কেন্দ্রগী মন্ত্রী-মন্দলদা ঐগী মরুপ ওইরিবা অর্জুন মুন্দাজী, ফগ্গন সিংহ কুলস্তেজী, শ্রীমতি রেনুকা সিংহজী, দোক্তর ভারতী পৱারজী, বিশেশ্বর তুদুজী, অতোপ্পা দিগনিতরীশিং, অমসুং লৈবাক্কী তোঙান-তোঙানবা রাজ্যশিংদগী লাকপা ত্রাইবেল ইচিল-ইনাও পুম্নমক! ময়াম পুম্নমকপু আদি মহোৎসবতা তরাম্না ওকচরি।
আদী মহোৎসবনা আজাদী কা অমৃত মহোৎসব মনুংদা ভারতকী ত্রাইবেলগী হেরিতেজকী ফজরবা মমি অমা উৎলি। ভারতকী ত্রাইবেল সোসাইতীশিংগী ফজরবা তেব্লোক্স অমসুং তোঙান-তোঙানবা মহাও, মচু, অকে-অমৌ, চৎনবী, কলা অমসুং আর্ত ফোর্মশিং, মথেল-লুকোই অমসুং ঈশৈ-নোংমাইশিং উবা ফংবগী খুদোংচাবা ফংবদা নুঙাইবা পোকই। আদি মহোৎসবনা অমত্তা ওইনা লেপ্পিবা ভারতকী দাইভর্সিতী অমসুং মতিক ময়াই লৈরবা মমি অমা উৎলি।
আদি মহোৎসব অসি চুমথাংগী মচুশিং ওইনা ভারতকী মখল মথেল অসি তাক্লিবা লোইনাইদ্রবা অতিয়া অমগুম্বনি। চুমথাংগী অতোপ্পা মগুন অমগসু লৈ। চুমথাংগী মচুশিং পুনশিন্নবা মতমদা মালেমদা বিজন অমা পীরিবা মঙালগী বীম অমা শেম্মি মসিনা মাইকৈসু তাকই। মসিগী লোইনাইদ্রবা দাইভর্সিতীশিংনা ‘এক ভারত শ্রেস্থ ভারত’কী লংলা অমা ওইনা পুনশিল্লবা মতমদা জাতিগী মতিক ময়াই অসি উবা ফংই অমসুং মতম অদুদা ভারতনা মালেম পুম্ববু মাগী কলচরেল লাইৎনা লমজিংবা ঙম্মি।
আদি মহোৎসবকী ‘য়ুনিতী ইন দাইভর্সিতীদা’না ঐখোয়গী তৌবা ঙম্বদা অনৌবা ইনোৎ অমা হাপ্পি। মসিনা ‘চাউখৎ-থৌরাং অমসুং হেরিতেজ’কী ৱাখল্লোনবু হেন্না থৱায় হাপ্পি। ঐহাক্না থৌরম অসি পাঙথোকপগীদমক ঐগী ত্রাইবেল ইচিল-ইনাওশিংদা থাগৎপা ফোঙদোকচরি।
মরুপশিং,
২১শুবা ভারতনা ‘সবকা সাথ, সবকা বিকাস’কী মন্ত্রগা লোয়ননা মাংদা চংশিল্লি। মতম অমদা মনুং হঞ্জিনবনি হায়না লৌনরম্বা অদু হৌজিক্তি সরকারনা দিল্লীদগী মফম অদুদা চৎলি অমসুং মনুং হঞ্জিনবা অমসুং নাথৈদুনা থমলমখিবশিং অদু মেনস্ত্রীমদা পুশিনখি। হৌখিবা চহি ৮-৯ অসিদা আদি মহোৎসবকুম্বা থৌরমশিং অসিনা লৈবাক্কী ইহৌ অমা ওইরকখি অমসুং ঐহাক ইশানা অসিগুম্বা কয়াদা শরুক য়ারি। মসিগী মরমদি ত্রাইবেল খুন্নাইগী য়াইফনবা তৌবা অসি ঐহাক্কী ওইনা লনাইগী মরী অমসুং ইমোসনগী ৱাফম অমসু ওইরি। ঐহাক্না রাজনিতীদা চংলকপা মতমদা সোসিএল ৱার্কর ওইরিঙৈ মতমদা ঐহাক্না রাজ্য কয়াদা চৎপগী অমসুং ত্রাইবেল ফুরুপশিংগা লোয়নবগী খুদোংচাবা ফংজখি।
