মরুপশিং,
ঙসি নখোয় পুম্নমক্কা ৱারী শানবদা নুংঙাইবা ফাওখি। কেন্দ্রগী মন্ত্রীমন্দলগী মরুপ মানসুখ মান্দাবিয়া জী, মন্ত্রী রক্ষা খাদসেজী অমসুং লৈবাক শিনবা থুংবদগী লাকপা নহা ওইরিবা মরুপশিং অসি ঐখোয়গা লোয়ননা শরুক য়ারি।
মসিগী প্রোগ্রাম অসি তশেংনা অখন্নবা অমনি। ভারতকী জিলা ২৫০ রোমগী নহারোলশিংনা মসিগী প্রোগ্রাম অসিগা শম্নরি, অমসুং ঐহাক্না ময়াম পুম্নমকপু তরাম্না ওকচরি।
মরুপশিং,
চহি খরগী মমাংদা, ঐখোয়না মাই ভারত প্লেৎফোর্ম শেমখি। ঙসিদি, লৈবাক অসিদা লৈরিবা নহারোল মিলিয়ন কয়ানা মসিগী শরুক অমা ওইরে, অমসুং মখোয়না থাগৎনিংঙাই ওইবা থবকশিং তৌরি। ভিক্সিৎ ভারত দাইলোগতগী হৌরগা ভাইব্রেন্ত ভিলেজ প্রোগ্রাম ফাওবদা, অদোম্না অদোমগী শক্তি অমসুং তৌবা ঙম্বগী মতিক অদু উৎখ্রে।
মরুপশিং,
য়ং লিদর্স দাইলোগকী মনুংদা ঐনা ৱাখল্লোন অমা শেয়র তৌখি: ভর্চ্যুএল ওইনা শম্নবগী মহুৎতা, করিগীদমক গ্রাউন্দদা চংশিল্লোইদগে, ভারতপু এক্সপরিয়েন্স তৌরোইদগে, ভারত্তা হিংল্লোইদগে, অমসুং ভারতপু খঙলোইদগে? খুঙ্গংশিংদা চাউখৎপগী অপাম্বশিং অসি মখোয়দা চৎতুনা খংবা ঙমগনি। ঐখোয়গী ঙমখৈদা লৈবা খুঙ্গংশিংদা, চাউখৎপগী অপাম্বা অসি পেত্রিওতিজমগী অচেৎপা ৱাখল্লোনগা লোয়নৈ। তোইনা, মখোয়গীদমক্তদি, লৈবাক অসি হান্না লাকই, অদুগা মখোয় মশাগী নুংঙাইবনা তুংদা লাকই হায়না খল্লি।
মসিনা মরম ওইদুনা তোঙান তোঙানবা জিলাশিংদগী নহাশিংনা হিমাচল, উত্তরাখন্দ অমসুং লদাখকী খুঙ্গংশিংদা চৎপগী পান্দম থম্লি। মীশিংনা মতৌ করম্না হিংলি, মখোয়না করি চাই, মখোয়না মতৌ করম্না থবক তৌই, মখোয়গী চৎনবী, মখোয়গী পুন্সি মহিং, মখোয়গী শিংনবশিং য়েংগনি। লৈবাক অসিগী অহানবা খুঙ্গংশিংদা লৈবা মীওইশিংনা লৈবাক অসিগী ঙাকশেলগীদমক মতৌ করম্না চেকশিন্না লৈবগে, অমসুং ভারতকী অতৈ মফমশিংগা মখোয়গা লৈনরিবা মরী অসি করম্না নকশিন্নবগে হায়বদু উবা ফংলগনি। মসিগী এক্সপরিয়েন্স অসি ঐখোয়গী নহা ওইরিবশিংগীদমক্তনি। উৎখিবা থৌনা অদু য়াম্না অখন্নবা ওইখি। নহা ৩০০,০০০ রোম্না কম্পিতিসন অসিদা শরুক য়াখি, অমসুং ৪০০ হেন্না খনখি। অদোম্না খঙদবা মফমশিং – মনুং হঞ্জিনবা খুঙ্গংশিং অসিদা চয়োল অমা লৈখি। অদোম্না মখোয়গী পুন্সি মহিং অদু হিংনবা হোৎনখি, মখোয়গী চৎনবীদা য়াওখি, অদোমগী চৎনবীশিংবু মখোয়গী চৎনবীশিংগা শম্নহনখি। মসি "এক ভারত শ্রেস্থ ভারত"কী খ্বাইদগী ফবা খুদম ওইগনি।
