খুরুমজরি!
কমদৌবীরিবগে, গুজরাত্তা ইংবীদবরা, গুজরাতকী রাজ্যপাল আচার্য় দেবব্রতজী, মুখ্য মন্ত্রী শ্রীমান বিজয় রুপানীজী, বিধানসভাগী স্পীকর শ্রী রাজেন্দ্র ত্রিবেদী, কেন্দ্রগী হকশেলগী মন্ত্রী দা. হর্শবর্ধনজী, দিপুতী সি.এম. ভাই নিতিন পতেলজী, মন্ত্রীমন্দলদা ঐগী খোংলোই ওইবীরিবা শ্রীমান অশ্বিনী চৌবেজী, মনসুখ ভাই মান্দবিয়াজী, পুরুশোত্তম রুপালাজী, গুজরাত সরকারদা মন্ত্রী ওইবীরিবা চুরাসমাজী, শ্রী কিশোর কনানীজী, অতৈ মন্ত্রী পুম্নমক, শক্নাইরবা পুম্নমক।
ইচিল–ইনাওশা,
অনৌবা চহিনা থোংদা থিল্লরে। ঙসি লৈবাক অসিগী মেদিকেল ইনফ্রাস্ত্রকচরবু মপাঙ্গল কলহনগদবা তাঙ্কক অমগা হাপচিল্লে। রাজকোত্তা ওল ইন্দিয়া ইন্সতিত্যুৎ ওফ মেদিকেল সাইন্সেসকী উরেপ-উয়ুং তম্বা অসিনা গুজরাতকা লোইননা লৈবাক অপুনবা অসিদা হকশেল অমসুং মেদিকেল এজুকেসনগী নেতৱর্ক্তা পাঙ্গল হাপ্লগনি। ইচিল–ইনাওশা, কুমজা ২০২০ অসিবু অনৌবা নেস্নেল হেল্থ ফেসিলিতীগা লোইননা উবা ফংবা অসিনা, হন্দক চহিগী শিংনবশিং অদুবুসু ফোংদোক্লি অমসুং অনৌবা চহিগী মরুওইবশিং অদুবুসু ময়েক শেংনা ফোংদোক্লি। চহি অসি মালেম অপুনবগী ওইনা হকশেলগী ওইনা অমুক্তা ওইখিদ্রিবা শিংনবশিংগী চহি ওইরি। চহি অসিনা উৎখ্রে মদুদি হকচাং ফবনা ললনি, ৱাফম অসি ঐখোয়গী ইপা-ইপুশিংনা করিগী তম্বীরম্লিবা, মসি ঐখোয়দা হন্না হন্না করিগী চিনফা পুহনখিবা পুম্নমক অসি ঐখোয়দা ২০২০না নীংথিজনা তম্বীরে। হকশেলদা শোক্লবদি পুন্সিগী শরুক খুদিংমক্তা শোকহল্লি অমসুং শুপ্নগী ইমুং-মনুংতা নত্তনা খুন্নাইসু মসিগা খুবাম নুংদা তাই অমসুং মরম অসিনা চহিগী অরোইবা নুমিৎ অসিদা ভারতকী অদুগুম্বা মীওইববু ঙাক-শেন্নবগীদমক লেপ্তনা মথৱাই খুবাক্তা হাপ্তুনা হোৎনরিবা দোক্তরশিং, হেল্থ ৱারিয়রশিং, সফাই কর্মীশিং, হিদাক-লাংথক্কী দুকানশিংদা থবক তৌরিবশিং অমসুং অতৈ ফ্রন্তলাইন কোরোনা ৱারিয়রশিং অদুবু নীংশিংজগদবনি। মথৌদাংগী লম্বীদা মরূপলোইশিং অসিনা মপুন্সি কৎথোক্লিবা, ঐনা ঙসি পুম্নমকপু ইকাই খুম্নজবগা লোইননা নোলুকচরি। ঙসি লৈবাক অসিনা কোরোনাগী লানফমদা মরুওইবা মেদিকেল ইনফ্রাস্ত্রকচর শেম-শাবদা অহিং-নুংথিল খাক্তনা হোৎনখিবা মরূপলোইশিং অদুবু, সাইন্তিস্তশিং অদুবু, শিন্মীশিং অদুবুসু হন্না হন্না নীংশিংজরি। ঙসিগী নুমিৎ অসি লাইরবশিংদা চানবা পোৎলমশিং অমসুং মথৌ তাবা অতৈ পোৎলমশিং য়ৌহনবদা মপুং ফানা কৎথোকপগা লোইননা থবক তৌখিবা অদুগুম্বা মরূপ পুম্নমক অদুবু থাগৎচগদবনি। অসুক শাংবা মতম, অদুক্কী মতিক চাউরবা অমাং-অতা অদুবু খুন্নাইগী অপুনবা থৌনা, খুন্নাইগী সেবাগী ৱাখল্লোন, খুন্নাইগী খাংবা কনবা পুম্নমক অসিগী মরমদগী ইরৈবাকচাশিংনা লাইরবা অমা ফাওবা অৱাবতনা থল্লবা মতম অসিদা অহিংদা মপুক লাম্না তুমহনবা তৌখিদে। পুম্নমক ইকাই খুম্নননীংঙাইগী মশক্নি।
মরূপশা,
অৱাবতনা থল্লবা চহি অসিনা উৎখ্রে মদুদি ভারতনা অমত্তা ওইনা পুনশিল্লবদি মদুগী লুরবা অৱাবগী মতম অসিবু কয়াদা মতিং লৈনা মায়োক্নবা ঙম্লিবা। ভারতনা অমত্তা ওইনা মতৌ অসুম্না মতম চানা কান্নবা খোংথাং লৌখৎখিবা অসিগী মরমদগী ঙসি ঐখোয় হেন্না ফবা ফিভমদা লৈরি। মী করোর ১৩০দগী হেন্না লৈরিবা লৈবাক, মী কুংনা তারিবা, মফম অসিদা চাউরাক্না মীওই করোর অমরোম লাইনা অসিগা মায়োক্নদুনা মায় পাকখ্রে। কোরোনানা নারবা মরূপশিংবু কনবদা ভারতকী রিকোর্দ অসি মালেম অপুনবা অসিদগী য়াম্না হেন্না ফবা ওইরি। হৌজিক লাইনা অসিনা শন্দোকপগী মতাংদসু ভারত লেপ্তনা হন্থরক্লি।
ইচিল–ইনাওশা,
কুমজা ২০২০দা লৈরম্বা লাইচৎকী অৱাবা, মায়কৈ মরিদা লৈরম্বা ২০২০গী ৱাহং খুদম অদুনা ২০২১গী লাইয়েংগী আশা পুদুনা লাক্লি। ভেক্সিনগী মতাংদা ভারত্তা মথৌ তাবা শেম-শাবা পুম্নমক চৎথরি। ভারত্তা শাবা ভেক্সিন খোংজেল য়াংনা মথৌ তাবা কাংলুপ্তা য়ৌহন্নবগীদমক হোৎনরিবা অসিগী অরোইবা তাঙ্কক য়ৌরক্লে। মালেমগী খ্বাইদগী চাউবা ভেক্সিন কাপ্পগী খোংজং চৎথনবা ভারতনা কন্না শেম-শারি। ঐনা থাজৈ মদুদি মমাং চহিদা লাইচৎ অসিবু থিংননবা ঐখোয়না পুন্না হোৎনমিন্নখিবা অদুগুম্না, ভেক্সিন কাপ্পা অসি মায় পাকহন্নবা ভারত অপুনবনা অমত্তা ওইনা মাংদা চংশিনমিন্নগনি।
মরূপশা,
গুজরাত্তসু লাইচৎ অসি থিংননবা অমসুং হৌজিক্না ভেক্সিন কাপ্নবগীদমক্তা শেম-শারিবা অসিদা শিংথানীংঙাই ওইনা থবক পায়খৎলি। হৌখিবা চহি তরাগী খুজিং অনিদা অসিগুম্বা মেদিকেল ইনফ্রাস্ত্রকচর গুজরাত্তা শেম-শারিবা অসিগী চাউরবা মরমদি গুজরাতনা কোরোনাগী শিংনবশিং অসিগা হেন্না ফবা মওংদা মায়োক্নবা ঙমখি। এম্স রাজকোত অসিনা গুজরাতকী হেল্থ নেতৱর্ক অসি অমুক্কা হেন্না পাঙ্গল হাপ্লগনি। হৌজিক লুদগী লুরবা অনাবশিংগীদমক্তা রাজকোত্তা অনৌবা খুদোংচাবা ফংগদৌরি। লায়েং অমসুং