কেন্দ্র মন্ত্রী শ্রী গজেন্দ্র সিংহ সেখাৱত জী, রাও ইন্দ্রজিত সিংহ, এল. মুরুগন জী, অমদি থৌরমসিগী মরুওইবা পুক্নিং চিংশিনফম ওইরিবা, অইবা সীনি বিস্বানাথন জী, পব্লিসর ভি স্রিনিভাসন জী, মফমসিদা লেঙশিনবিরিবা মীথুং পুম্নমক, ইবুংঙো অমদি ইবেম্মশিং…
ঙসি লৈবাক অসিনা মহাকবি সুব্রমনিয়া ভারথীগী মপোক কুমওন থৌরম পাঙথোক্লি। ঐনা সুব্রমনিয়া ভারথীগী মফমদা ইকায়খুম্নবগা লোয়ননা ইকোক নোঞ্জরি। মহাক্কী মফমদা শ্রদ্ধাঞ্জলি কৎচরি। ঙসি অসি ভারতকী নাৎ অমদি লোইনসিল্লোনগী, ভারতকী নীংতম ঈহৌগী নীংশিং মমিশিংগী, অমদি তামিল নাদুগী চাউথোকচনিংঙাই ওইবা ৱাফমশিংগী অচৌবা থৌরম অমনি। মহাকবি সুব্রমনিয়া ভার্থীগী খুৎইশিং, মহাক্না ইরম্বশিং ফোঙদোকপা হায়বসি অচৌবা থৌগল অমনি, অচৌবা থৌরাং অমা ঙসি মপুং ফাররে। ভোল্যুম ২১দা ফোঙলিবা ‘কালবরিসাইয়িল ভার্থিয়ার পদপ্পুগল’গী কম্পাইলেসন অসি দেকেদ ৬ চোকথবা নাইদনা হোৎনরকপগী থৌনাদুনি, মসি তোপ্পা তোপ্পা, ওইরক্কনি খন্নরুদবা অমনি। সীনি বিস্বনাথন জীগী অসিগুম্না কত্থোকপা, পুক্নিং লুপ্পা, হোৎনবা কন্বা অসিদগী তুংগী মীরোলশিংনা কান্নবা কয়া ফংগনি হায়না ঐনা চপ চানা থাজৈ। করিগুম্বা মতমদা, ঐখোয়না ৱন লাইফ, ৱন মিসন হায়বা ৱাহৈ তাখিবা য়াওরম্লগনি। অদুবু সীনি জীনা ৱন লাইফ ৱন মিসন হায়বসি হকথেংননা উরবনি। মসি অচৌবা ফিরেপ অমনি। মহাক্না হোৎনরিবশিং অসিনা ঐহাকপু মহা-মহোপধ্যায় পন্দুরং বমন কানেগী মরমদা নীংশিংহল্লি। মহাক্না চহি ৩৫ ধর্মসাস্ত্রগী পুৱারী ইবদা লেনখি। সীনি বিস্বনাথন জীগী খুৎই অসিনা একাদমিক তাইবংগী বেঞ্চমার্ক অমা ওইরক্কনি হায়না ঐনা থাজৈ। ঐনা বিস্বনাথন জী, মহাক্কী খোঙলোয় পুম্নমক অমদি ময়াম পুম্নমকপু পাঙথোকপিরিবা থৌদাং অসিগীদমক নুংঙাইবা ফোঙদোকচরি।
মরুপশিং,
“কালবরিসাইয়িল ভার্থিয়র পদপ্পুগাল” গী ভোল্যুম ২৩ অসিদা ভার্থিয়রগী কম্পোজিসনখক্তা নত্তনা মহাক্কী লোইনসিল্লোনগী বেকগ্রাউন্দ ইনফোর্মেসন অমসুং ফিলোসোফিকেল এনালাইসিসসু য়াওরি হায়না ঐঙোন্দা পাউদম্লকই। ভোল্যুম খুদিংদা কম্মেন্তরী অমসুং দেস্ক্রিপ্সন য়াওরি। মসিনা ভার্থিয়রগী ৱাখল্লোন মনুং হুৎনা খঙবদা, মতমদুগী মরমদা মমুৎ তানা খঙবদা য়াম্না চাউনা মতেঙ ওইগনি। অদুগা কম্পাইলেসসন অসিনা রিছর্চ স্কোলার অমসুং স্কোলারশিংদসু চাউনা কান্নহনগনি।
