ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ପ୍ରଗତି ମାଧ୍ୟମରେ ଆଜି ବିଭିନ୍ନ ରାଜ୍ୟ ଓ ମନ୍ତ୍ରଣାଳୟ ସଂଲଗ୍ନ କାର୍ଯ୍ୟକ୍ରମର ଅଗ୍ରଗତି ସମୀକ୍ଷା କରିଛନ୍ତି । ଏହା ପ୍ରଧାନମନ୍ତ୍ରୀଙ୍କର 23ତମ ପ୍ରଗତି ସମୀକ୍ଷା ବୈଠକ ।
ଏଥି ପୂର୍ବରୁ ପ୍ରଧାନମନ୍ତ୍ରୀ 22ଟି ପ୍ରଗତି ବୈଠକ ମାଧ୍ୟମରେ 200 ଭିତ୍ତିଭୂମି ପ୍ରକଳ୍ପର ସମୀକ୍ଷା କରିସାରିଛନ୍ତି । ଏହିସବୁ ପ୍ରକଳ୍ପରେ 9.31 ଲକ୍ଷ କୋଟି ଟଙ୍କାର ପୁଞ୍ଜି ନିବେଶ ହୋଇଛି । ଏହାଛଡା 17ଟି କ୍ଷେତ୍ରରେ ସାଧାରଣ ଆପତ୍ତି ଅଭିଯୋଗର ଆସୁ ଫଏସଲା କରାଯିବା ନେଇ ମଧ୍ୟ ପ୍ରଧାନମନ୍ତ୍ରୀ ସମୀକ୍ଷା କରିଛନ୍ତି ।
ଆଜିର 23ତମ ପ୍ରଗତି ସମୀକ୍ଷା ବୈଠକରେ ଉପଭୋକ୍ତାମାନଙ୍କ ଆପତି ଅଭିଯୋଗର ଶୁଣାଣି ଓ ଏହାର ସମାଧାନ ଦିଗରେ କେତେ କ’ଣ ଅଗ୍ରଗତି ହୋଇଛି ସେ ନେଇ ମଧ୍ୟ ବିସ୍ତୃତ ଆଲୋଚନା ହୋଇଛି । ଉପଭୋକ୍ତା ଅଭିଯୋଗଗୁଡିକର ଆଶୁ ଫଏସଲା କରିବା ଦିଗରେ ନିଆଯାଉଥିବା ପଦକ୍ଷେପ ସମ୍ପର୍କରେ ପ୍ରଧାନମନ୍ତ୍ରୀଙ୍କୁ ଅବଗତ କରାଯାଇଥିଲା । ତେବେ ପ୍ରଧାନମନ୍ତ୍ରୀ ବହୁ ସଂଖ୍ୟାରେ ଆସୁଥିବା ଉପଭୋକ୍ତା ଅଭିଯୋଗ ନେଇ ଉଦବେଗ ପ୍ରକାଶ କରିଥିଲେ । ସେ ଏହିସବୁ ମାମଲାଗୁଡିକର ଶୀଘ୍ର ଫଏସଲା ବ୍ୟବସ୍ଥା କରି ଉପଭୋକ୍ତାମାନଙ୍କୁ ଠିକ୍ ସମୟରେ ଲାଭ ପହଂଚାଇବା ପାଇଁ ପରାମର୍ଶ ଦେଇଥିଲେ ।
ଆଜିର ବୈଠକରେ ପ୍ରଧାନମନ୍ତ୍ରୀ ରେଳବାଇ, ରାଜପଥ, ଶକ୍ତି ଏବଂ ଅକ୍ଷୟ ଶକ୍ତି କ୍ଷେତ୍ରର 9ଟି ଭିତ୍ତିଭୂମି ପ୍ରକଳ୍ପର ଅଗ୍ରଗତି ସମୀକ୍ଷା କରିଛନ୍ତି । 30 ହଜାର କୋଟି ଟଙ୍କାରୁ ଅଧିକ ମୂଲ୍ୟର ଏହି ଭିତ୍ତିଭୂମି ପ୍ରକଳ୍ପଗୁଡିକ ଓଡିଶା, ଆନ୍ଧ୍ରପ୍ରଦେଶ, ପଶ୍ଚିମବଙ୍ଗ, କର୍ଣ୍ଣାଟକ, ତାମିଲନାଡୁ, କେରଳ, ନାଗାଲାଣ୍ଡ, ଆସାମ, ମହାରାଷ୍ଟ୍ର, ତେଲଙ୍ଗାନା ଏବଂ ଉତ୍ତରାଖଣ୍ଡରେ କାର୍ଯ୍ୟକାରୀ ହେଉଛି ।
ପ୍ରଧାନମନ୍ତ୍ରୀ ଖଣିଜ କ୍ଷେତ୍ର କଲ୍ୟାଣ ଯୋଜନାର କାର୍ଯ୍ୟକାରୀତା ଏବଂ ଅଗ୍ରଗତି ସମ୍ପର୍କରେ ଆଜିର ପ୍ରଗତି ସମୀକ୍ଷା ବୈଠକରେ ବିସ୍ତୃତଭାବେ ଆଲୋଚନା ହୋଇଥିଲା । ପ୍ରଧାନମନ୍ତ୍ରୀ କହିଥିଲେ ଯେ, ଜିଲ୍ଲା ଖଣିଜ ଫାଉଣ୍ଡେସନକୁ ମିଳୁଥିବା ପାଣ୍ଠିର ଠିକଣା ସମୟରେ ଏବଂ ଠିକଣା ଜାଗାରେ ବିନିଯୋଗ ହେବାକୁ ପଡିବ । ସମ୍ପୃକ୍ତ ଜିଲ୍ଲାର ଯେଉଁସବୁ ବିକାଶଗତ ଅନଗ୍ରସରତା ରହିଛି ତାହାକୁ ଦୂର କରିବା ଦିଗରେ ଖଣିଜ ଫାଉଣ୍ଡେସନର ପାଣ୍ଠି ବେଶ ସହାୟକ ହେବ । ଏହି ପାଣ୍ଠିର ଉପଯୁକ୍ତ ବିନିଯୋଗ କରି 2022 ସୁଦ୍ଧା ଆବଶ୍ୟକ ପରିଣାମ ହାସଲ କରିବାକୁ ପଡିବ । ଏହି ବର୍ଷ ଭାରତ ସ୍ୱାଧିନତାର 75 ବର୍ଷ ପାଳନ କରୁଥିବା ପରିପ୍ରେକ୍ଷୀରେ ବିକାଶ ଲାଗି ଉପଲବ୍ଧ ପାଣ୍ଠିକୁ ଶୀଘ୍ର ବିନିଯୋଗ କରିବା ଲାଗି ସେ ପରାମର୍ଶ ଦେଇଥିଲେ ।