মহৈ-মশিংদা নত্তনা মসিদগী থবক ফংবগী খুদোংচাবা ময়াম অমসু শেম-শাগনি। অনৌবা হোস্পিতালদা থবক তৌবা চাউরাক্না লিশিং ৫না হকথেংননা কান্নবা ফংগনি। মসিগা লোইননা য়ুমলৈ-কৈরৈ, চাকচা-ইথক, ত্রান্সপোর্ত, অতৈ মেদিকেলগী খুদোংচাবশিংগা মরী লৈননা নাকোইননা থবক কয়াসু মফম অসিদা শেমগনি অমসুং ঐখোয়না উরি মদুদি অচৌবা হোস্পিতাল লৈবা মফমগী অকোইবদা শহর মচা অমদি অদুমক শেমগৎলি।
ইচিল–ইনাওশা,
মেদিকেল সেক্তরদা গুজরাতকী মায় পাকপা অসিগী মরুমদা হৌখিবা চহি তরাগী খুজিং অনিগী হোৎনবা, কৎথোকপা অমসুং ৱাশক অদু য়াওরি। হৌখিবা চহি ৬লোম অসিদা লৈবাক অসিদা অনা লায়েং অমসুং মেদিকেল এজুকেসনগী মতাংদা থাক অদুদা থবক তৌরিবা অদুগী তশেংনা কান্নবা গুজরাতনসু ফংলি।
মরূপশা,
অচৌবা হোস্পিতালশিংগী ফিভম, মখোয়দা পীরিবা শাফু অদু অদোমসু ময়েক শেংনা খঙই। ফিভমদুদি নীং খা তম্লবা চহি কয়াগী মতুং অসিদসু ভারত্তা শুপ্নগী এম্স ৬ খক্তমক লৈরম্মি। ২০০৩দা অতলজীগী সরকারগী মতমদা, অহেনবা এম্স ৬ অমগা লিংখৎনবা খোংথাং পায়খৎখি। হৌখিবা চহি ৬ অসিদা, অনৌবা এম্স ১০ শাগৎপগী থবক হৌখ্রে অমসুং কয়া অমনা শঙ্গাখ্রে। এম্সশিং অসিগা লোইননা, সুপর স্পিসিএলিতা হোস্পিতালশিংসু শাগৎলি।
মরূপশা,
২০১৪গী মমাংদা, ঐখোয়গী হকশেলগী লমগী তোঙান তোঙানবা মায়ওন অসি তোঙান তোঙানবা মায়কৈ অমসুং মিৎয়েংদা থবক পায়খৎলম্মি। ২০১৪গী মতুংদগীদি, হকশেলগী লম অসিনা অপুনবা মওংদা থবক তৌখি অমসুং প্রিভেন্তিব কেয়রদা শাফু পীখি, অদুগা অনৌবা লায়েংগী খুদোংচাবশিংসু মরুওইবা ওইনা থমখি। সরকারনা লাইরবশিংগী লায়েংবদা চংবা মমল হন্থহল্লে অমসুং মতম মদুগা লোইননা, দোক্তরশিংগী মশিং লেপ্তনা হেনগৎহনবদসু শাফু পীখি।
মরূপশা,
আয়ুশ্মান ভারত স্কিমগী মখাদা, মনুং হঞ্জিনবা অরাপ্পা মফমদা হেল্থ অমসুং ৱেলনেস সেন্তর মিলিয়ন ১.৫ শাখ্রে অমসুং মখোয়শিং অদুগী মনুংদা সেন্তর ৫০০০০রোম থবক হৌখ্রে। মখোয়শিং অদুগী মনুংদা লিশিং ৫দি গুজরাত খক্তদা লৈরি। য়োজনা অসিদগী হৌজিক ফাওবদা লৈবাক অসিগী চাউরাক্না লাইরবা করোর অমা মখাইরোমদা লুপা লাখ ৫ ফাওবা লেম্না লাইয়েং ফংহল্লি। স্কিম অসিনা লাইরবা ইচিল-ইনাওশিংগী মতেং কয়াদা চাউনা পাংলিবা মসিগী মশিং ঐনা লৈবাক মীয়ামদা ফোংদোকপা পাম্মি।
মরূপশা,