ঐহাক্না ত্রাইবেলগী ইমুংশিংগা লোয়ননা, লৈবাক্কী কাচিন-কোয়াদা লৈরিবা ত্রাইবেলগী খুন্নাইশিংগা লোয়ননা চয়োল কয়া লৈমিন্নখি। ঐহাক্না নখোয়গী চৎনবী হকথেংননা উবা ফংখ্রে, মখোয়গা লোয়ননা হিংমিন্নখি অমসুং মখোয়দগী কয়া অমা তমশিনখি। গুজরাত্তসু ঐহাক্কী পুন্সিগী মরু ওইবা চহি অয়াম্বা গুজরাতকী অপুনবা নোংপোক থংবা বেল্তকী উমরগমদগী ত্রাইবেল বেল্তকী অম্বাজি ফাওবদা লৈরিবা ত্রাইবেল ইচিল-ইনাওশিংগী শেবা তৌদুনা লেনখি। মসিনা ঐঙোন্দা লৈবাক্কী অমদি মাগী চৎনবীশিংগী মতাংদা কয়া অমা তাকপী-তম্বীখি। মরম অসিনা ঐহাক্না নখোয়গী নরক্তা লাকপদা অনকপা মরী অমা ফাওই। নখোয়গা মরী অমা লৈনবগুম্না ফাওই।
মরুপশিং,
লৈবাক অসিনা মাগী ত্রাইবেলগী মতিক-ময়াইগী মতাংদা অমুক্তা ওইখিদ্রিবা মওংদা চাউথোকচবগা লোয়ননা মাংদা চংশিল্লি। ঐহাক্না মপালগী লৈবাক্কী মকোকশিংগা উনবা মতমদা মখোয়দা খুদোলশিং পীবদা ঐহাক্না ত্রাইবেল ইচিল-ইনাওশিংগী প্রদক্তশিং খুদোলশিং তম্নবা হোৎনৈ।
ঙসি ভারতনা ত্রাইবেলগী চৎনবী অসি মালেমগী ফম্পাকশিংদা ভারতকী মীংচৎ অমসুং হেরিতেজকী মরু ওইবা শরুক অমা ওইনা উৎলি। ঙসি ভারতনা ত্রাইবেলগী পুন্সিগী মহিংগী মওংদা গ্লোবেল ৱার্মিং অমসুং ক্লাইমেৎ চেঞ্জকুম্বা সমস্যাশিংগী সোল্যুসনশিং পীরি হায়না মালেমদা খঙহল্লি। ঙসি সস্তেনেবল দিবেলপমেন্তগী মতাংদা লাকপা মতমদা ঐখোয়না মালেমদা চাউথোক্না হায়বা য়াই মদুদি ভারতকী ত্রাইবেলগী ফুরুপতগী তমশিনবা য়াবা কয়া লৈরি। ঐখোয়গী ত্রাইবেল ইচিল-ইনাওশিংনা ঐখোয়না উশিং, উমুং, তুরেল, চীংশিংগা লোয়ননা ঐখোয়গী মীরোলশিংগী মরক্তা করম্না মরী অমা থমগনি, মহৌশাদগী রিসোর্স লৌদুনা মাগী রিসোর্স করম্না কনগনি অমসুং হেনগৎহনগনি হায়বগী মতাংদা লেপ্পা লৈতনা ইথিল পীরি।
মরুপশিং,
ঙসি ভারতকী নাৎকী ওইনা পুথোকচবা প্রদক্তশিং অমসুং মরু ওইনা ত্রাইবেল খুন্নাইগী প্রদক্তশিংগী দিমান্দ লেপ্পা লৈতনা হেনগৎলক্লি। ঙসি অৱাং নোংপোক্কী প্রদক্তশিং মীরমদা এক্সপোর্ত তৌরি। ঙসি ৱাগী প্রদক্তশিং পাম্নবা হেনগৎলক্লি। নখোয়না নীংশিংলমগনি মমাংগী সরকারনা ৱা য়ানবা অমসুং শীজিন্নবদা