ভারত ইমানা য়াফরে
ভারত ইমানা য়াফরে
মধ্য প্রদেশকী রাজ্যপাল শ্রী মঙ্গু ভাই পতেল, মুখ্য মন্ত্রী ভাই শিবরাজজী, ঐহাক্কী কেন্দ্রগী মন্ত্রী মন্দলগী মরুপ, পঞ্চায়তী রাজ মন্ত্রালয়বু লুচিংবীরিবা ভাই গিরিরাজজী, এম.এল.এ., এম.পি., অতোপ্পা মীথুংলেন অমসুং মশিং য়াম্না লেংবীরক্লিবা ঐহাক্কী নুংশিরবা ইচিল ইনাওশিং!
রিৱাগী পুৱারী ওইরবা মফমসিদগী ঐহাক্না ইমা বিন্ধ্যবাসিনীগী মফমদা খুরুমজরি। লমদম অসি লৈবাক্কীদমক্তা মথৱাই থাখিবা থৌনা ফবশিংগী লমদম্নি। ঐহাক্না রিৱাদা মশিং থীঙমদনা লাক্লে, অদোমগী মরক্তা কয়ারক হন্না লাকখ্রে। অদোম্না ঐহাক্না লাকপা খুদিংদা য়াম্না নুংশিনা লোয়নবীখি। ঐহাকপু থৌজালবীনবগীদমক্তা ঙসিসু অদোম্না মশিং য়াম্না লাকপীরি। ঐহাক্না অদোম পুম্নমকপু থম্মোই শেংনা থাগৎচরি। অদোম খুদিং, লৈবাক্কী লাক্ষ অনি মখায় হেনবা পঞ্চায়তপু লৈবাক্কী পঞ্চায়তী রাজ নুমিৎ অসিদা য়াইফ পাউজেল পীজরি। অদোমগা লোয়ননা পঞ্চায়তকী মীহুত লাক্ষ 30 হেনবনা ঐখোয়গা ভর্চুএলগী খুত্থাংদা পুল্লি। মসিমক ভারতকী লোকতন্ত্রগী মপাঙ্গল লৈবগী শক্তম অমনি। ঐখোয় পুম্নমক মীয়ামগী মীহুৎনি। ঐখোয় পুম্নমক লৈবাক অমসুং লোকৎন্ত্রা অসিগীদমক্তা কত্থোক্লবনি। ঐখোয়গী থবক্না তোঙান-তোঙাঞ্জরবসু ঐখোয়গী পান্দমদি অমত্তনি – মীয়ামগী সেবা তৌদুনা লৈবাক্কী সেবা তৌবা। কেন্দ্র সরকারনা খুঙ্গং অমসুং লাইরবশিংগী পুন্সি নুংঙাইহন্নবা স্কিম কয়া শেম্লিবশিংবু পঞ্চায়তনা থম্মোই শেংনা থবক্তা ওন্থোক্লিবা অসিদা ঐহাক্না নুংঙাইজৈ।
ইচিল ইনাওশিং,
ইগ্রাম স্বরাজ অমসুং GeM পোর্তেল পুনশিন্দুনা অনৌবা পথাপ অমা ঙসি হৌদোক্লিবা অসিনা অদোমগী থবকশিংবু হেন্না লাইথোকহল্লগনি। পি.এম. স্বামিত্বা য়োজনাগী মখাদা লৈবাক্কী খুঙ্গংগী ইমুং লাক্ষ 35কী মফমদা প্রোপর্তী কার্দ পীখ্রে। ঙসিদি, মধ্য প্রদেশকী চাউখৎ থৌরাংগা মরী লৈনবা লুপা করোর লিশিং 17গী শেনফম হেনবগী প্রোজেক্ত কয়া শঙ্গাবগা লোয়ননা উরেপ উয়ুং তম্লে। মসিদা রেলৱে, লাইরবশিংগী পক্কা য়ুম শাবা, ঈশিংগী মরী লৈনবা প্রোজেক্ত কয়া য়াওরি। খুঙ্গংগী লাইরবশিংগী পুন্সি হেন্না নুংঙাইহনবা, থবক পীবগী প্রোজেক্তশিং অসিগীদমক্তা ঐহাক্না অদোম্বু অমুক্কা হন্না থাগৎচরি।
