মোহান নায়োক, লাসিৎ বরফুকোনোরজী, সারি খো বোসোরিয়া, জোয়োতী অপোলোখ্যে, দেখোর রাজধানীলোই আহা, আরু ইয়াত, হোমোবেতা হুৱা, আপুনালুক, মুর আন্তোরিক আভিবাদোন, আরু, হেবা জোনাইসু।
অসামগী রাজ্যপাল, শ্রী জগদীস মুখীজী, মীয়াম্না পাম্নরবা মুখ্য মন্ত্রী শ্রী হিমন্তা বিশ্বা সরমাজী, কেন্দ্রগী মন্ত্রী মন্দলদা ঐহাক্কী মরুপ ওইরিবা শ্রী সর্বানন্দ সোনোৱালজী, বিধান সভাগী স্পীকর শ্রী বিশ্বজীতজী, রিতায়র্দ চীফ জস্তিস রঞ্জন গোগোই, তপন কুমার গোগোইজী, অসাম সরকারগী মন্ত্রী পিয়ুশ হজারিকাজী, মেম্বর ওফ পার্লিয়ামেন্ত, অমসুং থৌরম অসিদা শরুক য়াবীরিবশিং, অমসুং লৈবাক অসিদা অমদি মপালদা লৈরিবা অসাম কলচরগা মরী লৈনবা মীওইশিং।
অহানবদা ঐহাক্না ইমা ভারত্তা লাচিৎ বরফুকনগুম্বা অথৌবশিং পীবিখিবা অসামগী অথোইবা লমদমবু ইকাই খুম্নবা উৎচরি। ঙরাং লৈবাক শিনবা থুংনা ভীর লাচিৎ বরফুকনগী ৪০০শুবা মপোক কুমওন পাঙথোকখি। থৌরম অসি দিল্লীদা নুমিৎ ৩নিগী অখন্নবা প্রোগ্রাম পাঙথোকখি। প্রোগ্রাম অসিদা য়াওবা ফংজবা অসি ঐহাক্কী লাইবক ফবনি। প্রোগ্রাম অসিদা শরুক য়ানবা হৌজিক দিল্লীদা অসামদগী মশিং য়াম্লবা মীওই কয়া লাকখি হায়না ঐঙোন্দা পাউদমলকখি। পুম্নমক, অসামগী মীয়াম, ইরৈবাকচা করোর ১৩০বু থৌরম অসিদা ঐহাক্না নুংঙাইবা ফোঙদোকচরি।
মরুপশিং,
লৈবাক অসিনা ‘আজাদী কা অমৃত মহোৎসব’ পালন তৌরিবা তানফমদা ভারতনা লাচিৎ বরফুকনগী ৪০০শুবা মপোক কুমওন পাঙথোকপগী খুদোংচাবা ঐখোয়না ফংজরি। পুৱারী ওইরবা থৌরম অসি অসামগী পুৱারীদা মতিক-মঙাল লৈরবা পন্দুপ অমনি। ভারতকী মুৎনাইদ্রবা নাৎ, মুৎনাইদ্রবা থৌনা অমসুং মুনাইদ্রবা লেংলি-পালিবগী কুহ্মৈগী থৌরমদা অথোইবা চৎনবী অসিবু ঐহাক্না ইকাই খুম্নবা উৎচরি। ঙসি লৈবাক অসিনা মীখা পোনবগী ৱাখল্লোন থদোক্তুনা মাগী হেরিতেজতা চাউথোকচবা পোক্লি। ভারতনা মাগী কলচরেল দাইভর্সিতী পালন তৌবা খক্তা নত্তনা মাগী পুৱারীগী শকখঙদ্রবা অথৌবা অমসুং অথৌবীশিংবু শকখঙলি। লাচিৎ বরফুকনগুম্বা অথোইবা মীশকশিংনা, ইমা ভারতকী অমর ওইরবা মপারীশিংনা অমৃত কালগী ফিরেপশিং থুংহন্নবা ইথিলগী হৌরকফম ওইরি। মহাক্কী পুন্সিদগী ঐখোয়গী শক্তাক, ঐখোয়গী আত্মা-বিশ্বাস অমসুং জাতিগীদমক কত্থোক্নবা থৌনা ফংখি। ঐহাক্না য়াইফরবা থৌরম অসিদা লাচিৎ বরফুকনগী থৌনা-লিংজেলবু ইকাই খুম্নবা উৎচরি।
