খুরুমজরি!
মেঘালয়গী মীয়াম পুম্নমক্তা রাজ্য অসি শেমখিবগী গোন্দন জুবিলী সেলেব্রেসন পাঙথোকপা অসিদা হন্না-হন্না নুংঙাইবা ফোঙদোকচরি! ঙসি, ঐহাক্না মেঘালয় শেমগৎপদা অমসুং চাউখৎহনবদা শরুক তমখিবা মীপুম খুদিংমক্তা নুংঙাইবা ফোঙদোকচরি। মেঘালয়গীদমক চহি ৫০গী মমাংদা স্তেৎহুদকীদমক খোলাউ লাউখিবশিং অদুদগী মশক নাইবা মীওই খরা ঙসিগী থৌরম অসিদা শরুক য়ারি। মখোয়বসু ঐহাক্না ইকাই খুম্নবা উৎচরি!
মরুপশিং.
ঐহাক্না মেঘালয় অসি কয়ারক চৎপা ফংজখ্রে। অহানবা ওইনা মীয়ামদা ঐঙোন্দা প্রধান মন্ত্রী ওইনা থৌ পুনবগী খুদোংচাবা পীবিখিবা মতমদা ঐহাক্না নোর্থ ইস্তর্ন কাউন্সিলগী মীফম য়াওনবা শিল্লোংদা লাকখি। চহি দিকেদ অহুম-মরিগী মতুংদা প্রধান মন্ত্রী অমনা থৌরম অসিদা শরুক য়ান্নবা শিল্লোংদা চৎখিবগী খোংচৎ অদু কাউঙমদবা থৌদোক অমা ওইখি। হৌখিবা চহি ৫০ অসিদা মেঘালয়গী মীয়াম্না মহৌশাগা খ্বাইদগী নক্নবা মীওইশিং ওইবগী মশক অদুবু মখাতানা মপাঙ্গল কনখৎহনবদা ঐহাক্না নুংঙাইবা পোকই। মেঘালয় অসি নীংথিজরবা ঈশিং চাইবীশিং য়েংনবা, অরুবা অমসুং অচীকপা অকোইবগী ফীভমগী নুংঙাইবা ফংনবা, অদোমগী তোপ-তোপ্পা চৎনবী অদুগা কন্নেক্ত তৌনবা লৈবাক অসিগী অমদি মালেমগী ওইনা পুক্নিং চীংশিল্লিবা মফম অমা ওইরক্লি।
মেগালয়না মহৌশাগী, খুমাং চাউশিনবগী, কঞ্জর্বেসনগী অমসুং ইকো-সস্তেনেবিলিতীগী পাউজেল অদু মালেমদা পীরি। খাসী, গারো অমসুং জনয়তিয়া কাংলুপশিংগী ঐখোয়গী ইচিল-ইনাওশিংবু মসিগীদমক অখন্ননা থাগৎনীংঙাই ওই। কাংলুপশিং অসিনা মহৌশাগা লোয়ননা পুন্না হিংনবা পুক্নিং থৌগৎখি অমসুং কলা, ঈশৈ-নোংমাই মগুন হাপ্পদা চাউনা শরুক তমখি। ‘ৱিস্তলিং ভিলেজ’ হায়বদি কোংথোং খুঙ্গংনা গী চৎন-লোনচৎনা ঐখোয়গী হৌরকফমগা লৈনরিবা লোইনাইদ্রবা মরী অসিবু থৌগৎখি। মেঘালয়দা লৈবা খুঙ্গং খুদিংমক্না কোইরগী মমল য়াম্লবা চৎনবী অসি ঙাক্তুনা থম্লি।
লমদম অসিদা হৈথোই শিংথোইরবা আর্তিস্ত কয়ামরুম লৈরি। শিল্লোং চেম্বর কোইরনা মসিবু অনৌবা মশক অমা তাক্লি, মসিগী চৎনবী অসিবু অৱাংবা থাক্তা পুখৎলি। কলাগা লোয়ননা মেঘালয়গী নহারোলশিংনা শান্ন-খোৎনবগী লমদসু লৈবাক অসিবু মশক তাকপা হেনগৎলক্লি। অসুম্না ঙসি ভারতনা শান্ন-খোৎনবদা অচৌবা পাঙ্গল অমা ওইহন্নবা মাংদা চংশিল্লিবা তানফম অসিদা মেঘালয়গী অচৌবা স্পোর্তস কলচর অসিদা লৈবাক অসিনা চাউনা আশা থম্লি। মেঘালয়গী ইচে ইচলশিংনা বেম্বু ৱীভিং অমসুং কেন ৱীভিংগী কলা অদু অমুক হিংগৎহনখ্রে অমসুং মফম অসিগী শুবা নোম্বা কনবা লৌমীশিংনা মেঘালয়বুঅ ওর্গানিক রাজ্য অমা ওইনা মশক তাকপদা মপাঙ্গল কনখৎহল্লি। গোল্দন স্পাইস, লখাদোং য়াইঙং থাবা অসি মালেম শিনবা থুংবদা পাম্নরক্লি।
মরুপশিং.