অথিংবা থমলমখি অদুবু হৌজিক পাল্লিবা সরকারনা ৱাবু নাপীগী কাংলুপ্তা চলহনখি অমসুং অথিংবা অসি মুত্থৎখি। মসিনা মরম ওইদুনা ৱাগী প্রদক্তশিং অসি হৌজিক অচৌবা ইন্দস্ত্রীগী শরুক অমা ওইরি। ত্রাইবেল প্রদক্তশিং অসি মার্কেৎ অয়াম্বদা য়ৌহনগদবনি, মখোয়বু শকখঙবা হেনগৎহনগদবনি, মখোয়গী দিমান্দ হেনগৎহনগদবনি, মাইকৈ অসিদা সরকারনা থবক লেপ্পা লৈতনা পাইখৎলি।
ঐখোয়গী মাংদা বন ধন মিসন অসি খুদম ওইনা লৈরি। লৈবাক অসিগী তোঙান-তোঙানবা রাজ্যশিংদা বন ধন কেন্দ্র ৩০০০ হেন্না লিংখৎখ্রে। ২০১৪গী মমাংদা এম.এস.পি.গী মখাদা মাইনর ফোরেস্ত প্রদ্যুস খরা খক্তমক লৈরমখি। হৌজিক এম.এস.পি.গী মখাদা মাইনর ফোরেস্ত প্রদক্ত ৯০রোম পুশিনখি, ২০১৪দা মসিগী মশিং শরুক ৭ হেনগৎহনখি। বন ধন সেল্ফ-হেল্প গ্রুপ লিশিং ৫০ হেনবগী খুত্থাংদা ত্রাইবেল মীওই লাখ কয়ানা কান্নবা ফংলি। লৈবাক অসিদা শেম্লিবা অচৌবা মতৌ সেল্ফ-হেল্প গ্রুপশিংগী হেনগৎলক্লিবা নেৎৱার্কনা ত্রাইবেল খুন্নাইদা কান্নবা পীখি। লৈবাক অসিদা মথৌ তৌরিবা সেল্ফ-হেল্প গ্রুপ লাখ ৮০ হেনবদা ত্রাইবেল মেম্বর করোর ১.২৫ লৈরি।
ইচিল-ইনাওশিং,
ঙসি ত্রাইবেল আর্তশিং অমসুং ত্রাইবেলগী নহারোলগী স্কিল দিবেলপমেন্ত প্রমোৎ তৌনবা সরকারনা খোঙথাংশিংদা মীৎয়েং চংখি। চহি অসিগী বজেৎতা পি.এম. বিশ্বাকর্মা য়োজনা অসি ত্রেদিস্নেল ক্রাফমেনশিংগীদমক হৌদোকখি মসিদা স্কিল দিবেলপমেন্ত ফংহনবা অমসুং মখোয়গী পোত্থোকশিং মার্কেতিং তৌবদা তেংবাং পীবগী মথক্তা ইকনোমিকেল এসিস্তেন্স পীগনি। মসিনা ঐখোয়গী হৌরক্লিবা মীরোলদা চাউনা কান্নবা পীরগনি। অমসুং মরুপশিং, খোঙথাংশিং অসি অকক্নবা মফম খক্তগী নত্তে। লৈবাক অসিদা ত্রাইবেল ফুরুপ কয়া লৈ। মখোয়গী চৎনবী অমসুং স্কিল কয়ামরুম লৈ, লোইনাইদ্রবা ওইথোকপা য়াবশিং লোৎতুনা লৈরি। মরম অসিনা লৈবাক অসিদা ত্রাইবেল রিসর্চ ইন্সতিত্যুতশিং লিংখৎখি। খোঙথাংশিং অসিগা লোয়ননা ত্রাইবেলগী নহারোলশিংগীদমক মখোয়গী মশাগী লমশিংদা অনৌবা খুদোংচাবশিং পীরি।
মরুপশিং,
