শ্রী সাদগুরু চারন কমলোব্যো নহমা !
উত্তর প্রদেসকী ইকায়খুম্নরবা চীফ মিনিস্তর য়োগী অদিত্যনাথ জি, কেন্দ্রগী মন্ত্রীমন্দলগী ঐগী মরুপ, মহেন্দ্র নাথ পান্দে জি, উত্তর প্রদেস সরকারগী মিনিস্তর অনিল জি, সাদগুরু অচার্য়্যা পুজ্যা শ্রী শ্বাতন্ত্র দেব জি মহারাজ, পুজ্যা শ্রী বিগ্যান দেব জি মহারাজ, অতোপ্পা শক্নাইরবা মীওইশিং, লৈবাক্কী মফম কয়াগী লাক্লিবা ভাক্তশিং অমসুং ঐগী
ইমুং-মনুংগী মীওইশিং !
ঙসি অসি ঐনা কাসিদা লৈবগী নিনি চনবা নুমিৎনি। মতম পুম্নমক্তা, কাসিদা লৈবা অসি অখন্নবা অমনি অমসুং অঙকপা নুংঙাইবা কয়ানা থনখি। চহি অনিগী মমাংদা ওল ইন্দিয়া বিহাঙ্গম য়োগ ইন্সতিতুৎকী চহিগী থৌরমদা ঐখোয় পুনখিবা অদু অদোম নিংশিংলমগনি। বিহাঙ্গম য়োগ সান্ত সমাজগী চহি ১০০ মপুংফারকপগী পুৱারি ওইরবা থৌরম শরুক য়াবগী খুদোংচাবা ঐ অমুক হন্না ফংলে। বিহাঙ্গম য়োগ শান্নবা অসি চহি ১০০ মপুংফারে। হৌখিবা চহিচাদা মহারসি সাদাফাল দেব জিনা লৌশিং অমসুং য়োগগী মৈরা চুখৎখি। হায়রিবা চহি ১০০ অসিদা, ঈশ্বরগী ওইবা মঙাল অসিনা মালেম শীনবা থুংনা মীওই মিল্লিয়ন কয়াগী পুন্সিদা অওনবা পুরকখি। শেংলবা থৌরম অসিদা, কুন্দিয়া শ্বর্বেদ গ্যান মহাযজ্ঞ ২৫,০০০গী অচৌবা থৌরম অমসু পাংথোক্লে। মসিগী মহাযজ্ঞ অসিদা কৎলিবা খুদিংমক্না ‘বিকসিত ভারত’ অমগী ৱাশক মপাঙ্গল কনখৎহনগনি হায়না ঐনা থাজৈ। থৌরম অসিদা, ঐনা মহারসি সাদাফাল দেব জিগী মফমদা চঙজরি অমসুং মপুংফাবা থাজবগা লোয়ননা মহাক্কী মফমদা থম্মোয় শেংনা কৎথোকচরি। মসিগী গুরুগী চৎনবী অসি লেপ্তনা চাউখৎহল্লিবা সাধুশিং ঐনা কোক নোঞ্জরি।
ঐগী ইমুং-মনুংগী মীওইশিং, সাধুশিংগা লৈমিন্নরিবা কাসিগী মীয়াম চাউখৎ-থৌরাং অমসুং অমুক হন্না শেমগৎ-শাগৎপগী লমদা অনৌবা মাইপাকপা কয়া ফংবা ঙম্লে। কাসি অওনবা পুরক্নবগীদমক সরকার, খুন্নাই অমসুং সাধুশিং পুন্না থবক তৌমিন্নরি। ঙসি শ্বার্বেদ মন্দির লোইশিনবা অসি ঈশ্বরগী ওইবা ইনোৎ পীবগী খুদম অমনি। অচৌবা লাইশঙ অসি মহারসি সাদাফাল দেব জিগী পাউতাকশিং অমসুং লমজিংবগী খুদম অমনি। লাইশঙ অসিগী অশেংবা শক্তম অমসুং চিংলেম্বা অসি অঙকপনি। লাইশঙ অসি য়েংবা মতমদা, মসিগী ফজবদা ঐ ইশামক ঙকখি। শ্বার্বেদ মন্দির অসি ভারতকী খুন্নাই অমসুং অধ্যতিক্কী শক্তিগী অনৌবা মতমগী খুদম্নি। বেদা, উপনিষদশিং, রমায়ন, গীতা অমসুং মহাভারতগুম্বা অরিবা লাইরিকশিংদগী ঈশ্বরগী ওইবা পাউজলশিং লাইশঙ অসিগী ফক্লাংশিংদা হকপা ঐ উরে।
