ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଆନ୍ଧ୍ରପ୍ରଦେଶର ବିଶାଖାପାଟଣାରେ ଏକାଦଶ ଅନ୍ତର୍ଜାତୀୟ ଯୋଗ ଦିବସ (ଆଇଓ୍ୱାଇଡି) କାର୍ଯ୍ୟକ୍ରମରେ ଉଦବୋଧନ ଦେଇଛନ୍ତି । ପ୍ରଧାନମନ୍ତ୍ରୀ ଅନ୍ତର୍ଜାତୀୟ ଯୋଗ ଦିବସ ପାଳନର ନେତୃତ୍ୱ ନେଇଥିଲେ ଏବଂ ଯୋଗ ଅଧିବେଶନରେ ଅଂଶଗ୍ରହଣ କରିଥିଲେ ।
ଏହି ଅବସରରେ ପ୍ରଧାନମନ୍ତ୍ରୀ ଭାରତ ଏବଂ ବିଶ୍ୱର ଲୋକମାନଙ୍କୁ ଅନ୍ତର୍ଜାତୀୟ ଯୋଗ ଦିବସରେ ହାର୍ଦ୍ଦିକ ଶୁଭେଚ୍ଛା ଜଣାଇଥିଲେ । ସେ କହିଥିଲେ, ଚଳିତ ବର୍ଷ ଏକାଦଶ ଯୋଗ ଦିବସରେ ସାମୂହିକ ଭାବରେ ଯୋଗ ଅଭ୍ୟାସ କରିବା ପାଇଁ ସାରା ବିଶ୍ୱ ଏକତ୍ରିତ ହୋଇଛି । ଯୋଗର ବିଶେଷତ୍ୱ ହେଉଛି ‘‘ଏକଜୁଟ ହେବା’’ ଏବଂ ଯୋଗ କିପରି ବିଶ୍ୱକୁ ଏକତ୍ରିତ କରିଛି, ତାହା ହୃଦୟଙ୍ଗମ କରିବା ଉତ୍ସାହଜନକ । ଗତ ଦଶନ୍ଧି ଧରି ଯୋଗର ନିରନ୍ତର ଯାତ୍ରା ଉପରେ ଗୁରୁତ୍ୱାରୋପ କରି ଶ୍ରୀ ମୋଦୀ ସେହି ମୁହୂର୍ତ୍ତକୁ ମନେ ପକାଇଥିଲେ ଯେତେବେଳେ ଭାରତ ମିଳିତ ଜାତିସଂଘରେ ଅନ୍ତର୍ଜାତୀୟ ଯୋଗ ଦିବସ ପାଳନର ପ୍ରସ୍ତାବ ଦେଇଥିଲା । ସେ ଉଲ୍ଲେଖ କରିଥିଲେ, ୧୭୫ଟି ଦେଶ ଏହି ପ୍ରସ୍ତାବକୁ ସମର୍ଥନ କରିଥିଲେ, ଯାହା ବ୍ୟାପକ ବିଶ୍ୱ ଏକତାର ଏକ ଅନନ୍ୟ ଉଦାହରଣ । ଏହି ସମର୍ଥନ କେବଳ ଏକ ପ୍ରସ୍ତାବ ପାଇଁ ନୁହେଁ ବରଂ ମାନବତାର ବୃହତ୍ତର ମଙ୍ଗଳ ପାଇଁ ବିଶ୍ୱର ସାମୂହିକ ପ୍ରୟାସର ନିଦର୍ଶନ ବୋଲି ସେ ଜୋର ଦେଇ କହିଥିଲେ । ପ୍ରଧାନମନ୍ତ୍ରୀ ଆହୁରି ମଧ୍ୟ କହିଥିଲେ, ଏଗାର ବର୍ଷ ପରେ, ଯୋଗ ବିଶ୍ୱର ଲକ୍ଷ ଲକ୍ଷ ଲୋକଙ୍କ ଜୀବନଶୈଳୀର ଏକ ଅବିଚ୍ଛେଦ୍ୟ ଅଂଶ ପାଲଟିଛି। ଦିବ୍ୟାଙ୍ଗ ଜନମାନେ ବ୍ରେଲିରେ ଯୋଗ ପାଠ ପଢ଼ିବା ଏବଂ ବୈଜ୍ଞାନିକମାନେ ମହାକାଶରେ ଯୋଗ ଅଭ୍ୟାସ କରିବା ଗୌରବର ବିଷୟ । ଯୋଗ ଅଲିମ୍ପିଆଡରେ ଗ୍ରାମାଞ୍ଚଳର ଯୁବକମାନଙ୍କ ଉତ୍ସାହଜନକ ଅଂଶଗ୍ରହଣକୁ ମଧ୍ୟ ସେ ଉଲ୍ଲେଖ କରିଥିଲେ । ଶ୍ରୀ ମୋଦୀ ଗୁରୁତ୍ୱାରୋପ କରି କହିଥିଲେ ଯେ ସିଡନୀ ଅପେରା ହାଉସର ପଦକ୍ଷେପ ହେଉ, ମାଉଣ୍ଟ ଏଭରେଷ୍ଟର ଶିଖର ହେଉ, କିମ୍ବା ସମୁଦ୍ରର ବିଶାଳ ବିସ୍ତୃତି, ସବୁଠି ବାର୍ତ୍ତା ଗୋଟିଏ, ‘‘ଯୋଗ ସମସ୍ତଙ୍କ ପାଇଁ, ଯୋଗ ସୀମା, ପୃଷ୍ଠଭୂମି, ବୟସ ଓ କ୍ଷମତାଠାରୁ ଊର୍ଦ୍ଧ୍ୱରେ।’’
