ময়াম পুম্নমকপু হন্না-হন্না থাগৎচরি!
মীওইবা জাতিগীদমক অচৌবা থবক অমা তৌরুরবা মতুংদা নখোয়না হল্লকখি। ওপরেসন দোস্ততা য়াওখিবা অপুনবা তীম, এন.দি.আর.এফ., আর্মী, এয়রফোর্স নত্ত্রগা অতোপ্পা সর্ভিসেসকী পার্তনরশিং ওইরবসু মখোয়না শীংথানীংঙাই ওইনা থবক তৌখি অমসুং ঐখোয়গী লোনথোক্ত্রবা মরুপ, দোগ স্বাদশিংগী মেম্বরশিংনা মখোয়গী তৌবা ঙম্বা অদু উৎখি। লৈবাক অসিনা নখোয় পুম্নমক্কীদমক য়াম্না চাউথোকচবা পোকই।
মরুপশিং,
ঐখোয়গী কলচরনা ঐখোয়দা বসুধৈব কুতুম্বকম তাকপীখি অমসুং মন্ত্রশিং অসি লৌথোকখিবা ৱাহৈ পরেং অদু য়াম্না ইথিল পীনীংঙাই ওই। অয়ম নিচ: পরো বেতি গননা লঘু চেতসাম। উদারচরিতানাম তু বসুতৈব কুতুম্বকম।। হায়বদি পুকচেল চাউবা মীওইনা মখোয়গী মীতোপশিংগী মশিং পাদে। পুকচেল চাউবগী গুন চেনবা মীওইশিংগীদি মালেম পুম্বা অসি ইমুং অমনি। মরম অসিনা মখোয়না মীওইবা অসিবু মখোয় মশাগী খন্না শেবা তৌই।
মরুপশিং,
তর্কী নত্ত্রগা সিরিয়া ওইরবসু তীম পুম্বনা মখোয়গী ভারত মচা ওইবগী গুনশিং অদু উৎখি। ঐখোয়না মালেম পুম্বা অসিবু ইমুং অমা ওইনা লৌই। অসিগুম্বা ফীভম অমদা করিগুম্বা খুদোংথিবা অমা থোক্লবা নত্ত্রগা ইমুংগী মীওই অমা হেক্তা অৱাবা নংলবদা খোঙজেল য়াংনা মতেং পাংবা হায়বা অসই ভারতকী ধর্মনি, ভারতকী থৌদাংনি, করিগুম্বা মীওইবা খুন্নাই, মীওইবগী সেন্সিতিবিতীগী ৱাফম লাকপা তারবদি ভারতনা মীওইবগী মতেং পাংবা হায়বা অসি খ্বাইদগী মরু ওইনা লৌই।
মরুপশিং,
মহৌশাগী খুদোংথিবা থোকপা মতমদা মতেং কয়াম থুনা পীবা ঙম্বা হায়বা অসি য়াম্না মরু ওই, মসি খুদোংথিবা অদুগী খ্বাইদগী মরু ওইবা পুংফমনি। সপ্পোর্ত তীম কয়াম থুনা য়ৌরকপা অসি মরু ওই। নখোয়না তর্কীদা য়ুহার হাখ্রবা মতুংদা খোঙজেল য়াংনা মফম অদুদা য়ৌশিনখিবা অদুনা মালেম পুম্বগী মীৎয়েং চীংশিনখি। মসিনা নখোয়গী শেম-শাদুনা লৈবা, নখোয়গী ত্রেনিংগী কান্নবা মহৈ ফংই হায়বা উৎলি। নুমিৎ ১০ চুপ্না কত্থোকপগা লোয়ননা নখোয়না মফম অদুদা থবক তৌখিবগী মওং, শীংনবা খুদিংমক মায়োক্নখিবা অদু তশেংনা ইথিল পীনীংঙাই ওই। ঐখোয় পুম্নমক্না মদুগী মমিশিং উখ্রে, ইমা অমনা নখোয়গী লাইবক্তা চুপ্পীদুনা থৌজাল পীখি। নখোয়না হোৎনবনা করিসু খঙজদ্রিবা থৱায়না অকাই অতোই মরক্তগী অমুক থোরক্তুনা পোমশাৎনবা ঙমহনখি। অতেক অকাই মরক্তা নখোয়না অৱাবা মায়োক্নখি। অদুবু ঐহাক্না হায়জনীংবদি মফম অদুদগী