ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି (ମେ’ 19, 2018) ଦିନିକିଆ ଜାମ୍ମୁ-କାଶ୍ମୀର ଗସ୍ତରେ ଯିବେ ।
ଲେହରେ ପ୍ରଧାନମନ୍ତ୍ରୀ ଉନବିଂଶ କୁଶୋକ ବକୁଲା ରିନପୋଚେଙ୍କ ଜନ୍ମ ଶତବାର୍ଷିକୀ ସମାରୋହର ଉଦ୍ଯାପନୀ ଉତ୍ସବରେ ଯୋଗଦେବେ । ଏହି ସମାରୋହ ଅବସରରେ ପ୍ରଧାନମନ୍ତ୍ରୀ ଫଳକ ଉନ୍ମୋଚନ ପୂର୍ବକ ନବନିର୍ମିତ ଜୋଜିଲା ସୁଡଙ୍ଗକୁ କାର୍ଯ୍ୟକ୍ଷମ କରିବେ ।
14 କିଲୋମିଟର ଲମ୍ବ ବିଶିଷ୍ଟ ଜୋଜିଲା ସୁଡଙ୍ଗ ଭାରତର ସବୁଠାରୁ ଦୀର୍ଘ ଏବଂ ଏସିଆର ଦୀର୍ଘତମ ସୁଡଙ୍ଗ, ଯେଉଁଥିରେକି ଉଭୟ ପଟୁ ଯାତାୟାତର ସୁବିଧା ରହିଛି । ଏହି ବର୍ଷ ପ୍ରାରମ୍ଭରେ NH-1A ଅନ୍ତର୍ଗତ ଶ୍ରୀନଗର-ଲେହ ସେକ୍ସନର ବଲତାଲ-ମିନାମାର୍ଗ ମଧ୍ୟରେ ଏହି ସୁଡଙ୍ଗର ନିର୍ମାଣ, କାର୍ଯ୍ୟକ୍ଷମ ଓ ରକ୍ଷଣାବେକ୍ଷଣ ପାଇଁ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର ଆର୍ଥିକ ବ୍ୟାପାର ସଂକ୍ରାନ୍ତ କ୍ୟାବିନେଟ କମିଟି 6800 କୋଟି ଟଙ୍କାର ପ୍ରକଳ୍ପକୁ ଅନୁମୋଦନ କରିଥିଲେ । ଏହି ସୁଡଙ୍ଗ ନିର୍ମାଣ ଦ୍ଵାରା ଶ୍ରୀନଗର, କାର୍ଗିଲ ଏବଂ ଲେହ ମଧ୍ୟରେ ସବୁଦିନିଆ ଯାତାୟାତ ସୁଗମ ହେବ । ବର୍ତ୍ତମାନ ଜୋଜିଲା ଗିରିପଥ ଅତିକ୍ରମ କରିବା ପାଇଁ ସାଢେ ତିନି ଘଣ୍ଟା ସମୟ ଲାଗୁଥିବା ବେଳେ ନୂତନ ସୁଡଙ୍ଗ ଖୋଲିଲେ ଏହି ସମୟ ମାତ୍ର 15 ମିନିଟକୁ ହ୍ରାସ ପାଇବ । ନୂତନ ସୁଡଙ୍ଗ କାର୍ଯ୍ୟକ୍ଷମ ହେବା ଫଳରେ ଏହି କ୍ଷେତ୍ରର ସମସ୍ତ ପ୍ରକାର ଆର୍ଥିକ ଏବଂ ସାମାଜିକ-ସାଂସ୍କୃତିକ ବିକାଶରେ ସହାୟକ ହେବ । ଏହାର ମଧ୍ୟ ସାମରିକ ଗୁରୁତ୍ଵ ରହିଛି ।
ପ୍ରଧାନମନ୍ତ୍ରୀ ତାଙ୍କ ଗସ୍ତ କାଳରେ ଶ୍ରୀନଗର ଶେର-ଇ-କାଶ୍ମୀର ଆନ୍ତର୍ଜାତିକ ସମ୍ମିଳନୀ କେନ୍ଦ୍ରଠାରେ 330 ମେଗାୱାଟ କ୍ଷମତାର କିଶାନଗଙ୍ଗା ଜଳବିଦ୍ୟୁତ ପ୍ରକଳ୍ପକୁ ଜାତି ଉଦ୍ଦେଶ୍ୟରେ ଉତ୍ସର୍ଗ କରିବା ସହିତ ଶ୍ରୀନଗର ରିଙ୍ଗ ରୋଡର ଶିଳାନ୍ୟାସ କରିବେ ।
ଜାମ୍ମୁର ଜେନେରାଲ ଜୋରାବର ସିଂହ ପ୍ରେକ୍ଷାଳୟଠାରେ ପ୍ରଧାନମନ୍ତ୍ରୀ ପକୁଲ ଦୁଲ ଶକ୍ତି ପ୍ରକଳ୍ପ ଏବଂ ଜାମ୍ମୁ ରିଙ୍ଗ ରୋଡର ଆଧାରଶିଳା ରଖିବେ । ପ୍ରଧାନମନ୍ତ୍ରୀ ତାରାକୋଟ ମାର୍ଗ ଏବଂ ଶ୍ରୀ ମାତା ବୈଷ୍ଣୋ ଦେବୀ ମନ୍ଦିର ବୋର୍ଡର ରୋପୱେ କୁ ଉଦ୍ଘାଟନ କରିବେ । ତାରାକୋଟ ମାର୍ଗରେ ଶ୍ରଦ୍ଧାଳୁମାନେ ସୁବିଧାରେ ଦେବୀଙ୍କ ଦର୍ଶନ ପାଇପାରିବେ ।
ଶ୍ରୀନଗର ଏବଂ ଜାମ୍ମୁ ସହରର ଟ୍ରାଫିକ ଭିଡକୁ କମାଇବା ସହିତ ଯାତାୟାତରେ ସୁରକ୍ଷା ଓ ସୁବିଧା, ତ୍ଵରିତ ଚଳାଚଳ ଏବଂ ଗମନାଗମନକୁ ଅଧିକ ପରିବେଶ ଅନୁକୂଳ କରିବା ହେଉଛି ରିଙ୍ଗ ରୋଡ ନିର୍ମାଣର ଲକ୍ଷ୍ୟ ।
ଗସ୍ତର ଅନ୍ତିମ ଚରଣରେ ପ୍ରଧାନମନ୍ତ୍ରୀ ଜାମ୍ମୁର ଶେର-ଇ-କାଶ୍ମୀର କୃଷି ବିଜ୍ଞାନ ଏବଂ ପ୍ରଯୁକ୍ତି ବିଶ୍ଵବିଦ୍ୟାଳୟର ସମାବର୍ତ୍ତନ ଉତ୍ସବରେ ଯୋଗଦେବେ ।