ବିଶାଖାପାଟଣାରେ ଉପସ୍ଥିତ ଥିବାରୁ ପ୍ରଧାନମନ୍ତ୍ରୀ ସନ୍ତୋଷ ପ୍ରକାଶ କରିଥିଲେ । ସେ ଏହି ସହରକୁ ପ୍ରକୃତି ଏବଂ ପ୍ରଗତିର ସଙ୍ଗମସ୍ଥଳ ଭାବରେ ବର୍ଣ୍ଣନା କରିଥିଲେ। ଶ୍ରୀ ମୋଦୀ ଏହି କାର୍ଯ୍ୟକ୍ରମର ଉତ୍କୃଷ୍ଟ ଆୟୋଜନ ପାଇଁ ଏଥିରେ ସମ୍ପୃକ୍ତ ଲୋକମାନଙ୍କୁ ପ୍ରଶଂସା କରିଥିଲେ। ସେ ମଧ୍ୟ ଶ୍ରୀ ଚନ୍ଦ୍ରବାବୁ ନାଇଡୁ ଓ ଶ୍ରୀ ପବନ କଲ୍ୟାଣଙ୍କୁ ସେମାନଙ୍କର ନେତୃତ୍ୱ ପାଇଁ ଅଭିନନ୍ଦନ ଜଣାଇଥିଲେ । ପ୍ରଧାନମନ୍ତ୍ରୀ ଆଲୋକପାତ କରି କହିଥିଲେ ଯେ ସେମାନଙ୍କ ନେତୃତ୍ୱରେ ଆନ୍ଧ୍ର ପ୍ରଦେଶ ଏକ ଉଲ୍ଲେଖନୀୟ ପଦକ୍ଷେପ ସ୍ୱରୂପ ‘ଯୋଗାନ୍ଧ୍ର ଅଭିଯାନ’ ଆରମ୍ଭ କରିଥିଲା । ଶ୍ରୀ ନାରା ଲୋକେଶଙ୍କ ପ୍ରୟାସକୁ ମଧ୍ୟ ବିଶେଷ ଭାବରେ ପ୍ରଶଂସା କରି ସେ କହିଥିଲେ, ଯୋଗ କିପରି ଏକ ପ୍ରକୃତ ସାମାଜିକ ଉତ୍ସବ ହୋଇପାରେ ଏବଂ ସମାଜର ପ୍ରତ୍ୟେକ ବର୍ଗକୁ ଏଥିରେ କିଭଳି ସାମିଲ କରାଯାଇପାରିବ ତାହା ଶ୍ରୀ ଲୋକେଶ ପ୍ରଦର୍ଶନ କରିଛନ୍ତି। ଗତ ଏକରୁ ଦେଢ଼ ମାସ ମଧ୍ୟରେ, ଶ୍ରୀ ଲୋକେଶ ଯୋଗାନ୍ଧ୍ର ଅଭିଯାନ ମାଧ୍ୟମରେ ଅନନ୍ୟ ପ୍ରତିବଦ୍ଧତା ଦେଖାଇଛନ୍ତି ଏବଂ ତାଙ୍କ ପ୍ରୟାସ ପାଇଁ ସେ ପ୍ରଶଂସାର ପାତ୍ର ବୋଲି ପ୍ରଧାନମନ୍ତ୍ରୀ ମତ ଦେଇଥିଲେ ।
ପ୍ରଧାନମନ୍ତ୍ରୀ ଜୋର ଦେଇ କହିଥିଲେ, ଯୋଗାନ୍ଧ୍ର ଅଭିଯାନରେ ଦୁଇ କୋଟିରୁ ଅଧିକ ଲୋକ ସାମିଲ ହୋଇଛନ୍ତି, ଯାହା ଦୃଢ଼ ଜନ ଭାଗୀଦାରୀ ଭାବନାକୁ ପ୍ରତିଫଳିତ କରୁଛି । ଏହି ଭାବନା ଏକ ବିକଶିତ ଭାରତ ପାଇଁ ମୂଳଦୁଆ ଗଠନ କରିଛି । ଯେତେବେଳେ ନାଗରିକମାନେ କୌଣସି ଏକ ଅଭିଯାନର ନେତୃତ୍ୱକୁ ସ୍ୱୀକୃତି ଦିଅନ୍ତି ଏବଂ ସକ୍ରିୟ ଭାବରେ ଅଂଶଗ୍ରହଣ କରନ୍ତି, ସେତେବେଳେ କୌଣସି ଲକ୍ଷ୍ୟରେ ପହଞ୍ଚିବା ଆଉ ଅସମ୍ଭବ ହୋଇ ରହେ ନାହିଁ । ବିଶାଖାପାଟଣାର ସମସ୍ତ କାର୍ଯ୍ୟକ୍ରମରେ ଲୋକଙ୍କ ସଦିଚ୍ଛା ଏବଂ ଉତ୍ସାହଜନକ ପ୍ରୟାସ ଦୃଶ୍ୟମାନ ହୋଇପାରିଛି ବୋଲି ଶ୍ରୀ ମୋଦୀ କହିଥିଲେ।
