‘ঙসি অসি ঐগী পামজবা নুমিৎনি’ : নরেন্দ্র মোদী

লাক্কদৌরিবা অদোমগী য়ু এ ই খোঙচৎগী মতাংদা খরা হায়বীয়ু

ফ্রেবুৱারি ১১দগী ১৩ ফাওবা দুবাইদা পাংথোক্কদবা ৬শুবা ৱার্ল্দ গোবর্মেন্ত সমিৎতা ৱা ঙাংনবা চেবাউ পীরকপদগী ঐগী দুবাইগী খোঙচৎ অসি চৎগদবনি। চহি অসিদা ভারত গেস্ত ওফ ওনর লৈবাক অমা ওইরি। ভারত্তা অসিগুম্বা ইকায়খুম্নবা উৎলকপা অসি লৈবাক অনিগী মরক্ত লৈনরিবা মরূপ-মপাং ওইবগী মরী অদু শক খঙবা উৎপনি।

দুবাইগী উপ-রাষ্ট্রপতি, প্রধানমন্ত্রী অমসুং দুবাইগী লৈঙাকপা সৈখ মহমদ বিন রসিদ অল মাকতুম অমসুং দুবাইগী ক্রাউন প্রিন্স অমসুং য়ু এ ই আমদ ফোর্সগী দিপুতি সুপ্রিম কম্মান্দর সৈখ মহমদ বিন জয়েদ নয়ানগা ঐগা উনদুনা মীফম পাংথোক্কনি।

ভারতকী ইনর্জি ৱাৎহন্দনবা অমসুং য়ু এ ইনা ইনফ্রাস্ত্রকচরদা শেল থাদহন্নবা মরুওইনা খন্নগনি। ঐগী মমাংগী য়ু এ ই খোঙচৎশিংদা য়ানখিবশিং অমসুং মমাংগী চহিদা ঐখোয়গী গনতন্ত্র দিবস থৌরমদা সৈখ মহমদ বিন জয়েদনা অথোইবা মীথুংলেন ওইখিবগী মহয় চারে।

তোঙান-তোঙানবা শেন্মীৎলোনগী মতাংদা লৈবাক অনিনা মতেং পীনবা অসিগী মথক্তা সরকারগা সরকারগা অমসুং ললোন-ইতিক মশেল মতেং পাংনবগী ৱাফম য়াওরকপা অসি য়াম্না নুংঙাইবা অমনি।

“য়ু এ ইদা লৈরিবা ভারত মচাশিংনা লৈবাক অনিগী মরক্তা থোং ওইরি অমসুং ঐগী খোঙচৎ অসিনা লৈবাক অনিগী মরী চেৎশিনহনগনি হায়না ঐনা থাজৈ”

য়ু এ ইদা ভারত মচা মিলিয়ন ৩ হেন্না লৈরি।  ভারত মচাশিংনা লৈবাক অনিগী মরক্তা থোং ওইরি অমসুং ঐগী খোঙচৎ অসিনা লৈবাক অনিগী মরী চেৎশিনহনগনি হায়না ঐনা থাজৈ।

অদোম লমকোয়বগী নুংঙাইবা ফংবীবরা?

ঐহাক মুখ্যমন্ত্রী ওইনা নৎত্রগা প্রধানমন্ত্রী ওইনা লম কোয়দে। অদুবু ঐগী থবক অসিনা ঐহাক ভারত শীনবা থুংনা কোয়দুনা মীয়ামগা উনবা, মখোয়গী অৱা-নুংঙাই খঙবা দরকার ওই। মসি ঐগী নুংঙাইবনি অমসুং পোথাবনি। কুমজা ২০০১ দা ঐনা গুজরাতকী মুখ্যমন্ত্রী ওইদ্রিঙৈদা ঐ ভারতগী জিলা খুদিংমক থুংনবা চৎখ্রে। মদু য়াম্না নুংঙাইবা অমনি অমসুং ভারতগী ইনাক খুল্লবা কলচরশিং ঐনা উবা ফংখি।

অদোম্না ভারতকী মপান্দা চৎপদা চাক থোঙনবা অখন্নবা মী পুবীবরা?

