ঙসি অসি উত্তরাখন্দগী সিলভর জুবিলী চহিগী অহৌবা নুমিৎনি। হায়বদি, ঐখোয়গী উত্তরাখন্দ অসি 25শুবা চহিদা চঙশিল্লি। উত্তরাখন্দগী মঙাল লৈবা তুংলমচৎকীদমক্তা লাক্কদৌরিবা চহি 25গী খোঙচৎ অসি ঐখোয়না হৌগদৌরি। মসিদসু নুংঙাইবা চানরুবা অমসু য়াওরি। লৈবাক অসিনা চহি 25গী অমৃত কালগী মনুংদা লৈবা মতম অসিদা খোঙচৎ অসি পাংথোক্লগনি। হায়বদি, চাউখৎলবা ভারতকীদমক চাউখৎলবা উত্তরাখন্দ, লৈবাক অসিনা মসিগী ৱারেপ অসি মতম অসিদা মপুং ফাহনবা উবা ফংগনি। লাক্কদৌরিবা চহি 25গী ৱারেপশিংগা লোয়ননা উত্তরাখন্দগী মীয়াম্না রাজ্য পুম্বদা তোঙান তোঙানবা প্রোগ্রামশিং পাংথোক্লিবা অসিদা ঐহাক নুংঙাইবা ফাওই। প্রোগ্রামশিং অসিগী খুত্থাংদা উত্তরাখন্দগী ইকাই খুম্নবা অসিসু শন্দোক্কনি অমসুং চাউখৎলবা উত্তরাখন্দগী পান্দম অসিসু রাজ্য অসিগী মীওই খুদিংদা য়ৌরগনি। মসিগী মরুওইবা থৌরম অসিদা অমসুং মরুওইবা ৱারেপ অসিগীদমক্তা ঐহাক্না ময়াম পুম্নমক্তা য়াইফ-পাউজেল পীজরি। নুমিৎ নিনিগী মমাংদা, প্রভাসি উত্তরাখন্দ সম্মেলনসু মায় পাক্না পাংথোকখি। ঐহাক্না থাজবা থম্লি মদুদি ঐখোয়গী মাইগ্রেন্ত উত্তরাখন্দগী মীওইশিংনা রাজ্য অসিগী চাউখৎ থৌরাংগী খোঙচৎতা মখা তানা অচৌবা থৌদাং লৌগনি।
মরুপশিং,
উত্তরাখন্দগী মীয়াম্না মখোয়গী আশা অমসুং এস্পিরেসনশিং মপুং ফাহন্নবগীদমক তোঙানবা রাজ্য অমগীদমক মতম শাংনা হোৎনখি। হায়রিবা হোৎনরিবশিং অসি কেন্দ্রদা শক্নাইরবা অতলজীগী লুচিং মখাদা অমসুং BJPনা লুচিংদুনা NDA সরকার শেমখিবা মতমদা মায় পাকখি। উত্তরাখন্দ শেমখিবগী মঙলান অদু ঐখোয়না মঙফাওনহল্লিবা অসিদা ঐহাক নুংঙাইবা ফাওই। দেবভুমী উত্তরাখন্দনা ঐখোয় পুম্নমক্তা অমসুং BJPদা মতম পুম্নমক্তা মীনুংশি-থৌজাল পীরম্মি। দেবভুমীগী সেবা তৌবগী ৱাখল্লোনগা লোয়ননা উত্তরাখন্দগী চাউখৎ থৌরাংগীদমক BJPনা থবক অমত্তা লেপহন্দে।
মরুপশিং,
নুমিৎ খরনিগী মমাংদা কেদর্নাথ লাইশঙগী থোঙশিং থিংজিনখি। চহি খরগী মমাংদা, বাবা কেদর্নাথদা চৎলবা মতুংদা অমসুং মহাক্কী খুয়া খাদা লৈরবা মতুংদা, ঐহাক্না চাউরবা থাজবগা লোয়ননা হায়খি মদুদি চহি তরা অসি উত্তরাখন্দগী চহি তরা ওইগনি। হৌখিবা চহিশিংদা, উত্তরাখন্দনা ঐহাক্কী থাজবা অদু অচুম্বনি হায়না উৎখ্রে। ঙসি উত্তরাখন্দনা চাউখৎপগী অনৌবা রেকোর্দশিং শেমগৎলি। অনৌবা রেকোর্দশিং শেম্মি। হৌখিবা চহিগী সস্তেনেবল দিবেলপমেন্ত গোল ইন্দেক্সতা উত্তরাখন্দনা অহানবা মফমদা লৈখ্রে। রাজ্য অসি ইজ ওফ দুইং বিজিনেসকী মায় পাকপা অমসুং স্তার্তঅপ রেঙ্কিংদা মকোক থোংবা কাংলুপকী মনুংদা থমখ্রে। হৌখিবা চহি অমা মখাইদা, উত্তরাখন্দগী রাজ্যগী চাউখৎ-থৌরাংগী চাং অসি শরুক চাম্মা হেনগৎলে। চহি অসিদা GST কালেক্সনসু চাদা 14 হেনগৎলে। 2014দা, উত্তরাখন্দদা মীওই অমদা চংবা শেনফম অসি চহিদা লুপা লাখ 1.25 রোম ওইখি। ঙসিদি মসি লুপা লাখ 2.60দা হেনগৎখ্রে। 2014দা, উত্তরাখন্দগী গ্রোস দোমেস্তিক প্রদক্ত, হায়বদি রাজ্য অসিগী GDP অসি লুপা করোর লাখ 1.5 রোম ওইখি। হৌজিক্তি মসি চাউরাক্না লুপা করোর লাখ 3.5দা হেনগৎখ্রে। মশিংশিংশিং অসিনা উত্তরাখন্দদা নহারোলশিংগীদমক অনৌবা খুদোংচাবশিং করম্না শেমগৎলি অমসুং মফম অসিদা ইন্দস্ত্রীএল প্রোগ্রেস করম্না পাংথোক্লি হায়বা অদু উৎলি।
সরকারনা হোৎনরিবশিং অসিনা মরম ওইদুনা উত্তরাখন্দগী মীয়ামগী পুন্সি, মরুওইনা রাজ্য অসিগী মমাশিং, ইচে-ইচলশিং অমসুং ইচানুপীশিংগী পুন্সি অসি হেন্না লায়থোকহল্লে। 2014গী মমাংদা, উত্তরাখন্দদা লৈবা য়ুমশিংগী চাদা 5দগী হন্থনা থক্নবা ঈশিং ফংখি। ঙসিদি, মসি চাদা 96 হেনখ্রে। ঐখোয়না 100%দা চঙশিল্লি। 2014গী মমাংদা উত্তরাখন্দদা পি.এম. গ্রামগী লম্বীগী কিলোমীতর 6000 খক্তমক শাখি, কিলোমীতর 6000। ঙসিদি, লম্বীশিং অসিগী অশাং অসি কিলোমীতর 20,000 হেনখ্রে। অমসুং ঐহাক্না খংই মদুদি চীংগী লমশিংদা লম্বী শেম্বগী থবক অসি কয়া য়াম্না লুবা অমদি কয়া য়াম্না মথৌ তাবগে। উত্তরাখন্দদা তোইলেৎ লাখ কয়া শাদুনা, ইমুং খুদিংদা মৈ ফংহন্দুনা, উজ্জ্বলা স্কিমগী মখাদা গ্যাস কন্নেক্সন লাখ কয়া পীদুনা, আয়ুশ্মান স্কিমগী মখাদা লেম্না লাইয়েং পীদুনা, ঐখোয়গী সরকারনা কাংলুপ খুদিংগী অমসুং চহি খুদিংগী মীওইশিংগা পার্তনর অমা ওইনা থবক তৌরি।
মরুপশিং,
ঐখোয়না উত্তরাখন্দদসু দবল ইঞ্জিন লৈঙাক্না করি তাকপগে হায়বদু উবা ফংলি। উত্তরাখন্দনা মমাংদা কেন্দ্রদগী ফংখিবা গ্রান্ত অসি ঙসিদি শরুক অনি হেনগৎখ্রে। দবল ইঞ্জিন সরকারগী মখাদা উত্তরাখন্দদা AIIMS সেতলাইত সেন্তরগী খুদোংচাবা ফংখি। মতম অসিদা, লৈবাক অসিগী অহানবা দ্রোন এপ্লিকেসন রিসর্চ সেন্তর দেহরাদুনদা হাংদোকখি। উধম সিংহ নগরদা স্মার্ত ইন্দস্ত্রিএল তাউনশিপ অমা শেমগৎনবা থৌরাং অমা লৈরি। ঙসি উত্তরাখন্দদা কেন্দ্র সরকারগী লুপা করোর লাখ 2গী