প্রধান মন্ত্রীনা ‘মিসন মৌসম’ হৌদোকখ্রে, IMD ভিজন-২০৪৭ দোকুমেন্ত ফোঙখ্রে
প্রধান মন্ত্রীনা থৌরমদুদা নীংশিং খুদম ওইনা পুথোকপা পোস্তেজ স্তাম্প অমদি শেলয়েক মায়খুম হাংদোকখ্রে
IMD গী চহি ১৫০ অসি ভারত মচা করোর কয়াগী থৌগলদা ইন্দিয়ন মেতিওরোলোজিকেল দিপার্তমেন্তকী খোঙচৎ অমা ওইবখক নত্তনা লৈবাক অসিগী মোদর্ন সাইন্স অমসুং তেক্নোলোজীগী অথোয়বা খোঙচৎ অমনি: প্রধান মন্ত্রী
সাইন্তিফিক ইন্সতিত্যুসনশিংদা রিছর্চ অমদি ইনোভেসন তৌবনা অনৌবা ভারতকী খোঙফমগী শরুক অমনি, IMD গী ইনফ্রাস্ত্রকচর অমদি তেক্নোলোজীনা হৌখিবা চহি ১০ সিদা হান্না খল্লুদবা চাংদা পাকথোক চাউথোরক্লি: প্রধান মন্ত্রী
ঐখোয়না ‘মিসন মৌসম’ ভারতপু ক্লাইমেত-স্মার্ত লৈবাক ওইহন্নবা হৌদোকপনি, মিসন মৌসম অসি তুং কোইগদবা তুংলমচৎ অমদি তুংগীদমক শেম শাবগী মায়কৈদা ভারতনা লেপ্লিবা খোঙফমগী খুদম অমনি: প্রধান মন্ত্রী
ঐখোয়গী মেতিওরোলোজিকেলগী লমদা খুমাঙ চাওশিনবনা মরম ওইরগা ঐখোয়গী দিজাস্তর মেনেজমেন্ত কেপাসিতী শেমগৎলকপনি, মালেম পুম্বনা মসিদগী কান্নবা ফংলি, ঐখোয়গী ফ্লাস ফ্লদ গাইদেন্স সিস্তেম্না নেপাল, ভুতান, বঙ্গলাদেশ অমদি স্রি লঙ্কাদা ইনফোর্মেসন ফংহল্লি: প্রধ
কেন্দ্রগী মন্ত্রীমন্দলগী ঐগী মরুপশিং দোক্তর জিতেন্দ্র সিংহ জি, দব্লিউ.এম.ওগী সেক্রেতরি জেনেরেল, প্রোফেসার সেলেস্তে সাউলো জি, মপান লৈবাকশিংদগী লাকপা ঐখোয়গী অতিথিশিং, আর্থ সাইন্সেস মিনিস্ত্রিগী সেক্রেতরি দোক্তর এম রবিচন্দ্রন জি, আই.এম.দিগী দিরেক্তর জেনেরেল দোক্তর মৃত্যুঞ্জয় মোহাপাত্রা জি, অতোপ্পা শক্নাইরবশিং, তোঙান-তোঙানবা বিভাগশিং অমসুং মহৈলোয়শঙশিংগী সাইন্তিস্তশিং অমসুং ওফিসিএলশিং অমসুং ইবেম্মাশিং অমসুং ইবুংঙোশিং।
ঙসি ঐখোয়না ইন্দিয়া মেতিওরোলোজিকেল দিপার্তমেন্ত (আই এম দি) গী চহি ১৫০ শুবা থৌরম পাংথোক্লি। মসি ইন্দিয়া মেতিওরোলোজিকেল দিপার্তমেন্তগী চহি ১৫০ গী খোঙচৎ খক নত্তে। মসি ঐখোয়গী লৈবাক্কী অনৌবা সাইন্স অমসুং তেক্নোলোজিগী খোঙচৎ অমশুনি। হৌখিবা চহি ১৫০ অসিদা ইন্দিয়া মেতিওরোলোজিকেল দিপার্তমেন্তনা ভারতকী মীওই করোর কয়াগী সেবা