মতম পুম্নমক্তা পুদে। ঐগী খোঙচৎশিংদা ঐগী চাক থোঙনবা অখন্নবা মী পুদে। য়ুম্বু অদুনা থোঙলম্বা খুদিংমক ঐনা হরাওনা অমসুং হাওনা চাই।

অদোম নোংমদা পুং কয়া তুম্বীবগে?

থবক্কী মতুংইন্না ঐ নোংমদা পুং ৪ দগী ৬ ফাওবা তুম্মি। অদুবু ঐ অহিং খুদিং ফজনা তুম্মি। তশেংনা হায়রবদা, ঐ ফম্মুং হেক চংবগা  তুম্মি। ঐ তুম্লমদাইদা অৱাবা ৱাখল খন্দে অমসুং অয়ুক খুদিং নুংঙাইনা য়াহৌই অমসুং নোংমগী মতম অদু তরাম্না ওকই। পুক্নিং অমসুং হকচাংগীদমক তুম্বা অসি তঙাইফদবা অমনি। হন্দক ঐনা নহারোলশিংগীদমক একজাম ৱারিয়র কৌবা লাইরিক অমা ইখিবা অদুদা নুমিদাং ফজনা তুম্বগী মরুওইবশিং অদু ঐনা ফজনা পল্লি।

অদোম্না অয়ুক্তা করি থবক ইহান হান্না তৌবীবগে অমসুং ফম্মুং চংলমদাইদা করি থবক তৌবীবগে?

ঐ অহানবদা য়োগ শান্নৈ, মসি পুক্নিং অমসুং হকচাংদা য়াম্না কান্নৈ হায়না ঐনা খল্লি। মসিনা ঐগী হকচাং তেকখৎহল্লি অমসুং নুমিৎ চুপ্পা হকচাং খিং খিং লাওদুনা লৈহল্লি। ঐগী অয়ুক্কী মতম অয়াম্বা পাউচেশিং পাই, ই-মেলশিং য়েংই অমসুং ফোন তৌই। নরেন্দ্র মোদী মোবাইল এপতা মীয়াম্না পীরকপা পাউতাকশিং অমসুং ৱাখল্লোনশিং ঐনা পাদুনা মতম লেল্লি। ভারতগী মীয়ামগা পাউ ফাওনদুনা লৈবগী অঙকপা নুংঙাইবা অমা ঐনা ফংই।

“ঐ মীয়ামদা থৌনা পীরিবা তেক্নোলোজীগী তৌবা ঙম্বদা চেৎনা থাজবা মীওই অমনি”

ফম্মুং চংদ্রিঙৈদা, নুংথিলগী মতমদা থারকপা চে-চাংশিং ঐনা পাই। মথং নুমিৎকী থবকশিং অমসুং উনগদবশিংসু ঐনা শেম শাই।

অদোমগী পামজবা মথেল লৈবীবরা? চারা ৱানবদা, অয়ুক্কী চাক্তা অমসুং নুমিদাংগী চাক্লেন্দা করি চানিংবা লৈবীবগে?

ঐ চাবদা থৱায় য়াওবা মীওই অমা নত্তে। ঐ নুমিৎ খুদিংগী অচম্বা মনা-মশিং পাম্না চাই।

ভারত অসি চাবা পামজবশিংগী অচৌবা লৈবাক অমনি। ঐখোয়গী লৈবাক অসিগী রাজ্য খুদিংমক্তা হাওরবা মথেল কয়া লৈ। ভারতগী মফম খুদিংমক চৎপগী খুদোংচাবা ঐনা ফংখ্রে অমসুং ভারতগী মথেল কয়া মহাও তংবগী খুদোংচাবা ফংলে।

চয়োল অমগী মনুংদা অদোম্না করি নুমিৎ পাম্বীবগে অমসুং করি মরমগীনো?

চয়োল অমগী মনুংদা ঙসি অসিনা ঐগী পামজবা নুমিৎনি! অচম্বা ফিদম অমা ঐনা থাজৈ, ঙসি নোংমগী পুন্সি অদু মপুংফানা হিংগদবনি। থবক কন্না শুনবা অমসুং থবক ওইনা পাংথোক্নবা ঐখোয়গী খুৎতা লৈরিবা মতম অসি ঙসি হায়বা মতম অসিখক্তনি।

কনানা অদোমদা খ্বাইদগী য়াম্না ঈথিল পীবীখিবগে?