মরুপশিং,
নিংতম্বগী অমৃত কাল অসিদা ঐখোয়না চাউখৎপা ভারত অমা পুরক্নবা পান্দম থম্লি, মসি মঙফাওনহন্নবগীদমক্তা অহিং নুংথিল নাইদনা হোৎনরি। ভারতপু চাউখৎহন্নবগীদমক্তা ভারতকী খুঙ্গংগী খুন্নাইগী খুদোংচাবশিংগী ফগৎহনবগী মথৌ তাই। ভারতকী খুঙ্গংগী পঞ্চায়তকী পথাপশিং চাউখৎহনবগী মথৌ তাই। ঐখোয়গী সরকারনা মসিগী ৱাখল্লোন অসিগা লোয়ননা লৈবাক্কী পঞ্চায়তী রাজকী পথাপ্পু মপাঙ্গল লৈহন্নবা লেপ্তনা হোৎনরি। মমাংগী সরকারনা পঞ্চায়তকী মফমদা করম্না মীচঙ মীখায় নাইরম্বা, মদুবু ওন্থোক্তুনা ঐখোয়না মখোয়গী মপাঙ্গল করম্না হেনগৎহল্লি, পথাপশিং করম্না ফগৎহল্লি হায়বসিদি খুঙ্গংগী মীয়াম্না উরে, লৈবাক্কী মীয়াম্না উরে। ইং 2014গী মমাংদা পঞ্চায়তকী ফাইনান্স কম্মিসনগী গ্রান্তশিং অসি লুপা করোর লিশিং 70দগী হন্থনা লৈরম্মি। মশিং অসি অদোম নিংশিংবীয়ুকো? অদোম্নসু খরা হায়রবদি, ঐহাকসু নিংশিংগনি, অদোম নিংশিংবীয়ুকো? ইং 2014গী মমাংদা কাইথরম্লিবা য়ামদ্রবা লুপা করোর লিশিং 70 অসিনা অশুক চাউরবা লৈবাক্কী মশিং য়াম্লবা পঞ্চায়তশিংনা করম্না থবক তৌবা ঙম্লমগনি? ইং 2014দা ঐখোয়গী সরকার লাক্লবা মতুংদা পঞ্চায়তকীদমক্তা কাইথবা শেনফম্বু লুপা করোর লিশিং 70দগী হেনগত্তুনা লুপা করোর লাক্ষ 2 হেলহনখি। ঐহাক্না মশিং কয়া হায়খি? হৌজিক্না কয়া ওইরে? থবক করম্না তৌই হায়বসি অদোম্না হৌজিক খঙলম্লগনি। ঐহাক খুদম অনি পীজগে। ইং 2014গী মমাংগী চহি 10গী মতমগী ৱারী লিজগে। কেন্দ্র সরকারগী তেংবাংদগী পঞ্চায়ত ভবন চাউরাক্না লিশিং 6মুক শাখি। ঐখোয়গী সরকারনা চহি 8কী মনুংদা অনৌবা পঞ্চায়ত ভবন লিশিং 30 হেন্না শাখ্রে। ঐখোয়না খুঙ্গংগীদমক্তা কয়া য়াম্না খনবগে হায়বা মশিং অসিনা তাক্কনি। মমাংগী সরকারনা গ্রাম পঞ্চায়তশিংদা ওপ্তিকেল ফাইবর য়ৌহন্নবা থবক হৌরম্মি। অদুবু, স্কিম অদুগী মখাদা 100শু শুদবা লৈবাক্কী শুপ্নগী 70দগী তাবা পঞ্চায়তশিংদা ওপ্তিকেল ফাইবর য়ৌহল্লম্মি। মদুসু শহরগা নক্নবা পঞ্চায়তশিংদা। লৈবাক্কী লাক্ষ অনিদগী হেনবা পঞ্চায়তশিংগী মফমদা ওপ্তিকেল ফাইবর য়ৌহল্লিবা অসিদি ঐখোয়গী সরকারনি। খেন্নবা ময়েক শেংলেকো মরুপশিং। নিংতম্বা ফংলবা মতুংদা সরকারনা ভারতকী