নহা ওইরিবা মরুপশিং পুম্নমকপু ঐহাক্না য়াইফ-পাউজেল পীজরি!
২০২৬কী চহি অসি হৌরকপদা অদোমগী পুন্সিদা অনৌবা নুংঙাইবা কয়া অমা লাক্কনি। মসিগা লোয়ননা, ঙরাং বসন্ত পঞ্চমী পাংথোকখিবগা লোয়ননা, অদোমগী পুন্সিদা অনৌবা বসন্ত অমা হৌরে। মসিগী মতম অসিনা অদোমবু সংবিধানগী মায়কৈদা অদোমগী থৌদাংগা শম্নহল্লি। মরক অসিদা, লৈবাক অসিদা রিপব্লিক্কী অচৌবা কুমহৈ অসি হৌজিক পাংথোক্লগনি। ঙরাং জানুৱারী ২৩দা ঐখোয়না নেতাজী সুভাসকী মপোক কুমওন্দা পরক্রম দিবস পাংথোকখি অদুগা হয়েং জানুৱারী ২৫দা নেস্নেল ভোতর্স দেনি, মদুগী মতুংদা জানুৱারী ২৬দা রিপব্লিক দেনি। ঙসি অসিসু অখন্নবা নুমিৎ অমনি। হায়রিবা নুমিৎ অসিদনি ঐখোয়গী সংবিধান্না "জনগন মন"বু নেস্নেল এন্থেম অমসুং "বন্দে মাতরম"বু নেস্নেল সোং ওইনা লৌখৎখিবসি। ঙসিগী য়াম্না মরু ওইবা নুমিৎ অসিদা নহা লিশিং ৬১ হেনবনা পুন্সিদা অনৌবা পুন্সি অমা হৌরে।
ঙসিদি, অদোম পুম্নমক্না সরকারগী সর্বিসশিংগীদমক এপোইন্তমেন্ত লেতরশিং ফংলি; অমরোমদা মসি লৈবাক শেমগৎপগীদমক ইনভিতেসন লেতর অমনি। মসি চাউখৎলবা ভারত অমা শেমগৎপদা খোংজেল য়াংশিনবা রেজোলুসন লেতর অমনি। নখোয় ময়ামগী মরক্তগী মীওই কয়ানা লৈবাক অসিগী সেক্যুরিতী মপাঙ্গল কনখৎহল্লগনি, ময়ামগী মরক্তগী মীওই কয়ানা ঐখোয়গী এজুকেসন অমসুং হেল্থকেয়র ইকোসিস্তেমবু হেন্না মপাঙ্গল কনখৎহল্লগনি, ময়ামগী মরক্তগী মীওই কয়ানা ফাইনান্সিএল সর্ভিসশিং অমসুং ইনর্জী সেক্যুরিতী মপাঙ্গল কনখৎহল্লগনি, অদুগা নহা কয়ানা ঐখোয়গী সরকারগী কম্পেনীশিং চাউখৎহনবদা মরুওইবা থৌদাং লৌগনি। ঐহাক্না নহারোল পুম্নমকপু থাগৎপা ফোংদোকচরি অমসুং য়াইফ-পাউজেল পীজরি।
মরুপশিং,
নহাশিংবু স্কিলগা শম্নহনবা অমসুং মখোয়বু থবক ফংহন্নবা অমসুং মশানা মশাবু থবক ফংহন্নবা খুদোংচাবশিং ফংহনবা অসি ঐখোয়গী সরকারগী মরুওইবা অমনি। সরকারগী রিক্রুতমেন্ত অসি মিসন মোদতা পাংথোক্নবা, রোজগর মেলা হৌদোকখি। হৌখিবা চহিশিংদা, রোজগর মেলা অসি ইন্সতিত্যুসন অমা ওইরকখি। মসিগী খুত্থাংদা নহারোল লাখ কয়ানা সরকারগী তোঙান তোঙানবা দিপার্তমেন্তশিংদা এপোইন্তমেন্ত লেতর ফংখ্রে। মিসন অসিবু মখা তানা পাকথোক চাউথোকহন্দুনা, ঙসিদি রোজগর মেলা অসি লৈবাক অসিগী মফম ৪০ হেনবদা পাংথোক্লি। মফম পুম্নমক্তা লৈরিবা নহাশিংবু ঐনা অখন্ননা তরাম্না ওকচরি।
