নমস্কার!
মরুপশিং,
ঙসি অসিদি বৈশাখীগী শেংলবা নুমিৎনি। ঐহাক্না লৈবাক মীয়ামদা বৈশাখীগী য়াইফ পাউজেল পীজরি। হরাও নুংঙাইবনা থল্লবা ঙসিগী কুহ্মৈ নুমিৎ অসিদা লৈবাক্কী নহা লিশিং 70না কেন্দ্র সরকারগী তোঙান-তোঙানবা বিভাগশিংদা অনৌবা থবক ফংলি। অদোম নহাশিং অমসুং অদোমগী ইমুং মনুংবুসু ঐহাক্না থাগৎচরি। অদোমগী অফবা তুংগী পুন্সি অমগীদমক্তা ঐহাক্না য়াইফ পাউজেল পীজরি।
মরুপশিং,
চাউখৎপা ভারত অমগী মঙলান মংফাওনহন্নবগীদমক্তা ঐখোয়গী সরকারনা নহাশিংগী তেলেন্ত অমসুং ইনর্জীগী চুনবা খুদোংচাবা পীনবগীদমক্তা সরকারনা খোঙফম চেৎলি। কেন্দ্র সরকারগা লোয়ননা NDA অমসুং বি.জে.পি.না লৈঙাকপা গুজরাত্তগী অসম অমসুং উত্তর প্রদেশতগী মহারাস্ত্রা ফাওবগী রাজ্যশিংদা সরকারগী থবক লৌবগী থৌওং অসি খোঙজেল য়াঙনা পায়খৎলি। ওজা 22,000 হেনবগী মফমদা মধ্য প্রদেশতা ঙরাংখক্তদা থবক খনবগী চিথী য়েন্থোকখি, ঐখোয়গী সরকারনা লৈবাক্কী নহাশিংগীদমক্তা খোঙফম চেৎলি হায়বসি মসিগী রোজগার মেলা অসিনা খুদম ওইরি।
মরুপশিং,
ভারত অসি মালেমগী খ্বাইদগী খোঙজেল য়াঙনা চাউখৎলক্লিবা শেন্মিৎলোন অমনি। মালেমগী শিংনবা অমসুং লাইচৎ মনুং অসিদা মালেম্না ভারতপু অঙানবা মফম অমনি হায়না য়েংনরি। ঙসিগী অনৌবা ভারতনা ঙসিদি পোলিসী অমসুং স্ত্রেতজী কয়াগা লোয়ননা তুংলমচত্তা চঙশিল্লি অমসুং মসিনা অনৌবা খুদোংচাবা কয়াগী থোঙ হাংদোক্লি। মমাংদা চৎনরম্বা রিএক্তিব স্তান্সকী তাইয়োন্নবা ওইনা ভারত্না ইং 2014গী মতুংদা প্রোএক্তিব এপ্রোচ অমা শিজিন্নরে। মসিনা 21শুবা চহি চাগী অহুমশুবা দিকেদ অসিনা ভারত্তা মমাংদা হান্না খন্নরমদবা ইমপ্লোয়মেন্ত অমসুং সেল্স ইমপ্লোয়মেন্তকী খুদোংচাবা কয়া লৈবগী ফিভম উহল্লে। চহি তরাগী মমাংদা লৈরমদবা সেক্তর কয়া ঙসিদি নহাশিংনা ফংলে। ঐখোয়গী মাঙদা স্তার্তঅপ্না খুদম ওইনা লৈরে। ভারতকী নহাশিংদা স্তার্তঅপকী মতাংদা থৱাই য়াম্না য়াওবগী মওং অমা লৈনরি। স্তার্তঅপশিংনা থবক লাখ 40 হকথেংননা অমসুং নাকোইননা পীবা ঙমখি হায়না রিপোর্ত অমনা হায়রিবনি। মতৌ অসুম্না দ্রোন