ভারত মাতা কী জয়!
ভারত মাতা কী জয়!
ইকাই খুম্নরবা রাজ্যপাল শ্রী আরিফ মোহমদ খান জী, ঐখোয়গী মীয়ামনা পাম্নরবা মুখ্য মন্ত্রী শ্রী নিতিশ কুমার জী, মফম অসিদা লৈরিবা অতোপ্পা মশক নাইরবা মীওইশিং অমসুং ঐহাক্কী নুংশিরবা ইচিল-ইনাওশিং!
ময়াম পুম্নমকপু ঐহাক্না খুরুমজরি। পর্নিয়া অসি লাইরেম্বী পুরন দেবী, ভক্ত প্রহলাদ অমসুং মহর্ষি মেহি বাবাগী থবক তৌফম্নি। হায়রিবা লমদম অসিনা ফানিশ্বর নাথ রেনু অমসুং সতীনাথ ভাদুরিগুম্বা নোভেলিস্তশিংবুসু পীনবিরি। মসি ভিনোবা ভাভেগুম্বা কর্ময়োগীশিংগী কর্মভুমিনি। ঐহাক্না মসিগী অশেংবা লমদম অসিদা হন্না-হন্না ইকায় খুম্নবা উৎচরি।
ঐহাক্না হৌদ্রিঙৈদা, ঐহাক্না ময়ামদা ঙাকপীনবা হায়জরি। কোলকাতাদা ঐগী প্রোগ্রাম শাংদোকখি, অমসুং মসিনা মরম ওইদুনা ঐহাক মফম অসিদা য়ৌবদা থেংখি। অদুম ওইনমক, মশিং য়াম্লবা মীওই কয়া অমা ঐঙোন্দা য়াইফ-মঙ্গোল পীনবা মফমসিদা লাক্লি। ময়াম্না মতম কুইনা ঙাইরি। ঐহাক্না ময়ামদা থাগৎপা ফোংদোকচরি। অমসুং অমুক্কা হন্না, ঐহাক্না থেংনা লাকপগীদমক ঙাকপীনবা মীয়ামগী মফমদা হায়জরি।
মরুপশিং,
ঙসি বিহারগীদমক চাউরাক্না লুপা করোর ৪০,০০০গী দিবেলপমেন্ত প্রোজেক্তশিং শঙ্গাখ্রে অমসুং উরেপ উয়ুংসু তমখ্রে। রেলৱেজ, এয়রপোর্ত, ইলেক্ত্রিসিতী অমসুং ঈশিংগা মরী লৈনবা প্রোজেক্তশিং অসিনা সীমাঞ্চলগী মঙলানশিং মপুং ফাহল্লগনি। ঙসি পি.এম. আৱাস য়োজনাগী মখাদা কান্নবা ফংলবা মীওই ৪০,০০০ হেনবনা পুক্কা (পর্মিনেন্ত) য়ুম ফংখ্রে। ঙসি অসি ইমুং ৪০,০০০ অসিগী অনৌবা অহৌবা অমনি। ধান্তেরস, দিৱালী অমসুং ছথ পুজাগী মমাংদা পুক্কা হাউস অমা ফংবা অমসুং অদোমগী য়ুমদা চঙবা অসি তশেংনা লাইবক ফবনি। ঐহাক্না ইমুংশিং অসিবু থাগৎচরি অমসুং ঐহাক্কী য়াইফ-পাউজেলশিং পীজরি।
মরুপশিং,
মরুপশিং, ঙসিগী থৌরম অসি য়ুম লৈতবা ঐগী ইচিল-ইনাওশিংবু থাজবা পীননবগী মতাংদসুনি। নুমিৎ অদু লাক্কনি মদুদা মখোয়নসু পুক্কা য়ুম অমা ফংলগনি অমসুং মসি মোদীগী গেরেন্তীনি। ঐখোয়গী সরকারনা হৌখিবা চহি ১১দা লায়রবশিংগীদমক পুক্কা য়ুম করোর ৪ হেন্না শাখ্রে অমসুং পীখ্রে। হৌজিক ঐখোয়না য়ুম করোর অহুম হেন্না শাবগী থবক পায়খৎলি। লায়রবা মীওই খুদিংমকপু পুক্কা য়ুম অমা ফংহন্দ্রিবা ফাওবা মোদী লেপ্পোই নত্ত্রগা পোত্থাবা তৌরোই। শোত্থরবশিংদা অমসুং লায়রবশিংগী সেবাদা অখন্নবা মীৎয়েং থম্বা অসি মোদীগী মিসননি।
