ଚାନ୍ସେଲର ଶ୍ରୀ କାର୍ଲ ନେହମାରଙ୍କ ନିମନ୍ତ୍ରଣକ୍ରମେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୨୦୨୪ ଜୁଲାଇ ୯ରୁ ୧୦ ତାରିଖ ମଧ୍ୟରେ ଅଷ୍ଟ୍ରିଆ ଗସ୍ତ କରିଛନ୍ତି । ଏହି ଗସ୍ତ ସମୟରେ ପ୍ରଧାନମନ୍ତ୍ରୀ ଅଷ୍ଟ୍ରିଆର ରାଷ୍ଟ୍ରପତି ମହାମହିମ ଆଲେକଜାଣ୍ଡର ଭାନ ଡର ବେଲେନଙ୍କୁ ସାକ୍ଷାତ କରିବା ସହ ଚାନ୍ସେଲର ନେହମାରଙ୍କ ସହ ଦ୍ୱିପାକ୍ଷିକ ଆଲୋଚନା କରିଥିଲେ । ପ୍ରଧାନମନ୍ତ୍ରୀ ମୋଦୀଙ୍କର ଏହା ପ୍ରଥମ ଅଷ୍ଟ୍ରିଆ ଗସ୍ତ ଏବଂ ୪୧ ବର୍ଷ ପରେ କୌଣସି ଭାରତୀୟ ପ୍ରଧାନମନ୍ତ୍ରୀଙ୍କର ମଧ୍ୟ ପ୍ରଥମ ଅଷ୍ଟ୍ରିଆ ଗସ୍ତ ଥିଲା । ଚଳିତ ବର୍ଷ ଦୁଇ ଦେଶ ମଧ୍ୟରେ କୂଟନୈତିକ ସମ୍ପର୍କର ୭୫ ବର୍ଷ ପୂରଣ ହେଉଛି।
ଗଣତନ୍ତ୍ର, ସ୍ୱାଧୀନତା, ଅନ୍ତର୍ଜାତୀୟ ଶାନ୍ତି ଓ ନିରାପତ୍ତାର ମିଳିତ ମୂଲ୍ୟବୋଧ, ଜାତିସଂଘ ଚାର୍ଟର୍ ସହିତ ଏକ ନିୟମ ଭିତ୍ତିକ ଅନ୍ତର୍ଜାତୀୟ ବ୍ୟବସ୍ଥା, ମିଳିତ ଐତିହାସିକ ସମ୍ପର୍କ ଏବଂ ଦୁଇ ଦେଶ ମଧ୍ୟରେ ଦୀର୍ଘଦିନ ଧରି ଚାଲି ଆସୁଥିବା ସମ୍ପର୍କ ବୃଦ୍ଧି ପାଉଥିବା ଭାଗିଦାରୀର କେନ୍ଦ୍ରବିନ୍ଦୁ ବୋଲି ପ୍ରଧାନମନ୍ତ୍ରୀ ଓ ଚାନ୍ସେଲର ଗୁରୁତ୍ୱାରୋପ କରିଥିଲେ । ଏକ ସ୍ଥିର, ସମୃଦ୍ଧ ଓ ଦୀର୍ଘସ୍ଥାୟୀ ବିଶ୍ୱ ପାଇଁ ଦ୍ୱିପାକ୍ଷିକ, ଆଞ୍ଚଳିକ ଓ ଅନ୍ତର୍ଜାତୀୟ ସହଯୋଗକୁ ଗଭୀର ଓ ବ୍ୟାପକ କରିବା ଦିଗରେ ସେମାନଙ୍କର ପ୍ରୟାସ ଜାରି ରଖିବାକୁ ସେମାନେ ନିଜର ପ୍ରତିବଦ୍ଧତାକୁ ଦୋହରାଇଥିଲେ ।
ଚାନ୍ସେଲର ନେହମାର୍ ଏବଂ ପ୍ରଧାନମନ୍ତ୍ରୀ ମୋଦୀ ସ୍ୱୀକାର କରିଛନ୍ତି ଯେ ଦୁଇ ଦେଶ ସେମାନଙ୍କ ଦ୍ୱିପାକ୍ଷିକ ଭାଗିଦାରୀକୁ ଉଲ୍ଲେଖନୀୟ ଭାବରେ ଉଚ୍ଚ ସ୍ତର ପର୍ଯ୍ୟନ୍ତ ଉନ୍ନତ କରିବାର ସାମର୍ଥ୍ୟ ରଖିଛନ୍ତି। ଏହି ସହଭାଗୀ ଉଦ୍ଦେଶ୍ୟକୁ ଆଗେଇ ନେବା ପାଇଁ ସେମାନେ ଏକ ରଣନୀତିକ ଆଭିମୁଖ୍ୟ ଗ୍ରହଣ କରିବାକୁ ରାଜି ହୋଇଥିଲେ। ଏହି ପରିପ୍ରେକ୍ଷୀରେ ଘନିଷ୍ଠ ରାଜନୈତିକ ସ୍ତରୀୟ ଆଲୋଚନା ବ୍ୟତୀତ ସେମାନେ ଭବିଷ୍ୟତ ଭିତ୍ତିକ ଦ୍ୱିପାକ୍ଷିକ ସ୍ଥାୟୀ ଅର୍ଥନୈତିକ ଏବଂ ପ୍ରଯୁକ୍ତି ବିଦ୍ୟା ଭାଗିଦାରୀ ଉପରେ ଗୁରୁତ୍ୱାରୋପ କରିଥିଲେ, ଯେଉଁଥିରେ ବିଭିନ୍ନ ନୂତନ ପଦକ୍ଷେପ ଓ ଯୁଗ୍ମ ପ୍ରକଳ୍ପ, ସହଯୋଗୀ ଜ୍ଞାନକୌଶଳ ବିକାଶ, ଗବେଷଣା ଓ ଉଦ୍ଭାବନ ଏବଂ ବ୍ୟବସାୟ-ବ୍ୟବସାୟ ସମ୍ପର୍କ, ସବୁଜ ଓ ଡିଜିଟାଲ ପ୍ରଯୁକ୍ତିବିଦ୍ୟା, ଭିତ୍ତିଭୂମି, ଅକ୍ଷୟ ଶକ୍ତି, ଜଳ ପରିଚାଳନା, ଜୀବନ ବିଜ୍ଞାନ, ସ୍ମାର୍ଟ ସିଟି, ଗତିଶୀଳତା ଓ ପରିବହନ କ୍ଷେତ୍ରରେ ଅନ୍ୟାନ୍ୟ ବିଷୟ ଅନ୍ତର୍ଭୁକ୍ତ ।
ରାଜନୈତିକ ଓ ସୁରକ୍ଷା ସହଯୋଗ
ଅନ୍ତର୍ଜାତୀୟ ତଥା କ୍ଷେତ୍ରୀୟ ଶାନ୍ତି ଓ ସମୃଦ୍ଧି ରେ ଯୋଗଦାନ କରିବା ପାଇଁ ଭାରତ ଓ ଅଷ୍ଟ୍ରିଆ ଭଳି ଗଣତାନ୍ତ୍ରିକ ଦେଶ ମିଳିତ ଭାବେ କାର୍ଯ୍ୟ କରିବା ଉପରେ ପ୍ରଧାନମନ୍ତ୍ରୀ ମୋଦୀ ଏବଂ ଚାନ୍ସେଲର ନେହମାର ଗୁରୁତ୍ୱାରୋପ କରିଥିଲେ । ଏହି ପରିପ୍ରେକ୍ଷୀରେ, ସେମାନେ ସାମ୍ପ୍ରତିକ ବର୍ଷଗୁଡ଼ିକରେ ସେମାନଙ୍କ ବୈଦେଶିକ ମନ୍ତ୍ରୀମାନଙ୍କ ମଧ୍ୟରେ ନିୟମିତ ଓ ଗୁରୁତ୍ୱପୂର୍ଣ୍ଣ ଆଲୋଚନାକୁ ସନ୍ତୋଷର ସହ ଉଲ୍ଲେଖ କରିଥିଲେ। ବିଭିନ୍ନ କ୍ଷେତ୍ରରେ ଅନୁଷ୍ଠାନିକ ଆଲୋଚନା ବୃଦ୍ଧି ଧାରା ବଜାୟ ରଖିବାକୁ ସେମାନେ ସେମାନଙ୍କ ଅଧିକାରୀମାନଙ୍କୁ ଉତ୍ସାହିତ କରିଥିଲେ।
ଉଭୟ ନେତା ୟୁଏନସିଏଲଓଏସରେ ପ୍ରତିଫଳିତ ଅନ୍ତର୍ଜାତୀୟ ସାମୁଦ୍ରିକ ଆଇନ ଅନୁଯାୟୀ ଏକ ମୁକ୍ତ, ଅବାଧ ଓ ନିୟମ ଭିତ୍ତିକ ଭାରତ-ପ୍ରଶାନ୍ତ ମହାସାଗର କ୍ଷେତ୍ର ପ୍ରତି ସେମାନଙ୍କର ପ୍ରତିବଦ୍ଧତାକୁ ଦୃଢ଼ କରିଥିଲେ। ସାମୁଦ୍ରିକ ନିରାପତ୍ତା ଓ ଅନ୍ତର୍ଜାତୀୟ ଶାନ୍ତି ତଥା ସ୍ଥିରତାର ଲାଭ ପାଇଁ ସାର୍ବଭୌମତ୍ୱ, କ୍ଷେତ୍ରୀୟ ଅଖଣ୍ଡତା ଓ ପରିବହନ ସ୍ୱାଧୀନତାକୁ ସମ୍ପୂର୍ଣ୍ଣ ସମ୍ମାନ ଦେଇଥିଲେ।
