These projects will significantly improve the ease of living for the people and accelerate the region's growth : PM
ভারত ইমানা য়াইফরে।
ভারত ইমানা য়াইফরে।
ফম্পাকথক্তা লেঙশিনবিরিবা গুজরাতকী রাজ্যপাল অচার্য় দেবব্রত জী, গুজরাতকী মুখ্যমন্ত্রী ভুপেন্দ্র ভাই পতেল জী, কেন্দ্র লৈঙাক্কী ঐগী খোঙলোয় সি.আর. পাতিল জী অমসুং গুজরাতকী ঐগী ইচিল ইনাওশিং, অমসুং মরুওইনা ঙসিগী অম্রেলীগী ঐগী ইচিল ইনাওশিং।
দিৱালী অমসুং ধন্তেরাসনা থোঙজিলদা থিল্লরে, মতম অসি য়াইফরবা পুংফম্নি। নাকল অমদনা সংস্কৃতিগী কুমহৈ, অদুগা নাকল অমদনা চাওখৎপগী কুমহৈ, অদুগা মসি ভারতকী অনৌবা শক্লোন্নি। নাৎকী লন য়োকখৎপা অমসুং চাওখৎপগী খুমাঙ চাওশিন্নবা থবক পায়খৎলি। ঙসি ঐহাক্না গুজরাতকা মরী লৈনবা প্রোজেক্তশিং উরেপ উয়ুং তম্বা অমসুং শঙ্গাবগী তাঞ্জা ফংলি। ঙসি মফমসিদা লাকত্রিঙৈদা বদোদরাদা চৎলুই, অমসুং ভারতকী অহান্বা এসী ফেক্তরী হৌদোক্লুই। ঐখোয়গী গুজরাত্তা, ঐখোয়গী বদোদরাদা অমসুং ঐখোয়গী অম্রেলী গাইক্বারদগীনি, অমসুং বদোদরাসু গাইক্বারদগীনি। শঙ্গারিবশিংগী মরক্তা ঐখোয়গী নোংথক লান্মীগী মেদ ইন ইন্দিয়া এয়রক্রাফ্ত মেনুফেকচরিং ফেক্তরী শঙ্গাবা য়াওরি। লাউখিবা খোল্লাউ ময়ামদু অদোমগী থবাক শেগায়হনগদবা চাংদনি। হায়বিয়ু অম্রেলীগী মীয়াম… নত্রগদি ঐখোয়গী রুপালাগী দাইরী পাবা তাবনি। ঐহাক্না মফমসিদা লাক্তুনা ভারত মাতা সরোবর শঙ্গানবগী খুদোংচাবা ফংলি। ফম্পাকথকসিদগী ঈশিং, লম্বী অমসুং রেলৱেজকী লোং-তর্ম প্রোজেক্ত কয়াগী উরেপ উয়ুং তমখি অমসুং শঙ্গাখি। প্রোজেক্তশিং সৌরাস্ত্র অমসুং কচ্ছকী মীয়ামগী পুন্সি মহিং ফগৎহন্নবনি। অদুগা চাওখৎ থৌরাংদা অনৌবা ইনোৎ হাপকদবা প্রোজেক্তশিংসু য়াওরি। শঙ্গারিবা অমসুং উরেপ উয়ুং তম্লিবা প্রোজেক্তশিং অসি ঐখোয়গী লৌমীশিংগী য়াইফনবনি, লৌউ-শিংউগী লমদা থবক তৌরিবা মীওইশিংগী নুংঙাই য়াইফনবনি। অদুগা ঐখোয়গী নহাশিংদা থবক পীনবনি…মসিগীদমকসু খুদোংচাবা কয়াসু মসিদা লৈগনি। কচ্ছ, সৌরাস্ত্র, গুজরাতকী ঐগী ইচিল ইনাওশিং হায়রিবা প্রজেক্তশিং অসিগীদমক নুংঙাইবা ফোঙদোকচরি।
মরুপশিং,
সৌরাস্ত্র অমসুং অম্রেলীগী লমদমসিনা মমল য়াম্লবা খুদোল কয়া পীখ্রে। পুৱারীগী, নাৎকী, লোইনসিল্লোনগী অমসুং রাজনিতীগী লম কয়াদা অম্রেলীগী চাওথোকচনিংঙাই ঙাক্তনি। লমদম অসিননি য়োগীজী মহারাজ পীনখিবা, লমদম অসিননি ভোজা ভগৎ পীখিবা। অদুগা গুজরাতকী মীয়ামগী পুন্সিদা নুমিদাংৱাইরমগী মতমদা দুলা ভৈয়া কাগপু নীংশিংদবা গুজরাতকী মফম অমত্তা লৈরম্লোই। কাগ বাপুগী মমিং পন্দবা পনখৈ নৎত্রগা ফুঙ্গা ৱারী অমত্তা লৈরম্লোই। অদুগা ঙসিসু লমদম অসিদা মহৈরোয়শিংগী পুন্সিদগী হৌরগা পুন্সিগী অরোয়বা মীৎকুপফাওবদা রে পনখিদা সুখথি চাঞ্জো… কবি কলাপিবু নীংশিংদবা অমসুং কলাপিগী থৱায়না ঈশিং লাকপা উরবদি পেঞ্জরমগনি… রে পনখিদা সুখথি চাঞ্জো, হৌজিক্তি মহাক্কী মতম অদু সনা ফুদোংবা মতম ওইরে। লমদম অসি অম্রেলীনি, মীত্রংগী লম্নি। কেওএস. লালসু মফমসিদগী হৌরকখিবনি, অদুগা মোদর্ন পোইত্রীগী লময়ানবা রামেসভাই পরেখপু নীংশিংবিয়ু অমসুং গুজরাতকী মুখ্য মন্ত্রী, জিবরাজভাই মেহতাসু লমদমসিদা পোকখিবনি। মফমসিগী অঙাংশিংনা খুদোংথিবা, শীংনবা কয়া মায়োক্নদুনা লাক্লি। মহৌশাগী লাংফমদা মশাগী খোঙফম মনিং হন্বগী