পঞ্চায়তশিংগী খুদোংচাব করম্না মাঙহনখি হায়বসিগী মতাংদা ঐহাক কুপ্না চঙনিংদ্রে। নিংতম্বা ফংদ্রিঙৈগী চহি কয়া-কয়াগী মমাংদা লৈরম্বা পঞ্চায়তকী পথাপশিংদা নিংতম্বা ফংলবা মতুংদা থাজবা থম্বীখিদে। নুংশিরবা বাপুনা হায়বীরম্মি, ভারতকী থৱাইদি খুঙ্গংদা লৈবনি। অদুবু কোংগ্রেসনা গান্ধীজীগী ৱা তাশিন্নদ্রে। মরিফুতরাগী দিকেদতা পঞ্চায়তী রাজকী মিংদা চিঞ্জাকপুদি য়েন্থোকখি, অদুবু পঞ্চায়তকী মাইকৈদা মিৎয়েংদি চঙবীখিদে, তঙাইফদবদি মদুনি।
মরুপশিং,
লৈবাক অসিনা ইং 2014গী মতুংদা পঞ্চায়তশিংবু মপাঙ্গল হাপ্নবা অচৌবা থৌদাং লৌখি। মদুগী মহৈদি ঙসি উবা ফংলে। ভারতকী পঞ্চায়তশিংনা ঙসিদি খুঙ্গংগী চাউখৎ থৌরাংগী থৱাই ওইরে। গ্রাম পঞ্চায়তশিংনা খুঙ্গংগী তঙাই ফদবগী মতুং ইন্না চাউখৎ থৌরাং লৈহন্নবগীদমক্তা গ্রাম পঞ্চায়ত বিকাস য়োজনা শেমদুনা থবক পায়খৎলি।
মরুপশিং,
শহর অমসুং খুঙ্গগী মরক্তা লৈরিবা খেন্নবশিংবু হন্থহন্নবা ঐখোয়না পঞ্চায়তকী খুত্থাংদা হোৎনরি। দিজিতেল ইহৌগী মতমসিদা ঐখোয়না পঞ্চায়তশিংবুসু স্মার্ত ওইহল্লে। ঙসিদি, পঞ্চায়তকী থাক্তা স্কিম শেম্বদগীনা থবক্তা ওন্তোকপা ফাওবদা তেক্নোলোজী নিংথীনা শিজিন্নরি। অদোম্না অমৃত সরোবরগী মতাংদা থবক তৌনরি। মসিগী অমৃত সরোবর অসিগী মফম খনবগী থবকশিংদা ঐখোয়না তেক্নোলোজী য়াম্না শিজিন্নখি। ঙসিদি, মফমসিদা ইগ্রাম স্বরাজ অমসুং GeMগী অপুনবা পোর্তেল অমসু হৌদোক্লি। মসিনা পঞ্চায়তশিংনা পোৎ লৈবগী থৌওংদা য়াম্না লাইথোকহল্লগনি। পঞ্চায়তকী মমলদা পোৎ-চৈ লোইনা ফংলগনি অমসুং লোকেলগী ইন্দস্ত্রীশিংসু মশাগী পোত্থোক য়োঞ্জবগী কান্নবা প্লেতফোর্ম অমা ফংগনি। দিব্যাংশিংগী ত্রাইসাইকল নত্ত্রগা অঙাংগী মহৈ তম্বদা চঙবা পোৎলম খুদিংমক পঞ্চায়তশিংনা পোর্তেল অসিদগী য়াম্না লাইনা লৈবা য়ারগনি।
ইচিল ইনাওশিং,
মোদর্ন তেক্নোলোজী শিজিন্নবগী কান্নবা অমা ঐখোয়না প্পি.এম. স্বামিত্বা স্কিমদা উবা ফংলি। ঐখোয়গী মফমশিংদা খুঙ্গংগী য়ুমশিংগী প্রোপর্তী কার্দকী মতাংদা উংখৎনবা য়াম্না থোকই। মসিগী মতাংদা খৎন-চৈনবা, লম খোপচিল্লকদরা হায়বগী চিংবা য়াম্না লৈ। অদুবু, পি.