ইন্দস্ত্রী লৈরে। লৌউ-শিংউ নত্ত্রগা দিফেন্স সেক্তর ওইরো, ইনফ্রাস্ত্রকচরগা মরী লৈনবা সর্ভে পাংথোকপা নত্ত্রগা স্বমিত্বা য়োজনা ওইরো, দ্রোনগী শিজিন্নফম অসি নোংম-নোংমগী হেনগৎলক্লি। মরম অদুনা, নহা কয়া অমদি দ্রোন পাইবা, দ্রোন শাবগী স্তার্তঅপশিংগা মরী লৈনরি। লৈবাক্কী স্পোর্ত সেক্তর অসিদসু মমাংগী চহি 8-9দা অহোংবা কয়া লাকখিবা অদোম্না উরবনি। ঙসিদি, লৈবাক্কী মফম খুদিংদা অনৌবা স্তেদিয়ম লৈরক্লি, অনৌবা একদমী লৈনরক্লি। মসিদা কোচ, তেক্নিসিয়ন, স্পোর্ত স্তাফকী মথৌ তাগনি। লৈবাক্কী স্পোর্তকী বজেৎসু শরুক অনি হেনগৎলিবসিনা নহাশিংদা অনৌবা খুদোংচাবা কয়া পীরিবনি।
মরুপশিং,
আত্মানির্ভর ভারত অভিয়ানগী ৱাখল খনবা অমসুং থবক পাংথোকপগী মওং মতৌনা স্বদেশী চৎপা অমসুং ‘ভোকেল ফোর লোকেল’দগী হেন্দোক্লে। মসিদি অকক্নবা লৈগদবা হীরম নত্তে। আত্মানির্ভর ভারত অভিয়ান অসিদি খুঙ্গংদগী শহর ফাওবদা থবক্কী খুদোংচাবা করোর কয়া লৈহন্নবা ‘অভিয়ান’ অমনি। ভারতনা ঙসিদি মোদর্ন সেতিলাইত অমসুং সেমি হাই স্পীদ ত্রেনশিং মশানা শারি। মমাংগী চহি 8-9দা LHB কোচ 3000 হেন্না ভারত্তা শাখি। মসি শাবদা তোন লিশিং কয়াগী স্তীল চঙখি। তোঙান-তোঙানবা পোত্থোক কয়া অমসু মসিদা চঙই, মসিগী সপ্লাই চেন অপুনবা অসিনা থবক লিশিং কয়া পীরিবনি। ঐহাক শান্নপোৎ ইন্দস্ত্রীগী খুদম অমা পীগে। জিতেন্দ্র সিংহজীনসু হৌজিক্তা তাকপীখ্রে। ভারতকী অঙাংশিংনা দিকেদ কয়া অমদি মীরমদগী পুশিল্লকপা শান্নপোৎ খক্তমক শান্নরম্মি। শান্নপোৎশিং অসি য়াম্না ফবসু নত্তে অদুগা ভারতকী অঙাংশিংগীদমক্তা অখন্ননা খল্লগা শাবসু অমত্তা নত্তে। মসিদা কনা অমত্তা মিৎয়েং চঙবীরমদে। ঐখোয়না মীরমদগী পুশিল্লকপা শান্নপোৎশিংগী স্তেন্দর্দগী বেঞ্চমার্ক অমা শেমখ্রে অমসুং লৈবাক অসিদা শাজবা শান্নপোৎশিং হেন্না খুমাং চাউশিলহন্নবা হোৎনবসু হৌখি। মসিদগী মমাংগী চহি 3-4দা শান্নপোৎকী ইন্দস্ত্রীদা অহোংবা পুরকখি, অদুগা মসিনা থবক কয়া অমসু পীবা হৌরকখি। দিফেন্সকী খুৎলায়শিং অসি মীরমদগী অদুমক লৈগদবনি হায়বা অরিবা ৱাখল্লোন অসি