শ্রী রামকৃষ্ণ পরমহংস, মাতা শ্রী সারদা দেবী অমসুং শ্বামী বিবেকানন্দা, তামিল নাদুগী রাজ্যপাল শ্রী আর এন রবি, চেন্নাই রামকৃষ্ণ মঠকী সাধুশিং, তামিল নাদুগী ঐগী নুংশিরবা মীয়াম ঐনা খুরুমজরি, পুম্নমক ঐনা তরাম্না ওকচরি।
মরুপশিং,
অদোমগা লোয়ন্না থৌরম অসি শরুক য়াবদা ঐ হরাওই। রামকৃষ্ণ মঠ অসি ঐনা থম্মোয় শেংনা ইকায়খুম্নবা লোয়শঙ অমনি। ঐগী পুন্সিদা লোয়শঙ অসিনা অচৌবা থৌদাং অমা লৌখি। লোয়শঙ অসিনা চেন্নাইদগী থবক তৌরকপদগী চহি ১২৫শুবা মপোক কুমওন থৌরম পাংথোক্লি। মসিনা ঐনা হরাওবগী অতোপ্পা মরম অমা ওইহল্লে। ঐনা য়াম্না নুংশিজবা তামিল মীয়ামগী মরক্তা ঐ তিল্লে। ঐ তামিল লোন, তামিল নাৎ অমসুং চেন্নাইগী নুংঙাইবা নুংশি। ঙসি, ঐ বিবেকানন্দা হাওসতা চৎনবগী খুদোংচাবা অমা ফংলে। মহাক্কী মমিং লৈরবা নোংচুপকী খোঙচৎ হল্লক্লবা মতুংদা শ্বামী বিবেকানন্দানা মফম অসিদা লৈখি। মফম অসিদা হীরি কোনবা য়াম্না নুংঙাইবা অমনি। ঐনা পুক্নিং থৌগৎপা ফাওখি অমসুং থৌনা পোকখি। মতমগী অনৌবা তেক্নোলোজিগী খুৎথাংদা মমাঙঙৈগী ৱাখল্লোনশিং নহারোলশিংদা য়ৌহনবা উবদা ঐ হরাওই।
মরুপশিং,
মহাক্কী ছন্দ অমদা সাধু তিরুভাল্লুভারনা হায়খি: पुत्तेळ् उलगत्तुम् ईण्डुम् पेरळ् अरिदे ओप्पुरविन् नल्ल पिर| মসিনা হায়রি: মালেম অমসুং লাইরৈবাক অনিমক্তা, থৌজাল হৈবদগী হেনবা অমতা লৈতে। তোঙান-তোঙানবা হিরমশিং হায়বদি লাইরিক-লাইশু তম্বা, লাইব্রেরিশিং অমসুং বুক বেঙ্কশিং, লেপ্রোসিগী মরমদা ৱাখল তাহনবা, অনা-লায়য়েং অমসুং নর্সিং অমসুং খুঙ্গং চাউখৎহনবদা রামকৃষ্ণ মঠনা তামিল নাদুগী মীয়ামগী সেবা তৌরি।
মরুপশিং,
রামকৃষ্ণ মঠনা তামিল নাদুগী মীয়ামদা কান্নবা পীবগী মতাংদা ঐনা ফোঙদোকখ্রে। মসি কোন্না লাকসি। অহানবদা শ্বামী বিবেকানন্দদা তামিল নাদুনা পীখিবা কান্নবগী মতাংদা লাকসি। কন্যাকুমারিগী মমিং লৈরবা রোক্তা, শ্বামী জিনা মহাক্কী পুন্সিগী পান্দম মশক খঙখি। মসিনা মহাক অওনবা পুরকখি অমসুং মসিগী কান্নবা চিকাগোদা ফংখি। শ্বামী জিনা নোংচুপ্তগী হল্লকপদা, মহাক্না অহানবদা শেংলবা তামিল নাদুগী লৈমায়দা খোঙদাখি। রামনাদকী নিংথৌনা ইকায়খুম্নবগা লোয়ন্না মহাক ওকখি। শ্বামী জিনা চেন্নাইদা লাকপদা, মদু অখন্নবা অমা ওইখি। নোবেল প্রাইজ ফংখ্রবা মমিং লৈরবা ফ্রেঞ্চ অইবা রোমেন রোল্লেন্দনা খোঙচৎ অসি শিংথাখি। মহাক্না হায়খি ভিক্তোরি আর্কস ১৭ য়ুংখি। চয়োল অমা, চেন্নাইগী মীয়ামগী পুন্সি চপ লেপখি। মদু কুহ্মৈ অমগা মান্নখি।
