ଫେବ୍ରୁଆରୀ ୬, ୨୦୨୩ ଦିନ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ କର୍ଣ୍ଣାଟକ ଗସ୍ତ କରିବେ । ପ୍ରାୟ ପୂର୍ବାହ୍ନ ସାଢ଼େ ଏଗାରଟା ବେଳେ, ପ୍ରଧାନମନ୍ତ୍ରୀ ବେଙ୍ଗାଲୁରୁ ଠାରେ ଭାରତ ଶକ୍ତ ସପ୍ତାହ-୨୦୨୩ ଉଦଘାଟନ କରିବେ । ତା’ପରେ ଅପରାହ୍ନ ପ୍ରାୟ ସାଢ଼େ ତିନିଟା ବେଳେ ସେ ଟୁମକୁରୁ ଠାରେ ହାଲ ହେଲିକପ୍ଟର କାରଖାନାକୁ ଜାତି ଉଦେଶ୍ୟରେ ଉତ୍ସର୍ଗ କରିବା ସହ ବିଭିନ୍ନ ବିକାଶମୂଳକ କାର୍ଯ୍ୟର ଶିଳାନ୍ୟାସ କରିବେ ।
ଭାରତ ଶକ୍ତି ସପ୍ତାହ ୨୦୨୩
ପ୍ରଧାନମନ୍ତ୍ରୀ ବେଙ୍ଗାଲୁରୁ ଠାରେ ଭାରତ ଶକ୍ତି ସପ୍ତାହ (ଆଇଇଡବ୍ଲୁ) ୨୦୨୩ର ଉଦଘାଟନ କରିବେ । ଫେବ୍ରୁଆରୀ ୬ରୁ ୮ ତାରିଖ ମଧ୍ୟରେ ଆୟୋଜିତ ଆଇଇଡବ୍ଲୁ ଭାରତରେ ଶକ୍ତି ଭଣ୍ଡାରର ଅବସ୍ଥାନ୍ତର ଉପରେ ଅବଗତ କରାଇବା ଲକ୍ଷ୍ୟ ରହିଛି । ଶକ୍ତିର ଦାୟିତ୍ୱପୂର୍ଣ୍ଣ ଅବସ୍ଥାନ୍ତର ଉପରେ ପାରମ୍ପରିକ ଓ ଅଣପାରମ୍ପରିକ ଶକ୍ତି ଶିଳ୍ପ, ସରକାର ଓ ବୁଦ୍ଧିଜୀବୀଗଣ ବିଚାରବିମର୍ଷ କରିବାର କାର୍ଯ୍ୟକ୍ରମ ରହିଛି । ବିଶ୍ୱର ବିଭିନ୍ନ ଦେଶରେ ୩୦ ଜଣ ମନ୍ତ୍ରୀ ଏଥିରେ ଯୋଗଦେବେ । ଭାରତ ଶକ୍ତିର ଭବିଷ୍ୟତ ଓ ଆହ୍ୱାନ ଉପରେ ୩୦ ହଜାରରୁ ଅଧିକ ପ୍ରତିନିଧି, ଏକ ହଜାର ପ୍ରଦର୍ଶନକାରୀ ଓ ପାଞ୍ଚ ଶହ ବକ୍ତା ଏଥିରେ ମିଳିତ ହେବେ । କାର୍ଯ୍ୟକ୍ରମ କାଳରେ ପ୍ରଧାନମନ୍ତ୍ରୀ ବୈଶ୍ୱିକ ତୈଳ ଓ ଗ୍ୟାସ ମୁଖ୍ୟ କାର୍ଯ୍ୟନିର୍ବାହୀ ମାନଙ୍କ ସହ ଏକ ଗୋଲଟେବୁଲ ବୈଠକରେ ଅଂଶଗ୍ରହଣ କରିବେ । ସବୁଜ ଶକ୍ତି ଉପରେ ମଧ୍ୟ ସେ ବହୁମୁଖୀ କାର୍ଯ୍ୟ ପଦ୍ଧତି ଶୁଭାରମ୍ଭ କରିବେ ।
