ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଭାରତ ସରକାରଙ୍କ ଅଧୀନରେ କାର୍ଯ୍ୟରତ 80 ଜଣ ଅତିରିକ୍ତ ସଚିବ ଏବଂ ଯୁଗ୍ମ ସଚିବଙ୍କ ସହ ଶନିବାର ଦିନ ବାର୍ତ୍ତାଳାପ କରିଥିଲେ । ମୋଟ 5ଟି ବାର୍ତ୍ତାଳାପ ଶୃଙ୍ଖଳା ମଧ୍ୟରୁ ଏହା ଥିଲା ତୃତୀୟ ।
ଏହି ବାର୍ତ୍ତାଳାପ ସମୟରେ ଅଧିକାରୀମାନେ କୃଷି, ପାନୀୟ ଜଳ, ନାଗରିକ କୈନ୍ଦ୍ରିକ ପ୍ରଶାସନ, ନବସୃଜନ ଏବଂ ଶାସନତନ୍ତ୍ରରେ ଦଳଗତ କାର୍ଯ୍ୟପ୍ରଣାଳୀ, ପ୍ରକଳ୍ପ କାର୍ଯ୍ୟକାରୀତା, ଶିକ୍ଷା, ବିନିର୍ମାଣ, ଆଭ୍ୟନ୍ତରୀଣ ସୁରକ୍ଷା ଏବଂ ସୌର ଶକ୍ତି ଆଦି ବିଷୟରେ ନିଜ ନିଜର ଅଭିଜ୍ଞତା ବାଣ୍ଟିଥିଲେ ।
ପ୍ରକଳ୍ପ ଅନୁଧ୍ୟାନ ଲାଗି ପ୍ରଧାନମନ୍ତ୍ରୀ ତାଙ୍କର ପ୍ରଗତି ଉପକ୍ରମ ସମ୍ପର୍କରେ ଉଲ୍ଲେଖ କରିଥିଲେ । ବିନିର୍ମାଣ ପ୍ରସଙ୍ଗରେ ପ୍ରଧାନମନ୍ତ୍ରୀ କହିଥିଲେ ଭାରତରେ ଇଲେକ୍ଟ୍ରୋନିକ ବିନିର୍ମାଣ କ୍ଷେତ୍ର ବର୍ତ୍ତମାନ ଚିକିତ୍ସା ଉପକରଣ ନିର୍ମାଣ ପ୍ରତି ଗୁରୁତ୍ୱାରୋପ କରିବା ଆବଶ୍ୟକ ।
ସରକାର ଓ ଶାସନତନ୍ତ୍ରକୁ ଏକ ସଂଗଠିତ ସଂସ୍ଥାରେ ପରିଣତ କରିବା ଲାଗି ସକାରାତ୍ମକ କାର୍ଯ୍ୟ ପରିବେଶ ସୃଷ୍ଟି କରିବାର ଗୁରୁତ୍ୱ ଉପରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ । ସେ କହିଥିଲେ ଯେ ନୂଆ ଆଇନ ପ୍ରସ୍ତୁତ ହେଉଥିବାରୁ, ପୁରୁଣା ଆଇନଗୁଡ଼ିକର ସମୀକ୍ଷା କରାଯାଇ ଆବଶ୍ୟକ ହେଲେ ସେସବୁକୁ ଉଚ୍ଛେଦ କରାଯିବା ଦରକାର ।
ବର୍ତ୍ତମାନର ଜାଗତିକ ପରିସ୍ଥିତି ଭାରତ ସପକ୍ଷରେ ସକାରାତ୍ମକ ରହିଥିବା ଉଲ୍ଲେଖ କରି ପ୍ରଧାନମନ୍ତ୍ରୀ ଅଧିକାରୀମାନଙ୍କୁ 2022 ସୁଦ୍ଧା ଏକ ନୂଆ ଭାରତ ନିର୍ମାଣ ଲାଗି ସ୍ପଷ୍ଟ ଲକ୍ଷ୍ୟ ନେଇ କାର୍ଯ୍ୟ କରିବାକୁ ପରାମର୍ଶ ଦେଇଥିଲେ ।
ପ୍ରଧାନମନ୍ତ୍ରୀ ସଚିବ ସ୍ତରର ଅଧିକାରୀମାନଙ୍କୁ ଦେଶର 100 ଟି ସର୍ବାଧିକ ଅନଗ୍ରସର ଜିଲ୍ଲା ପ୍ରତି ବିଶେଷ ଗୁରୁତ୍ୱ ଦେଇ କାର୍ଯ୍ୟ କରିବାକୁ କହିଥିଲେ, ଯା’ଦ୍ୱାରା ଏହି ଜିଲ୍ଲାଗୁଡ଼ିକ ବିଭିନ୍ନ ବିକାଶ ମାନଦଣ୍ଡରେ ଜାତୀୟ ସ୍ତର ସହ ସମାନ ହୋଇପାରିବ ।
