খুরুমজরি।
মহারাস্ত্রগী রাজ্যপাল, সি.পি. রাধাকৃষ্ণনজী, মহারাস্ত্রগী পাম্নরবা মুখ্য মন্ত্রী শ্রী একনাথ শিন্দেজী, উপ মুখ্য মন্ত্রী দেবেন্দ্র ফদনবীসজী, অজিত পৱারজী, পুনেগী এম.পি. অমসুং কাউন্সিল ওফ মিনিস্তরদা ঐগী মরুপ ওইরিবা, ইনাও মুরালীধর, ভিদিও কনফরেন্সকী থোংদা শম্নহল্লিবা অতৈ কেন্দ্রগী মন্ত্রীশিং, মহারাস্ত্রগী মকোক থোংবা মন্ত্রী পুম্নমক ঐগী মাংদা লৈবা উবা ফংলি, এম.পি.শিং. এম.এল.এ.শিং অমসুং থৌরম অসিদা য়াওরিবা ইচিল-ইনাও পুম্নমক!
पुण्यातील माझ्या सर्व लाडक्या बहिणींना
आणि लाडक्या भावांना माझा नमस्कार।
নুমিৎ নিনিগী মমাংদা, ঐহাক্না অচৌবা প্রোজেক্ত কয়া শঙ্গাবা অমসুং উরেপ উয়ুং তম্নবগীদমক পুনেদা লাকখি। অদুবু, অকনবা নোংনা মরম্না, প্রোগ্রাম অদু কেন্সেল তৌখি। পুনেগী মফম খুদিংমক্তা লৈবাক্কী পুক্নিং থৌগৎপা, পুনেগী মফম খুদিংমক্তা খুন্নাইগী ইকাইখুম্নবা লৈবনা ঐহাক য়াম্না কান্নবা ফাওই। অসিগুম্বা পুনেদা লাকপা অসিমক শক্তি ফংই। মরম অদুনা, ঙসি পুনেদা ঐহাক লাকপা ঙমদ্রিবা অসি ঐহাক্কী ওইনা য়াম্না চাউবা মাংজবা অমনি। অদুবু হৌজিক্তি, তেক্নোলোজীগী খুত্থাংদা, ঐহাক্না নখোয় পুম্নমক্কা উনবগী খুদোংচাবা ফংলে। ঙসি, পুনেগী লম... ভারতকী শক্নাইরবা মীওইশিংগী ইথিলগী লম অসি, মহারাস্ত্রগী চাউখৎ-থৌরাংগী অনৌবা চেপ্তর অমা উবা ফংলি। দিস্ত্রিক্ত কোর্ত্তগী স্বারগেৎ ফাওবগী রুতকী সেক্সন অদু হৌদোকখ্রে। হৌজিক্তি মসিগী লম্বী অসিদাসু মেত্রো চৎপা হৌরগনি। স্বারগেৎ-কাত্রাজ সেক্সনগীসু ঙসি উরেপ উয়ুং তমখ্রে। ঙসি, ঐখোয়গী শক্নাইরবা ক্রান্তিজোতি সাবিত্রিবাই ফুলে মেমোরিএলগীসু উরেপ উয়ুং তমখ্রে। পুনে সহরদা ইজ ওফ লিভিং হেনগৎহন্নবা ঐখোয়গী মঙলান অদুগী মায়কৈদা ঐখোয়না খোঙজেল য়াংনা চংশিল্লিবা অসিদা ঐহাক নুংঙাইবা ফাওই।
ইচিল-ইনাওশিং,
ঙসি, ভগৱানন ভিথলগী মঙালগা লোয়ননা মহাক্কী ভক্তশিংনা নুংশিবগী খুদোলসু ফংলে। সোলাপুরবু হকথেংননা এয়র কন্নেক্তিবিতীগা শম্নহন্নবা এয়রপোর্ত অসি অপগ্রেদ তৌবগী থবক লোইশিনখ্রে। মফম অসিদা তর্মিনেল বিল্দিংগী কেপাসিতী হেনগৎহনখ্রে। পেসেঞ্জরশিংগীদমক্তা অনৌবা খুদোংচাবশিং শেম্লে। মসিনা লৈবাক অসিদা অমসুং মপান লমদা লৈরিবা স্তেৎ পুম্নমক্তা ভিতোবাগী