মালেম শিনবা থুংনা খঙনরিবা, জ্ঞান অমসুং মোক্ষকী শেংলবা সহর গয়াজীবু ঐখোয়না খুরুমজরি।
বিষ্ণুপদ মন্দিরগী চাউথোকচনিংঙাই ওইরবা লমদম লমদম অসিদা ময়াম পুম্নমকপু তরাম্না ওকচরি।
বিহারগী রাজ্যপাল আরিফ মহম্মদ খান জী, মফম অসিগী মীয়াম্না নুংশিবা মুখ্যমন্ত্রী নীতিশ কুমারজী, কেন্দ্রগী মন্ত্রী মন্দলগী ঐহাক্কী মরূপ জীতন রাম মাণ্ঝী জী, রাজিব রঞ্জন সিংহ, চিরাগ পাসৱান জী, রাম নাথ থাকুর জী, নিত্যানন্দ রায় জী, সতীশ চন্দ্র দুবে জী, রাজ ভূষণ চৌধুরী জী, উপ মুখ্যমন্ত্রী সম্রাট চৌধুরী জী, বিজয় কুমার সিংহ জী, বিহার সরকারগী মন্ত্রীশিং, পার্লিয়ামেন্তকী ঐহাক্কী মরুপ উপেন্দ্র কুশৱাহা জী, অতৈ এম.পি.শিং, অমসুং বিহারগী ঐহাক্কী নুংশিরবা ইচিল-ইনাওশিং!
গয়াগী লমদম অসি, অধ্যাত্ম অমসুং শান্তিগী লমদম্নি। মসি ভগবান বুদ্ধনা বোধ ফংখিবা শেংলবা লমদম্নি। গয়াজিগী অধ্যাত্মিক অমসুং সংস্কৃতিক হেরিতেজ য়াম্না লিরবা মতমগীনি, য়াম্না মমিং চৎলি। মফম অসিগী মীয়াম্না সহর অসিবু গয়া হায়বগী মহুত্তা গয়াজী কৌহন্নিংই। ঐহাক্না ফিরেপ অসিগীদমক বিহার সরকারবু থাগৎলি। গয়াজী খোঙজেল য়াঙনা চাওখৎনবা বিহারগী দবল ইঞ্জিন সরকারনা লেপ্তনা থবক তৌরক্লিবা অসিদা ঐ হরাওই।
ইচিল ইনাওশিং,
ঙসিসু গয়াজীগী শেংলবা লমদম অসিদদা নোংমখক্তদা লুপা করোর লিশিং ১২ গী প্রোজেক্তশিং মীয়ামগী মফমদা কত্থোক্লি নত্ত্রগা উরেপ উয়ুং তম্লি। মখোয়গী মনুংদা ইনর্জী, হকশেল অমসুং সহর চাওখৎপগা মরী লৈনবা অচৌবা প্রোজেক্ত কয়া য়াওরি। মসিনা বিহারগী ইন্দস্ত্রীশিং মপাঙ্গল কনখৎহল্লগনি, অমসুং নহাশিংগীদমক থবক ফংনবগী অনৌবা খুদোংচাবশিং লৈরগনি। ঐহাক্না প্রোজেক্তশিং অসিগীদমক বিহারগী মীয়ামদা নুংঙাইবা ফোঙদোকচরি। বিহারদা হেন্না মশা মউ ফনা লৈনবগীদমক ঙসি মফম অসিদা হোস্পিতাল অমসুং রিসার্চ সেন্তরসু শঙ্গারি। হৌজিক্তি বিহারগী মীয়াম্না কেন্সর লায়েংনবগীদমক অহেনবা খুদোংচাবশিং ফংলগনি।
মরূপশিং
লায়রবশিংগী পুন্সি হিংবদা কোমহন্নবা, অমসুং নুপীশিংগী পুন্সি হেন্না লায়থোকহন্নবা হায়বসিদা মীয়ামগী সেবা তৌবা মীওই অমা ওইনা ঐহাক্কী ওইনদি খ্বায়দগী হরাওজবনি। লাইরবশিংদা লৈনবা অরেপ্পা য়ুম অমা পীবগা চপ মান্ননা…
মরূপশিং
