ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଫେବୃଆରୀ ୧୬ ତାରିଖ ଅପରାହ୍ଣ ପ୍ରାୟ ୪ଟା ସମୟରେ ଦିଲ୍ଲୀର ଭାରତ ମଣ୍ଡପମ୍ ଠାରେ ଭାରତ ଟେକ୍ସ-୨୦୨୫ରେ ସାମିଲ ହେବେ । ଏହି ଅବସରରେ ଉପସ୍ଥିତ ଜନସାଧାରଣଙ୍କୁ ସମ୍ବାଧିତ କରିବେ ।
ଭାରତ ଟେକ୍ସ ୨୦୨୫ ଏକ ବ୍ୟାପକ ବୈଶ୍ୱିକ କାର୍ଯ୍ୟକ୍ରମ ଏବଂ ଏହା ଫେବୃଆରୀ ୧୪ରୁ ୧୭ ତାରିଖ ପର୍ଯ୍ୟନ୍ତ ଭାରତ ମଣ୍ଡପମଠାରେ ଆୟୋଜିତ ହେଉଛି । ଏହା ଏକ ସ୍ୱତନ୍ତ୍ର କାର୍ଯ୍ୟକ୍ରମ କାରଣ, ଏହା କଞ୍ଚାମାଲ ଠାରୁ ଆରମ୍ଭ କରି ବୟନ ଉତ୍ପାଦ ତଥା ସମ୍ପୂର୍ଣ୍ଣ ପ୍ରସ୍ତୁତ ଉତ୍ପାଦର ଶୃଙ୍ଖଳକୁ ଗୋଟିଏ ମଞ୍ଚକୁ ଆଣିବ ।
ଭାରତ ଟେକ୍ସ କପଡ଼ା ଉଦ୍ୟୋଗର ସର୍ବବୃହତ ଏବଂ ସବୁଠାରୁ ବ୍ୟାପକ ଆୟୋଜନ । ଏହା ଏକ ମେଗା ପ୍ରଦର୍ଶନୀ ଯେଉଁଠି ଦୁଇଟି ସ୍ଥାନରେ ବୟନ ଶିଳ୍ପର ସମ୍ପୂର୍ଣ୍ଣ ବ୍ୟବସ୍ଥା ପ୍ରଦର୍ଶିତ ହେବ । ଏହି ଅବସରରେ ୭୦ରୁ ଅଧିକ ସମ୍ମିଳନୀ ଅଧିବେଶନ, ଗୋଲଟେବୁଲ ବୈଠକ, ପ୍ୟାନେଲ ଆଲୋଚନା ଏବଂ ବୈଶ୍ୱିକ ସ୍ତରର ମାଷ୍ଟର କ୍ଲାସେସ ଅନୁଷ୍ଠିତ ହେବ । କାର୍ଯ୍ୟକ୍ରମ ଅବସରରେ ଆୟୋଜିତ ହେବାକୁ ଥିବା ପ୍ରଦର୍ଶନୀରେ ବିଶେଷ ନବାଚାର ଏବଂ ଷ୍ଟାର୍ଟ ଅପ୍ ମଣ୍ଡପ ରହିବ । ଏଥିସହ ହାକାଥନ୍ ଭିତ୍ତିକ ଷ୍ଟାର୍ଟ ଅପ୍ ପିଚ୍ ଫେଷ୍ଟ, ଇନୋଭେସନ ଫେଷ୍ଟ, ଟେକ୍ ଟ୍ୟାଙ୍କସ ଏବଂ ଡିଜାଇନ ଆହ୍ୱାନକୁ ମଧ୍ୟ ସାମିଲ କରାଯିବ । ଏହା ପ୍ରମୁଖ ନିବେଶକ ମାନଙ୍କ ମଧ୍ୟରେ ଷ୍ଟାର୍ଟ ଅପ୍ ଗୁଡ଼ିକ ପାଇଁ ବିତ୍ତୀୟ ସହାୟତାର ଅବସର ପ୍ରଦାନ କରିବ ।
ଭାରତ ଟେକ୍ସ ୨୦୨୫ରେ ନୀତି ନିର୍ମାତାଗଣ, ବୈଶ୍ୱିକ ସିଇଓମାନଙ୍କ ସହିତ ୫୦୦୦ ରୁ ଅଧିକ ପ୍ରଦର୍ଶକ, ୧୨୦ରୁ ଅଧିକ ଦେଶର ୬୦୦୦ ଆନ୍ତର୍ଜାତିକ କ୍ରେତା ଏବଂ ଅନ୍ୟାନ୍ୟ ଅତିଥିମାନେ ଯୋଗ ଦେବା ଆଶା କରାଯାଏ । ଆନ୍ତର୍ଜାତିକ ବସ୍ତ୍ର ନିର୍ମାତା ସଂଘ (ଆଇଟିଏମଏଫ), ଆନ୍ତର୍ଜାତିକ କପା ପରାମର୍ଶଦାତା କମିଟି (ଆଇସିଏସି), ଇଉରାଟେକ୍ସ, ଟେକ୍ସଟାଇଲ ଏକ୍ସଚେଞ୍ଜ, ୟୁଏସ ଫେସନ ଇଣ୍ଡଷ୍ଟ୍ରି ଆସୋସିଏସନ (ୟୁଏସଏଫଆଇଏ) ଏବଂ ଅନ୍ୟମାନେ ମଧ୍ୟ ଅଂଶ ଗ୍ରହଣ କରିବେ ।