চহি ২০গী মমাংদা ঐহাক্না গুজরাতকী মুখ্য মন্ত্রী ওইরিঙৈ মতমদা ঐহাক্না ৱাফম অমা খঙবা ঙমখি। ত্রাইবেল বেল্ততা স্কুমশিং লৈবা মফমদা অচৌবা ত্রাইবেল ফুরুপ অমা লৈ, অদুবু মমাংগী সরকারমা ত্রাইবেলগী মফমশিংদা সাইন্স স্ত্রীমগী স্কুলশং শাবদা মীৎয়েং চংলমখিদে। ত্রাইবেলগী অঙাং অমনা সাইন্স স্কুলদা তমদ্রবদি মহাক্না করম্না দোক্তর-ইঞ্জিনীয়র ওইগনি? ঐখোয়না অপুনবা বেল্ত অসিদা লৈবা ত্রাইবেলগী মফমশিংদা লৈবা স্কুলশিংদা সাইন্স এজুকেসন লৈহন্নবা খোঙথাংশিং লৌখৎখি। লৈবাক্কী কাচিন-কোয়াদা লৈরিবা ত্রাইবেল অঙাংশিংগী এজুকেসন অমসুং মখোয়গী তুংলমচৎ অসিদা ঐহাক্না মরু ওইবা মীৎয়েং চংলি।
একলাব্য মোদেল রেসিদেন্সিএল স্কুলশিংগী মশিং অসি ২০০৪-২০১৪গী মনুংদা স্কুল ৯০ লৈরম্বদগী শরুক ৫ হেনগৎলক্তুনা ২০১৪দগী ২০২২দা স্কুল ৫০০ য়ৌখি। স্কুল ৪০০ হেনবনা হৌজিক মথৌ তৌরি, অঙাং লাখ ১দা তাকপী-তম্বীরি। চহি অসিগী বজেৎনা স্কুলশিং অসিগীদমক ওজা অমসুং স্তাফ লিশিং ৩৮ লাউথোকখি। ত্রাইবেল মহৈরোয়শিংগীদমক স্কোলরশিপশিং অসি শরুক অনি ওইহনখি। মহৈরোয় লাখ ৩০না মসিগী কান্নবা ফংলি।
মরুপশিং,
লোলগী অপনবনা মরম ওইদুনা ত্রাইবেলগী নহারোলনা অৱাবা কয়া মায়োক্নরি। অদুবু ন্যু এজুকেসন পোলিসীগী মখাদা নহারোলশিংনা মখোয়গী মমা লোলশিংদা মহৈ তম্বা য়াহল্লি। ঐখোয়গী ত্রাইবেলগী অঙাংশিং অমসুং নহারোলশিংনা মখোয়গী মশাগী লোলদা মহৈ তম্লি অমসুং খুমাং চাউশিনবা হায়বা অসি হৌজিক্তি ওইথোক্লে।
মরুপশিং,
লৈবাক অসিনা অরোইবদা লেপ্পিবা মীওই অদুদা মীৎয়েং চংলবা মতমদা চাউখৎপগী লম্বেল অসি মশা মথন্তা হাংদোকচরকই। সরকার অসিনা শোত্থরবশিংগী চাউখৎ-থৌরাংদা মীৎয়েং চংবনা অনৌবা পনখৈশিং য়ৌরি। ত্রাইবেলনা নম্না খুন্দাবা মফমশিং ওইরিবা এস্পিরেস্নেল দিস্ত্রিক্তশিং অমসুং ব্লোকশিং শেমগৎনবা সরকারনা কেম্পেন তৌরি।
চহি অসিগী বজেৎতা ২০১৪গা চাংদম্নবদা সেদ্যুল্দ ত্রাইবশিংগী পীখিবা বজেৎ অসি শরুক ৫ হেনগৎহনখি। ত্রাইবেলগী মফমশিংদা অফবা মোদর্ন ইনফ্রাস্ত্রকচর শেমগৎলি। মোদর্ন কন্নেক্তিবিতী হেনগৎলকপা লোয়ননা তুরিজম অমসুং ইনকমগী খুদোংচাবশিংসু হেনগৎলক্লি। লৈবাক অসিদা লৈরিবা খুঙ্গং লিশিং কয়াদি লেফ ৱিং এক্সত্রিমিজমনা শোকহনখি, হায়রিবা মফমশিং অসি হৌজিক ৪জি কন্নেক্তিবিতীনা কন্নেক্ত তৌরি। হায়বদি তোখাই তাবা অমসুং নাথৈদুনা থম্বনা মরম ওইদুনা সেপরেতিজমগী লাংদা থুরমখিবা নহারোলশিং হৌজিক ইন্তর্নেৎ অমসুং ইনফ্রাগী খুত্থাংদা মেনস্ত্রীমগা লোয়ননা শম্নহল্লি। মসি লৈবাককী মনুং হঞ্জিনবা মফমশিংদা লৈবা প্রজা খুদিংমক য়ৌশিল্লিবা ‘সবকা সাথ, সবকা বিকাস, সবকা বিশ্বাস অমসুং সবকা প্রয়াস’কী ইচেলনি। মসি অনৌবা ভারতনা ৱাংনা লেপ্লিবা আদি অমসুং আধুনিক্তা (মোদর্নিতী)গী অপুনবা মখোল অদুনি।