মরুপশিং,
ঙসি, ঐখোয়না সর এম. বিশ্বেস্বরায়জীগী মপোক কুমওন অসিবু ইঞ্জিনীয়রশিংগী নুমিৎ ওইনা পালন তৌরি। ইঞ্জিনীয়রশিংনা 'ভিকসিত ভারত' (চাউখৎলবা ভারত) অমসুং 'ভিকসিত ভারত' (চাউখৎলবা বিহার) শাগৎপদা মরু ওইবা থৌদাং অমা লৌরি। লৈবাক অসিগী ইঞ্জিনীয়র পুম্নমক্তা ঐহাক্না নুংঙাইবা ফোংদোকচরি অমসুং য়াইফ-পাউজেল পীজরি। ইঞ্জিনীয়রশিংগী কন্না হোৎনজবা অমসুং হৈ-শিংবা অসি ঙসিগী প্রোগ্রাম অসিদা ফাওবা উবা ফংলি। পর্নিয়া এয়রপোর্তকী তর্মিনেল বিল্দিং অসি থা মঙাগী মনুংদা রেকোর্দ ওইনা শাখ্রে। ঙসি, তর্মিনেল অসি শঙ্গাখ্রে, অমসুং অহানবা কম্মর্সিএল ফ্লাইতসু লমথাখ্রে। ঐখোয়গী এভিয়েসন মন্ত্রী, শ্রী নাইদুজীসু মফম অসিদা লৈরি। মহাক্না মফম অসিদগী ফ্লাইৎশিং পাইবা ঙমহল্লিবা অসিগীদমক ঐখোয়না মহাকপু থাগৎচরি। অনৌবা এয়রপোর্ত অসিগা লোয়ননা, পুর্নিয়া অসি লৈবাক অসিগী এয়রপোর্ত মেপতা য়াওরে। হৌজিক্তি পর্নিয়া অমসুং সীমান্চল লমদম অসি লৈবাক অসিগী মরুওইবা শহরশিং অমসুং ললোন-ইতিক্কী মফমশিংগা হকথেংননা শম্নহল্লগনি।
মরুপশিং,
এন.দি.এ. সরকারনা লমদম অসিবু মোদর্ন হাই-তেক রেল সর্বিসশিংগা শম্নহল্লি। ঙসিসু ঐহাক্না বন্দে ভারত, অমৃত ভারত অমসুং পেসেঞ্জর ত্রেনশিং লমথাখ্রে। অনৌবা আরারিয়া-গালগালিয়া রেল লাইন শঙ্গাখ্রে অমসুং অনৌবা বিক্রমশিলা-কতারিয়া রেল লাইনগীসু উরেপ উয়ুং তমখ্রে।
মরুপশিং,
নুমিৎ খরনিগী মমাংদা ভারত সরকারনা অতোপ্পা মরু ওইবা ৱারেপ অমা লৌখি। বুক্সর-ভাগলপুর হাই স্পিদ কোরিদোরগী মোকমা-মুঙ্গর সেক্সন অদু অয়াবা পীখ্রে। মসিনা মুঙ্গর, জমলপুর অমসুং ভাগলপুরগুম্বা ইন্দস্ত্রীএল হবশিংদা চাউনা কান্নবা ফংহল্লগনি। সরকারনা ভগলপুর - দুমকা - রামপুরহাত রেল লাইন দবলিং অয়াবা পীখ্রে।
মরুপশিং,
বিহারগী চাউখৎ-থৌরাং অসি লৈবাক অসিগী চাউখৎ-থৌরাংগীদমক তঙাইফদবা অমনি। অমসুং বিহারগী চাউখৎ-থৌরাংগীদমক, পর্নিয়া অমসুং সীমান্চলগী চাউখৎ-থৌরাং অসি তঙাইফদে। আর.জে.দি. অমসুং কংগ্রেস সরকারশিংগী ফত্তবা লৈঙাক্না মরম ওইদুনা খ্বাইদগী অৱাবা নংখিবা অসি হায়রিবা লমদম অসিনি। অদুবু হৌজিক, এন.দি.এ. সরকারনা ফিভম অসি হোংলক্লি। লমদম অসি হৌজিক চাউখৎপগী ময়াইদা লৈরে।
মরুপশিং,
বিহারবু ইলেক্ত্রিসিতীগী লমদা মশা-মরোমদোম লেপচবা ঙম্নবা থবক পায়খৎলি। ভগলপুরগী পীরপান্তীদা মেগাৱাৎ ২৪০০গী থর্মেল পাৱর প্রোজেক্ত অমা হৌদোকখ্রে।
মরুপশিং,
বিহারগী দবল ইঞ্জিন সরকারনা লৌমীশিং অমসুং শা-ষন য়োক্লিবশিংগী শেন্থোক হেনগৎহন্নবা হোৎনরি। ঙসি, কোসি-মেচী ইন্ত্রা-স্তেৎ রিভর লিঙ্ক প্রোজেক্তকী অহানবা ফেজকী উরেপ উয়ুংসু তমখ্রে। মসিনা নোংপোক কোসি মেন কেনেল পাকথোক চাউথোকহল্লগনি, লম হেক্তর লাখ কয়াদা ইরিগেসন ফংহল্লগনি অমসুং ঈশিং-ঈচাউগী শিংনবশিং থেংনবদা হেন্না লায়থোকহল্লগনি।
মরুপশিং,
মখানা (থাংজিং) থাবা অসি বিহারগী লৌমীশিংগীদমক্তা শেন্থোক্কী মরুওইবা সোর্স অমা ওইরি। অদুবু মমাংঙৈগী সরকারশিংনা মখানা অমসুং মসি থাবা লৌমীশিংবু য়েংশিনখিদে। অমসুং ঐহাক্না থাজবগা লোয়ননা হায়জনীংই মদুদি হৌজিক মফম অসিদা চত্থোক চৎশিন তৌরিবা মীওইশিং অসিনা ঐহাক্কী লৈঙাক অসি লাকত্রিঙৈ মমাংদা মখানা হায়বা ৱাহৈ অসিদি তাখিদ্রি। ঐখোয়গী সরকার অসিনা মখানাদা পীফম থোকপা প্রাইওরিতী পীরি।
মরুপশিং,
নেস্নেল মখানা বোর্দ অমা লিংখৎলগনি হায়না বিহারগী মীয়ামদা ঐনা থাজবা পীখি। ঙরাং কেন্দ্র সরকারনা নেস্নেল মখানা বোর্দ লিংখৎনবগী নোতিফিকেসন অমা থোকখ্রে। নেস্নেল মখনা বোর্দনা মখানা লৌমীশিংদা অচুম্বা মমল ফংহন্নবা অমসুং সেক্তর অসিদা মোদর্ন তেক্নোলোজী শিজিন্ননবা লেপ্পা লৈতনা থবক তৌগনি। ঐখোয়গী সরকারনা মখানা সেক্তর চাউখৎহন্নবা লুপা করোর ৪৫০ রোমগী স্কিম অমা অয়াবা পীখ্রে।
মরুপশিং,