লৈবাক অসিদা মতম শাংনা চৎনদুনা লাকখি। ঐখোয়না লৈবাক্কী মেন্যুফেকচররশিংদা থাজবা থম্লমদে। অদুবু ঐখোয়গী সরকারনা মসিগী ৱাখল্লোন অমসুং থৌওং অসিবু হোংদোকখি। ঐখোয়না ভারত খক্তদা শাগদবা আর্ম্দ ফোর্সকী খুৎশু-খুৎলায় 300 হেনবগী লিস্ত অমসু শেম্লে। হায়রিবশিং অসি ভারত্তা শারগনি, ভারতকী ইন্দস্ত্রীশিংদগী লৈরগনি। ঙসিদি লুপা করোর 15000 হেনবা শেনফমগী দিফেন্সকী খুৎলায়শু ভারতনা মালেম পুম্বদা এক্সপোর্ত তৌরিবনি।
মরুপশিং,
অদোম পুম্নমক্না ৱাফম অমসু কাওবা য়াদে। লৈবাক্না ঐখোয়গী ইফমদা ইং 2014দা সেবা তৌবগী খুদোংচাবা পীখিবা মতমদা ভারত্তা য়োল্লিবা মোবাইল ফোনশিং অসি মীরমদগী অয়াম্বা পুশিল্লক্লম্মি। ঐখোয়না লোকেল মেন্যুফেকচরিং তৌবদা পুক্নিং থৌগৎনবগীদমক্তা মসিগীদমক্তা ইন্সেন্তিব পীবা হৌখি। করিগুম্বা ঙসিসু হান্নগী ফিভম অসিমক লৈরম্লবদি, ঐখোয়গী লুপা করোর লাখ কয়া অমা ফোরেন এক্সচেঞ্জতা চৎলম্লগনি। অদুবু, হৌজিক্তি ঐখোয়না ইশাগী তঙাই ফদবশিংসু পীবা ঙম্লে অদুগা মীরমদসু এক্সপোর্ত তৌরে। মালেমগী অতোপ্পা লৈবাকশিংদা য়ৌহল্লি। মসিনসু থবক্কী খুদোংচাবা কয়া অমা পীরিবনি।
মরুপশিং,
থবক লৈহনবগী তোঙানবা পাম্বৈ অমসু লৈ, মদুদি সরকারনা ইনভেস্ত তৌদুনা পায়খৎপা ইনফ্রাস্ত্রকচর প্রোজেক্তশিংনি। ঐখোয়গী সরকার অসি ইনফ্রাস্ত্রকচর প্রোজেক্তশিংবু খোঙজেল য়াঙনা পায়খৎপগীদমক্তা খঙনরিবনি। সরকারনা কেপিতেল এক্সপেন্দিচরদা চাদিং তৌরকপা মতমদা শোরোক, রেলৱে, হিথাংফম অমসুং অনৌবা বিলদিংগুম্বা মখল কয়াগী ইনফ্রাস্ত্রকচর লৈরকই। ইনফ্রাস্ত্রকচর শেমগৎ-শাগৎপা মতমদা ইঞ্জিনিয়র, তেক্নিসিয়ন, একাউন্তেন্তম শিন্মী অমসুং মখল কয়াগী খুৎশু খুৎলায়, স্তীল, সিমেন্তকুম্বা রো মেতরিএল কয়াগী মথৌসু তারকই। ঐখোয়গী সরকারগী মতমসিদা, মমাংগী চহি 8-9দা কেপিতেল এক্সপেন্দিচরগী চাংনা শরুক মরি থোক্না হেনগৎখি। মসিনা মীয়ামদা থবক্কী খুদোংচাবা, মশাগী শেন্থোক অনিমক লৈহন্দুনা কান্নবা কয়া ফংহনখি। ইন্দিয়ন রেলৱেগী খুদম অমা ঐহাক মীয়ামদা থমজগে। ইং 2014গী মমাংগী দিকেদ 7দা রেলৱেগী