খুরুমজরি!
মধ্য প্রদেশকী রাজ্যপাল, শ্রী মঙ্গুভাই পতেলজী, মধ্য প্রদেশকী মুখ্য মন্ত্রী, শ্রী শিবরাজ সিংহ চৌহানজী, কেন্দ্রগী মন্ত্রী-মন্দলগী ঐহাক্কী মরুপশিং শ্রী হর্দীপ সিংহ পুরি, দা. বিরেন্দ্র কুমার অমসুং শ্রী কৌশল কিশোর, মধ্য প্রদেশ সরকারগী মন্ত্রীশিং, এম.পি, অমদি এম.এল.এ.শিং, ইন্দোর অমদি মধ্য প্রদেশকী শহর কয়াদগী লাক্লিবা নুংশিরবা ইচিল-ইনাওশিং, অতোপ্পা দিগনিতরীশিংসু ঙসি থৌরম অসিদা শরুক য়ারি।
ঐখোয়না অঙাং ওইরিঙৈদা ঐখোয়না লাইরিক ওরাইবদা ইন্দোর হায়বা মমিং অসি য়াওরকপদা অহানবদা দেবি অহিল্যাবাই হোল্কত, মাহেশ্বর অমসুং মখোয়না তৌরমখিবা শেবা অদু নীংশিংলকই। মতমগা ইরোইননা, ইন্দোর অসি য়াইফনবগীদমক হোংবা নাইখি অদুবু দেবি অহিল্যাভাইগী ইথিলদি মাংবা লৈখিদে। দেবি অহিল্যাজীগা লোয়ননা ঙসি ইন্দোর হায়বা মমিং অসি ৱাখলদা লাকপদা মতমদা –স্বচ্ছতা। ইন্দোরগী মমিং অসি ৱাখলদা হেক লাকপগা ৱাখলদা - সিবিক দ্যুতীবু হায়বা অসি ফাওরকই। ইন্দোরগী মীয়াম ফগৎলকপদা মখোয়গী শহর অসিনা হেন্না ফগৎলকই। অমসুং নখোয়বু শেমগীদমক খঙনবা খক্তা নত্তনা ইন্দোরগী মীয়াম অসি মখোয়গী শহরগী শেবা তৌবসু হৈ।
ঙসি ইন্দোরগী স্বচ্ছতাগী কেম্পেন্দা অনৌবা ইনোৎ অমা হাপ্লি। ৱেৎ ৱেস্ততগী বাইও-সি.এন.জি, শুংনবা ঙসি ইন্দোরনা গোবর ধন প্লান্ত ফংবা অসিদা ঐহাক্না ময়াম পুম্নমক্তা হন্না-হন্না নুংঙাইবা ফোঙদোকচরি। ঐহাক্না শিবরাজজী অমসুং মহাক্কী তীমনু থবক অসি অতেনবা মতমগী মনুংদা ওইথোকহনখিবগীসমক অখন্ননা থাগৎপা ফোঙদোকচনীংই। সুমিত্রা তাইনা এম.পি. অমা ওইনা ইন্দোরগী আইদেন্তিতীবু অনৌবা থাক অমদা পুখৎখিবগীদমক ঐহাক্না ঙসি তৌবীমল খঙবসু উৎচরি। ঐহাক্কী মরুপ ভাই শঙ্কর লালৱানীজী, হৌজিক এম.পি. ওইবীরিবা অসিনসু মহাক্না শেমজখিবা লম্বী অদুদা মাং থানা চংশিন্নবা ইন্দোরবু ফগৎহন্নবা লেপ্তনা হোৎনরি।
অমসুং মরুপশিং,
