ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୨୩ ଜାନୁଆରୀ ୨୦୦୬ରେ କେରଳ ଗସ୍ତ କରିବେ । ସକାଳ ପ୍ରାୟ ୧୦:୪୫ ସମୟରେ ପ୍ରଧାନମନ୍ତ୍ରୀ ଥିରୁବନନ୍ତପୁରମରେ ବିଭିନ୍ନ ବିକାଶମୂଳକ ପ୍ରକଳ୍ପର ଶିଳାନ୍ୟାସ ଏବଂ ଉଦ୍ଘାଟନ କରିବେ । ଏହି ଅବସରରେ ସେ ଉପସ୍ଥିତ ସମାବେଶକୁ ମଧ୍ୟ ସମ୍ବୋଧିତ କରିବେ ।
ଏହି ପ୍ରକଳ୍ପଗୁଡିକ ରେଳ ସଂଯୋଗୀକରଣ, ସହରାଞ୍ଚଳ ଜୀବିକା, ବିଜ୍ଞାନ ଏବଂ ନବାଚାର, ନାଗରିକ-କୈନ୍ଦ୍ରିକ ସେବା ଏବଂ ଉନ୍ନତ ସ୍ୱାସ୍ଥ୍ୟସେବା ସମେତ ପ୍ରମୁଖ କ୍ଷେତ୍ରକୁ ପରିବ୍ୟାପ୍ତ, ଯାହା ପ୍ରଧାନମନ୍ତ୍ରୀଙ୍କ ସମାବେଶୀ ବିକାଶ, ପ୍ରଯୁକ୍ତିବିଦ୍ୟା ପ୍ରଗତି ଏବଂ ନାଗରିକଙ୍କ ଜୀବନର ମାନ ଉନ୍ନତ କରିବା ଉପରେ ନିରନ୍ତର ଧ୍ୟାନକୁ ପ୍ରଦର୍ଶିତ କରୁଛି ।
ରେଳ ସଂଯୋଗୀକରଣକୁ ଏକ ପ୍ରମୁଖ ପ୍ରୋତ୍ସାହନ ସ୍ୱରୂପ, ପ୍ରଧାନମନ୍ତ୍ରୀ ଚାରୋଟି ନୂଆ ଟ୍ରେନ ସେବାକୁ ପତାକା ଦେଖାଇବେ, ଯେଉଁଥିରେ ତିନିଟି ଅମୃତ ଭାରତ ଏକ୍ସପ୍ରେସ ଟ୍ରେନ ଏବଂ ଗୋଟିଏ ଯାତ୍ରୀବାହୀ ଟ୍ରେନ ଅନ୍ତର୍ଭୁକ୍ତ । ଏଥିରେ ନାଗରକୋଇଲ-ମାଙ୍ଗାଲୁରୁ ଅମୃତ ଭାରତ ଏକ୍ସପ୍ରେସ, ଥିରୁବନନ୍ତପୁରମ-ତାମ୍ବରମ୍ ଅମୃତ ଭାରତ ଏକ୍ସପ୍ରେସ, ଥିରୁବନନ୍ତପୁରମ-ଚାରଲାପଲ୍ଲୀ ଅମୃତ ଭାରତ ଏକ୍ସପ୍ରେସ ଏବଂ ତରିଶୁର ଏବଂ ଗୁରୁଭାୟୁର ମଧ୍ୟରେ ଚାଲୁଥିବା ଏକ ନୂଆ ଯାତ୍ରୀବାହୀ ଟ୍ରେନ ମଧ୍ୟ ରହିଛି । ଏହି ସେବାଗୁଡିକର ପ୍ରଚଳନ କେରଳ, ତାମିଲନାଡୁ, କର୍ଣ୍ଣାଟକ, ତେଲଙ୍ଗାନା ଏବଂ ଆନ୍ଧ୍ରପ୍ରଦେଶ ମଧ୍ୟରେ ଦୂରଗାମୀ ଏବଂ ଆଞ୍ଚଳିକ ସଂଯୋଗୀକରଣକୁ ଉଲ୍ଲେଖନୀୟ ଭାବରେ ବୃଦ୍ଧି