মরুপশিং,
শ্বামী বিবেকানন্দা বেঙ্গলদগীনি। মহাক তামিল নাদুদা হিরো অমগুম তরাম্না ওকখি। মসি ভারতনা নিংতম্বা ফংগদবা চহি কয়াগী মমাঙদা থোকখিবনি। ভারত অসি চহি লিশিং কয়া জাতি অমা ওইদুনা লাক্লবনি হায়বগী অশেংবা ৱাখল্লোন অমা লৈবাক্কী মীয়ামদা লৈরি। মসি এক ভারত শ্রেস্থা ভারতকী ৱাখল্লোন্নি। মসি রামকৃষ্ণ মঠনা থবক তৌরিবা অদুগী ৱাখল্লোনগা চপ মান্নৈ। ভারত শীনবা থুংনা, ওইজবা থিদনা মীয়ামগী সেবা তৌনবা মখোয়গী লোয়শঙ কয়া ভারত শীনবা থুংনা লৈরি। এক ভারত শ্রেস্থা ভারতকী মতাং লাকপদা, কাসি তামিল শঙ্গমমগী মাইপাকপা ঐখোয় পুম্নমক্না উরে। হৌজিক, সৌরাস্ত্রা তামিল শঙ্গমমগী থবকশিং ঐনা তারে। ভারতকী অপুনবা হেন্না চেৎশিন্নবা অসিগুম্বা থবকশিং মাইপাক্নবা ঐনা য়াইফ-পাউজেল পীজরি।
মরুপশিং,
ঐখোয়গী লৈবাক ঙাকপগী ৱাঙুলোন অসিশু শ্বামী বিবেকানন্দনা ইথিল পীবনি। মহাক্না হায়খি মীওই খরদা খুদোংচাবা পীবা লৈহন্দ্রবা অমসুং চপ মান্নবা লৈরবা মতমদা, খুন্নাই চাউখৎলকই। ঙসি অদোম্না মসিগী পান্দম অসি ঐখোয়গী থবক-থৌরমশিংদা উবা ফংগনি। মমাঙদা, তঙাইফদবা থবকশিং অসি মীওই খর খক্তনা ফংগদবা খুদোংচাবশিং ওইনা লৌনরমখি। মীওই কয়া চাউখৎপগী মহৈ চাবা ফংলমদে। অখন্নবা মীওই খর খক নত্ত্রগা মশিং য়ামদবা কাংলুপ খর মসিগী খুদোংচাবা লৌবা য়াহনখি। ঙসিদি, চাউখৎপগী থোঙ মীওই খুদিংমক্কী হাংলে।
ঐখোয়গী খ্বাইদগী মাইপাকপা স্কিমশিংগী মনুংদা অমা ওইরিবা, মুদ্রা য়োজনা, ঙসি মসিগী ৮শুবা মপোক কুমওন থৌরম পাংথোক্লি। তামিল নাদুগী অপীকপা ওন্ত্রেপ্রেনিউয়রশিংনা রাজ্য অসি মুদ্রা য়োজনাগী লুচিংবা অমা ওইহল্লে। অপীকপা ওন্ত্রেপ্রেনিউয়রশিংদা গরেন্তি য়াওদনা চাউরাক্না লুপা করোর ৩৮ রোমগী লোনশিং ফংহনখ্রে। হায়রিবা মীওইশিং অসিগী মনুংদা নুপীশিং অমসুং খুন্নাইগী ফিবম শোক্লবা কাংলুপকী মীওই মশিং য়াম্না য়াওরি। ললোন-ইতিক্কীদমক বেঙ্কতগী লোন লৌবা হায়বসি মীওই খর খক্তনা ফংবা খুদোংচাবা ওইরম্মী, অদুবু হৌজিক, মসি মীওই খুদিংমক্না ফংলে। মসিগা চপ মান্নবা মওংদা, ইমুং খুদিংমক য়ুম অমা, মৈ, এল.পি.জি, তোইলেতশিং অমসুং অতৈ কয়া ফংলে।
মরুপশিং,
