ঝারখন্দগী রাজ্যপাল শ্রী সন্তোস গঙ্গাৱার জি, ঐগী মন্ত্রীমন্দলগী মরুপশিং সিবারাজ সিংহ চৌহান জি, অন্নাপুরনা দেবী জি, সঞ্জয় সেথ জি এম.পি বিদ্যুত মহাতো জি, রাজ্য সরকারগী মিনিস্তর ইরফান অন্সারি জি, ঝারখন্দ বি.জে.পি প্রসিদেন্ত বাবুলাল মহারান্দি জি, ওল ঝারখন্দ স্তুদেন্তস য়ুনিয়নগী প্রসিদেন্ত সুদেস মহাতো জি, এম.এল.এশিং, অতোপ্পা শক্নাইরবশিং, ইনাওশিং অমসুং ইচলশিং।
ঐনা বাবা বাইদ্যানাথ অমসুং বাবা বাসুকিনাথকী খুয়াদা চঙজরি। ভাগবান বিরসা মুন্দাগী লমদম অসিদশু ঐনা কোক নোঞ্জরি। ঙসি অসি য়াম্না শেংলবা নুমিৎ অমনি। হৌজিক ঝারখন্দা মহৌশাগী অকোয়বগী ফিবম ইরাৎ থৌনিবগী থৌরম কর্মা পর্ব মপুংফানা পাংথোক্লি। ঙসি অয়ুক ঐ রাঞ্চি এয়রপোর্ততা থুংলবদা, নুপী অমনা কর্মা পর্বগী খুদম অমা খুদোল ওইনা পীদুনা ঐ তরাম্না ওকখি। কুহ্মৈ অসিদা নিঙোলশিংনা মখোয়গী মবুং-মৌপাশিং নুংঙাই-য়াইফনা হিংনবা থৌনিজরি। কর্মা পর্ব অসিদা ঐনা ঝারখন্দগী মীয়ামদা য়াইফ-পাউজেল পীজরি। চাউখৎ-থৌরাংগী অনৌবা থৌজাল অমা ফংদুনা ঙসি ঝারখন্দগী শেংলবা নুমিৎ অমনি। অনৌবা বন্দে ভারত ত্রেন ৬ চেনবা হৌরে, লুপা করোর ৬৫০ হেনবগী প্রোজকশিং হৌদোক্লে, ঝারখন্দগী মীওই লিশিং কয়া পি.এম-অৱাস য়োজনাগী মখাদা মখোয় মশাগী য়ুমশিং লৈরে… হায়রিবা চাউখৎ-থৌরাংগী থবকশিং অসিগীদমক ঝারখন্দগী মীয়ামদা নুংঙাইবা ফোঙদোকচরি। বন্দে ভারত ত্রেনশিং অসি ফাওদুনা চেল্লিবা রাজ্যশিংগী মফমদশু ঐনা হরাওবা ফোঙদোকচরি।
মরুপশিং,
অনৌবা খুদোংচাবশিং, অনৌবা চাউখৎ-থৌরাংগী থবকশিং শুপ্নগী লৈবাক অসিগী সহর খর খক্তা পায়খৎপা মতম অমা লৈরমখি। অনৌবা খুদোংচাবশিং অমসুং অনৌবা চাউখৎ-থৌরাংগী মতাংদা ঝারখন্দগুম্বা রাজ্যশিং মনিংদা লৈহৌখি। অদুবু, সবকা সাথ, সবকা বিকাস লাইৱা অসিনা লৈবাক অসিগী ৱাখল্লোন অমসুং মরুওইবশিংগী মতাংদা অহোংবা পুরক্লে। হৌজিক লৈবাক অসিনা মরুওইনা লৌরিবা অসি লৈবাক অসিগী লায়রবশিংনি। হৌজিক লৈবাক অসিনা মরুওইনা লৌরিবা অসি লৈবাক অসিগী ত্রাইবেলশিংনি। হৌজিক লৈবাক অসিনা মরুওইনা লৌরিবা অসি দলিত, তোল্লবশিং অমসুং শোৎথরবা কাংলুপনি। হৌজিক লৈবাক অসিনা মরুওইনা লৌরিবা অসি নুপীশিং, নহারোলশিং, লৌমীশিংনি। মরম অদুনা, ঙসি অতোপ্পা রাজ্যশিংগুম, ঝারখন্দনা বন্দে ভারতগুম্বা অৱাংবা তেক্নোলোজিগী ত্রেনশিং অমসুং অনৌবা ইনফ্রাস্ত্রকচর লৈরে।
মরুপশিং,
