ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଅକ୍ଟୋବର 31, 2018ରେ ଗୁଜରାଟର କେଭାଡିଆଠାରେ ବିଶ୍ୱର ସର୍ବୋଚ ‘ଏକତା ପ୍ରତିମୂର୍ତୀ’ (Statue of Unity)କୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିବେ ।
182 ମିଟର ଉଚ୍ଚତା ବିଶିଷ୍ଟ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ପ୍ରତିମୂର୍ତ୍ତି ଗୁଜରାଟର ନର୍ମଦା ଜିଲ୍ଲାସ୍ଥିତ କେଭାଡିଆଠାରେ ତାଙ୍କ ଜୟନ୍ତୀ ଅବସରରେ ଦେଶବାସୀଙ୍କୁ ସମର୍ପିତ କରାଯିବ ।
ଏହି ଅବସରରେ ପ୍ରଧାନମନ୍ତ୍ରୀ ଏବଂ ଅନ୍ୟ ଗଣମାନ୍ୟ ବ୍ୟକ୍ତି ‘ଏକତା ପ୍ରତିମୂର୍ତ୍ତି’ ଲୋକାର୍ପଣ ସମାରୋହରେ ଉପସ୍ଥିତ ରହିବା ସହିତ ମୃତ୍ତିକା ଏବଂ ନର୍ମଦା ନଦୀର ଜଳକୁ କଳସରେ ଭରିବାର କାର୍ଯ୍ୟକ୍ରମ ରହିଛି । ପ୍ରଧାନମନ୍ତ୍ରୀ ଲିଭର ଉପରେ ଚାପ ପ୍ରୟୋଗ କରି ପ୍ରତିମୂର୍ତ୍ତି ଅଭିଷେକ କାର୍ଯ୍ୟର ଶୁଭାରମ୍ଭ କରିବେ ।
ଏହି ଅବସରରେ ପ୍ରଧାନମନ୍ତ୍ରୀ ଜନସାଧାରଣଙ୍କୁ ସମ୍ବୋଧନ କରିବେ ।
ଏହାପରେ ସେ ଏକତାର ପ୍ରାଚୀର (Wall of Unity) ପାଖରେ ପହଂଚିବେ ଏବଂ ଏହାର ଉଦଘାଟନ କରିବେ । ଏକତା ପ୍ରତିମୂର୍ତ୍ତିଙ୍କ ଚରଣରେ, ପ୍ରଧାନମନ୍ତ୍ରୀ ଏକ ବିଶେଷ ପ୍ରାର୍ଥନା କରିବେ । ସେ ସଂଗ୍ରହାଳୟ ଏବଂ ପ୍ରଦର୍ଶନୀ, ଏବଂ ଦର୍ଶକ ଗାଲେରୀ ମଧ୍ୟ ପରିଦର୍ଶନ କରିବେ । ଏହି ଗାଲେରୀ,153 ମିଟର ଉଚ୍ଚତାର । ଏଠାରେ ଏକା ସମୟରେ 200ଜଣ ଆଗନ୍ତୁକ ପରିଦର୍ଶନ କରିପାରିବେ । ଏଠାରେ ସର୍ଦ୍ଦାର ସରୋବର ବନ୍ଧ, ଏହାର ଜଳାଶୟ, ଏବଂ ସତପୁରା ଏବଂ ବିନ୍ଧ୍ୟ ପର୍ବତମାଳାର ଦୃଶ୍ୟ ଅତି ମନୋରମ ।
ସମର୍ପଣ ସମାରୋହକୁ ଆଇଏଏଫ ବିମାନର ଫ୍ଲାଇପାଷ୍ଟ ଏବଂ ସାଂସ୍କୃତିକ ମଣ୍ଡଳୀମାନଙ୍କ ପ୍ରଦର୍ଶନ ଦ୍ୱାରା ମଧ୍ୟ ସ୍ମରଣୀୟ କରାଯିବ ।