ଉଭୟ ନେତା ୟୁରୋପ ତଥା ପଶ୍ଚିମ ଏସିଆ/ମଧ୍ୟପ୍ରାଚ୍ୟର ସାମ୍ପ୍ରତିକ ଘଟଣାକ୍ରମ ସମ୍ପର୍କରେ ଗଭୀର ବିଶ୍ଳେଷଣ କରିଥିଲେ। ଶାନ୍ତି ଫେରାଇ ଆଣିବା ଏବଂ ସଶସ୍ତ୍ର ସଂଘର୍ଷକୁ ଏଡ଼ାଇବା ଦିଗରେ ପ୍ରୟାସକୁ ପ୍ରାଥମିକତା ଦେବା ସହିତ ଅନ୍ତର୍ଜାତୀୟ ଆଇନ ଓ ଜାତିସଂଘ ଚାର୍ଟରକୁ କଡ଼ାକଡ଼ି ପାଳନ କରିବା ଦିଗରେ ଦୁଇ ଦେଶର ଆଭିମୁଖ୍ୟରେ ପରିପୂରକତା ବିଷୟରେ ସେମାନେ ଉଲ୍ଲେଖ କରିଥିଲେ।
ୟୁକ୍ରେନ ଯୁଦ୍ଧ ସମ୍ପର୍କରେ ଉଭୟ ନେତା ଅନ୍ତର୍ଜାତୀୟ ଆଇନ ଏବଂ ଜାତିସଂଘ ଚାର୍ଟର ଅନୁଯାୟୀ ଶାନ୍ତିପୂର୍ଣ୍ଣ ସମାଧାନ ପାଇଁ ଯେକୌଣସି ସାମୂହିକ ପ୍ରୟାସକୁ ସମର୍ଥନ କରିଥିଲେ । ଉଭୟ ପକ୍ଷ ବିଶ୍ୱାସ କରନ୍ତି ଯେ ୟୁକ୍ରେନରେ ଏକ ବ୍ୟାପକ ଓ ସ୍ଥାୟୀ ଶାନ୍ତି ହାସଲ କରିବା ପାଇଁ ସମସ୍ତ ଅଂଶୀଦାରଙ୍କୁ ଏକାଠି କରିବା ଏବଂ ସଂଘର୍ଷରେ ଦୁଇ ପକ୍ଷ ମଧ୍ୟରେ ଏକ ଆନ୍ତରିକ ଓ ନିଷ୍ଠାପର ଯୋଗାଯୋଗ ଆବଶ୍ୟକ ।
ସୀମାପାର ଓ ସାଇବର ଆତଙ୍କବାଦ ସମେତ ସମସ୍ତ ପ୍ରକାର ଆତଙ୍କବାଦକୁ ଉଭୟ ନେତା ଦୃଢ଼ ନିନ୍ଦା କରିବା ସହ ଆତଙ୍କବାଦୀ କାର୍ଯ୍ୟକଳାପ ପାଇଁ ଅର୍ଥ ଯୋଗାଣ, ଯୋଜନା, ସମର୍ଥନ କିମ୍ବା ଆତଙ୍କବାଦୀ କାର୍ଯ୍ୟ କରୁଥିବା ଲୋକଙ୍କୁ କୌଣସି ଦେଶ ସୁରକ୍ଷିତ ଆଶ୍ରୟ ପ୍ରଦାନ କରିବା ଉଚିତ ନୁହେଁ ବୋଲି ଗୁରୁତ୍ୱର ସହ ଉଲ୍ଲେଖ କରିଥିଲେ। ମିଳିତ ଜାତିସଂଘ ନିରାପତ୍ତା ପରିଷଦ ୧୨୬୭ କଟକଣା କମିଟି ଦ୍ୱାରା ତାଲିକାଭୁକ୍ତ ହୋଇଥିବା ସଙ୍ଗଠନ ସହ ସମ୍ପୃକ୍ତ ବ୍ୟକ୍ତିଙ୍କ ସମେତ ସମସ୍ତ ଆତଙ୍କବାଦୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଉଭୟ ପକ୍ଷ ଆହ୍ୱାନ ଦେଇଛନ୍ତି। ଉଭୟ ଦେଶ ଏଫଏଟିଏଫ, ଏନଏମଏଫଟି ଏବଂ ଅନ୍ୟାନ୍ୟ ବହୁପକ୍ଷୀୟ ମଞ୍ଚରେ ମିଳିତ ଭାବେ କାର୍ଯ୍ୟ କରିବାକୁ ସେମାନଙ୍କ ପ୍ରତିବଦ୍ଧତା ଦୋହରାଇଛନ୍ତି ।