তৌবা খক নত্তনা, ভারতকী সাইন্সকী খোঙচৎকী খুদম অমশু ওইরে। হায়রিবা মাইপাকপশিং অসিগীদমক ঙসি পোস্তেজ স্তাম্প অমা অমসুং অখন্নবা শেনয়েক অমা ফোঙলে। লৈবাক অসিনা নিংতম্বা চহি ১০০ শুরকপগী থৌরম পাংথোকপা মতম ২০৪৭ দা ইন্দিয়া মেতিওরোলোজিকেল দিপার্তমেন্তগী তুংগী থবকশিং উৎপা ভিজন দোকুমেন্ত অমা ফোঙলে। য়াইফরবা থৌরম অসিদা লৈবাক অসিগী মীয়ামদা ঐনা য়াইফ পাউজেল পীজরি। চহি ১৫০ গী খোঙচৎ অসিদা নহারোলশিংগা শম্নবা ঙম্নবা ইন্দিয়া মেতিওরোলোজিকেল দিপার্তমেন্তনা নেসনেল মেতিওরোলোজিকেল ওলেম্পিয়াদশু পাংথোক্লে। মসিদা মহৈরোয় লিশিং কয়া শরুক য়াখি। মসিনা মহৈরোয়শিং মেতিওরোলোজিদা থৱায় য়াওবা হেনগৎহনগনি। ঐনা নহারোল খরগা ৱারি শানবগী খুদোংচাবা ফংলে অমসুং ঙসি ঐনা মফম অসিদা লৈবাক অসিগী রাজ্য কয়াদগী লাকপা ঐখোয়গী নহারোলশিংগা ৱারি শানরে। থৌরম অসিদা থৱায় য়াওবগীদমক ঐনা মখোয় থাগৎপা ফোঙদোক্লি। থৌরম শরুক য়ারিবা নহারোলশিং অমসুং মাইপাক্লবা মহৈরোয়শিং ঐনা থাগৎপা ফোঙদোক্লি।
মরুপশিং,
১৮৭৫ গী জনুৱারি ১৫, মকর সংক্রান্তি ময়াদা ইন্দিয়া মেতিওরোলোজিকেল দিপার্তমেন্ত লিংখৎখি। ভারতকী চৎনবীদা মকর সংক্রান্তি কয়া য়াম্না মরুওইবগে হায়বা ঐখোয় খঙলে। ঐ গুজরাত্তগীনি, মরম অদুনা ঐগী খ্বাইদগী পামজবা কুহ্মৈ অসি মকর সংক্রান্তিনা ওইগনি, ঙসি নুমিৎ চুপ্পা অমা গুজরাতকী মীওই খুদিংমক য়ুম মথক্ত লৈরমগনি অমসুং নুংঙাইনা তেলঙ্গা পাইরমগনি। ঐনা মফম অদুদা লৈরিঙৈদা, কুহ্মৈ অসি য়াম্না পামজখি, অদুবু ঙসি ঐ অদোমগী মরক্ত লৈরে।
মরুপশিং,
ঙসি নুমিৎনা ধনু রাসিদগী মকর রাসিদা চঙলক্লে। নুমিৎনা তপ্না তপ্না অৱাংলোমদা চঙলকপা হৌরে। ঐখোয়গী ভারতকী চৎনবীদা মসি উত্তরায়ান হায়না কৌই। পৃথিবীগী অৱাং থংবা শরুক্ত নুমিৎকী মঙাল ফংবা হেনগৎলকই। লৌ উনবা শেম-শাবা হৌই। মরম অদুনা ঙসিগী নুমিৎ অসি ভারতকী চৎনবীদা মরুওইনা লৌরি। নুমিৎ অসি অৱাংদগী খাদা, নোংপোক্তগী নোংচুপতা তোঙান তোঙানবা মচুশিংদা কুহ্মৈ পাংথোক্লি। মকর সংক্রান্তিগা মরী লৈনবা তোঙান তোঙানবা কুহ্মৈশিংগীদমক ঐনা লৈবাক অসিগী মীয়ামগী মফমদা য়াইফ পাউজেল পীজরি।
