ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ପଶ୍ଚିମବଙ୍ଗର ସିଲିଗୁଡି ଠାରେ ' ବିକଶିତ ଭାରତ ବିକଶିତ ପଶ୍ଚିମବଙ୍ଗ' କାର୍ଯ୍ୟକ୍ରମକୁ ସମ୍ବୋଧିତ କରିଥିଲେ । ସେ ପଶ୍ଚିମବଙ୍ଗରେ ୪୫୦୦ କୋଟି ଟଙ୍କାରୁ ଅଧିକ ମୂଲ୍ୟର ରେଳ ଓ ସଡ଼କ କ୍ଷେତ୍ର ସହିତ ଜଡିତ ଏକାଧିକ ପ୍ରକଳ୍ପର ଉଦଘାଟନ ଓ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଥିଲେ ।
ଏହି ଅବସରରେ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ ଚା'ର ସୁନ୍ଦର ଭୂମିରେ ଉପସ୍ଥିତ ରହି ଖୁସି ବ୍ୟକ୍ତ କରିଥିଲେ । ଆଜିର ପ୍ରକଳ୍ପକୁ ସେ ପଶ୍ଚିମବଙ୍ଗର ବିକାଶ ଦିଗରେ ଆଉ ଏକ ପଦକ୍ଷେପ ବୋଲି କହିଛନ୍ତି ।
ପ୍ରଧାନମନ୍ତ୍ରୀ କହିଥିଲେ ଯେ ପଶ୍ଚିମବଙ୍ଗର ଉତ୍ତର ଭାଗ ହେଉଛି ଉତ୍ତର - ପୂର୍ବର ପ୍ରବେଶ ଦ୍ୱାର ଏବଂ ଏହା ପଡୋଶୀ ଦେଶମାନଙ୍କ ସହିତ ବାଣିଜ୍ୟ ଚ୍ୟାନେଲ ମଧ୍ୟ ପ୍ରଦାନ କରେ । ତେଣୁ ପଶ୍ଚିମବଙ୍ଗର ବିକାଶ ସହ ରାଜ୍ୟର ଉତ୍ତର ଭାଗର ବିକାଶ ସରକାରଙ୍କ ପ୍ରାଥମିକତା ବୋଲି ପ୍ରଧାନମନ୍ତ୍ରୀ କହିଥିଲେ । ସେ ରେଳ ଓ ସଡ଼କ ଭିତ୍ତିଭୂମିର ଆଧୁନିକୀକରଣ ଉପରେ ଗୁରୁତ୍ୱାରୋପ କରିବା ସହ ଏକଲାଖୀ - ବାଲୁରଘାଟ, ରାଣୀନଗର ଜଳପାଇଗୁଡ଼ି - ହଳଦୀବାରୀ ଏବଂ ସିଲିଗୁଡି - ଆଲୁଅବାରୀ ସେକ୍ସନରେ ରେଳ ଲାଇନର ବିଦ୍ୟୁତିକରଣ କାର୍ଯ୍ୟ ଶେଷ ହେବା ବିଷୟରେ ଉଲ୍ଲେଖ କରିଥିଲେ ଯାହା ଉତ୍ତର ଏବଂ ଦକ୍ଷିଣ ଦିନାଜପୁର, କୁଚବିହାର ଏବଂ ଜଳପାଇଗୁଡି ଅଞ୍ଚଳରେ ଟ୍ରେନର ବେଗ ବୃଦ୍ଧି କରିବ ଏବଂ ସିଲିଗୁଡ଼ି - ସମୁକତାଲା ମାର୍ଗ ନିକଟବର୍ତ୍ତୀ ଜଙ୍ଗଲ ଅଞ୍ଚଳରେ ପ୍ରଦୂଷଣ ହ୍ରାସ କରିବ । ବାରସୋଇ - ରାଧିକାପୁର ସେକ୍ସନର ବିଦ୍ୟୁତିକରଣ ଦ୍ୱାରା ଉଭୟ ବିହାର ଓ ପଶ୍ଚିମବଙ୍ଗ ଉପକୃତ ହେବେ ବୋଲି ସେ କହିଥିଲେ । ରାଧିକାପୁର ଏବଂ ସିଲିଗୁଡ଼ି ମଧ୍ୟରେ ନୂତନ ରେଳ ସେବାର ଶୁଭାରମ୍ଭ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ ପଶ୍ଚିମବଙ୍ଗରେ ରେଳବାଇର ସୁଦୃଢ଼ୀକରଣ ବିକାଶର ନୂତନ ସମ୍ଭାବନାକୁ ତ୍ୱରାନ୍ୱିତ କରିବ ଏବଂ ସାଧାରଣ ଲୋକଙ୍କ ଜୀବନକୁ ସହଜ କରିବ ।