ঐহাক্কী অচৌবা পান্দম অমা লৈ। খুদোংচাদ্রবা মীওই খুদিংমকনা মখোয়গী ওইবা লৈনবা য়ুম অমা ফংদ্রিবা ফাওবা মোদীনা তুমিন্না ফমদুনা লৈথোক্লোই। মসিগী পান্দম অসিগা লোয়ননা চহি ১১ অসিদা য়ুম করোর ৪ হেন্না শাখ্রে অমসুং লায়রবশিংদা খুৎশিন্নখ্রে। বিহারখক্তদা য়ুম লাখ ৩৮ হেন্না শাখ্রে। গয়া দিস্ত্রিক্ততসু ইমুং লাখ ২ হেনবনা মখোয়গী ওইবা লৈনবা য়ুমশিং ফংখ্রে। অমসুং ঐখোয়না য়ুম হায়বদি ফক্লাং মরি খক্তা পিখিদে, ঐখোয়না লায়রবশিংদা মখোয়গী ইকায়খুম্নবসু পিখি। য়ুমশিং অসি মৈ, ঈশিং, খোঙহাম-খুৎহাম্ফম অমসুং গ্যাস কন্নেক্সনসু য়াওরি। অতোপ্পা ৱাহৈদা হায়রগদি, লায়রবা ইমুংশিংনা হৌজিক খুদোংচাবা মওংদা, ঙাকশেলগা অমসুং ইকাই খুম্নবগা লোয়ননা পুন্সি হিংনবগী থাজবা ফংখ্রে।
মরূপশিং,
ঙসি, থবক অসি মখা তানা পাংথোকপা ওইনা বিহারগী মগধ লমদগী ইমুং লিশিং ১৬ হেনবনা মখোয়গী ওইবা লৈনবা য়ুম ফংখ্রে। মসিনা হায়বদি, চহি অসিগী দিৱালী অমসুং ছত পুজা পাঙথোকপদা ইমুংশিং অসিগী ওইনদি য়াম্না হেন্না মশক থোক্লগনি। ঐহাক্না য়ুম ফংখ্রবা মীওই পুম্নমক্কী মফমদা নুংঙাইবা ফোঙদোক্লি। অদুগা পি.এম. অৱাস য়োজনাগী কান্নবা ফংদ্রিবা মীওইশিংগী ওইনদি ঐহাক্না থাজবা পীজরি—য়ুম শানবা কেম্পেন অসি লায়রবা খুদিংমকনা মখোয়গী ওইবা লৈনবা য়ুম ফংদ্রিবা ফাওবা মখা তানা চত্থগনি।
মরূপশিং,
বিহার অসি চন্দ্রগুপ্ত মৌর্য অমসুং চানক্যগী লমদম্নি। ভারৎপু য়েক্নবনা শিংনরকপা খুদিং, বিহারনা লৈবাক অসিগী চুঙ্গোয় ওইনা লেপ্তুনা লাক্লি। লমদম অসিদা লৌখিবা খোঙফম খুদিংমক লমদম অসিগী মপাঙ্গল পুদুনা চৎলি, অমসুং মফম অসিদা লৌখৎবা ফিরেপ খুদিংমক লেম্না মাঙদে।
মরম অদুননি ইচিল ইনাওশিং,
কাস্মিরগী পহলগামদা তেরোরিস্তনা লান্দারকপা মতমদা, ঐখোয়গী মীচম মীয়ামবু মখোয়গী ধর্মগী মতাংদা হংলবা মতুংদা হাৎলকখিবদা, ঐহাক্না বিহারগী লমদম অসিদগী তেরোরিস্তশিংবু উৎ ওলহনগনি হায়না লাউথোকখি। ঙসি, মালেম অসিনা বিহারগী লমদম অসিদগী লৌখিবা ফিরেপ মপুং ফাহনখিবা উনখ্রে। অদোম নিংশিংনরমগনি – মতম অদুদা পাকিস্তাননা ঐখোয়দা দ্রোন এতেক্ত তৌরকখি অমসুং মিসাইল কয়া কাপশিল্লকখি, অদুগা ভারতনা পাকিস্তানগী মিসাইলশিংবু মচেৎ তানা থুগাইখি। পাকিস্তানদগী কাপ্লকপা মিসাইল অমত্তনা ঐখোয়দা মাঙহন তাকহনখিদে।
মরূপশিং,
