খুরুমজরি মরূপশিং,
নোংজু মীফম অসিদা ঈ-পাউগী লমদগী লেঙশিনবিরিবা ময়াম পুম্নমকপু তরাম্না ওকচরি।
মরূপশিং,
নোংজুথা অসি অনৌবা অমদি মালহৌনবগী খুদম্নি, অমদি হৌজিক ফাওবদা ফংলিবা পাউশিংগী মতুং ইন্না, থারুক অসি লৈবাকসিদা মওং চুম্না চঙশিল্লি, মসিনা লৌউ-শিংউদা কান্নবা পীবগী পাউ ফংলি। লৌমীশিংগী শেন্মিৎলোন্দা, লৈবাকসিগী শেন্মিৎলোন, খুঙ্গংগী শেন্মিৎলোন, অমদি মসিখক্তা নত্তনা, ইমুং খুদিংমক্কী শেন্মিৎলোন্দা নোং হায়বসি য়াম্না মরুওই। হৌজিক ফাওবদা ঐঙোন্দা পীরকপা পাউগী মতুং ইন্না, হৌখিবা চহি ১০ সিদা শেমগৎখিবা ঈশিং তুংফম মশিং হন্দক্তি শরুক অহুমলোম হেনগৎলে হায়রি, মসিমক লাক্কদৌরিবা নুমিৎশিংদা লৈবাকসিগী শেন্মিৎলোন্দা চাউনা কান্নবা পীগদৌরিবনি।
মরূপশিং,
নোংজু মীফম অসি লৈবাকসিগী ওইনা য়াম্না চাওথোকচনিংঙাই ওইবা মীফম অমনি। নোংজু মীফম অসি লৈবাকসিগী ওইনা মায় পাকপগী হরাওবা ফোঙদোকপা মীফম মখল অমনি। ঐনা মীফম অসি লৈবাক্কী চাউথোকচনিংঙাই ওইবা অমদি মায় পাকপগী হরাওবা ফোঙদোকপগী মীফম্নি হায়রিবসিগী মতাঙদা, ঐনা অহানবদা হায়জনিংবদি, ইন্তরনেস্নেল স্পেস স্তেসন্দা ভারতকী মচু অহুমগী ফিরাল অহানবা ওইনা পাইহনখিবা অসিমক লৈবাকসিগী মীপুম খুদিংমক্কী চাউথোকচনিংঙাই ওইবা মীৎকুপ অমনি। মসিমক লৈবাক অসিবু সাইন্স অমসুং তেক্নোলোজী, অমদি ইনোভেসনগী লমদা চঙশিল্লিবা খোঙচত্তা অনৌবা ইনোৎ অমদি ইহুল হাপ্নিংঙাই ওইবা মায় পাক্নলবা খোঙচৎ অমা ওইরি। হৌজিক্তি পার্লিয়ামেন্ত পুম্বনা, লোক সভা অমসুং রাজ্য সভাগী হাউস অনিমক্না, লৈবাক মীয়াম পুম্বনা মখোয়দা ফাওরিবা চাউথোকচবগী ইথিল অমত্তা ওইবা খোঞ্জেলদা ফোঙদোক্লগনি, মসিবু অমত্তা ওইবা খোঞ্জেলদা থাগৎনগনি, মসিমক্না ভারতপু স্পেসকী লমদা অনৌবা পন্দোল লোমহনগদবা তুংগী থৌরাংশিংগী পুক্নিং থৌগৎনফম অমসু ওইরগনি।
মরূপশিং,
নোংজু মীফম অসি মায় পাকপগী হরাওবা ফোঙদোকপা মীফম অমনি। মালেম পুম্বনা ভারতকী লান্মী তেঙ্গোলগী মতিক, ভারত লান্মীগী মপাঙ্গল উখ্রে। ওনরেসন সিন্দুরদা ভারত লান্মীনা থমখিবা পান্দম চাদা ১০০ ফংখি। ওপরেসন সিন্দুরদা, তেরোরিস্ত মকোক্কী ময়ুম মিনত ২২ গী মনুংদা উৎ ওলহনখি। অদুগা ঐনা বিহারদা পাঙথোকপা থৌরম অমদা লাউথোকখি মদুদি ঐখোয়গী লান্মী তেঙ্গোলগী মতিক