খুরুমজরি!
অহানবদা ঐহাক্না পুম্নমকপু থমোয় শেংনা নুংঙাইবা ফোঙদোকচরি! ঙসি নখোয় খরনা এপোইন্তমেন্ত লেত্তরশিং ফংবদা ঐহাক্না য়াম্না নুংঙাইবা ফাওই। ঐহাক্না মসিগীদমক নখোয়দা য়াইফ-মঙ্গোল পীজরি!
ঙসি মহারাস্ত্রগী মমিং সরকারগী বিভাগশিংদা লৈবাক পুম্বগী ওইনা নহারোলশিংদা এপোইন্তমেন্ত লেত্তরশিং পীবগী কেম্পেন্দা হাপচিল্লি। ধনতেরসকী নুমিৎতা কেন্দ্র সরকারনা থবক লাখ ১০ পীনবগী কেম্পেন অমা হৌদোকখি। মতম অদুদা ঐহাক্না তুংদা তোঙান-তোঙানবা রাজ্য সরকারশিংনা চপ মান্নবা রোজগার মেলাশিং পাঙথোক্নরক্কনি হায়না ফোঙদোকখি। মথং-মথং চত্থরকপা ওইনা ঙসি মহারাস্ত্রদা লৈরিবা নহারোল কয়াদা অমুক্তদা এপোইন্তমেন্ত লেত্তরশিং পীরি। ঐহাক্না ঙসি এপোইন্তমেন্ত লেত্তর ফংলবা নহা ওইরিবা নুপা অমসুং নুপীশিংবু থমোয় শেংনা নুংঙাইবা ফোঙদোকচরি।
মুখ্য মন্ত্রী শ্রী একনাথ সিন্দেজী অমসুং উপ মুখ্য মন্ত্রী ভাধ দেবেন্দ্র ফদনবীসজীবু থাগৎপা ফোঙদোকচরি। অতেনবা মতমগী মনুংদা রোজগার মেলা পাঙথোকপা অসিনা মহারাস্ত্র সরকারনা নহারোলদা থবক পীনবগী অচেৎপা ফিরেপকা লোয়ননা মাংদা চংশিল্লি হায়বা ময়েক শেংলে। অসিগুম্বা রোজগার মেলাশিং মহারাস্ত্রদা তুংদসু হেন্না পাঙথোক্কদবা অসিদা ঐহাক্না নুংঙাইবা পোকই। মহারাস্ত্রগী হোম দিপার্তমেন্তদা পুলিস কোন্সতেবল লিশিং কয়া লৌগনি অমসুং রাজ্য অসিগী রুরেল দিবেলপমেন্ত দিপার্তমেন্তদা রিক্রুৎমেন্ত দ্রাইব চত্থগনি হায়না ঐঙোন্দা খঙহনবীরকখি।
মরুপশিং,
লৈবাক অসিনা আদাজী কা অমৃত মহোৎসব পালন তৌরিবা মতমদা লৈবাক অসিনা চাউখৎপা ভারতকী পান্দমদা থবক পাইখৎলি। পান্দম অসি ফংনবা হোৎনবদা নহারোলগী থৌদাং চাউই, মসি নখোয়গী থৌদাংনি। থবক্কী মওং-মতৌশিং লেপ্পা লৈতনা হোংলক্লি অমসুং সরকারনা তোঙান-তোঙানবা থবক্কী মখলশিংগীদমক খুদোংচাবশিং লেপ্পা লৈতনা পীরি। মুদ্রা স্কিমগী মখাদা ইশানা ইশাদা থবক পীজনবা গরেন্তী য়াওদনা লোনশিং পীরিবা অসিনা নহারোলশিংদা লুপা করোর লাখ ২ হেনবগী মতেং সরকারনা পীখি। মহারাস্ত্রদা লৈরিবা নহারোলনা মসিদগী কান্নবা ফংলি। মতৌ অসুম্না স্তার্ত-অপশিং অমসুং এম.এস.এম.ই. সেক্তরদা চাউনা মতেং পাংলি।
মরুপশিং,
সরকারগী খোঙথাংশিংগী মতাংদা খ্বাইদগী মরু ওইবা ৱাফম অসি থবক্কী অমসুং ইশানা ইশাদা থবক পীজবগী খুদোংচাবশিং অসি পুম্নমক্তা, দলিত-শোত্থরবা, ত্রাইবেল, জেনরেল ক্লাস অমসুং নুপীশিংদা থোং মান্ননা ফংহল্লি। খুঙ্গংগী মফমশিংদা সরকারনা সেল্ফ-হেল্প গ্রুপশিং চাউখৎহন্নবা চাউনা হোৎনরি। হৌখিবা চহি ৮দা সেল্ফ হেল্প গ্রুপশিংগা লোয়ননা থবক তৌরিবা নুপী করোর ৮দা লুপা করোর লাখ ৫গী তেংবাং পীথখি। হৌজিক গ্রুপশিং অসিদা য়াওবা নুপীশিংনা মখোয়গী মশাগী পোত্থোকশিং পুথোকপা খক্তা নত্তনা অতোপ্পা নুপীশিংদা থবক পীরি।
মরুপশিং,
ঙসি সরকারনা ইনফ্রাস্ত্রকচর, ইনফোর্মেসন তেক্নোলোজী অমসুং লৈবাক শিনবা থুংবগী অতোপ্পা লমশিংদা রেকোর্দ ওইবা মওংদা ইনভেস্তমেন্তশিং তৌবা অসিনা অনৌবা থবক্কী খুদোংচাবশিং পীরি। মহারাস্ত্রগী মতাংদা ঐখোয়না ৱারী শাবা তারবদি কেন্দ্র সরকারনা রাজ্য অসিগীদমক লুপা করোর লাখ ২ হেনবগী প্রোজেক্ত ২২৫রোম অয়াবা পীখ্রে। প্রোজেক্তশিং অসিগী থবক অসি হৌজিক পাইখৎলি নত্ত্রগা অথুবদা থবক পাইখৎগদবা ওইরি। খন্থদুনা য়েংবীয়ু, মহারাস্ত্রদা লুপা করোর লিশিং ৭৫ রোমগী রেলৱে প্রোজেক্তশিং অমসুং মোদর্ন রোদশিংগীদমক লুপা করোর ৫০ রোমগী প্রোজেক্তশিং অয়াবা পীখ্রে। সরকারনা ইনফ্রাস্ত্রকচরদা শেনফম চাউনা চাদিং তৌরবা মতমদা মসিনা মরম ওইদুনা থবক্কী অনৌবা খুদোংচাবা করোর কয়া ফংহল্লি।
মরুপশিং,
মহারাস্ত্রগী নহারোলশিংগীদমক তুংদা লাক্কদবা মতমশিংদসু মশিং লাকঙমদ্রবা থবক্কী খুদোংচাবশিং মখা তানা পীগনি হায়না ঐহাক্না থাজৈ। অমুক্কা হন্না ঐহাক্না ঙসি এপোইন্তমেন্ত লেত্তরশিং ফংখিবা নহা ওইরিবা নুপা অমসুং নুপীশিংদা ঐহাক্না য়াইফ-মঙ্গোল পীজরি।
হন্না-হন্না থাগৎচরি!