ঙসি, ঐহাক্না ইন্দোরবু অসুম্না থাগৎপা অসিদা ঐহাক্কী পার্লিয়ামেন্তরী কন্সতিত্যুন্সী বারানসীসু পনজগে। কাশী বিশ্বনাথ ধামদা দেবি অহিল্যাবাই হোল্করজীগী য়াম্না নীংথিজরবা মীতম অমা খিনবা অসিদা ঐহাক্না নুংঙাইবা পোকই। ইন্দোরগী মীয়াম্না বাবা বিশ্বনাথ য়েংবা চৎপা মতমদা মখোয়না দেবি অহিল্যাবাইজীগী মীতমসু উবা ফংগনি। অদোমগী শহর অসিগীদমক অদোম্না হেন্না চাউথোকচবা পোক্কনি।
মরুপশিং,
ঙসিগী খোঙথাং অসি ঐখোয়গী শহরশিংবু পোলুসন ফ্রী ওইনা থম্বদা, অমসুং ৱেৎ ৱেস্ত দিস্পোজ তৌনবা য়াম্না মরু ওই। শহরদা লৈরিবা য়ুমশিংদগী থাদোরকপা ৱেৎ ৱেস্ত অমসুং শা-শন লৌরিবা অমদি খুঙ্গংগী লৌবুকশিংদগী থাদোরকপা অমোৎ-অকাই ওইরবসু পুম্নমক অসি গোবর ধন ঙাক্তনি। শহরগী ৱেস্ততগী গোবরধন, গোবর ধনদগী ক্লিন ফ্যুএল, ক্লিন ফ্যুএলদগী ইনর্জী, মসিগী চেন অসি জীবন ধন অমনি। মসিগী চেন অমদা অমনা অমগা করম্না মরী লৈনবগে হায়বগী হকথেংনবা খুদম ওইরিবা ইন্দোরগী গোবর ধন প্লান্ত অসিনা অতোপ্পা শহরশিংদসু ইথিল পীরগনি।
মথংগী চহি অনি অসিদা গোবর ধন বাইও সি.এন.জি. প্লান্তশিং অচৌবা ম্যুনিসিপাল বোদী ৭৫দা লিংখৎনবা থবক পাইখৎলিবা অসিদা ঐহাক্না নুংঙাইবা ফাওই। কেম্পেন অসিনা ভারতকী শহরশিংবু লুনাননা, পোলুসন ফ্রী ওইনা থম্নবা অমদি ক্লিন ইনর্জী ফংহন্নবা মাইকৈদা চাউনা মতেং ওইরগনি। অমসুং শহরশিংদতা নত্তনা লৈবাক অসিগী খুঙ্গংশিংদসু গোবরধন প্লান্ত লিশিং কয়া হৌজিক শেমগৎলি। মসিনা মরম ওইরগা ঐখোয়গী শা-শন লোইরিবা লৌমীশিংনা গোবর ধনদগী অহেনবা শেন্থোক ফংবা হৌরগনি। ঐখোয়গী খুঙ্গংশিং লোয়ালমদা লৈরিবা লৌমীশিংনা মপু লৈতবা শা-শনশিংনা মরম ওইরগা অৱাবা থেংনরিবা অসি গোবর ধন প্লান্তশিং অসিনা হন্থহল্লগনি। খোঙথাং পুম্নমক অসিনা ভারতকী অই—অশাগী খল ঙাক্নবা লেপ্পিবা ফিরেপ অসি থুংহনবদা মতেংসু পাংলগনি।
মরুপশিং,
মীয়াম্না গোবর ধন য়োজনাগী হায়বদি ৱেস্ত তু ৱেল্থকী ঐখোয়গী কেম্পেন অসিগী কান্নবশিংগী মতাংদা খঙবা মীয়াম হেনগৎলকপা হায়বা অসি অফবনি। ইন্দোরনা নোংমদা গোবধন বাইও-সি.এন.জি. প্লান্তদগী বাইও সি.এন.জি.গী কে.জি. লিশিং ১৭তগী ১৮ ফাওবা ফঙবতা নত্তনা মসিদগী নুমিৎ খুদিংগী ওর্গানিক মেন্যুর তন ১০০সু ফংলগনি। সি,এন,জি,না মরম ওইরগা পোলুসন হন্থরকগনি অমসুং মীওই খুদিংমক্কী ইজ ওফ লিবিংসু হেনগৎহল্লগনি। চপ মান্নবা মওংদা মফম অসিদগী পুথোকপা ওর্গানিক মেন্যুর অসিদগী ঐখোয়গী পৃথিবী ইমানা অনৌবা পুন্সি পীরগনি, ঐখোয়গী পৃথিবী অসি অমুক হন্না হিংগৎহল্লগনি।
