ତାମିଲନାଡ଼ୁର ରାଜ୍ୟପାଳ
ତାମିଲନାଡ଼ୁ ମୁଖ୍ୟମନ୍ତ୍ରୀ
ମନ୍ତ୍ରୀପରିଷଦରେ ମୋର ସହଯୋଗୀ
ତାମିଲନାଡ଼ୁର ଉପମୁଖ୍ୟମନ୍ତ୍ରୀ
ମଞ୍ଚରେ ଉପସ୍ଥିତ ଅନ୍ୟ ସମ୍ମାନସ୍ପଦ ଅତିଥିଗଣ
ଭାଇ ଓ ଭଉଣୀମାନେ,
ଏପ୍ରିଲ 14ରେ ପଡ଼ୁଥିବା ତାମିଲ ନବବର୍ଷ ଭିଲାମ୍ଭୀ ଅବସରରେ ସାରା ବିଶ୍ୱରେ ଥିବା ସମସ୍ତ ତାମିଲ ଲୋକମାନଙ୍କୁ ମୁଁ ମୋର ଅଭିନନ୍ଦନ ଜଣାଉଛି । ମୁଁ ଆଦିଆର କର୍କଟ ପ୍ରତିଷ୍ଠାନରେ ଉପସ୍ଥିତ ହୋଇ ଆନନ୍ଦିତ । ଏହା ଭାରତର ଅନ୍ୟତମ ପୁରୁଣା ଏବଂ ଅଧିକ ଗୁରୁତ୍ୱପୂର୍ଣ୍ଣ ବ୍ୟାପକ କର୍କଟ ଚିକିତ୍ସା କେନ୍ଦ୍ର ।
ପରିବର୍ତ୍ତିତ ଜୀବନଶୈଳୀ ଅଣ-ସଂକ୍ରାମକ ରୋଗର ବୋଝ ବଢ଼ାଉଛି । କେତେକ ଆକଳନ ଅନୁଯାୟୀ, ଆମ ଦେଶରେ ଅଣ-ସଂକ୍ରାମକ ରୋଗ କାରଣରୁ 60 ପ୍ରତିଶତ ଲୋକଙ୍କ ମୃତ୍ୟୁ ଘଟୁଛି ।
ଦେଶର ବିଭିନ୍ନ ପ୍ରାନ୍ତରେ 20ଟି ରାଜ୍ୟସ୍ତରୀୟ କର୍କଟ ପ୍ରତିଷ୍ଠାନ ଏବଂ 20ଟି ଆଂଚଳିକ କର୍କଟ ଚିକିତ୍ସା କେନ୍ଦ୍ର ପ୍ରତିଷ୍ଠା କରିବା ଲାଗି କେନ୍ଦ୍ର ସରକାର ଯୋଜନା କରିଛନ୍ତି । ଆଂଚଳିକ କର୍କଟ ଚିକିତ୍ସା କେନ୍ଦ୍ର ପ୍ରତିଷ୍ଠା ପାଇଁ 45 କୋଟି ଏବଂ ରାଜ୍ୟସ୍ତରୀୟ କର୍କଟ ପ୍ରତିଷ୍ଠାନ ଲାଗି 120 କୋଟି ଟଙ୍କାର ସହାୟତା ବ୍ୟବସ୍ଥା ରହିଛି । ଏଥିପାଇଁ ଯୋଗ୍ୟ ପ୍ରତିଷ୍ଠାନ ପ୍ରସ୍ତାବକୁ ଅନୁମୋଦନ କରାଯାଇପାରେ । ସନ୍ତୋଷପୂର୍ବକ ମୁଁ ଏଠାରେ ଉଲ୍ଲେଖ କରିବାକୁ ଚାହିଁବି ଯେ ବର୍ତ୍ତମାନସୁଦ୍ଧା 15ଟି ରାଜ୍ୟ କର୍କଟ ପ୍ରତିଷ୍ଠାନ ଏବଂ 20ଟି ଆଂଚଳିକ କର୍କଟ ଚିକିତ୍ସା କେନ୍ଦ୍ର ପ୍ରତିଷ୍ଠାକୁ ଅନୁମୋଦନ ମିଳିସାରିଲାଣି । 14 ଟି ନୂଆ ଅଖିଳ ଭାରତୀୟ ଆୟୁର୍ବିଜ୍ଞାନ ପ୍ରତିଷ୍ଠାନ (ଏମ୍ସ)ରେ ଅନ୍ୟ ବିଭାଗ ସହ ଅଙ୍କୋଲୋଜି ବିଭାଗ ପ୍ରତି ବିଶେଷ ଗୁରୁତ୍ୱ ଦେଇ ପ୍ରତିଷ୍ଠା କରାଯାଉଛି ।
ପ୍ରଧାନମନ୍ତ୍ରୀ ସ୍ୱାସ୍ଥ୍ୟ ସୁରକ୍ଷା ଯୋଜନା ଅନ୍ତର୍ଗତ, ଅଙ୍କୋଲୋଜି ସେବା ପାଇଁ ବ୍ୟବସ୍ଥା ସହିତ 8ଟି ପ୍ରତିଷ୍ଠାନର ଉନ୍ନତିକରଣ କରାଯାଉଛି । ଜାତୀୟ ସ୍ୱାସ୍ଥ୍ୟ ନୀତି 2017 ରେ ପ୍ରତିଷେଧମୂଳକ ସ୍ୱାସ୍ଥ୍ୟସେବାର ଗୁରୁତ୍ୱ ପ୍ରତି ରେଖାପାତ କରାଯାଇଛି ।
ଆୟୁଷ୍ମାନ ଭାରତର ପ୍ରାଥମିକ ସ୍ୱାସ୍ଥ୍ୟ ସେବା ପ୍ରସଙ୍ଗର ବିସ୍ତୃତ ଦିଗ ଅଧୀନରେ ଆମେ ଲୋକମାନଙ୍କୁ ସେମାନଙ୍କ ଘର ପାଖରେ ପ୍ରତିଷେଧମୂଳକ ଏବଂ ରୋଗନାଶକ ସେବା ଯୋଗାଇଦେବୁ ।
ମଧୁମେହ, ଉଚ୍ଚ-ରକ୍ତଚାପ ଏବଂ ସାଧାରଣ କର୍କଟ ଭଳି ସାଧାରଣ ଅଣ-ସଂକ୍ରାମକ ରୋଗ ପାଇଁ ଆମେ ଜନସଂଖ୍ୟା ଆଧାରିତ ପ୍ରତିଷେଧକ, ନିୟନ୍ତ୍ରଣ, ସ୍କ୍ରିନିଂ ଏବଂ ପରିଚାଳନା ଆରମ୍ଭ କରିଛୁ ।
ଆୟୁଷ୍ମାନ ଭାରତରେ ପ୍ରଧାନମନ୍ତ୍ରୀ ଜାତୀୟ ସ୍ୱାସ୍ଥ୍ୟ ସୁରକ୍ଷା ମିଶନ ରହିଛି ।
ଏହା 10 କୋଟିରୁ ଉର୍ଦ୍ଧ୍ଵ ପରିବାରକୁ ସୁରକ୍ଷା ଯୋଗାଇଦେବ । ପାଖାପାଖି 50 କୋଟି ଲୋକ ଏହି ମିଶନ ଜରିଆରେ ଉପକୃତ ହେବେ । ଏହି ମିଶନ ଅଧୀନରେ ପ୍ରତିଟି ପରିବାରକୁ ମାଧ୍ୟମିକ ଏବଂ ଆଂଚଳିକ କ୍ଷେତ୍ରୀୟ ଡାକ୍ତରୀ ଚିକିତ୍ସା ପାଇଁ ବାର୍ଷିକ 5 ଲକ୍ଷ ଟଙ୍କା ପର୍ଯ୍ୟନ୍ତ ସ୍ୱାସ୍ଥ୍ୟ ବୀମା ସୁରକ୍ଷା ପ୍ରଦାନ କରାଯିବ ।
ଏହା ବିଶ୍ୱର ସର୍ବବୃହତ ସରକାରୀ ଅନୁଦାନପ୍ରାପ୍ତ ସ୍ୱାସ୍ଥ୍ୟସେବା କାର୍ଯ୍ୟକ୍ରମ ହେବ । ଏହି ଯୋଜନାର ଲାଭ ଦେଶର ସବୁ ସ୍ଥାନରେ ପହଁଚିବ । ଲୋକମାନେ ସରକାରୀ ଏବଂ ଅଧିକୃତ ଘରୋଇ ଡାକ୍ତରଖାନାରେ ସ୍ୱାସ୍ଥ୍ୟସେବାର ଲାଭ ପାଇପାରିବେ । ଏହି ଯୋଜନାରେ ପକେଟ ଖର୍ଚ୍ଚ ଠାରୁ ବାହାରେ ସ୍ୱାସ୍ଥ୍ୟ ବ୍ୟୟ ହ୍ରାସ କରିବା ଲାଗି ଯୋଜନା କରାଯାଇଛି ।
କର୍କଟ ଭଳି ରୋଗର ନିରାକରଣ, ନିୟନ୍ତ୍ରଣ ଏବଂ ପରିଚାଳନା ଲାଗି ଏନଜିଓ ଏବଂ ଘରୋଇ କ୍ଷେତ୍ରକୁ ମିଶାଇ ସମାଜର ପ୍ରତ୍ୟେକ ବର୍ଗର ପଦକ୍ଷେପର ଆବଶ୍ୟକତା ରହିଛି ।