ওপরেসন সিন্দূরনা ভারৎকী দিফেন্স পোলিসীদা অনৌবা লৈই অমা চিংখ্রে। হৌজিক্তি, কনামত্তনা ভারৎতা তেরোরিস্তশিং থাজিল্লক্তুনা এতেক্ত তৌবা অমদি নান্থোকখিবা ঙম্লরোই। তেরোরিস্তশিংনা লৈনুংদা লোৎনবা হোৎনরবসু, ভারৎকী মিসাইলশিংনা মখোয়বু মফম অদুদা ফুমখিগনি।
মরূপশিং,
বিহারদা খোঙলৈ থুনা চাওখৎপা পুরকপা হায়বসিনা কেন্দ্রগী এন.দি.এ. লৈঙাক্কী মরুওইবা ৱাফম অমনি। মরম অদুননি ঙসি বিহারনা মপুং ফানা চাওখৎনবগী লম্বীদা চঙশিল্লিবা। হৌখিবা চহি কয়াদা, অরিবা অৱাবশিং কোকহনখ্রে অমসুং চাওখৎনবগী অনৌবা লম্বীশিং শেমখ্রে। "লেন্তর্ন"গী লৈাক মতমদা কমদৌরম্মি নীংশিংবিয়ু। মতম অদুদা মফম অসি অঙাংবা তেররনা লাকশিল্লমখি। মাওইস্তশিংনা মরম ওইরগা, নুমিৎ তাখ্রবা মতুংদা মফম অমদা চৎপদা য়াম্না অৱাবা ওইখি। "লেন্তর্ন"গী লৈঙাক মতমদা গয়া জীগুম্বা সহরশিং অমম্বগী খয়াৎনুংদা লৈরম্মি। খুঙ্গং লিশিং কয়াদা মৈগী পোস্ত ফাওবা য়ুংলমদে। "লেন্তর্ন" লৈঙশক্না বিহারগী তুংলমচৎপু অমম্বা লম্বীদা পুরম্মি। মখোয়গী মরম্না মহৈ মশিং তম্নরমদে, থবক ফংনরমদে, অমসুং মীরোল কয়া বিহারদগী চৎনখিরম্মি।
মরূপশিং,
আর.জে.দি. অমসুং মখোয়গী খোঙবুশিংনা বিহারগী মীয়াম্বু মখোয়গী ভোত বেঙ্ক ওইনা উই। মখোয়দা লায়রবশিংগী নুংঙাইবা, অৱাবা, ইকায়খুম্নবগী মতাংদা করিগুম্বা অমত্তা নাচুংলমদে। কংগ্রেসকী মুখ্যমন্ত্রী অমনা স্টতজ মথক্তা বিহারদগী মীওইশিং মহাক্কী স্তেত্তা চঙহল্লোই হায়না ফোংনা লাউখিবা অদোম নীংশিংলমগনি। কংগ্রেসনা বিহারগী মীয়ামগী অসুক হাক্না তাথিরিবা, অসিগুম্বা মওং মতৌ – পুম্নমক অসি কৈদৌঙৈদা কাউরোই। কংগ্রেসনা বিহারগী মীয়াম্বু অসুম্না তাথি তাওইনা তৌখ্রবসু, আর.জে.দি.গী লুচিংবশিংনা তুমিন্না তুমদুনা লৈরি।
ইচিল ইনাওশিং,
বিহারগী এন.দি.এ. সরকারনা কংগ্রেস অমসুং ইন্দি এলাইন্সকী অসিগুম্বা মীনুংশি লৈতবা কেম্পেন অসিগী পাউখুম পীরি। ঐখোয়না বিহারগী মচা মশুশিংনা মফম অসিদা থবক ফংনবা, মফম অসিদা ইকায়-খুম্নবগা লোয়ননা পুন্সি হিংনবা, অমসুং মফম অসিদা মখোয়গী মমা-মপাশিংগী থৌগল তৌনবা পান্দমগা লোয়ননা থবক তৌরি। হৌজিক্তি, বিহারদা অচৌবা প্রোজেক্তশিং পায়খৎলি। গয়া জী দিস্ত্রিক্তকী দোভিদা, বিহারগী খ্বায়দগী চাওবা ইন্দস্ত্রিয়েল এরিয়া শেমগৎলি। গয়া জীদা তেক্নোলোজীগী সেন্তর অমসু লিংখৎলি। ঙসিসু, বুক্সর থর্মেল পৱার প্লান্ত শঙ্গাখ্রে। থা খরগী মমাংদা, ঐহাক্না ঔরঙ্গবাদতা নবিনগর