মরুপশিং,
লৈবাক অমগী সাইন্তিফিক ইন্সতিতুৎশিং চাউখৎলকপা অসিদা লৈবাক অদুনা সাইন্সকী মরমদা খঙবা হেনগৎলকপগী মমি তারে। সাইন্তিফিক ইন্সতিতুসনশিংদা রিছার্স অমসুং ইন্নোবেসনগী থবকশিং অসি অনৌবা ভারতকী থাদোক্নবা য়াদ্রবা মচৎ অমনি। হৌখিবা চহি ১০ অসিদা, মমাঙদা অমুক্ত ওইখিদ্রিবা মওং অমদা ইন্দিয়া মেতিওরোলোজিকেল দিপার্তমেন্তগী ইনফ্রাস্ত্রকচর অমসুং তেক্নোলোজি ফগৎলে। দোপ্লর ৱেদর রাদার, ওতোমেতিক ৱেদর স্তেসনশিং, রনৱে ৱেদর মোনিতরিং সিস্তেমশিং, জিলাশিংগী নোং তাবগী চাং ওন্নবা স্তেসনশিং য়াওনা অসিগুম্বা অনৌবা ইনফ্রাস্ত্রকচরশিংগী মশিং হেনগৎলে। মমাঙদা ঐখোয় কদাইদা লৈরম্মী অমসুং হৌজিক ঐখোয় কদাই য়ৌরবগে হায়গী মশিং দোক্তর জিতেন্দ্র সিংহনা অদোমগী মফমদা খঙহনখ্রে। ভারতকী স্পেস তেক্নোলোজি অমসুং দিজিতেল তেক্নোলোজিগী কান্নবা মেতিওরোলোজিশু মপুংফানা ফংলে। ঙসি, লৈবাক অসিগ এন্তারতিকাদা মাইত্রি অমসুং ভারতি কৌবা মেতিওরোলোজিকেল ওজার্বেতোরি অনি লৈরে। হৌখিবা চহিদা, আর্ক অমসুং অরিনিকা সুপরকম্পুতরশিং থবক হৌখ্রে। মসিনা হান্নদগী হেন্না ইন্দিয়া মেতিওরোলোজিকেল দিপার্তমেন্তনা মপুংফানা থবক তৌবা হেনগৎহল্লে। তুংদা ভারতনা নোংজু-নুংশাগী ফিবম খুদিংমক্কী থৌরাং তৌগদবনি, ভারত ক্লাইমেত স্মার্দ নেসেন অমা ওইনবা ঐখোয়না ‘মিসন মৌসম’ হৌদোক্লে। ভারতনা তুংগীদমক থৌরাং তৌবা অমসুং তুংগী থবকশিং পায়খৎপগী মমি মিসন মৌসমদা তারে।
মরুপশিং,
সাইন্সকী দরকার ওইবা অসি চাউখৎপগী অনৌবা থাকশিং য়ৌহনবা অদু খক নত্তে। মীচম মীয়ামগী পুন্সি হেন্না নুংঙাইনবা মখোয় হিংবদা লাইহন্নবা পাম্বৈ অমা ওইরক্লবা মতমদা সাইন্সকী মরুওইবা লৈগনি। হিরম অসিদা ইন্দিয়া মেতিওরোলোজিকেল দিপার্তমেন্তনা থবক কয়া মাঙজৌননা পায়খৎখ্রে। মীওই খুদিংমক্ত নোংজু-নুংশাগী অমসুং নোং-চিংগী মরিক চুম্বা পাউ য়ৌহন্নবা ভারত্ত ইন্দিয়া মেতিওরোলোজিকেল দিপার্তমেন্তনা অখন্নবা থবক পায়খৎলি। ঙসি, লৈবাক অসিগী অপুনবা মীশিংগী চাদা ৯০ হেনবদা মাঙজৌননা নোং-চিংগী চেকশিনৱা মাঙজৌননা ফংহল্লে। মীওই অমনা হৌখিবা নুমিৎ ১০ অমসুং লাক্কদৌরিবা নুমিৎ ১০ গী নোংজু-নুংশাগী মরমদা ই-পাউ ফংবা ঙম্লে। নোংজু-নুংশাগী মতাংদা মাঙজৌননা লাউথোকপশিং ৱাতসএপ্পতাশু ফংলে। ঐখোয়না মেঘদুত মোবাইল এপ্প হৌদোক্লে, মসিদা লৈবাক অসিগী লোল কয়াদা ই-পাউশিং ফংহল্লে। মসিগী কান্নবা অদোম উবা ফংলে, ঙসিদগী চহি ১০ গী মমাংদা, লৈবাক অসিগী লৌমীশিং অমসুং শা-ষন লোইবা লৌমীশিংগী চাদা ১০ খক নোংজু-নুংশাগী ই-পাউ শীজিন্নখি। ঙসিদি লৌমীশিংগী চাদা ৫০ হেন্না মসি শীজিন্নরে। ব্রাজ তাবগী মতাংদা মাঙজৌননা লাউথোকপা ফাওবা মীয়াম্না মোবাইলদগী খঙবা য়ারে। মমাঙদা, লৈবাক অসিগী ঙামী লাখ সমুদ্রদা চৎখিবা মতমদা, মখোয়গী ইমুং-মনুংশিংনা য়াম্না ৱাখি। থোকহন্নিংদবা থৌদোকশিং থোকপা য়াবগী অকিবা লৈখি। অদুবু হৌজিক্তি, ইন্দিয়া মেতিওরোলোজিকেল দিপার্তমেন্তগী মতেংদগী, ঙামীশিংনা মতম চানা চেকশিনৱা ফঙবা ঙম্লে। হায়রিবা খুদক্ত পীবা পাউ অসিনা মীয়াম অশোই-অঙাম থোকহন্দ্রে অমসুং লৌউ-শিংউ অমসুং ব্লু ইকোনোমিগুম্বা হিরমশিং চাউখৎহল্লে।
মরুপশিং,
লৈবাক অমনা মহৌশাগী ওইবা অমাং-অতা থেংনবদা মেতিওরোলোজি অসি য়াম্না মরুওই। দিজাস্তর মেনেজমেন্তগী থবক তৌবা মশিং য়াম্লবা মীওইশিং মফম অসিদা লৈরি। মহৌশাগী অমাং-অতাশিংনা থোকহনবা অমাঙবশিং হন্থহন্নবা, ঐখোয়না মেতিওরোলোজি শীজিন্নবা হেনগৎহনগদবনি। ভারতনা মসিগী মরুওইবা মখা খঙলে। মতম অমদা লাইবক্না তম্বনি হায়না খন্নরম্বা মহৌশাগী ওইবা অমাং-অতাশিংগী মাইওন হোংহনবদা ঙসি ঐখোয় মাইপাক্লে। ১৯৯৮ তা কুছ, কন্দালাদা নোংলৈ-নুংশিৎনা কয়া য়াম্না অমাং-অতা থোকহনখিবগে হায়বা অদোম নিংশিংলমগনি। মতম অদুদা মশিং য়াম্লবা মীওই লৈখিদে। মসিগা চপ মান্না, ১৯৯৯দা, অকনবা নোংলৈ-নুংশিৎ অমনা ওরিসাদা মীওই লিশিং কয়া শিহনখি। হৌখিবা চহিদা, লৈবাক অসিনা অকনবা নোংলৈ-নুংশিৎ কয়া অমসুং মহৌশাগী অমাং-অতা কয়া থেংনখি। মখোয় অয়াম্বা, ঐখোয়না মীওইবগী পুন্সি মাঙবগী জিরো নত্ত্রদা মশিং খ্বাইদগী য়ামদনা হন্থহল্লে। হায়রিবা মাইপাকপশিং অসিদা ইন্দিয়া মেতিওরোলোজিকেল দিপার্তমেন্তনা অচৌবা থৌদাং অমা লৌরি। সাইন্স অমসুং শেম-শাবগী অপুনবা অসিনা লুপা করোর কয়াগী শেন-থুম