থোরকপা মমি খুদিংমক উবদা লৈবাক পুম্বনা চাউথোকচবনা থনখি। প্রোফেসনেসলিজমগা লোয়ননা ভারতকী তীমনা হ্যুমেন সেন্সিতিবিতী উৎখিবা অদু চাংদম্নবা য়ারোই। মীওই অমনা অৱাবা তারিঙৈদা, মীওই অমনা পুম্নমক মাংখ্রবা মতুং ৱাখল তারকপদা মসি য়াম্না মমল য়াম্মি। আর্মী হোস্পিতাল অমসুং মাগী পর্সনেলনা অদুগুম্বা ফীভমশিংদা তৌখিবা থবক অদু শীংথানীংঙাই ওই।
মরুপশিং,
২০০১দা গুজরাত্তা য়ুহার হাখিবা মতমদা মদু মমাংগী চহিচাগী খ্বাইদগী চাউবা য়ুহার হাবনি হায়না লৌনখি, মদুদগীসু হন্দক্কী অসিনা য়াম্না চাউবা হেল্লি। গুজরাত্তা য়ুহার হাখিবা মতমদা ঐহাক্না মতম শাংআ মী কনবগী থবক থৌরমদা য়াওখি। অতাই অতোই লৌথোকপদা মায়োক্নখিবা অৱাবা, অকাই অতোই মরক্তা মীওইশিং থীবদা অৱাবা মায়োক্নখিবা, চানা থক্নবগী অৱাবা মায়োক্নখিবা, হীদাক লাংথকশিংদগী হৌরগা হোস্পিতালগী মথৌ তাবশিং, ভুজতা লৈবা হোস্পিতাল পুম্নমক পুমকাই কাইবা ঐহাক্না উবা ফংখি। হায়বদি অপুনবা সিস্তেম অদু পুম-মাং মাংখি। মসি ঐহাক্না হকথেংননা থেংনখি। মতৌ অসুম্না ১৯৭৯দা গুজরাতকী মোর্বীদা লৈবা মচ্চু দাম কাইবা মতমদা ঈশিংনা খুঙ্গং পুম্বা মাং তাকহনখি, মোর্বীগী অপুনবা সহর মাংতাকখি, মীওই কয়া শীখি। মতম অদুদসু ঐহাক্না ভোল্যুন্তীয়র অমা ওইনা থা কয়া মফম অদুদা লৈ অমসুং থবক তৌখি। ঐগী হৌখ্রবা মতমগী অৱা-নুংঙাই অদু নীংশিংলুরগা নখোয়না কয়াম কন্না হোৎনরমগনি হায়বা ঐহাক্না মুন্না খঙবা ঙম্মি। নখোয়না মফম অদুদা থবক তৌরগা ঐহাক্না মফম অসিদা থমোয়দা ফাওবা ঙম্মি। মরম অসিনা ঙসি নখোয়বু ইকাই খুম্নবা উৎনবা ঐহাক্না খুদোংচাবা অসি লৌজরি।
মরুপশিং,
কনাগুম্বনা মশাগী মতেং মশানা পাংজবা ঙম্লবদি মদুবু সেল্ফ সফিসিএন্ত হায়না কৌই। কনাগুম্বা অমনা অতোপ্পবু মতেং পাংবা ঙম্লবদি মহাক অদু সেল্ফলেস কৌই। মসি মীওই অমগী ৱা খক্তা নত্তে মসি জাতি অমগীদমক্তসুনি। মরম অসিনা ভারতনা হৌখিবা মতমশিংদা সেল্ফ-সফিসিএন্ত ওইবগা লোয়ননা সেল্ফলেস ওইবগী আইদেন্তিতী অসি মপাঙ্গল কনখৎহনখি। মচু অহুমগী ফিরালগা লোয়ননা ঐখোয়না য়ৌরকপা মতমদা ভারতকী তীম য়ৌরক্লে হায়না ঐখোয়দা থাজবা পীরকই, ফীভম ফগৎলগনি হায়না ফাওবহল্লি অমসুং সিরিয়াগী থৌদোক অমগী মতাংদা হায়রকখি মদুদি ফিরাল থেৎপা বোক্স য়ৌরকপা মতমদা মদু মথক মখা ওন্নখি মদু মখোয়না ওন্থোক্নরগা চাউথোক্না হায়খি ভারত য়ৌরক্লে অমদি ভারতপু ইকাই খুম্নজরি। মতম