সুপর থর্মেল পৱার প্রোজেক্তকী উরেপ উয়ুং তমখি। ভাগলপুরগী পীরপেন্তীদা অনৌবা থর্মেল পৱার প্লান্ত অমসু শাখিগনি। পৱার প্লান্তশিং অসিনা বিহারদা মৈগী সপ্লাই হেনগৎহনগনি। অমসুং অদোমসু খঙই – মৈ পুথোকপা হেনগৎলকপা মতমদা করি ওইগনি? য়ুমশিংদা মৈগী সপ্লাই হেনগৎলকই, ইন্দস্ত্রীশিংনা হেন্না মৈ ফংই, অমসুং মসিনা থবক ফংনবগী অনৌবা খুদোংচাবশিং শেম্লকই।
মরূপশিং,
নীতিশ জীনা বিহারগী নহাশিংদা সরকারগী থবক ফংহন্নবা য়াম্না চাওবা কেম্পেন অমা হৌদোকখ্রে। নীতিশ জীগী মরম্না মফম অসিদা অরোন অথুপ লৈতনা ওজা লৌনবা থবক থৌরমশিং পায়খৎখ্রে।
মরূপশিং,
মফম অসিগী নহাশিংনা বিহার মনুংদা থবক ফংনবগী খুদোংচাবা হেন্না ফংহন্নবা অমসুং থবক থিবদা অতোপ্পা মফমদা চৎনখিদনবা, কেন্দ্র লৈঙাক্কী অনৌবা স্কীম অমনা অচৌবা মতেং পীরগনি। হৌখিবা চয়োলখক্তদা, নীংতম নুমিৎ ওগস্ত ১৫ দগী হৌরগা, প্রধান মন্ত্রী বিকসিৎ ভারৎ রোজগার য়োজনা লৈবাক শিনবা থুংনা হৌদোকখ্রে। স্কীম অসিগী মখাদা, ঐখোয়গী নহাশিংনা মখোয়গী অহানবা থবক প্রাইভেত সেক্তরদা তৌবা মতমদা, কেন্দ্র সরকারনা মখোয়দা লুপা ১৫,০০০ হকথেংননা পীরগনি। নহাশিংবু থবক পীরিবা প্রাইভেত কোম্পানীশিংসু সরকারদগী অহেনবা ইন্সেন্তিবশিং ফংগনি। বিহারগী ঐহাক্কী নহা ওইরিবা ইচিল-ইনাওশিংনা স্কীম অসিদগী য়াম্না কান্নরগনি।
মরূপশিং,
কংগ্রেস নত্ত্রগা আর.জে.দি. ওইরবসু, মখোয়গী সরকারনা মীয়ামগী শেল-থুমগী মমল কৈদৌনুংদা খঙখিদে। মখোয়গীদমক, মীয়ামগী শেল-থুমদি মখোয়গী শেঙ্গাও থন্নবা খক্তনি। মরম অদুননি কংগ্রেস-আর.জে.দি. সরকারগী মতমদা প্রোজেক্তশিং চহি কয়া লোয়শিন্দনা লৈরম্লিবা। প্রোজেক্ত অমা মতম হেন্না চোন্থরিবমখৈ, মখোয়না শেল হেন্না কোৎলিবনি। এন.দি.এ. সরকারনা মসিগী অরানবা মওং অসি লোইশিনখ্রে। হৌজিক্তি, উরেপ উয়ুং তমখ্রবা মতুংদা, অপীবা মতমগী মনুংদা থবক অদু লোইশিন্নবা হেক ঙম্লিবমখৈ হোৎনরি। ঙসিগী থৌরম অসিসু মসিগী য়াম্না ফজরবা খুদমনি। ঐহাকপু ওনতা-সিমারিয়া সেক্সনগী উরেপ উয়ুং তম্নবা তাঞ্জা ফংহনখি, অদুগা ঙসি, ময়ামগী থৌজাল অমদি মীনুংশিগা লোয়ননা ঐহাকপু থোং অসি শঙ্গানবা তাঞ্জা অমুক পীবিরে। থোং অসিনা লম্বিশিং শম্নহনবতা নত্তনা অৱাং অমসুং খা বিহার পুনশিন্নহল্লগনি। মমাঙদা পোৎলুম পুবা গারীশিংনা কিলোমিতর ১৫০ কোইদুনা গান্ধি সেতু রোমদা চৎলম্বা অদু হৌজিক্তি কোইদ্রবসু চৎপা য়াহল্লগনি। মসিনা ত্রেদকী খোঙজল য়াঙখৎহল্লগনি, ইন্দস্ত্রীশিং মপাঙ্গল কনখৎহল্লগনি, অমসুং লাই খুরুম্বা লাকপশিং মখোয়গী থুংফমদা য়ৌবা লায়হল্লগনি। এন.দি.এ. সরকারনা প্রোজেক্তশিং উরেপ উয়ুং তম্লবদি, মখোয়দু শোয়দনা লোইশিনগনি – মসি ৱাশক্নি।