মরুপশিং,
মসিগী প্রোগ্রাম অসি ঐহাক্কী ওইনসু অখন্নবা অমনি। লৈঙাক অমসুং রাজনিতীদগী লাপ্না লৈরিঙৈদা, ঐনা অসিগুম্বা ঙমখৈগী খুঙ্গংশিংদা তোইনা চৎখি। ঐনা মখোয় কয়াগা লোয়ননা মতম শাংনা লৈমিন্নখি। সরকারদা য়াওরবা মতুংদসু ঐহাক্না ঙমখৈগী খুঙ্গংশিংদা চৎপগী খুদোংচাবা অমত্তা মাংহন্দে। হৌখিবা চহি ২৫ অসিদা ঐহাক্না ঐখোয়গী থৌনা ফরবা লান্মীশিংগা লোয়ননা ঙমখৈদা দীপাবলী পাংথোকখি। অদোম্না চৎখিবা খুঙ্গং খরদি ঐহাক ইশামক্না চৎলম্বা খুঙ্গংশিংনি। অদোম্না অদোমগী এক্সপরিয়েন্সশিং অদু শন্দোক্না তাকপীরকপদা, ঐহাক্না অরিবা মেমোরীশিং অদু ময়েক শেংনা উবা ফংখি। অদোমগী এক্সপরিয়েন্সশিং অসি চপ মান্ননা ইথিল পীবা ওইখি - খরনা অৱাংবা চীংশাংশিংগী থোইদোক হেন্দোকপা নুংঙাইবা, খরনা ঙমখৈদা লৈবা খুঙ্গংশিংগী মীনুংশি, খরনা অঙাংশিংগী মঙলান, অমসুং খরনা ঐখোয়গী লান্মীগী থৌনা অমসুং দিসিপ্লিনগী উবা ফংবগী মতাংদা ফোংদোকখি। তশেংনমক, ভাইব্রেন্ত ভিলেজগী এক্সপরিয়েন্স অসি মশক থোকপা অমনি। ঙসি অসি কারগিল বিজয় দিবসনি। কারগিলগী অকোয়বদা লৈবা মফম কয়াদা নখোয় অয়াম্বনা চৎখ্রে, মফম অসিদা ঐখোয়গী থৌনা ফরবা লান্মীশিংনা অরুবা ফীভমশিংদা মায় পাকপা ঙমখি। অদোম্না মসিবু অদোমগী মীৎমক্না উখি। প্রোগ্রাম অসিগী শরুক অমা ওইবগীদমক অমসুং অসিগুম্বা মগুন লৈরবা এক্সপরিয়েন্সশিং ফংবগীদমক ঐনা ময়াম পুম্নমকপু থাগৎচরি।
মরুপশিং,
চাউখৎলবা খুঙ্গং অমনা চাউখৎলবা ভারতকী য়ুম্ফম্নি। চাউখৎলবা ভারত অমা শেমগৎপগী খোঙচৎ অসি মখা চৎথরি, অমসুং খোঙচৎ অসিদা নহারোলশিংগী থৌদাং অসি য়াম্না চাউই। নহারোলশিংনা লমদম অসিগা শম্নরকপা মতমদা, মখোয়না চাউখৎলবা ভারত অমগী মীৎয়েং পাকথোক চাউথোকহল্লি। মসিনা মখোয়গী লৈবাক অসিগীদমক হিংনবা অমসুং মসিগীদমক তেংবাংনবা মখোয়গী ৱারেপ অদু মপাঙ্গল কনখৎহল্লি।
মরুপশিং,
মসিগী কেম্পেন অসিদা, ঙমখৈদা লৈবা খুঙ্গংশিংদা পুন্সি অসি কয়া য়াম্না অৱাবা ওইবগে হায়বদু অদোম্না থেংনরমগনি। অদুম ওইনমক, খুদোংচাদবা খুদিংমক লৈরবসু, খুঙ্গংশিং অসিগী মীওইশিংনা লৈবাক নুংশিবগা লোয়ননা মতম পুম্নমক্তা হিংলি। চহি খরগী মমাং ফাওবদা, ঙমখৈদা লৈবা খুঙ্গংশিং অসি "অরোইবা খুঙ্গংশিং" হায়না কৌই অমসুং মখোয়বু মখোয়না থোকপা হিংজনবা থাদোকই। লম্বীশিং, ইলেক্ত্রিসিতী, ঈশিং, স্কুলশিং, হোস্পিতালশিং - মরুওইবা খুদোংচাবশিং পুম্নমক লৈরমদে। মফম অদুদা লৈরিবা মীওইশিংদগী অদোম্না অসিগুম্বা ৱারী কয়া অমা হেক হেক তারম্বা য়াই। মখোয়না নহাকপু মমাংগী ফীভমগী মরমদা পাউদমলমগনি। অমসুং অসিগুম্বা ফীভমশিং অসিদসু মখোয়গী লৈবাক নুংশিবগী থৌনা অসি খজিক্তং ওইরবসু হন্থখিদবসিদা ঐখোয়না চাউথোকচফম থোকই।