খরগী মমাংদা ঐখোয়না য়ুক্রেন্দা মচু অহুমগী ফিরালগী চপ মান্নবা থৌদাং অসি উবা ফংখি। ভারতকী প্রজাশিং লোয়ননা লৈবাক কয়াগী মরুপশিংগীদমক ভারতকী মচু অহুমগী ফিরালনা চুঙ্গোই ওইখি। ওপরেসন গঙ্গানা মীপুম খুদিংমক্কী আশাগী মঙাল ওইনা অচৌবা খুদম ওইখি। ঐখোয়না অফঘানিস্তান্দা য়াম্না অৱাবা তাবা মতমদা ওপরেসন দেভিশক্তি চত্থদুনা মীওই কয়া কনবা ঙমখি। ঐখোয়না কোরোনাগী মালেমগী লাইচৎ মনুংদসু মসি উবা ফংখি। তম্বা ঙমদবা ফীভম অদুদা ভারতনা প্রজা খুদিংমক তেক্তা কাইদনা পুরক্নবা থৌদাং লৌখি। ঐখোয়না অতোপ্পা লৈবাকশিংগী মীওই কয়াগী মতেং পাংখি। ভারতনা মালেমগী লায়রবা লৈবাকশিংদা হীদাক-লাংথক অমসুং ভেক্সিনশিং সপ্লাই তৌখি। ঙসি অফবা থবক্কীদমক মালেমনা ভারতপু খঙনরি।
মরুপশিং,
ওপরেসন দোস্তনা ভারতনা মীওইবা খুন্নাইগীদমক কত্থোকপগী অমসুং অৱাবা তারবা লৈবাকশিংদা খুদক্তা মতেং পাংনবা ঐখোয়গী ফিরেপকী মমি তারি। মালেমগী মফম অমা হেক্তদা অৱাবা অমা তাবা মতমদা ভারতনা ফার্স্ত রেস্পোন্দর ওইনা মতেং পাংনবা মতম চুপ্পদা শেম শাদুনা লৈ। নেপালগী য়ুহারহাবা, মাল্দীপকী অৱাবা, শ্রী লঙ্কাগী অৱাবা ওইরবসু ভারতনা মতেং পাংনবা মাং থাখি। হৌজিক লৈবাক অসিগী খক্তা নত্তনা অতোপ্পা লৈবাকশিংনা ইন্দিয়ন ফোর্সেসতা লোয়ননা এন.দি.আর.এফ.তা থাজবা থম্বা হেনগৎলক্লি। চহি খরা অসিদা এন.দি.আর.এফ.না লৈবাক্কী মীয়াম মরক্তা অফবা মীংচৎ পুরকপা ঙমখি। লৈবাক্কী মীয়াম্না নখোয় উবদা থুনমক থাজৈ। নখোয়না হায়বা তারি। খুদোংথিবগী মতম অমা হেক্তদা সাইক্লোন, ইচাই নত্ত্রগা য়ুহার হাবগুম্বা ওইরবসু এন.দি.আর.এফ.কী য়ুনিফোর্ম শেৎপশিংনা ফিল্দদা য়ৌরকপগা মীয়ামদা থাজবা পোকহল্লি। মসিমক অচৌবা মাইপাকপা অমনি। স্কিল লৈবা ফোর্সতা সেন্সিতিবিতী হাপচিনবা মতমদা মসিনা হ্যুমেন ফেস ওইরকখী, শক্তি শরুক কয়া হেনগৎলকখি। মসিগীদমক ঐহাক্না এন.দি.আর.এফ.পু অখন্ননা থাগৎচরি।
মরুপশিং,
নখোয়না শেম-শাদুনা লৈরিবা অসিদা লৈবাক্না থাজবা থম্মি। অদুবু ঐখোয়না মফম অসিদা লেপ্পদি য়াদে। খুদোংথিবা থোকপা মতমদা তেংবাং পীবা অমদি মী কনবগী ঐখোয়গী কেপাসিতী অসি হেনগৎহনখি। মালেমগী খ্বাইদগী ফবা তেংবাং পীবা অমদি মী কনবগী থবক চত্থবা তীম ওইনা ঐখোয়গী আইদেন্তিতী মপাঙ্গল কনখৎহনবা তাই। ঐখোয়না থৌদাং লৈনা থবক তৌই অমসুং মীওইবা খুন্নাইগীদমক খল্লি, অদুবু ঐখোয়না অসিগুম্বা অচৌবা খুদোংথিবগী থৌদোকশিং