এম. স্বামিত্বা য়োজনা লাকপদগী ফিভম অসিদা অহোংবা য়াম্না লাক্লে। ঙসিদি, খুঙ্গং খুদিংদা দ্রোন তেক্নোলোজী শিজিন্নদুনা সর্ভে পাংথোক্লি, মেপ য়েক্লি। মসিদা য়ুম্ফম ওইদুনা, মীচঙ মীখায় অমত্তা নাইদনা আইনগী ওইবা লমগী চে-চাং মীয়ামগী মখুত্তা শিন্নরি। হৌজিক ফাওবদা লৈবাক অসিগী খুঙ্গং লিশিং 75তা প্রোপর্তী কার্দ য়েন্থোকপগী থবক লোইশিনখ্রে। মসিদা মধ্য প্রদেশ সরকারনা মশক থোকপা থবক পাংথোকখিবা অসিদা ঐহাক্না য়াম্না নুংঙাইবা ফাওই।
মরুপশিং,
অদোম্না মতম শাংবদগী থাজবা থমদুনা লাক্লিবশিংনা ছিন্দ্বারাগী চাউখৎ থৌরাংদা মিৎয়েং চঙবীদনা অমসুং উশিন্নদনা করিগী লৈরিবনো হায়না ঐহাক্না য়াম্না তত্তনা খল্লি। মসিগী পাউখুমদি রাজনিতীগী ৱাখল খনবগী মতৌদা লৈরে। নিংতম্বা ফংলবা মতুংদা খ্বাইদগী শাংনা সরকার পায়রম্বশিংনা খুঙ্গংগী থাজবা পুম্নমক মাঙহল্লে। খুঙ্গংদা লৈবা মীওই, খুঙ্গংগী স্কুল, খুঙ্গংগী মৈ, খুঙ্গংগী পোৎ চৈ থম্নবা মফম, খুঙ্গংগী শেন্মিৎলোন্দা কোংগ্রেসকী সরকারগী মিৎয়েং চঙফম থোকপা হীরমশিংদা খ্বাইদগী অনেম্বা থাক্তা থম্বীখি।
ইচিল ইনাওশিং,
লৈবাক্কী মীশিংগী তংখাই অমা লৈরিবা খুঙ্গংগী মফমদা অসিগুম্বা থৌওং চত্থদুনা লৈবাক্না মাঙজিল থানা চৎপা কৈদৌনুংদা ঙম্লোই। মরম অদুনা, ইং 2014গী মতুংদা, মীয়াম্না ঐখোয়দা লৈবাক সেবা তৌবগী খুদোংচাবা পীবিখিবা মতমদা, ঐখোয়না খুঙ্গনগী শেন্মিৎলোন, ফেস্লিতী, মীয়ামগী অপাম্ববু খ্বাইদগী অহানবা মিৎয়েং চঙখি। উজ্বালা য়োজনাগী মখাদা গ্যাস কন্নেক্সন করোর 10 লেম্না পীখিবা অদু খুঙ্গংগী মীয়ামগী য়েংদুনা পীখিবনি। ঐখোয়গী সরকারনা লাইরবশিংগীদমক্তা লৈবাক শিনবা থুংবদা য়ুম করোর 4.5 হেন্না শাখিবশিংগী মনুংদা য়ুম করোর অহুম হেনবদি খুঙ্গংদা শাখিবনি। মসিগী য়ুম অয়াম্বগী মপুবু ইমা, ইচে-ইচলশিং ওইহনখি। য়ুম, দুকান, গারী, লবুক লৈবা মতমদা নুপীগী মিংদা লৈবগী চৎনবী ঐখোয়গী লৈবাক্তা চৎনৈ, নুপীশিংগী মিংদা করিমত্তা পাংথোক্তে। ঐখোয়না ৱাখল্লোন অসি হোংদোক্লে অদুগা ঐখোয়গী ইমা, ইচে-ইচলশিংবু য়ুম মপু ওইহনখ্রে।
মরুপশিং,