মাঙবদগী কনবা ঙম্লে। মসিনা লৈবাক অসিগী শেন-থুমনা অৱাবা মায়োক্নবা ঙম্বগী থৌনা হেনগৎহল্লে অমসুং শেন থাদরিবা মীওইশিংগী থাজবা হেনগৎহল্লে অমসুং ঐগী লৈবাক্কী ওইনশু য়াম্না কান্নরে। ঙরাং ঐ সোনামার্গতা চৎখি, অহানবদা থৌরম অসি ঙনখৎনা থৌরাং তৌখিবনি, অদুবু ইন্দিয়া মেতিওরোলোজিকেল দিপার্তমেন্তনা পীরকপা পাউগী মতুংইন্না হায়রিবা মতম অদুদা ঐগী চুনবা ওইখিদে, মদুদগী ইন্দিয়া মেতিওরোলোজিকেল দিপার্তমেন্তনা ঐঙোন্দা হায়খি, সার তারিখ ১৩ অসি য়াম্না ফরে। মরম অদুনা ঐ ঙরাং মফম অদুদা চৎখি, ইংবগী চাং মাইনস ৬ দিগ্রি ওইখি, অদুবু ঐনা মফম অদুদা লৈরিঙৈ মনুংদা, লৈচিল অমদা উখিদে, নুংশা মপুংফানা থোকখি। ইন্দিয়া মেতিওরোলোজিকেল দিপার্তমেন্তদগী ফংবা পাউ অসিনা মরম ওইদুনা, থৌরম অদু লাইনা লোইশিল্লবা মতুংদা ঐ হল্লকখি।
মরুপশিং,
সাইন্সকী লমদা চাউখৎপা অমসুং মসি মপুংফানা শীজিন্নবা অসি মালেমদা লৈবাক অমগী মিংচৎ হেনগৎনবগী খ্বাইদগী চাউবা য়ুম্ফমনি। ঙসি অদোম্না উরে, ঐখোয়গী মেতিওরোলোজি চাউখৎলকপদগী, ঐখোয়না অমাং-অতা মায়োক্নবা ঙম্বগী থৌনা হেনগৎলে। মালেম শীনবা থুংনা মসিগী কান্নবশিং ফংলে। ঙসি, ঐখোয়গী খঙহৌদনা ঈশিং ইচাউ লাকপদা লমজিংনবা থবকশিংগী কান্নবশিং নেপাল, ভুতান, বাংলাদেস অমসুং শ্রী লঙ্কাদশু পীরে। করিগুম্বা ঐখোয়গা য়ুম্লোন্নরিবা লৈবাক অমদা মহৌশাগী ওইবা অমাং-অতা অমা থোকপা মতমদা, মতেং পাংনবা ভারতনা হান্না চোঙথোরক্কনি। মসিনা মালেমগী লৈবাকশিংনা ভারত্ত থম্লিবা থাজবশু হেনগৎহল্লে। মালেমগী মরুপ অমা ওইনা ভারতকী মিংচৎ হেন্না ফগৎলে। মসিগীদমক ঐনা ইন্দিয়া মেতিওরোলোজিকেল দিপার্তমেন্তগী সাইন্তিস্তশিং থাগৎপা ফোঙদোকচরি।
মরুপশিং,
ঙসি, ইন্দিয়া মেতিওরোলোজিকেল দিপার্তমেন্তগী চহি ১৫০ শুবা মপোক কুমওন থৌরমদা, মেতিওরোলোজিগী লমদা চহি লিশিং কয়াগী ভারতকী লৌশিং অমসুং হৈথোই-শিংথোইবা ঐনা পাউদমগনি। মরুওইনা, ঐনা চহি ১৫০ গী থবকশিংগী মতাংদা শন্দোক্না তাক্কনি। মসিগী মরমদা খঙবদা ঐখোয়গী মালেমগী লৈবাকশিংগী অতিথিশিং য়াম্না নুংঙাইগনি। অদোম্না খঙলিবা অদুনি, মীওইবগী ইভোলুসন্দা মরুওইবা ইথিল