হর হর মহাদেব! জয় শ্রী মহাকাল, জয় শ্রী মহাকাল মহারাজকী জয়! মহাকাল মহাদেব, মহাকাল মহা প্রভো। মহাকাল মহারুদ্র, মহাকাল নমোস্তুতে। উজ্জৈনগী শেংলবা লমদম অসিদা য়াইফরবা থৌরম অসিদা শরুক য়ারিবা লৈবাক শিনবা থুংবদগী লাক্লিবা চরন-বন্ধ্য সন্তশিং, ইকাই খুম্নরবা ঋসিশিং অমসুং সন্যাসীশিং, মধ্য প্রদেশকী রাজ্যপাল শ্রী মঙ্গুভাই পতেল, ছতীসগরগী রাজ্যপাল ইচল অনুস্যুয়া উইকেজী, ঝারখন্দগী রাজ্যপাল শ্রী রমেশ বৈন্সজী, মধ্য প্রদেশকী মুখ্য মন্ত্রী ভাই শিবরাজ সিংহ চৌহানজী, কেন্দ্রগী মন্ত্রী-মন্দলগী ঐহাক্কী মরুপ, রাজ্য সরকারগী মন্ত্রীশিং, এম.পি.শিং, লেজিস্লেচরশিং, ভগৱান মহাকালগী ভক্তি পুম্নমক, নুপী অমদি নুপাশিং, জয় মহাকাল!
উজ্জৈনগী ইনর্জী, মসিগী থৱায় য়াওবা! অভন্তিকাগী মসিগী ইথিল, মসিগী নুংঙাইবা, মসিগী থৌজাল! মহাকালগী মতিক ময়াই! ‘মহাকাল লোক’তা সেক্যুলর ওইদবা অমত্তা নত্তে। শঙ্করগী লোয়নরিবশিংদা অচম্বা অমত্তা লৈতে। পুম্নমক সুপরনেচরল, তোপ-তোপ্পা ওই। কাউঙমদবা, অঙকপা ওই। ঐখোয়গী ইচম চম্বা অমসুং থাজবা অসিদা মহাকালনা পেনবীদুনা মহাক্কী থৌজালগা লোয়ননা অসিগুম্বা অচৌবা শক্তম অসি শাবা ঙম্লিবনি। অমসুং মহাকালদগী থৌজালশিং ফংলবা মতমদা মতমগী অকক্নবা লৈরম্বা অদু মুত্থৎখি, মতমগী অকক্নবা লৈরম্বা অদু হন্থহনখি অমসুং লোইনাইদ্রবা হায়বা অসিগী ওইথোকপশিং লাকখি। অরোইবদগী লোইনাইদ্রবা খোঙচৎ অমা হৌখি। মহাকাল লোক্কী মতিক ময়াই অসিনা তুংদা লাক্কদবা মীরোলশিংদা সুপরনেচরল দিভিনিতীগী বিজন অমা পীরগনি, মসিনা ভারতকী নাৎ অমসুং স্পিরিচুএল কন্সিয়সনেসতা ইনর্জী হাপ্লগনি। য়াইফরবা থৌরম অসিদা ঐহাক্না রাজাধিরাআ মহাকালগী খুয়াদা পুনেমজরি। ঐহাক্না পুম্নমক্তা, লৈবাক অসিদা অমদি মালেমদা লৈরিবা মহাকালগী ভক্তা পুম্নমক্তা নুংঙাইবা ফোঙদোকচরি। মরু ওইনা ঐহাক্না শিবরাজ সিংহ চৌহান অমসুং মহাক্কী সরকারবু তৌবীমল খঙবা উৎচরি। অমসুং তেম্পল ত্রস্তকা মরী লৈনবা মীওইশিং, সন্তশিং অমসুং স্কোলরশিংগী মতেংনা খোঙথাং অসি মাইপাকহনখিবগীদমক মখোয়বুসু থমোয় শেংনা থাগৎপা ফোঙদোকচরি।
মরুপশিং,