মরূপশিং,
ঙসি অসি গীতা জয়ন্তীগী শেংলবা থৌরমসু তারি। শ্রী সুব্রমনিয়া ভার্তি জীনা গীতাদা চেৎনা থাজরম্মি, অমদি মহাক্না গীতাগী মরমদা লৈরিবা ৱাখল লৌশিং য়াম্না য়াম্মি। মহাক্না গীতাবু তামিলদা হন্দোক্লম্মি অমসুং মসিগী মরমদা ইচম চম্না অমদি লায়না তাক্লম্মি। য়েংবিয়ু, ঙসি অসি গীতা জয়ন্তীনি, সুব্রমনিয়া ভারতী জীগী মপোক কুমওনসুনি, অদুগা মহাক্কী খুৎইশিং ফোঙবগী নুমিৎসু তারি, ফীভমসি ত্রিবেনী সঙ্গম অমগুম্বনি। থৌরম অসিগী খুত্থাঙদা ঐহাক্না ময়াম পুম্নমক অমদি লৈবাক মীয়ামগী মফমদা গীতা জয়ন্তীগী য়াইফ পাউজেলসু পীজরি।
মরূপশিং,
লৈবাকসিদদি, ৱাহৈ অমা হায়বসি শুপ্নতগী ৱাখল্লোন ফোঙদোক্নবগী পাম্বৈ অমখক ওইদে। ঐখোয় ‘সব্দ ব্রহ্মা’, ৱাহৈগী লোইনাইদ্রবা মতিক্কী মরমদা ৱারী শানবা কলচর অমগী শরুক্নি। মরম অদুননি মুনি রিশিশিংগী ৱাহৈশিং অসি মখোয়গী ৱাখল্লোন ফোঙদোকপখক্তা ওইদ্রিবসি। মখোয়গী ৱাহৈশিং অসি মখোয়না খল্লিবা ৱাখল্লোনগী মমিনি, মখোয়না থেংনরকপপশিং অমসুং মখোয়গী ফিরেপশিংগী ইহুলদুনি। অসিগুম্বা তোপ তোপ্পা মীওইশিংসিগী ৱাংউলোনশিং অসিবু ইশাদা চুশিনহন্দুনা অমদি তুংগী মীরোলগীদমক ঙাক শেন্দুনা থম্বা হায়বসি ঐখোয়গী ইথৌনি। ঙসি অসিগুম্বা খোমজিন্বা লাইরিক অমা হায়বসি মতমসিগী ওইনা য়েংবদা ঐখোয়গী চৎনবীদা মরী লৈনবগুম অদুক্কী মতিক মরু ওই। খুদম ওইনা, ঐখোয়বু প্রভু ব্যাসনা ইরম্বা খুৎই কয়াগীদমক শকখঙনরি। মহাক্কী ৱাহৈশিং অসি ঙসি ফাওবা ঐখোয়দা ঙসি ফাওবা ইথিল পীদুনা লৈরি মরমদি মখোয়দু পুরানগী মওংদা ইরম্বনি। মতৌ অসুম্না স্বামী বিবেকানন্দকী মপুং ফাবা খুৎইশিং, দোক্তর বাবাসাহেব অম্বেদকরগী খুৎই অমদি ৱারোলশিং, দীন দয়াল উপধ্যায়গী সম্পুর্ন বংময়নচিংবা কুইদ্রিবা মতমগী খোমজিনবশিংনা ঐখোয়গী খুন্নাই অমদি একাদমিয়াদা কান্নবা পীরি। ‘তিরুক্কুরাল’ বু তোঙান তোঙানবা লোলশিংদা হন্দোক্নবা থবকসু পায়খৎলি। মমাঙ চহিদা, ঐ পপুা নিউ গীনীদা চৎলুই, মফমদুদা ‘তিরুক্কুরাল’ লমদমদুগী তোক পিসিন লোলদা হন্দোক্তুনা ফোঙবগী তাঞ্জা ফংখি। মমাঙদা, লোক কল্য়ান মার্গ অসিদা ঐনা ‘তিরুক্কুরাল’ গুজরাতী লোলদা হন্দোক্তুনা ফোঙজখি।