মহুত্তা থৌনা ফবগী লম্বী খল্লিবা লমদমসিগী মপারীশিংনি। মখোয়গী মরক্তগী ফেক্তরী মপু কয়াসু থোরকখি। লমদম অসিনা দিস্ত্রিক্ত অসিগী মমিং ঙান্থোইহন্বতা নত্তনা গুজরাতকী মিংচৎ, লৈবাক্কী মিংচৎ পুরকখিবা মমল য়াম্লবা মীওই কয়া পুথোকখিবনি। অদুগা মখোয়না খুন্নাইগীদমক তৌখি, তৌনবগীদমক হোৎনরি। অদুগা ঐখোয়গী ধোলকিয়া ইমুংনসু থৌওং অসি মাঙদা পুদুনা চৎলি। ঈশিংগীদমক গুজরাত্তা ভাজপা লৈঙাক লাকপগা গুজরাত লৈঙাক্না ৮০/২০ য়োজনা হৌদোকখি মসি ঐখোয়গী অথোইবা মায় পাকপনি। ৮০/২০ য়োজনা অমসুং মীয়াম্না শরুক য়াদুনা, চেক দাম শাখি, লৌরক্কী ইকোনশিং তৌখি, পাৎশিং লুথহনখি, ঈশিংগী লাইশঙশিং শাখি, অচৌবা ইকোনশিং তৌখি, পুম্নমক হোৎনখি… ঐ নীংশিংলি ঐনা মুখ্য মন্ত্রী ওইনা অখিল ভার্তিয়গী মীফমদা শরুক য়াবদা ঐহাক্না গুজরাতকী বজেতকী অচৌবা শরুক অমা ঈশিংগী লমদা থাদগদবনি হায়বদা ভারতকী তোঙান তোঙানবা লৈঙাক্কী মুখ্যমন্ত্রীশিং, লুচিংবশিংনা ঐঙোন্দা ৱাখলদু নহাক্না কদায়দগী ফংলক্লিবনো হায়বগুম য়েংদুনা য়েংখি। মতমদুদা ঐনা হায়খি, ঐখোয়গী গুজরাত্তা পানিদার ময়াম অমা লৈ অদুগা ঐখোয়না ঈশিং মরাঙ কায়না ফংলবদি গুজরাতকী মীপুম খুদিংমক পানিদার ওইরগনি হায়খি। চৎনবী অসি ঐখোয়গী গুজরাতকীনি। অদুগা ৮০/২০ য়োজনাদা য়াওরকখি। খুন্নাইনা, খুঙ্গংশিংনা শরুক য়াখি, ঐগী ধোলকিয়া ইমুংশিংনা অচৌবা থৌদাং য়াখি, কংলুরবা তুরেলশিং হিঙ্গৎহনখি। অদুগা থৌওং অসি তুরেলশিংবু হিংদুনা লৈহন্নবা থৌওংনি। ঐখোয়না নর্মদা তুরেলগা শম্নবা তুরেল ২০দা থবক পায়খৎখি। ঐখোয়গী ৱাখলদা তুরেলশিংদা অপীক অপীকপা ইকোনশিং তৌদুনা ঈশিং য়োকশিন্নবা ৱাখল লাকখি। অদুগা লৈমায়থক্তা ঈশিং লাক্লবা মতমদদি অমৃৎ লাক্তনিংঙাইগী ৱা লৈতে। ঈশিংগী মরুওইবা গুজরাতকী মীয়াম, সৌরাস্ত্রগী মীয়াম নৎত্রগা কচ্ছকী মীয়াম্না অমুক নৈনরুবগী মথৌ তাদ্রে, লাইরিক অমুক তম্লুবগী মথৌ তাদ্রে মরমদি অয়ুক হৌগৎলকপা খুদিংগী খুদোংচাদবা কয়া থেংনদুনা লাক্লবনি, মখোয়না মখোয়গী খুদোংচাদবা ৱাফমশিং খঙদুনা লাক্লবনি, খুদোংচাদবশিং অসি মখল কয়াদনি হায়বা মখোয়না খঙলবনি। মখোয়না মসিমসু খঙই মদুদি ঈশিং ৱাৎপনা মরম ওইরগা ঐখোয়গী সৌরাস্ত্রগী মীয়াম্না খুল হোংনরম্মি, কচ্ছকীসু খুল হোংনরম্মি। অদুগা ঐখোয়না সহরশিংদা কা অমদা মীওই ৮-৮ লৈনরম্বা মতমসু থেংনখ্রে অদুগা ঙসি ঐখোয়না অহান্বা ওইনা লৈবাক্কী জল শক্তি মন্ত্রালয় লিংখৎখি মরমদি ঐখোয়না মসিগী মরুওইবা খঙই। অদুগা ঙসিদি হায়রিবা থৌশিল ময়ামদুনা ঐখোয়গী ফীভম হোংহল্লে, হৌজিক্তি নর্মদাগী ঈশিংনা খুঙ্গং খুদিং য়ৌহন্নবগী থৌরাং ঐখোয়না মায় পাকহল্লে। ঐ নীংশিংলি মতম অমদা নর্মদাগী ঈশিংগী কান্নবা লৌনরম্বা, হৌজিক্তি মতম হোংলক্তুনা ইমা নর্মদা মশামক্না খুঙ্গং খুদিং কোয়না চত্তুনা কান্নবা য়েল্লি, ঈশিং য়েল্লি। সৌনি স্কীম লৈঙাক্কী ঈশিং য়োকশিন্নবা স্কিম্নি। ঐনা অহান্বা ওইনা সৌনি স্কীম হৌদোকখিবা মতমদা কনাগুম্বা অমত্তনা মদু মায় পাক্কনি হায়না থাজনরমদে। কনাগুম্বা মীওই খরদি মোদীগী মীখল মতম য়ৌরক্লবনিনা বেলুন থাদোরক্লে হায়না হেদলাইন ওইনখিবনি। অদুবু স্কীমশিং অদুনা কচ্ছ, সৌরাস্ত্রদা অনৌবা পুন্সি অমা পীরি অমসুং অদোমগী মীৎমাঙদা অদোমগী মঙলান মঙফাওনহন্দুনা অশঙ অমান্না থন্না উহল্লি। মসিনি পুকচেল