ସ୍ୱର୍ଗତଃ ଡା.ମୁଥୁଲକ୍ଷ୍ମୀ ରେଡ୍ଡୀଙ୍କ ପ୍ରେରଣାଦାୟୀ ନେତୃତ୍ୱରେ ମହିଳା ସମାଜସେବୀମାନଙ୍କ ସ୍ୱେଚ୍ଛାସେବୀ ଗୋଷ୍ଠୀ ଦ୍ୱାରା ଡବ୍ଲ୍ୟୁଆଇଏ ଚେନ୍ନାଇ କର୍କଟ ପ୍ରତିଷ୍ଠାନ ଏକ ସ୍ୱେଚ୍ଛାସେବୀ ଦାତବ୍ୟ ଅନୁଷ୍ଠାନ ଭାବେ ପ୍ରତିଷ୍ଠା ହୋଇଥିଲା ।
ଏକ ଛୋଟିଆ ଘରେ ଏହି ହସପିଟାଲ ଆରମ୍ଭ ହୋଇଥିଲା । ଏହା ଥିଲା ଭାରତର ଦ୍ୱିତୀୟ ଏବଂ ଦକ୍ଷିଣ ଭାରତର ପ୍ରଥମ ସ୍ପେଶାଲିଟି କର୍କଟ ହସପିଟାଲ । ଆଜି ଏହି ପ୍ରତିଷ୍ଠାନ 500 ଶଯ୍ୟା ବିଶିଷ୍ଟ କର୍କଟ ହସପିଟାଲରେ ପରିଣତ ହୋଇଛି । ମୁଁ ଜାଣିବାକୁ ପାଇଛି ଯେ ଏହି ଶଯ୍ୟା ମଧ୍ୟରୁ 30 ପ୍ରତିଶତ ଶଯ୍ୟା ମାଗଣା, ଯାହାର ଅର୍ଥ ରୋଗୀଙ୍କୁ ଏଥିପାଇଁ ଟଙ୍କା ଖର୍ଚ୍ଚ କରିବାକୁ ପଡ଼ିବ ନାହିଁ ।
ଏହି ପ୍ରତିଷ୍ଠାନର ଆଣବିକ(Molecular) ଅଙ୍କୋଲୋଜି ବିଭାଗକୁ 2007ରେ କେନ୍ଦ୍ର ସରକାରଙ୍କ ଦ୍ୱାରା “ଉତ୍କର୍ଷ କେନ୍ଦ୍ର” ଭାବେ ମାନ୍ୟତା ଦିଆଯାଇଥିଲା । 1984ରେ ଏହା ପ୍ରଥମ ସୁପର ସ୍ପେଶାଲିଟି ମେଡ଼ିକାଲ କଲେଜରେ ପରିଣତ ହୋଇଥିଲା । ଏଗୁଡ଼ିକ ଅଭିନବ ଏବଂ ପ୍ରଶଂସାଯୋଗ୍ୟ ଉପଲବ୍ଧୀ ।
ଏହି ପ୍ରତିଷ୍ଠାନରେ ଦେଖାଦେଇଥିବା କେତେକ ସମସ୍ୟା ବିଷୟରେ ଡା.ଶାନ୍ତା ତାଙ୍କ ପ୍ରାରମ୍ଭିକ ଅଭିଭାଷଣରେ କହିଲେ । ମୁଁ ତାଙ୍କୁ ଆଶ୍ୱସ୍ତ କରିବାକୁ ଚାହେଁ ଯେ ଏସବୁ ସମସ୍ୟା ପ୍ରତି ଆମେ ଦୃଷ୍ଟି ଦେବୁ ଏବଂ କ’ଣ କରାଯାଇପାରିବ ସେଥିପ୍ରତି ଦୃଷ୍ଟି ଦେବା ଲାଗି ମୁଁ ତାମିଲନାଡ଼ୁର ମୁଖ୍ୟମନ୍ତ୍ରୀଙ୍କୁ ଅନୁରୋଧ କରୁଛି । ଶେଷରେ, ଦୟାକରି ମୋତେ କହିବାକୁ ଦିଅନ୍ତୁ, ଏପରି କେତେକ ପ୍ରସଙ୍ଗ ଯାହକୁ କିଛି ମନ୍ଦ ଉଦ୍ଦେଶ୍ୟଧାରୀ ଲୋକ ଗତ କିଛିଦିନ ମଧ୍ୟରେ ଉଠାଇଛନ୍ତି ।