ঙসিদি, রাজ্য খুদিংমক, সহর খুদিংমক য়াংনা চাউখৎনবা বন্দে ভারতগুম্বা অয়াংবা ত্রেনশিং পাম্নরে। নুমিৎ খরনিগী মমাঙদা ঐনা অৱাং অমসুং খা থংবা রাজ্যশিংগী অনৌবা বন্দে ভারত ত্রেন ৩ লমথাখ্রে। ঙসি, ওরিসাদা তাতানগর-ব্রাহ্মাপুর, রৌরকেলা-তাতানগর-হাওরা, ভাগলপুর-দুমকা-হাওরা, দিওগর-বরানাসী-গয়া, গয়া-কোদেরমা-পরাসনাথ-ধনবাদ-হাওরা বন্দে ভারত ত্রেনশিং থবক হৌরে। ঐনা হায়রিবা বন্দে ভারত ত্রেনশিংদা খুৎ হাইখিবা অমসুং মখোয়গী পন্থুংফমগীদমক চেনবা হৌখিবা মতম অদুদা, য়ুম য়েন্থোকপগী থৌরম ফম্বাক্তা পাংথোক্লি। নোংপোক ভারত্তা রেলগী চৎথোক-চৎশিন হেনগৎহনবা অসিনা লমদম অসি শীনবা থুংনা শেন-থুমগী ফিবম ফগৎহনগনি। ললোনবশিং, মহৈরোয়শিং হায়রিবা ত্রেনশিং অসিদগী কান্নবা য়াম্না ফংগনি। মসি মফম অসিগী শেন-থুম অমসুং নাতকী থবকশিংশু খোঙজেল য়াংখৎহনগনি। অদোম্না খঙলিবা অদুনি, ঙসি লৈবাক অসিগী মশিং য়াম্লবা ভক্ত কয়া কাসিদা চৎলি। কাসিদগী দিওগর ফাওবা বন্দে ভারত ত্রেনশিং চেনবদগী মশিং য়াম্লবা মীয়াম বাবা বিশ্বানাথকী লাইফমদা চৎপা ফংলগনি। মসিনা মফম অসিগী তুরিজমশু চাউখৎহনগনি। তাতানগর অসি লৈবাক অসিগী অচৌবা উদ্যোগকী মফম অমনি। অফবা চৎথোক-চৎশিনগী খুদোংবা অসিনা মখা তানা মফম অসিগী উদ্যোগ চাউখৎহনগনি। তুরিজম অমসুং উদ্যোগ চাউখৎলকপা অসিনা ঝারখন্দগী নহারোলশিংদা থবক ফংনবা খুদোংচাবা কয়া পীরগনি।
মরুপশিং,
য়াংনা চাউখৎনবগীদমক অনৌবা মতমগী রেল ইনফ্রাস্ত্রকচর দরকার ওই। মরম অদুনা ঙসি মফম অসিদা অনৌবা প্রোজক কয়া হৌদোক্লিবনি। মধুপুর বাইপাস লাইনগী উরেপ-উয়ুং তম্লে। মসি লোইরবা মতুংদা, হাওরা-দিল্লি মেন লাইন্দা ত্রেনশিং লেপ্পগী দরকার ওইদ্রে। বাইপাস লাইন থবক হৌরকপা মতমদা গিরিদিহ অমসুং জাসিদিহগী মরক্তা চৎথোক-চৎশিনগী মতম হন্থহনগনি। ঙসি হাজারিবাগ তাউন কোচিং দিপোশু উরেপ-উয়ুং তম্লে। মসিনা অনৌবা ত্রেন সর্বিস কয়া হৌদোকপদা খুদোংচাবা পীগনি। কুরকুরাদগী কনারাউন ফাওবগী রেলৱে লাইন দবল ওইহন্দুনা ঝারখন্দা মখা তানা রেলগী খুদোংচাবা হেনগৎহল্লে। সেক্সন অসিদা লাইন অনি ওনখৎপগী থবক লোইশিল্লকপগা লোয়ননা, স্তিল উদ্যোগকা মরী লৈনবা পোৎ-চৈশিং পুথোক-পুশিন তৌবা হেন্না লাইহল্লগনি।
মরুপশিং,
ঝারখন্দ চাউখৎনবগীদমক, কেন্দ্র সরকারনা রাজ্য অসিদা শেন থাদবশু হেনগৎলে অমসুং থবক্কী খোঙজেলশু য়াংখৎহল্লে। চহি অসিগী বজেত্তা, ঝারখন্দগী রেল ইনফ্রাস্ত্রকচর চাউখৎহন্নবা লুপা করোর লিশিং ৭ হেনবগী শেনফম অমা কাইথোক্লে। করিগুম্বা ঐখোয়না মসিগী বজেত অসি হৌখিবা চহি ১০গী মমাঙগা চাংদম্নবদা, মসি শরুক ১৬ হেল্লবনি। রেলৱে বজেত হেনগৎলকপগী কান্নবা অদোম্না উরে, ঙসিদি অনৌবা রেল লাইনশিং শেমগৎপগী থবক শরুক অনি হেনগৎলে অমসুং রাজ্য অসিদা স্তেসনশিংদা অনৌবা খুদোংচাবশিং য়াংনা হেনগৎলে। ঙসিদি ঝারখন্দশু রেলৱে নেতৱার্কতা চাদা ১০০ ইলেক্ত্রিক ফংহল্লবা রাজ্যশিংগী মরক্তা য়াওরে। অমৃত ভারত স্তেসন স্কিমগী মখাদা ঝারখন্দগী রেলৱে স্তেসন ৫০ নৌনা শেমজিনবগী থবক পায়খৎলে।