মরুপশিং,
মীওইবা জাতিগী চহি লিশিং কয়া শুরবা পুৱারী অসিদা পৃথিবীদা সভ্যতা মশিং কয়া খুন্দা লৈতাখি, কয়া অমনা মুৎনাইদনা ঙান্থোইখি অদুবু মতমগী খোঙজেলগা ইরোইননা অসিগুম্বা সভ্যতা অসিবু মাইথিবা পীখি, মখোয়বু মাংহনখি। ঙসি মালেম্না পুৱারী অসি অসিগুম্বা সভ্যতাগী লেমহৌবশিংদা য়ুম্ফম ওইরগা থিদোক্লি অদুবু ভারতনদি পুৱারীদা থাজরুদবা অৱাবশিং মায়োক্নখি অমসুং লোইলম শন্দোকপা মীওইশিংগী তমশিরবা মীওৎ-মীনৈশিং খাংদুনা চপ মান্নবা থৌনা লিংজেল অমসুং ৱাখল তবা মতৌগা লোয়ননা মুৎনাইদনা অদুমক লেপতুনা লৈহৌখি। মসিগী মরমদি খুদোংথিবা অমা থোরকপা খুদিং মদুবু লাকশিনবা ঙম্বা মীশক খরা অদুমক থোরকখিবনা ওইরি। অকক্নবা মতমগী তাঙ্কক অমদা লম্বোইবশিং অমসুং লৌশিং লৈবা মীওইশিংনা ভারতকী স্পিরিচুএল অমসুং কলচরেল আইদেন্তিতী ঙাকশেন্নবা থোরকখি। ইমা ভারতীনা পোকখিবা অথৌবশিংনা ভারতপু নমথনবা হোৎনখিবশিংগী মায়োক্তা থৌনা ফনা লান্থেংনখি। লাচিৎ বরফুকনগুম্বা থৌনা ফবা মীওইশিংনা করিগুম্বা অমদা কা হেন্না হকচিনবা মতৌ অমসুং অকি-অখঙগী শক্তিশিং অসি অদুমক মাংখিগনি অদুবু ভারত মচাগী পুন্সিগী অমর ওইরবা মঙালদি মুৎনাইদনা লৈহৌগনি হায়বা অসি উৎপীরমখি।
মরুপশিং,
অসামগী পুৱারী অসিমক ভারতকী খোঙচৎ অমসুং নাৎকী মমল য়াম্লবা হেরিতেজকী মনুং চল্লি। তোঙান-তোঙানবা ৱাখল অমসুং আইদিওলোজী, খুন্নাই অমসুং নাৎ, অমদি থাজবা অমসুং চাৎনবীশিং ঐখোয়না পুনশিল্লি। অহোল লৈঙাক্তা পুম্নমক্কা লোয়ননা শেমখিবা শিবসাগর শিব দোউল, দেভি দোউল অমসুং বিষ্ণু দোউলনা ঙসিসু খুদমশিং ওইরি। অদুবু করিগুম্বা ঐখোয়বু কনাগুম্বনা থাংগী শক্তিনা মাইথিবা পীবা পাম্লবদি, ঐখোয়গী শক্তাক অসি মাংহনবা পাম্বা তারবদি মদুদা করম্না পাউখুম পীগদগে হায়বা ঐখোয়না খঙই। অসাম অমসুং অৱাং নোংপোক্কী লমদমনা মসিগী শাখি ওইখি। লমদম অসিগী মীওইশিংনা তর্কশিং, অফঘানশিং অমসুং মুগলশিংবু থেংখাং কয়াদা তান্থোকখি। মুগলশিংনা অঙম্বা শক্তি শীজিন্নদুনা