খুরুমজরি...
ইলেক্ত্রোনিক্স অমসুং আইতি মন্ত্রী…অশ্বিনী বৈষ্ণব, লৈবাক অসিগী তোঙান-তোঙানবা রিসর্চ ইন্সতিত্যুসনশিংগী দিরেক্তরশিং…. লৈবাক্কী মকোক থোংবা সাইন্তিস্তশিং…ইঞ্জিনীয়রশিং…মহৈরোয়শিং, অতৈ দিগনিতরীশিং, অমসুং নুপী অমদি নুপাশিং!
ঙসি অসি সাইন্স অমসুং তেক্নোলোজীগী লমদা ভারতকী অচৌবা মায়পাকপগী নুমিৎ অমনি। ঙসিগী থৌরম অসি 21শুবা চহিচাগী ভারতনা সাইন্স, তেক্নোলোজী অমসুং রিসর্চতা মরুওইবা পীদুনা মতৌ করম্না মাংলোমদা চংশিল্লক্লিবা অদুগী মশক অমসু ওইরি। ঙসিগী ভারতনা লোইনাইদ্রবা ওইথোকপা য়াবা কয়াদা অনৌবা খুদোংচাবশিং ফংলি। ঐখোয়গী সাইন্তিস্ত অমসুং ইঞ্জিনীয়রশিংনা 'পরম রুদ্রা সুপর-কম্প্যুতর' অহুম শাখ্রে। সুপর-কম্প্যুতর অহুম অসি দিল্লী, পুনে অমসুং কোলকতাদা ইনস্তোল তৌখ্রে। ঙসি লৈবাক অসিগী ওইনা হায়-পর্ফোমেন্স কম্প্যুতিং সিস্তেম অনি, আরকা অমসুং অরুনিকসু হৌদোকখ্রে। মসিগী থৌরম অসিদা, লৈবাক অসিগী সাইন্তিফিক কম্ম্যুনিতী, ইঞ্জিনীয়রশিং অমসুং লৈবাক অসিগী মীওই পুম্নমকপু ঐনা থাগৎপা ফোংদোকচরি।
ইচিল-ইনাওশিং,
হাক্কী অহুমশুবা তর্মগী হৌরকপদা, নুমিৎ 100গী মথক্তা নহারোলশিংদা অহেনবা নুমিৎ 25 পীগনি হায়না ঐহাক্না ৱাশকখি। চপ মান্নবা মওংদা, ঙসি ঐহাক্না সুপর-কম্প্যুতরশিং অসি ঐহাক্কী লৈবাক অসিগী নহাশিংদা কত্থোকচবা পাম্মি। সুপর-কম্প্যুতরশিং অসিনা ভারতকী নহা ওইরিবা সাইন্তিস্তশিংনা ভারত মশাদা খ্বাইদগী ফবা তেক্নোলোজী অসি ফংহনবদা মরু ওইবা থৌদাং অমা লৌগনি। ঙসি লোঞ্চ তৌখিবা সুপর-কম্প্যুতর অহুম অসিনা ফিজিক্সতগী হৌরগা আর্থ সাইন্স অমসুং কোস্মোলোজী ফাওবদা অৱাংবা থাক্কী রিসর্চতা মতেং পাংগনি। মসি ঙসিগী সাইন্স অমসুং তেক্নোলোজীগী মালেম অসিনা তুংলমচৎকী মালেমদা য়েংলিবা হীরমশিংনি।
মরুপশিং,
ঙসিদি, দিজিতেল রিভোলুসনগী মতম অসিদা, কম্প্যুতিং কেপাসিতী অসি নেস্নেল কেপাসিতীগা মান্নরক্লি। সাইন্স অমসুং তেক্নোলোজীগী লমদা রিসর্চকী খুদোংচাবশিং, শেন্মিৎলোনগী চাউখৎপগী খুদোংচাবশিং... লৈবাক অসিগী স্ত্রেতেজিক ওইবা তৌবা ঙম্বশিং... দিজাস্তর মেনেজমেন্তগী তৌবা ঙম্বশিং... হিংবদা লাইবা, ললোন-ইতিক তৌবদা লাইবা, তেক্নোলোজী অমসুং কম্প্যুতিংগী তৌবা ঙম্বশিংদা হকথেংননা মখা পোনদবা অসিগুম্বা সেক্তর অমত্তা লৈতে! মসি ইন্দস্ত্রী 4.0দা ভারতকী মায় পাকপগী খ্বাইদগী চাউবা য়ুম্ফমনি... মসিগী রিভোলুসন অসিদা ঐখোয়গী শরুক অসি বিৎ অমসুং বাইৎতা নত্তনা তেরা-বাইৎ অমসুং পেতা-বাইৎতা ওইগদবনি। মরম অদুনা, ঙসিগী মায়পাকপা অসি ঐখোয়না অচুম্বা মাইকৈদা অচুম্বা খোঙজেলদা চংশিল্লিবা অসিগী খুদম্নি।