হৌখিবা চহি ৭ অসিদা কেন্দ্র সরকারনা মেঘালয়গী চাউখৎ খোঙচৎ অসিবু খোঙজেল য়াংখৎহন্নবা থমোয় শেংনা হোৎনখি। কেন্দ্র সরকারনা লম্বী থোংশিং, রেল অমসুং এয়র কন্নেক্তিবিতী ফগৎহন্নবা মপুং ফানা হোৎনখি। লৈবাক অসিদা অমদি মপাল লৈবাক্তা ওর্গানিক প্রদক্তশিংগী অনৌবা কৈথেলশিং ফংনবা মরু ওইবা মীৎয়েং চংদুনা থবক পাইখৎখি। নহা ওইরিবা মুখ্য মন্ত্রী কোনরাদ সঙ্গমাজীগী লুচিং মখাদা কেন্দ্রগী স্কীমশিং অসি মীচম মীয়ামদা য়ৌহন্নবা খোঙজেল য়াংনা হোৎনখি। পি.এম. গ্রামিন সরক য়োজনা, নেস্নেল লাইবলিহুদ মিসন অসিগুম্বা প্রোগ্রামশিংদগী মেঘালয়না চাউনা কান্নবা ফংখি। জল জীবন মিসন্না মরম ওইরগা মেঘালয়দা তোতি ঈশিং ফংবা য়ুমথোংশিংগী মশিং অসি চাদা ৩৩ হেনগৎখি। ইং কুমজা ২০১৯ ফাওবদা হায়বদি চহি অহুমগী মমাংদা ঈশিং ফংবা ইমুং অসি শুপ্নগী চাদা ১ খক্তা ওইরমখি। ঙসি লৈবাক অসিনা পব্লিক ফেসিলিতীশিং চাউনা ফংহনবদা দ্রোন তেক্নোলোজী শীজিন্নদুনা মাংদা চংশিল্লি, মেঘালয় অসি দ্রোনশিংগী খুত্থাংদা কোরোনাগী ভেক্সিনশিং য়ৌহনখিবা লৈবাক অসিগী অহানবা রাজ্যশিংগী মনুংদা অমা ওইখি। মসি হোংলক্লিবা মেঘালয়গী মশক অদুনি।
ইচিল-ইনাওশিং,
মেঘালয়না মাইপাকপা কয়া পুরকপা ঙমখ্রে। অদু কয়া অমসু ফংগদবা লৈরি। তুরিজম অমসুং ওর্গানিক প্রদক্তশিংগী মথক্তা মেঘালয়দা অনৌবা সেক্তরশিংদা চাউখৎ থৌরাং পুরক্নবা হোৎনবসু মথৌ তারি। অদোম্না হোৎনপদা ঐহাক্না অদোমগীদমক লেপকনি। দিকেদ অসিদা অদোম্না থমখিবা পান্দমশিং ফংনবা হোৎনবদা ঐখোয় পুন্না হোৎনমিন্নসি। ময়ামদা ঐহাক্না য়াইফ-পাউজেল পীজরি!
থাগৎচরি, খুবলৈ শিবুন, মিথলা,
জয় হিন্দ!