আয়ুশ্মান ভারত স্কিম অসিদগী লাইরবশিংগী চাউরাক্না লুপা করোর লিশিং ৩০ কনবা ঙম্লে। লুপা করোর লিশিং ৩০ অসি য়াম্না চাউবা শেনফম্নি। অদোম খনবীয়ু, স্কিম অসিনা লাইরবশিংবু কয়াদা চাউখ্রবা শিন্মিৎলোনগী অৱাবদগী ঙাকথোক্লবনো। কেন্সর ওইরো, হার্তকী প্রোব্লেম ওইরো, কিদনীগী অৱাবা ওইরো, অরুবা লাইনা কয়াগী লায়েং, ঐগী লৈবাক্কী লাইরবশিংদা লেম্না তৌহল্লে অমসুং মদুসু অফবা হোস্পিতালশিংদা।
মরূপশা,
ঐখোয়না মসিসু উরে মদুদি মচৎ অসি পৈশা ৱাৎপনা মরম ওইদুনসু হোংদোকই, মচৎ অদুমক লাইরবগী ঙাক-শেলগী চুংঙ্গোই ওইরবদি, মদু আত্মবিশ্বাস্তা হোংদোকই। আয়ুশ্মান ভারত য়োজনাগী মখাদা লাইরবশিংগী লায়েংনা মীয়ামগী অৱাবা অসি, মচৎ অসিবু হোংদোকপদা মায় পাক্লে। করি করিগুম্বদা ঐনা উখি মদুদি য়ুমগী অহলশিং য়াম্না অহল নত্তে চহি ৪৫-৫০গী অহলশিংনা মরম অসিদগী হিদাক চাদে মদুদি মখোয়না হায় শেন্দোল পুবা তাগনি, পুম্নমক অঙাংশিংনা শিংবা তাগনি অমসুং অঙাংশিং লোইনা মাংলনি। অঙাংশিংগী পুন্সি মাংদনবগীদমক মমা-মপা ওইবা কয়ানা পুন্সি চুপ্পা চৈনা খাংই অমসুং শিখি। মরমদি শেল তোন্দনবা, চৈনা খাংখি অদুবু অঙাংশিংগী মরাইবক্তা মীগী শেল তোনবা ওইদনবা অসিগীদমক্তা মখোয় ত্রীৎমেন্ত তৌখিদে।
মরূপশা,
মখোয়গী হকশেলগী শোইদ-ঙামদবগী ৱাখল, লায়েংনবগীদমক পৈশাগী অদুক য়াম্না ৱাদবা, মসিনা খুন্নাইগী ৱাখল্লোন অসিবু হোংদোকহল্লে অমসুং ঐখোয়না মসিগী ফল অদুসু উবা ফংলে। ঙসি হেল্থ অমসুং ৱেলনেসকী মতাংদা চেকশিনবা পুরক্লিবা অসি শহর খক্তদা নত্তে, অরাপ্পা মনুং হঞ্জিনবা গুঙ্গংগী মফমশিংদসু মসি উবা ফংলে। অমাংশঙ ফংহনখিবদগী মীয়ামদা হকশেলগীদমক্তা খঙহনখি। য়ুমথোং খুদিং ঈশিংগী খোংজংনা মীয়ামদা অফবা ঈশিং ফংহল্লি, ঈশিংদগী ওইরকপা লাইনাশিং হন্থহল্লে। চাকখুমদা গ্যাস য়ৌখিবদগীদি শুপ্নগী ঐখোয়গী ইচা-ইচলশিংগী হকচাং ফগৎলকপদা নত্তনা ইমুং অপুনবা অদুদা অফবা ৱাখল্লোন পুরক্লে। ন্যুত্রিসনগী খোংজংনসু মসিদা খঙবা হেনগৎহল্লে। হোৎনরিবশিং অসিগী য়াম্না চাউবা কান্নবা অমা ফংলে মদুদি লৈবাক অসিদা ইমাশিং মতম চাদনা শিবগী মশিং য়াম্না হন্থরে।
মরূপশা,
