ঙসি অসি ভারতকী চাউখৎ-থৌরাংগী খোঙচৎকী মরুওইবা মাইলস্তোন অমনি! মসি ভারত মচা করোর 140গী অপাম্বগী বজেৎনি, মসি ভারত মচা খুদিংমক্কী মঙলানশিং মপুং ফাহনবা বজেৎনি। ঐখোয়না নহারোলশিংগীদমক সেক্তর কয়া অমা হাংদোক্লে। চাউখৎলবা ভারতকী মিসন অসি মীচম প্রজাশিংনা লমজিংগনি। মসিগী বজেৎ অসি ফোর্স মলতিপ্লাইয়র অমনি। হায়রিবা বজেৎ অসিনা সেভিং হেনগৎহনগনি, ইনভেস্তমেন্ত হেনগৎহনগনি, কঞ্জ্যুম্পসন হেনগৎহনগনি অমসুং গ্রোথসু খোংজেল য়াংনা হেনগৎহনগনি। জনতা জনর্দন কা বজেৎ, মীয়ামগী বজেৎ অসিগীদমক ঐনা শেল-থুম মন্ত্রী নির্মলা সিতারমনজী অমসুং মহাক্কী তীম পুম্নমকপু থাগৎপা ফোংদোকচরি।
মরুপশিং,
মহৌশানা বজেৎকী মীৎয়েং অসি লৈঙাক্কী ত্রেজরী করম্না থলহনগদগে হায়বসি ওইগনি, অদুবু মসিগী বজেৎ অসিদি মদুগী ওন্ন-তৈনবনি। অদুবু মসিগী বজেৎ অসিনা লৈবাক অসিগী প্রজাশিংগী ফুরিৎ খাও করম্না থলহনগনি, লৈবাক অসিগী প্রজাশিংগী সেভিং করম্না হেনগৎলগনি অমসুং লৈবাক অসিগী প্রজাশিং অসি চাউখৎপা অসিদা মপাংশিং করম্না ওইগনি হায়বগী মতাংদা য়াম্না মপাঙ্গল লৈবা য়ুম্ফম অমা শেম্লে।
মরুপশিং,
হায়রিবা বজেৎ অসিদা রিফোর্মগী মায়কৈদা মরু ওইবা খোংথাং কয়া অমা লৌখৎখ্রে। ন্যুক্লিয়র ইনর্জীদা প্রাইবেৎ সেক্তরবু পুক্নিং থৌগৎপগী ৱারেপ অসি য়াম্না পুৱারী ওইরবা অমনি। মসিনা লাক্কদৌরিবা মতমশিংদা লৈবাক অসিগী চাউখৎ-থৌরাংদা সিভিল ন্যুক্লিয়র ইনর্জীনা অচৌবা থৌদাং অমা লৌবা ঙম্লগনি। বজেৎ অসিদা এমপ্লোইমেন্তকী লম খুদিংমকপু মরুওইবা পীরি। অদুম ওইনমক ঐনা ৱাফম অনিদা পুক্নিং চিংশিনবা পাম্মি, লাক্কদৌরিবা মতম অসিদা অচৌবা অহোংবা পুরকপা য়াবা রিফোর্মশিং অদুগী মতাংদা ঐনা খন্ন-নৈনবা পাম্মি। অহানবদা, ইনফ্রাস্ত্রকচর স্তেতস পীবনা মরম ওইদুনা, ভারত্তা অচৌবা জহাজশিং শাবদা পুক্নিং থৌগৎলগনি, আত্মানির্ভর ভারত অভিয়াননা খোঙজেল য়াংনা চঙশিল্লগনি অমসুং ঐখোয়না পুম্নমক্না খঙই মদুদি জহাজ শাবা অসি থবক খ্বাইদগী য়াম্না পীবা সেক্তর অমনি। মসিগা মান্ননা, লৈবাক অসিদা তুরিজমগী ওইথোকপা য়াবা কয়া অমসু লৈরি। অহানবা ওইনা, মরুওইবা তুরিস্ত দিস্তিনেসন 50দা শাবা হোতেলশিং অসি ইনফ্রাস্ত্রকচরগী লমদা পুদুনা তুরিজমদা অহেনবা মিৎয়েং থম্লি। মসিনা থবক পীবগী য়াম্না চাউবা লম অমা ওইরিবা হোস্পিতালিতী সেক্তরবু পুক্নিং থৌগৎকনি অমসুং থবক পীবগী খ্বাইদগী চাউবা লম ওইরিবা তুরিজম অসিনা নাকল অমদা মফম খুদিংদা থবক ফংহন্নবা খুদোংচাবশিং শেমগৎকনি অমসুং সেক্তর অসিদা পুক্নিং থৌগৎকনি। ঙসিদি, লৈবাক অসিনা দিবেলপমেন্ত অমসুং হেরিতেজকী মন্ত্রগা লোয়ননা মাংলোমদা চংশিল্লি। মসিগীদমক্তা মসিগী বজেৎ অসিদা য়াম্না মরু ওইবা অমসুং কংক্রিৎ ওইবা খোংথাংশিং লৌখৎলি। মেন্যুস্ক্রিপ্ত করোর অমা ঙাক-শেন্নবা জ্ঞান ভারত মিসন হৌদোকখ্রে। মসিগা লোয়ননা, ভারতকী নোলেজ ত্রেদিসনদগী ইথিল ফংলবা নেস্নেল দিজিতেল রিপোজিৎরি অমা শেম্লগনি। মসিনা তাকপদি তেক্নোলোজী অসি মপুং ফানা শিজিন্নগনি অমসুং ঐখোয়গী ত্রেদিস্নেল নোলেজদগী অমৃত লৌথোকপগী থবকসু পাংথোক্কনি।