মরুপশিং,
ঙসিগী অনৌবা ভারত অসি চাউখৎপা অমসুং তেক্নোলোজীদা মালেমগী অতৈ লৈবাকশিংগা চাংদম্নদুনা মপুং ফাহনবা ঙম্লোই। অনৌবা ভারতনা মাগী সাইন্তিফিক রিসর্চকী খুত্থাংদা মীওইবা জাতিগী সেবা তৌবগী থৌদাং অদু লৌরি। মসি ঐখোয়গী থৌদাংনি, 'রিসর্চকী খুত্থাংদা মশা-মরোমদোম লেপচবা', মশা-মরোমদোম লেপচনবা সাইন্স, ঙসিদি মসি ঐখোয়গী মন্ত্র ওইরে। মসিগীদমক ঐখোয়না দিজিতেল ইন্দিয়া, স্তার্ত অপ ইন্দিয়া, মেক ইন ইন্দিয়াগুম্বা পুৱারী ওইরবা কেম্পেন কয়া অমা হৌদোক্লে। ভারতকী তুংলমচৎকী মীরোলশিংদা সাইন্তিফিক মেমোরিতী মপাঙ্গল কনখৎহন্নবা... স্কুলশিংদা অতল তিঙ্করিং লেব লিশিং10 হেন্না শঙ্গাখ্রে।
STEMগী সবজেক্তশিংদা মহৈ তম্বগী স্কোলারশিপসু হেনগৎহনখ্রে। চহি অসিগী বজেৎতা লুপা করোর লাখ 1গী রিসর্চ ফন্দ অমসু লাউথোকখ্রে। ভারতনা 21শুবা চহিচাগী মালেম অসিদা ইন্নোভেসনশিংগা লোয়ননা শক্তি লৈহন্নবা অমসুং মালেম অসিবু মপাঙ্গল কনখৎহন্নবা হোৎনরি।
মরুপশিং,
ঙসিদি, ভারতনা অনৌবা ৱারেপ লৌদবা নৎত্রগা অনৌবা পোলিসী শেমদবা সেক্তর অমত্তা লৈতে। খুদম অমা হায়রবদি স্পেস সেক্তরনি। ঙসি ভারতনা স্পেস সেক্তরদা অচৌবা শক্তি অমা ওইরে। অতোপ্পা লৈবাকশিংনা দোল্লর বিল্লিয়ন কয়া চাদিং তৌদুনা মায় পাকপা ঙমখিবশিং অদু ঐখোয়গী সাইন্তিস্তশিংনা অকক্নবা রিসোর্সশিংগা লোয়ননা মায়পাকপা ঙমখ্রে। মসিগী হীহুল অসিগা লোয়ননা ভারতনা থাগী খা থংবা পোল য়ৌখিবা অহানবা লৈবাক ওইরে। ৱারেপ অসিগা লোয়ননা, ভারতনা হৌজিক মিসন গগনয়ানগীদমক শেম-শারি। "ভারতকী মিসন গগনয়ান অসি স্পেসতা য়ৌনবা মিসন অমা খক্তা নত্তে, অদুবু ঐখোয়গী সাইন্তিফিক দ্রীমশিংগী লোইনাইদ্রবা মঙলানশিং য়ৌনবা মিসন অমনি।" ভারতনা 2035 ফাওবদা স্পেস স্তেসন অমা শেমগৎনবা পান্দম থম্লি। নুমিৎ খরনিগী মমাংদা, সরকারনা মাগী অহানবা ফেজ অদু অয়াবা পীখ্রে।
মরুপশিং,
ঙসিদি, সেমি-কন্দক্তরশিং অসি চাউখৎপগী তঙাই ফদবা মচাক অমা ওইরে। ভারত সরকারনা মসিগী মাইকৈ অসিদা 'ইন্দিয়া সেমিকন্দক্তর মিসন'গুম্বা মরুওইবা কেম্পেন অমসু হৌদোকখ্রে। অসিগুম্বা অতেনবা মতমগী মনুংদা, ঐখোয়না মসিগী পোজিতিব ওইবা মহৈশিং উবা হৌরে। ভারতনা মালেমগী সপ্লাই চেনগী মরুওইবা শরুক অমা ওইগদবা মশাগী সেমিকন্দক্তর ইকো-সিস্তেম শেমগৎলি। ঙসি, ভারতকী মল্তি-দাইমেন্সনেল সাইন্তিফিক দিবেলপমেন্ত অসি পরম রুদ্রা সুপর-কম্প্যুতর অহুমগী খুত্থাংদা হেন্না মপাঙ্গল কনখৎহল্লগনি।
মরুপশিং,