মহাকালগী সহর ওইরিবা উজ্জৈনগী মতমদা অসুম্না হায়নৈ – “প্রলয়ো ন বাধতে তত্র মহাকালপুরী” হায়বদি মহাকালগী সহর অসি খুদোংথিবগী চৈথেংদগী লাপ্না লৈ। চহি লিশিং কয়াগী মমাংদা ভারতকী জিওগ্রাফিকেল ফোর্ম অসি ঙসি লৈরিবা অসিদগী খেন্নরম্বা য়াই, উজ্জৈন অসি ভারতকী ময়াইদা লৈরম্মি হায়না থাজনৈ। অমরোমদা উজ্জৈন অসি এস্ত্রোলোজিকেল কেলক্যুলেসনশিংদা ময়াইদা লৈবতা নত্তনা ভারতকী থৱায়গী ময়াইদা লৈরমখি। সহর অসি ঐখোয়গী শেংলবা পুরি তরেৎকী মনুংদা অমা ওইনা মশিং পারি। সহর অসি ভগৱান কৃষ্ণ মশামক লাক্তুনা মহৈ তমখিবা মফমনি। উজ্জৈনা মহারাজা বিক্রমঅদিত্যগী মতিক-ময়াই উবা ফংখি, মহাক্না ভারত্তা সনাগী চহিচা হৌদোকলমখি। মহাকালগী লম অসিদগী বিক্রম সমভত হায়বা মওংদা ভারতকী কালক্যুলসকী অনৌবা পন্দুপ অমা হৌখি। উজ্জৈন্দা পুৱারী অসি মীকুপ খুদিংমক্তা য়াওরি, পোৎলম খুদিংমক্তা য়াওরি। দিভাইন ইনর্জী অসি কাচিন খুদিংমক্তা শন্দোক্লি। তাইম সাইকলগী কল্পা ৮৪বু মশক তাক্লিবা শিবলিং ৮৪ লৈ। মহাবীর ৪, বিনায়ক ৬, ভৈরব ৮, অস্তমাতৃকাসশিং, নবগ্রহ ৯, বিষ্ণু ১০, রুদ্র ১১, আদিত্য ১২, দেবি ২৪ অমসুং তীর্থ ৮৮ লৈ। পুম্নমক অসিগী ময়াইদা রাজাধিরাজ কালাধিরাজ মহাকাল ফম্লি। মরম অসিনা ঐখোয়গী অপুনবা তাইবংপালগী শক্তি অসি ঐখোয়গী সন্তশিংনা সিম্বোলিক ফোর্ম অমদা উজ্জৈন্দা থমখি। মরম অসিনা উজ্জৈন্না ভারতকী চাউখৎপা, লৌশিং অমসুং ইকাই খুম্নবা, সভ্যতা অমসুং সহিত্য অসি চহি লিশিং কয়া লমজিংদুনা লাকখি। সহর অসিগী আর্কিতেকচর অদু করিনো, মসিগী মতিক ময়াই কমদৌবগে, ক্রাফ কমদৌবগে, ফজবা কমদৌবগে, হায়রিবশিং অসি অথোইবা কবি কালিদাসকী মেঘদুতমদা ঐখোয়না উবা ফংই। ঐখোয়না নাৎ অমসুং চৎনবীগী ৱারী অদু বানভত্তগুম্বা কবিগী শৈরেংশিংদা উবা ফংই। মসি খক্তা নত্তনা মেদিভেলগী মতমগী অইবশিংনা মফম অসিগী আর্কিতেকচরবু থাগৎলকখি।
ইচিল-ইনাওশিং,
জাতি অমগী নাৎকী ফজবা অসি অদুক্কী মতিক চাউই। অমসুং মাইপাকপগী পন্দোম য়ৌনবা জাতিনা নাৎকী ওইবা পনখৈশিং য়ৌবা ঙম্নবা হোৎনবা, মাগী শক্তাক্কা লোয়ননা চাউথোক্না লেপ্পা তঙাই ফদে। মরম অসিনা আজাদী কা অমৃত মহোৎসব অসিদা ভারতনা ‘মীখা পোনবগী ৱাখল্লোন থাদোক্নবা’ অমসুং ‘মাগী হেরিতেজকীদমক চাউথোকচবা পোকপা’ অসিগুম্বা পঞ্চ প্রন লৌখি। মরম অসিনা ঙসি অয়োধ্যাদা অচৌবা তাম মন্দির শাবা অসি খোঙজেল য়াংনা চত্থরি। কাশিগী বিশ্বানাথ ধামনা ভারতকী কলচরেল কেপিতেলদা মগুন হাপ্লি। সোমনাথকী চাউখৎ-থৌরাংগী থবকশিং অসিনা অনৌবা রেকোর্দশিং থম্লি। বাবা কেদরগী থৌজালগা লোয়ননা উত্তরাখন্দদা কেদরনাথ-বদ্রিনাথ তীর্থ য়াত্রাশিংগী মফমদা