পীবদা নোংজু-নুংশা অসি মরুওইবা অমা ওইরি। মালেমগী মফম খুদিংমক্ত, নোংজু-নুংশা অমসুং মহৌশাগী অকোয়বগী ফিবমগী মতাংদা খঙনবা মীওইবনা লেপ্তনা হোৎনদুনা লাক্লি। হিরম অসিদা, ভারত অসি চহি লিশিং কয়াগী মমাঙদগী মেতিওরোলোজিগী লমদা নৈনবা অমসুং থিজিন্দুনা লাক্লবা লৈবাক অমনি। ঐখোয়গী বেদশিং, সমহিতাশিং অমসুং সু্র্য সিদ্ধান্তগুম্বা লাইরিকশিংদা মেতিওরোলোজিগী মরমদা য়াম্না ইরমখি। তামিল নাদুগী শঙ্গম সাহিত্য অমসুং অৱাং ভারতকী ঘাঘ ভাদারি ফোক্ল লিতেরেচরদা মেতিওরোলোজিগী মরমদা য়াম্না ইরমখি। মসিগী মেতিওরোলোজি অসি তোখায়বা মশা অমা নত্তে। মসিদা এস্ত্রোনোমিকেল অঙ্কশিং খোৎপা, নোংজু-নুংশা নৈনবা, শা- উচেকশিংগী লমচৎ-শাজৎ নৈনবা অমসুং খুন্নাইগী থবকশিং থিজিনবা য়াওরি।
গ্রহশিংগী লৈফমশিংগী মতাংদা পাংথোকখিবা অঙ্কগী থবকশিং মালেম শীনবা থুংনা খঙনরে। ঐখোয়গী সাধুশিংনা গ্রহশিংগী লৈফমশিং খঙখি। রাসিগী খুদমশিং, থৱান্মিচাকশিং অমসুং নোংজু-নুংশাগা মরী লৈনবশিং ঐখোয়না অঙ্ক ওইনা খোৎখি। কৃষি পারাসার, পরাসার রুচি অমসুং ব্রিহাত সমহিতাগুম্বা অরিবা লাইরিকশিংদা, লৈচিল শেম্বা অমসুং লৈচিল মখলশিংগী মরমদা য়াম্না কুপ্না থিজিনখি। কৃষি পারাসারদা হায়খি-
अतिवातम् च निर्वतम् अति उश्नम् चाति सीतलम् अत्य-भ्रंच निरभ्रंच शाद विधाम मेघ लक्ष्णम्॥
মসিনা হায়রি মদুদি অৱাংবা নত্ত্রগা অনেম্বা এদমোস্ফেরিক প্রেসর অমসুং অৱাংবা নত্ত্রগা অনেম্বা তেম্পেরেচরনা লৈচিলগী মচৎ হোংহল্লি অমসুং নোং চুবা থোকহল্লি। অনৌবা যুগকী খুৎলায়শিং য়াওদনা চহি লিশিং কয়াগী মমাঙদা সাধুশিং অমসুং পন্দিৎশিংনা কয়া য়াম্না থিজিল্লম্বগে হায়বা অদোম খন্দুনা য়েংউ। হিরম অসিগী মতাংদা চহি খরগী মমাংদা ঐনা “প্রি-মোর্দন কুতচি নেভিগেসন তেক্নিকস এন্দ ভোয়েজেস” কৌবা লাইরিক অমা ফোঙখ্রে। লাইরিক অসিদা সমুদ্র অমসুং নোংজু-নুংশাগা মরী লৈনবা গুজরাতকী হিহোনবশিংগী চহি চা কয়াগী অরিবা লৌশিং কয়া য়াওরি। ঐখোয়গী ত্রাইবেল খুন্নাইশু অসিগুম্বা লৌশিং কয়া মরাংকাইনা লৈরি। মসিদা মহৌশা ফজনা খঙবা অমসুং শা-উচেকশিংগী লমচৎ-শাজৎশিং কুপ্না থিজিনবা য়াওরি।