বি.জে.পি.না লৈবাক্কী নুপী কয়াবু য়ুম্বুরেম্বী ওইহনখি। পি.এম. অৱসকী য়ুম খুদিংমক লুপা লাক্ষ অমগী মথক্তা লোইনা শাই হায়বা খঙলম্লগনি। অদুনা হায়বদি, বি.জে.পি.না লৈবাক্কী ইচে-ইচল কয়াবু লাক্ষপতি ওইহল্লে হায়বনি। ঐহাক্না লাক্ষপতি ইচেল-ইচলশিংবু কোক নোঞ্জরি, ইচে ইচল করোর কয়াবুসু লাক্ষপতি ওইহনবগী থবক মখা তানা পাংথোকপা ঙম্নবা থৌজাল পীবিয়ু। ঙসিমকসু মীওই লাক্ষ মরি হেনবনা মশাগী পক্কা য়ুমদা ঙসি চঙনখ্রে। মসিগী মনুংদা ইচেল মশিং অয়াম্বসু লাক্ষপতি ওইবা য়াওরিবনি। ঐহাক্না পুম্নমকপু থাগৎচরি।
মরুপশিং,
পি.এম. সৌভাগ্যা য়োজনাগী মখাদগী য়ুম করোর অনি মখায়দা মৈ ফংলিবশিং অসিগী মরক্তগী অয়াম্বা য়ুমদি খুঙ্গংদা লৈবা ঙাক্তনি। খুঙ্গংদা লৈবা ইচিল ইনাওশিংনা ফংবনি। ঐখোয়গী সরকারনা খুঙ্গংগী য়ুম্থোং খুদিংদা তোতি ঈশিং ফংহন্নবা স্কিম চলায়বসু হৌদোকখি। স্কিম অসিগী মখাদা শুপ্নগী চহি অনি অহুমগী মনুংদা খুঙ্গংগী ইমুং করোর 9গী মথক্তা তোতি ঈশিং ফংহনখি। এম.পি.দা লৈবা খুঙ্গংশিংগী ইমুং শুপ্নগী লাখ 13দা তোতি ঈশিং ফংলম্বনি। অদুবু, হৌজিক্তি খুঙ্গংগী য়ুম চাদা হুম্ফুগী মফমদা তোতি ঈশিং ফংলে। অদুগা অদোমগী জিলা অসিদদি চাদা চাম্মনা তোতি ঈশিং ফংলবনি।
মরুপশিং,
ঐখোয়গী মীয়ামশিং অসিগী বেঙ্কতা হক অমত্তা লৈ হায়না খল্লম্মি, মখোয়বু বেঙ্কশিংনা কাওথোকপীরম্মি। খুঙ্গংগী মীওই অয়াম্বগী বেঙ্ক একাউন্ত অমত্তা লৈনরমদে অদুনা বেঙ্ককী খুদোংচাবা অমত্তা মখোয়না ফংলমদে। সরকারনা লাইরবশিংগীদমক্তা শেল থাদরকপশিংসু বেঙ্ক একাউন্ত লৈতবনিনা মরক্তা অদুমক হাইহৎপীরম্মি। ঐখোয়গী সরকারনা মসিবু মপুং ফানা ওন্থোক্লে। ঐখোয়না জন ধন চলায়দুনা খুঙ্গংগী মীওই করোর 40 হেনবগী বেঙ্ক একাউন্ত হাংদোকখি। ঐখোয়না ইন্দিয়া পোস্ত পেমেন্ত বেঙ্ককী মতেংদগী পোস্ত ওফিস শিজিন্নদুনা খুঙ্গংশিংদা বেঙ্ককী খুদোংচাবা য়ৌশিলহনখি। ঐখোয়না বেঙ্ক মিত্রা লাখ কয়া শেমখি, বেঙ্ক সখীশিংবু ত্রেনিং তৌখি। ঙসিদি ঐখোয়না খুঙ্গং খুদিংদা মসিগী কান্নবা উবা ফংলে। বেঙ্ককী মীয়ামদা বেঙ্ককী পাঙ্গল ফংনরকপা মতমদা, লৌউবদগী হৌরগা কারবার তৌবা ফাওবদা খুঙ্গংগী মীয়ামগী মতেং য়াম্না ওইরে।
মরুপশিং,