କରିବ, ଯାହା ଦ୍ୱାରା ଯାତ୍ରୀମାନଙ୍କ ପାଇଁ ଯାତ୍ରା ଅଧିକ ସୁଲଭ, ସୁରକ୍ଷିତ ଏବଂ ସମୟସୀମା ମଧ୍ୟରେ ହୋଇପାରିବ । ଉନ୍ନତ ସଂଯୋଗୀକରଣ ସମଗ୍ର ଅଞ୍ଚଳରେ ପର୍ଯ୍ୟଟନ, ବାଣିଜ୍ୟ, ଶିକ୍ଷା, ନିଯୁକ୍ତି ଏବଂ ସାଂସ୍କୃତିକ ଆଦାନପ୍ରଦାନକୁ ଏକ ମଜବୁତ ପ୍ରୋତ୍ସାହନ ପ୍ରଦାନ କରିବ ।
ପ୍ରଧାନମନ୍ତ୍ରୀ ସହରାଞ୍ଚଳ ଜୀବିକାକୁ ସୁଦୃଢ଼ କରିବାର ପ୍ରୟାସର ଅଂଶ ସ୍ୱରୂପ, ପ୍ରଧାନମନ୍ତ୍ରୀ ସ୍ୱନିଧି କ୍ରେଡିଟ କାର୍ଡ ଶୁଭାରମ୍ଭ କରିବେ, ଯାହା ଉଠାଦୋକାନୀଙ୍କ ପାଇଁ ଆର୍ଥିକ ସମାବେଶୀର ପରବର୍ତ୍ତୀ ପର୍ଯ୍ୟାୟର ଶୁଭାରମ୍ଭ କରିବ । ୟୁପିଆଇ ସହିତ ଜଡିତ ସୁଧ ମୁକ୍ତ ରିଭଲଭିଂ କ୍ରେଡିଟ୍ ସୁବିଧା ତୁରନ୍ତ ନଗଦ ଉପଲବ୍ଧ କରାଇବ, ଡିଜିଟାଲ କାରବାରକୁ ପ୍ରୋତ୍ସାହିତ କରିବ ଏବଂ ହିତାଧିକାରୀମାନଙ୍କୁ ଆନୁଷ୍ଠାନିକ କ୍ରେଡିଟ ଇତିହାସ ଗଠନ କରିବାରେ ସାହାଯ୍ୟ କରିବ । ପ୍ରଧାନମନ୍ତ୍ରୀ କେରଳର ଉଠାଦୋକାନୀଙ୍କ ସମେତ ଏକ ଲକ୍ଷ ହିତାଧିକାରୀଙ୍କୁ ପ୍ରଧାନମନ୍ତ୍ରୀ ସ୍ୱନିଧି ଋଣ ମଧ୍ୟ ପ୍ରଦାନ କରିବେ । ୨୦୨୦ରେ ଆରମ୍ଭ ହେବା ପରଠାରୁ, ପ୍ରଧାନମନ୍ତ୍ରୀ ସ୍ୱନିଧି ଯୋଜନା ବହୁ ସଂଖ୍ୟକ ହିତାଧିକାରୀଙ୍କ ନିମନ୍ତେ ପ୍ରଥମ ଥର ପାଇଁ ଆନୁଷ୍ଠାନିକ ଋଣ ଯୋଗାଣ ସମ୍ଭବ କରିଛି ଏବଂ ସହରାଞ୍ଚଳ ଅସଂଗଠିତ ଶ୍ରମିକମାନଙ୍କ ମଧ୍ୟରେ ଦାରିଦ୍ର୍ୟ ଦୂରୀକରଣ ତଥା ଜୀବିକା ସୁରକ୍ଷାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି ।