মরম অদুনা লাইশঙ অসি অধ্যতিক, পুৱারি অমসুং নাৎকী অহিংবা খুদম অমনি। মীওই লিশিং কয়া মফম অসিদা পুন্না বিহাঙ্গম য়োগা শান্নবা য়াগনি। মরম অদুনা, মসিগী অচৌবা লাইশঙ অসি য়োগগী লাইফম অমা ওইবতা নত্তনা লৌশিংগী লাইফম অমসুনি। মসিগী অঙকপা অধ্যতিক্কী ওইবা শেমগৎ-শাগৎপা অসিগীদমক ঐনা শ্বার্বেদ মহামন্দির ত্রস্ত থাগৎপা ফোঙদোকচরি অমসুং ভক্তা মিল্লিয়ন কয়া ঐনা থাগৎপা ফোঙদোকচরি। থবক অসি মাইপাক্না লোইশিনবগীদমক ঐনা পুজ্যা শ্বামী শ্রী শ্বাতন্ত্রা দেব জি অমসুং পুজ্যা শ্রী বিগ্যান দেব জি অখন্ননা থাগৎপা ফোঙদোকচরি।
ঐগী ইমুং-মনুংগী মীওইশিং,
ভারত অসি চহিচা কয়া শেন-থুমগী নুংঙাই-য়াইফবা অমসুং চাউখৎপগী খুদম ওইদুনা লাকপা লৈবাক অমনি। ঐখোয়না চাউখৎপগী থাক অমা লেপখি অমসুং নুংঙাই-য়াইফবগী তাঙ্ককশিং য়ৌখি। চাউখৎপা অসি লম পাকথোক-চাউথোকনবা অমসুং মীওৎ-মীনৈ পাংথোক্নবা পাম্বৈ অমনি হায়বা ভারতনা কৈদৌঙৈদা য়াখিদে। ফিজিকেল ওইনা চাউখৎনবগীদমক ঐখোয়না অধ্যতিক অমসুং মীওইবগী খুদমশিংসু শেমখি। কাসিগুম্বা ফজরবা নাৎকী মফমশিংগী থৌজাল ঐখোয়না ফংখি অমসুং কোর্নাকগুম্বা লাইশঙশিং শাখি। ঐখোয়না সর্নাথ অমসুং গয়াদা ইসতুপাশিং শাখি। লৈবাক অসিদা নলান্দা অমসুং তক্সিলাগুম্বা য়ুনিভর্সিতিশিং লিংখৎখি।
মরম অদুনা, ভারতকী অধ্যতিক্কী শেমগৎ-শাগৎলিবশিংগী অকোয়বদা ঐখোয়গী কলা অমসুং নাৎ অৱাংবা থাকশিং য়ৌখি। মফম অদুদা, লৌশিং অমসুং থিজিনবগী অনৌবা লম্বীশিং শেমখি, থবকশিং অমসুং উদোগশিংগা মরী লৈনবা মপান নাইদ্রবা ওইথোকপা য়াবা কয়া পোকখি। লাইনিংগা লোয়ননা য়োগাগুম্বা সাইন্স চাউখৎখি অমসুং মফম অসিগী মীওইবগী গুনশিং লেপ্পা লৈতনা মালেমগী মফমশিংদা শন্দোকখি।
ইনাওশিং অমসুং ইচলশিং,