মমাংগী সরকারনা ভারতকী খুঙ্গংগী মফমদা মীচঙ মীখায় নাইবগী অচৌবা থৌওং অমগসু পাংথোক্লম্মি। মমাংগী সরকারনা খুঙ্গংদা শেল থাদরমদে। খুঙ্গং অসিদি মহৌশানা ভোতবেঙ্ক ওইদবনিনা উশিন্নদনা অদুমক লৈথোক্লম্মি। খুঙ্গংগী মীয়াম্বু তোখায়না তাহন্দুনা রাজনিতীগী লিলা য়াম্না শান্নবীরম্মি। খুঙ্গংগী মফমদা অসুম্না তৌবীরিবশিংবু ভারতিয়া জনতা পার্তীনা লোইশিনখি। ঐখোয়না খুঙ্গংগী চাউখৎ থৌরাংগীদমক্তা পাক্সি হাংদোকখি। হর ঘর জল য়োজনাদা চাউরাক্না লুপা করোর লাক্ষ অহুম হেন্না থাদরি। পি.এম. অৱস য়োজনাদা লুপা করোর লাক্ষ কয়া হেন্না থাদরি। দিকেদ কয়াদগী লোইশিন্দনা লাক্লবা ইরিগেসনগী প্রোজেক্তশিং লোইশিন্নবা লুপা করোর লাক্ষ অমা হেন্না থাদখি। পি.এম. গ্রামীন শরক য়োজনাগী মখাদা লুপা করোর লিশিং কয়া থাদরি। পি.এম. সম্মান নিধীগী মখাদা লৌমীশিংগী বেঙ্ক একাউন্ততা লুপা করোর লাক্ষ অনি মখায় হেন্না হাপখ্রে। এম.পি.গী চাউরাক্না চাদা 90গী লৌমীশিংনা স্কিম অসিগী মখাদগী লুপা করোর লিশিং 18.5 ফংখ্রে। মসিগী নিধীগী স্কিম অসিদগী রিৱাগী লৌমীশিংনা চাউরাক্না লুপা করোর 500মুক ফংনখি। ঐখোয়গী সরকারনা MSP হেনগৎখিবা অদুদগী খুঙ্গংগী মফমশিংদা লুপা করোর লিশিং কয়াসু ফংনখি। কোরোনাগী ইরাংগী মতমসিদা ঐখোয়না খুঙ্গংগী মীয়ামদা চহি অহুমদগী লেম্না রাসন পীদুনা লাক্লি। লাইরবশিংগী য়াইফ য়ুম্বালগীদমক্তা পায়খৎলিবা প্রোগ্রাম অসিদসু লুপা করোর লাক্ষ 3 হেন্না চঙখ্রে।
মরুপশিং,
চাউখৎ থৌরাংগী থবক কয়া খুঙ্গংদা পায়খৎলিবা, শেল কয়া অমা থাদরিবা অসিনা থবক্কী খুদোংচাবা কয়াসু লৈহনখি। মশানা মশাবু থবক পীজবা অমসুং মশাগী খুঙ্গংমক্তদা থবক পীজবা ঙমহন্নবগীদমক্তা সরকারনা মুদ্র স্কিম চলায়রি। মুদ্র স্কিমগী মখাদা হৌখিবা চহিশিংদা মীয়ামগী মফমদা লুপা করোর লাক্ষ 24গী মতেং পীখ্রে। মসিদগী খুঙ্গংগী মফমদসু মীওই করোর কয়ান অমনা মশাগী থবক হৌদোকচখি। ঐখোয়গী ইমা, ইচে-ইচলশিংনা মুদ্র য়োজনাগী মশিং য়াম্লবা বেনিফিশরীশিং ওইরি। ঐখোয়গী সরকারনা খুঙ্গংদা নুপীশিংগী মপাঙ্গল করম্না হাপ্লি, খুঙ্গংগী নুপীশিংদা শেন্মিৎলোনগী লমদা করম্না তেংবাংলি হায়বগী মতাংদা মাইকৈ খুদিংদা ৱারী শানরি। মমাংগী চহি 9দা নুপী করোর 9না সেল্ফ হেল্প গ্রুপশিংদা য়াওখি। মধ্য প্রদেশতা নুপী লাক্ষ 50 হেনবনা সেল্ফ গ্রুপকী মেম্বর ওইরি। ঐখোয়গী সরকারনা সেল্ফ হেল্প গ্রুপশিংগী মফমদা গেরেন্তী য়াওদনবা লুপা লাক্ষ 20 ফাওবগী লোন লৌবা