শুপ্নগী আউৎকম – ফল খক্তদা ফোকস তৌবনা য়াদ্রি। ইম্পেক্ত – অসিসু মরুওই, অদুবু ইম্প্লিমেন্তেসনসু অদুক্কী মতিক মরুওই মরম অসিনা, ঐনা খল্লি মদুদি লমচৎতা পাক-চাউনা অহোংবা পুরক্নবগীদমক্তা ঐখোয়না খ্বাইদগী হান্না থৌওংদা অহোংবা পুরকপা মথৌ তাই। হৌখিবা চহিশিংদা লৈবাক অসিনা মসিদা শাফু পীখি। মসিগী ফল ওইনা ঐখোয়না উরি মদুদি লৈবাক্কী হেল্থ সেক্তরদা মখোংদগী হৌনা অহোংবা পরক্লে। স্কিমশিং অসিগী, এৱ্যারনেস অসিগী অচৌবা মরমদগী স্কুলশিংদা ইচানুপীশিংগী দ্রোপআউৎ রেত্তা হন্থবা পুরক্লে।
মরূপশা,
লৈবাক অসিদা মেদিকেল এজুকেসনবু ইনোৎ হাপ্নবগীদমক্তসু মিশন মোদতা থবক চৎথরি। মেদিকেল এজুকেসনগী মেনেজমেন্তকা মরী লৈনবা ইন্সতিত্যুৎশিংদা রিফোর্ম তৌরে। ত্রেদিস্নেল ইন্দিয়ন মেদিসিনগা মরী লৈনবা মহৈ-মশিংদসু মথৌ তাবা রিফোর্মশিং তৌরে। নেস্নেল মেদিকেল কমিশন শেম্লবা মতুংদা হেল্থ এজুকেসন্দা ক্বালিতীসু হেন্না ফগৎলগনি অমসুং ক্বান্তিতীগী মতাংদা চাউখৎপা পুরক্কনি। গ্রেজুএৎকীদমক্তা নেস্নেল এগজিৎ তেস্ত অসিগা লোইননা চহি ২গী পোস্ত এম.বি.বি.এস. দিপ্লোমা, নত্ত্রগা পোস্ত গ্রেজুএৎ দোক্তরশিংগীদমক্তা দিস্ত্রিক্ত রেসিদেন্সী স্কিম্বু ওইরো, অসিগুম্বা অনৌবা খোংথাংনা মথৌ তাবা অমসুং মগুন লৈবা থাক অনিমক্তা থবক পায়খৎলি।
মরূপশা,
পান্দমদি রাজ্য খুদিংমক্তা এম্স য়ৌহনবনি অমসুং লোকসভাগী মফম ৩ খুদিংগী মরক্তা মেদিকেল কোলেজ অমা শোইদনা লৈহনবনি। হোৎনবশিং অসিগী ফলদগী হৌখিবা চহি ৬তা এম.বি.বি.এস.তা অনৌবা সীৎ লিশিং ৩১ অমসুং পোস্ত গ্রেজুএত্তা অনৌবা সীৎ লিশিং ২৪ হেনগৎহনখ্রে। মরূপশা, হেল্থ সেক্তরদা ভারতনা মখোংদগী হৌরগা হোংদোকপগী থবক্তা মায় ওনশিল্লি। করিগুম্বা ২০২০ অসি হেল্থ চেলেঞ্জশিংগী চহি ওইরবদি, ২০২১ অসি হেল্থ সোলুসন্সকী চহি ওইগনি। ২০২১দা মালেম অসিনা, হকশেলগী লমদা হেন্না পুক্নীং চংদুনা পাম্বৈশিং পুথোকপগী মায়কৈদা চংশিনগনি। ভারতনসু মতৌ অসুম্না হেল্থ চেলেঞ্জশিংগী মায়োক্নবদা লৌরিবা থৌদাং অসি, মালেম্না উরি। ঐনা হৌরকপদা মসিগী মতাংদা পনখ্রে।
মরূপশা,
ভারতকী থৌদাং অসি ২০২১দা হেল্থ সোলুসনগীদমক্তা, সোলুসনগী স্কেলিংগীদমক্তা মরুওইবা ওইগদৌরি। ভারতনা, ফ্যুচর ওফ হেল্থ অমসুং হেল্থ ওফ ফ্যুচর, অনিমক্তা খ্বাইদগী মরুওইবা রোল লৌগদৌরি। মসিদা মালেম্না কম্পিতেন্ত মেদিকেল প্রোফেস্নেলশিংসু ফংগনি, মখোয়গী সেবাগী ৱাখল্লোনসু ফংগনি। মফম অসিদা, মালেম্না মাস ইম্যুনাইজেসনগী এক্সপিরিএনসু ফংগনি অমসুং এক্সপর্তাইসসু ফংগনি। মফম অসিদা মালেম্না হেল্থ সোলুসন অমসুং তেক্নোলোজীবু পুনশিনগদবা স্তার্অপশিং অমসুং স্তার্তঅপ ইকোসিস্তেমসু ফংগনি। স্তার্তঅপ হেল্থকেয়র অসিনা এক্সেসিবলসু ওইহল্লি অমসুং হেল্থ আউৎকমসু ইম্প্রুবসু তৌগনি।