বিহারদা চাউখৎপগী খোঙজেল অসি, বিহারগী খুমাং চাউশিল্লক্লিবা অসি মীওই খরদি নুংঙাইতে। চহি তরাগী খুজিং কয়াদগী বিহারবু মাংহনখিবা, মসিগী লমদম অসিবু য়েংবীখিদবা মীওইশিং অসিনা বিহারনা অনৌবা মাইলস্তোনশিং ফংবদা য়ানীংদ্রি। বিহারগী সেক্তর খুদিংমক্তা লুপা করোর লিশিং কয়াগী দিবেলপমেন্ত প্রোজেক্তশিং পায়খৎলি। রাজগীরদা হোকী এসিয়া কপ পাংথোকপা, অউন্তা-সিমরিয়া ব্রিজগুম্বা পুৱারী ওইরবা কন্সত্রক্সনগী থবকশিং অমসুং বিহারদা শাবা লোকোমোতিবশিং আফ্রিকা ফাওবা এক্সপোর্ত তৌবা অসিগুম্বা মরুওইবা থৌরমশিং পাংথোক্লি। অদুবু কংগ্রেস অমসুং আর.জে.দি.না মসিগী খুমাং চাউশিনবা অসি য়াবা ঙমদে। বিহারনা মাংলোমদা চংশিল্লকপা খুদিংগী, হায়রিবা মীওইশিং অসিনা বিহারবু ইকাইবা পীরি। আর.জে.দি.গী মরী লৈনরিবা কংগ্রেসনা বিহারবু সোসিএল মীদিয়াদা 'বিদি'গা চাংদম্নখিবা অদু অদোম্না ইকুই কুইদ্রিঙৈদা উরম্বা য়াই। বিহারগীদমক মখোয়না অসুক য়াম্না নুংশিদে! মখোয়না বিহারগী মীংচৎ অসিবু ফত্তবা থবকশিং অমসুং শেঞ্জা-থুমজা তৌদুনা মাঙহনখি। অমসুং হৌজিক, বিহারগী খুমাং চাউশিল্লক্লিবা অসি উবদা কংগ্রেস অমসুং আর.জে.দি.না রাজ্য অসি মীংচৎ থিনবা হোৎনরি।
ইচিল-ইনাও অমসুং ইচিল-ইনাওশিং,
অসিগুম্বা ৱাখল্লোন লৈবা মীওইশিংনা বিহারগীদমক করিগুম্বা অমত্তা অফবা তৌবা ঙম্লোই। মখোয়না মখোয়গী শেনগাওশিং মপুং ফাহনবা খক্তদা পুক্নিং চিংশিল্লিবা মখোয়না করিগীদমক লাইরবশিংগী য়ুমশিংগী মতাংদা পুক্নিং চিংশিল্লগনি? মতম অমদা কংগ্রেসকী প্রধান মন্ত্রী অমনা ফাওবা কংগ্রেস সরকারনা পৈশা ১০০ থারকপা মতমদা, পৈশা ৮৫দি লান্না শীজিন্নখি হায়না য়াখি। হৌজিক ঐঙোন্দা হায়বিয়ু মদুদি কংগ্রেস-আর.জে.দি. সরকারগী মতমদা লায়রবশিংগী একাউন্ততা শেল হকথেংননা চঙব্রা? লেন্তর্ন (আর.জে.দি.গী খুদম) মঙাল্লগা, মখোয়গী খুৎ অমসুং খোঙনা শেল অদু লৌখি, অমসুং মখোয়না পৈস ৮৫ চাথোকখি। কোরোনা লাইচৎকী মতুংদা, লাইরবা ইমুং খুদিংমক্না লেম্না রাসন ফংলি। কংগ্রেস অমসুং আর.জে.দি. সরকারশিংনা অদোমদা লেম্না চানবা পীখিব্রা? ঙসিদি, লায়রবা ইমুং খুদিংমক্না আয়ুশ্মান ভারত স্কিমনা মরম ওইদুনা লুপা লাখ ৫ ফাওবগী ওইবা মেদিকেল ত্রিৎমেন্তগী খুদোংচাবা ফংলি। মখোয়না অদোমগীদমক্তা হোস্পিতাল অমত্তা শাবা ঙমদ্রবদি মখোয়না অদোমবু লেম্না লায়েংবীবা ঙমগদ্রা? ঐনা অদোমদা হংনীংবদি মখোয়না লেম্না লায়েংবগী খুদোংচাবা পীখিব্রা? মখোয়না অদোমগীদমক খনবীখিব্রা?