লৈবাক অমা হেক্তনা অচৌবা মঙলান অমা লৈরবদি অচৌবা মায় পাকপা অমা ফংই। সুপরকম্প্যুতরদগী ক্বান্তম কম্প্যুতর ফাওবগী ভারতকী খোঙচৎ অসি মসিগী অচৌবা মীৎয়েং অসিগী মহৈনি। সুপরকম্প্যুতরশিং অসি লৈবাক খরখক্তগী লমনি হায়না লৌনরম্বা মতম অমা লৈরম্মি। অদুবু, ঐখোয়না নেস্নেল সুপরকম্প্যুতরিং মিসন অসি 2015দা হৌদোকখি। ঙসিসু, ভারতনা সুপরকম্প্যুতরগী লমদা অচৌবা লৈবাকশিংগা চাংদম্নরি। অমসুং ঐখোয়না মসিদা লেপকনি। ভারতনা ক্বান্তম কম্প্যুতরিংগুম্বা তেক্নোলোজীশিংদা মাংজিল থাখ্রে। ঐখোয়গী নেস্নেল ক্বান্তম মিসন অসিনা ভারতপু ক্বান্তম কম্প্যুতিংগী লমদা মাংলোমদা পুখৎপদা অচৌবা থৌদাং অমা লৌগনি। অনৌবা তেক্নোলোজী অসিনা লাক্কদৌরিবা মতমশিংদা ঐখোয়গী মালেম অসি মপুং ফানা হোংদোক্লগনি। মসিনা IT সেক্তর, মেন্যুফেকচরিং ইন্দস্ত্রী, MSME অমসুং স্তার্তঅপ সেক্তরদা মমাংদা অমুক্তা ওইখিদ্রিবা অহোংবা পুরক্লগনি, অনৌবা খুদোংচাবশিং শেম্লগনি। অমসুং মসিদা, ভারতনা মালেম পুম্বদা অনৌবা মায়কৈ অমা পীনবগী ৱাখল্লোনগা লোয়ননা মাংলোমদা চংশিল্লি। মরুপশিং, "সাইন্সকী মরুওইবা অসি ইনভেন্সন অমসুং দিবেলপমেন্ততা নত্তে, অদুবু লাস্ত মাইলগী অপাম্বশিং মপুং ফাহন্নদুনসুনি।"
ঙসি ঐখোয়না হায়-তেক চৎনরবদি, ঐখোয়গী হাই-তেক তেক্নোলোজী অসি লায়রবশিংগী পাঙ্গল ওইহনগনি। ভারতকী দিজিতেল ইকনোমী, ঐখোয়গী UPI অসি মসিগী অচৌবা খুদম অমনি। ইকুই কুইদ্রিঙৈদা, ঐখোয়না 'মিসন মৌসাম' হৌদোক্লে। মসিনা ভারতপু ৱেদর রেদি অমসুং ক্লাইমেৎ স্মার্ত ওইহন্নবা ঐখোয়গী মঙলান অদু মংফাওনহনগনি। ঙসিসু, লৈবাক অসিনা ফংলিবা সুপরকম্প্যুতরশিং অমসুং হায়-পরফোর্মেন্স কম্প্যুতর সিস্তেমগুম্বা এচিবমেন্তশিং... মখোয়গী মহৈশিং অসি লৈবাক অসিগী লায়রবশিং অমসুং খুঙ্গংশিংদা মতেং পাংনবা পাম্বৈ অমা ওইগনি। HPC সিস্তেমশিং লাক্লবা মতুংদা, লৈবাক অসিনা নুংশিৎকী ফীভম মাংজৌননা তাক্নবা সাইন্তিফিক কেপাসিতী হেনগৎলগনি। হৌজিক ঐখোয়না হাইপর লোকেল, হায়বদি মপুং ফানা লোকেলগী থাক্তা ৱেদরগী ফিভমগা মরী লৈনবা হেন্না চুম্বা ইনফোর্মেসন পীবা ঙম্লগনি। হায়বদি, ঐখোয়না খুঙ্গং অমগী নহারোলশিংদা খুঙ্গং অদুগী নহারোলশিংগা পাউ ফাওনহনবা ঙমগনি। সুপরকম্প্যুতর অমনা অরাপ্পা খুঙ্গং অমগী ৱেদর অমসুং লৈহাও নৈনরকপা মতমদা, মসি সাইন্সকী মায় পাকপা অমখক্তং নত্তে অদুবু মসিনা মীওই লিশিং অমসুং মিলিয়ন কয়াগী পুন্সিদা অচৌবা অহোংবা অমা লৈহল্লি। সুপরকম্প্যুতর অসিনা খ্বাইদগী পীকপা লমদমগী লৌমী ফাওবা মালেমগী খ্বাইদগী ফবা লৌশিং ফংহনগনি।