প্লান্ত অসিদা পুথোকপা সি.এন.জি. অসিনা ইন্দোর শহরদা নুমিৎ খুদিংগী বস ৪০০রোম চেলহনবা ঙম্লগনি হায়না পান্নরি। প্লান্ত অসিদগী নাকোইননা নহারোল কয়া অমসু থবক ফংলগনি হায়বদি মসিনা গ্রিন জোবশিং হেনগৎহনবদা মতেং পাংগনি।
ইচিল-ইনাওশিং,
শীংনবা অমা হেক্তা লাকশিন্নবা পাম্বৈ অনি লৈ। অহানবা অসিনা শীংনবা অদুগী খুদক্কী ওইবা ৱারোইশিন পুরকপা। অনিশুবা অসিনা শীংনবা অসিদগী মীওই খুদিংমক্না মতম চুপ্পগী ওইবা ৱারোইশিন অমা পীনবগী পাম্বৈ। ঐখোয়গী সরকারনা হৌখিবা চহি তরেৎতা পাইখৎপা স্কিমশিং অসিনা মতম চুপ্পগী ওইবা রারোইশিন পীনবা হোৎনরি, মখোয়না অমুক্তদা পান্দম কয়া অমা ফংলগনি।
স্বচ্ছ ভারত অভিয়ান অসি খুদম ওইনা লৌবীয়ু। মসিনা স্বচ্ছতাগা লোয়ননা ইচে-ইচলশিংবু ইকাই খুম্নবা উৎনবা, লাইনা কয়া ঙাকথোক্নবা, খুঙ্গং অমদি শহরশিং নীংথিজহন্নবা থবক কয়া পাইখৎলি অমসুং মসিগা লোয়ননা থবক্কী খুদোংচাবশিংসু পীরি। হৌজিক্তি ঐখোয়না য়ুম, লম্বীদগী থোরকপা অমোৎ-অকাই অসি দিস্পোজ তৌদুনা চিংগুম্না পৈদুনা লৈরিবা অমোৎ-অকাইদগী শহরশিংবু শেংদোকপা অসিদা মীৎয়েং থম্মি। মসিগী মরক্তা ইন্দোর অসি রোল মোদেল অমা ওইরি। অদোম্নসু খঙবীরে মদুদি অনৌবা প্লান্ত লিংখৎলিবা মফম অসিদা, দেভগুদরিয়াগী মনাক্তা অমোৎ-অকাইনা চিংগুম্না পৈদুনা লৈমখি। মসিনা ইন্দোরদা লৈরিবা মীওই খুদিংমক্তা খুদোংচাদবা থোকহনখি। অদুবু হৌজিক্তি ইন্দোর ম্যুনিসিপাল কোর্পোরেসন অসিনা একর ১০০গী দম্প সাইৎ অসি গ্রিন জোন অমদা ওন্থোকপা ঙমখ্রে।
মরুপশিং,