মরুপশিং,
ঙসি ঝারখন্দগী বেনিফিসরিশিং লিশিং কয়াদা অহানবা তাঙ্কক্কী ওইনা পাক্কাগী য়ুম লিশিং কয়া ফংহনবা হৌরে। প্রধান মন্ত্রী অৱাস য়োজনাগী মখাদা মীওই লিশিং কয়াদা পাক্কাগী য়ুমশিং ফংহল্লে। হায়রিবা য়ুমশিং অসিগা লোয়ননা, মখোয়দা তোইলেত, ঈশিং, মৈ অমসুং গ্যাস কন্নেক্সন ফংহল্লে। ঐখোয়না নিংশিংগদবদি… ইমুং অমনা মখোয়গী য়ুম ফংবা মতমদা মখোয়গী ইকায়খুম্নবা হেনগৎলকই… মখোয়গী হৌজিক্কী ফিবম ফগৎলকপগা লোয়ননা মখোয়গী অফবা তুংলমচৎ অমগীদমক মখোয়না ৱাখল খনবা হৌরকই। করিগুম্বা অৱাবা অমা মায়োক্নরবশি, মহাক্কী য়ুম অমা লৈরে হায়না মহাক্না খল্লি। মসিনা ঝারখন্দগী মীয়ামদা য়ুম ফংহনবা খক নত্তনা, পি.এম অৱাস য়োজনানা খুঙ্গংশিং অমসুং সহরশিংদা মশিং য়াম্লবা থবকশিং ফংহল্লে।
মরুপশিং,
২০১৪ দগী হৌনা, লৈবাক অসিগী লায়রবশিং, দলিত, তোল্লবশিং অমসুং ত্রাইবেল ইমুংশিংগী ফিবম ফগৎনবা মরুওইবা থবক কয়া পায়খৎতুনা লাক্লি। ঝারখন্দ য়াওনা লৈবাক অসিগী ত্রাইবেল ইনাওশিং অমসুং ইচলশিংগীদমক পি.এম জনমন য়োজনা পায়খৎলে। স্কিম অসিগী মখাদা খ্বাইদগী য়াম্না চাউখৎত্রিবা ত্রাইবশিং য়ৌনবা থবকশিং পায়খৎলে। মখোয়গী য়ুমশিং, লম্বীশিং, ইলেক্ত্রিসিতি অমসুং ঈশিং অমসুং থক্নবা ঈশিং ফংহন্নবা ওফিসিএলশিংনা থবক পায়খৎলে। মসিগী থবক অসি চাউখৎলবা ঝারখন্দ অমগী ঐখোয়গী ৱাশকশিংগী শরুক অমনি। অদোমগী থৌজালশিংগা লোয়ননা, হায়রিবা ৱাশকশিং অসি থবক ওইনা শোইদনা পাংথোক্কনি অমসুং ঐখোয়না ঝারখন্দগী মঙলানশিং মঙফাওনবা ঙমগনি হায়না ঐনা থাজৈ। থৌরম অসিগী মতুংদা, ঐ অতোপ্পা মীয়ামগী অচৌবা মীতিন অমা শরুক য়াগনি। ঐ মফম অদুদা মিনিত ৫-১০গী মনুংদা য়ৌরগনি। মফম অদুদা য়াম্লবা মীয়াম্না ঐ ঙাইদুনা লৈরে। মফম অদুদা ঝারখন্দগা মরী লৈনবা অতোপ্পা হিরমশিং ঐনা কুপ্না ৱা ঙাংগনি। ঐনা রাঞ্চিদা থুংলবগা, নোং-চিংগী ফিবম ফত্তবদগী মফম অসিদগী ঐগী হেলিকোপ্তর পাইখৎপা ঙমদবগীদমক ঝারখন্দগী মীয়াম্না ঙাকপীনবা ঐনা হায়জরি। উরেপ-উয়ুং তম্নবা অমসুং শঙ্গানবা ঐ মফম অদুদা য়ৌবা ঙমদবদগী ঙসিগী থৌরম অসি ভিদিও কনফরেন্সকী খুৎথাংদা পাংথোক্লে। মীয়ামগী মীতিন অসিসু ঐনা ভিদিও কনফরেন্স অমগী খুৎথাংদা ৱা ঙাংলগনি। মফম অসিদা লাকপগীদমক ঐনা অমুক হন্না মীয়াম পুম্নমক থাগৎপা ফোঙদোকচরি।
খুরুমজরি।