মরূপশিং,
NDA-গী দবল ইঞ্জিন সরকারনা মফমসিদা রেলৱে থুনা চাওখৎহন্নবা থবক পায়খৎলি। অমৃৎ ভারৎ স্তেশন স্কীমগী মখাদা, গয়া জী রেলৱে স্তেসন অসি মোদর্নাইজ তৌরি। অসিনা পেসেঞ্জরশিংদা এয়রপোর্ততা ফংলিবা খুদোংচাবশিং ফংহল্লগনি। ঙসিদি, গয়া অসি রাজধানী, জন শতাব্দি, অমসুং লমদমসিদা পুথোকচবা বন্দে ভারতকী ত্রেনশিংগী সর্ভিস লৈরবা সহর অমা ওইরে। গয়া জী, সসারাম, প্রয়াগরাজ অমসুং কানপুরদগী দিল্লী ফাওবা দাইরেক্ত কন্নেক্সন লৈবা অসিনা বিহারগী নহাশিং, লৌমীশিং, অমসুং ত্রেদরশিংদা অনৌবা খুদোংচাবা পীরি।
ইচিল ইনাওশিং,
অদোমগী থৌজাল, অমসুং লৈবাক মীয়াম্না চেৎনা থাজবিবনা, ২০১৪ দা হৌখিবা ঐগী প্রধানমন্ত্রী ওইবগী মতম ঙসি ফাওবা মখা শমথরি। চহিশিং অসিদা শেঞ্জা থুমজাগী অমোৎপা ৱাফম অমত্তা ঐখোয়গী লৈঙাক্তা লৈখিদ্রি। অমরোমদনা নীংতম্লবা মতুংদা, চহি ৬০-৬৫ লৈঙাক পায়রম্বা কংগ্রেস লৈঙাক্কী মফমদদি শেঞ্জা থুমজাগী অশাংবা লিস্ত অমা লৈ। RJD গী শেঞ্জা থুমজাগী ওইনদি—বিহারগী অঙাং খুদিংমক্নসু মদুগী মরমদা খঙই। করিগুম্বা ঐখোয়না শেঞ্জা থুমজাগী মায়োক্তা লান্থেংনরিবা অসি ৱাহন্থোক লৈনা মপুং ফাহল্লবদি, কনাগুম্বা অমত্তবু মসিগী পনখৈগী ৱাংমদা থম্লোইদবনি হায়না ঐনা থাজৈ। খন্দুনা য়েংবিয়ু—ঙসি, লোনা করি হায়রি, লৈঙাক্কী শিন্মী মচা অমবু কস্তদীদা পুং ৫০ ফানা থম্লবদি, মহাকপু সস্পেন্দ তৌই। দ্রাইভর ওইরবসু, জুনিয়র ক্লর্ক, নৎত্রগা পিওন ওইরবসু, মহাক্কী মপুন্সি মতম চুপ্পগী ওইনা মাঙলি। অদুবু কনাগুম্বা অমনা মুখ্যমন্ত্রী ওইরবা, মন্ত্রী ওইরবা নৎত্রগা প্রধান মন্ত্রী ওইরবদি, মহাক্না কৈশুমশঙদা লৈরবসু শক্তি পায়বগী নুংঙাইবা ফংলি। মসি কমদৌনা য়াহল্লিবনো? মতম খরগী মমাঙদা জেল মনুংদগী ফাইলশিং খুৎয়েক পীখিবা, লৈঙাক্কী য়াথংশিং কৈশুমশঙ মনুংদগী তাউথখিবা ঐখোয়না উনখ্রে। করিগুম্বা লুচিংবশিংনা অসুম্না তৌদুনা লৈরগদি, শেঞ্জা থুমজাগী মায়োক্তা থেংনরিবা লান্থেং অসি করম্না মায় পাক্কনি?
