রাজস্থানগী রাজ্যপাল শ্রী হরিভাউ বগরে জি, চীফ মিনিস্তর শ্রী ভঞ্জনলাল জি শর্মা, রাজস্থান সরকারগী মিনিস্তরশিং, এম.পিশিং, উদ্যোগকী মরুপশিং, তোঙান-তোঙানবা এম্বেসেদরশিং, এম্বেসিগী মীহুৎশিং, অতোপ্পা শক্নাইরবশিং, ইবেম্মাশিং অমসুং ইবুংঙোশিং।
রাজস্থানগী চাউখৎপগী খোঙচত্তা, ঙসি অসি য়াম্না মরুওইবা নুমিৎ অমনি। মশিং য়াম্লবা দেলিগেতশিং, লৈবাক অসিগী অমসুং মালেমগী ইনভেস্তরশিং পিঙ্ক সিতি অসিদা থুংলরে। উদ্যোগকী মরুপ কয়াশু মফম অসিদা পুল্লরে। রাইজিং রাজস্থান সম্মিত্তা ময়াম পুম্নমক তরাম্না ওকচরি। অঙকপা থৌরম অসিগীদমক ঐনা রাজস্থানগী বি.জে.পি সরকার থাগৎপা ফোঙদোকচরি।
মরুপশিং,
ঙসিদি, মালেম অসিদা ইনভেস্তর খুদিংমক, অখঙ-অহৈ খুদিংমক্না ভারতকী মরমদা থাজবা লৈরে। রিফোর্ম-পর্ফোম-ত্রান্সফোর্মগী লাইৱা শীজিন্নবদগী, হিরম খুদিংমক্ত ভারতকী চাউখৎপা ইরাই লাইনা উবা ফংলে। নিংতম্বা ফংলবা চহি ৭০গী মতুংদা, মালেমদা ভারত ৭শুবা খ্বাইদগী চাউবা ইকোনোমি অমা ওইখি। হৌখিবা চহি ১০ অসিদা, ১০শুবা খ্বাইদগী চাউবা ইকোনোমি ওইরম্বদগী ভারত ৫শুবা খ্বাইদগী চাউবা ইকোনোমি ওইর। হৌখিবা চহি ১০ দা মপান্দা থাদোকপা শরুক অনি হেনগৎলে। ২০১৪ গী মমাঙগা চাংদম্নবদা, হৌখিবা চহি ১০ দা ফোরেন দাইরেক্ত ইনভেস্তমেন্ত শরুক অনি হেনগৎলে। মসিগী মথক্ত, হায়রিবা মতম অসিদা লৈবাক অসিনা ইনফ্রাস্ত্রকচরদা থাজবা শেনফম লুপা ত্রিল্লিয়ন ২ দগী লুপা ত্রিল্লিয়ন ১১ দা হেনগৎলে।
মরুপশিং,
ভারতকী মাইপাকপা অসিদা গনতন্ত্র, অপুনবা মীশিং, দিজিতেল দেতা অমসুং মীয়ামদা খুদোংচাবশিং ফংহনবা অসি খুদম অমা ওইরে। ভারতগুম্বা খেন্নবা কয়াগী লৈবাক অমদা, গনতন্ত্র অসি হিংবা খক নত্তন হেন্না মপাঙ্গল কনখৎলক্লি, মসি শিংথানিঙাই ওইনা মাইপাকপনি। গনতন্ত্র চৎপগা লোয়ননা, ভারতকী ৱাঙুলোন অসি মীওইবগী য়াইফনবা থবকশিংদা মরুওইনা লৌবনি। ঙসিদি ভারতকী মীয়াম মখোয়গী গনতন্ত্রগী হকশিংগী খুৎথাংদা, মখোয়গী ভোৎনা তংদু-লৈতাবা সরকার অমা লৈহল্লে।
মরুপশিং,