মরূপশিং,
সুব্রমনিয়া ভারতী জী লৈবাক্কী মথৌ তাবশিং পুক্নিংদা থম্লগা থবক তৌবা ৱাখল মুন্না খন্বা মীওই অমা ওইরম্মি। মহাক্কী মীৎয়েঙ য়াম্না পাক চাউরম্মি। মহাক্না মতমদুদা লৈবাকসিনা মথৌ তাবা মায়কৈ খুদিংদা থবক তৌরম্মি। ভারতীয়র অসি তামিল নাদু অমসুং তামিল লোলগী লন অমখক্তা নত্তনা, ইমা ভারতীগী থৌগলদা মহাক্কী নীংশা খুদিং কত্থোক্লম্বা মীশক অমনি। ভারতনা খুমাঙ চাওশিল্লকপা, ভারতনা চাউথোকচবা হায়বসিনা মহাক্কী মঙলান ওইরম্মি। ঐখোয়গী লৈঙাক্না ভারতিয়র জীনা লৌরম্বা থৌদাংশিংবু ইথৌমক্নি খন্দুনা মীয়ামগী মফমদা হেক য়ারিবমখৈ পুথোক্নবা কন্না হোৎনখি। ২০২০ দা, মালেম পুম্বা কোবিদ লাইচৎনা অৱাবা তাহনখি, অদুবু ফীভমদু লৈরগসু, ঐখোয়না সুব্রমনিয়া ভারতী জীগী লৈখিদবগী ১০০ শুবা কুমওন থৌরম চাউনা পাঙথোকখি। ঐ ইশামকসু ইন্তরনেস্নেল ভারতী ফেস্তিবেলদা শরুক য়াজখি। লৈবাকসিগী লাল কিলাগী মথক্তা ওইরবসু নৎত্রগা মালেমগী অতৈ লৈবাকশিংদা ওইরবসু, ঐহাক্না লেপ্পা লৈতনা ভারতকী মঙলানবু মালেম পুম্বদা মহাকবি ভারতীগী ৱাখল্লোনশিংগী খুত্থাঙদা পুথোক্তুনা লাক্লি। অদুগা হৌজিক সীনি জীনা হায়বিখিবদা, ঐনা চৎলুবা মালেমগী মফম অমা হেক্তদা, ঐনা ভারতী জীগী মরমদা ৱারী শানৈ, অমদি মদুগীদমক সীনি জীনা থাগৎপিরি। অদোমসু খঙবিরমগনি, ঐখোয়গী কাসী অসিসু সুব্রমনিয়া ভারতী জী অমসুং ঐগী মরক্তা লৈবা থৱায় পান্বা মরী অমনি। মহাক্না ঐগী কাসিগা লৈনরিবা মরী, মহাক্না কাসিদা লেল্লম্বা মীৎকুপশিংনা কাসিগী পারী পুরীগী লনগী শরুক অমা ওইরে। মহাক্না কাসিদা ৱাখল লৌশিং তানশিন্নবা লাকখি, অমসুং মফমদুদা মতম পুম্বা লৈখি। মহাক্কী ইমুংগী মীওই কয়া হৌজিকসু কাসিদা লৈরি। মখোয়গা পাউ ফাউনদুনা লৈবা ফংজবা ঐগীদমক্তা লাইবক ফবনি। ভারতীয়রনা মহাক্কী নীংথিরবা কোই অদু কাসিদা লৈরিঙৈদা খাক্তুনা থম্নিংবগী ইথিল ফাওরকখিবনি হায়নৈ। ভারতিয়রনা মহাক্কী খুৎই কয়া কাসিদা লৈরিঙৈ, গঙ্গা তুরেল তোর্বান্দা ইরম্বনি। মরম অদুনা, ঙসি, কাসিগী এম.পই. ওইনা ঐহাক্না মহাক্কী ৱাহৈশিং খোমজিনবগী শেংলবা থবক অসিবু তরাম্না ওকচরি অমদি নুংঙাইবা ফোঙদোকচরি। BHU দা মহাকবি ভারতিয়রনা লৌরম্বা থৌদাংশিংদা কত্থোকপা চেয়র অমা লিংখৎখিবা অসি ঐখোয়গী লৈঙাক্কী লাইবক ফবনি।