ଶକ୍ତି କ୍ଷେତ୍ରରେ ଆତ୍ମନିର୍ଭରତା ହାସଲ ନିମନ୍ତେ ଇଥାନଲ ମିଶ୍ରଣ ସରକାରଙ୍କ ଏକ ପ୍ରମୁଖ କାର୍ଯ୍ୟକ୍ରମର ରୂପ ନେଇଛି । ସରକାରଙ୍କ ନିରବଚ୍ଛିନ୍ନ ପ୍ରୟାସ ଯୋଗୁ ୨୦୧୩-୧୪ ପରଠାରୁ ଇଥାନଲ ଉତ୍ପାଦନ ସାମର୍ଥ୍ୟ ଛଅଗୁଣ ବୃଦ୍ଧି ପାଇଛି । ଗତ ଆଠବର୍ଷ ମଧ୍ୟରେ ଇଥାନଲ ମିଶ୍ରଣ ଓ ଜୈବ ଇନ୍ଧନ କାର୍ଯ୍ୟକ୍ରମ ଯୋଗୁ ଭାରତରେ ଶକ୍ତି ସୁରକ୍ଷା ଅଧିକ ମଜଭୁତ ହେବା ସହ ୩୧୮ ଲକ୍ଷ ମେଟ୍ରିକ ଟନ ଅଙ୍ଗାରକାମ୍ଳ ଉତ୍ସରଣ କମ ହୋଇଛି ଓ ପ୍ରାୟ ୫୪,୦୦୦ କୋଟି ବିଦେଶୀ ମୁଦ୍ରାର ମଧ୍ୟ ସଞ୍ଚୟ ହୋଇଛି । ଏହାଛଡ଼ା ୨୦୧୪ରୁ ୨୦୨୨ ମଧ୍ୟରେ ଇଥାନଲ ଯୋଗାଣ ବାବଦ ୮୧,୮୦୦ କୋଟି ଟଙ୍କା ପଇଠ ହୋଇଥିବା ବେଳେ ଚାଷୀମାନଙ୍କ ଖାତାକୁ ୪୯ ହଜାର କୋଟିରୁ ଅଧିକ ଟଙ୍କା ପଠାଯାଇ ପାରିଛି ।
ଇଥାନଲ ମିଶ୍ରଣ କାର୍ଯ୍ୟକ୍ରମ ଅଧିନରେ ପ୍ରଧାନମନ୍ତ୍ରୀ ଦେଶରେ ୧୧ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ତୈଳ ବିପଣନ କମ୍ପାନୀ ଗୁଡ଼ଇକର ୮୪ଟି ପାଇକାରୀ କେନ୍ଦ୍ରର ପ୍ରଧାନମନ୍ତ୍ରୀ ଇ-୨୦ ଇନ୍ଧନ ବ୍ୟବସ୍ଥା ଶୁଭାରମ୍ଭ କରିବେ । ଇ-୨୦ ହେଉଛି ପେଟ୍ରୋଲରେ ଶତକଡ଼ା ୨୦ ଭାଗର ମିଶ୍ରଣ । ସରକାର ୨୦୨୫ ସୁଦ୍ଧା ସମର୍ଣ୍ଣ ଶତକଡ଼ା ୨୦ ଗୁଣ ଇଥାନଲ ମିଶ୍ରଣ ଲକ୍ଷ୍ୟ ହାସଲ କରିବାକୁ ନିଷ୍ପତ୍ତି ନେଇଛନ୍ତି । ତୈଳ ବିପଣନ କମ୍ପାନୀଗୁଡ଼ିକ ଏଥିପାଇଁ ୨ଜି-୩ଜି ଇଥାନଲ ପ୍ଲାଣ୍ଟମାନ ସ୍ଥାପନ କରୁଛନ୍ତି ।
ପ୍ରଧାନମନ୍ତ୍ରୀ ମଧ୍ୟ ଗ୍ରୀନ ମୋବିଲିଟି ରାଲିକୁ ପତାକା ଦେଖାଇ ଶୁଭାରମ୍ଭ କରାଇବେ । ରାଲିରେ ସବୁଜ ଇନ୍ଧନ ଦ୍ୱାରା ବାହାନ ଚଳାଚଳ ପ୍ରଦର୍ଶନ କରାଯିବା ସହ ଏ ସମ୍ପର୍କରେ ସଚେତନତା ସୃଷ୍ଟି କରାଯିବ ।
ଭାରତୀୟ ତୈଳ କମ୍ପାନୀର ‘ଅନବଟଲ’ ପଦକ୍ଷେପର ୟୁନିଫର୍ମ ଆରମ୍ଭ କରିବେ । ଏକକ ବ୍ୟବହାରକ୍ଷମ ପ୍ଲାଷ୍ଟିକର ମୂଳୋତ୍ପାଟନ ନେଇ ପ୍ରଧାନମନ୍ତ୍ରୀଙ୍କ ଦୂରଦୃଷ୍ଟି ପରିପ୍ରେକ୍ଷୀରେ ଭାରତୀୟ ତୈଳ ନିଗମ ପାଇକାରୀ ଗ୍ରାହକଙ୍କୁ ସିଲିଣ୍ଡର ଯୋଗାଇବା ବ୍ୟକ୍ତି ତଥା ଏଲପିଜି ଯୋଗାଣକାରୀଙ୍କ ନିମନ୍ତେ ପରିଚ୍ଛଦ ପ୍ରବର୍ତ୍ତନ କରିଛି । ପୁନଃ ପ୍ରକ୍ରିୟାକୃତ ପଲିଷ୍ଟର (ଆରପିଇଟି) ଓ ତୁଳାରୁ ଏହା ପ୍ରସ୍ତୁତ ହୋଇଛି ।