মরুপশিং,
ঙসিদি, ভারত অসি মালেমগী খ্বাইদগী নহা ওইরিবা লৈবাকশিংগী মনুংদা অমনি। লৈবাক অসিগী মনুংদা অমসুং মালেম শিনবা থুংনা ভারতকী নহারোলশিংগী শক্তিগীদমক অনৌবা খুদোংচাবা কয়া শেমগৎপা অসি ঐখোয়গী সরকারনা লেপ্পা লৈতনা হোৎনরি। ঙসি ভারত সরকারনা লৈবাক কয়াগা লোইননা ললোন-ইতিক অমসুং মোবিলিতী এগ্রীমেন্তশিং খুৎয়েক পীনরি। হায়রিবা ত্রেদ এগ্রীমেন্তশিং অসিনা ভারতকী নহারোলশিংগীদমক অনৌবা খুদোংচাবা কয়া অমা পুরক্লি।
মরুপশিং,
মমাংগী মতমশিংদা, ভারতনা মোদর্ন ইনফ্রাস্ত্রকচরগীদমক মমাংদা অমুক্তা ওইখিদ্রিবা ইনবেস্তমেন্তশিং তৌখি। মসিনা মরম ওইদুনা, কন্সত্রক্সনগা মরী লৈনবা সেক্তর খুদিংমক্তা এমপ্লোয়মেন্ত য়াম্না হেনগৎলক্লি। ভারতকী স্তার্ত-অপ ইকোসিস্তেমগী লম অসিসু খোঙজেল য়াংনা চাউখৎলক্লি। ঙসিদি, লৈবাক অসিদা রেজিস্তর তৌরবা স্তার্ত-অপ লাখ অনিরোম লৈরে। মসিদা নহারোল লাখ কুনমাটোই হেন্না থবক তৌরি। মসিগা মান্ননা, দিজিতেল ইন্দিয়ানা অনৌবা শেন্মিৎলোন অমা পাকথোক চাউথোকহল্লে। এনিমেসন অমসুং দিজিতেল মীদিয়াগুম্বা হিরম কয়াদা ভারত অসি গ্লোবেল হব অমা ওইরক্লি। ভারতকী ক্রীএতর ইকোনোমী অসি য়াম্না থুনা চাউখৎলি, অমসুং মসিদসু নহাশিংনা অনৌবা খুদোংচাবা কয়া ফংলি।
ঐগী নহা ওইরবা মরুপশিং,
ঙসি মালেমনা ভারত্তা থাজবা হেনগৎলক্লিবা অসিনা নহারোলশিংগীদমক অনৌবা ওইথোকপা য়াবা কয়া অমসু শেমগৎলি। ভারত অসি মালেমগী খ্বাইদগী চাউবা ইকোনোমী ওইরি অমসুং চহী তরাগী মনুংদা জি.দি.পি.গী চাং শরুক অনি হেনগৎলক্লি। ঙসিদি লৈবাক চামা হেনবনা ভারত্তা এফ.দি.আই.গী খুত্থাংদা ইনবেস্ত তৌরি। ২০১৪গী মমাংগী চহি তরাগা চাংদম্নবদা, ভারত্তা এফ.দি.আই.গী চাং অসি শরুক অনি তংখাইদগী হেনখ্রে। মপান লমদগী ইনভেস্তমেন্ত হেনগৎলকপা হায়বসিনা ভারতকী নহারোলশিংগীদমক থবক ফংহন্নবগী মশিং থিঙমদ্রবা খুদোংচাবশিং লৈহল্লগনি।
মরুপশিং,
ঙসিদি, ভারত অসি মেনুফেকচরিংগী অচৌবা শক্তি অমা ওইরক্লি। ইলেক্ত্রোনিক্স, হিদাক-লাংথক অমসুং ভেক্সিন, ঙাকশেল, অমসুং ওটোগুম্বা সেক্তর কয়াদা ভারতকী পুথোকপা অমসুং পুথোক-পুশিন অনিমক্তা মমাংদা অমুক্তা ওইখিদ্রিবা মওংদা হেনগৎলক্লি। ২০১৪দগী হৌরগা, ভারতকী ইলেক্ত্রোনিক মেনুফেকচরিংদা শরুক তরুক হেনগৎখ্রে। ঙসিদি মসি লুপা করোর লাখ ১১ হেনবগী ইন্দস্ত্রী