কিলোমীতর চাউরাকপা 20,000 খক ইলেক্ত্রিফিকেসন তৌখি। অদুবু মমাংগী চহি 9 অসিদা কিলোমীতর 40,000গী রেল লাইন ইলেক্ত্রিফিকেসন তৌখি। মেত্রো রেল লাইন থাবগী মতাংদা, ইং 2014গী মমাংদা থা অমদা শুপ্নগী মীতর 600খক থারম্মি, শুপ্নগী মীতর 600খক। অদুবু ঙসিদি ঐখোয়না থা অমদা কিলোমীতর 6 শাংবা অনৌবা মেত্রো লাইন থারে। মতমদুদা অশাংবগী চাং অসি মীতরদা চৎলম্মি, হৌজিক্তি কিলোমীতরদা ওইনা চৎলবনি। ইং 2014গী মমাংদা গ্যস নেতৱর্ক অসি লৈবাক্কী শুপ্নগী জিলা 70খক্তদা লৈরম্মি, অদুবু ঙসিদি জিলা মশিং অসি 630 য়ৌরে। জিলা 70 অমসুং জিলা 630গী খেন্নবসি অমুক্তা য়েংবীয়ু। ইং 2014 ফাওবদা খুঙ্গংগী অপুনবা শোরোক্কী অশাংবসি কিলোমীতর লাখ 4দগী তানা শাংলম্মি। ঙসিদি, মশিং অসি য়াম্না হেনগত্তুনা কিলোমীতর 7.25 হেনখ্রে। শোরোক্কী অশাংবা হেনগৎলকপা মতমদা মসিনা করি কান্নবা পুরকই হায়বা অদোমসু অমুক্তা খন্থবীয়ু। মসিনা অপুনবা ইকোসীস্তেমগী মনুংদা থবক কয়া খোঙজেল য়াঙনা লৈহল্লকই।
মরুপশিং,
চপ মান্নবা থবক অসিমক ঐখোয়না এভিএসন সেক্তরদসু পাংথোকখি। লৈবাক্কী এয়রপোর্ত মশিংসু ইং 2014দা লৈরম্বা 74দগী ঙসিদি 148 য়ৌরে। এয়রপোর্ত অমা চলায়বদা স্তাফ কয়াগী মথৌ তাবগে হায়বসি অদোমসু খঙলবনি। অনৌবা এয়রপোর্ত মশিং কয়া লৈরকপা অসিনা লৈবাক অসিদা থবক্কী অনৌবা খুদোংচাবা কয়াসু লৈহল্লকই। এয়র ইন্দিয়ানা রেকোর্দ ওইবা মশিংগী প্লেন ওর্দর তৌবা অমসুং অতোপ্পা কম্পেনী খরসু মসিগা মান্নবা ওর্দর তৌনবা হোৎনবগী থৌওংসু অদোম্না খঙলম্লগনি। মসিনা হায়বদি, লাক্কদৌরিবা মতমশিংদা সেক্তর অসিদা কেতরিংদগী হৌরগা ইনফ্লাইত সর্ভিস, মেন্তেনেন্স, ওন গ্রাউন্দ হেন্দলিং ফাওবগী মশিং য়াম্লবা খুদোংচাবা কয়া লৈরক্কদৌরি হায়বনি। মসিগুম্বা চাউখৎ থৌরাং অসিমক ঐখোয়গী হিথাংফমগী সেক্তরদসু পাংথোক্লি। ঐখোয়গী সমুদ্র তোর্বান, হিথাংফম অসিদা লৈরক্লিবা চাউখৎ থৌরাং অসি হান্নগী মতমগা চাংদম্নরুবা মতমদা কার্গো শেন্নবগী থৌওংনা শরুক অনি হেনগৎলে অমসুং মতম চঙবগী চাংনা তংখায়দা হন্থরে। মসিগুম্বা চাউনা অহোংবা লাক্লিবা অসিনসু হিথাংফম সেক্তরদা থবক্কী অনৌবা খুদোংচাবা মশিং য়াম্না লৈহল্লে।