ପ୍ରଧାନମନ୍ତ୍ରୀ କହିଥିଲେ ଯେ ଏହି ଅଞ୍ଚଳରେ ଭାରତର ଅନ୍ୟ ସ୍ଥାନ ଭଳି ସମାନ ବେଗରେ ଟ୍ରେନ୍ ଚଳାଚଳ କରିବାକୁ ସରକାର ପ୍ରତିଶ୍ରୁତିବଦ୍ଧ ଏବଂ ଆଧୁନିକ ଦ୍ରୁତଗତିସମ୍ପନ୍ନ ଟ୍ରେନ୍ର ଶୁଭାରମ୍ଭ କରାଯାଉଛି । ମିତାଲି ଏକ୍ସପ୍ରେସ ନ୍ୟୁ ଜଳପାଇଗୁଡ଼ିରୁ ଢାକା କ୍ୟାଣ୍ଟ ପର୍ଯ୍ୟନ୍ତ ଚାଲୁଥିବାରୁ ବାଂଲାଦେଶ ସହ ରେଳ ସଂଯୋଗ ଏବଂ ବାଂଲାଦେଶ ସରକାରଙ୍କ ସହଯୋଗରେ ରାଧିକାପୁର ଷ୍ଟେସନ ପର୍ଯ୍ୟନ୍ତ ଯୋଗାଯୋଗ ବିସ୍ତାର କରାଯାଉଛି ବୋଲି ସେ ଉଲ୍ଲେଖ କରିଥିଲେ ।
ସ୍ୱାଧୀନତା ପରବର୍ତ୍ତୀ ଦଶନ୍ଧିରେ ପୂର୍ବ ଭାରତର ସ୍ୱାର୍ଥ ପ୍ରତି ଅବହେଳାକୁ ମନେ ପକାଇ ପ୍ରଧାନମନ୍ତ୍ରୀ କହିଥିଲେ ଯେ ବର୍ତ୍ତମାନର ସରକାର ପୂର୍ବ ଭାରତକୁ ଦେଶର ଅଭିବୃଦ୍ଧି ଇଞ୍ଜିନ୍ ଭାବେ ବିବେଚନା କରୁଛନ୍ତି । ସେଥିପାଇଁ ଏହି ଅଞ୍ଚଳରେ ଯୋଗାଯୋଗରେ ଉନ୍ନତି ଆଣିବା ପାଇଁ ଅଭୂତପୂର୍ବ ପୁଞ୍ଜି ନିବେଶ କରାଯାଉଛି । ପ୍ରଧାନମନ୍ତ୍ରୀ କହିଥିଲେ ଯେ , ପଶ୍ଚିମବଙ୍ଗ ପାଇଁ ବାର୍ଷିକ ହାରାହାରି ରେଳ ବଜେଟ୍ ଯାହା ପୂର୍ବରୁ ମାତ୍ର ୪,୦୦୦ କୋଟି ଟଙ୍କା ଥିଲା , ତାହା ବର୍ତ୍ତମାନ ୧୪,୦୦୦ କୋଟି ଟଙ୍କାକୁ ବୃଦ୍ଧି ପାଇଛି । ପ୍ରଧାନମନ୍ତ୍ରୀ ଉତ୍ତର ବଙ୍ଗରୁ ଗୌହାଟୀ ଏବଂ ହାୱଡ଼ା ପର୍ଯ୍ୟନ୍ତ ଅର୍ଦ୍ଧ ହାଇସ୍ପିଡ୍ ବନ୍ଦେ ଭାରତ ଟ୍ରେନ୍ ଏବଂ ଉନ୍ନତିକରଣ ପାଇଁ ହାତକୁ ନିଆଯାଇଥିବା ୫୦୦ ଅମୃତ ଭାରତ ଷ୍ଟେସନରେ ସିଲିଗୁଡ଼ି ଷ୍ଟେସନକୁ ଅନ୍ତର୍ଭୁକ୍ତ କରିବା ବିଷୟରେ ଉଲ୍ଲେଖ କରିଥିଲେ । ଏହି ୧୦ ବର୍ଷ ମଧ୍ୟରେ ଆମେ ରେଳବାଇର ବିକାଶକୁ ଯାତ୍ରୀବାହୀ ବେଗ ଠାରୁ ଏକ୍ସପ୍ରେସ ବେଗକୁ ନେଇଛୁ । ଆମର ତୃତୀୟ ପାଳିରେ ଏହା ସୁପରଫାଷ୍ଟ ଗତିରେ ଆଗକୁ ବଢ଼ିବ ବୋଲି ପ୍ରଧାନମନ୍ତ୍ରୀ ମୋଦୀ କହିଥିଲେ ।