ঙসি লৈবাক শিনবা থুংবদা শহরশিংদা অমোৎ-অকাই তন মিলিয়ন কয়ানা হায়রিবা অসিগুম্বা লম একর লিশিং কয়া দিকেদ কয়া মাংহনদুনা থম্লমখি। মসিনা শহরশিংদা এয়র পোলুসন অমসুং ৱাতর পোলুসন্না থোকহনবা লাইনাশিংগী অচৌবা মরম অমসু ওইরি। মরম অসিনা স্বচ্ছ ভারত মিসনগী অনিশুবা ফেসতা মসিগী সমস্যা অসি কোকহন্নবা থবক পাইখৎলি। মসিগী পান্দমদি মথংগী চহি ২-৩ অসিদা ঐখোয়গী শহরশিং অসিবু চীংগুম্না ৱাংদুনা লৈরিবা অমোৎ-অকাই অসি লৈহনদবা অমসুং মখোয়বধ গ্রিন জোনশিংদা ওন্থোকপা অসিনি।
মসিগীদমক রাজ্য সরকারশিংদা পীবা য়াবা মতেং পুম্নমক পীরি। ২০১৪গী চহিদা লৈরম্বা অদুগা চাংদম্নবদা হৌজিক লৈবাক অসিগী অর্বান ৱেস্ত দিস্পোজেলগী কেপাসিতী অসি শরুক ৪ হেনগৎপা ঙম্বা অসিসু অফবা ৱাফম অমনি। সিঙ্গল য়ুজ প্লাস্তিক লৈহনদনবা লৈবাক অসিগী বোদী ১৬০০ হেনবদা মেতরিএল রিকভরী ফেসিলিতী লৈহল্লি। মথংগী চহি খরা অসিদা লৈবাক অসিগী শহর খুদিংমক্তা অসিগুম্বা সিস্তেম অমা শাবা হায়বা অসি ঐখোয়গী পান্দমনি। অসিগুম্বা মোদর্ন সিস্তেমশিং অসিনা ভারতকী শহরশিংদা কর্ক্যুলর ইকনোমীদা অনৌবা শক্তিসু পীরি।
মরুপশিং,
লুনানবা শহর অমদগী অতোপ্পা অনৌবা ওইথোকপা য়াবা অমসু থোরকই। মসি তুরিজমগী অনৌবা ওইথোকপা য়াবা অমনি। ঐখোয়গী লৈবাক অসিদা পুৱারীগী ওইবা মফম নত্ত্রগা শেংলবা লাইফমলেন লৈতবা শহর অমত্তা লৈতে। অৱাৎপা লৈরিবা অসি লুনানবা অসিদনি। শহরশিংনা লুনাল্লবা, অতোপ্পা মফমশিংদগী মীয়াম্না মফম অদুদা লাক্নীংবা ফাওই, মীওই কয়ানা মফম অদুদা লাক্কনি। হৌজিক্তি মীওই কয়না ইন্দোরদা লুনাননা থম্নবা পাইখৎখিবা থবক অদু য়েংনবগীদমক লাক্নরি। লুনাননা লৈরবা মতমদা, তুরিজম লৈরক্কনি, অনৌবা ইকনোমী অমা হৌরক্কনি।
মরুপশিং,
হন্দক্তা ইন্দোরনা ৱাতর প্লসকী মাইপাকপা ফংবা ঙমখি। মসিনসু অতোপ্পা শহরশিংদা তুং ইন্নবা লম্বী তাক্লিবা থবক অমা ওইরি। শহর অমগী ঈশিংগী হৌরকফমশিং অদু লুনাল্লবদি, ইরম-খোঙলমগী অমোৎপা ঈশিং অদুনা মদুদা চেনথরোই, মতম অদুদা শহর অদুদা তোখাইবা হিংবগী ইনর্জী অমা লাকই। ভারতকী অতোপ্পা শহর কয়া ৱাতর প্লস ওইহন্নবা সরকার অসিনা খোঙথাং লৌখৎলি। মসিগীদমক স্বচ্ছ ভারত মিসনগী অনিশুবা ফেজতা অখন্নবা মীৎয়েং চংলি। ম্যুমীশিং লাখ অমদগী তাবা নিসিপাল বোদীশিংদা ৱেস্ত ৱাতর ত্রীৎমেন্ত তৌনবগী ফেসিলিতীশিং হেনগৎহনখ্রে।