মরুপশিং,
লৈবাক্কী হকশেলগী সেক্তর অসিসু থবক পীবগী অফবা খুদম অমা ওইরিবনি। ইং 2014গী মমাংদা লৈবাক অসিদা মেদিকেল কোলেজ 400তগী হন্থনা লৈরম্মি, অদুবু ঙসিদি মেদিকেল কোলেজ 660 লৈরে। মান্নবা থৌওং ওইনা, অন্দর্গ্রেজুএত মেদিকেল সীত মশিংসু ইং 2014দা ওইরম্বা লিশিং 50দগী ঙসিদি লাখ 1 য়ৌরে অমসুং দাক্তর মশিং শরুক অনি হেনবনা ঙসিদি দাক্তরগী পরিক্ষা মায় পাক্লে। অয়ুশমান ভারত য়োজনাগী মরমদগী লৈবাক অসিদা অনৌবা হোস্পিতাল অমসুং ক্লিনিক হাংদোক্লি। মসিনা হায়বদি ইনফ্রাস্ত্রকচরগী প্রোজেক্ত খুদিংনা ইমপ্লোয়মেন্ত অমসুং সেল্স ইমপ্লোয়মেন্তকী চাং য়াম্না হেনগৎহল্লে হায়বনি।
মরুপশিং,
খুঙ্গংগী শেন্মিৎলোন চাউখৎহন্নবগীদমক্তা সরকারনা FPO কয়া শেম্লি, SHG কাঙলুপশিংগীদমক্তা লুপা করোর লাখ কয়াগী শেলগী তেংবাং পীরি, স্তোরেজ কেপাসিতী হেনগৎলি, মসিনা খুঙ্গংগী নহাশিংদা মখোয়গী খুঙ্গংমক্তদা থবক্কী খুদোংচাবা লৈহল্লি। ইং 2014গী মতুংদা কম্মন সর্ভিস সেন্তর লাখ 3 হেন্না শেমখ্রে অমসুং খুঙ্গংশিংদা ওপ্তিকেল ফাইবর কিলোমীতর লাখ 6 হেনবসু তিংখ্রে। ইং 2014গী মতুংদা সরকারনা লাইরবশিংগীদমক্তা য়ুম করোর 3 শাখ্রবনি অমসুং মসিগী মনুংদগী য়ুম করোর 2.5দি খুঙ্গংগী মফমশিংদা লৈরিবনি। মমাংগী চহিশিংদা অমাংশঙ করোর 10 হেন্না শাখ্রে, হেল্থ অমসুং ৱেলনেস সেন্তর লাখ 1.5 হেন্না শাখ্রে অমসুং পঞ্চায়ত ভবন লিশিং কয়াসু শাখ্রবনি। থবকশিং অসিন খুঙ্গংগী নহা লিশিং কয়াদা থবক পীখিবনি। মসিগা লোয়ননা লৌউ-শিংউগী সেক্তরদা মেকানাইজেসন তৌবগী থবকসু হান্নদগী হেন্না য়াম্না হেনগৎলে। মসিসু খুঙ্গংদা থবক পীবগী অনৌবা খুদোংচাবা অমা ওইরিবনি।
মরুপশিং,