য়াহল্লি। মফমসিগী রাজ্য সরকারদি জিলা খুদিংদা দিদি কেফে ফাওবা শাখ্রে। মমাংগী পঞ্চায়তকী মীখলদা সেল্ফ হেল্প গ্রুপকা মরী লৈনবা ইচে-ইচল চাউরাকপা লিশিং 17পু পঞ্চায়তকী মীহুৎ ওইনা খনখি। মসিমক য়াম্না চাউথোকচনিংঙাই ওইবা ৱাফম অমনি। ঐহাক্না মধ্য প্রদেশকী নারিশক্তি অসিগীদমক্তা ঐহাক্না অমুক্কা হন্না থাগৎচরি।
মরুপশিং,
নিংতম্বগী অমৃত মহোৎসবকী মতমসিদা হোলিস্তিক দিভেলপমেন্ত পুরক্নবা খোংথাং অমসু ঙসি মফমসিদা হৌদোক্লে। মসিনা চাউখৎপা ভারত অমা পুরক্নবগীদমক্তা সবকা প্রয়াসকী ৱাখল্লোনবু মপাঙ্গল হাপ্লগনি। চাউখৎপা ভারত অমগীদমক্তা লৈবাক্কী পঞ্চায়ত, লুপ খুদিংগী মীহুৎ, মীয়াম খুদিংনা অমত্তা ওইবা তাই। কান্নবা খুদিংমক বেনিফিশরী খুদিংদা চাদা চাম্মা ফংলবা, মীচাঙ মীখায় নাইদনা ফংলবা মতমদা মসি ওইথোক্কনি। মসিদা অদোম পঞ্চায়তকী মীহুৎশিংগী অচৌবা থৌদাং লৈরি।
ইচিল ইনাওশিং,
লৌউ-শিংউগী অনৌবা ফেসিলিতীগী মতাংদা মীয়ামদা এৱিয়র্নেস পীবগী থবকশিং পঞ্চায়তশিংনা তেংবাংদুনা পাংথোকপা য়াই। নেচরেল ফার্মিংগী মতাংদা লৈবাক অসিনা পাক শন্না থবক কয়া পায়খৎলি। কেমিকেল ফার্মিংনা অকায়বা পুরকপগী মতাংদা মফমসিদা ৱারী কয়া শান্নখি। ঐখোয়গী ইচানুপীশিংনা লৈহাও ইমাদা অকায়বা পীবগী মতাংদা ঐখোয়দা পাউদম্লি। ইমা পৃথিবীনা ফাওরিবা চৈথেংবু জগোই লিলাগী খুত্থাংদা উৎলি। কেমিকেল শিজিন্নবা লৌউদগী ঐখোয়গী ইমা লৈহাওদা নংহল্লিবা অকায়বশিংবু ঐখোয়গী ইচানুপীশিংনা য়াম্না লায়বা পাম্বৈ শিজিন্নদুনা তাকপীরি। ঐখোয়না ইমা লৈহাওগী খোল্লাও তাফম থোকই। লৈহাও অসি ঐখোয়গী ইমানি। ঐখোয়দা ইমাবু হাৎপগী হক লৈতে। ঐখোয়গী পঞ্চায়তশিংনা নেচরেল ফার্মিংগী মতাংদা থবক পায়খৎহন্নিংই। অপীকপা লৌমী, য়েন-ঙানু লোইবা, ঙা ফাবা ইচিল ইনাও ওইরো, মখোয়গী তেংবাংগীদমক্তা কেন্দ্র সরকারনা চলায়রিবা খোঙথাং অসিদা পঞ্চায়তশিংনা অচৌবা থৌদাং য়াওরি। অদোম্না চাউখৎ থৌরাংগা মরী লৈনবা থবক খুদিংদা শরুক য়াবা মতমদা, লৈবাক্না হোৎনরিবশিংগী মহৈ ফংগনি। মসিমক্না অমৃত কাল অসিদা চাউখৎপা ভারত অমা ওইহনবগী পাঙ্গল ওইগনি।
মরুপশিং,