ভক্তশিংদা অচৌবা মতেং পাংগনি। হৌজিক মীয়াম্না লোর্দ ভিথলগী দর্শন ফংনবগীদমক সোলাপুরদা হকথেংননা চৎপা ঙম্লগনি। মফম অসিদা ললোন-ইতিক, ললোন-ইতিক অমসুং তুরিজমসু চাউখৎলগনি। চাউখৎ-থৌরাংগী থবকশিং অসিগীদমক ঐনা মহারাস্ত্রগী মীয়াম, নখোয় পুম্নমকপু থাগৎচরি অমসুং নখোয় পুম্নমকপু য়াইফ-পাউজেল পীজরি।
মরুপশিং,
ঙসি মহারাস্ত্রদা অনৌবা ৱারেপশিংগা লোয়ননা অচৌবা পান্দমশিং মথৌ তাই। মসিগীদমক্তা, পুনেগুম্বা ঐখোয়গী সহরশিং অসি চাউখৎপা, অর্বান দিবেলপমেন্তকী সেন্তর ওইহনবা মথৌ তাই। ঙসিদি, পুনে অসি চাউখৎলক্লিবা খোঙজেল অসিগী মতুং ইন্না মফম অসিদা মীশিং হেনগৎলকপা অসিসু চপ মান্ননা হেনগৎলক্লি। পুনেগী মীশিং হেনগৎলকপনা সহর অসিগী খোঙজেল হন্থহন্দনবা, অদুবু মসিগী কেপাসিতী হেনগৎহন্নবা ঐখোয়না হৌজিক খোঙথাং লৌখৎপা মথৌ তাই। পুনেগী পব্লিক ত্রান্সপোর্ত অসি মোদর্ন ওইরকপা মতমদা মসি থোক্কনি। মসি সহর অসি পাকথোক চাউথোকপা মতমদা থোক্কনি অদুবু মফম অমদগী অমদা কনেক্তিবিতী অসি ফজনা লৈগনি। ঙসিদি, মহায়ুতী সরকারনা ৱাখল্লোন অমসুং থৌওং অসিগা লোইননা নুমিৎ নিনি চুপ্না থবক তৌরি।
মরুপশিং,
পুনেগী হৌজিক্কী মতমগী মথৌ তাবশিং অসি থম্মোয়দা থম্লদুনা, থবক অসি মতম কয়াগী মমাংদগী মথৌ তারম্মি। পুনেদা মতম কয়াগী মমাংদগী মেত্রোগুম্বা অওনবা পুরকপা ত্রান্সপোর্ত সিস্তেম অমা মথৌ তাই অদুবু লাইবক থিবদি, হৌখিবা দিকেদশিংদা, ঐখোয়গী লৈবাক অসিগী অর্বান দিবেলপমেন্তদা প্লানিং অমসুং ভিজন অনিমক লৈখিদে। করিগুম্বা থৌরাং অমা খন্ন-নৈনবগীদমক লাক্লবসু, মসিগী ফাইল অসি চহি কয়া চুপ্না লেংদনা লৈখি। করিগুম্বা থৌরাং অমা শেম্লবসু, প্রোজেক্ত খুদিংমক অসি দিকেদ কয়াগী মমাংদা লেপখি। অরিবা থবক তৌবগী চৎনবী অসিনা ঐখোয়গী লৈবাক, মহারাস্ত্র অমসুং পুনেদা চাউনা অমাংবা পীখি। পুনেদা মেত্রো অমা শাবগী ৱারী অসি অহানবা ওইনা 2008দা হৌখিবা অদু নিংশিংবীয়ু। অদুবু, মসিগী য়ুম্ফম অসি 2016দা ঐখোয়গী সরকারনা অথিংবশিং লৌথোক্তুনা খোঙজেল য়াংনা ৱারেপ লৌবা হৌরকপা মতমদা থোনখি। অমসুং ঙসি য়েংবীয়ু... ঙসি পুনে মেত্রো অসি খোঙজেল য়াংখৎলক্লি অমসুং পাকথোক চাউথোক্লি।