মরুপশিং,
কংগ্রেস অমসুং আর.জে.দি.না বিহারগী ইকাই খুম্নবদা শিংনবতা নত্তনা বিহারগী মশক মওংদসু শিংনরি। ঙসি সিমাঞ্চল অমসুং ভারতকী নোংপোক থংবা শরুক পুম্নমক্তা ইনফিলিতরশিংনা মরম ওইদুনা চাউরবা দেমোগ্রাফিক ক্রাইসিস অমা থোক্লে। বিহার, বেঙ্গল, অসাম অমসুং অতোপ্পা রাজ্য কয়াদা লৈরিবা মীওইশিংনা মখোয়গী ইচিল-ইনাও অমসুং মচানুপীশিংগী সেফতীগী মতাংদা য়াম্না খল্লি। মরম অসিনা ঐহাক্না রেদ ফোর্ৎতগী দেমোগ্রাফী মিসন লাউথোকখি। অদুবু মখোয়গী ভোৎ বেঙ্ক পোলিসীগী মশাগী ওইবা মীৎয়েং অদু য়েংবিয়ু। কংগ্রেস, আর.জে.দি. অমসুং মখোয়গী ইকোসিস্তেম পুম্নমক্না ইনফিলিতরশিংদা ঙাক্লৌ পীনবা, মখোয়বু ঙাক-শেনবা, থোইদোক হেন্দোক্না স্লোগানশিং থাগৎপা, অমসুং মপান্দগী আইন্না য়াদবা মওংদা লাকপা মীওইশিং ঙাকথোক্নবা খোঙচৎশিং পাঙথোকপদা থৱায় য়াওরি। হায়রিবা মীওইশিং অসিনা বিহার অমসুং লৈবাক অসিগী রিসোর্সশিং অমসুং সেক্যুরিতী অনিমক পীথোকপা পাম্মি। অদুবু ঙসিদি, পুর্নিয়াগী লৈমায়দগী ঐনা মখোয়দা করিগুম্বা অমবু ময়েক শেংনা তাকপীবা পাম্মি। আর.জে.দি. অমসুং কংগ্রেসনা নীংথিনা তাশিল্লু: ইনফিলত্রেতর খুদিংমক চৎহনখিগনি। ইনফিলত্রেসন থিংবা হায়বসি এন.দি.এ.গী অচেৎপা থৌদাং অমনি। অমসুং ঐনা লানহৌরিবা লুচিংবশিংবু, ইনফিলত্রেতরশিংবু ঙাকথোক্নবা মাংলোমদা চংশিল্লিবা মীওইশিংবু শিংনরি। অদোম্না ইনফিলত্রেতরশিংবু ঙাকথোক্নবা কন্না হোৎনরবসু, ঐখোয়না মখোয়বু লৌথোক্নবা ঐখোয়না লেপ্লিবশিং অদু মখা তানা পাংথোক্কনি। ইনফিলত্রেতরশিংবু ঙাকথোক্নবা হোৎনরিবা মীওইশিং, তাশিল্লু। ভারত্তা ইনফিলত্রেতররশিংগী অপাম্বশিং নত্তনা ভারতকী আইন্না চৎনগনি। মসি মোদীগী গেরেন্তীনি। ইনফিলত্রেতরশিংগী মায়োক্তা থবক লৌখৎকনি, অমসুং লৈবাক অসিনা মসিগী পোজিতিব ওইবা মহৈশিং অদু উবা ফংলগনি। কংগ্রেস অমসুং আর.জে.দি.না ইনফিলত্রেতরশিংদা মতেং পাংবগীদমক শন্দোরক্লিবা ঈহৌ অসিগীদমক বিহারগী মীয়াম অমসুং লৈবাক অসিনা মখোয়দা মতিক চাবা পাউখুম পীরগনি।