ভারতকী অরিবা গুনশিং লৈবাক অসিগী মীয়ামগী থৌনা-লৈবাক অসিগী নহারোলশিংগী থৌনানা মাংলোমদা পুখৎলি। তুংদা লাক্কদৌরিবা চহিশিংদা, ভারত মালেমদা খ্বাইদগী নহা ওইবা লৈবাক অমা ওইদুনা লৈরগনি। নহা ওইরিবা মীওই মশিং য়াম্না লৈবগা লোয়ননা, খুৎ-শা খ্বাইদগী হৈবা নহারোল য়াম্না লৈবা লৈবাক ভারতনা ওইরগনি। মসিগী খুদোংচাবা অসি লৌনবা, সরকারনা মরুওইবা ৱারেপ কয়া লৌরে।
হৌখিবা চহি ১০ দা, ভারতকী নহারোলশিংনা মখোয়গী তৌবা ঙম্বদা অনৌবা কয়া হাপচিল্লে। মসিগী অনৌবা মাইওন অসি ভারতকী তেক পৱার অমসুং দেতা পৱার অসিনি। হৌজিক হিরম খুদিংমক্ত তেক্নোলোজি অমসুং দেতা কয়া য়াম্না মরুওইবগে হায়বা অদোম খঙলে। হৌজিক অসি তেক্নোলোজি অমসুং দেতানা লমজিংবা চহিচানি। হৌখিবা চহি ১০ দা, ভারতকী ইন্তরনেত শীজিন্নবা মীওই মশিং শরুক মরি হেনগৎলে। দিজিতেল ত্রান্সসেক্সনশিং অনৌবা রেকোর্দশিং থম্লে অমসুং মসি হৌবতা ঙাইরিবনি। গনতন্ত্র, অপুনবা মীশিং অমসুং দেতাগী অশেংবা শক্তি ভারতনা মালেমদা উৎলে। হিরম খুদিংমক্ত অমসুং মীওই কাংলুপ খুদিংমক্ত কমদৌনা দিজিতেল তেক্নোলোজিগী কান্নবশিং ফংহনবগে হায়বা ভারতনা উৎলে। য়ু.পি.আই, দি.বি.তি স্কিমশিং, জি.ই.এম অমসুং ও.এন.দি.সিগুম্বা প্লেতফোর্মশিংনা ভারতকী দিজিতেলগী থবকশিংগী মপাঙ্গল অদু উৎলে। মসিগী দিজিতেলগী অওনবশিং অসিনা রাজস্থান্দা শিংথানিঙাই ওইবা কান্নবশিং ফংহনগনি। রাজ্যশিং চাউখৎপনা লৈবাক অসি চাউখৎকনি হায়বসি ঐগী অচেৎপা থাজবনি। রাজস্থান্না চাউৎপগী অনৌবা থাকশিং য়ৌরকপগা লোয়ননা, লৈবাক অসি শীনবা থুংনা চাউখৎপদা রাজ্য অসিনা মতেং পাংগনি।
মরুপশিং,
লমগী পাক-চাউবদা, রাজস্থান ভারতকী খ্বাইদগী চাউবা রাজ্যনি অমসুং মসিগী মীয়ামগী থম্মোয় রাজ্য অসিগী লমগুম পাক-চাউই। খ্বাইদগী কনবা পান্দমশিং ফংনবা থবক কন্না শুবা, পুকচেল শেংবা অমসুং অচেৎপা ফিরেপ লৈবা, থবক অতৈদগী লৈবাক্কী থবক্না হেন্না মরুওইনা লৌবা অমসুং লৈবাক্কীদমক থবক অমা হেক্ত পাংথোক্নবা ইথিল পীবা-হায়রিবা গুনশিং অসি রাজস্থানগী লৈবাক লৈহাওগী উফুল মরিক খুদিংমক্ত য়াওরি। অদুবু, নিংতম্বা ফংলবা মতুংদা, সরকারশিংগী মরুওইবা অসি লৈবাক অসি চাউখৎনবা নত্ত্রগা লৈবাক অসিগী হেরিতেচ ঙাক্নবদা ওইখিদে। মসিগী মীরাইবা অসিগী অচৌবা চৈথেং অমা রাজস্থান্না ফংখি। অদুবু ঙসিদি, ঐখোয়গী সরকারনা বিকাস অমসুং বিরাসতকী লাইৱাগা লোয়ননা থবক তৌরি অমসুং মসিগী কান্নবশিং রাজস্থান্না ফংলে।