গুৱাহাতিবু খুদুম চনখি। অদুবু অমুক হন্না লাচিৎ বরফুকনগুম্বা লান্মীশিং থোরকখি অমসুং মুগল সুলতানেৎনা খুদুম চনখ্রবা গুৱাহাতিবু মনীং তমহনখি। ঔরঙ্গজেবনা মাইথিবগী মমি অসি অঙম্বা থাক্তা মুৎথৎনবা হোৎনখি অদুবু মাইপাকপা ঙমখিদে। ভীর লাচিৎ বরফুকন্না উৎখিবা থৌনা, মহাক্না সরাইঘাত্তা উৎখিবা থৌনা লৈবা মতৌ অদু মমা লৈবাক নুংশিবগী খুদম ওইবা খক্তা নত্তনা মঙোন্দা অসামগী লমদম পুম্বদা লৈরিবা প্রজা খুদিংমক্তা করিগুম্বা মথৌ তারবদি মমা লৈবাক ঙাকশেন্নবা অমত্তা ওইনা পুনশিনবগী শক্তি ফাওবা চেনখি। মহাক্কী নহারোল খুদিংমক্না লমদম অদুগী লান্মী ওইখি। লাচিৎ বরফুকনগী থৌনা লৈবা মতৌ অমসুং অকিবা লৈতবা মতৌ অসিনা অসামগী মশক তাক্লি। অমসুং মসিনা মরম ওইদুনা ঙসি ঐখোয়না হায়রি – হুনিসানে লোহাহোদ, লাসিতোর কোথা মুগাল বিজোয়ী ভীর, ইরিহাখে লিখা হায়বদি অঙাংশিং নখোয়না লাচিৎকী মতমগী ৱারী তারবরা? মুগলবু মাইথিবা পীখিবা অথৌবা অসিগী মমিং পুৱারীদা মমিং তাদুনা লৈ।
মরুপশিং,
চহি লিশিং কয়া থৌনা ফনা হিংলকপা অসি ভারতকী পুৱারীনি। অদুবু চহিচা কয়া ঐখোয়না মতম চুপ্পদা মাইথিদুনা লাংখি হায়বা অসি লিনবা হোৎন্দুনা লাকখি। ভারতকী পুৱারী অসি মীখা পোনবগী পুৱারী অদু খক্তা নত্তে। ভারতকী পুৱারী অসি লান্মীশিংগী পুৱারী অদুনি, মাইপাকপগী পুৱারী অদুনু। ভারতকী পুৱারী অসি মাইপাকপা ঙম্বগী মতাংদনি, মসি মশিং লাকঙমদ্রবা অথৌবশিংগী মতিক-ময়াইগী মতাংদনি। ভারতকী পুৱারী অসি লানগী মতাংদনি, কত্থোকপা, তপস্যগী মতাংদনি, ভারতকী পুৱারী অসি থৌনা ফবা, কত্থোকপা, অথোইবা চৎনবীগী মতাংদনি। অদুবু লাইবকথিবদি নীংতম্বা ফংলবা মতুংদসু মীখা পোল্লিঙৈ মতমদা লৌতুনদুনা ইখিবা চপ মান্নবা পুৱারী অদুমক ঐখোয়দা তাকপীখি। নীংতম্বা ফংলবা মতুংদা ঐখোয়বু মীখা পোলহল্লমখিবা মীরৈবাক মচাশিংগী এজেন্দা অদু হোংদোকপা মথৌ তাখি অদুম ওইনমক মদু তৌখিদে। লৈবাক্কী কাচিন কোয়া খুদিংমক্তা ইমা ভারতকী অথৌবা মপারি অমসুং মমোমশিংনা তেরোরিস্তশিংগা লান শোক্নখি, মখোয়গী পুন্সি কত্থোকখি অদুবু পুরৱারী অদুবু নমদুনা নমশিন্দুনা থমখি। লাচিৎ বরফুকন্না কত্থোকখিবা অদু মরু ওইদবরা? মীওৎ-মীনৈগী