রাজ্যপাল শ্রী আর এন রবি জি, কেন্দ্রগী ঐগী মরুপশিং, শান্তনু থাকুর জি, সুকান্ত মজুমদার জি, নোংচুপ বেঙ্গলগী ওপোজিসনগী লুচিংবা সুভেন্দু অধিকারি জি, সংসদকী ঐগী মরুপশিং, সোমিক ভত্তরচার্য়া জি, অতোপ্পা মীয়ামগী মীহুৎশিং অমসুং ইবেম্মাশিং অমসুং ইবুংঙোশিং,
ঙসি, কোলকাতাগী লৈহাওদগী, নোংচুপ বেঙ্গল অমসুং নোংপোক ভারত চাউখৎনবগী অনৌবা পন্দুব অমা ইবা হৌরে। লুপা করোর ১৮,০০০ হেনবগী লম্বী, রেলৱে অমসুং হিথাংফম ইনফ্রাষ্ট্রকচরগী প্রোজেকশিং শঙ্গারে অমসুং উরেপ-উয়ুং তম্লে। প্রোজেকশিং অসিনা নোংচুপ বেঙ্গল অমসুং নোংপোক ভারত্ত অনৌবা ইনোৎ অমা হাপকনি, ললোন-ইতিক অমসুং উদ্যোগ চাউখৎকনি, মীওই লাখ কয়াগী পুন্সি হিংবদা হেন্না লাইহনগনি অমসুং মখোয়দা অনৌবা খুদোংচাবশিং পীগনি। খারাগপুর-মোরেগ্রাম এক্সপ্রেসৱে লোইশিল্লকপা মতমদা নোংচুপ বেঙ্গলগী মফম কয়াদা শেন-থুমগী থবকশিং য়াংখৎলক্কনি। দুব্রাজপুর বাইপাস অমসুং কংসবাতি অমসুং শিলাবতি তুরেলশিংগী মথক্ত শারিবা অচৌবা থোঙশিংনা চৎথোক-চৎশিন ফগৎহনগনি। প্রোজেকশিং অসিগীদমক নোংচুপ বেঙ্গল অমসুং নোংপোক ভারতকী মীয়ামদা ঐনা হরাওবা ফোঙদোকচরি।
মরুপশিং,
ঙসিদি, লৈবাক শীনবা থুংনা রেলৱেশিং মতমগা চুনবা মওংদা শেমগৎনবা অচৌবা খোঙজং অমা চৎথরি। থবক অসিদা নোংচুপ বেঙ্গল মনিংদা লৈহৌদনবা ঐখোয়না ৱারেপ লৌরে। মরম অদুনা, নোংচুপ বেঙ্গলগী রেলৱেগী ইনফ্রাষ্ট্রকচর য়াংনা পাকথোক-চাউথোক্নবা কেন্দ্র সরকারনা থবক পায়খৎলি। ঙসি, কলাইকুন্দা অমসুং কানিমহুলি সেক্সনশিংদা ওতোমেতেদ ব্লোক শিঙ্গনেলিং সিষ্টেম মীয়ামদা কৎথোক্লে। মসিনা য়াম্না চিনবা রেলৱেল রুত্ত কেপাসিতি হেনগৎহনগনি, অশোই-অঙাম থোক্তনা চৎপা য়াহনগনি অমসুং খোঙজেল য়াংখৎহনগনি অমসুং পেসেঞ্জরশিং খুদোংচাহনগনি।
মরুপশিং,
ঙসি, ষ্টেসন তরুক- কমাখ্যা গুরি, অনারা, তামলুক, হলদিয়া, বারাভুম অমসুং সিয়ুরি অমৃত ষ্টেসনশিং ওইনা শঙ্গারে। ঐখোয়গী বেঙ্গলগী ফজরবা নাৎ অমসুং চৎনবীশিং হৌজিক মখা তানা হায়রিবা ষ্টেসনশিং অসিদা মমি তারে। অতোপ্পা ষ্টেসন কয়াসু হৌজিক অমুক হন্না শেমগৎলি। পুরুলিয়া অমসুং অনন্দ বিহার তর্মিনেলগী মরক্ত অনৌবা এক্সপ্রেস ত্রেন অমসু লমথারে। ত্রেন অসিনা নোংচুপ বেঙ্গলগী মীয়ামদা কান্নবা পীবা খক নত্তনা ঝারখন্দ, বিহার, উত্তর প্রদেস অমসুং দিল্লিগী মীয়ামদসু কান্নবা পীরগনি।