ପ୍ରଧାନମନ୍ତ୍ରୀ ଉତ୍ତର ପଶ୍ଚିମବଙ୍ଗରେ ୩,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ଦୁଇଟି ସଡ଼କ ପ୍ରକଳ୍ପର ଉଦଘାଟନ ବିଷୟରେ କହିଥିଲେ । ୨୭ ନମ୍ବର ଜାତୀୟ ରାଜପଥର ଘୋଷପୁକୁର - ଧୁପଗୁଡ଼ି ସେକ୍ସନକୁ ୪ ଲେନ୍ ଏବଂ ୪ ଲେନ୍ ବିଶିଷ୍ଟ ଇସଲାମପୁର ବାଇପାସ୍ ନିର୍ମାଣ କଲେ ଜଳପାଇଗୁଡ଼ି, ସିଲିଗୁଡ଼ି ଓ ମୈନାଗୁରୀ ସହରରେ ଟ୍ରାଫିକ୍ ଜାମ୍ ହ୍ରାସ ପାଇବା ସହ ସିଲିଗୁଡ଼ି, ଜଳପାଇଗୁଡ଼ି ଓ ଅଲିପୁରଦ୍ୱାର ଅଞ୍ଚଳକୁ ଉନ୍ନତ ଯୋଗାଯୋଗ ଉପଲବ୍ଧ ହେବ । ଦୁଆର, ଦାର୍ଜିଲିଂ, ଗ୍ୟାଙ୍ଗଟକ ଏବଂ ମିରିକ୍ ଭଳି ପର୍ଯ୍ୟଟନସ୍ଥଳୀରେ ପହଞ୍ଚିବା ସହଜ ହେବା ସହିତ, ଏହା ଅଂଚଳର ବାଣିଜ୍ୟ , ଉଦ୍ୟୋଗ ଏବଂ ଚା’ ବଗିଚାର ବିକାଶକୁ ପ୍ରୋତ୍ସାହିତ କରିବ ବୋଲି ସେ କହିଛନ୍ତି ।
ବକ୍ତବ୍ୟ ଶେଷ କରି ପ୍ରଧାନମନ୍ତ୍ରୀ କହିଥିଲେ ଯେ ପଶ୍ଚିମବଙ୍ଗର ବିକାଶ ପାଇଁ କେନ୍ଦ୍ର ସରକାର ସମସ୍ତ ପ୍ରୟାସ କରୁଛନ୍ତି ଏବଂ ଆଜିର ବିକାଶ ମୂଳକ ପ୍ରକଳ୍ପ ପାଇଁ ନାଗରିକ ମାନଙ୍କୁ ଅଭିନନ୍ଦନ ଜଣାଇଥିଲେ ।
ଏହି ଅବସରରେ ପଶ୍ଚିମବଙ୍ଗ ରାଜ୍ୟପାଳ ଶ୍ରୀ ସି ଭି ଆନନ୍ଦ ବୋଷ, କେନ୍ଦ୍ର ରାଷ୍ଟ୍ର ମନ୍ତ୍ରୀ ଶ୍ରୀ ନିଶିଥ ପ୍ରାମାଣିକ ଏବଂ ସାଂସଦ ଶ୍ରୀ ରାଜୁ ବିଷ୍ଟଙ୍କ ସମେତ ଅନ୍ୟ ସାଂସଦ ଓ ବିଧାନ ସଭା ସଦସ୍ୟମାନେ ଉପସ୍ଥିତ ଥିଲେ ।
ପୃଷ୍ଠଭୂମି
ଉତ୍ତରବଙ୍ଗ ଏବଂ ଆଖପାଖି ଅଂଚଳର ଲୋକମାନଙ୍କୁ ଉପକୃତ କରିବା ପାଇଁ ରେଳ ଲାଇନର ବିଦ୍ୟୁତିକରଣର ଏକାଧିକ ପ୍ରକଳ୍ପକୁ ପ୍ରଧାନମନ୍ତ୍ରୀ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଛନ୍ତି । ଏହି ପ୍ରକଳ୍ପଗୁଡ଼ିକ ମଧ୍ୟରେ ଏକଲାଖୀ - ବାଲୁରଘାଟ ସେକ୍ସନ୍; ବାରସୋଇ - ରାଧିକାପୁର ସେକ୍ସନ; ରାଣୀନଗର ଜଳପାଇଗୁଡ଼ି - ହଳଦୀବାଡ଼ି ସେକ୍ସନ; ସିଲିଗୁଡ଼ି - ଆଲୁଅବାରି ସେକ୍ସନ ଭାୟା ବାଗଡୋଗ୍ରା ଏବଂ ସିଲିଗୁଡ଼ି - ସିଭୋକ୍ - ଅଲିପୁରଦ୍ୱାର ଜଙ୍କସନ୍ - ସମୁକତାଲା (ଅଲିପୁରଦ୍ୱାର ଜଙ୍କସନ୍ - ନ୍ୟୁ କୁଚ୍ ବିହାର ସମେତ) ବିଭାଗ ଅନ୍ତର୍ଭୁକ୍ତ ।
