ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଫେବୃଆରୀ 8, 2019 ତାରିଖ ଦିନ ଜଳପାଇଗୁଡ଼ି ଗସ୍ତରେ ଯିବେ । ସେଠାରେ ପ୍ରଧାନମନ୍ତ୍ରୀ ଜାତୀୟ ରାଜପଥ 31ଡ଼ି’ର ଫଲକାଟା- ସାଲସାଲାବାଡ଼ି ସେକ୍ସନର ଶିଳାନ୍ୟାସ କରିବେ । 41.7 କିଲୋମିଟର ଦୈର୍ଘ୍ୟର ଏହି ଜାତୀୟ ରାଜପଥ ପଶ୍ଚିମ ବଙ୍ଗର ଜଳପାଇଗୁଡ଼ି ଜିଲ୍ଲାରେ ରହିଛି ଏବଂ 1938 କୋଟି ଟଙ୍କା ବ୍ୟୟରେ ଏହା ନିର୍ମାଣ କରାଯିବ ।
ଏହି ଜାତୀୟ ରାଜପଥ ନିର୍ମାଣ କାର୍ଯ୍ୟ ଶେଷ ହେବାପରେ ସାଲସାଲାବାଡ଼ି ଏବଂ ଆଲିପୁରଦୁଆର ଠାରୁ ସିଲିଗୁଡ଼ି ମଧ୍ୟରେ ପ୍ରାୟ 50 କିଲୋମିଟର ପଥ କମିଯିବ । ଏହା ଦ୍ୱାରା ସିଲିଗୁଡ଼ିକୁ ଉତ୍ତମ ଯୋଗାଯୋଗ ବ୍ୟବସ୍ଥା ହୋଇପାରିବ ଯାହାକି ଅତ୍ୟନନ୍ତ ଗୁରୁତ୍ୱପୂର୍ଣ୍ଣ । ଏହା ଦ୍ୱାରା ସେଠାକାର ଲୋକମାନେ ଉତ୍ତମ ଓ ଦ୍ରୁତ ରେଳସେବା ଓ ବିମାନସେବା ଲାଭ କରିପାରିବେ । ଏହି ଜାତୀୟ ରାଜପଥ କାର୍ଯ୍ୟକାରୀ ହେଲେ ସେଠାକୁ ଯାନବାହନ ଚଳାଚଳ ଦ୍ରୁତତର ହେବ ଏବଂ ସେହି କ୍ଷେତ୍ରର ଚା’ ସମେତ ଅନ୍ୟାନ୍ୟ କୃଷିଜାତ ଦ୍ରବ୍ୟକୁ ସହଜରେ ଉତ୍ତମ ଭାବେ ବିଭିନ୍ନ ବଜାରରେ ପହଞ୍ଚାଯାଇପାରିବ । ଏଭଳି ଉନ୍ନତ ଯୋଗାଯୋଗ ବ୍ୟବସ୍ଥା ସେହି କ୍ଷେତ୍ରର ପର୍ଯ୍ୟଟନ ଶିଳ୍ପକୁ ବୃଦ୍ଧି ଘଟାଇବ । ଏହା ଫଳରେ ସ୍ଥାନୀୟ ଲୋକମାନଙ୍କ ସାମାଜିକ ଆର୍ଥିକ ସ୍ଥିତିରେ ଉନ୍ନତି ଘଟିବ ଯାହାକି ରାଜ୍ୟ ତଥା ଦେଶର ଆର୍ଥିକ ପ୍ରଗତିରେ ସହାୟକ ହେବ ।
ଏହି ଜାତୀୟ ରାଜପଥ ନିର୍ମାଣ ସହ ସେଥିରେ ସମସ୍ତ ପ୍ରକାର ଅତ୍ୟାଧୁନିକ ବ୍ୟବସ୍ଥା ରହିବ ଯାହାକି ଏହାର ବ୍ୟବହାରକାରୀମାନଙ୍କୁ ବିଶେଷ ସୁବିଧା ଯୋଗାଇଦେବ । ଏହି ଜାତୀୟ ରାଜପଥ ଖଣ୍ଡରେ ତିନୋଟି ରେଳ ଓଭରବ୍ରିଜ୍, ଦୁଇଟି ଫ୍ଲାଏ ଓଭର, 3ଟି ଯାନବାହନ ଚଳାଚଳ ଅଣ୍ଡରପାସ୍, 8ଟି ପ୍ରମୁଖ ପୋଲ ଏବଂ 17ଟି ଛୋଟ ପୋଲ ରହିବ ।
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏହି ଗସ୍ତ ଅବସରରେ ଜଳପାଇଗୁଡ଼ିଠାରେ ସ୍ଥାପିତ ନୂତନ ହାଇକୋର୍ଟର ସର୍କିଟ ବେଞ୍ଚକୁ ଉଦଘାଟନ କରିବେ । କଲିକତା ହାଇ କୋର୍ଟର ସର୍କିଟ ବେଞ୍ଚ ଭାବେ ଏହା ପରିଚିତ ହେବ ଏବଂ ଏହି ସର୍କିଟ ବେଞ୍ଚ୍ ଦ୍ୱାରା ଉତ୍ତର ବଙ୍ଗ କ୍ଷେତ୍ରର ଦାର୍ଜିଲିଂ, କାଲିମପଙ୍ଗ,ଜଳପାଇଗୁଡ଼ି ଏବଂ କୁଚ ବିହାର ଆଦି ଅଞ୍ଚଳର ଲୋକମାନଙ୍କୁ ତ୍ୱରିତ ନ୍ୟାୟିକ ସେବା ଯୋଗାଇ ଦିଆଯାଇପାରିବ । ଏହି ଚାରିଟି ଜିଲ୍ଲାରେ ଲୋକମାନଙ୍କୁ 600 କିଲୋମିଟର ପଥ ଯାତ୍ରା କରି କଲିକତା ହାଇକୋର୍ଟକୁ ଧାଇଁବା ପରିବର୍ତ୍ତେ ମାତ୍ର 100 କିଲୋମିଟର ମଧ୍ୟରେ ସର୍କିଟ ବେଞ୍ଚରେ ସେମାନଙ୍କର ସମସ୍ତ ପ୍ରକାର ନ୍ୟାୟିକ କାର୍ଯ୍ୟ ତୁଲାଇପାରିବେ ।