ସେପ୍ଟେମ୍ବର ୨୦୨୩ରେ ଦିଲ୍ଲୀରେ ଜି-୨୦ ଶିଖର ସମ୍ମିଳନୀ ଅବସରରେ ଭାରତ-ମଧ୍ୟପ୍ରାଚ୍ୟ-ୟୁରୋପ କରିଡର (ଆଇଏମ୍ଇସି)ର ଶୁଭାରମ୍ଭ କୁ ଦୁଇ ନେତା ମନେ ପକାଇଥିଲେ। ଚାନ୍ସେଲର ନେହମାର୍ ପ୍ରଧାନମନ୍ତ୍ରୀ ମୋଦୀଙ୍କୁ ଏହି ଗୁରୁତ୍ୱପୂର୍ଣ୍ଣ ପଦକ୍ଷେପର ନେତୃତ୍ୱ ପାଇଁ ଅଭିନନ୍ଦନ ଜଣାଇଥିଲେ। ଏହି ପ୍ରକଳ୍ପ ରଣନୀତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ହେବ ଏବଂ ଭାରତ, ମଧ୍ୟପ୍ରାଚ୍ୟ ଓ ୟୁରୋପ ମଧ୍ୟରେ ବାଣିଜ୍ୟ ଓ ଶକ୍ତିର ସମ୍ଭାବନା ତଥା ପ୍ରବାହକୁ ଯଥେଷ୍ଟ ବୃଦ୍ଧି କରିବ ବୋଲି ଦୁଇ ନେତା ସହମତ ହୋଇଥିଲେ। ଚାନ୍ସେଲର ନେହମାର୍ ଆଇଏମଇସି ସହିତ ଜଡ଼ିତ ହେବା ପାଇଁ ଅଷ୍ଟ୍ରିଆର ଗଭୀର ଆଗ୍ରହ ପ୍ରକାଶ କରିଥିଲେ ଏବଂ ଯୋଗାଯୋଗର ଏକ ପ୍ରମୁଖ ସକ୍ଷମକାରୀ ଭାବରେ ୟୁରୋପର କେନ୍ଦ୍ରରେ ଅଷ୍ଟ୍ରିଆର ଅବସ୍ଥିତିକୁ ଦର୍ଶାଇଥିଲେ ।
ଭାରତ ଓ ୟୁରୋପୀୟ ସଂଘ ମଧ୍ୟରେ ବିଶ୍ୱର ସର୍ବବୃହତ ଏବଂ ସବୁଠାରୁ ଜୀବନ୍ତ ମୁକ୍ତ ବଜାର ସ୍ଥାନ ରହିଛି ବୋଲି ଦୁଇ ନେତା ଗୁରୁତ୍ୱାରୋପ କରିଥିଲେ । ସେମାନେ ଉଲ୍ଲେଖ କରିଥିଲେ ଯେ ନିବିଡ଼ ୟୁରୋପୀୟ ସଂଘ-ଭାରତ ସମ୍ପର୍କ ପାରସ୍ପରିକ ଲାଭଦାୟକ ହେବା ସହିତ ଏକ ସକାରାତ୍ମକ ବୈଶ୍ୱିକ ପ୍ରଭାବ ପକାଇବ । ଚାନ୍ସେଲର ନେହମାର୍ ଏବଂ ପ୍ରଧାନମନ୍ତ୍ରୀ ମୋଦୀ ଭାରତ ଓ ୟୁରୋପୀୟ ସଂଘକୁ ନିକଟତର କରିବା ପାଇଁ ବିଭିନ୍ନ ପଦକ୍ଷେପକୁ ସମର୍ଥନ କରିବାକୁ ରାଜି ହୋଇଥିଲେ। ଏହି ପରିପ୍ରେକ୍ଷୀରେ ସେମାନେ ଭାରତ-ୟୁରୋପୀୟ ସଂଘ ବାଣିଜ୍ୟ ଓ ପୁଞ୍ଜିନିବେଶ ଆଲୋଚନା ଏବଂ ୟୁରୋପୀୟ ସଂଘ-ଭାରତ ଯୋଗାଯୋଗ ଭାଗିଦାରୀର ଶୀଘ୍ର କାର୍ଯ୍ୟକାରିତା ପାଇଁ ସେମାନଙ୍କର ଦୃଢ଼ ସମର୍ଥନକୁ ଦୋହରାଇଥିଲେ ।
ସ୍ଥାୟୀ ଆର୍ଥିକ ଭାଗିଦାରୀ
