କେରଳର ଭାଇ ଓ ଭଉଣୀମାନେ,
ଈଶ୍ୱରଙ୍କ ନିଜ ଦେଶକୁ ଆସି ମୁଁ ନିଜକୁ ଧନ୍ୟ ମନେ କରୁଛି । କୋଲ୍ଲମରେ, ଅଷ୍ଟମୁଦି ହ୍ରଦ କୂଳରେ, ବିଗତ ବର୍ଷର ବନ୍ୟାରୁ ଉଦ୍ଧାର ପାଇବାର ଅନୁଭବ ପାରିପାରୁଛି । କିନ୍ତୁ ଆମକୁ କେରଳର ପୁନଃନିର୍ମାଣ ଲାଗି କଠିନ ପରିଶ୍ରମ କରିବାକୁ ହେବ ।
ଏହି ବାଇପାସ ସମ୍ପୂର୍ଣ୍ଣ ହେବା ଅବସରରେ ଆପଣମାନଙ୍କୁ ଅଭିନନ୍ଦନ, ଯାହା ଲୋକମାନଙ୍କ ଜୀବନକୁ ଅଧିକ ସହଜ କରିବ । ଜନସାଧାରଣଙ୍କ ପାଇଁ ସହଜ ଜୀବନଧାରଣ ମୋ ସରକାରଙ୍କ ପ୍ରତିବଦ୍ଧତା । ଆମେ ସବକା ସାଥ, ସବକା ବିକାଶରେ ବିଶ୍ୱାସ କରୁ । ଏହି ପ୍ରତିବଦ୍ଧତା ସହିତ, ମୋ ସରକାର ଏହି ପ୍ରକଳ୍ପକୁ ଜାନୁଆରୀ 2015ରେ ଚୂଡ଼ାନ୍ତ ମଞ୍ଜୁରି ଦେଇଥିଲେ । ମୁଁ ଆନନ୍ଦିତ ଯେ ରାଜ୍ୟ ସରକାରଙ୍କ ଯୋଗଦାନ ଏବଂ ସହଯୋଗ କାରଣରୁ ଆମେ ଏହି ପ୍ରକଳ୍ପରକୁ ପ୍ରଭାବୀ ଢଙ୍ଗରେ ସମ୍ପୂର୍ଣ୍ଣ କରିସାରିଛୁ । ମେ 2014ରେ, ମୋ ସରକାର ଯେତେବେଳେ ଦାୟିତ୍ୱ ନେଲେ, ଆମେ କେରଳରେ ଭିତିଭୂମି ବିକାଶକୁ ସର୍ବାଧିକ ପ୍ରାଥମିକତା ଦେଲୁ । ଭାରତମାଳା ଅଧୀନରେ ମୁମ୍ବାଇ କନ୍ୟାକୁମାରୀ କରିଡର ପାଇଁ ବିସ୍ତୃତ ପ୍ରକଳ୍ପ ରିପୋର୍ଟ ପ୍ରସ୍ତୁତି ପଥରେ ରହିଛି । ଆହୁରି ଅନେକ ପ୍ରକଳ୍ପ ବିଭିନ୍ନ ବିକାଶସ୍ତରରେ ରହିଛି ।
ଆମ ଦେଶରେ, ଭିତ୍ତିଭୂମି ପ୍ରକଳ୍ପ ଘୋଷଣା କରାଯିବା ପରେ ବିଭିନ୍ନ କାରଣରୁ ବନ୍ଦ ହୋଇପଡ଼ିଥାଏ । ଖର୍ଚ୍ଚ ଏବଂ ସମୟ ଗଡ଼ୁଥିବା କାରଣରୁ ଜନସାଧାରଣଙ୍କ ବହୁ ଅର୍ଥ ନଷ୍ଟ ହୋଇଥାଏ । ଜନସାଧାରଣଙ୍କ ଅର୍ଥ ଏପରି ଅପଚୟ କରିବାର ସଂସ୍କୃତି ବନ୍ଦ କରାଯିବା ଦରକାର । ପ୍ରଗତି ଜରିଆରେ, ଆମେ ପ୍ରକଳ୍ପଗୁଡ଼ିକୁ ତ୍ୱରାନ୍ୱିତ କରୁଛୁ ଏବଂ ଏହି ସମସ୍ୟାରୁ ମୁକ୍ତି ପାଇବା ଲାଗି ପ୍ରୟାସ କରିଛୁ ।