প্রোজেক্তশিং পায়খৎলি। কন্নেক্তিবিতীগা মরী লৈনবা প্রোজেক্তশিং অসি য়াম্না থুনা লোইশিল্লি। রিশিকেশ কর্নপ্রয়াগ রেল প্রোজেক্ত অসি 2026 ফাওবদা লোইশিনগদৌরি। উত্তরাখন্দগী স্তেসন 11 অমৃত স্তেসন ওইনা শেমগৎলি। দেহরাদুন-দিল্লী এক্সপ্রেসৱে লোইরবা মতুংদা, শহর অনি অসিগী মরক্তা লৈরিবা অরাপ্পা অসি পুং অনি মখাইদা চৎপা ঙম্লগনি। হায়বদি, মওং অমদা, উত্তরাখন্দদা চাউখৎ-থৌরাংগী অচৌবা য়োগ অমা চত্থরি। মসিনা দেবভুমী অসিগী ইকাই খুম্নবা হেনগৎহল্লি। মসিনা চীংগী লমশিংদগী মাইগ্রেসন লেপহনখি।
মরুপশিং,
ঐখোয়গী সরকার অসি চাউখৎ-থৌরাংগা লোয়ননা হেরিতেজ ঙাক-শেন্দুনা থম্নবগীদমক হোৎনরি। দেবভুমীগী কলচরগী মতুং ইন্না কেদর্নাথ ধামগী গ্রান্দ অমসুং দিভাইন রিকনস্ত্রক্সন অমা পাংথোক্লি। বদ্রীনাথ ধামদা চাউখৎ-থৌরাংগী থবকশিং য়াম্না থুনা চত্থরি। মানস খন্দ মন্দির মালা মিসনগী মখাদা অহানবা তাঙ্কক্কী ওইনা লাইশঙ 16 শেমগৎলি। চার ধাম য়াত্রা অসি অল ৱেদর রোদনা খুদোংচাবা পীরি। পার্বতমালা প্রোজেক্তকী মখাদা, মফম অসিগী লাইনিং লাইশোনগী অমসুং লমকোইবশিংগী মফমশিং অসি রোপৱেনা শম্নহল্লি। ঐহাক্না মানা খুঙ্গংদা চৎখিবা অদু নীংশিংলি। ঐহাক্না ঙমখৈ অদুদা লৈরিবা ঐহাক্কী ইচিল-ইনাওশিং অমসুং ইচিন-ইনাওশিংগী থোইদোক হেন্দোকপা নুংশিবা অদু উখি। ভাইব্রেন্ত ভিলেজ প্রোগ্রাম অসি মানা খুঙ্গংদগী হৌখি। ঐখোয়গী সরকারনা ঙমখৈদা লৈরিবা খুঙ্গংশিং অসি অরোইবা খুঙ্গংশিং ওইনা লৌদে অদুবু লৈবাক অসিগী অহানবা খুঙ্গংশিংনি হায়না লৌই। ঙসিদি, প্রোগ্রাম অসিগী মখাদা, উত্তরাখন্দদা খুঙ্গং 50 রোম চাউখৎলক্লি। অসিগুম্বা হোৎনরিবশিং অসিগী মহৈদি উত্তরাখন্দদা তুরিজমগা মরী লৈনবা খুদোংচাবশিং অসি অনৌবা খোঙজং অমা চংশিল্লি। অমসুং তুরিজম হেনগৎলকপা হায়বসিনা উত্তরাখন্দগী নহারোলশিংগীদমক থবক ফংবগী মশিং হেনগৎলকপা হায়বনি। চয়োল খরনিগী মমাংদা পাউদমখি মদুদি চহি অসিদা তুরিস্ত অমসুং লাইখুরুম্বা চৎপা করোর 6 রোম উত্তরাখন্দদা লাকখ্রে। 2014গী মমাংদা, চার ধামদা লাই খুরুম্বা লাকপগী রেকোর্দ মশিং অসি লাখ 24 ওইরম্মি, অদুগা হৌখিবা চহিদা লাই খুরুম্বা লাকপগী মশিং অসি লাখ 54 হেনখি। মসিনা হোতেলদগী হৌরগা হোমস্তাইগী মপুশিং, তেক্সিগী মপুশিংদগী হৌরগা তেক্সতাইলগী মপুশিং ফাওবা কান্নবা ফংগনি। হৌখিবা চহিশিংদা, হোমস্তে 5000 হেন্না রেজিস্তর তৌখ্রে।