মরম অসিনা, মরুপশিং,
ঐখোয়গী সরকারনা ঙমখৈগী খুঙ্গংশিং অসি লৈবাক অসিগী অহানবা খুঙ্গংশিংনি হায়না লৌই। অয়ুক্কী নুমিৎনা ভারতপু তরাম্না ওকপা অহানবা খুঙ্গংশিং অমসুং অরোইবা মৈঙালশিংনা অফবা নুমিদাং অমা ওইনবগী য়াইফ পাউজেল পীরকপা মফমশিং। তিরঙ্গানা নুংশিৎকা অহানবা ওইনা ৱারী শানবগী মফম। মালেমনা ভারতপু অহানবা ওইনা উবা ফংলিবা মফম। ৱাখল্লোনগী অহোংবা অসিনা ঐখোয়গী ঙমখৈগী লমদমশিং অসি অহোংবা পুরকখি। খুঙ্গং কয়াদা নীংতম্বা ফংলবা মতুংদগী ইহান হানবা ওইনা মৈ ফংহনখ্রে, অহানবা ওইনা লম্বী-থোং ফংহনখ্রে, ইহান হানবা ওইনা ময়ুম-ময়ুমদা থক্নবা ঈশিং ফংহনখ্রে, গ্যাস কনেক্সন ফংহনখ্রে। সহরশিংদা, মসি মহৌশাগুম্বা ওইনা উবা য়াই, অদুবু মীওইশিং অসিগী ওইনা, মসি পুন্সিদা অহোংবা পুরকই। লৌমীশিং অমসুং হৈকোলশিংগী মপুশিংনা মহৈ-মরোং অমসুং মনা-মশিংবু অচৌবা কৈথেলশিংদা পুরকপা হৌজিক হেন্না লায়থোকহল্লে। হেন্না ফবা কনেক্তিবিতীনা পুন্সি অসি মখা তানা লেপলরোই হায়বনি - মসিনা লেপ্পা লৈতনা চংশিল্লি। অমসুং অদোম্না উবা ফংলমগনি মদুদি অরাপ্পা খুঙ্গংশিংদসু, অফবা ইন্তরনেত কনেক্তিবিতী হৌজিক ফংলি। অদোম্না মসি য়াম্না নুংঙাইবা মওংদা শন্দোক্না তাক্লি।
মরুপশিং,
ফেসিলিতী খুদিংমক্কী অতোপ্পা কান্নবা অমা লৈ - লমদমশিং অসিদা তুরিজম চাউখৎলক্লি। খুন্তাক লান শীরুরবা খুঙ্গংশিং অসি হৌজিক অমুক হন্না হিংগৎলক্লি। ইচানুপীশিংনা স্কুল অমসুং কোলেজশিংদা চৎলি। এজুকেসন অমসুং ইনকম ফংনবগীদমক অফবা অকোয়বগী ফীভম অমা শেমগৎলি। ভাইব্রেন্ত ভিলেজ প্রোগ্রামনা মসিগী চাউখৎ-থৌরাং অসিবু হেন্না খুমাং চাউশিলহল্লি।
মরুপশিং,
চাউখৎলবা, ভাইব্রেন্ত খুঙ্গংশিংগী খোঙচৎ অসি মীপুম খুদিংমকপু শম্নহন্নবগী মপাঙ্গল লৈবা পাম্বৈ অমনি। অমসুং হৌজিক্তি অদোমগী থৌদাং অসি হেন্না হেনগৎলে। অদোমগী খোঙচৎ অসি শরুক য়ামিন্নবগী খুত্থাংদা অমত্তা ওইবগী খোঙচৎ অমনি। ভারতকী নহারোলশিংনা ঙমখৈগী খুঙ্গংশিংবু হেন্না খঙবা হেনগৎলক্লবদি, মখোয়না ভারতপু হেন্না ময়েক শেংনা খঙবা হেনগৎলগনি, ভারতকী মফম খুদিংগা শম্নবা