অমা ওইরে। ঐখোয়গী ইলেক্ত্রোনিক্স এক্সপোর্তসু লুপা করোর লাখ মরি হেনখ্রে। ভারতকী ওতো ইন্দস্ত্রীসু খোংজেল য়াংনা চাউখৎলক্লিবা সেক্তরশিংগী মনুংদা অমা ওইরে। ২০২৫ ফাওবদা, চাকা অনি পানবা গারি য়োনবা অসি কোতি অনি হেনগৎলক্কনি। মসিনা উৎলি মদুদি লৈবাক অসিগী মীয়ামগী পোৎ-চৈ লৈবগী শক্তি হেনগৎলক্লি। মখোয়না ইনকম তেক্স অমসুং জি.এস.তি. হন্থরকপদগী কান্নবা কয়া ফংলি। অসিগুম্বা খুদম কয়ামরুম লৈরি মদুদি লৈবাক অসিদা থবক কয়া য়াম্না ফংলি।
মরুপশিং,
ঙসিগী থৌরম অসিদা, নুপীমচা লিশিং ৮ হেনবনা এপোইন্তমেন্ত লেতরশিং ফংখ্রে। হৌখিবা চহি ১১ অসিদা লৈবাক অসিগী থবক শুবা শিন্মীশিংদা নুপীশিং শরুক য়াবগী চাং অসি শরুক অনি হেনগৎলক্লি। ঐখোয়গী নুপীমচাশিংনা মুদ্রা অমসুং স্তার্ত-অপ ইন্দিয়াগুম্বা সরকারগী স্কিমশিংদগী কান্নবা কয়া ফংলি। নুপীশিংনা মশানা থবক পিজবগী চাং অসি চাদা ১৫ হেনগৎলক্লি। করিগুম্বা ঐহাক্না স্তার্ত-অপশিং অমসুং এম.এস.এম.ই.শিংগী মতাংদা হায়রবদি, ঙসিদি নুপী দাইরেক্তর অমসুং নুপী ফাউন্দর কয়া অমা লৈরে। ঐখোয়গী কোওপরেতিব সেক্তরদা, অমসুং খুঙ্গংশিংদা থবক তৌরিবা সেল্ফ হেল্প গ্রুপশিংদা, নুপীশিংনা মশীং য়াম্না লুচিংলি।
মরুপশিং,
ঙসি লৈবাক অসিনা রিফোর্ম এক্সপ্রেসতা চংশিল্লে। মসিগী পান্দমদি লৈবাক অসিদা পুন্সি অমসুং ললোন-ইতিক অনিমক লায়থোকহনবা হায়বসিনি। জি.এস.তি.দা নেক্স-জেনরেসনগী রিফোর্মশিং অসিদগী মীপুম খুদিংমক কান্নবা ফংলি। মসিগী খুত্থাংদা, ঐখোয়গী নহা ওইরিবা ওন্ত্রপ্রিনরশিংনা কান্নবা ফংলি, অমসুং ঐখোয়গী এম.এস.এম.ই.শিংনা কান্নবা ফংলি। হৌখিবা মতম খরদা লৈবাক অসিনা পুৱারী ওইরবা লেবর রিফোর্মশিং পায়খৎলে। মসিগী খুত্থাংদা, শিন্মীশিং, এমপ্লোয়িশিং, অমসুং ব্যুজিনেস পুম্নমক কান্নবা ফংগনি। অনৌবা লেবর কোদশিংনা লেবর অমসুং এমপ্লোয়ীশিংগী সোসিএল সেক্যুরিতীগী স্কোপ মখা তানা মপাঙ্গল কনখৎহল্লে।
মরুপশিং,
ঙসি রিফোর্ম এক্সপ্রেসকী মতাংদা মফম পুম্নমক্তা খন্ন-নৈনরিবা অসিদা, হীরম অসিগী মতাংদা ঐহাক্না অদোমদা থবক অমা পীবা পাম্মি। হৌখিবা চহী মঙাদগী তরেৎ ফাওবা অসিদা, করম্বা মতমদা অমসুং করম্বা মওংদা নহাক্না লৈঙাক্কা পাউ ফাওনখি? নহাক্না সরকারগী ওফিস অমদা থবক তৌরম্লগা নত্ত্রগা অতোপ্পা মেদিয়ম অমদগী ৱারী শানরম্লগা অমসুং নহাক্না