শেংবা ফিরেপ্না কমদৌনা মায় পাকপগে হায়বগী খুদম। ঐনা মীয়ামদা মারুতি কার অমা থৌবা চন্বা অচৌবা পাইপ অমা তিংগনি হায়বা মতমদা মীয়াম্না ঙক্নখি। ঙসিদি গুজরাতকী কাচিন কোয়া শিন থুংনা হায়রিবা পাইপশিংদুদগী ঈশিং ফংলি। গুজরাতনা মসি থবক ওইনা তৌদুনা উৎলে। করিগুম্বা ঐখোয়না তুরেল লুথহনবা পাম্লবদি, ঐখোয়না চেক দাম শাবা তাই, শাদ্রগনা বেরেজ শাবা তাই ঐখোয়না মদু তৌরগা ঈশিং য়োকশিনবা তাই। গুজরাতনা কেম্পেন অসিদসু গুজরাতনা তানখৎলক্তুনা মীয়াম্না শরুক য়াশিল্লক্লি। মদুগী মহৈনা অকোয়বা মফমশিংসিদা থক্নবা ঈশিংগী ফীভমসু ফগৎলকখি, হকশেলশু ফগৎলকখি, অমসুং অনৌবা প্রোজেক্তশিংনা য়ুমথোঙশিংদা ঈশিং পীনবা, অমসুং লৌফমশিংদা ঈশিং ফংহন্নবা মঙলানশিংদা ইনোৎ হাপ্লি। মসিদা তশেংনা অপেন্বা পোকই। ঙসিদি, চহি ১৮-২০গী নহাশিংনা ঈশিংগীদমক কয়াম ৱারম্বগে হায়বা ফাওবা খঙলরোই, ঙসিদি মখোয়না তেপতা ঈরু লুজরম্লগনি, মখোয়না মখোয়গী মমাশিংনা কোন কয়াম পুরগা কিলোমিতর ৩-৪ লাপ্না কমদৌনা ঈশিং শোকপা চৎনরম্বগে হায়বা খঙলরোই। গুজরাতনা তৌখিবশিংদু ঙসিগী লৈবাকসিগী খুদম চাংদম ওইররি। য়ুমথোঙ খুদিং লৌফম খুদিং ঈশিং ফংহন্নবা গুজরাতনা পায়খৎখিবা কেম্পেন ঙসিসু পুকচেল শেংনা মখা চত্থরি। মীওই মিলিয়ন কয়ানা ঙসি উরেপ উয়ুং তম্লিবা অমসুং শঙ্গারিবা প্রোজেক্তশিংসিদগী কান্নবা ফংলগনি, নবর-চবন্দ বল্ক পাইপলাইন প্রোজেক্তকী ঈশিংনা খুঙ্গং ১,৩০০ অমসুং সহর ৩৫ রোমদা কান্নবা পীরগনি। অম্রেলী, বোতাদ, রাজকোত, জুনাগর, পোরবন্দর দিস্ত্রিক্তকী মীওই মিলিয়ন কয়ানা মসিদগী ঈশিং ফংলগনি, অমসুং নুমিৎ খুদিং অহেন্বা ঈশিং লিতর মিলিয়ন ৩০০ লোম মফমশিং অসিদা য়ৌগদৌরিবনি। পসাবি গ্রুপ ওগমেন্তেসন ৱাতর সপ্লাই স্কীমগী অনিশুবা ফেজকীসু ঙসি উরেপ উয়ুং তম্লি। মহুৱা, তলাজা, পালিতানা প্রোজেক্ত অসিগী তালুকা অহুম্নি, অমসুং পালিতানা অসিনা স্তেত পুম্বগী শেন্মিৎলোন্দা ইনোৎ হাপ্লিবা লাই খুরুম্ফম অমসুং লম কোয়বা ময়ামগী মরুওইবা মফম অমনি। হায়রিবা প্রোজেক্ত অসি লোইশিল্লকপদা খুঙ্গং ১০০ হেন্বদা কান্নবা পীগনি।
মরুপশিং,
ঙসি ঈশিংগী প্রোজেক্তশিং উরেপ উয়ুং তম্লিবা অমসুং মীয়ামগী মফমদা কত্থোক্লিবা অসসি লৈঙাক্না খুন্নাইগী য়াইফনবা পায়খৎপা থৌরাংশিংগা মরী লৈনৈ। মসি ফজরবা খুদম অমনি অমসুং ঐখোয়না মীয়াম্না শরুক য়ামিন্নবদা মরুওইবা মীৎয়েঙ থম্লি। মরমদি ঈশিংগী প্রোজেক্তশিং অসি মায় পাকহনগে হায়রবদি, মীয়াম্না শরুক য়াশিন্বা মথৌ তাই। নীংতম্বগী চহি ৭৫ মপুং ফারকপা মতমদা, লৈঙাক্না থৌরাং কয়া, মোদীগী মমিং য়াওবা থৌরাং কয়া পায়খৎপা য়াই, অদুবু মদু ঐখোয়না তৌখিদে। ঐখোয়না খুঙ্গংশিংদা অমৃৎ সরোবর শেমগৎনবা দিস্ত্রিক্ত খুদিংদা অমৃৎ সরোবর ৭৫ শেমগৎনবা থৌরাং য়াৎখি, অমসুং হন্দক্তা নৌনা ফংবা পাউদা অসিগুম্বা মীয়ামগী ইকোন লিশিং ৭৫গী থবক হৌজিক হৌজিক পায়খৎলি। পাৎ ৬০,০০০ হেনবা হৌজিক নীংথিনা লৈরে। তুংগী মীরোলগীদমক পায়খৎলিবা থৌরাং অসি চাউই, অমসুং মসিনা কৈরোয় লৈকায়দা ঈশিং ফংবগী চাং হেনগৎহল্লে। ঐনা কেতচ দি রেন কেম্পেন পাঙথোকখি, অমসুং দিল্লীদা চৎলবা মতুংদা মদুনা কান্নবা কয়া পুরকখি। মসিগী মায় পাকপা অসিমক অচৌবা খুদম অমনি। ইমুংদা ওইরবসু, খুঙ্গংদা, লৈকায়দা ওইরবসু মীয়ামবু ঈশিং মরিক খুদিংমক য়োকশিন্নবা পুক্নিং থৌগৎখি, অমসুং লাইবক ফবনা সি.