ପ୍ରଧାନମନ୍ତ୍ରୀ ମଣିଗ୍ରାମ - ନିମତିତା ସେକ୍ସନରେ ରେଳ ଲାଇନ ଦୋହରୀକରଣ ପ୍ରକଳ୍ପ ଏବଂ ଅମ୍ବାରୀ ଫାଲକଟା - ଆଲୁଅବାରିରେ ସ୍ୱୟଂଚାଳିତ ଅବରୋଧ ସଂକେତ ସହିତ ନ୍ୟୁ ଜଳପାଇଗୁଡ଼ିରେ ଇଲେକ୍ଟ୍ରୋନିକ୍ ଇଣ୍ଟରଲକିଂ ପ୍ରକଳ୍ପ ସମେତ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ରେଳ ପ୍ରକଳ୍ପକୁ ଲୋକାର୍ପିତ କରିଥିଲେ । ପ୍ରଧାନମନ୍ତ୍ରୀ ସିଲିଗୁଡ଼ି ଏବଂ ରାଧିକାପୁର ମଧ୍ୟରେ ଏକ ନୂତନ ଯାତ୍ରୀବାହୀ ଟ୍ରେନ୍ ସେବାକୁ ମଧ୍ୟ ପତାକା ଦେଖାଇ ଶୁଭାରମ୍ଭ କରିଥିଲେ । ଏହି ରେଳ ପ୍ରକଳ୍ପଗୁଡିକ ରେଳ ସଂଯୋଗରେ ଉନ୍ନତି ଆଣିବ, ମାଲ ପରିବହନକୁ ସୁଗମ କରିବ ଏବଂ ଏହି ଅଞ୍ଚଳରେ ନିଯୁକ୍ତି ସୃଷ୍ଟି ଏବଂ ଅର୍ଥନୈତିକ ଅଭିବୃଦ୍ଧିରେ ସହାୟକ ହେବ ।
ପ୍ରଧାନମନ୍ତ୍ରୀ ପଶ୍ଚିମବଙ୍ଗରେ ୩,୧୦୦ କୋଟି ଟଙ୍କାର ଦୁଇଟି ଜାତୀୟ ରାଜପଥ ପ୍ରକଳ୍ପର ଉଦଘାଟନ କରିଥିଲେ । ଏହି ପ୍ରକଳ୍ପଗୁଡ଼ିକ ମଧ୍ୟରେ ଜାତୀୟ ରାଜପଥ ୨୭ ର ୪ ଲେନ୍ ବିଶିଷ୍ଟ ଘୋସପୁକୁର- ଧୁପଗୁଡ଼ି ସେକ୍ସନ୍ ଏବଂ ୨୭ ନମ୍ବର ଜାତୀୟ ରାଜପଥର ୪ ଲେନ୍ ବିଶିଷ୍ଟ ଇସଲାମପୁର ବାଇପାସ୍ ଅନ୍ତର୍ଭୁକ୍ତ । ଘୋସପୁକୁର - ଧୁପଗୁଡ଼ି ସେକ୍ସନ ପୂର୍ବ ଭାରତକୁ ଦେଶର ଅନ୍ୟାନ୍ୟ ଅଂଶ ସହିତ ସଂଯୋଗ କରୁଥିବା ଉତ୍ତର - ଦକ୍ଷିଣ ପରିବହନ କରିଡରର ଏକ ଅଂଶ ଅଟେ । ଏହି ସେକ୍ସନର ଚାରି ଲେନ୍ ନିର୍ମାଣ ହେଲେ ଉତ୍ତର ବଙ୍ଗ ଓ ଉତ୍ତର - ପୂର୍ବାଞ୍ଚଳ ମଧ୍ୟରେ ନିରବଚ୍ଛିନ୍ନ ଯୋଗାଯୋଗ ହୋଇପାରିବ । ୪ ଲେନ୍ ବିଶିଷ୍ଟ ଇସଲାମପୁର ବାଇପାସ୍ ଇସଲାମପୁର ସହରରେ ଟ୍ରାଫିକ୍ ଭିଡ଼ ହ୍ରାସ କରିବାରେ ସହାୟକ ହେବ । ଏହି ସଡ଼କ ପ୍ରକଳ୍ପଗୁଡ଼ିକ ଏହି ଅଞ୍ଚଳର ଶିଳ୍ପ ଏବଂ ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିବ।