ଚଳିତ ବର୍ଷର ଅନ୍ତର୍ଜାତୀୟ ଯୋଗ ଦିବସର ବାର୍ତ୍ତା, ‘‘ଏକ ପୃଥିବୀ, ଏକ ସ୍ୱାସ୍ଥ୍ୟ ପାଇଁ ଯୋଗ’’ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ, ଏହା ଏକ ଗଭୀର ସତ୍ୟକୁ ପ୍ରତିଫଳିତ କରେ ଏବଂ ତାହା ହେଉଛି ପୃଥିବୀର ପ୍ରତ୍ୟେକ ପ୍ରାଣୀର ସ୍ୱାସ୍ଥ୍ୟ ପରସ୍ପର ସହିତ ଜଡିତ । ଆମର ଖାଦ୍ୟ ଉତ୍ପାଦନ କରୁଥିବା ମାଟି, ଆମକୁ ଜଳ ଯୋଗାଉଥିବା ନଦୀ, ଆମର ପରିସଂସ୍ଥାକୁ ପରିଚାଳିତ କରୁଥିବା ପ୍ରାଣୀ ଏବଂ ଆମକୁ ପୋଷଣ ଦେଉଥିବା ଉଦ୍ଭିଦଗୁଡ଼ିକର ସ୍ୱାସ୍ଥ୍ୟ ଉପରେ ମାନବ କଲ୍ୟାଣ ନିର୍ଭର କରେ । ଯୋଗ ଆମକୁ ଏହି ସମ୍ପର୍କ ଉପରେ ସଚେତନ କରାଏ । ବିଶ୍ୱ ସହିତ ଏକରୂପତା ଆଡକୁ ଯାତ୍ରା ଦିଗରେ ମାର୍ଗଦର୍ଶନ କରେ । ଯୋଗ ଆମକୁ ଶିଖାଏ ଯେ ଆମେ ପୃଥକ ବ୍ୟକ୍ତି ନୋହୁଁ ବରଂ ପ୍ରକୃତିର ଅଭିନ୍ନ ଅଂଶବିଶେଷ । ପ୍ରାରମ୍ଭରେ, ଆମେ ଆମର ନିଜସ୍ୱ ସ୍ୱାସ୍ଥ୍ୟ ଏବଂ ସୁସ୍ଥତାର ଯତ୍ନ ନେବାକୁ ଶିଖୁ, କିନ୍ତୁ ଧୀରେ ଧୀରେ, ଏହି ଯତ୍ନ ଆମର ପରିବେଶ, ସମାଜ ଏବଂ ପୃଥିବୀ ଆଡ଼କୁ ବିସ୍ତାରିତ ହୁଏ ବୋଲି ପ୍ରଧାନମନ୍ତ୍ରୀ କହିଥିଲେ। ଯୋଗ ଏକ ଗଭୀର ବ୍ୟକ୍ତିଗତ ଶୃଙ୍ଖଳା ଯାହା, ସେହି ସମୟରେ, ଏକ ସାମୂହିକ ବ୍ୟବସ୍ଥା ଭାବରେ କାର୍ଯ୍ୟ କରେ - ଯାହା ବ୍ୟକ୍ତିକୁ ମୋ ଠାରୁ ଆମେ ପର୍ଯ୍ୟନ୍ତ ଯାତ୍ରା ଆଡ଼କୁ ନେଇ ଯାଏ ବୋଲି ଶ୍ରୀ ମୋଦୀ କହିଥିଲେ ।
ଶ୍ରୀ ମୋଦୀ କହିଥିଲେ,‘ମୁଁରୁ ଆମେ’ର ଭାବନା ଭାରତର ଆତ୍ମାକୁ ପରିପୂର୍ଣ୍ଣ କରିଥାଏ। ଯେତେବେଳେ ଜଣେ ବ୍ୟକ୍ତି ସ୍ୱାର୍ଥରୁ ଊର୍ଦ୍ଧ୍ୱକୁ ଉଠି ସମାଜ ବିଷୟରେ ଚିନ୍ତା କରିବା ଆରମ୍ଭ କରେ, ସେତେବେଳେ ସମଗ୍ର ମାନବତାର କଲ୍ୟାଣ ସମ୍ଭବ ହୋଇପାରିଥାଏ । ସେ ଭାରତୀୟ ସଂସ୍କୃତି ସମ୍ପର୍କରେ ଉଲ୍ଲେଖ କରି କହିଥିଲେ, ଏହା ଆମକୁ "ସର୍ବେ ଭବନ୍ତୁ ସୁଖିନଃ"ର ମୂଲ୍ୟ ଶିକ୍ଷା ଦିଏ। ସମସ୍ତଙ୍କ କଲ୍ୟାଣ ହେଉଛି ମନୁଷ୍ୟର ପରମ କର୍ତ୍ତବ୍ୟ। ‘ମୁଁ’ ରୁ ‘ଆମେ’ ପର୍ଯ୍ୟନ୍ତ ଏହି ଯାତ୍ରା ସେବା, ସମର୍ପଣ ଏବଂ ସହାବସ୍ଥାନର ମୂଳଦୁଆ ପ୍ରତିଷ୍ଠା କରେ । ଏହି ଚିନ୍ତାଧାରା ହିଁ ସାମାଜିକ ସଦ୍ଭାବନାକୁ ପ୍ରୋତ୍ସାହିତ କରେ ବୋଲି ପ୍ରଧାନମନ୍ତ୍ରୀ କହିଥିଲେ ।