আর পাতিল হৌজিকসু ঐখোয়গী মন্ত্রী মন্দলদা লৈরি। মখোয়না গুজরাতকী ঈশিংগী ফীভম থেংনদুনা লাকখ্রে। মসিমক লৈবাক পুম্পদা ইদুনা লৈহৌরগনি। কেতচ দি রেনগী থবক অসি পাতিলনা মহাক্কী মরুওইবা থৌরাংশিংগী মনুংদা অমা ওইনা পায়খৎখিবনি। গুজরাতকা লোয়ননা রাজস্থান, মধ্য প্রদেশ অমসুং বিহার য়াওনা লৈবাকসিগী স্তেত কয়ানা মীয়াম্না শরুক য়াদুনা রিচার্জ ৱেল লিশিং কয়া শাগৎপা হৌনখি। মতম খরগী মমাঙদা, ঐখোয়না ভিদিও কন্ফরেন্সিংগী খুত্থাঙদা খা গুজরাতকী সুরত্তা থৌরম অমা য়াওনবা তাঞ্জা ফংখি, থৌরমদুদা মীয়াম্না মখোয়গী খুলশিংদা রিচার্জ ৱেল তৌবগী থবক পায়খৎনবা উখি, মদুদা ইমুং খরদি মখোয়গী লম পুথোকপসু য়াওখি। মসি অনৌবা পুক্নিং মথুম মরাং হৌবা থৌওং অমনি, খুঙ্গংগী ঈশিংদি খুঙ্গংদুদা লৈগদবনি, ঙমখৈগী ঈশিংনা ঙমখৈদা লৈগদবনি, হায়না পায়খৎখিবা কেম্পেন অমসুং খোঙথাংশিংনি। মালেমগী লৈবাক কয়াদা নোং লিক্না তাই অমসুং মখোয়না ঈশিং য়োকশিন্দুনা শীজিন্নৈ। করিগুম্বা অদোম্না পোরবন্দরগী মহাত্মা গান্ধীগী য়ুমদা চৎলুরবদি, অদোম্না চহি ২০০ শুরবা লৈনুংগী ঈশিং য়োকফম থেংনগনি। মসিনা তাক্লিবদি ঐখোয়গী মীয়াম্না চহি ২০০গী মমাঙদা ঈশিংগী কান্নবা চাংয়েং তৌদুনা খঙখ্রে হায়বনি।
মরুপশিং,
হৌজিক্তি ঈশিং মরাং কায়না ফংলবনিনা লৌউ-শিংউবদসু লায়হল্লে, অদুবু ঐখোয়গী মরুওইবা লাইৱাদি ঈরিক অমনা মহৈ মরোং য়াম্না লোকপনি হায়বদি গুজরাত্তা ঐখোয়না স্প্রিঙ্ক্লরসু পুরক্লে। মসিবু গুজরাতকী লৌমীশিংনসু তরাম্না ওক্লি। ঙসি নর্মদাগী ঈশিং য়ৌবা মফম খুদিংদা লৌরোক অহুম লোক্লি, লৌরোক অমুরক লোকপদা খুদোংচাদবা মায়োক্নরম্বা লৌমীশিংদুনা হৌজিক্তি লৌরোক অহুম্লক লোক্লি। অসুম্না মখোয়গী ইমুংদা নুংঙাইবগী ইহুল লাক্লি। ঙসি অম্রেলী দিস্ত্রিক্তকী লৌউ-শিংউগী লমদা, মহৈ মরোং কয়া মায় পাক্না থানরি, ঐনা দিল্লীদা মসিগী পাউ তম্লি। ঐখোয়গী হীরা ভাইনা ঐঙোন্দা থারকই। অদুগা অমরেলীগী কেসর হৈনৌসু জি.আই. তেগ ফংলে। মদুনা মরম ওইরগা মালেম পুম্বদা অমরেলীগী কেসর হৈনৌ অসি জি.আই. তেগ য়াওদুনা মীয়াম্না খঙনরে। মসিগা লোয়ননা অমরেলীগী মিংচৎ পুরক্লিবা অমনা মহৌশাগী লৌউ-পথাপ্নি। ঐখোয়গী গভর্নর সাহেবনা মসিদা মিসন মোদতা থবক পায়খৎলি। মহাক্নসু অমরেলীগী প্রোগ্রেসিব লৌমীশিংগী থৌদাং য়াদুনা মাঙদা চঙশিল্লি। ঐখোয়গী হালোলদা মহৌশাগী লৌউ-পথাপগী তোঙান তোঙানবা য়ুনিভর্সিতীশিং শেমগৎলি। য়ুনিভর্সিতীশিং অসিগী মখাদা, অহান্বা নেচরেল ফার্মিংগী কলেজ অমরেলীদা লিংখৎলে। মসিনা মরম ওইরগা মফমসিগী লৌমীশিংনা মসিদগী কান্নবা ফংলগনি। মরম অসিনা চাংয়েং অসি থুনা মায় পাকহনবা তাই অমসুং মফমসিগী লৌমীশিংনা শা উচেক লোইবগী লমদসু চঙশিন্বিয়ু, মদুদা শন লোইবিদুনা মহৌশাগী লৌউ-পথাপ্তা মদুগী কান্নবা লৌবিয়ু। অমরেলীগী দেরী ইন্দস্ত্রীগী মতাঙদা ঐ নীংশিংলি মতমদুদা লৈরম্বা আইনদি অদোম্না দেরী পুথোক্লবদি মরাল লংশিল্লবনি। মদু পুম্নমক ঐহাক্না লৌথোকখ্রে অমসুং অমরেলীসিদা দেরী ইন্দস্ত্রী হৌদোকখি। মীৎমাঙদা মদু মথঙ মথঙ চাওখৎলক্তুনা মীয়াম পুন্না পায়খৎমিন্নবা থৌরাংগী মহৈ য়ানখি। ঐ নীংশিংলি ২০০৭দা অমর দেরী হৌদোকপা মতমদা খুঙ্গং ২৫দা কোওপরেতিব সোসাইতীশিং লৈরম্মি। ঙসিদি খুঙ্গং ৭০০ হেন্বদা লৈরে। দিলিপ ভাই, ঐনা হায়রিবসিনি, খুঙ্গং ৭০০ হেনবগী কোওপরেতিব সোসাইতীশিংনা দেরী ইন্দস্ত্রীগা খুৎশম্ননা চৎমিন্নরি। ঐনা ইকোক কোন্না ফংখিবা পাউদা নোংমদা শঙ্গোল লিতর ১.২৫তি পুথোকই হায়না তাখি। অসিগুম্বা য়াওল অসিনা লম্বী অমখক্তা নত্তনা চাওখৎপগী লম্বী কয়া হাংদোক্লি।