ପ୍ରଧାନମନ୍ତ୍ରୀ ମଧ୍ୟ ଭାରତୀୟ ତୈଳ ନିଗମର ଘର ଭିତରେ ସୌର ପାକ ପ୍ରସ୍ତୁତି ପପଦ୍ଧତିର ଦ୍ୱୈତ କୁକଟପ୍ ମଡେଲକୁ ଜାତି ଉଦେଶ୍ୟରେ ଉତ୍ସର୍ଗ କରିବେ ଓ ଏହାର ବାଣିଜି୍ୟକ ପ୍ରକ୍ରିୟା ମଧ୍ୟ ଆରମ୍ଭ ହେବ । ପୂର୍ବରୁ ଭାରତୀୟ ତୈଳ ସଂସ୍ଥା ଏକକ କୁକଟପ୍ ସହ ଇନଡୋର ସୋଲାର କୁକିଂ ସିଷ୍ଟମର ନବୋନ୍ମେଷ ସହ ଏହାର ପ୍ୟାଟେଣ୍ଟ ମଧ୍ୟ କରିଥିଲା । ଲୋକଙ୍କ ଠାରୁ ମିଳୁଥିବା ମତାମତ ଅନୁସାରେ ଟୁଇନ କୁକୁଟପ୍ ଇନଡୋର ସୋଲାର କୁକିଂ ସିଷ୍ଟମ ଅଧିକ ବ୍ୟବହାର ଉପଯୋଗୀ ଓ ସହଜ । ଏହି ପଦ୍ଧତି ଉଭୟ ସୌର ଓ ବିକଳ୍ପ ଶକ୍ତି ଉତ୍ସ ବଳରେ ଚାଲିପାରିବ ।
ଟୁମକୁରୁରେ ପ୍ରଧାନମନ୍ତ୍ରୀ
ପ୍ରତିରକ୍ଷା କ୍ଷେତ୍ରରେ ଆତ୍ମନିର୍ଭରତା ଦିଗରେ ଆଉ ଏକ ପାଦ ଅଗ୍ରସରପୂର୍ବକ ପ୍ରଧାନମନ୍ତ୍ରୀ ଟୁମକୁରୁରେ ହାଲ ହେଲିକପ୍ଟର କାରଖାନାକୁ ଜାତି ଉଦେଶ୍ୟରେ ଉତ୍ସର୍ଗ କରିବେ । ପ୍ରଧାନମନ୍ତ୍ରୀ ୨୦୧୬ରେ ମଧ୍ୟ ଏହାର ଶିଳାନ୍ୟାସ କରିଥିଲେ । ଏହା ଏକ ଉତ୍ସର୍ଗୀକୃତ ଗ୍ରୀନଫିଲ୍ଡ ହେଲିକପ୍ଟର କାରଖାନା ଯାହା ହେଲିକପ୍ଟର ନିର୍ମାଣର ସାମର୍ଥ୍ୟର ବାତାବରଣ ସୃଷ୍ଟି କରିବ ।
ଏସିଆର ସର୍ବବୃହତ ଏହି ହେଲିକପ୍ଟର ନିର୍ମାଣ ସୁବିଧାଥିବା କାରଖାନା ପ୍ରାଥମିକ ପର୍ଯ୍ୟାୟରେ ହାଲୁକା ଉପଯୋଗୀ ହେଲିକପ୍ଟର (ଏଲୟୁଏଚ) ତିଆରି କରିବ । ଏଲୟୁଏଚ ତିଆରି ତିନିଟନ ଶ୍ରେଣୀର ହେଲିକପ୍ଟର । ଏହାର ଏକକ ଇଞ୍ଜିନ ଥିବା ସହ ବହୁମୁଖୀ ଉପକାରିତା ରହିଛି ।