ପଞ୍ଚଦଶ ଅର୍ଥ କମିଶନଙ୍କ ସନ୍ଦର୍ଭ ସର୍ତ୍ତାବଳୀ ପ୍ରସଙ୍ଗରେ କେତେକ ଭିତ୍ତିହୀନ ଅଭିଯୋଗ କରାଯାଇଛି । କେତେକ ରାଜ୍ୟ କିମ୍ବା ଏକ ନିର୍ଦ୍ଦିଷ୍ଟ ଅଂଚଳ ପ୍ରତି ପକ୍ଷପାତିତା କରାଯାଉଥିବା କୁହାଯାଉଛି । ଆପଣମାନଙ୍କୁ ମୁଁ କହିବାକୁ ଚାହେଁ ଯେ ଆମର ସମାଲୋଚକମାନେ ପଥଭ୍ରଷ୍ଟ ହୋଇଯାଇଥିବା ଲକ୍ଷ୍ୟ କରାଯାଉଛି । ଜନସଂଖ୍ୟା ନିୟନ୍ତ୍ରଣ ଦିଗରେ କାର୍ଯ୍ୟ କରିଥିବା ରାଜ୍ୟଗୁଡ଼ିକୁ ପ୍ରୋତ୍ସାହିତ କରିବା ଲାଗି କେନ୍ଦ୍ର ସରକାର ଅର୍ଥ କମିଶନଙ୍କୁ ପରାମର୍ଶ ଦେଇଛନ୍ତି । ଏହି ମାନଦଣ୍ଡ ଦ୍ୱାରା, ତାମିଲନାଡ଼ୁ ଭଳି ରାଜ୍ୟ, ଯିଏକି ଜନସଂଖ୍ୟା ନିୟନ୍ତ୍ରଣ ଦିଗରେ ବ୍ୟାପକ ପ୍ରୟାସ, ଶକ୍ତି ଏବଂ ସମ୍ବଳ ବିନିଯୋଗ କରିଛି, ନିଶ୍ଚିତ ଭାବେ ଲାଭବାନ ହେବ । ପୂର୍ବରୁ ଏପରି ବ୍ୟବସ୍ଥା ନଥିଲା ।
ବନ୍ଧୁଗଣ,
ସହଯୋଗୀ ସଂଘୀୟ ବ୍ୟବସ୍ଥା ପ୍ରତି କେନ୍ଦ୍ର ସରକାର ପ୍ରତିବଦ୍ଧ ଅଟନ୍ତି । ଆମର ମନ୍ତ୍ର ହେଉଛି ସବକା ସାଥ, ସବକା ବିକାଶ । ଚାଲନ୍ତୁ ଆମେ ସମସ୍ତେ ମିଳିମିଶି ଏକ ନୂତନ ଭାରତ ଗଠନ କରିବା, ଯାହା ଆମର ମହାନ ସ୍ୱାଧୀନତା ସଂଗ୍ରାମୀମାନଙ୍କୁ ଗର୍ବିତ କରିବ ।
ଧନ୍ୟବାଦ
ବହୁତ ବହୁତ ଧନ୍ୟବାଦ ।
A baseless allegation is being made about the Terms of Reference of the 15th Finance Commission, being biased against certain states or a particular region: PM
— PMO India (@PMOIndia) April 12, 2018
The Union Government has suggested to the Finance Commission to consider incentivizing States who have worked on population control. Thus, a state like Tamil Nadu, which has devoted a lot of effort, energy and resources towards population control would certainly benefit: PM
— PMO India (@PMOIndia) April 12, 2018