ভারতনা ঙসি অপীকপা ইন্দস্ত্রীশিংবু লমজিং লমতাক্লিবা, ওন্তোপ্রিনর্শিপ খুমাং চাউশিনহল্লিবা অসিনসু থবক্কী খুদোংচাবা কয়া পীরি। প্রধান মন্ত্রী মুদ্রা য়োজনাসু হন্দক্তা চহি 8 মপুং ফাখ্রে। স্কিম অসিগী মখাদা লুপা করোর লাখ 23গী গেরেন্তী য়াওদবা লোন পীখি অমসুং মসিগী মনুংদা বেনিফিশরী 70% হেনবদি নুপীশিংনি। স্কিম অসিনা অনৌবা ওন্তোপ্রিনর করোর 8 শেমখি। মীওইশিং অসিনা মশাগী কারবারবু মুদ্র য়োজনাগী তেংবাংদগী অহানবা ওইনা হৌনখিবনি। মুদ্র য়োজনা মায় পাকপদগী লৈবাক অসিদা মশানা মশাবু থবক পীজবগী ইথিল অমা লৈহনখি, অনৌবা মাইকৈ তাকখি। ঐহাক্না ঐহাক্কী মরুপশিংদা ৱাফম অমা থম্বা পাম্মি। শেন্মিৎলোনবু গ্রাসরুত থাক্তা মপাঙ্গল হাপ্পদা মাইক্রো-ফাইনান্সকী থৌদাং য়াম্না চাওই। মাইক্রো ফাইনান্সনা কয়া য়াম্না চাউবা পাঙ্গল অমা ওইরক্লে হায়বসি ঐখোয়না মমাংগী চহি 8-9দা উবা ফংলে। মশাবু খ্বাইদগী চাউজরে খঞ্জবা, শেন্মিৎলোনগী পন্দিতনি হায়না মশানা খঞ্জবা অমসুং চাউনা কারবার তৌবা মীওইশিংদা ফোন্দগী অচৌবা লোন পীবা কাঙবুশিংনা মাইক্রো ফাইনান্সকী অশেংবা মপাঙ্গল করিনো খঙবা মমাংদা খঙলমদে। মখোয়শিং অসিনা ঙসিসু মাইক্রো ফাইনান্সপু করেম্নরি। মখোয়না লৈবাক্কী মীচম মীয়ামগী মপাঙ্গলবু খঙবা ঙমদ্রি।
মরুপশিং,
ঙসি অনৌবা থবক খনবগী চিথী ফংলিবশিংগী মফমদা ঐহাক্না করিগুম্বা অখন্নবা ৱাফম খরা থমজনিংই। অদোমগী মরক্তগী মীওই কয়া অমনা রেলৱে, এজুকেসনগা মরী লৈনরি। মীওই খরনা বেঙ্কতা সেবা তৌবগী খুদোংচাবা ফংনরি। মসিদি লৈবাক্কীদমক্তা ইশাগী থৌদাং পাংথোকপগী মতম্নি। লৈবাক অসিনা ইং 2047 ফাওবগী মনুংদা চাউখৎপা ভারত অমা ওইনবা চঙশিল্লিবা অসিদা লৈবাক্কী চাউখৎ থৌরাংদা মখোয়গী শরুক তম্বগী খুদোংচাবা অমনি। অদোমগী হৌজিক্কী চহি অসিদি মসিমক অমৃতকালগী তসেংবা ৱাহন্থোক্নি। ইশাগী পুন্সিগী মসিগুম্বা চহি 25 অসিদি খোঙজেল য়াঙনা তুংলমচত্তা চঙশিনবগী মতম্নি, মসিদা অদোমসু ইশাগী থৌদাং য়াগদৌরিবনি। কয়াদা য়াইফরবা মতমদা লৈবাক্কী সেবা তৌবগী খুদোংচাবা ফংলিবনো হায়বা অদোমসু অমুক্তা খন্থবীয়ু। লৈবাকপু চাউখৎহনবগী থৌদাং অমা ইশানা লৌরবনি। অদোমগী খোঙথাং খুদিং, মতম খুদিংনা লৈবাকপু চাউখৎহনবদা তেংবাংগদৌরিবনি।