শাংলবা মতম অসিগী মনুংদা লৈবাক অসিগী শক্তামগী মুগলশিংগী মায়োক্তা লান শোক্নখিবা অসামগী মীওই লিশিং কয়া লৈ হায়বা ঐখোয়না খঙই। মেনস্ত্রীমদা মসিগী থৌদোকশিং অসিবু মরু ওইনা লৌরমদবগী অশোইবশিং অদু হৌজিক্তি শেমদোক্লি। থৌরম অসি দিল্লীদা পাঙথোকপনা মসিগী অহোংবা অসি লাক্লে হায়বগী মমি তারি।
নুমিৎ খরনিগী মমাংদা অসাম সরকারনা মীওই কয়া কয়াদা ভীর লাচিৎ বরফুকনগী থৌনা ফরবা পুৱারী অদু খঙহন্নবা ম্যুজিয়ম শানবা লাউথোকখি। হিমন্তাজীগী সরকারনা অসামগী পুৱারীগী অথৌবশিংবু ইকাই খুম্ননবা মেমোরিএল অমা লিংখৎনবা থৌরাংসু তৌখি। অসিগুম্বা খোঙথাংশিং অসিনা শোইদনমক্কী ঐখোয়গী নহারোল অমদি তুংগী মীরোলশিংদা ভারতকী অথোইবা কলচর অসি হেন্না মুন্না খঙনবা খুদোংচাবা পীরগনি। অসাম সরকারনা মীয়ামবু মাগী বিজনগা লোয়ননা শম্নহন্নবা থিম সোং অমা লোঞ্চ তৌখি। ওখোমোর আকাখোর, ওখোমোর আকাখোর, ভুতাতোরা তুমি, হাহাহোর হোকোতি, পোরিভাখা তুমি হায়বদি নহাক্না অসামগী অতিয়াদা থোক্লিবা ধ্রুবা তারানি। নহাক্না থৌনাবু মশক তাকই। তশেংনমক লাচিৎ বরফুকনগী পুন্সিনা ঐখোয়দা লৈবাক অসিনা হৌজিক মায়োক্নরিবা শীংনবা কয়া অসি মায়োক্ননবা ইথিল পীরি। মহাক্কী পুন্সিনা ঐখোয়দা ইশাগী হায়বা থাদোক্তুনা জাতিগী য়াইফনবা হায়বা অসিদা মরু ওইবা মীৎয়েং চংনবা ইথিল পীখি। মহাক্কী পুন্সিনা ঐখোয়দা নেপোতিজম অমসুং শাহৈ-জাৎকী মহুৎ লৈবাক্না অথোইবা ওইনবা হোৎনগদবনি তাকপীখি।
হায়নৈ ভীর লাচিৎনা মৌমাইবু লৈবাক ঙাকশেনবগী থৌদাং পাঙথোকপা ঙমদবগীদমক চৈরাক পীখি। মহাক্না হায়খি –“দেখোত কোই, মৌমাই দঙ্গোর নোহোই” হায়বদি মৌমাই অসি লৈবাক্তগী হেন্না চাউদে। হায়বদি লৈবাক্তগী হেনবা মীশক, মরী অমত্তা লৈতে হায়বনি। নখোয়না খন্থদুনা য়েংবীয়ু ভীর লাচিৎকী লান্মীনা মখোয়গী কম্মান্দরনা লৈবাক অসিবু কয়াম মরু ওইনা লৌবগে খঙলমগনি, মসিনা অপীকপা লান্মীশিংনা থৌনা হেনগৎহল্লগনি। অমসুং মরুপশিং থৌনানা মাইপাকপগী হৌরকফম ওইরি। ঙসিগী অনৌবা ভারতনা নেসন ফর্স্ত হায়বা ৱাখল্লোনগা লোয়ননা মাংদা চংশিল্লি।
মরুপশিং,