ବିଜ୍ଞାନ ଏବଂ ନବାଚାର କ୍ଷେତ୍ରରେ, ପ୍ରଧାନମନ୍ତ୍ରୀ ଥିରୁବନନ୍ତପୁରମରେ ସିଏସ୍ଆଇଆର୍-ଏନ୍ଆଇଆଇଏସ୍ଟି ନବାଚାର, ପ୍ରଯୁକ୍ତିବିଦ୍ୟା ଏବଂ ଉଦ୍ୟୋଗୀତା କେନ୍ଦ୍ରର ଭିତ୍ତିପ୍ରସ୍ତର ସ୍ଥାପନ କରିବେ । ଏହି କେନ୍ଦ୍ର ଜୀବନ ବିଜ୍ଞାନ ଏବଂ ଜୈବ-ଅର୍ଥନୀତି ଉପରେ ଗୁରୁତ୍ୱ ଦେବ, ଆଧୁନିକ ଜୈବ ପ୍ରଯୁକ୍ତିବିଦ୍ୟା, ସ୍ଥାୟୀ ପ୍ୟାକେଜିଂ ଏବଂ ସବୁଜ ହାଇଡ୍ରୋଜେନ ସହିତ ଆୟୁର୍ବେଦ ଭଳି ପାରମ୍ପରିକ ଜ୍ଞାନ ବ୍ୟବସ୍ଥାକୁ ସମନ୍ୱିତ କରିବ ଏବଂ ଷ୍ଟାର୍ଟଅପ୍ ନିର୍ମାଣ, ପ୍ରଯୁକ୍ତିବିଦ୍ୟା ସ୍ଥାନାନ୍ତର ଏବଂ ବିଶ୍ୱବ୍ୟାପୀ ସହଯୋଗକୁ ପ୍ରୋତ୍ସାହିତ କରିବ । ଏହା ଗବେଷଣାକୁ ବଜାର-ପ୍ରସ୍ତୁତ ସମାଧାନ ଏବଂ ଉଦ୍ୟୋଗରେ ପରିଣତ କରିବା ପାଇଁ ଏକ ପ୍ଲାଟଫର୍ମ ଭାବରେ କାର୍ଯ୍ୟ କରିବ ।
ସ୍ୱାସ୍ଥ୍ୟସେବା ଭିତ୍ତିଭୂମିକୁ ସୁଦୃଢ଼ କରିବା ଏହି ଗସ୍ତର ଆଉ ଏକ ପ୍ରମୁଖ ଲକ୍ଷ୍ୟ ହେବ । ପ୍ରଧାନମନ୍ତ୍ରୀ ଥିରୁବନନ୍ତପୁରମର ଶ୍ରୀ ଚିତ୍ରା ତିରୁନାଲ ଇନ୍ଷ୍ଟିଚ୍ୟୁଟ୍ ଫର୍ ମେଡିକାଲ ସାଇନ୍ସେସ୍ ଆଣ୍ଡ ଟେକ୍ନୋଲୋଜିରେ ଏକ ଅତ୍ୟାଧୁନିକ ରେଡିଓ ସର୍ଜରୀ କେନ୍ଦ୍ରର ଭିତ୍ତିପ୍ରସ୍ତର ସ୍ଥାପନ କରିବେ । ଏହି ସୁବିଧା ଜଟିଳ ମସ୍ତିଷ୍କ ବିକାର ପାଇଁ ଅତ୍ୟନ୍ତ ସଠିକ, ସର୍ବନିମ୍ନ ଆକ୍ରମଣାତ୍ମକ ଚିକିତ୍ସା ପ୍ରଦାନ କରିବ, ଯାହା ଆଞ୍ଚଳିକ ତୃତୀୟ ସ୍ୱାସ୍ଥ୍ୟସେବା କ୍ଷମତାକୁ ବୃଦ୍ଧି କରିବ ।
ପ୍ରଧାନମନ୍ତ୍ରୀ ଥିରୁବନନ୍ତପୁରମରେ ନୂତନ ପୂଜାପ୍ପୁରା ଡାକଘର ମଧ୍ୟ ଉଦଘାଟନ କରିବେ। ଏହି ଆଧୁନିକ, ପ୍ରଯୁକ୍ତିବିଦ୍ୟା-ସକ୍ଷମ ସୁବିଧା ଡାକ, ବ୍ୟାଙ୍କିଙ୍ଗ, ବୀମା ଏବଂ ଡିଜିଟାଲ୍ ସେବାର ଏକ ବ୍ୟାପକ ପରିସର ପ୍ରଦାନ କରିବ, ଯାହା ନାଗରିକ-କୈନ୍ଦ୍ରିକ ସେବା ପ୍ରଦାନକୁ ଆହୁରି ସୁଦୃଢ଼ କରିବ।
