ସ୍ୱାମୀ ବିବେକାନନ୍ଦ ଜୟନ୍ତୀ ଓ ଜାତୀୟ ଯୁବ ଦିବସ ଅବସରରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ କୋଲକାତା ସ୍ଥିତ ବେଲୁର ମଠ ଗସ୍ତ କରିଥିଲେ । ମଠର ସନ୍ୟାସୀମାନଙ୍କ ସହ ଆଲୋଚନା କରିଥିଲେ ।
ଏହି ଅବସରରେ ସେ କହିଥିଲେ, ଦେଶବାସୀଙ୍କ ପାଇଁ ବେଲୁର ମଠର ଏହି ପବିତ୍ର ଭୂମିକୁ ଆସିବା ତୀର୍ଥଯାତ୍ରା ଠାରୁ କମ ନୁହେଁ, ହେଲେ ତାଙ୍କ ପାଇଁ ଏହା ଘରକୁ ଫେରିବା ସଦୃଶ । ଏହି ପବିତ୍ର ସ୍ଥାନରେ ରାତ୍ରୀଯାପନ ସୁଯୋଗ ମିଳିଥିବାରୁ ଖୁସିବ୍ୟକ୍ତ କରି ସେ କହିଥିଲେ, ସ୍ୱାମୀ ରାମକୃଷ୍ଣ ପରମହଂସ, ମା ଶାରଦା ଦେବୀ, ସ୍ୱାମୀ ବ୍ରହ୍ମାନନ୍ଦ ଓ ସ୍ୱାମୀ ବିବେକାନନ୍ଦଙ୍କ ସହ ସମସ୍ତ ଗୁରୁଙ୍କ ସାନ୍ନିଧ୍ୟ ଏଠାରେ ଅନୁଭୂତ ହୁଏ ।
ନିଜ ପୂର୍ବ ଗସ୍ତ ବେଳେ ସ୍ୱାମୀ ଆତ୍ମସ୍ଥାନନ୍ଦଜୀଙ୍କ ଆଶୀର୍ବାଦ ନେଇଥିବା କଥା ମନେ ପକାଇ ପ୍ରଧାନମନ୍ତ୍ରୀ କହିଥିଲେ ଯେ ସ୍ୱାମୀଜୀ ମୋତେ ଜନସେବା ପାଇଁ ପଥ ପ୍ରଦର୍ଶନ କରିଥିଲେ ।
ଆଜି ସେ ଶାରିରୀକ ଭାବେ ଆମ ଗହଣରେ ଉପସ୍ଥିତ ନାହାନ୍ତି ହେଲେ ତାଙ୍କ କାମ, ତାଙ୍କ ପ୍ରଦର୍ଶିତ ମାର୍ଗ ସବୁବେଳେ ପଥ ପ୍ରଦର୍ଶନ କରିବ ।
ଏଠିକାର ଯୁବ ବ୍ରହ୍ମଚାରୀଙ୍କ ଗହଣରେ ମୋତେ କିଛି ସମୟ ବିତାଇବାର ସୁଯୋଗ ମିଳିଥିଲା ଓ ଦିନେ ସେମାନଙ୍କ ଭଳି ମନଃସ୍ଥିତି ମୋର ଥିଲା ବୋଲି ସେ କହିଥିଲେ । ଅନେକଙ୍କୁ ବିବେକାନନ୍ଦଙ୍କ ବିଚାର, ବିବେକାନନ୍ଦଙ୍କ ବାଣୀ, ବିବେକାନନ୍ଦଙ୍କ ବ୍ୟକ୍ତିତ୍ୱ ଏଠାକୁ ଆକର୍ଷିତ କରିଥାଏ । ହେଲେ ଏହି ଭୂମିରେ ପହଁଞ୍ଚିବା ପରେ ମା ଶାରଦା ଦେବୀଙ୍କ ପଣତ ଆମକୁ ମା’ର ସ୍ନେହ ଦେଇଥାଏ ।
ଜାଣତ ହେଉ ଅବା ଅଜାଣତରେ ଦେଶର ପ୍ରତି ଯୁବକ ବିବେକାନନ୍ଦଙ୍କ ସଂକଳ୍ପର ଅଂଶବିଶେଷ । ସମୟ ବଦଳିଛି, ଦଶନ୍ଧି ବଦଳିଛି, ଶତାବ୍ଦୀ ବଦଳିଥିଲେ ବି ସ୍ୱାମୀଜୀଙ୍କ ସଂକଳ୍ପ ଯୁବବର୍ଗକୁ ପ୍ରେରିତ ଓ ଜାଗ୍ରତ କରୁଛି । ତାଙ୍କର ଏହି ଉଦ୍ୟମ ଆଗାମୀ ପିଢ଼ିକୁ ପ୍ରେରଣା ଦେଇ ଚାଲିଥିବ ।
ଏକାକୀ ଦୁନିଆକୁ ବଦଳାଇ ପାରିବେନି ବୋଲି ଭାବୁଥିବା ଯୁବପିଢ଼ିଙ୍କୁ ପ୍ରଧାନମନ୍ତ୍ରୀ ଆମେ କେବେ ବି ଏକାକୀ ନୁହେଁ ବୋଲି ଏକ ସହଜ ମନ୍ତ୍ର ଦେଇଥିଲେ ।