মরুপশিং,
রাজস্থান চাউখৎলকপা খক নত্তনা থবকশু ফজনা পাংথোকপনি। খুদোংচাদবশিং মায়োক্নবা অমসুং অনৌবা খুদোংচাবশিং শেমগৎপদা রাজস্থান খুদম ওইরি। রাজস্থানগী আর-ফেক্তরদা মসিনা অনৌবা মাইওন অমা হাপচিল্লে। রাজস্থানগী মীয়াম্না অওনবা পুরকপা বি.জে.পি সরকারনা অমা পুরক্লে। অতেনবা মতমগী মনুংদা, ভজন লাল জি অমসুং মহাক্কী অপুনবা তিমনা শিংথানিঙাই ওইবা থবক কয়া পায়খৎলে। রাজ্য সরকার অসি অথুবা মতমদা চহি অমা মপুংফারগনি। রাজস্থান য়াংনা চাউখৎনবা ভজন লাল জিগী থবক অসি থাগৎনিঙাইনি। লায়রবশিং য়াইফনবা, লৌমীশিংগী য়াইফনবা, নহারোলশিংগী অনৌবা খুদোংচাবশিং পীনবা নত্ত্রগা লম্বীশিং, মৈ অমসুং ঈশিং ফংহন্নবা-চাউখৎ-থৌরাংগী থবক খুদিংমক রাজস্থান্দা য়াংনা পায়খৎলে। সরকারনা মতম চানা ক্রাইম অমসুং শেঞ্জা-থুমজা লাকশিনবদগী মীয়াম অমসুং ইনভেস্তরশিংদা অনৌবা হরাওবা ফংহল্লে।
মরুপশিং,
রাজস্থান চাউখৎলকপগী অশেংবা অদু খঙনবা, রাজ্য অসিগী অশেংবা তৌবা ঙম্বশিং অদু খঙবা তঙাইফদে। রাজস্থান্দা মহৌশাগী লন মরাংকাইনা লৈরি, অনৌবা লম্বী-থোং, ইনাকখুল্লবা হেরিতেচ, পাক-চাউরবা লম অমসুং মতিক চারবা নহারোলশিং লৈরি। লম্বীশিংদগী হৌরগা রেলৱেশিং, অতিথিশিং লুনা তৌবদগী খুৎ-শা হৈবগী থবকশিং, লৌবুক্তগী হৌরগা লালবন্দশিং, রাজস্থান্দা খুদোংচাবশিং লন অমা লৈরি। মসিগী খুদোংচাবশিং অসিনা রাজস্থান অসি শেন থাদনবগী য়াম্না পাম্নবা মফম অমা ওইরে। রাজস্থানগী অঙকপা গুন অমদি-মসিগী মপাঙ্গল খঙবা অমসুং মসি হেনগৎহনবা অসিনি। মরম অদুনা হৌজিক লৈঙোইগী চীংদুমশিংদা চোর্ফোন অমসুং অৱা কেগগুম্বা থাদুনা মহৈ চাবা হৌরে। জয়পুরগী ব্লু পোত্তরি, প্রাতাপগরগী থেৱা জেৱেলারি অমসুং ভিলৱারাগী তেক্সতাইলনা অফবা মিংচৎ পুরক্লে। মাক্রানা মার্বল অমসুং কোতা দোরিয়া মালেম শীনবা থুংনা খঙনরে। নগৌরগী ফেনুগ্রিক্কী মনম অসিগুম্বা অতৈ মফমদা লৈতে। হৌজিক পাল্লিবা বি.জে.পি সরকারনা জিলা অমমমগী তোপ-তোপ্পা অফবা গুনশিং মশক খঙদোকপা অমসুং কান্নবা লৌবগী থবক পায়খৎলি।
মরুপশিং,
