খুরুমজরি! তেলঙ্গানাগী রাজ্যপাল দা. তামিলিসাই সৌন্দরারজনজী, কেন্দ্রগী রেলৱে মন্ত্রী অশ্বিনি বৈশ্নোজী, কেন্দ্রগী তুরিজম মন্ত্রী জি. কিশন রেদ্দীজী, তেলঙ্গানাগী মন্ত্রীশিং মোহম্মদ অলি গারু অমসুং তি শ্রীনিবাস য়াদব, পার্লিয়ামেন্তদা লৈরিবা ঐগী থবক পুম্মিন্নরিবা মীওইশিং অমসুং ঐগী মরুপ বন্দি সঞ্জয় গারু, অমসুং কে. লক্ষ্মন গারু, অতোপ্পা দিগনিতরীশিং, নুপী অমদি নুপাশিং!
নমস্কারম!
কুহ্মৈগী মতম অসিদা তেলঙ্গানা অমসুং আন্ধ্র প্রদেশনা ঙসি অচৌবা খুদোল অমা ফংলি। অমরোমদা ভন্দে ভারত এক্সপ্রেস অসিনা তেলঙ্গানা অমসুং আন্ধ্র প্রদেশকী অপুনবা কলচর অমসুং হেরিতেজ অসি শম্নহল্লগনি। ঐহাক্না তেলঙ্গানা অমসুং আন্ধ্র প্রদেশকী মীয়াম মরু ওইনা রাজ্য অসিগী মিদল ক্লাস, লোৱর মিদল ক্লাস অমসুং অপ্পর মিদল ক্লাসকী মীওইশিংবু ভন্দে ভারত ত্রেনগীদমক্তা নুংঙাইবা ফোঙদোকচরি।
মরুপশিং,
ঙসি অসি আর্মী দেসু তারি। ভারত মচা খুদিংমক্না মাগী আর্মীগীদমক চাউথোকচৈ। লৈবাক্কী ঙাকশেলদা, লৈবাক্কী ঙমখৈশিং ঙাকশেনবদা ইন্দিয়ন আর্মীনা শরুক তম্লিবা অমসুং থৌনা-লিংজেল অসি লম্বা লৈতে। ঐহাক্না লান্মীশিং, এক্স-সর্ভিসমেন অমসুং মখোয়গী ইমুং মনুংবু নুংঙাইবা ফোঙদোকচরি।
মরুপশিং,
পোঙ্গল, মাঘ বিহু, মকর সংক্রান্তি অমসুং উত্তরায়ন কুহ্মৈশিংগা শাগোন্নরিবা হরাও নুংঙাইবা অসি মফম খুদিংমক্তা ময়েক শেংনা উরি। কাশ্মিরদগী কন্যকুমারি ফাওবা অমসুং অত্তোক্তগী কত্তক ফাওবা মরু ওইবা থৌরমশিং অমসুং কুহ্মৈশিংনা লৈবাক অসি শম্নহল্লি, মতৌ অসুম্না ভন্দে ভারত ত্রেন অসিনসু ‘এক ভারত শ্রেস্থ ভারত’কী ৱাখল্লোন্দা লৈবাক্কী তোঙান-তোঙানবা শরুকশিংদা ভাব তানবা, খঙনবা অমসুং শম্নহন্নবা খুদোংচাবা পীরি। ভন্দে ভারত এক্সপ্রেস ত্রেন্নাসু জাতি অমা ওইনা ঐখোয়গী অপুনবা কলচর অমসুং লাইনিং শম্নহল্লি। অনৌবা ত্রেন অসিনা হাইদরাবাদ, ৱারঙ্গল, বিজয়ৱাদা অমসুং বিশাখপতনমগুম্বা সহরশিং শম্নহল্লগনি। লাইফম অমদি তুরিজমগা মরী লৈনবা মরু ওইবা মফম কয়া রুৎ অসিদা লৈরি। মরম অসিনা ভন্দে ভারত এক্সপ্রেসনা ভক্তাশিং অমসুং লমকোইবশিংদা চাউনা কান্নবা পীরগনি। সিকন্দরাবাদ অমসুং বিশাখপতনমগী মরক্তা চৎথোক চৎশিন তৌবগী মতম ত্রেন অসিনা হন্থহল্লগনি।