ইচিল-ইনাওশিং,
সমস্যাশিং মশক খঙদোক্তুনা থমোয় শেংনা হোৎনরিবদি শোইদনা অহোংবা পুরকপা ঙমগনি। ঐখোয়গী থাওগী খোঙ অমত্তা লৈতে, পেত্রোলিয়মগীদমক মপালদগী পুশিল্লক্তুনা মীপাল তাংলি, অদুবু ঐখোয়দা চহি কয়া চৎকদবা ইথানোল. বাইওফ্যুএল শুংনবা রিসোর্সশিং লৈ। মসিগী তেক্নোলোজী অসি থোরকপা চহি য়াম্লে। ঐখোয়গী সরকার অসিনা তেক্নোলোজী অসি শীজিন্নবদা অহেনবা মীৎয়েং চংখি। চহি ৭-৮গী মমাংদা ভারত্তা ইথানোল ব্লেন্দিং তৌবা অসি শধম্নবগী ১%, ১.৫% অমসুং ২% অসিগী হেনগৎপা ঙমখিদে। ঙসি পেত্রোলদা ইথানোল ব্লেন্দি তৌবা অসিগী চাং ৮%রোমগী ময়া য়ৌরক্লি। হৌখিবা চহি তরেৎ অসিদা ইথানোল ব্লেন্দিংগী সপ্লাই অসিসু চাউনা হেনগৎলকখি।
২০১৪গী মমাংদা লৈবাক অসিদা ব্লেন্দি তৌনবা থানোল লির করোর ৪০রোম সপ্লাই তৌরমখি। অদুবু ঙসিদা ভারত্তা ব্লেন্দি তৌনবা থানোল লির করোর ৩০০ হেন্না সপ্লাই তৌবা ঙম্লে। লিতর করোর ৪০দগী লিতর করোর ৩০০ য়ৌবা ঙম্লে! মসিনা সুগর মিলশিং অমসুং লৌমীশিংদা চাউনা মতেং পাংলি।
মরুপশিং,
অতোপ্পা হীরমনা চরুগী মতাংদনি। ঐখোয়গী লৌমীশিংনা চরুখোক্কী মতাং অসিনা অৱাবা পীরি অমসুং মসিনা শহরশিংদা লৈরিবা মীয়ামদসু অৱাবা পীরি। ঐখোয়না বজেৎ অসিদা চরুখোক্কা মরী লৈনবা মরু ওইবা ৱারেপ অমা লৌখি। কোলদা য়ুম্ফম ওইবা ইলেক্ত্রিসিতী প্লান্তশিংনা পরালি নত্ত্রগা চুরুখোক শীজিন্নরগনি হায়না ৱারেপ লৌখি। মসিনা লৌমীশিংগী অৱাবশিং কোকহনবা খক্তা নত্তনা এগ্রি-ৱেস্ততগী লৌমীশিংদা অহেনবা শেন্থোকসু ফংহল্লগনি।
মসিগা মান্নবা মওংদা, ঐখোয়না সোলর ইনর্জী-সোলর পাৱরগী মতাংদসু চাউনা খেন্নবা কয়া মমাংদা উবা ফংখ্রে। ২০১৪দগী হৌনা ঐখোয়গী সরকারা লৈবাক অসিদা সোলর পাৱর পুথোকপা হেনগৎহন্নবা কেম্পেন অমা হৌদোকখি। মসিগী ফল ওইনা ঙসি ভারতনা সোলর পাৱরদগী ইলেক্ত্রিসিতী পুথোকপগী হীরমদা মালেমগী মকোক থোংবা লৈবাক ৫গী মনুংদা মফম কনবা ঙমহনখি। মসিগী সোলর পাৱরগী শক্তি অসিগী লোয়ননা ঐখোয়গী সরকারনা লৌমীশিংবধ অন্নদাতা ওইবগা লোননা ইনর্জী প্রোভাইদরসু ওইহল্লি। লৈবাক অসিদা লৈরিবা লৌমীশিংদা সোলর পম্প লাখ কয়াসু পীথখ্রে।