ପ୍ରତିମାସର ଶେଷ ବୁଧବାରରେ, ମୁଁ ଭାରତ ସରକାରଙ୍କ ସମସ୍ତ ସଚିବ ଏବଂ ଭାରତ ସରକାରଙ୍କ ମୁଖ୍ୟ ସଚିବମାନଙ୍କ ସହିତ ବସୁ ଏବଂ ବିଳମ୍ବିତ ପ୍ରକଳ୍ପର ସମୀକ୍ଷା କରିଥାଉ ।
ମୁଁ ଏହା ଜାଣି ଆଚମ୍ବିତ ହେଲି ଯେ କେତେଗୁଡ଼ିଏ ପ୍ରକଳ୍ପ 20ରୁ 30 ବର୍ଷ ପୁରୁଣା ଏବଂ ବ୍ୟାପକ ଭାବେ ବିଳମ୍ବିତ ହୋଇଥିଲା । ଏତେ ଦୀର୍ଘ ସମୟ ପର୍ଯ୍ୟନ୍ତ କୌଣସି ପ୍ରକଳ୍ପ କିମ୍ବା ଯୋଜନାର ଲାଭରୁ ସାଧାରଣ ଲୋକଙ୍କୁ ବଂଚିତ କରିବା ଏକ ଅପରାଧ । ବର୍ତ୍ତମାନସୁଦ୍ଧା ପ୍ରଗତି ଅଧୀନରେ 12 ଲକ୍ଷ କୋଟି ଟଙ୍କା ମୂଲ୍ୟର 250ରୁ ଉର୍ଦ୍ଧ୍ଵ ପ୍ରକଳ୍ପର ସମୀକ୍ଷା କରିସାରିଛି ।
ବନ୍ଧୁଗଣ, ଅଟଳ ଜୀ ଯୋଗାଯୋଗର ଶକ୍ତିର ବିଶ୍ୱାସ କରୁଥିଲେ ଏବଂ ଆମେ ତାଙ୍କ ସଂକଳ୍ପକୁ ଆଗେଇ ନେଉଛୁ । ଜାତୀୟ ରାଜପଥ ଠାରୁ ଆରମ୍ଭ କରି ଗ୍ରାମୀଣ ସଡ଼କର ନିର୍ମାଣ ପୂର୍ବ ସରକାରଙ୍କ ତୁଳନାରେ ପାଖାପାଖି ଦ୍ୱିଗୁଣିତ ହୋଇଛି ।
ଆମେ ଯେତେବେଳେ ସରକାର ଗଠନ କଲୁ, ମାତ୍ର 56% ଗ୍ରାମୀଣ ବାସସ୍ଥଳୀ ସଡ଼କ ଦ୍ୱାରା ସଂଯୁକ୍ତ ହୋଇଥିଲା । ଆଜି 90%ରୁ ଅଧିକ ଗ୍ରାମୀଣ ବାସସ୍ଥଳୀ ସଡ଼କ ଦ୍ୱାରା ସଂଯୁକ୍ତ ହୋଇଛି । ମୁଁ ନିଶ୍ଚିତ ଯେ ଆମେ ଖୁବଶୀଘ୍ର 100% ଲକ୍ଷ୍ୟ ହାସଲ କରିପାରିବୁ ।
ସଡ଼କ କ୍ଷେତ୍ରରେ ମୋ ସରକାର ରେଳପଥ, ଜଳପଥ ଏବଂ ବାୟୁପଥ ଉପରେ ଗୁରୁତ୍ୱାରୋପ କରୁଛି । ବାରାଣାସୀରୁ ହଳଦିଆକୁ ଜାତୀୟ ଜଳପଥ କାର୍ଯ୍ୟକ୍ଷମ ହୋଇସାରିଛି । ଏହା ପରିବହନର ସ୍ୱଚ୍ଛ ମାର୍ଗ ସୁନିଶ୍ଚିତ କରିବ ଏବଂ ଭବିଷ୍ୟତ ପିଢ଼ି ପାଇଁ ପରିବେଶର ସଂରକ୍ଷଣ କରିବ । ଆଂଚଳିକ ବିମାନ ସଂଯୋଗ ଗତ ଚାରି ବର୍ଷରେ ମଧ୍ୟ ଉନ୍ନତି ହାସଲ କରିଛି । ଟ୍ରାକ୍ଗୁଡ଼ିକର ଦୋହରୀକରଣ, ବିଦ୍ୟୁତିକରଣ ଏବଂ ନୂଆ ଟ୍ରାକ ବିଛାଇବା କାମରେ ବ୍ୟାପକ ଉନ୍ନତି ହୋଇଛି । ଏ ସମସ୍ତ ନିଯୁକ୍ତି ସୁଯୋଗ ବୃଦ୍ଧି କରିପାରିଛି ।