মরুপশিং,
হৌখিবা চহি ৮-৯দা ত্রাইবেল খুন্নাইগী খোঙচৎনা লৈবাক অসিনা থোং মান্নবা অমসুং ইংচিকপদা মরু ওইবা মীৎয়েং চংলিবা অসিগী অওনবা উবা ফংখি। ভারতকী নীংতম্বগী চহি ৭৫দা অহানবা ওইনা লৈবাক্কী লুচিংবগী থৌদাং অসি ত্রাইবেল নুপীগী মখুৎতা পীরি , মহাক্না রাস্ত্রপতিগী থৌদাং লৌদুনা খ্বাইদগী ৱাংবা ওফিস পাইদুনা ভারতপু চাউথোকচবা পোকহল্লি। ত্রাইবেলগী পুৱারীনা অহানবা ওইনা লৈবাক অসিনা ফংফম থোকপা ইকাই খুম্নবা অদু ফংলি।
ভারতকী নীংতম্বগী ইহৌদা ত্রাইবেল খুন্নাইনা শরুক তমখিবা, মখোয়না লৌখিবা থৌদাংগী মতাংদা ঐখোয় পুম্নমক্না খঙই। অদুবু পুৱারীগী লমাইশিংদা অথৌবা অথৌবীশিংনা কত্থোকপা অমসুং থৌনা ফবগী মতিক-ময়াইগী পন্দুপশিং অদু দিকেদ কয়া কুপশিনদুনা থমখি। হৌজিক অমৃত মহোৎসব অসিদা লৈবাক অসিনা হৌখ্রবা মতমগী কাউথোকলুরবা পন্দুপশিং জাতিগী মাংদা পুরক্নবা খোঙথাং লৌখৎলি।
অহানবা ওইনা লৈবাক অসিনা ভগৱান বির্সা মুন্দাগী মপোক নুমিৎ অসি জনজাতিয়া গৌরব দিবস হায়না পালন তৌবা হৌখি। অহানবা ওইনা তোঙান-তোঙানবা রাজ্যশিংদা ত্রাইবেলগী নীংতম লান্মীশিংগা মরী লৈনবা ম্যুজিয়মশিং শেমগৎলি। মমাং চহিদা ঝারখন্দগী রাঞ্চিদা ভগৱান বির্সা মুন্দাদা কত্থোকখিবা ম্যুজিম অদু শঙ্গাবগী খুদোংচাবা ফংজখি। মসি অহানবা ওইনা পাঙথোকপা ওইরবসু মসিগী মমি অসি তুংদা লাক্কদবা মীরোল কয়াদা ময়েক শেংনা উবা ফংগনি অমসুং চহিচা কয়া লৈবাক অসিদা ইথিল অমদি মাইকৈ তাক্কনি।
মরুপশিং,
ঐখোয়না ঐখোয়গী হৌখ্রবা মতম, হৌজিক পাঙথোক্কদবা ঐখোয়গী থৌদাং য়াবগী ৱাখল্লোন অদু ঙাকশেনবা তাই। আদি মহোৎসবগুম্বা থৌরমশিং অসি ফিরেপ অসিবু মাংদা পুখৎনবা শক্তি লৈরবা মিদিয়ম অমনি। কেম্পেন অসি মাস মুফমেন্ত ওইহনগদবনি অমসুং তোঙান-তোঙানবা রাজ্যশিংদা অসিগুম্বা থৌরমশিং পাঙথোক্নবা হায়জরি।
মরুপশিং,