ଦୁଇ ନେତା ଦୁଇ ଦେଶ ମଧ୍ୟରେ ଏକ ସୁଦୃଢ଼ ଆର୍ଥିକ ଏବଂ ବୈଷୟିକ ଭାଗିଦାରୀକୁ ଏକ ରଣନୀତିକ ଉଦ୍ଦେଶ୍ୟ ଭାବରେ ଚିହ୍ନଟ କରିଥିଲେ । ଏହି ପରିପ୍ରେକ୍ଷୀରେ ଚଳିତ ଗସ୍ତ ସମୟରେ ଭିଏନାର ବିଭିନ୍ନ କମ୍ପାନୀର ସିଇଓଙ୍କ ଅଂଶଗ୍ରହଣ ସହିତ ପ୍ରଥମ ଉଚ୍ଚସ୍ତରୀୟ ଦ୍ୱିପାକ୍ଷିକ ବ୍ୟବସାୟ ବୈଠକର ଆୟୋଜନକୁ ସେମାନେ ସ୍ୱାଗତ କରିଥିଲେ । ଦୁଇ ନେତା ବ୍ୟବସାୟ ମଞ୍ଚ ବୈଠକକୁ ସମ୍ବୋଧିତ କରିବା ସହ ବିଭିନ୍ନ କ୍ଷେତ୍ରରେ ନୂତନ ଓ ଅଧିକ ସକ୍ରିୟ ଚୁକ୍ତି ଦିଗରେ କାର୍ଯ୍ୟ କରିବାକୁ ବ୍ୟବସାୟୀ ପ୍ରତିନିଧିମାନଙ୍କୁ ଉତ୍ସାହିତ କରିଥିଲେ ।
ଦୁଇ ନେତା ଦ୍ୱିପାକ୍ଷିକ ଭାଗିଦାରୀକୁ ଆଗକୁ ବଢ଼ାଇବାରେ ଗବେଷଣା, ବୈଜ୍ଞାନିକ ସହଯୋଗ, ପ୍ରଯୁକ୍ତି ବିଦ୍ୟା ଭାଗିଦାରୀ ଓ ଅଭିନବତାର ଗୁରୁତ୍ୱକୁ ସ୍ୱୀକାର କରିଥିଲେ ଏବଂ ପାରସ୍ପରିକ ହିତ ପାଇଁ ଏଭଳି ସମସ୍ତ ସୁଯୋଗ ଖୋଜିବାକୁ ଆହ୍ୱାନ ଦେଇଥିଲେ । ନୂତନ ବ୍ୟବସାୟ, ଶିଳ୍ପ ଏବଂ ଗବେଷଣା ଓ ବିକାଶ ଭାଗିଦାରୀ ମଡେଲ ମାଧ୍ୟମରେ ଚିହ୍ନଟ ହୋଇଥିବା କ୍ଷେତ୍ରରେ ପ୍ରଯୁକ୍ତିର ବିକାଶ ତଥା ବ୍ୟବସାୟୀକରଣ ପାଇଁ ଦୃଢ଼ ସହଯୋଗର ଆବଶ୍ୟକତା ଉପରେ ସେମାନେ ଗୁରୁତ୍ୱାରୋପ କରିଥିଲେ ।
ଫେବୃଆରୀ ୨୦୨୪ରେ ଅଷ୍ଟ୍ରିଆର ଶ୍ରମ ଓ ଅର୍ଥ ମନ୍ତ୍ରୀଙ୍କ ଭାରତ ଗସ୍ତ ସମୟରେ ସ୍ଥାପିତ ଷ୍ଟାର୍ଟଅପ୍ ସେତୁ ଏବଂ ଜୁନ୍ ୨୦୨୪ରେ ଭାରତୀୟ ଷ୍ଟାର୍ଟଅପ୍ ଗୁଡ଼ିକର ଏକ ଗୋଷ୍ଠୀ ଅଷ୍ଟ୍ରିଆ ଗସ୍ତ କରିବା ସମୟରେ ସ୍ଥାପିତ ଷ୍ଟାର୍ଟଅପ୍ ସେତୁ ମାଧ୍ୟମରେ ଦୁଇ ଦେଶର ଉଦ୍ଭାବନ ଏବଂ ଷ୍ଟାର୍ଟଅପ୍ ଇକୋସିଷ୍ଟମକୁ ଯୋଡ଼ିବା ପାଇଁ ପଦକ୍ଷେପକୁ ନେତାମାନେ ସ୍ୱାଗତ କରିଥିଲେ। ସେମାନେ ଅଷ୍ଟ୍ରିଆର ଗ୍ଲୋବାଲ ଇନକ୍ୟୁବେଟର ନେଟୱର୍କ ଏବଂ ଷ୍ଟାର୍ଟ ଅପ୍ ଇଣ୍ଡିଆ ପଦକ୍ଷେପ ଭଳି ଢାଞ୍ଚା ମାଧ୍ୟମରେ ଭବିଷ୍ୟତରେ ଆହୁରି ସମାନ ବିନିମୟକୁ ଅଧିକ ଗଭୀର କରିବା ପାଇଁ କାର୍ଯ୍ୟ କରିବାକୁ ଉଭୟ ଦେଶର ପ୍ରାସଙ୍ଗିକ ଏଜେନ୍ସିମାନଙ୍କୁ ଉତ୍ସାହିତ କରିଥିଲେ ।