মরূপশিং,
সুব্রমনিয়া ভারতীগুম্বা অথোইবা মীওই অমা হায়বসি চহিচা অমদা অমুকখক্তমক লাকই। মহাক্কী ৱাখল্লোন, মহাক্কী লৌশিং, মহাক্কী মায়কৈ কয়া লোংবা মীওই মীতৌনা ঙসিসু মীপুম খুদিংবু ঙকহল্লি। পুন্সিগী শুপ্নতগী চহি ৩৯দা, ভারতী জীনা ঐখোয়দা কয়ামুক য়াম্না পীবিরম্বগে হায়ববু, স্কোলারশিংনা মদুগী মরমদা তাকপদা মপুন্সি চুপ্পা কোন্নরি। মহাক চহি ৩৯খক লৈরম্বদা চহি ৬০গী থবক তৌরম্মি। মহাক্না অঙাং ওইরিঙৈদা, মহাক্না শান্নবা অমদি মহৈ মশিং তম্বা মতমদা, মহাক্কী মফমদা মরৈবাক নীংবগী ইহুল ফাওরকখি। নাকল অমদা, মহাক লাইনিং লম্বী থিরম্বা মীওইনি, অদুগা নাকল অমরোমদনা, মহাক মতমগী য়াওলবুসু শৌগৎলম্বা মীওইনি। মহাক্কী খুৎইশিংদা মহৌশাবু নুংশিবা, অমসুং হেন্না ফবা তুংলমচৎ অমগীদমক পুক্নিং থৌগৎনবগী মমি তাই। নীংতম ঈহৌ মতমদা, মহাক্না নীংতম্বা তাল্লম্বতা নত্তনা, ভারতকী মীয়ামগী পুক্নিংদা নীংতম্বগী য়াকাইরোলসু শক্লম্মি। মসি অচৌবা থৌদাং অমনি। মহাক্না লৈবাক মীয়ামদা হায়রম্মি, ঐ তামিল লোন্দা ঙাংনবা হোৎনবনি, অখঙ অহৈ ময়াম্না ঐগী ৱাহৈ ৱাতা শোয়রকপদা ঙাকপিয়ু হায়না মহাকবি ভারতিয়রনা হায়রম্মি।
এনু তনিয়ূম্, ইন্দ সুদন্তির, দাগম্। এনু মদিয়ূম্ এঙ্গত্থ্ অদিমৈয়িন্মোগম্।
ৱাহন্থোক্তি, নীংতম্নিংবগী ইখৌলাংলিবা অসি করম্বা মতমদা কোক্কনি? ঐখোয়না মীনাই নাইথাংদা হিংনিংবগী অপাম্বা করম্বা মতমদা লোইগনি? মতমদুদা, মীনাই নাইথাংদা হিংবা হৈনরবা মীওইশিংদুনা মহাকপু চৈবিরম্মি। মীনাই নাইথাংদা হিংনিংবগী অপাম্বা করম্বা মতমদা লোইগনি? হায়রিবা ৱাহং অসি মশা মথন্তা ৱাহং হংজবগী মথৌনা লৈবা অমদি মায় পাকপগী থাজবা লৈবা মীওইখক্তনা হংবা ঙমগনি। মসিনি ভারতিয়রগী তোপ তোপ্পা শক্তম। মহাক্না হায়নিংবা হায়বগী মতৌ লৈরম্মি, মহাক্না খুন্নাইদা মায়কৈ তাক্লম্মি। মহাক্না জর্নেলিজমগী লমদা থবক নীংথিনা তৌরম্মি। ১৯০৪ দা, মহাক্না তামিল পাউচে স্বদেসমিত্রন্দা য়াওরম্মি। অদুদগী ১৯০৬ তা মহাক্না অঙাংবা চেদা ইন্দিয়া