ବିଶ୍ୱର ବିଭିନ୍ନ ସ୍ଥାନରେ ବଢ଼ୁଥିବା ଚାପ, ଅଶାନ୍ତି ଏବଂ ଅସ୍ଥିରତା ଉପରେ ଚିନ୍ତା ପ୍ରକଟ କରି ଶ୍ରୀ ମୋଦୀ କହିଥିଲେ, ଏପରି ସମୟରେ ଯୋଗ ଶାନ୍ତିର ମାର୍ଗ ପ୍ରଦାନ କରେ । ଯୋଗ ହେଉଛି ଏକ ବିରାମ ବଟନ୍। ମାନବଜାତିକୁ ନିଃଶ୍ୱାସପ୍ରଶ୍ୱାସ ନେବା, ସନ୍ତୁଳନ ରକ୍ଷା କରିବା ଏବଂ ପୁଣି ଥରେ ସୁସ୍ଥ ହେବା ପାଇଁ ଏହା ସହାୟକ ହୋଇଥାଏ। ପ୍ରଧାନମନ୍ତ୍ରୀ ଅନ୍ତର୍ଜାତୀୟ ଯୋଗ ଦିବସ ଅବସରରେ ବିଶ୍ୱ ସମୂଦାୟକୁ ଏକ ବିଶେଷ ନିବେଦନ କରି କହିଥିଲେ, ‘‘ଏହି ଯୋଗ ଦିବସକୁ ମାନବତା ପାଇଁ ଯୋଗ 2.0ର ଶୁଭାରମ୍ଭ ହେବାକୁ ଦିଅନ୍ତୁ, ଯେଉଁଠାରେ ଆଭ୍ୟନ୍ତରୀଣ ଶାନ୍ତି ବିଶ୍ୱ ନୀତିରେ ପରିଣତ ହେବ।’’ ସେ ଗୁରୁତ୍ୱାରୋପ କରି କହିଥିଲେ ଯେ, ଯୋଗ କେବଳ ଏକ ବ୍ୟକ୍ତିଗତ ଅଭ୍ୟାସ ହେବା ଉଚିତ୍ ନୁହେଁ ବରଂ ବିଶ୍ୱ ସହଭାଗୀତାର ଏକ ମାଧ୍ୟମ ଭାବରେ ବିକଶିତ ହେବା ଉଚିତ୍ । ପ୍ରତ୍ୟେକ ଦେଶ ଏବଂ ପ୍ରତ୍ୟେକ ସମାଜକୁ ଯୋଗକୁ ସେମାନଙ୍କର ଜୀବନଶୈଳୀ ଏବଂ ସାର୍ବଜନୀନ ନୀତିରେ ଅନ୍ତର୍ଭୁକ୍ତ କରିବାକୁ ସେ ଆହ୍ୱାନ କରିଥିଲେ । ପ୍ରଧାନମନ୍ତ୍ରୀ ଏକ ଶାନ୍ତିପୂର୍ଣ୍ଣ, ସନ୍ତୁଳିତ ଏବଂ ସ୍ଥାୟୀ ବିଶ୍ୱକୁ ଆଗକୁ ବଢ଼ାଇବା ପାଇଁ ଏକ ସାମୂହିକ ପ୍ରୟାସର ପରିକଳ୍ପନା କରିଥିଲେ। ସେ କହିଥିଲେ, ଯୋଗ ବିଶ୍ୱକୁ ସଂଘର୍ଷରୁ ସହଯୋଗ ଏବଂ ଚାପରୁ ସମାଧାନ ଦିଗରେ ମାର୍ଗଦର୍ଶନ କରିବା ଉଚିତ"।
ଆଧୁନିକ ଗବେଷଣା ମାଧ୍ୟମରେ ଯୋଗ ବିଜ୍ଞାନକୁ ବିଶ୍ୱବ୍ୟାପୀ ପ୍ରସାରକୁ ସମର୍ଥନ କରିବା ପାଇଁ ଭାରତର ପ୍ରୟାସ ଉପରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ। ସେ କହିଥିଲେ, ଦେଶର ପ୍ରମୁଖ ଚିକିତ୍ସା ପ୍ରତିଷ୍ଠାନଗୁଡ଼ିକ ଯୋଗ ଗବେଷଣାରେ ସକ୍ରିୟ ଭାବରେ ନିୟୋଜିତ ଅଛନ୍ତି। ଏହାର ଲକ୍ଷ୍ୟ ହେଉଛି ସମସାମୟିକ ଚିକିତ୍ସା ପଦ୍ଧତି ମଧ୍ୟରେ ଏହାର ବୈଜ୍ଞାନିକ ପ୍ରାସଙ୍ଗିକତା ପ୍ରମାଣ କରିବା । ଭାରତ ଏହାର