ঙসিদি, অদোম্না সরকারগী থৌমী ওইবগী খোঙচৎ চৎপা হৌরে। অদোম্না খোঙচৎ অসিদা, অদোম্না মীচম মীয়াম অমা ওইরিঙৈদা মমাংগী চহি 5, মমাংগী চহি 10দা খঙলকখিবা, ফাওরকখিবা ফাওরম্বা ৱাখল্লোন খুদিংমক নিংশিংগদবনি। সরকারগী করম্বা মওং মতৌদা অদোম্না নুংঙাইতবা ফাওখিবগে নিংশিংগদবনি। করম্বা মওং মতৌদা অদোম্না নুংঙাইজখিবগে হায়বা খঙগদবনি। অদোমদা ফাওখিবা নুংঙাইতবশিং অসু লৈবাক্কী মীওই অমত্তা ফাহল্লোই খনগদবনি। অদোমদা নুংঙাইখিদবা অদু অতোপ্পা মীওই অমত্তগী মফমদা ফাওহল্লোইদবনি। হৌজিক্কী মতম অসিদি অতোপ্পা অপাম্বা ফংহনবা হায়বসিনা মখোয়গী থৌদাং ওইরবনি। অদোমগী থৌওং অমনা অতোপ্পা মীওই অমগী অফবসু ওইগনি, ইথিল পীগনি, নত্ত্রগনা অয়েৎপা অমসুং অকায়বসু পীগনি। মখোয়গী অৱাবা কয়াদা অদোম্না মতেং পাংগদবনি। মসিদগী হেন্না চাউবা মীওইবা অমা ওইবগী থবকপু করি লৈবগে? সরকারগী ফেসিলিতীশিংদা মখোয়না থাজবা লৈহনগদবনি।
ঐহাক্না অদোমদা চেকশিনৱা অমা হায়জনিংই। অদোম্না কন্না হোৎনদুনা ঙসিগী মায় পাকপা নুমিৎ অসি ফংলিবনি। অদুবু সরকারগী থবক ফংলবা মতুংদসু, তম্নিংবা, খঙনিংবগী ইথিল মাঙহনবীগনি হায়না ঐহাক্না অদোমগী মফমদা থমজনিংই। করিগুম্বা অনৌবা অমা খঙবা নত্ত্রগা তম্বা হায়বসি অদোমগী থবক অমসুং ইশাগী মীওইবা অমা ওইবগী মওং মতৌদা মমি তাগনি। অদোম্না iGoT কর্ময়োগী ওনলাইন লর্নিং প্লেতফোর্মদা য়াওদুনা মশাগী স্কিল অপগ্রেদ তৌজবা য়াই। ঐখোয়গী নুংদা য়াওরিবা মহৈরোই অমা ওইবগী ইথিল অদুবু কৈদৌনুংদা মাঙহনগনু হায়না ঐহাক্তি মতম পুম্বদা হায়দুনা লাক্লিবনি। ঐহাক্তি লোয়না খঙলবনি, তম্বা য়াবা তম্লবনি হায়বা ৱাখল্লোন অসিদি ঐহাক্কী নুংদা কৈদৌনুংদা চেল্লক্তে। ঐহাক্তি ইশাবু মতম পুম্বদা মহৈরোই অমনি খন্দুনা চৎলি। মতম পুম্বদা অনৌবা অমা তম্নবা হোৎনজৈ। ঐখোয়গী নুংগী মহৈরোই অদুবু ঐখোয়না হিংহন্দুনা থমগদবনি, অনৌবা অমা তম্নবা হোৎনদুনা লৈগদবনি। মদুনা পুন্সিদা অনৌবা খুদোংচাবগী থোঙ হাংগনি।
মরুপশিং,
বৈশাখীগী য়াইফরবা থৌরম, পুন্সিগী অনৌবা তাঙ্কক, মসিদগী হেন্না ফবা করি লৈরিবগে? অদোমগী য়াইফরবা তুংগী মতম অমগীদমক্তা ঐহাক্না পুম্নমক্কী মফমদা য়াইফ পাউজেল পীজরি। অমুক্কা হন্না থাগৎচরি।