খুদোংচাদবা থেংনরম্লগা, করিগুম্বা অমা লৈতবগুম তৌরক্লগা নত্ত্রগা নুংঙাইতবা খরা ফাওরক্লগা - অসিগুম্বা ৱাফমশিং অদু খংজিনবিয়ু। হৌজিক অদোম্না ৱারেপ লৌগদবনি মদুদি করিগুম্বা মতমদা অদোমগী মমা-মপাদা, করিগুম্বা মতমদা অদোমগী মরুপশিংদসু খুদোংচাদবা থোকহল্লিবা, অমসুং করিগুম্বা মতমদা অদোমবু কুপশিলহল্লিবা, নুংঙাইতবা পোকহল্লিবা, নত্ত্রগা নহাকপু নুংঙাইতবা পোকহল্লিবা - হৌজিক অদোম্না অতোপ্পা নাগরিকশিংদা অদোমগী মতমগী মনুংদা খুদোংচাদবা অসি থোকহন্দনবা ৱারেপ লৌগদবনি। লৈঙাক্কী শরুক অমা ওইবনা, অদোমসু অদোমগী থাক্তা অপীকপা রিফোর্মশিং পাংথোক্কদবনি। মশিং য়াম্লবা মীওইশিংনা কান্নবা ফংবা ঙম্নবগীদমক অদোম্না থৌওং অসিগা লোয়ননা মাংলোমদা চংশিনগদবনি।
ইজ ওফ লিভিং অমসুং ইজ ওফ দুইং বিজিনেস মপাঙ্গল কনখৎহন্নবা থবক অসি পোলিসীগী খুত্থাংদা পাংথোকপা অদুগা মসি লোকেল লেবেলদা থবক তৌরিবা সরকারগী এমপ্লোয়িগী ইন্তেনসনগী খুত্থাংদা পাংথোকপা য়াই। অদোম্না অতোপ্পা ৱাফম অমগা নিংশিংগদবনি। তেক্নোলোজী য়াম্না থুনা হোংলক্লিবা মতম অসিদা, লৈবাক অসিগী মথৌ তাবশিং অমসুং মরুওইবশিংসু য়াম্না থুনা হোংলক্লি। য়াম্না থুনা হোংলক্লিবা অসিগা লোয়ননা অদোম্না অদোমসু মশা-মশানা ফগৎহনগদবনি। অদোম্না আইগিত কর্ময়োগিগুম্বা প্লেতফোর্মশিং অসি অফবা মওংদা শীজিন্নগদবনি। অসিগুম্বা অতেনবা মতমগী মনুংদা, সরকারগী এমপ্লোয়ী কোতি অমা মখাইনা আইগোতকী খুত্থাংদা ত্রেনিং ফংলি অমসুং মশা মথন্তা এম্পাৱর তৌরি হায়বা খংবদা ঐহাক্না নুংঙাইবা ফাওই।
মরুপশিং,
প্রধান মন্ত্রী ওইরো নত্রগা সরকারগী অপীকপা সর্ভেন্ত অমা ওইরো, ঐখোয় পুম্নমক সর্ভেন্তশিংনি অমসুং ঐখোয় পুম্নমক্তা মান্নবা মন্ত্র অমা লৈ; মদুদি, কনাগুম্বা অমত্তা মথক্তা লৈতে, কনাগুম্বা অমত্তা ময়াইদা লৈতে, অমসুং ঐখোয় পুম্নমক্কী, ঐগী অমসুং অদোমগীদমক, মদুদি মন্ত্র অদুদি - "নাগরিক দেবো ভব" (নাগরিক অসি ঈশ্বরনি) অসিনি । ঐখোয়না "নাগরিক দেবো ভব"গী মন্ত্র অসিগা লোয়ননা থবক তৌগদবনি। অদোমসু মসি তৌদুনা লৈবীয়ু। অমুক্কা হন্না, অদোমগী পুন্সিদা লাক্লিবা অনৌবা বসন্ত অসি, অদোমগী পুন্সিগী অনৌবা য়ুগ অসি হৌরে, অমসুং অদোমগী খুত্থাংদা ২০৪৭দা চাউখৎলবা ভারত অমা শেমগৎলগনি। ঐহাক্না অদোমদা য়াইফ-পাউজেল কয়া পীজরি। অদোমবু থাগৎচরি।