ঐ নিংশিংলি, মদু চহি ৫০ গী মমাঙ ওইরমগনি, ঐ মতম খর গির উমংদা লৈনবা মফম অদুদা চৎখি। মফম অদুদা, সরকারগী মীওইশিংনা ত্রাইবেল অঙাং অমদা থা খুদিংগী লুপা ৩০ পীখি। মসি করিগীনো হায়না ঐনা হংখি? করিগীদমক অঙাং অসিদা শেন পীরিবনো? মখোয়না হায়খি মদুদি অঙাং অসিগী অখন্নবা তৌবা ঙম্বা অমা লৈরি, করিগুম্বা উমংগী মফম অমদা মৈ চাকপা মতমদা, য়াম্না লাপ্না চাকপা মতমদা, মফম অমদা মৈ চাক্লে হায়বা মহাক্না খঙগনি, মদু মহাক্না খঙবা ঙম্মী অমসুং মহাক্না খুদক্ত সরকারদা পাউ পীগনি অমসুং মদুগীদমক ঐখোয়না মঙোন্দা লুপা ৩০ পীরিবনি। ত্রাইবেল অঙাং অদুগী তৌবা ঙম্বা মতিক মগুন অদুনা, মহাক্না হায়গনি, সার, ঐনা মাইকৈ অশোমদগী মৈ চাকপগী মনম তারে।
মরুপশিং,
ঙসি, ঐখোয়না হিরম অসিদা হেন্না থিজিনগদবনি। ঐখোয়না থায়নাগী লৌশিংগা অনৌবা সাইন্সগা শম্ননবা লম্বীশিং থিগদবনি।
মরুপশিং,
ৱেদর দিপার্তমেন্তনা মাঙজৌননা লাউথোক্লিবশিং হেন্না চুম্বা মতমদা, মসিগী মরুওইবা হেনগৎলক্কনি। তুংদা, ইন্দিয়া মেতিওরোলোজিকেল দিপার্তমেন্তগী দেতা পাম্না হেনগৎলক্কনি। উদ্যোগশিং অমসুং মীচম মীয়াম য়াওনা হিরম কয়াদা মসিগী দেতা অসি শীজিন্নবা হেনগৎলক্কনি। মরম অদুনা, তুংগী দরকার ওইবশিং খন্দুনা ঐখোয়না থবক তৌগদবনি। য়ুহা হাবগুম্বা মহৌশাগী ওইবা অমাং-অতাশিংগী অৱাবশু থেংনরি, মসিগীদমক ঐখোয়না মাংজৌননা চেকশিনৱা পীনবা সিস্তেমশিং পুথোক্কদবনি।
হিরম অসিদা ঐখোয়গী সাইন্তিস্তশিং, থিজিল্লোয়শিং অমসুং ইন্দিয়া মেতিওরোলোজিকেল দিপার্তমেন্তগুম্বা ইন্সতিতুসনশিংনা অনৌবা থবক কয়া পায়খৎপা ঐনা পাম্মী। মালেমগী থবক তৌবগা লোয়ননা মালেমগী সেকুরিতিগীদমক ভারতনা মরুওইবা থৌদাং অমা লৌগদবনি। মসিগী ৱাখল্লোন অসিগা লোয়ননা, লাক্লিবা চহিশিংদা ইন্দিয়া মেতিওরোলোজিকেল দিপার্তমেন্তনা অনৌবা মাইপাকপা কয়া পুরক্কনি হায়বগী থাজবা থম্লি। চহি ১৫০ গী মেতিওরোলোজিগী মাইপাকগী খোঙচৎ অসিদা ইন্দিয়া মেতিওরোলোজিকেল দিপার্তমেন্ত অমসুং মসিগী চৎমিন্নরিবা মীওইশিং ঐনা অমুক হন্না থাগৎপা ফোঙদোকচরি। ঐনা অমুক হন্না মীয়াম পুম্নমক থাগৎপা ফোঙদোকচরি।