ଜଳବାୟୁ ପରିବର୍ତ୍ତନ ଉପରେ ମିଳିତ ଜାତିସଂଘ ଫ୍ରେମୱର୍କ କନଭେନ୍ସନ୍ (ୟୁଏନ୍ଏଫସିସିସି)ର ଅଂଶୀଦାର ହୋଇଥିବାରୁ ତଥା ବିଶ୍ୱର ହାରାହାରି ତାପମାତ୍ରା ବୃଦ୍ଧିକୁ ପ୍ରାକ୍-ଶିଳ୍ପ ସ୍ତରଠାରୁ ୨ ଡିଗ୍ରୀ ସେଲସିୟସ୍ ତଳକୁ ରଖିବାକୁ ପ୍ରତିଶ୍ରୁତିବଦ୍ଧ ହୋଇଥିବାରୁ ନେତାମାନେ ସ୍ୱୀକାର କରିଥିଲେ ଯେ ଏହା ଜଳବାୟୁ ପରିବର୍ତ୍ତନର ବିପଦ ଓ ପ୍ରଭାବକୁ ଯଥେଷ୍ଟ ହ୍ରାସ କରିବ। ୨୦୫୦ ସୁଦ୍ଧା ଜଳବାୟୁ ନିରପେକ୍ଷତା ପାଇଁ ୟୁରୋପୀୟ ସଂଘ ସ୍ତରରେ ଗ୍ରହଣ କରାଯାଇଥିବା ବାଧ୍ୟତାମୂଳକ ଲକ୍ଷ୍ୟ, ୨୦୪୦ ସୁଦ୍ଧା ଜଳବାୟୁ ନିରପେକ୍ଷତା ହାସଲ ପାଇଁ ଅଷ୍ଟ୍ରିଆ ସରକାରଙ୍କ ପ୍ରତିବଦ୍ଧତା ଏବଂ ୨୦୭୦ ସୁଦ୍ଧା ନିଟ୍ ଶୂନ୍ୟ ନିର୍ଗମନ ହାସଲ କରିବାକୁ ଭାରତ ସରକାରଙ୍କ ପ୍ରତିବଦ୍ଧତାକୁ ସେମାନେ ସ୍ମରଣ କରିଥିଲେ।
ସେମାନେ ଅଷ୍ଟ୍ରିଆ ସରକାରଙ୍କ ଉଦଯାନ ରଣନୀତି ଏବଂ ଶକ୍ତି ପରିବର୍ତ୍ତନ ଆହ୍ୱାନର ମୁକାବିଲା ପାଇଁ ଭାରତ ଦ୍ୱାରା ଆରମ୍ଭ କରାଯାଇଥିବା ଜାତୀୟ ସବୁଜ ହାଇଡ୍ରୋଜେନ ମିଶନ ପରିପ୍ରେକ୍ଷୀରେ ଯୋଗଦାନର ସୁଯୋଗ ବିଷୟରେ ଉଲ୍ଲେଖ କରିଥିଲେ ଏବଂ ନବୀକରଣଯୋଗ୍ୟ / ସବୁଜ ଉଦଯାନ କ୍ଷେତ୍ରରେ ଉଭୟ ଦେଶର କମ୍ପାନୀ ଏବଂ ଗବେଷଣା ଓ ବିକାଶ ଅନୁଷ୍ଠାନ ମଧ୍ୟରେ ବ୍ୟାପକ ଭାଗିଦାରୀକୁ ସମର୍ଥନ କରିଥିଲେ ।
ସ୍ୱଚ୍ଛ ପରିବହନ, ଜଳ ଓ ବର୍ଜ୍ୟଜଳ ପରିଚାଳନା, ବର୍ଜ୍ୟବସ୍ତୁ ପରିଚାଳନା, ଅକ୍ଷୟ ଶକ୍ତି ଏବଂ ଅନ୍ୟାନ୍ୟ ସ୍ୱଚ୍ଛ ପ୍ରଯୁକ୍ତି ବିଦ୍ୟା କ୍ଷେତ୍ରରେ ଲକ୍ଷ୍ୟଭିତ୍ତିକ ସହଯୋଗ ପାଇଁ ନେତାମାନେ ବିଭିନ୍ନ ପରିବେଶ ପ୍ରଯୁକ୍ତି ବିଦ୍ୟା ଚିହ୍ନଟ କରିଥିଲେ। ଏହି କ୍ଷେତ୍ର ଏବଂ ଆନୁସଙ୍ଗିକ କ୍ଷେତ୍ରରେ ବିସ୍ତାରିତ ଯୋଗଦାନକୁ ସମର୍ଥନ କରିବା ପାଇଁ ସେମାନେ ସରକାରୀ ଓ ବେସରକାରୀ ଅନୁଷ୍ଠାନଗୁଡ଼ିକୁ ଏସବୁ କ୍ଷେତ୍ରଗୁଡିକରେ ଉଦ୍ୟୋଗ ଓ ପ୍ରକଳ୍ପଗୁଡିକ ପାଇଁ ଆର୍ଥିକ ସହାୟତା ପ୍ରଦାନ କରିବାକୁ ଉତ୍ସାହିତ କରିଥିଲେ । ସ୍ଥାୟୀ ଅର୍ଥନୀତି କ୍ଷେତ୍ର ସମେତ ଶିଳ୍ପାୟନ ପ୍ରକ୍ରିୟା (ଶିଳ୍ପ ୪.୦)ରେ ଡିଜିଟାଲ ଜ୍ଞାନକୌଶଳର ବଢୁଥିବା ଭୂମିକାକୁ ମଧ୍ୟ ସେମାନେ ସ୍ୱୀକୃତି ଦେଇଥିଲେ ।