মরূপশিং,
সংবিধান্না মীয়ামগী মীহুৎ খুদিংমক্তগী পুকচেল শেংবা অমদি অরোন অথুপ লৈতবা পাম্লি। ঐখোয়না সংবিধানবু মচেৎ তানা শেগায়বা য়াহনবা ঙম্লোই। মরম অদুননি NDA লৈঙাক্না শেঞ্জা থুমজাগী মায়োক্তা লো পুরক্লিবা, মসিদা প্রধান মন্ত্রী ফাওবা কোনশিল্লিবনি। লো অসিনা মুখ্যমন্ত্রী অমদি মন্ত্রীশিংসু কোনশিল্লি। চৎনরক্লবা মতমদা, প্রধান মন্ত্রী, মুখ্যমন্ত্রী, নৎত্রগা মন্ত্রী অমা হেক্তা ওইরবসু—মখোয়না ফারবা মতুং নুমিৎ ৩০নিগী মনুংদা বেল লৌবা তাই। করিগুম্বা বেল ফংদ্রবদি, ৩১নি শুবা নুমিত্তা মখোয়না ওফিস থাদোক্কদবনি। ইচিল ইনাওশিং হায়বিয়ু, করিগুম্বা কনাগুম্বা মীওই অমনা জেলদা চঙলবদি, মখোয়গী ফম অদু থাদোক্লম্বা তাদবরা? মখোয় চৌক্রি কোন্দুনা লৈফম থোকপরা? মখোয়না জেলদগী চে-চাংশিং খুৎয়েক পীবা য়াবরা? কনাগুম্বা অমনা কৈশুমশঙ মনুংদগী লৈঙাক চলাইবা য়াবরা? মরম অদুননি ঐখোয়না অসিগুম্বা অকনবা লো অমা পুরক্লিবা।
অদুবু মরূপশিং,
RJD, কংগ্রেস, লেফ্তকী মীওইশিং অসিনা—মখোয়না লো অসিগী মায়োক্তা লেপ্লি। মখোয়না শাউরি। করি মরমগীনো হায়বা খঙদবা কনাবু য়াওরি? মরাল লৈরবা মীশকশিংদুনা মখোয়গী মরাল মীয়ামদগী লোৎশিল্লম্বদি য়াই, অদুবু মথম্মোয়দদি, মখোয়না করি অরানবা তৌখ্রে হায়বা মখোয় খঙই। মসি মখোয় পুম্নমক্কী ৱারীনি। RJD অমসুং কংগ্রেসকী লুচিংবশিংনা—মখোয় খরা অমদি বেলদা থোক্লগা লৈরিবনি অদুগা খরনা রেলৱে স্কেমদা চেন্নদুনা কোর্ত কারিবনি। অদুগা ঙসি বেলদা থোক্তুনা লৈরিবা মীওইশিংদুনি লো অসিগী মায়োক্তা লেপ্লিবা। করিগুম্বা মখোয় জেল য়ৌরবদি, মখোয়গী মঙলান পুম্নমক কায়রগনি হায়না মখোয়না কিরি। মরম অদুননি, মখোয়না অহিং নুংথিল খাক্তনা, মোদীদা চৈদুনা লৈরিবা। মখোয় শাউরি, লৈতাফম খঙদ্রি, অদুনা মখোয়না মীয়ামগীদমক কান্নরবা লো অসিবু য়ানিংদবা ফোঙদোক্লি। ঐখোয়গী রাজেন্দ্র বাবু, বাবাসাহেব অম্বেদকরনা কৈদৌঙৈদসু শক্তি পাম্বা লুচিংবশিংনা শেঞ্জা থুমজা তৌরক্কনি অমদি জেল চঙলবা ফাওবদা চৌক্রি কোন্দুনা লৈগনি হায়না খল্লম্লোই, মঙদা ফাওবা মঙলম্লোই। অদুবু হৌজিক্তি, শেঞ্জা থুমজা তৌবশিং জেলদা চঙলগনি, অমদি মখোয়গী চৌক্রিসু পুদুনা চঙলি। ভারতপু শেঞ্জা থুমজাদগী মনীং তমহন্নবা ফিরেপ অসি লৈবাক অসিগী মীওই করোর কয়াগীনি। ফিরেপ অসি শোয়দনা ফংহনগনি।