ইচিল-ইনাওশিং,
ভন্দে ভারত ত্রেনগী অতোপ্পা ফীচর অমসু লৈ। ত্রেন অসিনা অনৌবা ভারতকী ফিরেপ অমদি তৌবা ঙম্বগী খুদম অমা ওইরি। মসিনা খোঙজেল য়াংনা চাউখৎপগী লম্বেল খল্লিবা ভারত অমা ত্রেন অসিদা মাগী মঙলানশিং অমসুং অনীংবশিংগী মাইকৈদা চংশিল্লিবা ভারত অমা, মাগী অনীংবা অপাম্বশিং ফংবা পাম্বা ভারত অমা, মাগী পান্দমশিং ফংনবা খোঙজেল য়াংনা মাংদা চংশিল্লিবা ভারত অমগী খুদম অমনি। ভন্দে ভারত এক্সপ্রেসনা পুম্নমক্তা খ্বাইদগী ফবা পাম্লিবা ভারতকী মশক তাক্লি। ভন্দে ভারত এক্সপ্রেসনা মাগী প্রজাশিংদা খ্বাইদগী ফবা ফংহনবা পাম্মিবা ভারতকী মশক তাক্লি। ভন্দে ভারত এক্সপ্রেসনা মীখা পোনবগী ৱাখল্লোনগী য়োৎলিং থৎদৎতুনা আত্মনির্ভরতা ওইনবা মাইকৈদা চংশিল্লিবা ভারতকী মশক তাক্লি।
মরুপশিং,
ভন্দে ভারতনা পাকথোক চাউথোরক্লিবা খোঙজেল অসিগা পনবা য়াই। ২০২৩গী সিকন্দরাবাদ – বিশাখপতনম ভন্দে ভারত অসি অহানবা ত্রেন্নি। অমসুং নুমিৎ ১৫নিগী মনুংদা লৈবাক অসিদা অনিশুবা ভন্দে ভারত ত্রেন চেলহনখিবা অসিদা নখোয়না হরাওবা পোক্কনি। মসিনা ভারত্তা ভন্দে ভারত কেম্পেন করম্না খোঙজেল য়াংনা খুমাং চাউশিন্দুনা অহোংবা পুরক্লিবা অসি তাক্লি। ভন্দে ভারত ত্রেন অসি ভারত্তা দিজাইন তৌখি অমসুং শাখি। মাগী খোঙজেলগী মরমদা থোক্লিবা মশিং লাকঙমদ্রবা ভিদিওশিংনা মীয়ামগী থমোয় অমদি ৱাখল জয় তৌরি অমসুং সোসিএল মেদিয়া খুদম চল্লি। ঐনা য়াম্না পুক্নিং চীংশিন্নীংঙাই ওইবা অতোপ্পা স্তেতিস্তিক অমগা থমজগে। হৌখিবা চহি খরা অসিদা ভন্দে ভারত ত্রেন ৭না অপুনবা অশাংবা কিলোমিতর লাখ ২৩ কোনশিনখি, মসি পৃথিবী ৫৮রক কোইবগা মান্নৈ। মহাক্না হায়, হৌজিক ফাওবদা পেসেঞ্জর লাখ ৪০না ভন্দে ভারত ত্রেনশিংদা তোংদুনা চৎখ্রে। মীয়াম্না ত্রেনশিংদা চৎপনা মতম কনবা ঙমখিবা অদু লম্বা লৈরোই।
ইচিল-ইনাওশিং,