ଆମେ ଯେତେବେଳେ ସଡ଼କ ଏବଂ ସେତୁ ନିର୍ମାଣ କରୁ, ଆମେ କେବଳ ସହର ଏବଂ ଗ୍ରାମକୁ ସଂଯୋଗ କରିନଥାଉ । ଆମେ ମଧ୍ୟ ଆକାଂକ୍ଷାକୁ ଉପଲବ୍ଧୀ ସହିତ, ଆଶାବାଦକୁ ସୁଯୋଗ ସହିତ ଏବଂ ଆଶାକୁ ଆନନ୍ଦ ସହିତ ଯୋଡ଼ିଥାଉ ।
ମୋର ପ୍ରତ୍ୟେକ ଦେଶବାସୀଙ୍କ ବିକାଶ ପାଇଁ ମୋର ପ୍ରତିବଦ୍ଧତା ରହିଛି । ଧାଡ଼ିର ଶେଷ ବ୍ୟକ୍ତି ମୋର ପ୍ରାଥମିକତା । ମତ୍ସ୍ୟଚାଷ କ୍ଷେତ୍ରରେ 7500 କୋଟି ଟଙ୍କାର ନୂଆ ପାଣ୍ଠି ମୋ ସରକାର ଅନୁମୋଦନ କରିଛନ୍ତି ।
ଆୟୁଷ୍ମାନ ଭାରତ ଅଧୀନରେ, ପ୍ରତ୍ୟେକ ପରିବାରକୁ, ଗରିବଙ୍କ ପାଇଁ ଆମେ 5 ଲକ୍ଷ ଟଙ୍କା ପର୍ଯ୍ୟନ୍ତ ନଗଦମୁକ୍ତ ସ୍ୱାସ୍ଥ୍ୟ ବୀମା ଯୋଗାଇ ଦେଉଛୁ । ବର୍ତ୍ତମାନ ସୁଦ୍ଧା ଏହି ଯୋଜନାର ଲାଭ 8 ଲକ୍ଷରୁ ଅଧିକ ରୋଗୀ ଉପକୃତ ହୋଇସାରିଛନ୍ତି । ସରକାର ବର୍ତ୍ତମାନ ସୁଦ୍ଧା 1100 କୋଟି ଟଙ୍କା ମଞ୍ଜୁର କରିସାରିଛନ୍ତି । ଏହି ଯୋଜନାକୁ ତ୍ୱରାନ୍ୱିତ କରିବା ଲାଗି ମୁଁ କେରଳ ସରକାରଙ୍କୁ ଅନୁରୋଧ କରୁଛି, ଯାହାଫଳରେ କେରଳର ଲୋକମାନେ ଏହାର ଲାଭ ପାଇପାରିବେ ।
ପର୍ଯ୍ୟଟନ କେରଳ ଅର୍ଥନୈତିକ ବିକାଶର ପରିଚୟ ଏବଂ ଏହା ରାଜ୍ୟର ଅର୍ଥବ୍ୟବସ୍ଥାକୁ ପ୍ରମୁଖ ଯୋଗଦାନ ଦେଉଛି । ମୋ ସରକାର ପର୍ଯ୍ୟଟନ କ୍ଷେତ୍ରରେ କଠିନ ପରିଶ୍ରମ କରିଛି ଏବଂ ଏହାର ଫଳାଫଳ ଚମତ୍କାର ହୋଇଛି । ବିଶ୍ୱ ଭ୍ରମଣ ଏବଂ ପର୍ଯ୍ୟଟନ ପରିଷଦ ରିପୋର୍ଟ 2018ର ପାୱାର ରେଙ୍କିଙ୍ଗରେ ଭାରତ ବର୍ତ୍ତମାନ ତୃତୀୟ ସ୍ଥାନରେ ରହିଛି । ଏହା ଏକ ପ୍ରମୁଖ ଉପଲବ୍ଧୀ ଯାହା ଦେଶର ସମ୍ପୂର୍ଣ୍ଣ ପର୍ଯ୍ୟଟନ କ୍ଷେତ୍ର ପ୍ରତି ଶୁଭସଂକେତ ଦେଉଛି ।
ବିଶ୍ୱ ଅର୍ଥନୈତିକ ଫୋରମର ଭ୍ରମଣ ଏବଂ ପର୍ଯ୍ୟଟନ ପ୍ରତିଦ୍ୱନ୍ଦ୍ୱିତା ସୂଚକାଙ୍କରେ ଭାରତର ସ୍ଥାନ 65ତମରୁ 40ତମ ସ୍ଥାନକୁ ଉଠିଆସିଛି ।