ଚିକିତ୍ସା ଏବଂ ଗବେଷଣା ପ୍ରତିଷ୍ଠାନ ମାଧ୍ୟମରେ ଯୋଗ କ୍ଷେତ୍ରରେ ପ୍ରମାଣ-ଭିତ୍ତିକ ଚିକିତ୍ସାକୁ ପ୍ରୋତ୍ସାହିତ କରୁଛି । ଏହି ଦିଗରେ ଅନୁକରଣୀୟ ଅବଦାନ ପାଇଁ ନୂଆଦିଲ୍ଲୀସ୍ଥିତ ଅଖିଳ ଭାରତୀୟ ଚିକିତ୍ସା ବିଜ୍ଞାନ ସଂସ୍ଥାନ (ଏମ୍ସ) କୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ । ଏମ୍ସ ଗବେଷଣା ନିଷ୍କର୍ଷକୁ ଉଦ୍ଧୃତ କରି ସେ କହିଥିଲେ, ଯୋଗ ହୃଦସ୍ପନ୍ଦନ ଏବଂ ସ୍ନାୟୁଗତ ରୋଗର ଚିକିତ୍ସାରେ ଗୁରୁତ୍ୱପୂର୍ଣ୍ଣ ପ୍ରଭାବ ଦେଖାଇଛି। ମହିଳାଙ୍କ ସ୍ୱାସ୍ଥ୍ୟ ଏବଂ ମାନସିକ ସୁସ୍ଥତାରେ ମଧ୍ୟ ଉନ୍ନତି ଆଣିପାରିଛି ।
ଶ୍ରୀ ମୋଦୀ କହିଥିଲେ, ଜାତୀୟ ଆୟୁଷ ମିଶନ ମାଧ୍ୟମରେ, ଯୋଗ ଏବଂ ସୁସ୍ଥତାର ବାର୍ତ୍ତା ସାରା ଦେଶରେ ସକ୍ରିୟ ଭାବରେ ପ୍ରସାରିତ ହେଉଛି । ଡିଜିଟାଲ ପ୍ରଯୁକ୍ତିବିଦ୍ୟା ଏହି ପ୍ରୟାସରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି । ଯୋଗ ପୋର୍ଟାଲ୍ ଏବଂ ଯୋଗାନ୍ଧ୍ର ପୋର୍ଟାଲ୍ ମାଧ୍ୟମରେ ଦେଶବ୍ୟାପୀ ଦଶ ଲକ୍ଷରୁ ଅଧିକ କାର୍ଯ୍ୟକ୍ରମ ପଞ୍ଜୀକୃତ ହୋଇଛି। ଏହା ସାରା ଦେଶରେ ଯୋଗର ପ୍ରଚାର-ପ୍ରସାରର ଉଲ୍ଲେଖନୀୟ ବିସ୍ତାରକୁ ସୂଚିତ କରେ । ଭାରତର ପ୍ରତ୍ୟେକ କୋଣରେ ହେଉଥିବା କାର୍ଯ୍ୟକ୍ରମଗୁଡ଼ିକର ବ୍ୟାପକତା ଯୋଗର ବର୍ଦ୍ଧିତ ପ୍ରଭାବକୁ ପ୍ରତିଫଳିତ କରୁଛି ବୋଲି ସେ କହିଥିଲେ ।
ବିଶ୍ୱସ୍ତରରେ ‘ହିଲ୍ ଇନ୍ ଇଣ୍ଡିଆ’ ବା ‘ଭାରତରେ ଆରୋଗ୍ୟ ଲାଭ’ ମନ୍ତ୍ରର ବର୍ଦ୍ଧିତ ଲୋକପ୍ରିୟତାକୁ ଦୃଷ୍ଟିରେ ରଖି, ଭାରତ ଚିକିତ୍ସା ଓ ଆରୋଗ୍ୟ ପାଇଁ ଏକ ପ୍ରମୁଖ ଗନ୍ତବ୍ୟସ୍ଥଳ ଭାବରେ ଉଦୟ ହୋଇଛି ବୋଲି ଶ୍ରୀ ମୋଦୀ କହିଥିଲେ । ସେ କହିଥିଲେ, ଯୋଗ ଏହି ବିକାଶରେ ଏକ ପ୍ରମୁଖ ଭୂମିକା ଗ୍ରହଣ କରୁଛି । ଏହି ଅଭ୍ୟାସକୁ ମାନକୀକରଣ କରିବା ପାଇଁ ଏକ ସାଧାରଣ ଯୋଗ ପ୍ରୋଟୋକଲ ବିକଶିତ ହୋଇଥିବାରୁ ସେ ସନ୍ତୋଷ ବ୍ୟକ୍ତ କରିଥିଲେ । ଯୋଗ ପ୍ରମାଣନ ବୋର୍ଡର ପ୍ରୟାସ ଉପରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ । ଏହା ୬.