তেনখ্রবা মতমগী মনুংদা উৎখি। অদুগা মালেম অসিনা ভারত্তা শাজবা লান্মীগী মতিক ময়াইদা পুক্নিং চিংশিনখি। হৌজিক্তি, ঐনা মালেমগী মীয়ামগা উনবদা, ভারত্তা পুথোকচবা খুৎশু খুৎলায়শিংদা মালেম্না পুক্নিং চিংশিনবা হেনগৎলক্লি হায়বা খঙবা ঙমই। হাউস অসিনা মায় পাকপগী মীৎকুপ অসি খোঞ্জেল অমত্তা ওইনা হরাওবা ফোঙদোকপা মতমদা, অমদি পুক্নিংদা ফাওরিবা নুংঙাইরবা ৱাফমশিং ফোঙদোকপা মতমদা, ভারতকী লান্মীগী মতিক হেন্না মপাঙ্গল কনখৎকনি, হেন্না পুক্নিং থৌগৎকনি, লৈবাক মীয়াম্না পুক্নিং থৌগৎনফম ওইগনি, অমদি ভারতকী ঙাকশেলগী খুৎলায়শিং পুথোকপদা পায়খৎলিবা থিজিন-হুমজিনবা, অনৌবা ৱাখল্লোন্দা ইনোৎ হাপকনি, অমদি ভারতকী নহাশিংগী থবক ফংনবা অনৌবা তাঞ্জাশিং শেমগৎকনি হায়না ঐনা থাজৈ।
মরূপশিং,
দেকেদ অসিদা ঐখোয়না ইং-তপ্পা অমদি খুমাঙ চাওশিনবা অনি তুনা চৎমিন্নবা মতমদা খোঙথাং খুদিংদা মায় পাক্না চঙশিনবা ঐখোয়না উবা ফংলি। লৈবাক অসি মখল কয়াগী হিংসাগী থৌদোকশিংনা অৱাবা পীদুনা লাক্লে, মতম শাংনা অৱাবা থেংনদুনা লাক্লি, হায়রিবা ফীভমশিং অসি ঐখোয়না নীং-খা তম্লকপা মতমদগী হৌনা থেংনদুনা লাক্লবনি। তেরোরিজম ওইরবসু, নৎত্রগা নক্সলিজম ওইরবসু, খরনা ঙল্লিঙৈদগী হৌরকখি, অদুগা খরনা থেংনা হৌরকখি। অদুবু ঙসিদি নক্সলিজম, মাউইজমগী ঙমখৈ থুনা পীকশিল্লক্লি। মাউইজম অমসুং নক্সলিজমবু মরু ফংনা মুত্থৎনবা পান্দমগা লোয়ননা, লৈবাকসিগী সিক্যুরিতী ফোর্সনা অনৌবা থাজবা অমগা লোয়ননা খোঙজেল য়াঙনা মাঙদা চঙশিল্লি। ঐনা মতাঙসিদা চাউথোক্না হায়বা ঙমই মদুদি লৈবাকসিগী দিস্ত্রিক্ত চা কয়া নক্সলিজমগী খুবাম্নুংদগী নান্থোরক্লে অমদি ঙসিদি নীংতম্বগী নিংশা হোল্লি। বোম্ব, নোংমৈ, অমদি পিস্তোলগী মমাঙদা, লৈবাকসিগী সংবিধান্না মায় পাকপা উবদা, ঐখোয়গী লৈবাকসিগী সংবিধান্না মায় পাক্লকপদা ঐখোয়দা চাউথোকচবা পোকই। লৈবাকসিগী তরং তরংবা তুংলমচৎ অমগীদমক, ঙরাং ফাওবা লৈরম্বা অঙাংবা কোরিদোরশিং অদু ঙসিদি অশঙ অমানগী মফম ওন্থোরকপা তশেং তশেংনা উবা ফংলে।
মরূপশিং,
অসিগুম্বা থৌদোকশিং অমগী মথংদা অমা থোক্লকপা হায়বসি মরৈবাক নিংবা অমদি লৈবাক্কীদমক য়াফনবা খন্দুনা পার্লিয়ামেন্ততা য়ৌরক্লিবা ইকায়খুম্নরবা এমপি খুদিংমক্কী চাউথোকচনিংঙাইগী মীৎকুপ অমনি। অদুগা পার্লিয়ামেন্তকী মীফম অসিদা লৈবাক পুম্বনা চাউথোকচবগী শৈশক অসি তাবা ফংলগনি, এমপি খুদিংমক্তগী তাবা ফংলগনি, পার্তী খুদিংমক্তগী তাবা ফংলগনি।