অদোম খঙলিবা অদুনি, ভারতকী মিনরেলগী অয়াম্বা শরুক রাজস্থান্দা ফংলি। রাজ্য অসিদা জিঙ্ক, মিসি, কোরি, মার্বল, শুনু নুঙ, গ্রেনাইত অমসুং পোতাসগী রিজার্বশিং লৈরি অমসুং মসিনা অত্মানির্ভর ভারতকী অকনবা য়ুম্ফম থোল্লে। ভারতকী ইনর্জি সেকুরিতিদা রাজস্থান্না অচৌবা মতেং পাংলি। চৎলিবা চহি ১০ অসিগী অরোইবদা গিগাৱাত ৫০০গী রিন্যুএল ইনর্জ পুথোক্নবা ভারতনা পান্দম অমা থম্লি অমসুং মসিগী মিসন অসিদা রাজস্থান্না মরুওইবা থৌদাং অমা লৌরি। লৈবাক অসিদা খ্বাইদগী চাউবা সোলার পার্ক খর রাজ্য অসি অসিদা শেমগৎলি।
মরুপশিং,
অচৌবা শেন-থুমগী মফম অনি, দিল্লি অমসুং মুম্বাইগী মরক্তা রাজস্থান্না মরুওইবা শম্নবা অমা ওইরি। রাজ্য অসিনা মহারাস্ত্রা অমসুং গুজরাতকী হিথাংফমশিংগা অৱাং ভারতকা শম্নহল্লি। দিল্লি-মুম্বাই ইন্দস্ত্রিএল কোরিদোরগী কিমি ২৫০ গী শরুক রাজস্থানগী জিলাশিং হায়বদি অলৱার, ভারতপুর, দৌসা, সৱাই মধোপুর, তোঙ, বুন্দি অমসুং কোতা ফাওদুনা চৎলি। মসিগা চপ মান্ননা, দেদিকেগেদ ফ্রেদ কোরিদোরগী কিমি ৩০০ রাজস্থানগী জয়পুর, অজমর, সিকার, নগৌর অমসুং অলৱার জিলাশিং ফাওদুনা চৎলি। হায়রিবা লম্বী-থোংগী প্রোজেকশিংগী ফিবম অসিদগী মরুওইনা দ্রাই পোর্তশিং অমসুং লোজিস্তিক্স সেক্তরশিংদা রাজস্থান শেন থাদনবগী মতিক চারবা মফম অমা ওইরে। ঐখোয়না রাজ্য অসিদা মল্তি-মোদাল লোজিস্তিক্স পার্কশিং অমসুং ইন্দস্ত্রিএল পার্ক ২৪ রোম শেমগৎলে। মসিগী মথক্ত, এয়র কার্গো কমপ্লেক্স অনি লিংখৎলে অমসুং মসিনা রাজস্থান্দা উদ্যোগশিং লিংখৎপা লাইহল্লে অমসুং উদ্যোগশিংগী মরক্তা চৎথোক-চৎশিনগী খুদোংচাবা হেনগৎহল্লে।
মরুপশিং,
ভারতকী তুংগী নুংঙাই-য়াইফবদা তুরিজমগী অচৌবা খুদোংচাবশিং লৈরি। মহৌশা, নাত, এদভেঞ্জর, কনফরেন্স, লুহোংবা অমসুং হেরিতেচ তুরিজমদা মশিং থিঙমদ্রবা খুদোংচাবশিং ভারতনা পীরি। ভারতকী তুরিজমগী মেপ্তা রাজস্থান মরুওইবা মফম অমা ওইরি। রাজ্য অসিগী ঈশৈ, মথেল-লুকোই অমসুং চৎনবীশিংগী লাম্বা লৈতে। তুরিজম, ত্রাবেল অমসুং হোস্পিতেলিতিদগী হৌরগা সেক্তর খুদিংমক্কী দরকার ওইবশিং রাজস্থান্দা ফংলি। লুহোংবা অমসুং নিংশিংদুনা লৌগদবা পুন্সিগী ওইবা