ভারতকীদমক শ্বামী বিবেকানন্দগী অচৌবা মঙলান অমা লৈরমখি। মহাক্কী মঙলান মঙফাউন্নবা ভারতনা হোৎনরিবা অসি মহাক্না চাউথোকচনা য়েংলমগনি হায়না ঐনা থাজৈ। মহাক্কী খ্বাইদগী মরুওইবা পাউজেলদি ঐখোয় ইশামক অমসুং ঐখোয়গী লৈবাক থাজবনি। ঙসিদি, চৎলিবা চহিচা অসি ভারতকী চহিচা ওইগনি হায়না অখঙ-অহৈ কয়ানা হায়রি। মরুওইনা, হৌজিক অসি ঐখোয়গী মতম্নি হায়না ভারতমচা খুদিংমক্না খল্লে। থাজবা অমসুং অমনা অমবু থাজনবগী ফিবম অমদগী ঐখোয়না মালেম অসি থেংনরি। শ্বামী জিনা হায়রমখি মদুদি ঐখোয় নুপীশিং মতেং পাংনবা লৈবা নত্তে। মখোয়গী চপ চাবা মফম ফংলবা মতমদা, মখোয়না খুন্নাই অসি লমজিংগনি অমসুং মখোয় মশানা অৱাবশিং কোকহনজগনি। ঙসিগী ভারতনা নুপীশিংনা মাংজিল থাবা চাউখৎপদা থাজবা থম্লে। স্তার্দঅপশিং নত্ত্রগা শান্নবা, আর্মদ ফোর্সশিং নত্ত্রগা অৱাংবা থাক্কী মহৈ তম্বা ওইগেরা নুপীশিংনা অপনবশিং নমখায়রি অমসুং রেকোর্দশিং থম্লি।
লমচৎ-শাজৎ শেমগৎপদা শান্নবা অমসুং হকচাং ফবা য়াম্না মরুওই হায়বা শ্বামী জিনা থাজখি। ঙসিদি খুন্নাই অসিনা শান্নবা অসি অহেনবা থবক অমা ওইনা লৌরম্বদগী শান্নবা অসি শীনফম অমা ওইনা উরে। য়োগা অমসুং ফিৎ ইন্দিয়া মীয়ামগী ইহৌ অমা ওইরক্লে। লাইরিক তম্বনা থৌনা পী হায়বা শ্বামী জিনা থাজবা থমখি। মহাক্না তেক্নিকেল অমসুং সাইন্তিফিক ইজুকেসনশু পামখি। ঙসিদি মালেমগী খ্বাইদগী ফবা থবকশিং পায়খৎনবা নেসনেল ইজুকেসন পোলিসি শেমদোক্লে। মমাঙদা অমুক্তা ওইখিদ্রিবা ফিবমদা স্কিল দিবলপমেন্ত পায়খৎলে। মালেমদা খ্বাইদগী ফবা তেক অমসুং সাইন্তিফিক ইকোসিস্তেমশিং লৈবা লৈবাকশিংগী মনুংদা ঐখোয়শু য়াওরে।
মরুপশিং,
ঙসিগী ভারতনা কান্নবা খর শ্বামী জিনা তামিল নাদুদা হায়খি। মহাক্না হায়খি অনৌবা ৱাখল্লোন মঙা খঙবা অমসুং মখোয়গা লোয়ন্না লৈমিন্নবা অসি শক্তি য়াম্না লৈ। ঐখোয়না নিংতম্বা চহি ৭৫ শুরকপগী থৌরম পাংথোকখ্রে। মথং চহি ২৫ অসি অমৃত কাল হায়না লৈবাক অসিনা মসিগী পান্দম থম্লে। অনৌবা ৱাখল্লোন মঙা-পঞ্চ প্রান ফজনা খঙদুনা, অচৌবা থবকশিং পাংথোক্নবা মসিগী অমৃত কাল শীজিন্নবা য়াগনি। মখোয় অদুদি, চাউখৎলবা ভারত অমগী পান্দম, লোয়লম লৈঙাক্কী ৱাখল্লোনগী লেমহৌবশিং লৌথোকপা, ঐখোয়গী হেরিতেচ হরাও-তয়াম্বা ফোঙদোকপা, অপুনবগী শক্তম মপাঙ্গল কনখৎহনবা অমসুং ঐখোয়গী ইথৌশিংদা মীৎয়েং থম্বা অসিনি। হায়রিবা পঞ্চ প্রান ঙসি ঐখোয়না অপুনবা ওইনা অমসুং অমমমতা ওইনা থবক ওইনা পাংথোকপা ঙমগদরা? করিগুম্বা মীওই করোর ১৪০না ৱারেপ অমা লৌরবদি, ঐখোয়না ২০৪৭দা চাউখৎলবা, মশাগী ওক্নবা পুথোকচবা ঙম্বা অমসুং অপুনবা ভারত অমা শেমগৎপা ঙমগনি। মসিগী মিসন অসিদা শ্বামী বিবেকানন্দগী থৌজাল ফংগনি হায়না ঐনা অচেৎপা থাজবা থম্লি।
ময়াম পুম্নমক থাগৎচরি।