মরূপশিং,
লাল কিলাদগী, ঐহাক্না অতোপ্পা খুদোংথিবা অমগী মরমদা ৱা ঙাংখি—খুদোংথিবা অদু বিহারদসু লৈগনি। লৈবাকসিদা চঙশিল্লকপা মীশিং হেনগৎলক্লিবা অসি য়াম্না নুংনাংনিংঙাইনি। বিহারগী ঙমখৈ ময়াগী দিস্ত্রিক্তশিংদা দিমোগ্রাফী থুনা হোংলক্লি। মরম অসিননি NDA লৈঙাক্না লৈবাক অসিগী তুংলমচৎ মপান্দগী চঙশিল্লকপশিংনা লেপহন্দনবা ফিরেপ লৌখ্রিবা। ঐখোয়না মপান্দগী চঙশিল্লকপশিংনা বিহারগী নহাশিংগী থবক মুনহল্লোই। ঐখোয়না মপান্দগী চঙশিল্লকপশিংবু ভারতকী মীয়াম্না ফংফম থোকপা খুদোংচাবশিং ফংহল্লোই। খুদোংথিবা অসি থেংননবগীদমক, ঐহাক্না দিমোগ্রাফী মিসন হৌনবা ৱাফম লাউথোকখ্রে। অথুবা মতমদা, মিসন অসিগী থবক হৌরগনি—অমদি ঐখোয়না মপান্দগী চঙশিল্লকপা খুদিংমক লৈবাক অসিদগী তান্থোকখিগনি। ময়ামসু হায়বিয়ু—মপান্দগী চঙশিল্লকপশিং অসি তান্থোক্কদ্রা নৎত্রগা তান্থোক্লোইদ্রা? চঙশিল্লকপশিং অসিনা অদোমগী লম মুনখ্রবদি অদোম য়াগদ্রা? চঙশিল্লকপশিংনা অদোমগী হক মুনখ্রবদি অদোম য়াগদ্রা? বিহারগী মীয়ামশিং, অদুগুম্বা চঙশিল্লকপশিং অসিবু শৌগৎলিবা মীওইশিংদগী চেকশিনবিয়ু। কনানা চঙশিল্লকপশিংগা লোয়ননা লেপ্লি হায়বা মুন্না খঙবিয়ু। কংগ্রেস অমসুং RJD গুম্বা পার্তীশিংনা বিহারগী মীয়ামবু মখোয়গী হক ফংহন্দনা, চঙশিল্লকপশিংদা পীথোকপা পাম্মি। পেলহন্নবগীদমক, ভোত-বেঙ্ক পোলিতিক্সকীদমক, কংগ্রেস অমসুং RJD না থাক অমদা হেক্তা কুমথবা ঙম্মি। মরম অদুনা বিহারগী মীয়াম্না মীৎশিং নাশিংনা লৈবা তাই।
মরূপশিং,
ঐখোয়না বিহারগী মীয়াম্বু কংগ্রেস অমসুং RJD গী ফৎত্রবা মীৎয়েঙদগী ঙাকথোকপা তাই। হৌজিক বিহারগীদমক্তা য়াম্না অরুবা তানফম্নি। বিহারগী নহাশিংগী মঙলান মঙফাওনহন্নবগীদমক, বিহারগী মীয়ামগী অপাম্বশিং হেন্না ৱাংনা কাহন্নবগীদমক—কেন্দ্র লৈঙাক অমদি নিতিস জীনা বিহারগী য়াইফনবগীদমক পুন্না থবক তৌমিন্নরি। বিহারগী চাওখৎ খোঙজেল হন্থহন্দনবগীদমক, দবল-ইঞ্জিন লৈঙাক্না লেপ্তনা হোৎনরি। ঙসিগী প্রোজেক্তশিং অসি মায়কৈ অদোমদা থাংজিনবা মরুওইবা খোঙথাং অমনি। অমুক্কা হন্না ঐহাক্না প্রোজেক্তশিং অসিগীদমক বিহারগী মীয়ামগী মফমদা থম্মোয়নুংদগী নুংঙাইবা ফোঙদোকচরি। ঐগা লোয়ননা লাউবিয়ু—
ভারত ইমানা য়াইফরে!
ভারত ইমানা য়াইফরে!
ভারত ইমানা য়াইফরে!
ময়ামবু থাগৎচরি।