কন্নেক্তিবিতী অমসুং খোঙজেল অমদি ‘সবকা বিকাস’কা লোয়ননা লৈনরিবা মখোয়গী মরী অসিগী মরক্তা হকথেংননা মরী লৈনৈ। কন্নেক্তিবিতীগা মরী লৈনবা ইনফ্রাস্ত্রকচরনা মফম অনি শম্নহনবা খক্তা নত্তনা তাইবংগা মঙলানশিংগা, মার্কেৎকা মেন্যুফেকচরিংগা, মতিক চাবা ফম্পাক্কা তেলেন্তকী মরক্তা মরক্তা মরী লৈনহল্লি। কন্নেক্তিবিতীনা চাউখৎপগী ওইথোকপা য়াবশিং হেনগৎহল্লি। হায়বদি গতি (খোঙজেল) লৈবা মফমদা প্রগতি (চাউখৎপা) লৈ। চাউখৎপা মফমদা শোইদনা নুংঙাইবা ফংই। ঐখোয়গী লৈবাক্তা চাউখৎপা অমসুং মোদর্ন কন্নেক্তিবিতীগী কান্নবা অসি অকক্নবা মীওই খরা খক্তনা ফংলমখিবা মতম অদু ঐখোয়না উখ্রে। মসিনা মরম ওইদুনা লৈবাক অসিদা য়াম্লবা মীশিং কয়াগী মতম অসি অতাংবা ত্রান্সপোর্তেসন্না মাংহনখি অমসুং মীচম প্রজা, মিদল ক্লাসকী মীওইনা মসিদগী চাউনা চৈথেং নংখি। ঙসি ভারতনা অরিবা এপ্রোচ অদু তুংওইনরম্লগা মাংদা খুমাং চাউশিল্লি। ঙসিগী ভারত অসিদা ‘গতি’ অমসুং ‘প্রগতি’গা লোয়ননা মীপুম খুদিংমক শম্নহন্নবা থবক খোঙজেল য়াংনা পাইখৎখি। মসি ভন্দে ভারত ত্রেনগী অচৌবা প্রমান অমনি।
মরুপশিং,
আশা লৈরবদি খ্বাইদগী অরুবা পান্দমশিং ফাওবা মাইপাকপা ঙমগনি। চহি ৮গী মমাংদা ইন্দিয়ন রেলৱেজনা ফীভম শোক্না লৈরম্বগী নুংঙাইতবা অদু খঙখি। লৈবাক অসিগী মীয়াম্না ইন্দিয়ন রেলৱেজতা লৈরিবা অতপ্পা খোঙজেল, অমোৎপা মপৈ, তিক্কেৎ বুকিং তৌবগা মরী লৈনবা ৱাকৎশোং অমসুং নুমিৎ খুদিংগী থোকপা এক্সিদেন্তশিংনা খুমাং চাউশিনবা ওইথোকপা ঙমখিদে। বজেৎ ৱাৎপগা মরী লৈনবা মরমশিং অসি রেলৱেজকী অনৌবা ইনফ্রাস্ত্রকচর শেমগৎপদা তোইনা পনখি।
অদুবু মরুপশিং,
ঐখোয়না ময়েক শেংবা অমদি থমোয় শেংনা হোৎন্দুনা শীংনবা অসি কোকহন্নবা ৱারেপ লৌখি। হৌখিবা চহি নিপাল অসিদা মসিগী মন্ত্রা অসিনা ইন্দিয়ন রেলৱেজতা অওনবা পুরকপা ঙমখি। ঙসি ইন্দিয়ন রেলৱেজতা চৎথোক-চৎশিন তৌবা অসি নুংঙাইরবা এক্সপরিয়েন্স অমা ওইরে। রেলৱে স্তেসন কয়ানা মতমগা চুনবা ভারতকী শক্তমগী মমি তারি। হৌখিবা চহি ৭-৮দা তৌখিবা থবক্না লাক্কদৌরিবা চহি ৭-৮ অসিদা ইন্দিয়ন রেলৱেজতা অওনবা পুরক্লগনি। ঙসি বিস্তাদোম কোচশিংগুম্বা থৌরাংশিং অমসুং তুরিজম চাউখৎহন্নবা হেরিতেজ ত্রেনশিং, অরাপ্পা মফমগী কৈথেলশিংদা লৌউ-শিংউগী পোত্থোক পুনবা কিসান রেল হৌদোকখি। পোৎ পুবা ত্রেনশিংগীদমক স্পেসিএল ফ্রৈৎ কোরিদোরগী থবক অসি খোঙজেল য়াংনা খুমাং চাউশিল্লি। লৈবাক অসিদা পব্লিক ত্রান্সপোর্ত ফগৎহন্নবগীদমক অনৌবা সহর ২৪ হেনবদা মেত্রো নেৎৱার্ক পাকথোক চাউথোকখি। লৈবাক অসিদা ফ্যুচরিস্তিক রেপিদ রেল ত্রাঞ্জিৎ সিস্তেম অমা খোঙজেল য়াংনা চাউখৎলক্লি।