জাতি অমনা মাগী তশেংবা পুৱারী খঙলবা মতমদা খক্তা মাগী এক্সপরিয়েন্সশিংদগী তমশিনবা ঙমগনি অমসুং মাগী তুংলমচৎকীদমক অচুম্বা মাইকৈদা চৎপা ঙমগনি। ঐখোয়গী পুৱারীগী ৱাখল্লোন অসি দিকেৎ খরা অমসুং চহিচা খরা খক্তগী মখা পোলহন্দবা হায়বা অসি ঐখোয়গী থৌদাংনি। ঙসি ঐহাক্না ভারত রত্ন ভুপেন হজারিকানা লেংলম্বা অসামগী মমিং লৈরবা ঈশৈ পরেং অদুদগী পরেং অনি খক্তা থমজগে। মোই লাসিতে কোইসু, মোই লাসিতে কোইসু, মুর হোহোনাই নম লুৱা, লুইৎ পোরাই দেকা দোল। হায়বদি লাচিৎ ঐহাক্না হায়রি, ব্রহ্মপুত্র তোর্বানগী নহারোলশিং ঐহাক্কী ইমিং অসি হঞ্জিন-হঞ্জিন পল্লু। হঞ্জিন-হঞ্জিন নীংশিংলবা খক্তদা ঐখোয়না হৌরক্লিবা মীরোলশিংদা পুৱারীগী অচুম্বা মশক অমা পীবা ঙমগনি। মীকুপ খরগী মমাংদা ঐহাক্না লাচিৎ বরফুকনগী পুন্সিদা য়ুম্ফম ওইরবা একজিবিসন অমা য়েংখি, মদুনা ইথিল পীখি, কান্নবা ওইখি। মসিগা লোয়ননা ঐহাক্না মহাক্কী থৌনা লৈরবা পুৱারী অদুগী মতাংদা ইবা লাইরিক অমা ফোঙবগী খুদোংচাবা ফংজখি। অসিগুম্বা থৌরমশিংগী খুত্থাংদা খক্তা লৈবাক্কী তশেংবা পুৱারী অমসুং পুৱারী ওইরবা থৌদোকশিং খঙবা ঙমগনি।
মরুপশিং,
ঐহাক্না মদু য়েংবা মতমদা ঐহাক্কী ৱাখলদা করিগুম্বা অমা খল্লকখি অসামগী অমদি লৈবাক্কী কলাকারশিং পুনশিন্দুনা ঐখোয়না ছত্রপতি শিবাজী মহারাজকী জনতা রাজা নাত্য প্রয়োক তৌবা অদুগুম্না খনবা য়াগনি। কলাকার ২৫০-৩০০, শমু, শগোলনা থৌরম অদুদা শরুক য়াখি অমসুং য়াম্না ফজবা থৌরম ওইখি। ঐখোয়না লাচিৎ বরফুকনগী পুন্সিদা অসিগুম্বা থিহত্রিকেল এক্সপরিমেন্ত তৌদুনা লৈবাক অসিগী কাচিন-কোয়া য়ৌহন্নবা থৌরাং পাইখৎপা য়াগনি। পুম্নমক অসিনা ‘এক ভারত, শ্রেস্থ ভারত’কী ফিরেপ অদিদা চাউনা শাহৌ পীগনি। ঐখোয়না ভারতপু চাউখৎহন্নবা অমসুং অৱাং নোংপোকপু ভারতকী গ্রোথকী হব ওইহনবা তাই। ভীর লাচিৎ বরফুকনগী ৪০০শুবা মপোক কুমওনগী ৱাখল্লোন অসিনা ঐখোয়গী ফিরেপতা থৌনা পীগনি অমসুং জাতিনা মাগী পান্দমশিং ফংবা ঙমগনি হায়না ঐহাক্না থাজৈ। ঐহাক্না অসাম সরকার, হিমন্তাজী অমসুং অসামগী মীয়ামবু থমোয় শেংনা অমুক্কা হন্না থাগৎচরি। শেংলবা থৌরম অসিদা শরুক য়ানবা ঐঙোন্দা খুদোংচাবা পীবীরকপগীদমক তৌবীমল খঙবা উৎচরি।
থাগৎচরি!