মীনাই ওইরিঙৈ মতমদা, ঐখোয়গী মথক্তা পানখিবশিংনা ঐখোয়গী খুদমশিং অসি অহানবা ওইনা খুৎথাদুনা ভারত মপাঙ্গল শোন্থনবা হোৎনখি। নিংতম্বা ফংলবা মতুংদা হায়রিবা নাৎকী খুদমশিং অসি অমুক হন্না শেমগৎপা দরকার ওইখি। করিগুম্বা ঐখোয়না ঐখোয়গী নাৎকী শক্তম ইকায়খুম্নরবদি, লৈবাক মনুংদা অপুনবগী ৱাখল্লোন অমা অমসুং মশানা মশাবু ইকায়খুম্নবা উৎপা মপাঙ্গল কনখৎহনগনি। লাইবক থিবদি, মসি ওইথোকখিদে। নিংতম্বা মতুংদা সোমনাথ লাইশঙ অমুক হন্না শেমজিনবা ফাওবা অথিংবা পীখি। মসিগী ৱাখল্লোন অসি চহি কয়া লৈবাক অসিদা লৈখি। মদুগী ফল ওইনা, লৈবাক অসি মীরক-মীচিনথিগী কোমদা তাখি, লৈবাক অসিগী হেরিতেচগী চাউথোকচবা পোকপা কাউখি।
অদুবু ইনাওশিং অমসুং ইচলশিং, নিংতম্বা চহি ৭০গী মতুংদা মতমগী চকা অমুক হন্না লৈরকখি। হৌজিক লৈবাক অসি ‘মীনাই ওইবগী ৱাখল্লোন’দগী নিংতম্লে অমসুং ‘লৈবাক অসিগী হেরিতেচগী চাউথোকচরে’ হায়না লাল কিলাদগী লাউথোক্লে। সোমনাথতা হৌখিবা অদু হৌজিক ইহৌ অমা ওইরক্লে। ঙসিদি, কাসিদা বিশ্বনাথ ধামগী চিংলেম্বা অদু ভারতকী নুঙগী ফজবগী যুগকী ৱারি ওইরে। ঙসিদি, মহাকাল মহালোকনা ঐখোয়গী শিবা নাইদবগী খুদম ওইরি। ঙসিদি কেদরনাথ ধামসু চাউখৎপগী অনৌবা থাকশিং য়ৌরে। বুদ্ধ সর্কুইত চাউখৎহন্দুনা, ভারতনা মালেম অসি বুদ্ধনা মঙাল ফংখিবদা লমদমদা অমুক হন্না কৌরি। লৈবাক অসিদা য়াংনা রাম সর্কুইতসু শেমগৎলি। লাক্লিবা চয়োল খরগী মনুংদা, অয়োধ্যাদা রাম মন্দির শাবসু লোইশিল্লগনি।
মরুপশিং,
লৈবাক অসিনা মসিগী খুন্নাইগী অচুম্বশিং অমসুং নাৎকী শক্তমশিং পুনশিনবা মতমদা ঐখোয় অপুনবা চাউখৎপগী মাইকৈদা চঙশিনবা ঙমগনি। মরম অদুনা ঙসি, ঐখোয়গী লাইফমশিং শেমগৎলি অমসুং অনৌবা মতমগী ইনফ্রাস্ত্রকচরদা ভারত অনৌবা রেকোর্দশিং থম্লে। লৈবাক অসিদা চাউখৎপগী খোঙজেল করিনো হায়বা বরানস মথন্থদগী উবা ফংগনি। চয়োল অনিগী মমাঙদা, কাসি বিশ্বনাথ ধাম শাগৎপা চহি অনি মপুংফারে। মতম অদুদগী বরানস থবক ফংবা অমসুং ললোন-ইতিক্কী অনৌবা চাউখৎলকপা অমা উবা ফংখি। হান্নদি, এয়রপোর্ত য়ৌবা মতমদা কমদৌনা সহর য়ৌবা ঙমগনি হায়বগী অৱাবা ওইখি। মফম খুদিং ফত্তবা লম্বীশিং, কাংখোং-চাইবা অসিনা বরানসকী শক্তম ওইখি। হৌজিক বরানস হায়বদি চাউখৎপা হায়বনি। হৌজিক অরিবা চৎনবীগা লোয়ননা বরানস হায়বদি অনৌবা খুদোংচাবশিং হায়বনি। হৌজিক বরানস হায়বদি লু-নানবা অমসুং অহোংবা পুরকপা হায়বনি।