ইচিল-ইনাওশিং,
হৌখিবা চহি ৮দা তেলঙ্গানাদা রেলৱেজকা মরী লৈননা তৌখিবা শীংথানীংঙাই ওইবা থবক তৌখি। ২০১৪দগী চহি ৮গী মমাংদা তেলঙ্গানাগী রেলৱেজকী বজেৎ অসি লুপা করোর ২৫০দগী তারমখি অদুবু ঙসিদি মসি লুপা করোর ৩০০০দা হেনগৎহনখ্রে। মেদকগুম্বা তেলঙ্গানাগী মফম কয়া অসি অহানবা ওইনা রেল সর্ভিসনা শম্নহনখি। অনৌবা রেল লাইনশিংগী কিলোমিতর ১২৫দগী তানা ২০১৪দগী চহি ৮গী মমাংদা তেলঙ্গানাদা শেমখি অমরোমদা হৌখিবা চহি নিপালদা তেলঙ্গানাদা অনৌবা রেল লাইন কিলোমিতর ৩২৫রোম শেমখি। হৌখিবা চহি নিপালদা কিলোমিতর ২৫০ হেনবগী ‘ত্রেক মলতি-ত্রেকিং’গী থবক অসি তেলঙ্গানাদা তৌখি অমসুং মসিগী ইলেক্ত্রিফিকেসনগী মতমগী মনুংদা রাজ্য অসিদা রেলৱে ত্রেকশিং ইলেক্ত্রিফিকেসন তৌবা শরুক ৩ হেনগৎলকখি। য়াম্না অথুবদা ঐখোয়না তেলঙ্গানাগী ব্রোদ গেজ রুৎ পুম্নমক ইলেক্ত্রিফিকেসন তৌবগী থবক লোইশিল্লগনি।
মরুপশিং,
ঙসি লমথাখিবা ভন্দে ভারত অসিনা মতোল অমদগী আন্ধ্র প্রদেশকাসু শম্নহল্লি অমসুং কেন্দ্র সরকারনা আন্ধ্র প্রদেশতা রেল নেৎৱার্ক মপাঙ্গল কনখৎহন্নবগী থবক লেপ্পা লৈতনা তৌরি। ২০১৪গী মমাংদা অনৌবা রেলৱে লাইনশিং আন্ধ্র প্রদেশতা শেমখিবা অদুদগী শরুক কয়া হেন্না খোঙজেল য়াংনা শেম্লি। হৌখিবা চহিশিংদা আন্ধ্র প্রদেশতা অনৌবা রেলৱে লাইনগী কিলোমিতর ৩৫০ শেম্বা অমসুং কিলোমিতর ৮০০গী মলতি-ত্রেকিং তৌবা লোইশিনখ্রে। মমাংগী সরকারগী মতমদা আন্ধ্র প্রদেশতা চহিগী ওইনা রেলৱে ত্রেকশিংগী শুপ্নগী কিলোমিতর ৬০ ইলেক্ত্রিফাইদ তৌখি অমসুং মসিগী খোঙজেল অসি হৌজিক্তি চহিদা কিলোমিতর ২২০ হেন্না হেনগৎহনখ্রে। ইজ ওফ লিবিং লোয়ননা ইজ ওফ দুইং বিজিনেস শাহৌ পীনবা কেন্দ্র সরকারনা খোঙথাংশিং লৌখৎখি। খোঙজেল অমদি চাউখৎপগী থৌওং অসি অসুম্না মখা চত্থখিগনি। থাজবা অসিগা লোয়ননা ঐহাক্না তেলঙ্গানা অমসুং আন্ধ্র প্রদেশকী মীয়ামদা ভন্দে ভারত এক্সপ্রেস ত্রেনগীদমক অমুক হন্না নুংঙাইবা ফোঙদোকখি অমসুং পেসেঞ্জরশিংদা য়াইফ মঙ্গোল পীখি। হন্না-হন্না থাগৎচরি!