থৌরমশিংগী রাজস্থান মালেমদা খ্বাইদগী পাম্নবা মফমশিংগী মনুংদা অমা ওইরে। রাজ্য অসিদা ৱাইল্দলাইফ তুরিজমগী খুদোংচাবা কয়া মরাংকাইনা ফংলি, রনথামবোর, সারিস্কা, মুকুন্দ্র হিলস অমসুং কিওলাদিও নেসনেল পার্ক অসি লম্লক্কী শা-উচেক পামজবশিংগী লাইরৈবাকনি। রাজস্থান সরকারনা মসিগী লমকোয়ফমশিং অমসুং হেরিতেচ সেন্তরশিংগী লম্বী-থোং ফগৎহনবা উবদা ঐ অপেনবা ফাওই। তোঙান-তোঙানবা থিম সর্কুইতশিং শম্নবা স্কিমশিং ভারত সরকারনা হৌদোক্লে। ২০০৪ অমসুং ২০১৪ গী মরক্তা ভারত্ত মপানগী লমকোয়বা মীওই করোর ৫ রোম লাকখি। ২০১৪ দগী ২০২৪ ফাওবগী মনুংদা, চহি অহুমদগী চহি মরি ফাওবা কোরোনা লাইচৎনা অপনবা পীখ্রবশু, মপানগী লমকোয়বা মীওই করোর ৭ লাকখি। কোরোনা লাইচৎ মনুংদা তুরিজম চপ লেপখি। মদু ওইরবশু, ভারত্ত লমকোয়বা মীওইশিং লাকপা শিংথাবা য়ানা হেনগৎলকখি। তোঙান-তোঙানবা লৈবাকশিংগী লমকোয়বা মীওইশিংদা ভারতনা ই-ভিসাগী খুদোংচাবশিং পীবদগী মালেমগী লমকোয়বা মীওইশিংদা চাউনা কান্নবা ফংহল্লে। লৈবাক মনুংগী তুরিজম অনৌবা থাকশিং য়াওনা চাউখৎলে। উরান, বন্দে ভারত ত্রেনশিং অমসুং প্রাসাদ প্রোগ্রামনা রাজস্থান্দা কান্নবা য়াম্না পীরে। ভাইব্রেন্ত ভিলেজগুম্বা থৌরমশিংনা রাজ্য অসি মখা তানা চাউখৎপদা মতেং পাংলি। “ভারত্ত লুহোংবা” অসি পাংথোক্নবা ঐনা মীয়ামদা হায়জরি অমসুং হায়রিবা থবক অসিদা রাজস্থান্না শিংথাবা য়ানা কান্নবশিং ফংগনি। রাজস্থান্দা হেরিতেচ তুরিজম, ফিল্ম তুরিজম, ইকো-তুরিজম, রুরেল তুরিজম অমসুং ঙমখৈগী তুরিজম পাকথোক-চাউথোক্নবা খুদোংচাবা কয়া মরাংকাইনা লৈরি। হায়রিবা হিরমশিং অসিদা অদোম্না শেন থাদবা অসিনা রাজস্থানগী তুরিজম ইন্দস্ত্রি মপাঙ্গল কনখৎহনবা খক নত্তনা অদোমগী ললোন-ইতিক চাউখৎহনগনি।
মরুপশিং,
মালেমগী সপ্লাই চেনশিং অমসুং ভেলু চেনশিংগী খুদোংচাদবশিং অদোম খঙলে। ঙসিদি, অচৌবা অৱাবা মায়োক্নবা মতমদা ফাওবা লেংদনা লৈবা অমসুং অপনবা লৈতনা থবক তৌবা ঙম্বা ইকোনোমি অমা মালেমনা দরকার ওইরে। মসিগীদমক, ভারত্ত পাক-চাউরবা মেনুফেকচরিং বেজ অমা লিংখৎপা তঙাইফদে। মসি ভারত খক্তগী মরুওইবা নত্তনা মালেমগী ইকোনোমিগী ওইনশু মরুওইবনি। মসিগী