মরুপশিং,
ঐনা নুংঙাইজবা ৱাফম অমসু লৈ, ঐনা চহি কয়াগী মমাঙদা হায়খি, ঐনা মীয়ামগী মমাঙদা ৱাইত রিভোলুসন পুরক্নবা, অদুদগী গ্রীন রিভোলুসন পুরক্নবা হায়খি, অদুগা হৌজিক্না স্বীত রিভোলুসন অমুক হৌবা তারে। খোইহী পুথোকপা তাই, য়ুমদা শীজিন্ননবখক্কীদমক পুথোক্কদবা নত্তে, খোইহী হেন্না পুথোক্লিবমখৈ লৌমীশিংদা শেন্থোক হেনগৎহনগদৌরিবনি, অমসুং মসিগী ত্রেনিং মীয়াম্না ফংখ্রে। ঙসিদি খোইহীনসু ঐখোয়গী মশক তাক্লি। মসি নুংঙাইবা ৱাফম অমনি। অকোয়বগী ফীভম কন্নবা অতৈ থবক কয়া অমসু পায়খৎলি, ইমাগী মিংদা উ থাবগী গুজরাতনা হৌদোকখিবা কেম্পেন লৈবাক পুম্বনা পাঙথোক্লি অমসুং মসিনা মালেমগী ওইনা কান্নবা পীগদৌরিবনি। মসিদা মীপুম খুদিংমক্না শরুক য়ারি। অকোয়বগী ফীভমগী থবক কয়ামরুমসু পায়খৎলি, অমদি মসিগী মতাঙদা অনিশুবা অচৌবা থবক অমনা ঐখোয়গী ইলেক্ত্রিসিতী বিল অমত্তা তাহন্দবদুনি। পি.এম. সুর্য়ঘর ফ্রী ইলেক্ত্রিসিতী স্কীম অসি ইমুং পুম্নমক্তা চহিদা মৈগী বিলদা লুপা লিশিং ২৫ দগী ৩০ ফাওবগী শেনফম হন্থহন্নবা অচৌবা থৌরাং অমনি, মসিখক্তা নত্তনা, মখোয়না অহেন্বা মৈশিং য়োন্দুনা শেল তাঞ্জবসু য়াই। থৌরাং অসি হৌখিবতা ঙায়রি, অদোম্না ঐঙোন্দা অহুমলকশুবা ওইনা মীয়ামগী থৌগল তৌনবা থৌদাং শিন্নবিরকপা মতমদা হৌখিবনি। অমদি হৌজিক ফাওবদা, ইমুং মিলিয়ন ১৫না মসিদা রেজিস্তর তৌরক্লে। ঐখোয়গী গুজরাতকী য়ুম লাখ ২ রোম্না মখোয়গী য়ুমথক্তা সোলার পেনেলশিং খিনখ্রে, মখোয়না মৈ পুথোক্লি, অমসুং য়োল্লি। ইনর্জীগী মতাঙদা অমরেলীনসু খোঙথাং খরা পায়খৎলে। ঙসি ঐখোয়গী গোবিন্দভাইনা মিসন অসি মহাক্কী দুধদ খুঙ্গংদা পায়খৎলি। থা ৬কী মমাঙদা গোবিন্দভাইনা ঐঙোন্দা মাগী খুঙ্গং পুম্বদা নুমিৎকী য়ুম লৈহন্নবা হোৎনরি, অমসুং মসিগী থবক অয়াম্বা লোইশিল্লক্লে হায়খি। মদুনা মরম ওইরগা, খুঞ্জাশিংদুনা থা অমদা মৈগী মতাঙদা লুপা ৭৫,০০০ রোম শেল চৎলরোই। দুধদ খুঞ্জা অমসুং ময়ুম ময়ুমদা সোলার প্লান্ত খিল্লিবা মীওইশিংনা চহিদা লুপা ৪,০০০ রোম শেল চৎপা হন্থগদৌরিবনি। দুধদ খুঙ্গংনা অমরেলীগী অহান্বা সোলার ভিলেজ ওইরকপদা গোবিন্দভাই অমসুং অমরেলীগী মীয়ামগী মফমদা নুংঙাইবা ফোঙদোকচরি।
মরুপশিং,
ঈশিং অমসুং তুরিজমগা হকথেংননা মরী লৈনৈ, ঈশিং লৈবা মফমদা তুরিজম লৈগদৌরিবনি। হৌজিক ঐহাক্না ভারত মাতা সরোবর য়েংলম্বনি, মতমদুদা ঐঙোন্দা ফাওরকখিবসি হন্দক্কী দিসেম্বরদা অরাপ্পা মফমদগী পাইরক্কদৌরিবা উচেকশিং, কচ্ছতা পাইরক্কদৌরিবশিং অদুনা হৌজিক্তি মফমসিদা মফম অমা ফংলগনি হায়বসিনি। মখোয়না মফমসিদা মখোয়গী চাক্তাফম অমা ফংবগা লোয়ননা ফ্লেমিঙ্গো তারক্লবদি লম কোয়বশিংসু হেনগৎলক্লগনি। মসিদা তুরিজমগী অচৌবা মফমসু য়াওরি। ঐখোয়গী অমরেলী দিস্ত্রিক্ততা মীয়াম্না লাই খরুম্বা লাক্নবা লাইফম মশিং য়াম্না লৈ। ঐখোয়না সর্দার সরোবর দাম উরে, দাম অসি ঈশিংগীদমক শাখিবনি, অদুবু ঐখোয়না মসিদা ভেল্যু হাপচিন্দুনা মালেমগী খ্বায়দগী ৱাংবা সর্দার সাহেবকী মীতম