মরুপশিং,
কংগ্রেস অমসুং আর.জে.দি.না বিহারদা হৌখিবা চহি তরাগী খুজিং অনিদগী লৈঙাক পায়দ্রি। অমসুং তশেংনা হায়রবদা, মসিদা খ্বাইদগী চাউবা থৌদাং অসি বিহারগী ইমাশিং অমসুং ইচিল-ইনাওশিংগীনি। ঙসি, ঐহাক্না বিহারগী মমাশিং অমসুং ইচিল-ইনাওশিংদা অখন্ননা ইকায় খুম্নবা উৎচরি। আর.জে.দি.গী মতমদা মী হাৎপা, রেপ তৌবা, অমসুং মীওই অমা ফাজিনবগী খ্বাইদগী অৱাবা তারিবশিং অসি বিহারগী ঐহাক্কী ইমা অমসুং ইচিন-ইনাওশিং, লমদম অসিগী নুপীশিংনি। অদুবু দবল ইঞ্জিন লৈঙাক্কী মখাদা, হায়রিবা নুপীশিং অসি 'লাখপতি দিদি' অমসুং 'দ্রোন দিদি' ওইরক্লি। ঙসি ঐখোয়না "দ্রোন দিদিস" শেমগৎলি। নুপীশিংনা সেল্ফ-হেল্প গ্রুপকী খুত্থাংদা অচৌবা অহোংবা অমা পুরক্লি। মরুওইনা নিতিশ জীগী লুচিং মখাদা, "জীবিকা দিদী" মুভমেন্তকী মায় পাকপা অসি মমাংদা অমুক্তা ওইখিদ্রি। বিহার অসি লৈবাক পুম্বগীদমক্তা ইথিল পীবা মফম অমা ওইরক্লি।
মরুপশিং,
ঙসিসু ঐখোয়গী ইচিল-ইনাওশিংগীদমক চাউরাক্না লুপা করোর ৫০০গী কম্ম্যুনিতী ইনভেস্তমেন্ত ফন্দ থাদোক্লে। লুপা করোর ৫০০! হায়রিবা শেনফম অসি ক্লস্তর লেভেল ফেদরেসনশিংদা য়ৌহল্লগনি। মসিনা খুঙ্গং খুদিংমক্তা সেল্ফ হেল্প গ্রুপশিংবু মপাঙ্গল কনখৎহল্লগনি। মসিনা নুপীশিংদা মখোয়গী পোতেন্সিএল পাকথোক চাউথোকহন্নবা খুদোংচাবা পীগনি।
মরুপশিং,
আর.জে.দি. অমসুং কংগ্রেসকী মীৎয়ৈং অসি মতম পুম্নমক্তা মখোয়গী ইমুং মনুংনি। মখোয়না অদোমগী ইমুং-মনুংগীদমক করিসু তৌরোই। অদুবু মোদীগীদমক্তদি, ময়াম পুম্নমক অসি মোদীগী ইমুং মনুংনি। মরম অসিনা মোদীনা হায়রি: 'সবকা সাথ, সবকা বিকাস'। অমসুং মখোয়শিং অসিনা করি তৌবগে? মখোয়গী ইমুং মনুংগীদমক্তা মতেং অমসুং মখোয়গী ইমুং মনুংগীদমক্তা চাউখৎপা!