মরুপশিং,
ঙসি উত্তরাখন্দনা অসিগুম্বা ৱারেপশিং লৌরি, অসিগুম্বা পোলিসীশিং শেম্লি অমসুং লৈবাক অসিগীদমক খুদম অমা ওইরি। মপুং ফানা নৈনরবা মতুংদা উত্তরাখন্দনা য়ুনিফোর্ম সিবিল কোদ চৎনহনখি, মদু ঐহাক্না সেক্যুলর সিবিল কোদ হায়না কৌই। ঙসি লৈবাক পুম্বনা য়ুনিফোর্ম সিভিল কোদকী তঙাইফদবা অদু খঙলদুনা খন্ন-নৈনরি। উত্তরাখন্দ সরকারনা রাজ্য অসিগী নহারোলশিংগী তুংলমচৎকীদমক এন্তি-চিতিং লো চৎনহনখি। উত্তরাখন্দদা জালিয়াৎ মাফিয়াগী মায়োক্তা অকনবা থবক লৌখৎলে। হৌজিক রাজ্য অসিদা রিক্রুতমেন্তশিং অসি মপুং ফানা ত্রান্সপরেন্সীগা লোয়ননা মতম চানা পাংথোক্লি। উত্তরাখন্দগী মায়পাকপা অসি অতোপ্পা রাজ্যশিংগীদমক খুদম অমা ওইরক্লিবা অসিগুম্বা থবক কয়া অমা লৈরি।
মরুপশিং,
ঙসি নবেম্বরগী তাং 9নি। নম্বর 9 অসি য়াম্না অফবা মশীংনি হায়না লৌনৈ। মসি পাৱরগী খুদম অমনি। ঙসি ঐহাক্না অদোম অমসুং উত্তরাখন্দদা লাক্লিবা তীর্থযাত্রীশিংদা ৱাফম নিপান হায়জবা পাম্মি। উত্তরাখন্দগী মীয়ামদা ৱাফম মঙা অমসুং লাই খুরুম্বা অমসুং লম্বী চৎপা মীওইশিংদা মরি।
মরুপশিং,
অদোমগী লোলশিং অসি য়াম্না মগুন লৈ। গরহৱালি, কুমৌনি, জৌনসারীগুম্বা লোলশিংবু ঙাক-শেন্দুনা থম্বা অসি য়াম্না মরু ওই। ঐহাক্কী অহানবা ৱাফমদি উত্তরাখন্দগী মীয়াম্না মখোয়গী তুংগী চারোন-শুরোনগীদমক্তা হায়রিবা লোলশিং অসি তাকপীগদবনি। হায়রিবা লোলশিং অসি উত্তরাখন্দগী মশক মওং অদু মপাঙ্গল কনখৎহন্নবগীদমকসু মরু ওই। দেবভুমীগী মীয়াম অসি করম্না মহৌশা অমসুং অকোয়বগী ফিভমবু য়াম্না নুংশিজবগে হায়বসি লৈবাক পুম্বনা খঙই। উত্তরাখন্দ অসি গৌরা দেবীগী লম্নি অমসুং মফমসিগী নুপী খুদিংমক মা নন্দাগী মওং অমনি। ঐখোয়না মহৌশাগী ফিভমবু ঙাক-শেন্দুনা থম্বা অসি য়াম্না মরু ওই। মরম অদুনা, ঐহাক্কী অনিশুবা ৱাফমদি - এক পেদ মা কে নাম, মীপুম খুদিংমক্না মসিগী খোঙজং অসি মাংলোমদা পুখৎকদবনি। ঙসিদি লৈবাক শীনবা থুংনা মসিগী কেম্পেন অসি য়াম্না থুনা চত্থরি হায়বসি অদোম্না উবা ফংলি। উত্তরাখন্দনা মসিগী মাইকৈদা থবক পায়খৎলকপা থুনা, ঐখোয়না ক্লাইমেৎ চেঞ্জগী শিংনবশিং অসি থেংনবদা মতেং পাংগনি। উত্তরাখন্দদা নহল ধারাগী লাইনিং লাইশোন তৌবগী চৎনবী অমা লৈ। নখোয় পুম্নমক্না তুরেলশিং অমসুং নাওলশিং ঙাক-শেন্দুনা থম্নবা, ঈশিং শেংদোক্নবা প্রমোৎ তৌবা কেম্পেনশিং অথুবা মতমদা পাংথোক্নবা