খিনখি, হৌজিক্তি মীওইই মিলিয়ন কয়ানা মসি য়েংবা লাক্নরি। মমাঙ চহিদা মীওই মিলিয়ন ৫ রোম্না সর্দার সাহেবকী মীতম য়াংবা লাক্নখি। হৌজিক ওক্তোবর ৩১ য়ৌগদৌরে। নুমিৎ নিনিগী মতুংদা, সর্দার সাহেবকী মপোক কুমওন লাক্লগনি, অমসু হন্দক্তি চহি ১৫০ ফারকপগী অখন্নবা তাঞ্জানি। ঐ দিল্লীদা হল্লগনি অদুগা হয়েং অমুক সর্দার সাহেবকী খুয়াখাদা ইকায় খুম্নবা উৎপা লাক্কনি। চহি খুদিংগী মতৌগুম ঐখোয়না সর্দার সাহেবকী মপোক নুমিত্তা নেস্নেল য়ুনিতী রন অমা পাঙথোক্কনি। অদুবু হন্দক্তি দিৱালীসু ৩১দা তাই, মরম অসিনা থৌরম অসি ২৯দা য়ৈখৎলে। অমসুং য়ুনিতী রন থৌরম অসি গুজরাত শিন্বা থুনা চাউনা পাঙথোকহন্নিংই। অদুগা ঐহাক কেবারিয়াদা পাঙথোক্কদৌরিবা নেস্নেল য়ুনিতী পেরেদতা শরুক য়াগনি।
মরুপশিং,
তুংদা ঐখোয়গী হৌজিক শেমগৎলিবা কেরলী রিচার্চ রিজর্বরসু ইকো-তুরিজমগী অচৌবা মফম অমা ওইরক্লগনি। ঐনা মসি ঙসি হায়রম্লিবসিনি। ঐনা মফমসিদা এদভেঞ্চর তুরিজমগী মতিং উবা ফংই। অদুগা করেলী বর্দ সেংচুএরীনা মালেমগী মমিং চৎনা লৈগনি ময়াম পুম্বসু য়েংবিদুনা মালেমগী মফম মফমদা পাউ শন্দোকপিয়ু। উচেক য়েংবা লাকপা তুরিস্তশিংনা উমংদা কেমেরা পায়দুনা লাক্কনি অমসুং নুমিৎ কয়ানি লৈগনি। মরম অসিনা অসিগুম্বা তুরিজম অসি শেন্থোক লাক্নবা অচৌবা পাম্বৈ অমনি। অসিগুম্বা অচৌবা সমুদ্র খোঙবাল অমা লৈবা হায়বসি ঐখোয়গী গুজরাতকী লাইবক ফবনি, মমাঙদদি সমুদ্র অসিনা ঐখোয়দা থুমহি চেনবা ঈশিং অমসুং অৱাবখক্তা পীগনি হায়না লৌনরম্মি। ঙসিদি, ঐখোয়না মদুবু নুংঙাই য়াইফবগী হোজঙ অমা ওন্থোক্লে। গুজরাতকী সমুদ্র খোঙবাল অসি গুজরাতকীখক নত্তনা লৈবাক পুম্বগী নুংঙাই য়াইফবগী হোজঙ ওন্থোক্নবা থৌরাং ঐখোয়না পায়খৎলি। ঙামীশিংনসু মফমসিদা চহি লিশিং কয়াগী মমাঙদগী লৈরক্লিবা য়োংশিংদগী কান্নবা ফংলি। মখোয় অমুক হন্না হিঙ্গৎহল্লি। লোথাল অসি মোদীনা লাক্লবা মতুংদা লৈরকখিবা নত্তে, চহি লিশিং মঙাগী মমাঙদগী লৈরক্লবনি। ঐহাক্না মুখ্য মন্ত্রী ওইরিঙৈদা, লোথালবু মালেমগী লমকোয়ফমগী পাফলদা য়াওহনবা হায়বসি ঐগী মঙলান ওইখি। অদুগা মালেমগী পাফলদা য়াওহন্বা হায়বসি অরায়বা থবক অমদি নত্তে। অদুগা হৌজিক্তি লোথাল অসি মালেমগী খ্বায়দগী চাউবা মেরিতাইম ম্যুজিয়ম লৈদুনা মেরীতাইম হেরিতেজ কমপ্লেক্স ওইরে। ঐখোয়না অমরেলীদগী অহমদবাদ চৎপগী লম্বীদা খজিকখক্তং চঙলগা লৈরবনি।
মসি ভারতকী ঈশিং লম্বীগী পারী পুরীগী লনবু লৈবাক্কী মফমদা অমসুং মালেমগী মফমদা শক্তাক্নবগী থৌরাং অমনি। চহি লিশিং কয়াগী মমাঙদা, মফমসিগী মীওইশিং সমুদ্র লান্না চৎনরম্বা মীওইশিংনি। অদুগা ঐখোয়না হোৎনরিবসু ব্লু রিভোলুসন, ব্লু ৱাতর পুরকপনি। হিথাংফম শেমগৎলিবশিংসি চাওখৎপা ভারত অমা পুরক্নবা ফিরেপ মপাঙ্গল কনখৎহন্নবা পায়খৎপা থৌরাংনি। ঙামীশিংগী খ্বায়দগী ফবা ইনফ্রাস্ত্রকচর থমদুনা জাফ্রবাদ, সিয়াল বেতনা অমরেলীগী চাউথোকচনিংঙাই ওইরি। পিপাবাব বন্দবু মতমগা চুনবা মওংদা শেমগৎপনা অনৌবা খুদোংচাবা কয়া পুরক্লি। ঙসিদি হিথাংফম অসি মীওই লিশিং কয়া থবক পীরিবা মফম অমা ওইরে। ঙসি পিপাবাব হিথাংফম অসি জহাজ লিশিং কয়া, কন্তেনর মিলিয়ন ১ হেনবা হেন্দল তৌবা ঙম্বগী কেপাসিতী লৈরে। অদুগা হৌজিক অমুক ঐখোয়না হোৎনরিবসিনা গুজরাতকী হিথাংফম পুম্নমক লৈবাক্কী মফম পুম্নমক্কা শম্নহনবনি। মসি