অসিদগী কয়া অমসু তমশিনবা ফংই। ঐখোয়না অসিগুম্বা ফীভমদা থবক তৌবদা অনৌবা ৱাফম ১০ উবা ফংই। মসিদা ঐখোয়না হেন্না ফবা মওংদা তৌবগী মরমদা খঙবা নত্ত্রগা অতোপ্পনা পাইখৎপা চপ মান্নবা থৌওংশিং তুংইনবগী মরমদা খঙবা ঙম্মি। অমসুং মসিনা ঐখোয়গী কেপাসিতী হেনগৎহনখি। ঐখোয়না তর্কীগী মীয়ামগীদমক নুমিৎ ১০নি অসিদা ঐখোয়গী থৌদাং পাঙথোকখি। অদুবু মফম অদুদা থেংনখিবা অৱা-নুংঙাইবা অদু নীংথিনা দোক্যুমেন্তেসন তৌবা চংই। খুদোংথিবা অসিদগী করি অনৌবা তমশিনবা য়াই? অসিগুম্বা শীংনবশিং অসি থেংনবদা ঐখোয়গী কেপাসিতী করম্না হেনগৎহনবা য়াই? হৌজিক অহানবা ওইনা ঐখোয়গী ইচানুপীশিংনা মফম অদুদা চৎপা য়াওরি। ঐখোয়গী ইচানুপীশিংনা চৎপনা মফম অদুগী নুপীশিংগী মরক্তা থাজবা পোকহনখি। মখোয়গী নুংঙাইতবা অদু নীংথিনা ফোঙদোকপা ঙমহনখি। অসিগুম্বা অৱাবা থবক্কীদমক ঐখোয়গী ইচানুপীশিং থাগনি হায়না হান্না খল্লুদে। অদুবু হন্দক্তি মফম অদুদা ইচানুপীশিং থানবা ৱারেপ লৌখি। ইচানুপীশিংগী মশিং য়ামজদ্রবসু মসিগী থৌশিল অসিনা মফম অদুদা মরী অমা থম্বদা চাউনা মতেং পাংখি। ঐহাক্না থাজৈ মদুদি ঐখোয়না হেন্না নীংথিনা ইশাবু শেম শাজদুনা মালেমগীদমক হেন্না নীংথিনা শেবা তৌবা ঙমগনি।
মরুপশিং, ঐহাক্না থাজৈ মদুদি নখোয়না থবক কয়া তৌখ্রে অমসুং কয়া অমা তমশিনখ্রে। নখোয়না তৌখিবা থবক অদুনা লৈবাক অসিগী ইকাই খুম্নবা হেনগৎহনগনি। করিগুম্বা ঐখোয়না তমশিনখিবা অদু ইন্সতিত্যুস্নেলাইজ তৌরবদি ঐখোয়না তুংগীদমক অনৌবা থাজবা অমা শেমগৎপা ঙমগনি। অমসুং ঐহাক্না থাজৈ মদুদি নখোয় অমমমগী ৱারী অমা লৈজরমগনি অমসুং মসিগীদমক শিয়র তৌনবা অৱা-নুংঙাই লৈরমগনি। ঐহাক্না নখোয় অনা অয়েক য়াওদব্রা হায়না মতম চুপ্পদা হংখি মরমদি মফম অদুগী খুদোংচাদ্রবা অইং অশাগী ফীভম অদুনা মরম ওইদুনা মফম অদুদা অমত্তা শিল লাংলমলোই খঙই। অদুবু নখোয়না অদুগুম্বা অৱাবা ফীভম অদুদা থবক তৌদুনা লৈবাক অসিবু চাউথোকচবা পোকহনখি। তুংদা কান্নগদবা কয়া অমা নখোয়না তমশিনখি। ঐহাক্না থমোয় শেংনা থাগৎপা ফোঙদোকচরি। ঙসি নখোয়না হল্লক্লগা নখোয় ৱারগনি হায়বা ঐসু খঙই। অদুবু ঐহাক্না হৌখিবা নুমিৎ ১০নি অসি নখোয়গী তোইনা পাও লৌনদুনা নখোয়গী মরমদা হঙখি। নখোয়গা মেন্তেল্লী কন্নেক্ত তৌখি অমসুং মসিনা মরম ওইদুনা ঐহাক্না নখোয়বু মফম অসিদা কৌবনি। ঐহাক্না ময়ামবু অমুক্কা হন্না ইকাই খুম্নবা উৎচরি। থাগৎচরি!