ঙসিসু, নাকল অমরোমদা ঐখোয়না অরিবা থবক অসি শঙ্গাখ্রে, অদুগা অমরোমদা স্বারগেৎতগী কাত্রাজ লাইন ফাওবগী উরেপ-উয়ুং তম্লে। চহি অসিগী মার্চ থাদা, ঐহাক্না রুবি হোল ক্লিনিক্তগী রামৱাদী ফাওবগী মেত্রো সর্বিসকীসু উরেপ উয়ুং তমখি। 2016তগী হৌজিক ফাওবদা, চহি 7-8 অসিদা, পুনে মেত্রোগী চাউথোকহনখিবা অসি... লম্বী কয়াদা থবক কয়া পায়খৎলকপা অমসুং অনৌবা য়ুম্ফম থোনগী থৌওং অসি... করিগুম্বা অরিবা ৱাখল্লোন অমসুং থবক তৌবগী থৌওং লৈরম্বা তারবদি, থবকশিং অসি অমত্তা লোইশিনবা ঙম্লম্লোই... মমাংগী সরকারনা চহি ৮দা মেত্রোগী য়ুম্বী অমত্তা শাবসু ঙমখিদে। অদুগা ঐখোয়গী সরকারনা পুনেদা মোদর্ন নেৎৱার্ক ওফ মেত্রো শেমগৎলে।
মরুপশিং,
রাজ্য অসিগী চাউখৎ-থৌরাংগীদমক, সরকারনা চাউখৎ-থৌরাংবু অখন্নবা মীৎয়েং থমদুনা মখা তানা থবক পায়খৎপা মথৌ তাই। মসিদা খুদোংচাদবা অমা লাকপা মতমদা, মহারাস্ত্রনা চাউনা অৱাবা মায়োক্নৈ। মেত্রোগা মরী লৈনবা প্রোজেক্তশিং, মুম্বাই-অহমদাবাদ বুলেৎ ত্রেন, নৎত্রগা লৌমীশিংগীদমক মরুওইবা ইরিগেসনগা মরী লৈনবা থবকশিং ওইরবসু, দবল ইঞ্জিন সরকারগী মমাংদা, মহারাস্ত্রগী চাউখৎ-থৌরাংগীদমক দরকার ওইবা অসিগুম্বা প্রোজেক্ত কয়া অসি পন্থদুনা থমলমখি। মসিগী অতোপ্পা খুদমদি বিদকিন ইন্দস্ত্রীএল এরিয়া অসিনি! ঐখোয়গী সরকারগী মতমদা, ঐগী মরুপ দেবেন্দ্র জীনা ওরিক সিতীগী ৱাখল্লোন পুথোকখি। মহাক্না দিল্লী-মুম্বাই ইন্দস্ত্রীএল কোরিদোরদা শিন্দ্রা-বিদকিন ইন্দস্ত্রীএল এরিয়াগী উরেপ-উয়ুং তমখি। মসিগী থবক অসি নেস্নেল ইন্দস্ত্রীএল কোরিদোর দিবেলপমেন্ত প্রোগ্রামগী মখাদা পাংথোক্কদবনি। অদুবু, মসিগী থবক অসিসু মরক্তা লেপখি। হৌজিক, শিন্দেজীগী লুচিং মখাদা লৈবা দবল ইঞ্জিন সরকার অসিনা হায়রিবা অৱাবা অসি কোকহন্নবা থবক পায়খৎলি। ঙসি বিদকিন ইন্দস্ত্রীএল নোদসু লৈবাক মীয়ামদা কত্থোকখ্রে। বিদকিন ইন্দস্ত্রীএল এরিয়া অসি ছত্রপতি সম্ম্বাজী নগরদা একর 8,000 রোমদা পাকথোক চাউথোকহল্লগনি। মফম অসিদা অচৌবা ইন্দস্ত্রী কয়াগীদমক লম পীখ্রে। মসিনা লুপা করোর লিশিং কয়াগী ইনভেস্তমেন্ত পুরক্লগনি। মসিনা নহারোল লিশিং কয়াদা থবক ফংহল্লগনি। ইনবেস্তমেন্তকী থোংদা থবক ফংহন্নবা মন্ত্র অসি ঙসি মহারাস্ত্রগী নহারোলশিংগী মরুওইবা পাঙ্গল অমা ওইরক্লি।