୫ ଲକ୍ଷରୁ ଅଧିକ ସ୍ୱେଚ୍ଛାସେବୀଙ୍କୁ ତାଲିମ ଦେଇଛି ଏବଂ ପ୍ରାୟ ୧୩୦ଟି ପ୍ରତିଷ୍ଠାନକୁ ସ୍ୱୀକୃତି ଦେଇଛି। ଏକ ସାମଗ୍ରୀକ ସୁସ୍ଥତା ଇକୋସିଷ୍ଟମ ଗଠନର ଅଂଶ ଭାବରେ ମେଡିକାଲ କଲେଜଗୁଡ଼ିକରେ ୧୦ ଦିନିଆ ଯୋଗ ମଡ୍ୟୁଲକୁ ସାମିଲ କରିବା ବିଷୟରେ ମଧ୍ୟ ସେ ଉଲ୍ଲେଖ କରିଥିଲେ । ପ୍ରଧାନମନ୍ତ୍ରୀ କହିଥିଲେ, ସାରା ଦେଶର ଆୟୁଷ୍ମାନ ଆରୋଗ୍ୟ ମନ୍ଦିରରେ ତାଲିମପ୍ରାପ୍ତ ଯୋଗ ପ୍ରଶିକ୍ଷକମାନଙ୍କୁ ନିୟୋଜିତ କରାଯାଉଛି । ଭାରତର ସୁସ୍ଥତା ଇକୋସିଷ୍ଟମରୁ ବିଶ୍ୱ ସମୂଦାୟକୁ ଲାଭ ପ୍ରଦାନ କରିବା ପାଇଁ ସ୍ୱତନ୍ତ୍ର ଇ-ଆୟୁଷ ଭିସା ପ୍ରଦାନ ବିଷୟରେ ପ୍ରଧାନମନ୍ତ୍ରୀ ଘୋଷଣା କରିଥିଲେ ।
ମେଦବହୁଳତା ସମସ୍ୟା ପ୍ରତି ଦୃଷ୍ଟି ଆକର୍ଷଣ କରି, ଏହାକୁ ଏକ ବର୍ଦ୍ଧିତ ବିଶ୍ୱ ଆହ୍ୱା ବୋଲି ଶ୍ରୀ ମୋଦୀ ଦର୍ଶାଇଥିଲେ । ସେ ମନ କୀ ବାତ କାର୍ଯ୍ୟକ୍ରମରେ ଏହି ବିଷୟ ଉପରେ ତାଙ୍କର ଆଲୋଚନାକୁ ବିସ୍ତୃତ ଭାବରେ ମନେ ପକାଇଥିଲେ। ପ୍ରଧାନମନ୍ତ୍ରୀ କହିଥିଲେ, ଦୈନିକ ଖାଦ୍ୟରେ ତେଲ ବ୍ୟବହାରକୁ ୧୦ ପ୍ରତିଶତ ହ୍ରାସ କରିବା ପାଇଁ ଏକ ଚ୍ୟାଲେଞ୍ଜ ଆରମ୍ଭ କରିଥିଲେ । ଭାରତ ଏବଂ ବିଶ୍ୱର ନାଗରିକମାନଙ୍କୁ ଏହି ପଦକ୍ଷେପରେ ସାମିଲ ହେବା ପାଇଁ ତାଙ୍କର ଆହ୍ୱାନକୁ ଦୋହରାଇଲେ । ବ୍ୟକ୍ତିମାନେ କିପରି ସେମାନଙ୍କ ଖାଦ୍ୟରେ ଅତି କମରେ ୧୦ ପ୍ରତିଶତ ତେଲ ବ୍ୟବହାର ହ୍ରାସ କରିପାରିବେ ସେ ବିଷୟରେ ସଚେତନତା ବୃଦ୍ଧି କରିବାର ଆବଶ୍ୟକତା ଉପରେ ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ। ସେ କହିଥିଲେ, ତେଲ ହ୍ରାସ କରିବା, ଅସ୍ୱାସ୍ଥ୍ୟକର ଖାଦ୍ୟ ପରିହାର କରିବା ଏବଂ ଯୋଗ ଅଭ୍ୟାସ କରିବା ଏକ ସୁସ୍ଥ ଜୀବନଶୈଳୀର ଗୁରୁତ୍ୱପୂର୍ଣ୍ଣ ଅଂଶବିଶେଷ ।
ପ୍ରଧାନମନ୍ତ୍ରୀ ଯୋଗକୁ ଏକ ଜନ ଆନ୍ଦୋଳନରେ ପରିଣତ କରିବାକୁ ସମସ୍ତଙ୍କୁ ଆହ୍ୱାନ କରିଥିଲେ। ସେ କହିଥିଲେ ଯେ ଏହା ଏକ ଆନ୍ଦୋଳନ ଯାହା ବିଶ୍ୱକୁ ଶାନ୍ତି, ସ୍ୱାସ୍ଥ୍ୟ ଏବଂ ସୌହାର୍ଦ୍ଦ୍ୟ ଆଡ଼କୁ ନେଇଯିବ । ପ୍ରତ୍ୟେକ ବ୍ୟକ୍ତି ଜୀବନରେ ସନ୍ତୁଳନ ଆଣିବା ପାଇଁ ଯୋଗ ସହିତ ନିଜର ଦିନ ଆରମ୍ଭ କରିବା ଉଚିତ ଏବଂ ପ୍ରତ୍ୟେକ ସମାଜ ଚାପରୁ ମୁକ୍ତି ପାଇବା ପାଇଁ ଯୋଗକୁ ଗ୍ରହଣ କରିବା ଉଚିତ । ପ୍ରଧାନମନ୍ତ୍ରୀ ଶେଷରେ କହିଥିଲେ, ଯୋଗ ମାନବଜାତିକୁ ଏକତା ସୂତ୍ରରେ ବାନ୍ଧିଥାଏ। ‘ଏକ ପୃଥିବୀ, ଏକ ସ୍ୱାସ୍ଥ୍ୟ ପାଇଁ ଯୋଗ’ ବିଶ୍ୱର ଏକ ସଂକଳ୍ପ ହେବା ଉଚିତ ।"
ଏହି କାର୍ଯ୍ୟକ୍ରମରେ ଆନ୍ଧ୍ରପ୍ରଦେଶର ରାଜ୍ୟପାଳ ଶ୍ରୀ ସୟଦ ଅବଦୁଲ ନାଜିର, ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଶ୍ରୀ ଏନ ଚନ୍ଦ୍ରବାବୁ ନାଇଡୁ, କେନ୍ଦ୍ର କ୍ୟାବିନେଟ ମନ୍ତ୍ରୀ ଶ୍ରୀ ରାମମୋହନ ନାଇଡୁ କିଞ୍ଜାରାପୁ, ଶ୍ରୀ ଯାଧବ ପ୍ରତାପରାଓ ଗଣପତରାଓ, ଡକ୍ଟର ଚନ୍ଦ୍ର ଶେଖର ପେମାସାନି, ଶ୍ରୀ ଭୂପତି ରାଜୁ ଶ୍ରୀନିବାସ ବର୍ମା ଉପସ୍ଥିତ ଥିଲେ ।
ପୃଷ୍ଠଭୂମି
ଏକାଦଶ ଅନ୍ତର୍ଜାତୀୟ ଯୋଗ ଦିବସ (ଆଇଡିଓ୍ୱାଇ) ଅବସରରେ, ପ୍ରଧାନମନ୍ତ୍ରୀ ବିଶାଖାପାଟଣାରୁ ଜାତୀୟ ସମାରୋହର ନେତୃତ୍ୱ ନେଇଥିଲେ । ସେ ପ୍ରାୟ ୫ ଲକ୍ଷ ଅଂଶଗ୍ରହଣକାରୀଙ୍କ ସହିତ ବିଶାଖାପାଟଣାର ବେଳାଭୂମିରେ ସାଧାରଣ ଯୋଗ ପ୍ରୋଟୋକଲ (ସିଓ୍ୱାଇପି) ଅଧିବେଶନରେ ଅଂଶଗ୍ରହଣ କରିଥିଲେ। ଏହା ସହିତ ଦେଶକୁ ଏକ ସୁସଙ୍ଗତ ଯୋଗ ପ୍ରଦର୍ଶନରେ ନେତୃତ୍ୱ ଦେଇଥିଲେ । ସାରା ଭାରତରେ ୩.୫ ଲକ୍ଷରୁ ଅଧିକ ସ୍ଥାନରେ ଏକକାଳୀନ ଯୋଗ ସଙ୍ଗମ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି ବର୍ଷ, ମାଇଗଭ୍ ଏବଂ ମାଇ ଭାରତ ଭଳି ପ୍ଲାଟଫର୍ମରେ ଯୋଗ ଅନପ୍ଲଗଡ୍ ଅଧୀନରେ ପରିବାର ସହିତ ଯୋଗ ଏବଂ ଯୁବ-କୈନ୍ଦ୍ରିକ ପଦକ୍ଷେପ ଭଳି ବିଶେଷ ପ୍ରତିଯୋଗିତା ଆରମ୍ଭ କରାଯାଇଛି, ଯାହା ଜନସାଧାରଣଙ୍କ ଅଂଶଗ୍ରହଣକୁ ଉତ୍ସାହିତ କରୁଛି ।
ଏହି ବର୍ଷର ବିଷୟବସ୍ତୁ, ‘‘ଏକ ପୃଥିବୀ, ଏକ ସ୍ୱାସ୍ଥ୍ୟ ପାଇଁ ଯୋଗ’’ ମାନବ ଏବଂ ସମ୍ପୂର୍ଣ୍ଣ ବିଶ୍ୱର ସ୍ୱାସ୍ଥ୍ୟର ସମନ୍ୱୟକୁ ପ୍ରୋତ୍ସାହିତ କରୁଛି । ଏହା ଭାରତର ‘ସର୍ବେ ସନ୍ତୁ ନିରାମୟ’ (ସମସ୍ତେ ରୋଗ ମୁକ୍ତ ରୁହନ୍ତୁ) ଦର୍ଶନର ମୂଳରେ ଥିବା ସାମୂହିକ ସୁସ୍ଥତାର ବିଶ୍ୱ ଦୃଷ୍ଟିକୋଣକୁ ପ୍ରତିଫଳିତ କରିଥାଏ । ୨୦୧୫ ମସିହାରେ ଆରମ୍ଭ ହେବା ପରଠାରୁ ମିଳିତ ଜାତିସଂଘ ସାଧାରଣ ସଭା (ୟୁଏନ୍ଜିଏ) ଜୁନ ମାସ ୨୧ ତାରିଖକୁ ଅନ୍ତର୍ଜାତୀୟ ଯୋଗ ଦିବସ ଭାବରେ ପାଳନ କରିବା ପାଇଁ ଭାରତର ପ୍ରସ୍ତାବକୁ ଗ୍ରହଣ କରିଥିଲା। ଏହାପରେ ପ୍ରଧାନମନ୍ତ୍ରୀ ଶ୍ରୀ ମୋଦୀ ନୂଆଦିଲ୍ଲୀ, ଚଣ୍ଡିଗଡ଼, ଲକ୍ଷ୍ନୌ, ମହୀଶୂର, ନ୍ୟୁୟର୍କ (ଜାତିସଂଘ ମୁଖ୍ୟାଳୟ) ଏବଂ ଶ୍ରୀନଗର ସମେତ ବିଭିନ୍ନ ସ୍ଥାନରୁ ଯୋଗଦିବସ ପାଳନର ନେତୃତ୍ୱ ନେଇଥିଲେ । ବର୍ତ୍ତମାନ ଅନ୍ତର୍ଜାତୀୟ ଯୋଗ ଦିବସ ଏକ ଶକ୍ତିଶାଳୀ ବିଶ୍ୱ ସ୍ୱାସ୍ଥ୍ୟ ଆନ୍ଦୋଳନରେ ପରିଣତ ହୋଇଛି।
ସମ୍ପୂର୍ଣ୍ଣ ଅଭିଭାଷଣ ପଢିବା ପାଇଁ ଏଠାରେ କ୍ଲିକ କରନ୍ତୁ
Yoga has united the entire world. pic.twitter.com/b5Hn1kZmHf
— PMO India (@PMOIndia) June 21, 2025
Yoga is for Everyone. pic.twitter.com/0TV3xFocEW
— PMO India (@PMOIndia) June 21, 2025
Yoga leads us on a journey towards oneness with the world. pic.twitter.com/yE0mylnhWW
— PMO India (@PMOIndia) June 21, 2025
Yoga is a system that takes us from Me to We. pic.twitter.com/tdBsW4TYmp
— PMO India (@PMOIndia) June 21, 2025
‘मैं’ से ‘हम’ की ये यात्रा ही सेवा, समर्पण और सहअस्तित्व का आधार है। pic.twitter.com/BnG0zVmOj2
— PMO India (@PMOIndia) June 21, 2025
Yoga is the pause button humanity needs... to breathe, to balance, to become whole again. pic.twitter.com/vsGghEsNxq
— PMO India (@PMOIndia) June 21, 2025
Let this Yoga Day mark the beginning of Yoga for Humanity 2.0... where Inner Peace becomes Global Policy. pic.twitter.com/9CZPuhDPJz
— PMO India (@PMOIndia) June 21, 2025