মরূপশা,
ঙসি ঐখোয় পুম্নমক্না মসি উরি মদুদি লাইনাশিং অসি হৌজিক গ্লোবেলাইজ ওইরক্লি। মরম অসিনা, মতম অসি হেল্থ সোলুসনসু গ্লোবেলাইজ ওইহন্নবা, মালেম্না অমত্তা ওইনা পুনশিন্দুনা হোৎনগদবনি, রেস্পোন্স তৌগদবনি। ঙসি তোঙান তোঙান্না হোৎনবা, সাইলোস্তা থবক তৌবা, মসি কান্নবা ওইররোই। পুম্নমক্কা লোইননা চৎমিন্নবা, পুম্নমক্কীদমক্তা খনবা অমসুং ভারত অসি ঙসি মসিবু তৌদুনা উৎলিবা প্লেয়র অমনি। ভারতনা দিমান্দগী মতুং ইন্না ‘এদাপ্ত, ইনভোল্ব অমসুং এক্সপান্দ’ তৌনবগী মসিগী পাঙ্গল অদু উৎলে। ঐখোয়না মালেমগা লোইননা মাংদা চখৎনবা, কলেক্তিব ইফোর্ত্তা ভেল্যু এদিসন তৌরে, অমসুং পুম্নমক্তগী কাখৎতুনা ঐখোয়না শুপ্নগী মীওইবদা মিৎয়েং থমখি, মীওইবগী সেবা তৌখি। ঙসি ভারত্তা পাঙ্গলসু লৈরে, অমসুং সেবাগী ৱাখল্লোনসু লৈরে। মরম অসিনা, ভারতনা গ্লোবেল হেল্থকী নর্ব সেন্তর ওইদুনা শাহৌরক্লি। ২০২১দা ঐখোয় ভারতকী থৌদাং অসি হেন্না মপাঙ্গল কলহনগনি।
মরূপশা,
ঐখোয়গী অসিদা হায়নৈ –‘সর্বম অন্য পরিত্যজ্য শরীরম পালয়েদতঃ’॥ হায়বদি খ্বাইদগী মরুওইবদি হকচাংবু ঙাক-শেনবনি। পুম্নমক থাদোক্লগা হকশেলগী হান্না খনগদবনি। অনৌবা চহিদা ঐখোয়না মন্ত্র অসিবু ঐখোয়গী পুন্সিগী মরুওইবা ওইনা লৌশিনজগদবনি। ঐখোয় হকচাং ফনা লৈরগদি লৈবক অসিসু মশা ফগনি, অমসুং ঐখোয় মসিসু খঙই মদুদি ফিৎ ইন্দিয়া মুবমেন্ত চৎথরিবা অসি শুপ্নগী নহারোল খক্তগীনি হায়বগী ৱাফম করিসু লৈতে, চহি খুদিংমক্কী মীওইনা ফিৎ ইন্দিয়া মুবমেন্তকা লোইনদুনা লৈগদবনি অমসুং পন্থা অসিসু ফিৎ ইন্দিয়াগী মসিগী মুবমেন্ততা খোংজেল পীবগী য়াম্না ফরবা মতম্নি। ইমুং খুদিংমক য়োগবু ওইরো, ফিৎ ইন্দিয়াবু ওইরো, ঐখোয়না ইশাবু হকচাং ফনা থমগদবনি। নারবা মতুংদা তৌবশিং অদুক য়াম্না হকচাং ফনবগীদমক তৌবা মথৌ তাদে। অমসুং মরম অসিনা ফিৎ ইন্দিয়া ৱাফম অসিবু ঐখোয়না মতম পুম্নমক্তা নীংশিংগদবনি ইশাবু ফিৎ থমগদবনি, ঐখোয়গী লৈবাকপু ফিৎ ওইহনগদবনি, মসিসু ঐখোয় পুম্নমক্কী থৌদাংনি। রাজকোতকী ঐগী নুংশিরবা ইচিল-ইনাওশা, গুজরাতকী ঐগী নুংশিরবা ইচিল-ইনাওশা ৱাফম অসি কাওথোকপীগনু মদুদি কোরোনা শন্দোকপা শোইদনা হন্থরে, অদুবু মসি অথুবা মতমদা অমুক