ଏହି କାରଖାନା ପରେ ସମ୍ପ୍ରସାରିତ ହୋଇ ହାଲୁକା ଲଢୁଆ ହେଲିକପ୍ଟର (ଏଲସିଏଚ) ଓ ଇଣ୍ଡିଆନ ମଲ୍ଟି ରୋଲ ହେଲିକପ୍ଟର (ଏମଆରଏଚ) ନିର୍ମାଣ କରିବା ସହ, ଏଲସିଏଜ, ଏଲୟୁଏଚ, ସିଭିଲ ଏଏଲଏଚ ଓ ଆଇଏମଆରଏଚ ହେଲିକପ୍ଟରଗୁଡ଼ିକର ମରାମତି ଓ ଫିଟିଂ କାମ ଭବିଷ୍ୟତରେ କରିବାରେ କାର୍ଯ୍ୟକ୍ରମ ରହିଛି । ଭବିଷ୍ୟତରେ ବେସାମରିକ ଏଲୟୁଏଚ ରପ୍ତାନି ପାଇଁ ମଧ୍ୟ ଏହି କାରଖାନାର ସାମର୍ଥ୍ୟ ରହିଛି । ଏହାଫଳରେ ହେଲିକପ୍ଟର ପାଇଁ ସମସ୍ତ ଜ୍ଞାନକୌଶଳ ଆମ ଦେଶରେ ଉପଲବ୍ଧ ହେବ । ଏହାବ୍ୟତୀତ ହେଲିକପ୍ଟର ପରିପାଟୀ, ବିକାଶ ଓ ନିର୍ମାଣ କ୍ଷେତ୍ରରେ ଭାରତ ସମ୍ପୂର୍ଣ୍ଣ ଆତ୍ମନିର୍ଭରଶୀଳତା ମଧ୍ୟ ହାସଲ କରିବ ।
ଏହି କାରଖାନାର ୪.୦ ଶିଳ୍ପମାନର ନିର୍ମାଣ କ୍ଷମତା ରହିଛି । ଟୁମକୁରୁରୁ ହାଲ ଆଗାମୀ ୨୦ ବର୍ଷ ମଧ୍ୟରେ ଏକ ହଜାରରୁ ଅଧିକ ୩-୧୫ ଟନ ଶ୍ରେଣୀୟ ହେଲିକପ୍ଟର ନିର୍ମାଣ କରିବା ଯୋଜନା ରଖିଛି । ଏହାଫଳରେ ସେ ଅଞ୍ଚଳରୁ ପ୍ରାୟ ଛଅ ହଜାରେ ଜନସାଧାରଣଙ୍କୁ କର୍ମନିଯୁକ୍ତି ମିଳିପାରିବ ।
ପ୍ରଧାନମନ୍ତ୍ରୀ ଟୁମକୁରୁ ଶିଳ୍ପାଞ୍ଚଳର ଶିଳାନ୍ୟାସ କରିବେ । ଜାତୀୟ ଶିଳ୍ପ କରିଡର ବିକାଶ କାର୍ଯ୍ୟକ୍ରମ ଅଧିନରେ ଠୁମକୁରୁ ଅଞ୍ଚଳରେ ୮୪୮୪ ଏକକ ପରିମିତ ଅଞ୍ଚଳରେ ଶିଳ୍ପାଞ୍ଚଳ ବିକାଶ ଯୋଜନା ରଖିଛି । ଚେନ୍ନାଇ-ବେଙ୍ଗାଲୁରୁ ଶିଳ୍ପ କରିଡରର ଅଂଶ ବିଶେଷ ଭାବେ ଏହାର ବିକାଶ କରାଯାଉଛି ।
ପ୍ରଧାନମନ୍ତ୍ରୀ ମଧ୍ୟ ଟୁମକୁରୁର ଟିପତୁର ଓ ଚିକ୍କାନାୟାକାହାଲି ଠାରେ ଦୁଇଟି ଜଳ ଜୀବନ ମିଶନ ପ୍ରକଳ୍ପର ଶିଳାନ୍ୟାସ କରିବେ । ଟିପତୁର ବହୁମୁଖୀ ଗ୍ରାମ୍ୟ ପାନୀୟ ଜଳ ଯୋଗାଣ ପ୍ରକଳ୍ପ ୪୩ଠ କୋଟି ଟଙ୍କା ବ୍ୟୟରେ ନିର୍ମିତ ହେବ । ଚିକାନାୟାହାଲୀ ତାଲୁକରେ ୧୪୭ଟି ଜନବସତି ନିମନ୍ତେ ବହୁମୁଖୀ ଜଳଯୋଗାଣ ଯୋଜନା ବାବଦ ପ୍ରାୟ ୧୧୫ କୋଟି ଟଙ୍କା ଖର୍ଚ୍ଚ ହେବ । ସେ ଅଞ୍ଚଳର ଅଧିବାସୀମାନଙ୍କୁ ଏହି ପ୍ରକଳ୍ପ ନିର୍ମଳ ପାନୀୟ ଜଳ ଯୋଗାଇବାରେ ସହାୟକ ହେବ ।