ইচিল-ইনাওশিং,
ঙসি ভারতনা তেক্নোলোজী অমসুং ইন্নোবেসনগা লোয়ননা মাইপাকপা ঙম্লিবা খুদিংমক অসিদা ভারত মচাশিংনা কন্না হোৎনখিবগী খুৎ য়াওরি। মরম অসিনা ঙসি ভারতনা গ্রিন অমসুং ক্লিন ফ্যুচর অমগীদমক অচৌবা পান্দমশিং থম্বা ঙমলি। ঐখোয়গী নহারোল, ঐখোয়গী ইচে-ইচল, ঐখোয়গী সফাই কর্মচারি লাক-লাখ অসিদা লেংদ্রবা থাজবা থমদুনা ঐখোয়না মাংদা চংশিল্লি। ভারতকী নহারোলশিংনা অনৌবা তেক্নোলোজী, অনৌবা ইন্নোবেসন লোয়ননা পব্লিক এৱেরনেসতা মরু ওইবা থৌদাং অমা লৌরি।
ইন্দোরগী ৱাখল লৈবী ইচে-ইচলশিংনা গর্বেজ মেনেজমেন্ত অসি তোপ-তোপ্পা থাক অমা পুখৎপা ঙমখি হায়না ঐঙোন্দা খঙহনবীরকখি। ইন্দোরগী মীয়াম্না অমোৎ-অকাই অসি শরুক ৬ থোক্না খাইদোকই, অসুম তৌদুনা ৱেস্ত প্রোসেসিং অমসুং রিসাইক্লিং নীংথিনা তৌবা য়াহল্লি। শহর অম হেক্তগী মীয়ামগী মসিগী ৱাখল্লোন, মসিগী খোঙথাং অসিনা স্বচ্ছ ভারত অবিয়ান অসি মাইপাকপা অমা ওইহনবদা মতেং পাংলি। লুনানবগা লোয়ননা রিসাইকল তৌবগী ভেল্যুশিং অসি এম্পাৱর তৌবনা লৈবাক অসিগীদমক অচৌবা শেবা অমা তৌবা ওইগদৌরিবনি। মসি এল.আই.এফ.ই.গী ফিলোসোফী অদুনি, লাইফস্তাইল ফোর এনভাইরনমেন্ত, পুন্সি মহিংগী মওং অদুনি।
মরুপশিং,
ঙসিগী প্রোগ্রাম অসিদা ঐখোয়না ইন্দোর য়াওনা লৈবাক অসিগী সফাই কর্মচারি লাখ কয়াদা তৌবীমল খঙবা উৎচরি। ইংথমথা ওইগেরা, কালেন ওইগেরা মখোয়না অয়ুক ঙন্না হৌগৎতুনা অদোমগী শহর অসি লুনাননা থম্মি। কোরোনাগী ৱারবা মতমদা অদোম্না তৌখিবা শেবা অসিনা মীওই কয়াগী পুন্সি কনবা ঙমখি। লৈবাক অসিনা সফাই কর্মচারি ইচিল-ইনাও খুদিংমক্কী লমন তোল্লি। ঐখোয়গী শহরশিং লুনাননা থমদুনা, অমোৎ-অকাই চাইথোকহনদনা, কাংলোনশিং ঙাক্না চৎতুনা ঐখোয়না মখোয়গী মতেং পাংবা য়াগনি।