ভারত পুম্বগী মীয়ামবু গুজরাতকী হিথাংফমগা শম্নহন্নবা থৌরাংনি। নাকল অমরোমদা মীচম মীয়ামগী য়াইফনবা থৌরাংসু চপ চানা পায়খৎলি। লায়রবশিংগী পক্কাগী য়ুম, মৈ, রেলৱে, লম্বী, গ্যাস পাইপলাইন, তেলিফোন ৱাইয়র, ওপ্তিকেল ফাইবর তিংবা, লায়েংশঙশিং শাবনচিংবা ইনফ্রাস্ত্রকচরগী থবক থৌরাং কয়া ঐখোয়গী অহুমশুবা তর্ম অসিদা পায়খৎলি মরমদি চহি ৬০গী মতুংদা লৈবাক অসিনা প্রধান মন্ত্রী অমদা অহুম্লক হন্না থৌগল তৌনবা তাঞ্জা পীনবিরি। গুজরাতকী মতেঙগী মতাঙদদি থোইদোক্না হায়রুদ্রবসু য়ারে। অচৌ অচৌবা ইনফ্রাস্ত্রকচরনা মীয়ামদা কয়া য়াম্না কান্নবা পীবগে হায়বা ঐখোয়না সৌরাস্ত্রদা উরে। ইনফ্রাস্ত্রকচর ফগৎলকপগা লোয়ননা, অচৌবা ইন্দস্ত্রীশিং চঙলকই, ঐখোয়না রোরো ফেরী সর্ভিসকী কান্নবা উনরে। ঐনা স্কুল তম্লিঙৈদা গোগা কি ফেরী হায়না তাখি, ময়ামদি তাবিহৌদবরা….? ঐখোয়না তাঞ্জা অসি লৌদুনা মীওই লাখ ৭ হেন্ববু রোরো-ফেরী সর্ভিসতু পুশিল্লকখি। গারী লাখ ১ হেন্বা, ত্রক, বস লিশিং ৭৫ হেন্বা লৈদুনা মীয়ামগী চত্থোক চশিন্দা চঙবা মতম য়াম্না হন্থহনখি। মীওই কয়াগী শেল কয়া য়াম্না মাঙহনখিদ্রবগে, পেত্রোলগী মৈখু কয়া য়াম্না হন্থহল্লবগে হায়বা অদোম পাদুনা য়েংবিয়ু, মতমদুদা ঐখোয় পুম্নমক্না অসিগুম্বা অচৌবা থৌরাং অমা মমাঙদা পায়খৎলমদ্রিবা করিগীনো হায়না ঙক্নগন। ঐনা খন্বদা অসিগুম্বা অফবা থবকশিং অসি তৌ হায়না ঐগী লাইবক্তা তম্লম্লবা মাল্লি।
মরুপশিং,
ঙসি জামনগর-অমৃৎসর-ভতিন্দা ইকমনিক কোরিদোর শেমগৎ শাগৎপগী থবক পায়খৎলি। মসিনা খ্বায়দগী চাউনা কান্নবা পুরক্কনি। গুজরাত্তগী পঞ্জাব ফাওবদা লৈরিবা স্তেতশিংনা মসিদগী কান্নবা ফংগদৌরিবনি। লম্বী পরিং অসিদা য়াম্না চাউবা শেন্মিৎলোনগী সেক্তরশিং লাক্কদৌরি। অদুগা জামনগর-মোর্বী লম্বীগী প্রোজেক্ত অসিগী মতাঙদদি রাজকোত-মোর্বী-জামনগর অসি ভারতকী মেনুফেকচরিং হব ওইনবগী মতিক লৈবা ত্রাইএঙ্গল অমনি হায়না ঐনা মতম পুম্নমক্তা হায়দুনা লাকপা ৱাফম্নি। চহি ২০গী মমাঙদা ঐহাক্না মফম অসি অপীকপা জাপান অমা ওইরক্নবা মতিক লৈ হায়বদা মীয়াম্না নোক্নবিখি, ঙসিদি মদুমক ওইররে, মসিগী কন্নেক্তিভিতীগী থবকশিংসিনা মসিগা মরী লৈনরক্লিবনি। মদুনা মরম ওইরগা, সিমেন্ত ফেক্তরী মফমগী কন্নেক্তিবিতীসু ফগৎলক্লগনি। মসিগী মথক্তা সোমানাথ, দ্বার্কা, পোরবন্দর, গির লাইনসু লাই খুরম্বা অমসুং লম কোয়বা লাকপশিংগী খুদোংচাবা কয়া নীংথিনা শেমগৎলক্লগনি। ঙসি কচ্ছকী রেল কন্নেক্তিবিতীগী থবকসু হৌদোক্লি, সৌরাস্ত্রগী অমসুং কচ্ছকী কন্নেক্তিবিতী প্রোজেক্ত অসিনা মরম ওইরগা কচ্ছ অসি লৈবাক পুম্বগী লমকোয়বশিংগী পুক্নিং চিংশিনফম ওইরি। লৈবাক পুম্বগী মীওইশিংনা কচ্ছকী তুরিজম অমসুং কচ্ছকী ইন্দস্ত্রীগী খোঙজেল তপথহৌবা তারে খন্না চেন চোংদুনা হোৎনরি।
মরুপশিং,