মরুপশিং,
লম্বী অমসুং রেলগুম্না হিথাংফমশিং অমসুং ঈশিং লম্বীশিংনা চপ মান্নবা মরুওইবা থৌদাং অমা লৌরি। ঙসিদি, ঈশিং লম্বীশিংনা ললোন-ইতিক অমসুং উদ্যোগ চাউখৎনবা অনৌবা খুদোংচাবশিং পীরে। মাইকৈ অসিদা, ঙসি হিথাংফমগী ইনফ্রাষ্ট্রকচরগা মরী লৈনবা প্রোজেকশিং উরেপ-উয়ুং তম্লে অমসুং শঙ্গারে। কোলকাতা অমসুং হলদিয়াগী হিংথাফমশিং নোংপোক ভারত্ত ললোন-ইতিক্কী মরুওইবা মফমশিংনি। হলদিয়া দোক কমপ্লেক্স মেকানাইজেসনগী থবক পায়খৎলি। মসিনা কার্গোশিংগী থবক য়াংখৎহনগনি, হিথাংফমগী থবক তৌবা হেনগৎহনগনি অমসুং ললোন-ইতিক্কী অনৌবা খুদোংচাবশিং ফংহনগনি। কোলকাতা হিথাংফমদা বেসকুল ব্রিজসু নৌনা শেমজিল্লে। খিদিরপুর হিথাংফমদা কার্গোগী থবক হেনগৎহন্নবা ঐখোয়না মীৎয়েং চঙলে। প্রোজেকশিং অসিনা নোংপোক ভারতকী পোৎ-চৈ পুথোক-পুশিনগী থবক মখা তানা ফগৎহনগনি।
মরুপশিং,
অনৌবা লম্বী, রেল অমসুং হিথাংফমগী প্রোজেকশিংনা নোংচুপ বেঙ্গলগী অনৌবা তুংলমচৎকী অনৌবা খুদোংচাবা কয়া পীরে। লৌমীশিং, ললোনবশিং, ওন্ত্রেপ্রেন্যুরশিং অমসুং মহৈরোয়শিংনা মসিগী কান্নবা ফংগনি। তুরিজম, মফম অসিগী উদ্যোগশিং অমসুং সর্বিসেসগুম্বা হিরমশিংদা অনৌবা খুদোংচাবশিং লৈরে। ঐখোয়গী পান্দমদি ‘বিকসি বেঙ্গল’ অমা ওইনবা অমুক হন্না ফগৎলকপা অদুনি, মতম পুম্নমক্ত বেঙ্গলনা ভারত লমজিংবা অদুনি। অফবা লম্বী-থোঙ অমসুং মতমগী অনৌবা ইনফ্রাষ্ট্রকচরনা বিকসিত বেঙ্গলি অমা শেমগনি হায়না ঐনা থাজৈ। থাজবা অসিগা লোয়ননা, চাউখৎ-থৌরাংগী প্রোজেকশিং অসিগীদমক ঐনা অমুক হন্না ময়ামদা হরাওবা ফোঙদোকচরি। হৌজিক, সরকারগী থৌরম অসি লোইরবা মতুংদা, নোংচুপ বেঙ্গলগী মীয়াম হুপ্না তিনগদবা লম্পাক অমদা ঐ চৎলগনি। ঐনা অপুনবা বেঙ্গল উবা ফংলগনি অমসুং বেঙ্গলগী মীয়াম মরক্ত য়াম্না মরুওইবা হিরমশিং খন্নগনি। থৌরম অসি মতাং অসিদা লোইশিঞ্জরে।
অদোম থাগৎপা ফোঙদোকচরি!
অদোমগী মফমদা য়াইফ পাউজেল পীজরি!