চাউখৎলবা ভারতকী পন্দোম লোমনবগীদমক্তা, ঐখোয়না থাক কয়া অমা লান্থোক্কদবনি। ভারত অসি মোদর্ন ওইগদবনি... ভারত অসি মোদর্নাইজ ওইগদবনি... অদুবু মসি ঐখোয়গী ফন্দামেন্তেল ভেল্যুশিংদা য়ুম্ফম ওইগদবনি। ভারতনা চাউখৎকদবনি... মসিসু খুমাং চাউশিনগদবনি অমসুং মসিগী হেরিতেজ অসিগী চাউথোকচবাগা লোয়ননা মাংলোমদা চংশিনগদবনি। ভারতকী ইনফ্রাস্ত্রকচর অসি মোদর্ন ওইগদবনি... অমসুং মসি ভারতকী মথৌ তাবশিং অমসুং মরুওইবশিংদা য়ুম্ফম ওইগদবনি। ভারতকী খুন্নাই অসি ৱাখল অমগা লোয়ননা অমসুং পান্দম অমগা লোয়ননা খোঙজেল য়াংনা মাংলোমদা চংশিনগদবনি। ঐখোয়না হায়রিবা পুম্নমক অসি ৱাখলদা থমদুনা মাংলোমদা চংশিনবা তাই।
মহারাস্ত্রগীদমক তুংলমচৎকীদমক শেম-শারবা ইনফ্রাস্ত্রকচর অসি মরু ওইবগুম্না, চাউখৎপগী কান্নবা অসি খুন্নাইগী শরুক খুদিংমক্তা য়ৌহনবা অসিসু মরু ওই। মসি লৈবাক অসিগী শরুক খুদিংমক অমসুং খুন্নাই খুদিংমক্না লৈবাক অসিগী চাউখৎ থৌরাংদা শরুক য়াবা মতমদা ওইগনি। মসি লৈবাক অসিগী নুপীশিংনা চাউখৎলবা ভারত অমগী ৱারেপ অদু লুচিংদুনা পুরকপা মতমদা ওইথোক্কনি। নুপীশিংনা খুন্নাইদা অহোংবা পুরকপগী থৌদাং লৌবা মতমদা, করি থোকপা য়াবগে, মহারাস্ত্রগী লমদম অসি মসিগী খুদম্নি। মসি লমদম অসিদা অমসুং লমদম অসিদগীনি সাবিত্রিবাই ফুলেনা নুপীশিংগী এজুকেসনগীদমক অসিগুম্বা অচৌবা খোঙজং অমা হৌরকখিবসি। ইচানুপী অমসুং মচানুপীশিংগী অহানবা স্কুল অসি মফম অসিদা হাংদোকখি। মসিগী মেমোরি, মসিগী লেগেসি অসিবু ঙাক-শেন্দুনা থম্বা অসি য়াম্না মরু ওই। ঙসি ঐহাক্না লৈবাক অসিগী অহানবা নুপীমচাগী স্কুল অসিদা সাবিত্রিবাই ফুলে মেমোরিয়েলগী উরেপ উয়ুংসু তমখ্রে। মসিগী মেমোরিএল অসিদা স্কিল দিবেলপমেন্ত সেন্তর, লাইব্রেরী অমসুং অতোপ্পা দরকার ওইবা ফেসিলিতীশিংসু শেমগৎলিবা অসিদা ঐহাক নুংঙাইবা ফাওই। মসিগী মেমোরিয়েল অসিনা খুন্নাইগী ৱাখল্লোনগী অচৌবা খোঙজং অদুগী নিংশিং মমি অদু অমুক হন্না হিংগৎহল্লি। মসিগী নিংশিং থৌরম অসিনা ঐখোয়গী খুন্নাই, ঐখোয়গী অনৌবা চারোন-শুরোনবু ইথিল পীরগনি।
ইচিল-ইনাওশিং,