ଏକ ସହଭାଗୀ ଭବିଷ୍ୟତ ପାଇଁ ଦକ୍ଷତା
ଚାନ୍ସେଲର ନେହମାର ଏବଂ ପ୍ରଧାନମନ୍ତ୍ରୀ ମୋଦୀ ଉଚ୍ଚ ଜ୍ଞାନକୌଶଳ କ୍ଷେତ୍ରରେ ବିସ୍ତାରିତ ଯୋଗଦାନକୁ ସମର୍ଥନ କରିବା ପାଇଁ ଦକ୍ଷତା ବିକାଶ ଏବଂ ଦକ୍ଷ କର୍ମଚାରୀଙ୍କ ଗତିଶୀଳତାର ଗୁରୁତ୍ୱକୁ ସ୍ୱୀକାର କରିଥିଲେ । ଏହି ପରିପ୍ରେକ୍ଷୀରେ, ସେମାନେ ଦ୍ୱିପାକ୍ଷିକ ପ୍ରବାସ ଓ ପରିବହନ ଚୁକ୍ତିକୁ ସ୍ୱାଗତ କରିଥିଲେ, ଯାହା ଏପରି ବିନିମୟକୁ ସହଜ କରିବା ପାଇଁ ଏକ ସଂସ୍ଥାଗତ ଢାଞ୍ଚା ପ୍ରଦାନ କରିଥାଏ ଏବଂ ଏହା ସହିତ ଅନିୟମିତ ପ୍ରବାସର ମୁକାବିଲା କରିଥାଏ।
ପାରସ୍ପରିକ ସ୍ୱାର୍ଥ, ବିଶେଷକରି ବିଜ୍ଞାନ, ପ୍ରଯୁକ୍ତି ବିଦ୍ୟା ଓ ଇଞ୍ଜିନିୟରିଂ କ୍ଷେତ୍ରରେ ଭବିଷ୍ୟତ ଭିତ୍ତିକ ଭାଗିଦାରୀ ସୃଷ୍ଟି କରିବାକୁ ସେମାନେ ଉଭୟ ଦେଶର ଶିକ୍ଷାନୁଷ୍ଠାନଗୁଡ଼ିକୁ ଉତ୍ସାହିତ କରିଥିଲେ।
ନାଗରିକ ସମ୍ପର୍କ
ଉଭୟ ନେତା ସାଂସ୍କୃତିକ ବିନିମୟର ଦୀର୍ଘ ପରମ୍ପରା, ବିଶେଷକରି ଅଷ୍ଟ୍ରିଆ ଇଣ୍ଡୋଲୋଜିଷ୍ଟ (ଭାରତୀୟ ଭାଷା, ସାହିତ୍ୟ ଓ ସଂସ୍କୃତି ଗବେଷକ) ଏବଂ ଅଷ୍ଟ୍ରିଆ ସହ ଜଡିତ ଅଗ୍ରଣୀ ଭାରତୀୟ ସାଂସ୍କୃତିକ ବ୍ୟକ୍ତିତ୍ୱଙ୍କ ଭୂମିକାକୁ ପ୍ରଶଂସା କରିଥିଲେ । ଅଷ୍ଟ୍ରିଆବାସୀଙ୍କ ମଧ୍ୟରେ ଯୋଗ ଓ ଆୟୁର୍ବେଦ ପ୍ରତି ଆଗ୍ରହ ବଢ଼ୁଥିବା କଥା ମଧ୍ୟ ନେତାମାନେ ଉଲ୍ଲେଖ କରିଥିଲେ। ନିକଟରେ ସ୍ୱାକ୍ଷରିତ ସାଂସ୍କୃତିକ ସହଯୋଗ ବୁଝାମଣାପତ୍ରର ଢାଞ୍ଚା ସମେତ ସଙ୍ଗୀତ, ନୃତ୍ୟ, ଅପେରା, ମଞ୍ଚ ନାଟକ, ଚଳଚ୍ଚିତ୍ର, ସାହିତ୍ୟ, କ୍ରୀଡ଼ା ଏବଂ ଅନ୍ୟାନ୍ୟ କ୍ଷେତ୍ରରେ ଦ୍ୱିପାକ୍ଷିକ ସାଂସ୍କୃତିକ ସମ୍ପର୍କକୁ ପ୍ରୋତ୍ସାହିତ କରିବାର ପ୍ରୟାସକୁ ସେମାନେ ସ୍ୱାଗତ କରିଥିଲେ ।
