ଆବଶ୍ୟକତା ରହିଛି ।
ମୋର ବିଶ୍ୱାସ ଅଛି ଯେ ଆମେ ସମସ୍ତେ ଗୁରୁଜୀଙ୍କ ପ୍ରଦର୍ଶିତ ମାର୍ଗରେ ନୂଆ ଭାରତକୁ ଆପଣାଇବାର ସଂକଳ୍ପକୁ ଆହୁରି ମଜଭୁତ କରିବୁ ।
ପୁଣି ଥରେ ଆପଣମାନଙ୍କୁ ସମସ୍ତଙ୍କୁ ପ୍ରକାଶ ପର୍ବର ଶୁଭକାମନା । ଆପଣମାନଙ୍କ ପାଇଁ ନୂଆ ବର୍ଷ ଅନେକ ଖୁସି ନେଇକି ଆସୁ, ଏହି କାମନା ସହିତ-
ଜୋ ବୋଲେ, ସୋ ନିହାଲ!… ସତ୍ ଶ୍ରୀ ଅକାଲ!