মরুপশিং,
বজেৎ অসিদা লৌমীশিংগীদমক লাউথোকখিবা ৱাফমশিং অসিনা লৌউ-শিংউগী সেক্তর অমসুং খুঙ্গংগী শেন্মিৎলোন পুম্বদা অনৌবা অহোংবা অমগী য়ুম্ফম ওইগনি। পি.এম. ধন-ধন্যা কৃশী য়োজনাগী মখাদা, জিলা 100দা ইরিগেসন অমসুং ইনফ্রাস্ত্রকচর শেমগৎকনি, অমসুং কিসান ক্রেদিৎ কার্দকী লিমিৎ লুপা লাখ 5দা হেনগৎহনবনা মখোয়দা হেন্না মতেং পাংগনি।
মরুপশিং,
হৌজিত্তি হায়রিবা বজেৎ অসিদা লুপা লাখ 12 ফাওবগী ইনকম অসি তেক্সতগী কোকপীরে। ইনকম কাংলুপ খুদিংমক্কী মীওইশিংগীদমক্তা তেক্সসু হন্থহনখ্রে। ঐখোয়গী মিদ্দল ক্লাস, ফিক্স ইনকম লৈবা থবক তৌরিবা মীওইশিং, অসিগুম্বা মিদ্দল ক্লাসকী মীওইশিংনা মসিগী অচৌবা কান্নবা ফংলগনি। মসিগা মান্ননা, অনৌবা শিনফম অমদা চংলকপা মীওইশিং, অনৌবা থবক ফংলকপা মীওইশিং, ইনকম তেক্সতগী কোকপীবা অসিনা মখোয়গীদমক অচৌবা খুদোংচাবা অমা ওইহল্লগনি।
মরুপশিং,
ওন্তপ্রিন্যুওরশিং, MSMEশিং, অপীকপা ওন্তপ্রিন্যুওরশিংবু মপাঙ্গল কনখৎহন্নবা অমসুং অনৌবা থবক ফংহন্নবা বজেৎ অসিদা মেন্যুফেকচরিংদা 360 দিগ্রী মীৎয়েং থম্মি। নেস্নেল মেনুফেকচরিং মিসনদগী ক্লিন তেক, লেদর, ফুতৱার, তোই ইন্দস্ত্রী ফাওবা সেক্তর কয়াদা অখন্নবা মতেং পীরি। ভারতকী পোত্থোকশিংনা মালেমগী কৈথেলদা মঙাল পীবা ঙমগনি হায়বসি পান্দম অদু ময়েক শেংই।
মরুপশিং,
রাজ্যশিংদা শেল থাদনবগীদমক অচেৎপা কম্পিতিতিব এনভাইরনমেন্ত অমা শেমগৎপদা বজেৎ অসিদা অখন্নবা মীৎয়েং থম্লি। MSMEশিং অমসুং স্তার্ত-অপশিংগীদমক ক্রেদিৎ গেরেন্তী শরুক অনি হেনগৎহন্নবা লাউথোকখ্রে। অনৌবা ওন্তপ্রিন্যুওর অমা ওইবগা লোয়ননা লৈবাক অসিগী ST, SC, অমসুং নুপী ওন্তপ্রিন্যুওরশিংগীদমক লুপা করোর ২ ফাওবগী লোনগী স্কিম অমসু পুরকখ্রে। মসিসু গেরেন্তী য়াওদনা। অনৌবা য়ুগকী শেন্মিৎলোনবু ৱাখলদা থম্লদুনা, বজেৎ অসিদা গিগ ৱার্করশিংগীদমক অচৌবা পাউজেল অমা পীখ্রে। অহানবা ওইনা, গিগ ৱার্করশিং অসি ই-শ্রম পোর্তেলদা রেজিস্তর তৌরগনি। মসিগী মতুংদা, হায়রিবা মরুপ-মপাংশিং অসিনা হেল্থ কেয়র অমসুং অতোপ্পা সোসিএল সেক্যুরিতী স্কিমশিংগী কান্নবা ফংগনি। শিন্মীশিংগী ইকাই খুম্নবা অসিনা সরকারনা শিন্মীশিংগী ইকাই খুম্নবা অদু উৎলি, শ্রমেব জয়তে। রেগ্যুলেতরী রিফোর্মশিংদগী হৌরগা ফাইনান্সিএল রিফোর্মশিং ফাওবদা, জন বিশ্বস 2.0গুম্বা খোংথাংশিং অসিনা মিনিমম গবর্নমেন্ত অমসুং ত্রস্ততা য়ুম্ফম ওইবা লৈঙাক্লোনগীদমক ঐখোয়গী অচেৎপা ফিরেপ অদু হেন্না মপাঙ্গল কনখৎহল্লগনি।
মরুপশিং,
মসিগী বজেৎ অসিনা লৈবাক অসিগী হৌজিক্কী তঙাই ফদবশিং খক্তা য়েংবতা নত্তনা তুংলমচৎকীদমক শেম-শাবদা মতেং পাংই। স্তার্ত অপশিংগীদমক দিপ তেক ফন্দ, জিওস্পেসিএল মিসন অমসুং ন্যুক্লিয়র ইনর্জী মিসন অসি অসিগুম্বা মরু ওইবা খোংথাংশিংনি। ঐহাক্না অমুক্কা হন্না লৈবাক মীয়াম পুম্নমকপু পুৱারী ওইরবা পিপলস বজেৎ অসিগীদমক্তা নুংঙাইবা ফোংদোকচরি। ঐহাক্না অমুক্কা হন্না শেল-থুম মন্ত্রীবুসু নুংঙাইবা ফোংদোকচরি। হন্না-হন্না থাগৎচরি!