চহি অসিবু মালেম পুম্বনা ভারতকী থৌশিলদগী ইন্তর্নেস্নেল ইয়র ওফ মিল্লেৎস হায়না পালন তৌরি। কোর্স গ্রেন অসি চহিচা কয়াদগী ত্রাইবেলগী দাইৎকী শরুক অমা ওইদুনা লাকখি। হৌজিক ভারতনা মিল্লেৎশিং, সুপর ফুদ অসিবু শ্রী অন্নগী মীথোল পীখি। শ্রী অন্ন বাজরা, শ্রী অন্ন জৱার, শ্রী অন্না রাগীগুম্না মমিং কয়া লৈ। ফেস্তিবেল মফম অসিদা হাংলিবা ফুদ স্তোলশিংদা শ্রী অন্নগী মহাও তংবা ফংজখি। ঐখোয়না ত্রাইবেলগী মফমশিংগী চিঞ্জাক প্রমোৎ তৌনবা য়ারিবা মখৈ হোৎনগদবনি।
মসিনা মীয়ামগী হকশেলদা কান্নবা পীবা খক্তা নত্তনা ত্রাইবেল লৌমীশিংগী ইনকম হেনগৎহনগনি। চাউখৎপা ভারত অমগী মঙলান অসি মীপুম খুদিংমক্না পুন্না হোৎনরবা মতমদা মঙফাওনবা ঙমগনি হায়না থাজৈ। অমসুং ঙসি দিল্লীদা মন্ত্রালয়না অসিগুম্বা অচৌবা থৌরম অমা পাঙথোকখি। লৈবাক্কী মফম খুদিংমক্তগী ঐখোয়গী ত্রাইবেল ইচিল-ইনাওশিংনা মখল কয়াগী পোৎলমশিং পুথোকখি অমসুং মফম অসিদা পুরকখি। মরু ওইনা লৌবুকশিংদা পুথোকপা খ্বাইদগী ফবা অদু মফম অসিদা পুরক্লি। ঙসি ঐহাক্না দিল্লীগী মীয়ামদা, গুরগাওগী মীয়ামদা অমসুং হরিয়ানাগী মনাক্তা লৈবা অতোপ্পা মফমশিংগী মীয়ামদা, উত্তর প্রদেশকী নোইদা-ঘজিয়াবাদকী মীয়ামদা মফম অসিদা লাক্নবা হায়জরি। নুমিৎ খরনি অসি মেলা অসি পাঙথোকখিগনি।নখোয়না অরাপ্পা উমংদা লৈবাক অসিগী করম্বা মখলগী শক্তিনা লৈবাক অসিগী তুংলমচৎ শেমগৎলি য়েংবীয়ু।
হকচাংগী মরমদা খঞ্জবা, দাইনিং তেবলদা পুথোরকপা পোৎলম খুদিংমক্কী মরমদা য়াম্না চেকশিঞ্জবা, মরু ওইবা ইমা অমদি ইচে-ইচলশিংদা ঐহাক্না মচি ওইবা ঐখোয়গী উমংগী পোত্থপক অসি লাক্তুনা য়েংবীনবা হায়জরি। নখোয়না লাক্লগা খঙগনি অমসুং তুংদা অদুমক ওর্দর তৌগনি। হৌজিক নখোয়না অৱাং নোংপোক্কী মরু ওইনা মেঘালয়গী য়াইঙং ফংগনি। মসিদা য়াওরিবা ন্যুত্রিস্নেল ভেল্যুশিং অসি মালেমগী মফম অমত্তদা ফংলোই। মরম অসিনা দিল্লী, হরিয়ানা অমসুং উত্তর প্রদেশকী মনাক্তা লৈরিবা মীওইশিংনা মসিদা লাকপীনা হায়জরি অমসুং ঐহাক্না দিল্লীনা ঐখোয়গী ত্রাইবেল ইচিল-ইনাওগী পোৎশক অমা খক্তংদা শক্তি কয়াম লৈবগে উৎচনীংই।
লাকপীয়ু, ঐখোয়না আদি মহোৎসব অসি কাউঙমদ্রবা অমা ওইহনসু, মসিবু য়াম্না মাইপাকহনসি। ঐহাক্না ময়ামদা য়াইফ-মঙ্গোল পীজরি।
হন্না-হন্না থাগৎচরি!