নীংতম্বা ফংদ্রিঙৈগী মমাংদা, লৈবাক অসিদা খুন্নাইগী ফিভম, লায়রবা অমসুং খেৎনবা কয়া লৈরম্মি। ফিভমশিং অদুদা ঐখোয়গী নুপীমচাশিংনা মহৈ তম্বদা অৱাবা ওইরম্মি। সাবিত্রিবাই ফুলেগুম্বা শক্নাইরবা মীওইশিংনা নুপীমচাশিংগীদমক্তা মহৈ তম্বগী থোঙ হাংদোকখি। অদুবু নীংতম্বগী মতুংদসু লৈবাক অসিনা হান্নগী ৱাখল্লোন অসিদগী মপুং ফানা মুত্থৎপা ঙমখিদে। মফম কয়াদা মমাংগী সরকারশিংনা নুপীশিং চঙলকপা থিংখি। স্কুলশিংদা তোইলেৎকুম্বা তঙাই ফদবা খুদোংচাবশিং লৈরমদে। মসিনা মরম ওইদুনা, স্কুলশিং লৈরবসু, স্কুলশিংগী থোঙশিং অসি নুপীমচাশিংগীদমক্তা থোঙ লোন্দুনা থমখি। নুপীমচাশিং অদু খরা চাউখৎলকপা মতমদা, মখোয়না স্কুল তোকখি। সাইনিক স্কুলশিংদা নুপীমচাশিং চংহনবদা অথিংবা থমখি। লান্মীগী লম অয়াম্বদা নুপীশিংবু থবক পীবা য়াদে। মসিগা মান্ননা, নুপী কয়া অমনা মীরোনবা মতমদা মখোয়গী থবক তোকপা মথৌ তাই। ঐখোয়না মমাংঙৈগী সরকারশিংগী ৱাখল্লোনশিং অদু হোংদোকখি, অরিবা সিস্তেমশিং অদু হোংদোকখি। ঐখোয়না স্বচ্ছ ভারত অভিয়ান হৌদোক্লে। মসিগী খ্বাইদগী চাউবা কান্নবা অসি লৈবাক অসিগী ইচানুপীশিং, ঐখোয়গী ইমাশিং অমসুং ইচে-ইচলশিং ওইখি। মখোয়না ওপন দেফিকেসন তৌবা তোকখি। স্কুলশিংদা তোইলেৎশিং শাবনা অমসুং নুপীমচাশিংগী তোইলেৎশিং তোঙান্না শাবনা নুপীমচাশিংগী স্কুল তোকপগী চাং হন্থহনখি। ঐখোয়না নুপীশিংগীদমক আর্মী স্কুলশিংগা লোয়ননা আর্মীগী পোস্ত পুম্নমক হাংদোকখি। নুপীশিংগী শাফনবগী মতাংদা ঐখোয়না অকনবা আইন শেম্লে। অমসুং মসিগী পুম্নমক অসিগী লোয়ননা, লৈবাক অসিনা নারী শক্তি বন্ধন এক্তকী খুত্থাংদা দিমোক্রেসিদা নুপীশিংগী লুচিংবগী থৌদাংসু লৈহনখ্রে।
মরুপশিং,
"কনাগুম্বা অমনা ঐখোয়গী ইচানুপীশিংগীদমক লম খুদিংমক্কী থোঙ হাংদোক্লবদি, ঐখোয়গী লৈবাক্কী চাউখৎপগী অশেংবা থোঙ হাংদোকপা ঙমগনি।" ঐহাক্না থাজবা থম্লি মদুদি সাবিত্রিবাই ফুলে মেমোরিএলনা ঐখোয়গী ৱারেপশিং অসিদা, নুপীশিংগী শক্তি লৈহন্নবা ঐখোয়গী কেম্পেন অসিদা হেন্না ইনর্জী পীরগনি।
মরুপশিং,
মহারাস্ত্রগী লমদম অসিনা লৈবাক অসিবু মতম পুম্নমক্তা লমজিংদুনা লাক্কনি হায়না ঐনা থাজবা থম্লি। ঐখোয় পুম্নমক্না পুন্না 'ভিকসিৎ মহারাস্ত্রা, ভিকসিৎ ভারত'কী পান্দম অসি মপুং ফাহনগনি। অসিগুম্বা থাজবা অসিগা লোয়ননা, মরুওইবা প্রোজেক্তশিং অসিগীদমক ময়াম পুম্নমকপু হন্না-হন্না নুংঙাইবা ফোংদোকচরি। অদোম পুম্নমকপু হন্না-হন্না থাগৎচরি।
