ଏକାଦଶ ବ୍ରିକ୍ସ ଶିଖର ସମ୍ମିଳନୀରେ ଯୋଗ ଦେବା ଲାଗି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ନଭେମ୍ବର 13ରୁ 14 ତାରିଖ ପର୍ଯ୍ୟନ୍ତ ବ୍ରାଜିଲର ବ୍ରାସିଲିଆ ଗସ୍ତ କରିବେ । ଚଳିତ ବର୍ଷ ବ୍ରିକ୍ସ ଶିଖର ସମ୍ମିଳନୀର ବିଷୟବସ୍ତୁ “ଏକ ଅଭିନବ ଭବିଷ୍ୟତ ପାଇଁ ଆର୍ଥିକ ଅଭିବୃଦ୍ଧି” ରଖାଯାଇଛି ।
ଷଷ୍ଠ ଥର ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବ୍ରିକ୍ସ ଶିଖର ସମ୍ମିଳନୀରେ ଯୋଗ ଦେବେ । ପ୍ରଥମ ଥର ୨୦14ରେ ବ୍ରାଜିଲର ଫୋର୍ଟାଲିଜା ଠାରେ ଅନୁଷ୍ଠିତ ବ୍ରିକ୍ସ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ଯୋଗ ଦେଇଥିଲେ ।
ବ୍ରିକ୍ସ ବ୍ୟବସାୟ ମଂଚରେ ଯୋଗ ଦେବା ଲାଗି ଏହି ଗସ୍ତରେ ଭାରତରୁ ଏକ ବଡ଼ ବ୍ୟବସାୟୀ ପ୍ରତିନିଧି ଦଳ ସାମିଲ ହେବେ ବୋଲି ଆଶା କରାଯାଉଛି । ଏହି ମଂଚରେ ସମସ୍ତ 5ଟି ଦେଶର ବ୍ୟବସାୟୀ ପ୍ରତିନିଧିମାନେ ଅଂଶଗ୍ରହଣ କରିବେ ।
ରୁଷ ରାଷ୍ଟ୍ରପତି ଭ୍ଲାଦିମିର ପୁତିନ, ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କ ସହିତ ପୃଥକ ଦ୍ୱିପାକ୍ଷିକ ବୈଠକରେ ପ୍ରଧାନମନ୍ତ୍ରୀ ଯୋଗ ଦେବେ । ଏହାଛଡ଼ା ସେ ବ୍ରିକ୍ସ ବ୍ୟବସାୟ ମଂଚର ଉଦଯାପନୀ ସମାରୋହ ଏବଂ ଏକାଦଶତମ ବ୍ରିକ୍ସ ଶିଖର ସମ୍ମିଳନୀର ରୁଦ୍ଧଦ୍ୱାର ଓ ପୂର୍ଣ୍ଣକାଳୀନ ଅଧିବେଶନରେ ଯୋଗଦେବେ ।
ରୁଦ୍ଧଦ୍ୱାର ଅଧିବେଶନରେ ସାମ୍ପ୍ରତିକ ବିଶ୍ୱରେ ରାଷ୍ଟ୍ରୀୟ ସାର୍ବଭୌମତ୍ୱ ପ୍ରୟୋଗ କରିବା କ୍ଷେତ୍ରରେ ରହିଥିବା ଆହ୍ୱାନ ଏବଂ ସୁଯୋଗ ବିଷୟରେ ଆଲୋଚନା ହେବ ବୋଲି ଆଶା କରାଯାଉଛି । ଏହାପରେ ବ୍ରିକ୍ସ ପୂର୍ଣ୍ଣକାଳୀନ ଅଧିବେଶନ ଅନୁଷ୍ଠିତ ହେବ, ଏଥିରେ ନେତାମାନେ ବ୍ରିକ୍ସ ସମାଜର ଅର୍ଥନୈତିକ ବିକାଶ ପାଇଁ ଆନ୍ତଃ ବ୍ରିକ୍ସ ସହଯୋଗ ବିଷୟରେ ଆଲୋଚନା କରିବେ ।
ଏହାପରେ ପ୍ରଧାନମନ୍ତ୍ରୀ ବ୍ରିକ୍ସ ବ୍ୟବସାୟ ପରିଷଦ ସହିତ ବ୍ରିକ୍ସ ନେତାମାନଙ୍କ ବୈଠକରେ ଯୋଗ ଦେବେ । ଏଥିରେ ବ୍ରାଜିଲୀୟ ବ୍ରିକ୍ସ ବ୍ୟବସାୟ ପରିଷଦର ଅଧ୍ୟକ୍ଷ ଏବଂ ନ୍ୟୁ ଡେଭଲପମେଂଟ ବ୍ୟାଙ୍କର ଅଧ୍ୟକ୍ଷ ରିପୋର୍ଟ ଉପସ୍ଥାପନ କରିବେ ବୋଲି ଆଶା କରାଯାଉଛି ।
ଏହାର କିଛି ସମୟ ପରେ ବାଣିଜ୍ୟ ଓ ନିବେଶ ପ୍ରୋତ୍ସାହନ ସଂସ୍ଥା ମଧ୍ୟରେ ବ୍ରିକ୍ସ ବୁଝାମଣା ସ୍ୱାକ୍ଷରିତ ହେବ ।
ଶିଖର ସମ୍ମିଳନୀର ଶେଷରେ ନେତାମାନେ ଏକ ମିଳିତ ଘୋଷଣାନାମା ଜାରି କରିବେ ।
ବିଶ୍ୱର 42ପ୍ରତିଶତ ଜନସଂଖ୍ୟା ଥିବା 5ଟି ବୃହତ ଅର୍ଥବ୍ୟବସ୍ଥାକୁ ନେଇ ବ୍ରିକ୍ସ ଗଠିତ ହୋଇଛି । ବିଶ୍ୱର ଜିଡିପି ଏବଂ ବ୍ୟବସାୟ କାରବାରରେ ଏହାର ଯଥାକ୍ରମେ 23 ଏବଂ 17ପ୍ରତିଶତ ଅଂଶ ରହିଛି ।
ବ୍ରିକ୍ସ ସହଯୋଗ ଦୁଇଟି ସ୍ତମ୍ଭ ଉପରେ ଆଧାରିତ । ନେତୃବୃନ୍ଦ ଓ ମନ୍ତ୍ରୀମାନଙ୍କ ବୈଠକ ଜରିଆରେ ଆପୋସ ହିତ ପ୍ରସଙ୍ଗରେ ବିଚାରବିମର୍ଶ ଏବଂ ବରିଷ୍ଠ ଅଧିକାରୀଙ୍କ ବୈଠକ ଜରିଆରେ ବାଣିଜ୍ୟ, ଅର୍ଥ, ସ୍ୱାସ୍ଥ୍ୟ, ଶିକ୍ଷା, ବିଜ୍ଞାନ ଓ ପ୍ରଯୁକ୍ତି, କୃଷି, ଯୋଗାଯୋଗ, ଆଇଟି ଆଦି ସମେତ ବିଭିନ୍ନ କ୍ଷେତ୍ରରେ ସହଯୋଗ ।