ঙসিগী লৈবাক্কী পঞ্চায়তী রাজ নুমিৎ অসিদা মধ্য প্রদেশকী চাউখৎ থৌরাংদা খোঙজেল হাপকদবা প্রোজেক্ত কয়া শঙ্গাবগা লোয়ননা উরেপ উয়ুং তম্লে। ছিন্দ্বারা-নৈনপুর-মন্দলা ফোর্ত রেল লাইন ইলেক্ত্রিফিকেসন তৌবনা লমদম অসিগী মীয়ামগী দিল্লী-চেন্নৈ অসুং হৌরা-মুম্বাই ফাওবগী কন্নেক্তিবিতী হেন্না ফগৎহল্লগনি। ছিন্দ্বারা-নৈনপুর লম্বীগী অনৌবা ত্রেনসু ঙসিদগী হৌরে। মসিগী অনৌবা ত্রেন অসি চেনবদগী তাউন অমসুং খুঙ্গংগা ঐখোয়গী ছিন্দ্বারা জিলাগী হেদক্বার্তরগা হকথেংননা শম্নরগনি। ত্রেন অসিনা নাগপুর অমসুং জবলপুর চৎপদা লাইহল্লগনি। ঙসিদগী চেনবা হৌরিবা রিৱা-ইতৱারি-ছিন্দ্বারা ত্রেন অসিনা শিবনি অমসুং ছিন্দ্বারাবু নাগপুরগা হকথেংননা শম্নরগনি। মসিগী অপুনবা লমদম অসিদি মখোয়গী ৱাইল্দ লাইফকীদমক্তা মমিং চৎলি। মফমসিগী চাউখৎলক্লিবা কন্নেক্তিবিতীনা লমদমসিগী তুরিজম্বুসু হেন্না চাউখৎহনগনি, থবক্কী অনৌবা খুদোংচাবা কয়া পীগনি। মসিনা লৌমী, মহৈরোই, নুমিৎ খুদিংগী রেল তোংদুনা চৎলিবা, অপীকপা কারবার তৌরিবা অমসুং দুকান ফম্বশিংদা কান্নবা য়াম্না পীগনি। মসিনা হায়বদি দবল ইঞ্জিন সরকার অসিনা অদোমগী খুদোংচাবশিংসু দবল ওইহল্লে হায়বনি।
মরুপশিং,
ঙসিদি, ঐহাক্না অদোম পুম্নমকপু ৱাফম অমগীদমক্তা ইকায় খুম্নজনিংই। হন্দক্কী নোংমাইজিং নুমিত্তা মন কী বাতকী 100শুবা তাঙ্কক মপুং ফারগনি হায়না শিবরাজজীনা তম্বীখ্রে। অদোম পুম্নমক্কী থৌজাল, মীনুংশি অমসুং শরুক য়াবনা মন কী বাতনা ঙসিগী থাক অসিদা য়ৌরক্লিবনি। ঐহাক্না মধ্য প্রদেশকী চাউখৎ থৌরাংগী মতাংদা মন কী বাত্তা কয়ারক হন্না ৱারী শাখ্রে। মফমসিগী মীয়ামগী চিথী অমসুং পাউতাক কয়া অমা ঐহাক্না হৌজিকসু ফংজরি। ঐহাক্না হন্দক্কী নোংমাইজিং নুমিৎকী মন কী বাত্তা অদোম পুম্নমক্কা অমুক হন্না উন্নজনবা ঙাইদুনা লৈজরি। মরমদি মসিদি সেঞ্চ্যুরীনিদনা। অদুগা ঐখোয়গী লমদম অসিদদি সেঞ্চ্যুরীগী তোঙানবা মগুন অমা লৈরিবনি। অদোম্না নোংমাইজিং নুমিৎ খুদিংদা তৌবগুম্না হন্দকসু ঐহাক্কা শোইদনা পুনমিন্নসি। মসিগী পাউজেল অসিগা লোয়ননা ঐহাক্কী ৱারোল লোইশিঞ্জরগে। ঐহাক্না পঞ্চায়তী রাজ নুমিৎকীদমক্তা অদোম পুম্নমক্কী মফমদা অমুক্কা হন্না য়াইফ পাউজেল পীজরি। হন্না হন্না থাগৎচরি।
ভারত ইমানা য়াইফরে,
ভারত ইমানা য়াইফরে,
ভারত ইমানা য়াইফরে!!!