ଆର୍ଥିକ, ସ୍ଥାୟୀ ଏବଂ ସାମଗ୍ରିକ ଅଭିବୃଦ୍ଧି ତଥା ଉଭୟ ଦେଶର ଲୋକଙ୍କ ମଧ୍ୟରେ ଅଧିକ ବୁଝାମଣା ସୃଷ୍ଟି କରିବାରେ ପର୍ଯ୍ୟଟନର ଭୂମିକାକୁ ନେତାମାନେ ସ୍ୱୀକୃତି ଦେଇଥିଲେ । ସିଧାସଳଖ ବିମାନ ଯୋଗାଯୋଗ, ରହଣି ସମୟ ଓ ଅନ୍ୟାନ୍ୟ ପଦକ୍ଷେପ ସମେତ ଉଭୟ ଦିଗରେ ପର୍ଯ୍ୟଟନ ପ୍ରବାହକୁ ବିସ୍ତାର କରିବା ପାଇଁ ମିଳିତ ଭାବେ କାର୍ଯ୍ୟ କରିବା ପାଇଁ ସମ୍ପୃକ୍ତ ଏଜେନ୍ସିଗୁଡିକର ପ୍ରୟାସକୁ ସେମାନେ ଉତ୍ସାହିତ କରିଥିଲେ ।
ବହୁପକ୍ଷୀୟ ସହଯୋଗ
ବହୁପକ୍ଷବାଦ ଏବଂ ମିଳିତ ଜାତିସଂଘ ଚାର୍ଟରର ସିଦ୍ଧାନ୍ତ ପ୍ରତି ନେତାମାନେ ସେମାନଙ୍କର ପ୍ରତିବଦ୍ଧତାକୁ ଦୋହରାଇଥିଲେ। ବହୁପକ୍ଷୀୟ ମଞ୍ଚରେ ନିୟମିତ ଦ୍ୱିପାକ୍ଷିକ ପରାମର୍ଶ ଓ ସମନ୍ୱୟ ମାଧ୍ୟମରେ ଏହି ମୌଳିକ ନୀତିଗୁଡ଼ିକର ସୁରକ୍ଷା ଓ ପ୍ରୋତ୍ସାହନ ପାଇଁ ମିଳିତ ଭାବରେ କାର୍ଯ୍ୟ କରିବାକୁ ସେମାନେ ରାଜି ହୋଇଥିଲେ ।
ନିରାପତ୍ତା ପରିଷଦ ସମେତ ଜାତିସଂଘରେ ବ୍ୟାପକ ସଂସ୍କାର ହାସଲ ପାଇଁ ସେମାନେ ନିଜର ପ୍ରତିବଦ୍ଧତା ଦୋହରାଇଥିଲେ। ଭାରତ ୨୦୨୭-୨୮ କାର୍ଯ୍ୟକାଳ ପାଇଁ ଅଷ୍ଟ୍ରିଆର ୟୁଏନଏସସି ପ୍ରାର୍ଥିତ୍ୱକୁ ସମର୍ଥନ ଜଣାଇଥିବା ବେଳେ ଅଷ୍ଟ୍ରିଆ ୨୦୨୮-୨୯ ଅବଧି ପାଇଁ ଭାରତର ପ୍ରାର୍ଥିତ୍ୱକୁ ସମର୍ଥନ ଜଣାଇଛି।
ନିକଟରେ ନିଜର ୧୦୦ତମ ସଦସ୍ୟଙ୍କୁ ସ୍ୱାଗତ କରି ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ହାସଲ କରିଥିବା ଅନ୍ତର୍ଜାତୀୟ ସୌର ମେଣ୍ଟରେ ସଦସ୍ୟ ଭାବେ ଯୋଗ ଦେବା ଲାଗି ପ୍ରଧାନମନ୍ତ୍ରୀ ମୋଦୀ ଅଷ୍ଟ୍ରିଆକୁ ସ୍ୱାଗତ କରିଥିଲେ।
ଏହି ଗସ୍ତ ସମୟରେ ଅଷ୍ଟ୍ରିଆ ସରକାର ଏବଂ ଲୋକମାନଙ୍କ ଦ୍ୱାରା ପ୍ରଦାନ କରାଯାଇଥିବା ଉଦାର ଆତିଥେୟ ପାଇଁ ପ୍ରଧାନମନ୍ତ୍ରୀ ମୋଦୀ ଚାନ୍ସେଲର ନେହମାରଙ୍କୁ ଧନ୍ୟବାଦ ଜଣାଇଥିଲେ । ପ୍ରଧାନମନ୍ତ୍ରୀ ମୋଦୀ ଚାନ୍ସେଲର ନେହମାରଙ୍କୁ ତାଙ୍କ ସୁବିଧା ଅନୁଯାୟୀ ଭାରତ ଗସ୍ତ ପାଇଁ ନିମନ୍ତ୍ରଣ କରିଥିଲେ, ଯାହାକୁ ଚାନ୍ସେଲର ଆନନ୍ଦର ସହ ଗ୍ରହଣ କରିଥିଲେ ।