কৌবা চয়োলগী পাউচে অমা নম্বা হৌরকখি। মদুনা তামিল নাদুগী অহান্বা রাজনিতীগী কার্তুন ফোঙবা হৌখিবা পাউচেনি। ভারতী জীনা খুন্নাইবু অশোন্বা অমদি চাকথুং ফিথুংদ্রবা মীওইশিংগী মতেঙ পাংবিনবা পুক্নিং থৌগৎলম্মি। মহাক্কী শৈরেংশিংগী খোমজিন্বা কন্নন পত্তুদা, মহাক্না প্রভু কৃষ্ণবু শাইওন ২৩দা ফোঙদোক্লম্মি। মহাক্কী শৈরেংশিংগী মনুংদা অমদা, মহাক্না লায়রবা ইমুংশিংগী খ্বায়দগী খুদোংচাদ্রবা মীওইশিংগীদমক ফিরোল খুদোল ওইনা নিরম্মি। মতৌ অসুম্না, মহাক্না কত্থোকপা ঙম্বা মীওইশিংগী মফমদা পাউজেল অমা চেনখি। লৈত-লায়রদা মতেঙ পাংবগী পুক্নিং থৌগৎনিংঙাই ওইরবা মচাকশিংনা থল্লবা মহাক্কী শৈরেংশিংনা ঙসিসু ঐখোয়বু পুক্নিং থৌগৎপা লেপত্রি।
মরূপশিং,
ভারতিয়র মহাক্কী মতমগী মাঙওইননা উবা ঙম্বা অমমদি তুংলমচৎপু মুন্না খঙলম্বা মীওই অমা ওইরম্মি। মতমদুদা ফাওবা, খুন্নাইদা খুদোংচাদবা ৱাফম কয়ানা থন্বা মতমদা, ভারতিয়রনা নহা অমসুং নুপীশিং মপাঙ্গল হাপ্পদা কন্না শৌগৎলম্মি। ভারতিয়রনা সাইন্স অমসুং ইনোভেসন্দা চেৎনা থাজরম্মি। মতমদুদা, মহাক্না অরাপ্পা হন্থহন্দুনা লৈবাক পুম্বা শম্নহনগদবা ঈ-পাউ ফাওনবগী মওং অমগী পুক্নিং চিংশিল্লম্মি। ঙসি ঐখোয়না উরিবা তেক্নোলোজী অসি মতমদুদা ভারতিয়র জীনা ৱা কাঙথোক্লম্লবনি। মহাক্না হায়রম্মি –
কাসী নগর, পুলৱর পেসুম, উরৈ তান্। কাঞ্চিয়িল, কেতপতকৌর, করুৱি চেব্য়োম।
মসিনা হায়রিবদি, বনারসতগী লম্বোইবা অমনা হায়রিবা ৱাহৈশিং অদু কাঞ্চিদা ফম্লগা তাবা য়াবা খুৎলায় অমা লৈহনগদবনি। ঙসি হায়রিবা মঙলান অদু মতৌ করম্না দিজিতেল ইন্দিয়ানা অশেঙবা ওইহন্বগে হায়বা ঙসি ঐখোয়না উরি। ভাসিনী গুম্বা এপশিংনা লোলগী পল পুম্বা নমখায়খ্রে। ভারতকী লোল খুদিংগী ইকায়খুম্নবগী ৱাখল্লোন অমা লৈরবা মতমদা, ভারতকী লোল খুদিংমক্কী চাউথোকচনিংঙাই ওইরক্লবা মতমদা, ভারতকী লোল খুদিংমক ঙাক শেন্দুনা থম্নবগী অফবা ৱাখল্লোন লৈরক্লবা মতমদা লোল খুদিংগী থবক পায়খৎপা মপুং ফাগদৌরিবনি।
মরূপশিং,