হেক্তা চংলকপা ঙম্মি। মরম অদুনা গজ অনি লাপ্নবা, মাস্ক অমসুং সেনিতাইজেসনগী মতাংদা কোমথোকপা তৌবীগনু। অনৌবা চহিনা ঐখোয় পুমন্মক্কীদমক্তা হরাও-তয়াম্বা ময়াম অমা পুদুনা লাকপা ওইসনু। অদোমগীদমক্তা অমসুং লৈবাক অসিগীদমক্তা অনৌবা চহি অসি য়াইফবা ওইরসনু। অদুগা ঐনা মসিসু হায়জরি মদুদি ঐনা হান্ননা হায়জখি হিদাক লৈত্রিফাওবদি কোমথোকপা তৌরোইদবনি, মসি হন্না হন্না হায়জখি। হৌজিক হিদাক অদু মাংদা উরে। মতম খরগী ৱানি অদু ওইরবসু ঐনা হায়জরি, হান্না ঐনা হায়জখি হিদাক লৈত্রিফাওবদি কোমথোকপা তৌরোইদবনি, অদুবু হৌজিক অমুক ঐনা হন্না হায়জরি হিদাকসু চেকশিনবসু। চেকসু চেকশিনগদবনি অমসুং হিদাকসু লৌগদবনি। হিদাক লাক্লবনিনা পুম্নমক ফংলে, মসি খক খনবীগনু। মালেম্না মসি হায়রি, সাইন্তিস্তশিংনা মসি হায়রি অমসুং মরম অসিনা হৌজিক ঐখোয়গী ২০২১গী মন্ত্রী অসি মসি ওইগনি, হিদাকসু অমসুং চেকশিনবসু।
অতোপ্পা ৱাফম অমনা ঐখোয়গী লৈবাক্তা তোকঙাগী কৈথেল অসি খরা খোংজেল য়াংশিল্লি। মখল মখলগী মীওইশিংনা মরন্নাইগী কান্নবা য়েংদুনা করিগুম্বা দায়িত্ব য়াওদবা মচৎকীদমক্তা মখল-মখলগী তোকঙাশিং শন্দোকই। ভেক্সিনগী থবক হৌরকপা অসিদসু তোকঙাগী কৈথেলসু খোংজেল য়াংখৎলকপা য়ারি। কনাবু ফত্তনা উহন্নবগীদমক মীচম মীয়ামগী কয়াদা অমাংবা ওইরিবনো হায়বসিগী খল্লুবা তৌদনা মশিং থিঙমদ্রবা ৱাখলনা শাগৎপা মীনম্বা শন্দোরক্কনি। মতাং খরদদি হৌবু হৌখ্রবনি, অমসুং ইচম চমজবা লাইরবা মীওই নত্ত্রগা অরানবা ৱাখল্লোন্দা থবক তৌরিবা মীওইশিংনা অচৌবা কনভিক্সনগা লোইননা মসিবু শন্দোক্লি। ঐনা ইরৈবাকচাশিংদা হায়জরি মদুদি কোরোনাগী মায়োক্তা শকখঙদবা য়েক্নবগী মায়োক্তা চংশিনবা লানফম্নি। তোকঙাগী কৈথেল হেনগৎহল্লোইদবনি, ঐখোয়সু সোসিএল মীদিয়াদা উবদু, ফোরৱার্দ তৌরোইদবনি। ঐখোয়সু ইথৌ খঙবা নাগরিক ওইনা লাক্কদৌরিবা নুমিৎশিং অসিদা লৈবাক অসিগী মনুংদা হকশেলগীদমক চংশিনগদৌরিবা খোংজং অসিদা, ঐখোয় পুম্নমক্না থৌদাং য়াগদবনি। পুম্নমক্না মাগী মাগী মায়কৈদগী থৌদাং লৌবীয়ু অমসুং ৱাফম অসি হান্না য়ৌহনগদবা মীওইশিং অদুদা ঐখোয় মপুং ফানা মতেং পাংসি ভেক্সিনগী ৱাফম অসিগী অনৌবা পাউ হেক লাকপগা ইরৈবাকচাশিংনা মতম চানা পাউ ফংগনি। ঐনা অমুক্কা হন্না ২০২১গীদমক্তা অদোম ময়ামদা হন্না হন্না য়াইফ-পাউজেল পীজরি।
থাগৎচরি!