ଏକବିଂଶ ଶତାବ୍ଦୀରେ ନୂଆ ଭାରତ ନିର୍ମାଣ ପାଇଁ ଦେଶ ସଂକଳ୍ପ ନେଇଛି । ଏହି ସଂକଳ୍ପ କେବଳ ସରକାରଙ୍କ ନୁହେଁ ବରଂ 130 କୋଟି ଦେଶବାସୀଙ୍କର ଓ ଦେଶର ଯୁବପିଢ଼ିଙ୍କ ବୋଲି ସେ କହିଥିଲେ ।
ଯେଉଁ ଅଭିଯାନ ସହ ଦେଶର ଯୁବପିଢ଼ି ଜଡ଼ିତ ହୁଅନ୍ତି ସେହି ଦେଶ ନିଶ୍ଚିତ ସଫଳ ହୁଏ । ତାଙ୍କର ବିଗତ ପାଞ୍ଚ ବର୍ଷର ଅନୁଭବ ଏହା ଦର୍ଶାଉଛି ବୋଲି ପ୍ରଧାନମନ୍ତ୍ରୀ କହିଥିଲେ । 5 ବର୍ଷ ପୂର୍ବରୁ ଭାରତ ସ୍ୱଚ୍ଛ ହୋଇପାରିବ କି ନାହିଁ ସେ ନେଇ ସଂଶୟ ଥିଲା । ହେଲେ ଦେଶର ଯୁବପିଢ଼ି ଦାୟିତ୍ୱ ନେଲେ ଓ ପରିବର୍ତ୍ତନ ଦୃଶ୍ୟମାନ ବୋଲି ସେ କହିଛନ୍ତି ।
ଯୁବପିଢ଼ିଙ୍କ ମଧ୍ୟରେ ଥିବା ଉତ୍ସାହ ଓ ଉଦ୍ଦୀପନା ଏକବିଂଶ ଶତାବ୍ଦୀର ଏହି ଦଶକରେ ଭାରତ ବଦଳିବାର ଆଧାର । ଯୁବପିଢ଼ି ସମସ୍ୟାର ସମ୍ମୁଖୀନ ହୁଅନ୍ତି, ସମାଧାନ କରନ୍ତି ଓ ଆହ୍ୱାନକୁ ଆହ୍ୱାନ ଦିଅନ୍ତି । ଏହି ଚିନ୍ତାଧାରାକୁ ପାଥେୟ କରି କେନ୍ଦ୍ର ସରକାର ଦେଶ ସମ୍ମୁଖୀନ ହେଉଥିବା ଦଶନ୍ଧି ପୁରୁଣା ସମସ୍ୟା ସମାଧାନ ପାଇଁ ଚେଷ୍ଟା କରୁଥିବା ସେ କହିଛନ୍ତି ।
ଜାତୀୟ ଯୁବ ଦିବସ ଅବସରରେ, ନାଗରିକତା ସଂଶୋଧନ ଆଇନ ସମ୍ପର୍କରେ ଯୁବପିଢ଼ିଙ୍କୁ ବୁଝାଇବା, ସନ୍ତୁଷ୍ଟ କରିବା ଓ ସେମାନଙ୍କ ଦ୍ୱନ୍ଦ୍ୱ ଦୂର କରିବା ତାଙ୍କ ଦାୟିତ୍ୱ ବୋଲି ପ୍ରଧାନମନ୍ତ୍ରୀ କହିଥିଲେ । ସେ ସ୍ପଷ୍ଟ କରି ଦେଇଥିଲେ ଯେ, ନାଗରିକତା ସଂଶୋଧନ ଆଇନ ନାଗରିକତା ଛଡ଼ାଇ ନେବା ପାଇଁ ନୁହେଁ ପ୍ରଦାନ କରିବାକୁ ପ୍ରଣୟନ ହୋଇଛି । ନାଗରିକତା ସଂଶୋଧନ ଆଇନ କେବଳ ଏକ ସଂଶୋଧନ, ଯାହା ବିଭାଜନ ପରେ ପାକିସ୍ତାନରେ ଧାର୍ମିକ ବିଶ୍ୱାସ ଯୋଗୁଁ ଅତ୍ୟାଚାରିତ, ନିଷ୍ପେସିତଙ୍କୁ ଭାରତୀୟ ନାଗରିକତା ପ୍ରଦାନ କରିବ । ମହାତ୍ମା ଗାନ୍ଧିଙ୍କ ସମେତ ବହୁ ନେତା ଏହାକୁ ସେତେବେଳେ ସମର୍ଥନ କରିଥିଲେ । ଏହା ବ୍ୟତୀତ ଆଜି ମଧ୍ୟ ଯେକୌଣସି ଧର୍ମର ବ୍ୟକ୍ତି, ସେ ଭଗବାନଙ୍କୁ ବିଶ୍ୱାସ କରୁ ବା ନକରୁ.. ଭାରତର ସମ୍ବିଧାନକୁ ବିଶ୍ୱାସ କରୁଥିଲେ ନିର୍ଦ୍ଧାରିତ ନିୟମ ଅନୁଯାୟୀ ଭାରତର ନାଗରିକତା ଗ୍ରହଣ କରିପାରିବେ । ଏହି ଆଇନ ଦ୍ୱାରା ଉତ୍ତର-ପୂର୍ବ ରାଜ୍ୟଗୁଡିକର ଡେମୋଗ୍ରାଫି ଉପରେ ଯେପରି କୌଣସି ପ୍ରତିକୂଳ ପ୍ରଭାବ ନପଡ଼େ ସେଥିପାଇଁ ସରକାର ପଦକ୍ଷେପ ନେଇଛନ୍ତି । ଏତେ ସ୍ପଷ୍ଟତା ସତ୍ତ୍ୱେ କିଛି ଲୋକ ରାଜନୈତିକ କାରଣରୁ ନାଗରିକତା ସଂଶୋଧନ ଆଇନ ସମ୍ପର୍କରେ ଭ୍ରମ ସୃଷ୍ଟି କରୁଛନ୍ତି । ନାଗରିକତା ଆଇନ ସଂଶୋଧନ ଯୋଗୁଁ ବିବାଦୀୟ ପରିସ୍ଥିତି ଉପୁଜି ନଥିଲେ ପାକିସ୍ତାନରେ ସଂଖ୍ୟାଲଘୁଙ୍କ ଉପରେ ହେଉଥିବା ଅତ୍ୟାଚାର, ମାନବାଧିକାର ଉଲ୍ଲଂଘନ ସମ୍ପର୍କରେ ସାରା ବିଶ୍ୱ ଜାଣି ପାରିନଥାନ୍ତା । 