মহাকবি ভারতীগী লোইনসিল্লোনশিং অসি মালেমগী খ্বায়দগী লিরবা লোল তামিলগী লন অমগুম্বনি। ঐখোয়গী তামিল লোলনা মালেমগী খ্বায়দগী লিবা লোল ওইবসিদা ঐখোয় চাউথোকচৈ। ঐখোয়না মহাক্কী লোইনসিল্লোনবু শন্দোকপা মতমদা তামিল লোলগী থৌগলসু তৌগদৌরিবনি। ঐখোয়না তামিলগী থৌগল তৌবা মতমদা লৈবাকসিগী খ্বায়দগী লীবা লনগী থৌগলসু তৌগদৌরিবনি।
ইচিল ইনাওশিং,
হৌখিবা চহি ১০ সিদা, লৈবাক অসিনা তামিল লোলগী চাউথোকচনবা থবক কয়া পুক্নিং লুপ্না পায়খত্তুনা লাক্লি। ঐহাক্না তামিলগী চাউথোকচনিংঙাই ওইবা ৱাফমবু মালেম পুম্বগী মাঙদা য়ুনাইতেদ নেসন্সতা পুথোকখ্রে। ঐখোয়না মালেম শিন্বা থুংনা তিরুবল্লবর কলচরেল সেন্তরশিং লিংখৎকনি। এক ভারত শ্রেস্থ ভারতকী ৱাখল্লোন অসিদা সুব্রমনিয়া ভারতীগী ৱাখল্লোনশিংগী মমি তারি। ভারতিয়রনা মতম পুম্বদা লৈবাকসিগ নাৎ কয়া শম্নহন্নবগী ৱাখল্লোন মপাঙ্গল কনখৎহল্লম্মি। ঙসিসু, কাসী তামিল সঙ্গমম অমসুং সৌরাস্ত্র তামিল সঙ্গমমগুম্বা থৌরমশিংনা হীরমসিদা থবক পায়খৎলি। মসিনা লৈবাক পুম্বগী মীওইশিংদা তামিলগী মরমদা খঙনিংবগী লাংতক্নবা হেনগৎহল্লি। তামিল নাদুগী নাৎপুসু য়োকখৎলি। লৈবাকসিগী মীওই খুদিংমক্না লৈবাকসিগী লোল খুদিংবু মখোয়গী লোলনি হায়না খন্নবা, ভারত মচা খুদিংনা লোল খুদিংগীদমক চাউথোকচনবা ফিরেপ ঐখোয়না লৌগদবনি। তামিল গুম্বা ভারতকী লোলশিং য়োকখৎনবগীদমক, ঐখোয়না নহাশিংদা মখোয়গী মমা লোলদা হাইয়র এজুকেসন তম্নবা খুদোংচাবা পীরে।
মরূপশিং,
ভারতী জীগী খুৎইশিংগী খোমজিন্বা অসিনা তামিল লোল য়োকখৎনবা ঐখোয়না হোৎনরিবশিং অসিদা ইনোৎ হাপকনি হায়না ঐনা থাজৈ। ঐখোয় পুন্না চাওখৎপা ভারতকী পান্দম ফংমিন্নগনি অমদি ভারতিয়রগী মঙলান মঙফাওনহনগনি। ঐনা অমুক্কা হন্না ময়াম পুম্নমক্কী মফমদা খোমজিনবা অসি ফোঙবগী থৌরমসিদা নুংঙাইবা ফোঙদোকচরি। পুন্সিগী তাঙ্কক অসিদা তামিলদা লৈবা ফংজবা, অমদি দিল্লীগী অইংবা মরক্তা খোঞ্জেল থোক্না লাউখিবা, মহাক্কী পুন্সি কয়াদা পুক্নিং লুপ্না হিংলমগদগে হায়বা মহাক্কী খুৎইশিংদা য়েংবিয়ু। মহাক্কী খুৎই য়াম্না ফজৈ। চহি মতাঙসিদা ঐখোয়দি খুৎয়েক পীনবা হোৎনবদা খুৎ নিকই। মসি তশেংবদি অদোমগী পুক্নিং লুপচবা, অদোম্না চপ য়ুংনা লেপ্পদুগী মওংদুনি। ঐনা অদোমগী মফমদা অদোমগী কত্থোকচবদুগীদমক ইকায়খুম্নবা উৎচরি। ময়ামগী মফমদা বন্নকম, ময়ামবু ঙমখৈ লৈতনা থাগৎচরি!