মসিনা খ্বাইদগী পীকপা খুঙ্গংশিংদসু লৌউ-শিংউ তৌরিবা লৌমীশিংদা চাউনা কান্নবা ফংহল্লগনি মরমদি হৌজিক্তি লৌমীশিংনা মখোয়গী মহৈ-মরোংশিংগীদমক অচুম্বা ৱারেপ লৌবা ঙম্লগনি। ঙা ফাবা সমুদ্রদা চৎপা ঙামীশিংনা মসিগী কান্নবা ফংগনি। লৌমীশিংনা মাংখিবা অদু হন্থহন্নবা ঐখোয়না অনৌবা পাম্বৈশিং পুথোকপা ঙমগনি। মসিনা ইন্সুরেন্স স্কিমগী খুদোংচাবা ফংহনবদা মতেং পাংগনি। মসিগী মতেংগা লোইননা, ঐখোয়না স্তেকহোল্দর পুম্নমক্না কান্নবা ফংগদবা এ.আই. অমসুং মেছিন লর্নিংগা মরী লৈনবা মোদেলশিং শেম্বা ঙমগনি। লৈবাক অসিগী মনুংদা সুপরকম্প্যুতরশিং শেমগৎপা ঙম্বগী ঐখোয়গী তৌবা ঙম্বনা, মসিগী এচিবমেন্ত অসি লৈবাক অসিগী মীচম প্রজাগীদমক চাউথোকচনীংঙাই ওইবতা নত্তনা, লাক্কদৌরিবা মতমশিংদা লৈবাক অসিগী মীচম প্রজাগী পুন্সিদা অচৌবা অহোংবা পুরকপগী লম্বীসু হাংদোক্লগনি।
AI অমসুং মেছিন লর্নিংগী মতম অসিদা, সুপরকম্প্যুতরশিংনা অচৌবা থৌদাং অমা লৌগনি। ঙসিদি ভারতনা 5G নেৎৱার্ক অসি মসিগী লমদমসিগী তেক্নোলোজীগা লোয়ননা শেম্লে, ঙসিদি ভারত্তা অচৌবা কম্পনীশিংগী মোবাইল ফোনশিং শারি, মসিনা লৈবাক অসিগী দিজিতেল রিভোলুসনদা অনৌবা শাফু পীরে। মসিগী খুত্থাংদা ঐখোয়না লৈবাক অসিগী প্রজা খুদিংমক্তা তেক্নোলোজী অমসুং মসিগী কান্নবশিং অসি য়ৌহনবদা ঙম্লে। মতৌ অসুম্না, তুংলমচৎকী তেক্নোলোজী শেমগৎপগী ঐখোয়গী তৌবা ঙম্বা, মেক ইন ইন্দিয়াগী মায়পাকপা অসিনা লৈবাক অসিগী মীচম প্রজাশিংবু লাক্কদৌরিবা তুংলমচৎকীদমক শেম-শারগনি। সুপরকম্প্যুতরশিংনা লম খুদিংমক্তা অনৌবা রিসর্চশিং পাংথোক্কনি। মসিনা অনৌবা ওইথোকপা য়াবশিং পোকহল্লগনি। লৈবাক অসিগী মীচম প্রজা অসিনা মসিগী কান্নবা ফংগনি। মখোয়না মালেমগী অতোপ্পশিংদগী শোথরোই, অদুবু মখোয়না মালেমগা লোয়ননা চৎমিন্নগনি। অমসুং ঐহাক্কী নহারোলশিংগীদমক, ঐহাক্কী লৈবাক অসিগী নহারোলশিংগী শক্তিগীদমক, অমসুং ভারত অসি মালেমগী খ্বাইদগী নহা ওইরিবা লৈবাক অমা ওইরকপা মতমদা, লাক্কদৌরিবা মতম অসি সাইন্স অমসুং তেক্নোলোজীদা চৎকদৌরিবা মতমদা, মসি অনৌবা খুদোংচাবশিং পোকহল্লকপা থৌরম অমসু ওইগনি। মসিগীদমক্তা ঐহাক্না লৈবাক অসিগী নহাশিংবু অখন্ননা থাগৎপা ফোংদোকচরি। মসিগী মায়পাকপশিং অসিগীদমক্তা ঐহাক্না লৈবাক মীয়াম্বু থাগৎপা ফোংদোকচরি।
ঐহাক্না ঐখোয়গী নহাশিং অমসুং ঐখোয়গী রিসর্চরশিংনা মসিগী অওনবা পুরিবা খুদোংচাবশিং অসি শীজিন্নগনি অমসুং সাইন্সকী লমদা অনৌবা লমশিং হাংদোক্কনি হায়না আশা তৌই। অমুক্কা হন্না, ময়ামবু য়াইফ-পাউজেল পীজরি।
থাগৎচরি!