70 ବର୍ଷ ଧରି ପାକିସ୍ତାନରେ ସଂଖ୍ୟାଲଘୁଙ୍କ ଉପରେ କାହିଁକି ଏପରି ଅତ୍ୟାଚାର ହେଉଥିଲା ତାର ଜବାବ ସେମାନଙ୍କୁ ଦେବାକୁ ପଡିବ ବୋଲି ପ୍ରଧାନମନ୍ତ୍ରୀ କହିଥିଲେ ।
ଆମ ସଂସ୍କୃତି ଓ ସମ୍ବିଧାନ ନାଗରିକ ଭାବେ କର୍ତ୍ତବ୍ୟ ପାଳନ, ସତ୍ୟନିଷ୍ଠ ଓ ଉତ୍ସର୍ଗୀକୃତ ଭାବେ ଦାୟିତ୍ୱ ନିର୍ବାହ ଆଦି ଆଶା ରଖୁଛି ବୋଲି ପ୍ରଧାନମନ୍ତ୍ରୀ କହିଛନ୍ତି । ପ୍ରତ୍ୟେକ ଭାରତୀୟଙ୍କ କର୍ତ୍ତବ୍ୟ ସମ ଗୁରୁତ୍ୱପୂର୍ଣ୍ଣ । ପ୍ରତ୍ୟେକ ଭାରତୀୟଙ୍କ ଠାରୁ ସ୍ୱାମୀ ବିବେକାନନ୍ଦ ଏହା ହିଁ ଆଶା କରନ୍ତି ଓ ଏହି ଅନୁଷ୍ଠାନର ଏହା ହିଁ ମୂଳକଥା । ତାଙ୍କ ସ୍ୱପ୍ନ ସଫଳ କରିବାକୁ ଆମେ ସମସ୍ତେ ସଂକଳ୍ପ ନେବା ବୋଲି କହି ସେ ବକ୍ତବ୍ୟ ଶେଷ କରିଥିଲେ ।
Tributes to Swami Vivekananda on his Jayanti. Live from Belur Math. https://t.co/yE8lOghIIQ
— Narendra Modi (@narendramodi) January 12, 2020
Swami Vivekananda lives in the hearts and minds of crores of Indians, especially the dynamic youth of India for whom he has a grand vision.
— Narendra Modi (@narendramodi) January 12, 2020
Today, on Vivekananda Jayanti and National Youth Day I am at the Belur Math, including the room where Swami Ji meditated. pic.twitter.com/UeWQkUk94C
The thoughts of Sri Ramakrishna emphasise on furthering harmony and compassion. He believed that a great way to serve God is to serve people, especially the poor and downtrodden.
— Narendra Modi (@narendramodi) January 12, 2020
At the Belur Math this morning, I paid tributes to Sri Ramakrishna. pic.twitter.com/Es9vPSH80q