মরূপশিং,
শেন্মিৎলোনগী লমদসু, অদোম্না ঐখোয়দা ২০১৪ দা থৌদাং শিন্নবিরকপা মতমদা লৈবাক অসি ফ্রেজাইল-৫ গী থাক্তা লৈরম্মি। ২০১৪ গী মমাঙদা, ঐখোয় মালেমগী শেন্মিৎলোন্দা ১০ শুবা মফমদা লৈরম্মি, অদুগা ঙসিনা ভারতনা মালেমগী অহুমশুবা খ্বায়দগী চাউবা শেন্মিৎলোন ওইরক্নবগী লম্বীদা খোঙজেল য়াঙনা চঙশৎল্লি, থোংজিন্দা লেপ্লরবনি। হন্দক মরকসিদা, মীওই করোর ২৫ লায়রবগী পনখৈগী ৱাংমদা কাখৎলক্লি, মসিমক মালেমগী ইন্সতিত্যুসনশিংনা শিংথানরি। ২০১৪ গী মমাঙদা ইনফ্লেসন রেত দবল দিজিত ওইরম্বা মতম অমা লৈরম্মি, অদুবু ঙসিদি মসি চাদা ২ গী ময়াদা কুমথরক্লে অমদি লৈবাকসিগী মীচম মীয়ামগী পুন্সিদা অৱাবা কোকপা অমদি খুদোংচাবগী পুংফম অমা ওইরে। ইনফ্লেসন নেম্লগা গ্রোথ ৱাংবা হায়বসি অফবা চাউখৎ খোঙচৎ অমগী মায়কৈদা চঙশিল্লি তাকপনি।
মরূপশিং,
ঙসিদি মালেম অসিনা ভারতকী অনৌবা মতিংশিং, দিজিতেল ইন্দিয়া অমদি UPI গী মওংদা উরি অমদি শকখঙলি, অমদি লৈবাক অয়াম্বনা মসিদা পুক্নিং চিংশিল্লি। ফিনতেক্কী তাইবংদা UPI না মশাী মফম অমা কঞ্জরে। রিএল তাইম দিজিতেল ত্রাঞ্জেক্সন মালেমগী ওইনা খ্বায়দগী ৱাংবা ওইরি; মালেমগী মফম অমা হেক্তদা তৌনবগী চাংদগী ভারতখক্তদা তৌনবা দিজিতেল ত্রাঞ্জেক্সন্না মশিং য়াম্না হেল্লি।
মরূপশিং
হন্দক্তা, ইন্তরনেস্নেল লেবর ওর্গনাইজেসনগী মালেমগী ওইবা কন্ফরেন্স অমা পাঙথোকখি, অমদি মদুদা ভারতনা খ্বায়দগী ৱাংবা মফম ফংবা ঙমখি। ILO না, ভারত্তা মীওই করোর ৯০ হেনববু সোসিএল সিক্যুরিতীগী মখাদা কোনশিল্লে হায়খি, মসিমক মশানা অচৌবা মায় পাকপা অমনি। মতৌ অসুম্না মালেমগী লুপ WHO না ভারত হৌজিক্তি নোংজুথা মতমদা থোক্কনবা মীৎকী লায়না ত্রেকোমা লৈত্রে হায়খ্রে। হৌজিক্তি WHO না ভারতপু ত্রেকোমা লৈতবা লৈবাক্নি হায়না লাউথোকখ্রে, অদুনা হকশেলগী লমদসু মসিমক ভারতকী অচৌবা মায় পাকপা অমনি।
মরূপশিং,