ଭାରତକୁ ବିଦେଶୀ ପର୍ଯ୍ୟଟକମାନଙ୍କ ଆଗମନ 2013ରେ 70 ଲକ୍ଷ ଥିବା ବେଳେ ଏହା 2017ରେ ପାଖାପାଖି 1 କୋଟିରେ ପହଁଚିଛି । ଏଥିରେ 42% ବୃଦ୍ଧି । ପର୍ଯ୍ୟଟନ କ୍ଷେତ୍ରରୁ ଭାରତର ବୈଦେଶିକ ମୁଦ୍ରା ଆମଦାନୀ 2013ରେ 18 ବିଲିୟନ ଆମେରିକୀୟ ଡଲାର ଥିବା ବେଳେ 2018ରେ ଏହା 27 ବିଲିୟନ ଡଲାରରେ ପହଁଚିଛି! ଏହା 50% ଅଭିବୃଦ୍ଧି! ବାସ୍ତବରେ, 2017ରେ ଭାରତ ବିଶ୍ୱର ସର୍ବୋର୍ଚ୍ଚ ଅଭିବୃଦ୍ଧିଶୀଳ ପର୍ଯ୍ୟଟନ ଲକ୍ଷ୍ୟସ୍ଥଳୀ ଥିଲା । 2016 ଅପେକ୍ଷା ଏଥିରେ 14% ବୃଦ୍ଧି ପରିଲକ୍ଷିତ ହୋଇଥିଲା, ଏହି ସମୟରେ ବିଶ୍ୱ ପର୍ଯ୍ୟଟନ ଅଭିବୃଦ୍ଧି ମାତ୍ର 7% ଥିଲା ।
ଇ-ଭିସା ବ୍ୟବସ୍ଥାର ଆରମ୍ଭ ଭାରତୀୟ ପର୍ଯ୍ୟଟନ ପାଇଁ ଯୁଗାନ୍ତକାରୀ ପଦକ୍ଷେପ ଥିଲା । ଏହି ସୁବିଧା ବର୍ତ୍ତମାନ ସାରା ବିଶ୍ୱର 166ଟି ଦେଶର ନାଗରିକମାନଙ୍କ ପାଇଁ ଉପଲବ୍ଧ ହେଉଛି ।
ମୋର ସରକାର ପର୍ଯ୍ୟଟକ, ଐତିହ୍ୟ ଏବଂ ଧାର୍ମୀକ କ୍ଷେତ୍ରରେ ମୌଳିକ ଭିତିଭୂମି ନିର୍ମାଣ ଲାଗି ଦୁଇଟି ଫ୍ଲାଗଶିପ କାର୍ଯ୍ୟକ୍ରମ ଆରମ୍ଭ କରିଛି : ବିଷୟ ଆଧାରିତ ପର୍ଯ୍ୟଟନ ସର୍କିଟର ସମନ୍ୱିତ ବିକାଶ ଏବଂ ପ୍ରସାଦ ।
କେରଳରେ ରହିଥିବା ପର୍ଯ୍ୟଟନ ସମ୍ଭାବନାକୁ ବିଚାର କରି ଆମେ ସ୍ୱଦେଶ ଦର୍ଶନ ଏବଂ ପ୍ରସାଦ ଯୋଜନା ଅଧୀନରେ ପାଖାପାଖି 550 କୋଟି ଟଙ୍କାର ବ୍ୟୟରେ 7ଟି ପ୍ରକଳ୍ପକୁ ଅନୁମୋଦନ କରିଛୁ ।
ଆଜି ଅପରାହ୍ଣରେ, ମୁଁ ଶ୍ରୀ ପଦ୍ମନାଭସ୍ୱାମୀଙ୍କ ମନ୍ଦିରରେ ସେପରି ଏକ ପ୍ରକଳ୍ପକୁ ଉଦଘାଟନ କରିବି । ମୁଁ ମଧ୍ୟ କେରଳ ଏବଂ ସାରା ଦେଶର ଜନସାଧାରଣଙ୍କ କଲ୍ୟାଣ ପାଇଁ ଭଗବାନ ପଦ୍ମନାଭସ୍ୱାମୀଙ୍କୁ ପ୍ରାର୍ଥନା କରିବି ।
ମୁଁ ସେହି ପଦ ଶୁଣିଛି “‘କୋଲ୍ଲମ କାଣ୍ଡାଲିଲାମଭେନ୍ଦା” ଯାହାର ଅର୍ଥ ଥରେ କୋଲ୍ଲମକୁ ଆସିଲେ ଜଣେ ନିଜ ଘର କଥା ଭୁଲିଯିବ । ମୁଁ ମଧ୍ୟ ସେପରି ଅନୁଭବ କରୁଛି ।
ମୁଁ କେରଳ ଏବଂ କୋଲ୍ଲମର ଜନସାଧାରଣଙ୍କୁ ସେମାନଙ୍କ ସ୍ନେହ ଏବଂ ଆତ୍ମୀୟତା ପାଇଁ ଧନ୍ୟବାଦ ଜଣାଉଛି । ମୁଁ ବିକଶିତ ଏବଂ ସୁଦୃଢ଼ କେରଳ ପାଇଁ ପ୍ରାର୍ଥନା କରୁଛି ।