দাইত্ব অসি খঙদুনা, মেনুফেকচরিংদা অত্মানির্ভর ওইনবা ভারতনা থবক পায়খৎলে। মেক ইন ইন্দিয়া প্রোগ্রামগী মখাদা, শেন য়াম্না চঙদবা মেনুফেকচরিংদা ভারতনা থবক পায়খৎলে। লৈবাক অসিগী পেত্রোলিয়মগী পোৎথোকশিং, হিদাক-লাংথকশিং অমসুং তিকাশিং অমসুং ইলেক্ত্রোনিক্কী পোৎ-চৈশিং অসি মালেম অসি কান্নবা পীরিবা রেকোর্দ থুগায়বা মেনুফেকচরিংগী থবকশিংগী খুদমশিংনি। হৌখিবা চহিদা লুপা করোর ৮৪,০০০ রোম মপান্দা থাদোক্তুনা থবক অসিদা রাজস্থান্না চাউনা মতেং পাংলি। মসিদা ইঞ্জিনিয়ারিংগী পোৎলমশিং, জেমশিং অমসুং জেৱেলারিশিং, তেক্সাতাইলশিং, হেন্দিক্রাফশিং অমসুং লৌউ-শিংউগী পোৎথোকশিং য়াওরি।
মরুপশিং,
ভারত্ত মেনুফেকচরিং হেনগৎহনবদা পি.এল.আই স্কিমনা অচৌবা থৌদাং অমা লৌরি। ইলেক্ত্রোনিক্স, স্তিল, ওতোমোবাইলশিং, ওতো কম্পোনেন্তশিং, সোলার ফোতোভোলতাইকশিং অমসুং হিদাক-লাংথকশিং অসি ফজনা পাম্নবা উরে। পি.এল.আই স্কিমগী ফল অমা ওইনা, লুপা করোর লাখ ১.২৫ থাদরক্লে অমসুং লুপা করোর লাখ ১১ রোমগী পোৎথোকশিং পুথোক্লে অমসুং মপান্দা থাদোকপা লুপা করোর লাখ ৪ রোম হেনগৎলে। মসিদগী নহারোল মিল্লিয়ন কয়া থবক ফংনবগী খুদোংচাবশিং ফংলে। রাজস্থান্দা হান্নদগী ওতোমেতিপ অমসুং ওতো কম্পোনেন্ত ইন্দস্ত্রিশিং লৈরে। রাজ্য অসিদা ইলেক্ত্রিক গারি শানবা খুদোংচাবা কয়া মরাংকাইনা লৈরি অমসুং ইলেক্ত্রোনিক্স মেনুফেকচরিংগী দরকার ওইবা মচাকশিং মরাংকাইনা ফংলি। রাজস্থানগী মেনুফেকচরিংগী খুদোংচাবশিং থিদোক্নবা অমসুং খুদোংচাবা লৌনবা ঐনা ইনভেস্তরশিংদা হায়জরি।
মরুপশিং,
রাইজিং রাজস্থানগী মরুওইবা মপাঙ্গলশিংগী মনুংদা অমদি রাজ্য অসিগী এম.এস.এম.ই সেক্তরনি। এম.এস.এম.ইশিংগী লমদা ভারতকী মকোক থোংবা রাজ্য মঙাগী মনুংদা রাজস্থান্না মকোক্ত লৈরি। মীফম অসিদা এম.এস.এম.ইশিংদা কৎথোক্লবা কনক্লেপ অমা পাংথোক্কনি। এম.এস.এম.ই লাখ ২৭ হেনবদা মীওই লাখ ৫০ হেন্না থবক পীদুনা রাজ্য অসিগী মরাইবক লেপ্পদা রাজস্থানগী এম.এস.এম.ইশিংগী থৌনা লৈরি। শক্তি হেক পায়রকপদগী রাজস্থানগী অনৌবা সরকারনা অনৌবা এম.এস.এম.ই থৌশিল অমা পুথোক্লে। ভারত সরকারনা মসিগী থৌশিলশিং অমসুং থবকশিংনা এম.এস.