মালেম পুম্বা পহলগামগী তমথিবা মীহাৎ, মীওৎ মীনৈদা নুংনাংবা পোক্নখি। মালেম পুম্বগী মীৎয়েঙ তেরোরিস্তশিং অমদি মখোয়গী মকোকশিংদা থম্নখি। মতমদুদা, পার্তীগী খেন্নবা নাথৈরম্লগা, লৈবাক্কী য়াইফনবগীদমক, ঐখোয়গী অয়াম্বা পার্তীগী মীহুৎশিংনা, স্তেত অয়াম্বগী মীহুৎশিংনা মালেমগী মফম কয়াদা চৎখি, লৈবাক কয়াদা চৎখি, অমদি তেরোরিস্তকী মকোক ওইরিবা পাকিস্তানবু মালেমগী মমাঙদা পুথোক্তুনা থম্নবা মায় পাক্না কেম্পেন চত্থনখি। ঙসি, ঐহাক্না অদুগুম্বা এমপিশিং, পার্তী পুম্নমকপু লৈবাক্কী য়াইফনবগীদমক পায়খৎখিবা মরুওইবা থবক অদুগীদমক তৌবিমল খঙবা উৎচরি, অমদি মসিনা লৈবাকসিদা অফবা ফীভম অমা পুরকখি। মালেম অসিনা ভারতকী মীৎয়েঙবু য়ানিংবগী খোঙফম লেপ্নখি, অমদি মসিগীদমক ঐখোয়গী এমপিশিং, পার্তীশিংবু থাগৎচবা ফংজবা ঐহাক্কী লাইবক ফবনি।
মরূপশিং,
লিংজেল মান্নবগী অমত্তা ওইবা খোঞ্জেল, অমত্তা ওইবা ফীভমগী ৱাখল্লোন্না লৈবাক অসিদা কমদৌনা শিন-থুংখি হায়বা ঐখোয় খঙই। হায়রিবা মায় পাকপগী হরাওবা ফোঙদোকপা অসিমক চপ মান্নবা ৱাখল্লোন্দা নোংজু মীফম অসিদা মমি তাবা ফংগনি, মীফম অসিনা লৈবাক অসিগী লান্মীগী মতিক থাগৎনগনি, লৈবাক্কী মপাঙ্গল শক-শোনগনি, অমদি ভারত মচা করোর ১৪০ গী পুক্নিং থৌগৎনফম অমা ওইগনি। ঐখোয় পুম্নমক্না ঙাকশেলগী লমদা ইরোমদোম লেপচবা ঙম্নবা হোৎনরিবা অসিদা মপাঙ্গল হাপমিন্নগনি, লান্মীগী মপাঙ্গলবু থাগৎমিন্নগনি হায়না ঐনা থাজৈ। অদুগা ঐহাক্না ঙসি লৈবাক মীয়ামগী মফমদা শোয়দনা হায়গদবা, অমদি লৈবাকসিগী পোলিতিকেল পার্তীশিংগী মফমদা হায়গদবা ৱাফমদি লৈবাক অসিনা লিংজেল মান্নবগী মতিক উবা ফংখ্রে, অমত্তা ওইবা খোঞ্জেলগী মতিক উখ্রে, মরম অসিনা ইকায়খুম্নরবা হাউসকী এমপিশিংনা মসিদা পাঙ্গল হাপ্পিদুনা ফীভম অসিবু মাঙদা পুখৎপিয়ু। ঐনা হায়জগদবা ৱাফম অমনা পোলিতিকেল পার্তীশিং অসি খেন্নৈ, পুম্নমক্কী মশাগী ওইবা এজেন্দা অমমম লৈজৈ, মখোয়গী শক্লোনসু লৈজৈ, অদুবু ভোততি পার্তীগী য়াইফনবদা ফংলোই, অদুবু মীয়ামগী থম্মোয়দি লৈবাক্কী য়াইফনবা খনবদা ফংগনি। হায়রিবা পুক্নিং ইথিল অসিগা লোয়ননা, লৈবাক্কী চাওখৎ খোঙচত্তা ইনোৎ হাপকদবা, লৈবাক্কী খোঙজেল য়াঙখৎহনগদবা, লৈবাক্কী মীয়াম মপাঙ্গল হাপকদবা বিল কয়া নোংজু মীফম অসিদা পুথোকচরি। হাউসনা মখোয়বু নীংথিনা খন্নবিরগা পাস তৌবিগনি। ঐহাক্না ইকায়খুম্নরবা এমপি পুম্নমক্কী মফমদা অফবা মওংদা য়েৎনবিনবা নোল্লুকচরি।
হন্না হন্না থাগৎচরি।