হেনগৎলগনি অমসুং লৈবাক অসিবু মপাঙ্গল কনখৎহল্লগনি। নিংশিংবীয়ু, খুঙ্গংশিং অদুদা অদোমগীদমক গেস্ত হাউসশিং নৎত্রগা হোতেলশিং লৈরমদে। খুঙ্গং পুম্নমক্না অদোমগী হোস্ত ওইরকখি। অমসুং অদোম্না মফম অসিদা লৈরকপা অসি একম্মোদেসন খক্তা নত্তে - মসি কলচরেল ক্লাসরুম অমা ওইরকখি। নহাক্না খুদোংচাবশিংদগী হেন্না নুংঙাইবা অমসুং ইকায়খুম্নবা ফংখি। অদোম্না থেংনখিবা অদু ক্লাসরুম অমত্তদা তম্বা য়াদে। অতোপ্পা নহাশিংগা ৱারী শানৌ। মখোয়বু ঙমখৈদা লৈবা খুঙ্গংশিংদা চৎনবা পুক্নিং থৌগৎকনি। নহাশিংনা মফম অদুদা চৎলিবমখৈ, মখোয়না লৈবাক অসিবু হেন্না উবা অমসুং খঙবা হেনগৎলগনি। অমসুং মীওইশিংনা চৎপা হৌরকপগা লোয়ননা, খুঙ্গংশিং অদুদা খুদোংচাবশিং অসি হেন্না থুনা য়ৌহল্লগনি।
মরুপশিং,
ঐখোয়গী সরকারনা ঙমখৈগী খুঙ্গংশিংদা তুরিজম চাউখৎহল্লি। অদোম্না মসিগী হোৎনবা অসি পাকথোক চাউথোকহনবা য়াই। ঐহাক্না নখোয় খুদিংমকপু নখোয়গী এক্সপরিয়েন্সশিং অসি য়ামদ্রবদা অতোপ্পা নহা ১০০গা শিয়র তৌবিনবা হায়জরি। নহাক্কী লমদম অদুগী মীওইশিংগা শম্নদুনা লৈয়ু। করিগুম্বা অদোম্না মফম অদুদা ফোতো নত্ত্রগা ভিদিও লৌরম্লবদি, মখোয়দু সোসিএল মীদিয়াদা পাক শন্না শিয়র তৌবীয়ু। মহৌশা অমসুং নাৎপু শৌগৎনবগীদমক্তা লোকেল কন্তেন্ত ক্রিএতরশিংগা কোল্লাব তৌবীয়ু। করিগুম্বা নহাক্না লোকেল প্রদক্তশিং উরবদি, নহাক্কী মফমদা মখোয়বু করম্না প্রমোৎ তৌবা য়াবগে হায়বদু খল্লু। ইন্তরনেত্তা ঈ-পাউ মরাং কায়না লৈরি, অদুবু অদোম্না খুঙ্গংশিং অসিগী মরমদা অশেংবা লৌশিং অদু শিয়র তৌবা য়াই। নহাক্কী মরুপ-মপাং অমসুং ইমুং-মনুংগা লোয়ননা খুঙ্গংশিং অসিদা অমুক হন্না চৎলু। ঐহাক্না স্কুলশিং, কোলেজশিং অমসুং য়ুনিভর্সিতীশিংদা ঙমখৈদা লৈবা খুঙ্গংশিংদা এজুকেস্নেল তুরশিং পাংথোক্নবা পুক্নিং থৌগৎলি।
মরুপশিং,
ভারতকী নহারোলশিংনা ২১শুবা চহিচাগী মালেম অসি শেমগৎলগনি হায়না ঐহাক্না মতম পুম্নমক্তা থাজবা থম্লি। মসি ভারতকী নহারোলশিংগী অশেংবা মঙলাননি। ঙসিগী নহারোলশিং অসি চাউখৎলবা ভারত অমগী ইনর্জী অমসুং মসিগী খ্বাইদগী চাউবা কান্নবা ফংলবশিংনি। নহারোলশিংগী শক্তিনা লৈবাক্কী শীংনবশিং অমসুং সোলুসনশিংগা হকথেংননা শম্নরকপা মতমদা, তুংলমচৎ অসি মঙাল লৈবা ওইগনি। মসিগী ৱাখল্লোন অসিগা লোয়ননা, ঐহাক্না অমুক্কা হন্না ময়াম পুম্নমকপু য়াইফ-পাউজেল পীজরি।
হন্না-হন্না থাগৎচরি!