মরম অদুনা, ইচিল-ইনাওশিং,
মোদীনা অদোমগী চাদিংগী মতাংদা খল্লি, মোদীনা অদোমগী শেন্থোক্কী মতাংদা খল্লি। লাক্কদৌরিবা নুমিৎশিংদা কুমহৈ কয়া অমা লাক্কদৌরি। মসিগী মতম অসিদা, ঐখোয়গী সরকারনা লাইরবা অমসুং মিদল ক্লাসকী মীওইশিংদা দিৱালী অমসুং ছথকী মমাংদা অচৌবা খুদোংচাবা অমা পীরে। ঙসি সেপ্তেম্বর ১৫নি অমসুং চয়োল অমগী মতুংদা, সেপ্তেম্বর ২২, নবরত্রিগী অহানবা নুমিত্তা, লৈবাক শীনবা থুংনা জি.এস.তি. অদোমগী নুমিৎ খুদিংগী মথৌ তাবা পোৎলম অয়াম্বদা জি.এস.তি. হন্থরগনি। মফম অসিদা লৈরিবা ঐগী ইমাশিং অমসুং ইচিল-ইনাওশিংদা ঐনা অখন্ননা হায়জনীংবদি জি.এস.তি. অসি তুথপেস্ত, সাপোন, অমসুং শম্পুদগী হৌরগা ঘী অমসুং চিঞ্জাক্কী পোৎলম কয়াদা পোৎলম খুদিংমক মমল হন্থরগনি। অঙাংশিংগী মহৈ তম্বদা চংবা স্তেসনরীগী মমলসু হন্থরগনি। ফেস্তিবেল সিজন অসিদা অঙাংশিংগীদমক্তা অনৌবা ফি-রোল অমসুং খোঙউপশিং লৈবা অসি অরাইবা ওইরগনি মরমদি মখোয় অসিসু মমল হন্থরগনি। লায়রবশিংগীদমক খনবা সরকার অমা লৈরবদি, মসিনা লায়রবশিংগী য়াইফনবগীদমক্তা চপ চানা থবক তৌই।
মরুপশিং,
পর্নিয়াগী মচানুপাশিংনা নিংতম লানফমদা ভারতকী শক্তি অদু বৃটিশশিংদা উৎখি। ঙসি, ঐখোয়না অমুক্কা হন্না ওপরেসন সিন্দুরগী খুত্থাংদা লৈবাক অসিগী শক্তি অদু য়েক্নবশিংদা উৎলি। অমসুং পর্নিয়াগী থৌনা ফরবা মচানুপা অসিনা মসিগী থৌরাং অসিদা অচৌবা থৌদাং অমা লৌখি। লৈবাক্কী ঙাকশেল ওইগেরা নত্ত্রগা লৈবাক্কী চাউখৎপা ওইগেরা, বিহারনা মতম পুম্নমক্তা ভারতকী খুমাং চাউশিল্লকপদা অচৌবা থৌদাং লৌদুনা লাক্লি। ঐখোয়না বিহারগী চাউখৎ থৌরাংগী খোঙজেল অসি চপ মান্নবা মওংদা লেপ্তনা খোঙজেল য়াংশিনহনগদবনি। ঐহাক্না অমুক্কা হন্না বিহারগী ঐহাক্কী ইচিল-ইনাওশিংদা চাউখৎ-থৌরাংগী প্রোজেক্ত পুম্নমক্কীদমক থাগৎপা ফোংদোকচরি। ঐহাক্না নিতিশজীগী লুচিংবগী থৌনা অদু থাগৎচরি। ঐহাক্না ময়াম পুম্নমকপু হন্না-হন্না থাগৎচরি। হৌজিক, ঐগা লোয়ননা হৌনা হায়বীয়ু:
ভারত মাতা কী জয়! ভারত মাতা কী জয়! ভারত মাতা কী জয়!
ময়ামবু হন্না-হন্না থাগৎচরি।