মীওই কয়ানা ঐঙোন্দা ঈথিল পীখি অমসুং মখোয় খরগী মরমদা ঐনা শোয়দনা নখোয়দা হায়গনি।

ঐগী অঙাং ওইরিঙৈ মতমদগী, ঐ শ্বামী বিবেকানন্দনা ঈথিল পীখি। মালেমগী ওইনা নুংশিনবা অমসুং মরূপ-মপাং ওইবগী মরমদা মহাক্কী অচেৎপা থাজবা লৈ।

মহাত্মা গান্ধী অসিসু ঐঙোন্দা ঈথিল পীখিবা মীওই অমনি। লায়রবশিংগীদমক মহাক্না লৈখিবা, ইংতপ্পা অমসুং অহিংশাদা থম্লিবা মহাক্কী অচেৎপা থাজবশিং নৎত্রগা লৈবাক্কী নিংতম লান্দা লৈবাক অসিগী মীওই অমমম পুনশিনবা ঙমখিবা মহাক্কী গুনশিং অদু ওইগনি।

অপুনবা ভারত অমা শেমগৎনবা মহাক্না হোৎনরমখিবশিং অদুগীদমক ঐনা সর্দার বল্লভভাই পতেলবু লুম্না লৌই। মহাক্কী থৌনা অদুগীদমক সহিদ ভগৎ সিংহনা ঐগী ৱাখলদা অচৌবা ঈনোৎ পীখি।

“ অচম্বা ফিদম অমা ঐনা থাজৈ,ঙসি নোংমগী পুন্সি  অদু মপুংফানা হিংগদবনি । থবক কন্না শুনবা অমসুং থবক ওইনা পাংথোক্নবা ঐখোয়গী খুৎতা লৈরিবা মতম অসি ঙসি হায়বা মতম অসিখক্তনি।”

ঐঙোন্দা ঈথিল পীবগুম দোক্তর বাবাসাহেব অম্বেদকরনা ভারত মচা কয়াদা ঈথিল পীখি। চপ য়ুংনা লেপ্পা অমসুং অচম্বা ৱাখল্লোন চেনবগী মরুওইবশিং মহাক্না ঐখোয়দা তম্বীরমখি।

মসিনা অরোইবদি নত্তে, মহাক্কী মাইওন য়াম্বা মগুনশিং অমসুং মহাক্না মরৈবাক্কী তৌরম্বা থবকশিং অদুগীদমক ঐনা বেঞ্জামিন ফ্রেঙ্কলিনবু ইকাই খুম্নৈ।

অদোমগী ই-পাউ ফাওনবদা অদোম কয়া য়াম্না তেক্নোলোজী শীজিন্নবীবগে?

ঐ মীয়ামদা থৌনা পীরিবা তেক্নোলোজীগী তৌবা ঙম্বদা চেৎনা থাজবা মীওই অমনি।

অনৌবা ভারতগা পাউ ফাওনবদা তেক্নোলোজী অসি অঙকপা পাম্বৈ অমনি মসিনা মখোয়দা ইনোৎ অমা পীরি।

ঐ সোসিয়েল মীদিয়া (ফেসবুক, তুইত্তর, লিঙ্কদিন, ইনস্তগ্রাম, য়ুত্যুব) ফজনা শীজিন্নৈ অমসুং মখোয়গী কান্নবা ঐনা ফজনা খঙবা ঙমই।

ঐগী মোইবাইল এপ নরেন্দ্র মোদী মোবাইল এপতা ঐনা তোয়না মেসেজ চেক তৌই। এপ অসিদা হিরম কয়াদা মীয়ামগী পাউতাক, ৱাকৎ অমসুং ৱাখল্লোন কয়া পীরকখি। মসি ঐঙোন্দা য়াম্না লৌশিং ওইখি।

লৌথোকফমঃ গল্ফ ন্যুজ এক্সপ্রেস