এম.ইশিংগী ফিবম ফগৎহল্লি। ভারতকী এম.এস.এম.ইশিংনা লৈবাক অসিগী শেন্মিৎলোন মপাঙ্গল কনখৎহনবা খক নত্তনা মালেমগী সপ্লাই অমসুং ভেলু চেনশিংদা মরুওইবা থৌদাং অমা লৌরি। মসি ঐখোয়না কোরোনা লাইচৎ মনুংদা মালেমগী ফার্মা সপ্লাই চেন অপনবা পীরকপা মতমদা উবা ফংখি অমসুং ভারতকী মপাঙ্গল কল্লবা ফার্মা সেক্তরনা মালেমগী মতেং পাংখি। মসি ভারতনা ফার্মাসিউতিকেল সেক্তরদা অকনবা য়ুম্ফম অমা থোনবদগী ওইখিবনি। তোঙান-তোঙানবা পোৎথোকশিংগী অফবা মেনুফেকচরিংগী য়ুম্ফম অমা শেমগৎপদা এম.এস.এম.ইশিংনা মরুওইবা থৌদাং অমা লৌগনি।
মরুপশিং,
এম.এস.এম.ই হেন্না চাউখৎনবা মখোয়দা খুদোংচাবশিং পীনবা ঐখোয়গী সরকারনা এম.এস.এম.ইশিংগী পেরামিতরশিং অমুক হন্না শেমদোক্লে। এম.এস.এম.ই করোর ৫ ফোর্মেল ইকোনোমিদা পুনশিন্দুনা মখোয় শেন্থং ফংবদা লাইহল্লে। ঐখোয়না ক্রেদিদ গরেন্তি লিঙ্ক স্কিম হৌদোক্তুনা অপীকপা উদ্যোগশিংদা লুপা করোর লাখ৭ রোম মতেং পাংখ্রে। হৌখিবা চহি ১০ দা এম.এস.এম.ইশিংদা পীবা শেন্থং শরুক অনি হেনগৎলে। ২০১৪ দা লুপা করোর লাখ ১০ পীখি, অদুবু ঙসিদি লুপা করোর লাখ ২২ হেল্লে। এম.এস.এম.ইশিংগী মপাঙ্গল কনখৎলকপা অসিনা রাজস্থানগী চাউখৎপা অনৌবা থাকশিংদা পুখৎকনি।
মরুপশিং,
ঐখোয় অত্মানির্ভর ভারতকী মাইকৈদা অনৌবা খোঙচৎ অমা হৌরে। অত্মানির্ভর ভারত মিসন অসিদা মালেমগী অনিংবশিং অমসুং মালেমগী কান্নবশিং য়াওরি। সরকারগী থাক্ত, ঐখোয়গী সরকারগী মিনিস্ত্রি খুদিংমক শরুক য়াবা থৌরাং অমগা লোয়ননা চঙশিল্লি। মসিগী সবকা প্রায়াসকী ৱাখল্লোন অসিনা বিকসিত রাজস্থান অমা অমসুং বিকসিত ভারত অমা শেমগৎকনি।
মরুপশিং,
মীফম অসিনা লৈবাক শীনবা অমসুং মালেম শীনবা থুংবগী দেলিগেতশিং তরাম্না ওক্লে। অদোম অয়াম্বনা, ভারত নত্ত্রগা রাজস্থান্দা লাকপা মসিনা অহানবা ওইরমগনি। অদোমনা য়ুমদা হন্দ্রিঙৈদা, রাজস্থান অমসুং ভারত য়েংনবা ঐনা হায়জরি। ফজরবা কৈথেলশিং, মীয়াম অমসুং লমদম অসিগী লাম্বা লৈত্রবা ফজবশিংনা অদোম মফম চুপ্পা হরাওহনগনি। অমুক হন্না, রাইজিং রাজস্থানগী পান্দমদা মখোয়গী থাজবা থম্বগীদমক ঐনা ইনভেস্তরশিংগী মফমদা ঐগী য়াইফ-পাউজেল পীজরি।
অদোম থাগৎচরি।