ভারতনা অসুম অসুম চাওখৎলক্লিবমখৈ, মালেমগী ভারতকী মিংচৎ হেনগৎলক্লি। মালেম পুম্বনা ভারত্তা অনৌবা থাজবগা লোয়ননা য়েংলি, মালেমসিদা ভারতকী অনৌবা মীৎয়েঙ অমা লৈরে। ভারতনা হোৎনরিবশিং অসি মীয়াম্না খঙনবা হৌরক্লে। ঙসি মালেম পুম্বনা ভারতকী ৱাফম লুম্না লৌরি, মুন্না তারি। মীপুম খুদিংমক্না ভারত্তা করি করি মতিং লৈবগে হায়বগী মতাঙদা খন্নরি। মদুদা গুজরাতকী থৌদাংদি অদুমক য়াওদুনা লৈরে, গুজরাতনা মালেমগী মফমদা ভারতকী সহর অমসুং খুঙ্গংশিংদা মতিং কয়াম লৈবগে হায়বা উৎলি। নুমিৎ খরনিগী মমাঙদা, মমাঙ চয়োলদা রসিয়াদা ব্রিক্স সম্মিত য়াওবা চৎলুই, মফমদুদা লৈবাক কয়াগী প্রধান মন্ত্রী, রাস্ত্রপতীশিং শরুক য়াখি, মখোয়গা লোয়ননা ইংনা চিক্না ৱারী শাননবা তাঞ্জা ফংলকখি অমসুং ময়াম্না হায়নরকপা ৱাফম অমদি ঐখোয় ভারতকা মরী শাগৎপা পাম্মি হায়বসিনি। ঐখোয়না ভারতকী চাওখৎ খোঙচৎকী খোঙলোয় ওইবা পাম্মি। লৈবাক পুম্বনা ভারত্তা শেল থাদনিংবগী অপাম্বা ফোঙদোক্নরকখি, ৱাহং কয়া হংনরকখি। ঐনা রসিয়াদগী হল্লকপগা জর্মনীগী চান্সেলর দিল্লীদা লাকখি অমসুং মহাক্না অচৌবা দেলিগেসন অমা পুদুনা লাকখি, এসিয়া পুম্বদা শেল থাদরিবা জর্মনীগী মীওই পুম্নমক পুদুনা লাকখি। মহাক্না মখোয়দা মোদীগী ৱা তারো অমসুং নখোয়না ভারত্তা করি তৌবা য়াবগে হায়বদু লেপ্পিরো হায়খি। মদুনা তাক্লিবদি জর্মনীসু ভারত্তা শেল চাউনা থাবদা পাম্লি হায়বসিনি। মদুদসু নত্তে, মহাক্না মরুওইবা ৱাফম অমসু হৌদোক্লমখি মহাক্না নহাশিং রিক্রুত তৌনবগী ৱাফমসু হৌদোক্লমখি। মমাঙদা জর্মনীনা ভিজা ২০,০০০ পীরম্বনি অদুবু মহাক্না ভিজা মশিং ৯০,০০০দা হেনগৎহন্নবা ৱাফম ফোঙদোক্লম্বগা লোয়ননা মখোয়গী ফেক্তরীশিংদা নহা শিন্মীশিং পাম্মি হায়রম্মি। ভারতকী নহাশিংগী মপাঙ্গল য়াম্না লৈ, মখোয় আইন ঙাক্না চৎলি অমসুং ইংনা-চিক্না লৈমিন্নৈ। ঐখোয়না মীওই ৯০,০০০ মথৌ তাই অদুনা চহি খুদিংগী ভিজা ৯০,০০০ পীরগনি হায়না মহাক্না লাউথোক্লম্মি। হৌজিক্তি খুদোংচাবা অসি ঐখোয়গী মীয়ামদা লৈরে, মখোয়না মথৌ তাবগী মতুং ইন্না শেম শাবা তাই। ঙসি স্পেনগী রাস্ত্রপতীসু মফমসিদা লাক্লম্মি, স্পেন্না ভারত্তা শেল য়াম্না থাদরি। ঙসি বরোদাগী ত্রান্সপোর্ত ফেক্তরীনা গুজরাতকী অপীকপা ইন্দস্ত্রীশিংদা কান্নবা পীরগনি। রাজকোতকী খুৎলায় মচা মশু শাবা ফেক্তরী মচাশিংসু মখোয়গী খুৎলায় এয়রক্রাফ্ত শাবদা শীজিন্নগদৌরিবনি। গুজরাতকী কাচিন কোয়া শিনবা থুংবদা অপীকপা লাথে মেছিন্দা থবক শুরিবা মীওইশিংসু পার্ত মচা মচা শাবা ঙম্লগনি, মরমদি, এয়রক্রাফ্ত অমদা পার্ত মচা মচা কয়া মথৌ তাই অমসুং ফেক্তরী খুদিংগী মখোয় মশাগী ওইবা হৈ-শিংবা লৈজৈ। থৌরাং অসিদা অপীকপা ইন্দস্ত্রী মরাং কায়না লৈবা সৌরাস্ত্রগী ওইনদি খুৎশা মঙামক ঘীদা লুপ্পগুম্বনি মরমদি মসিদা থবক্কী খুদোংচাবা কয়া য়াওরি।
মরুপশিং,
ঐনা গুজরাত্তা লৈরুবগীনি ঐহাক্না গুজরাত চাওখৎহনবগা লোয়ননা লৈবাক পুম্বা চাওখৎহন্নবা মীয়ামগী থৌগল তৌবা ফংজরিবা, অদুগা ঐনা লেপ্লিবা খোঙফমদি ভারত চাওখৎনবগীদমক গুজরাত চাওখৎহনবা, চাওখৎপা গুজরাত, চাওখৎপা ভারত হায়বা মঙলানসিবু মঙফাওনহন্নবা লম্বী চেৎশিলহনবনি।
মরুপশিং,
ঙসি মতম কুইরবগী তুংদা অরিবা মরুপ মপাংশিংগী মরক্তা লাক্তুনা তিল্লরি। মতম কুইনা উরুদ্রবা মায়থোঙ কয়া উরি, পুম্নমক্না মোমোন নোক্লি, ৱাখল নুংঙাইবগী মতৌ ইরি। ঐনা অমুক্কা হন্না ঐগী সবজিভাইইদা হায়জনিংবদি অদোম হৌজিক সুরত্তা চৎপা লেপ্পিরো মফমসিদগী গুজরাতকী কাচিন কোয়া শিন্বা থুংনা ঈশিং য়ৌহন্বিয়ু। ৮০/২০ স্কীমগী কান্নবা মপুং ফানা গুজরাত্তা ফংহনবিয়ু। ঐহাক্না ময়াম পুম্নমক্কী মফমদা য়াইফ পাউজেল পীজরি।
ঐগা লোয়ননা লাউবিরকউ –
ভারত ইমানা য়াইফরে ।
ভারত ইমানা য়াইফরে ।
ভারত ইমানা য়াইফরে ।
থাগৎচরি মরুপশিং ।