হায়জরি। মসি ঐহাক্কী অহুমশুবা ৱাফম্নি। ঐহাক্কী মরিশুবা ৱাফমদি - অদোমগী হৌরকফমগা শম্নদুনা লৈবীয়ু, অদোমগী খুঙ্গংশিংদা চাং নাইনা চৎপীয়ু অমসুং অদোম্না থবক লোইরবা মতুংদা অদোমগী খুঙ্গংশিংদা লেপ্পা লৈতনা চৎপীয়ু। মফম অদুদগী কন্নেক্সন অদু মপাঙ্গল কনখৎহল্লু। উত্তরাখন্দগী মীয়ামদা ঐহাক্কী মঙাশুবা ৱাফম অসিদি - অদোমগী খুঙ্গংগী অরিবা য়ুমশিং, অদোম্না তিৱারী য়ুমশিং হায়না কৌরিবশিং অসি ঙাকপীয়ু। হায়রিবা য়ুমশিং অসি থুগাইরোইদবনি। নহাক্না মখোয়বু হোমস্তে ওইহন্দুনা নহাক্কী ইনকম হেনগৎহন্নবগী পাম্বৈ অমা ওইহনবা য়াই।
মরুপশিং,
উত্তরাখন্দদা লাকপা তুরিস্তশিংগী মশিং অসি চহি খুদিংগী হেনগৎলক্লি। মখোয় অসি লৈবাক অসিগী মফম খুদিংমক্তগী, মপান লৈবাক্তগী লাক্লি। ঙসি, ঐহাক্না তুরিস্ত খুদিংমক্তা ৱাফম মরি থমজগে। অহানবা ৱাফমদি - অদোম্না হিমালয়গী চীংশিংদা চৎপা মতমদা, শেংদোক-শেংজিন তৌববু খ্বাইদগী মরুওইনা লৌবীয়ু। নহাক্না সিঙ্গল য়ুজ প্লাস্তিক শিজিন্নরোই হায়না ৱাশক্লগা চৎলু। অনিশুবা ৱাফমদি মফম অদুদসু ভোকেল ফোর লোকেলগী মন্ত্রশিং অদু নিংশিংবিয়ু। নহাক্কী চৎপা শেলগী য়ামদ্রবদা 5%দি মফম অদুগী মীওইশিংনা পুথোকপা পোৎলমশিংদা শিজিন্নৌ। অহুমশুবা ৱাফমদি - করিগুম্বা নহাক্না চীংগী লমদা চৎলবদি, মফম অদুদা চৎথোক-চৎশিনগী কাংলোনশিং অদু ঙাক্না চৎকদবনি। চেকশিনবিয়ু, মী খুদিংমক্কী পুন্সি অসি মমল য়াম্মী। ঐহাক্কী মরিশুবা ৱাফমদি - চৎত্রিঙৈ মমাংদা ধর্মগী মফমশিংগী চৎনবী অমসুং কাংলোনশিংগী মরমদা খঙজিনবিয়ু। মফম অসিদা ইকায় খুম্নবা উৎপীয়ু। মসিগীদমক্তা, উত্তরাখন্দগী মীয়ামদগী মতেং য়াম্না লৌবা য়াই। উত্তরাখন্দগী মীয়ামদা ঐহাক্না হায়জবা ৱাফম মঙা অমসুং উত্তরাখন্দদা লাক্কদৌরিবা মীয়ামদা ঐহাক্না হায়জবা ৱাফম মরি অসিনা দেব ভুমীগী চাউখৎ থৌরাংদা দেব ভুমীগী শক্তম মপাঙ্গল কনখৎহনবদা অচৌবা থৌদাং লৌগনি।
মরুপশিং,
ঐখোয়না উত্তরাখন্দবু খোঙজেল য়াংনা চাউখৎপগী লম্বীদা মাংলোমদা পুখৎকদবনি। ঐখোয়গী উত্তরাখন্দনা লৈবাক অসিগী ৱারেপশিং অসি মপুং ফাহন্নবগীদমক মখা তানা মরু ওইবা থৌদাং লৌগনি হায়না ঐনা থাজবা থম্লি। উত্তরাখন্দগী সিলভর জুবিলী চহি অসিদা ঐহাক্না অমুক্কা হন্না ময়াম পুম্নমকপু য়াইফ-পাউজেল পীজরি। বাবা কেদরনা ময়াম পুম্নমক্কী পুন্সিদা চাউখৎপা পুরকপা ওইরসনু। হন্না-হন্না থাগৎচরি।