ঙসি বরানস চাউখৎপগী অঙকপা লম্বীদা চঙশিল্লি। হৌখিবা চহি ৯দা বরানসীদা পুৱারি ওইনা লম্বী-থোংগী ফিবম ফগৎলে। বরানসী য়ৌবা লম্বীশিং পাকথোক্লে নত্ত্রগা লেন মরি নত্ত্রগা লেন তরুক ওইরে। অনৌবা রিং রোদ অমা শেমগৎলে। বরানসীদা অনৌবা লম্বীশিংগী নেতৱার্ক শেমগৎলে অমসুং অরিবা অমসুং অনৌবা অনিমক শেমগৎলি। বরানসীদা রেলৱে স্তেসনশিং শেমগৎলে, বরানসতগী অনৌবা ত্রেনশিং চেনবা হৌরে, দেদিকেতেদ ফ্রেদ কোরিদোরশিংগী থবক পায়খৎলি, এয়রপোর্তকী খুদোংচাবশিং হেনগৎহল্লে, গঙ্গাগী ঘাতশিং নৌনা শেমজিল্লে, গঙ্গাদা ক্রুইজশিং হোল্লে, বরানসতা অনৌবা হোস্পিতালশিং শেমগৎলে, অনৌবা অমসুং মতমগা চুনবা দাইরি লিংখৎলে। গঙ্গা মপান পরিংদা মহৌশাগী ওইবা লৌউ মখল পাংথোক্নবা লৌমীশিংদা মতেং পীরে। বরানসকী নহারোলশিং স্কিল হেনগৎহন্নবা মফম অসিদা ত্রেনিং ইন্সতিতুৎশিং লিংখৎলে। সংসদ রোজগার মেলাগী খুৎথাদা নহারোল লিশিং কয়া থবক ফংলে।
ইনাওশিং অমসুং ইচলশিং,
ঐখোয়গী অধ্যতিক্কী খোঙচৎশিংদা ইনফ্রাস্ত্রকচর ৱাৎপনা অচৌবা শিংনবা ওইবা মরম্না মতমগী অনৌবা ইনফ্রাস্ত্রকচর শেমগৎপা হায়বসি তঙাইফদে। খুদম ওইনা, বরানসতা লাই খুরুম্বা লাকপা মীওইশিং সহরগী ৱাংমদা লৈরিবা শ্বার্বেদ মন্দির য়েংবা পামগনি। অদুবু করিগুম্বা লম্বীশিং ঙসিগী ফিবম অসিগুম্বা ওইরমদ্রবদি, চৎনিংলবসু মখোয়গী অনিংবা অদু ফংবা ঙমলোই। অদুবু হৌজিক, শ্বার্বেদ মন্দির অসি বরানসতা লাকপা মীওইশিংগী মরুওইবা মফম অমা ওইরগনি। মসিনা অকোয়বগী খুঙ্গংশিংদা ললোন-ইতিক অমসুং থবক ফংবগী খুদোংচাবশিং পীরগনি।
ঐগী ইমুং-মনুংগী মীওইশিং,
ঐখোয়গী অধ্যতিক্কী য়াইফনবা কৎথোক্লবা বিহাঙ্গম য়োগ ইন্সতিতুৎ অসি খুন্নাইগী থবক তৌবদসু থৱায় য়াওনা শরুক য়ারি। মসি সাদাফাল দেব জিগুম্বা সাধুশিংগী চৎনবীনি। কৎথোক্লবা য়োগী অমা ওইনা, নিংতম ইহৌ মনুংদা সাদাফাল দেব জি নিংতম লান্মী অমসু ওইখি। ঙসিদি, নিংতম্বগী অমৃত কাল অসিদা মহাক্কী ৱাশকশিং থবক ওইনা পাংথোকপা হায়বসি ভক্ত খুদিংমক্কী থৌদাংনি। মমাঙদা ঐনা অদোমগী মরক্তা তিনবা মতমদা, লৈবাক অসিদগী ঐখোয়না থাজবা থম্লিবা খর ঐনা ফোঙদোকখি। ঙসি অমুক হন্না, ঐনা অদোমগী মমাঙদা ৱারেপ ৯ থম্লি। মখোয় অদুদি:
অহানবা- ঈশিং মরিক অমা ফাওবা য়োকশিনবা অমসুং ঈশিং তুংশিনবগী মরমদা ভাব তাবা হেনগৎহনবা।
অনিশুবা- খুঙ্গংদা চৎপা, দিজিতেল ত্রান্সসেক্সনশিংগী মতাংদা মীয়াম খঙহনবা অমসুং মখোয়দা ওনলাইন পেমেন্তশিংগী মতাংদা তম্বীবা।
অহুমশুবা- অদোমগী খুঙ্গং, অদোমগী লৈকায় অমসুং অদোমগী সহর লু-নানবদা মকোক তানবা থবক তৌবা।
মরিশুবা- ঙম্লিবমখৈ লমদম অসিগী পোৎথোকশিং য়োকখৎপা অমসুং ভারত্তা শাবা পোৎথোকশিং শীজিন্নবা।
মঙাশুবা- ঙম্লিবমখৈ অদোমগী লৈবাক হান্না কোয়বা অমসুং অদোমগী লৈবাক মনুংদা কোয়বা অমসুং করিগুম্বা অদোম্না মপান্দা চৎপা পাম্লবদি, অদোম্না লৈবাক অসি শীনবা থুংনা কোয়দ্রি ফাওবা মদু খল্লোইদবনি। করিগীদমক ইনাকখুনবা মীওইশিং মপান লৈবাকশিংদা লুহোংলিবনো? ঐনা হায়রি ‘ভারত্তা লুহোংউ; ‘ৱেদ ইন ইন্দিয়া’।
তরুকশুবা- লৌমীশিং ওর্গনিক লৌউ মখলগী মরমদা খঙহনগদবনি। মসি মালেম ইমা কন্নবা য়াম্না মরুওইবা খোঙজং অমনি।
তরেৎশুবা- অদোমগী নুমিৎ খুদিংগী অচা-অথকশিংদা মিল্লেতশিং অমসুং শ্রী অন্ন য়াওহল্লু। মসি য়োকখৎলু অমসুং মসি অফবা চীঞ্জাক অমনি।
নিপালশুবা- হকচাং ফনা লৈয়ু, য়োগা অমসুং শান্নবা অদোমগী পুন্সিগী থাদোক্নবা য়াদ্রবা শরুক অমা ওইহল্লু।
মপানশুবা- য়ামদ্রবা লায়রবা ইমুং অমা শৌগৎলু, মখোয়গী মতেং পাংউ। মসি ভারত্তা লায়রবা মুৎথৎনবা দরকার ওই।
নুমিৎ খরনি অসিদা অদোম্না বিকসিত ভারত সংকল্প যাত্রা উরে। ঙরাং নুমিদাংৱাইরম থৌরম অমদা ঐ মসি শরুক য়াখি। ঙাইহাক্কী মতুংদা, ঐ অমুক হন্না বিকসিত ভারত সংকল্প যাত্রাগী শরুক অমা ওইরগনি। মীওই খুদিংমক্না যাত্রা অসিগী মরমদা খঙহনগদবনি। মীওই খদিংমক বিকসিত ভারত সংকল্প যাত্রাগী মতাংদা মশাগী ওইবা ৱারেপ অমা লৌনবা ঐনা হায়জরি। ঐনা ময়াম পুম্নমক থাগৎপা ফোঙদোকচরি অমসুং ঐঙোন্দা ইকায়খুম্নবা উৎপীবগীদমক ঐনা শেংলবা সাধুশিং থাগৎচরি। ঐখোয় পুন্না লাউমিন্নসি-
ভারত মাতা কি জয়- জয়!
ভারত মাতা কি জয়- জয়!
ভারত মাতা কি জয়- জয়!
অদোম থাগৎচরি।