ঐহাক্না নীংশিংলি, প্রয়াগরাজতা কুম্ভ মনুংদা মালেমগী ওইনা অহানবা ওইনা, ভারতকী কুম্ভ মেলানা অনৌবা মশক অমা তাকপা ঙমখিবা অদোম্না উবীরমগনি। মমাংদা কুম্ভ মেলা হায়রগা ঐখোয়গী ঋসি অমসুং মহাত্মাশিং, মখোয়গী ওইবা ৱাফম ওইনা তৌরমখি। অদুবু হন্দক্তা অহানবা ওইনা উত্তর প্রদেশতা য়োগীজীগী লুচিং মখাদা প্রয়াগরাজতা পাঙথোকখিবা কুম্ভ অসি স্বচ্ছ কুম্ভ হায়না মশক খঙখি। মালেম শিনবা থুংনা মসিগী মতাংদা খন্ন-নৈনখি। মালেমগী পাউচেশিংদা মহাক্কী মতাংদা ইখি। মসিনা ৱাখলদা অফবা মঙাল অমা পীরি। ঐহাক্না কুম্ভ মেলাদা স্নান তৌবা চৎলুরগা হল্লকপা মতমদা সফাই কর্মচারিশিংদা তৌবীমল খঙবা উৎপা ওইনা ঐখোয়না মসিগী সফাই কর্মচারিশিংগী মখোয় হাম্বীখি। মহাক্না ইকাই খুম্নবা ফংখি। মঙোন্দগী ঐহাক্না থৌজাল ফংখি।
ঙসি দিল্লীদগী ঐহাক্না ঐহাক্কী সফাই কর্মচারিশিং, ইন্দোরগী ইচিল-ইনাওশিংদা ঐখোয় খুম্নবা উৎচরি। ঐহাক্না ইকোক নোনজরি। কোরোনাগী মতম অসিদা নখোয়না লুনানবগী কেম্পেন অসি মখা চত্থরমদবা তারবদি ঐখোয়না অনৌবা অৱাংবা কয়া অমা মায়োক্নরম্বসু য়াই। লৈবাক অসিগী মীচম প্রজাবু কনবীখিবদগীদমক, দোক্তরদা চৎপগী মথৌ তাহনখিদবগীদমক ঐহাক্না নখোয়বু ইকাই খুম্নবা উৎচরি।
ইচিল-ইনাওশিং,
মসিগা লোয়ননা ঐহাক্না তেনশিনজগে। অমুক্কা হন্না ইন্দোরগী প্রজা পুম্নমক, মরু ওইনা ইন্দোরগী ইমা-ইবেল অমসুং ইচে-ইচলশিংবু থাগৎপা ফোঙদোকচরি মরমদি থবক অসি পাইখৎপগী থৌশিলদা অমোৎ-অকাই পুম্নমক হুন্দোক্তনা মখোয়বু সেগ্রিগেৎ তৌবদা ঐখোয়গী ইমা-ইবেল অমসুং ইচে-ইচলশিংনা থৌদাং লৌখি। য়ুমদা অমোৎ-অকাই চখাইবা তৌহনদবা ওফিসর অমসুং অঙাংশিংগী আর্মী লৈখি। ঐহাক্কী বাল সেনানা ভারত শিনবা থুংনা লুনানবগী কেম্পেন অসি চত্থবদা ঐঙোন্দা চাউনা মতেং পাংখি। চহি অহুম-মরিগী অঙাংনা মখোয়গী মধৌশিংদা অমোৎ-অকাই চখাইদনবা হায়খি। চোকলেৎ চারবদু মফম চাদনা হুন্দোকপা তৌখিদে। বাল সেনানা তৌরিবা থবক অসি ঐখোয়গী তুংলমচৎকীদমক থোল্লিবা য়ুম্ফম অসি চেৎশিলহল্লি। ঙসি ঐহাক্না থমোয় শেংনা মখোয় পুম্নমকপু থাগৎপা ফোঙদোকপা লোয়ননা বাইও-সি.এন.জি. প্লান্তগীদমক ময়ামদা নুংঙাইবা ফোঙদোকচরি!
হন্না-হন্না থাগৎচরি! খুরুমজরি!