চাউখৎপগী অনৌবা পন্দুপ ইরি। নীংতম্বা ফংলবা মতুংদা অহানবা ওইনা চারধাম প্রোজেক্তশিংগী খুত্থাংদা নোংজু-নুংশা খাইদনা চৎপা য়াবা ঐখোয়গী ধাম মরিগী শম্নহল্লি। মসি খক্তা নত্তনা নীংতম্বা ফংলবা মতুংদা অহানবা ওইনা করতারপুর সাহিব কোরিদোর হাংদোকখি, হেমকুন্দ সাহিব অসি রোপৱেগী খুত্থাংদা শেম্নহল্লি। মতৌ অসুম্না ঐখোয়গী স্পিরিচুএল কন্সিয়সনেসকী অসিগুম্বা সেন্তরশিংগী মীংচৎ অসি স্বাদেশ দর্শন অমসুং প্রসাদ য়োজনাগী খুত্থাংদা লৈবাক শিনবা থুংবদা অমুক হন্না হান্নগী ফীভমদা হঞ্জিলহল্লি। অমসুং তাঙ্কক অসিদা মসিগী অচৌবা ‘মহাকাল লোক’ অসি হৌখিবা মতমগী মতিক-ময়াইগা লোয়ননা তুংলমচৎতা তরাম্না ওক্নবসু শেম-শারি। ঐখোয়না অৱাংদগী খাদা, নোংপোক্তগী নোংচুপতা লৈরিবা অরিবা মন্দিরশিং, মখোয়গী পাক চাউবা, মখোয়গী আর্কিতেকচর অসি য়েংলুবদা ঐখোয়দা অঙকপনা থল্লি। কোর্নাকগী সুর্য় মন্দির নত্ত্রগা মহারাস্ত্রগী এলোরাগী কাইলাশ মন্দির ওইরবসু মসিনা মালেমদা অঙকপা পোক্তবা কনা লৈবগে? ওর্নাক সুর্য় মন্দিরগুম্না উজরাত্তা মোধেরা সুর্য় মন্দির লৈ মফম অসিদা মনুংদা লৈরিবা লাইশঙ মনুংদা নুমিৎকী অহানবা মঙালনা হকথেংননা য়ৈরি। মতৌ অসুম্না তামিল নাদুগী তাঞ্জোরদা রাজারাজ চোলানা শাখিবা বৃহদেশ্বর লৈরি। কাঞ্চিপুরমদা বরাদারাজা পেরুমাল মন্দির, রামেশ্বরমদা রামানাথ স্বামী মন্দির, বেলুরদা চান্নাকেশবা মন্দির, মধুরাইদা মীনাক্ষী মন্দির, তেলঙ্গানাদা রামাপ্পা মন্দির, শ্রীনাগরদা শঙ্করচার্য় মন্দির লৈরি। লম্বা লৈত্রবা অসিগুম্বা মন্দির কয়া লৈ, ‘ন ভুতো ন ভবিশ্যতি’গী খুদমশিং ওইরি। মখোয়বু উবা মতমদা ঐখোয়না চহিচা অদুদা করম্বা তেক্নোলোজীনা শাখিবগে হায়বা ৱাখল খল্লকই। ঐখোয়গী ৱাহংশিংগী পাউখুমশিং ফংবা ঙমদ্রবসু মন্দিরশিং অসিনা পীরিবা স্পিরিচুএল অমসুং কলচরেলগী পাউজেলশিং অসি চপ মান্নবা ক্লেরিতীগা লোয়ননা ঙসিসু তাবা ফংলি। মীরোলশিংনা হেরিতেজ অসি উবা ফংবা মতমদা, পাউজেলশিং অসি তাবা মতমদা মসিনা সভ্যতা ওইনা ঐখোয়গী খুমাং চাউশিন্নবা অমসুং ইমোর্তেলিতীগী গারী ওইরি। ‘মহাকাল লোক্তা’ মসিগী চৎনবী অসি কলাগা চপ মান্নবা মওংদা হক্তুনা লৈ। মন্দির অসিগী অপুনবা মফম অসি শিব পুরানাগী ৱারীশিংদা য়ুম্ফম ওইরগা শেমখি। করিগুম্বা অদোম্না মফম অসিদা লাকপা তারবদি মহাকালগী দর্শন তৌবগা লোয়ননা অদোম্না মহাকালগী মতিক ময়াই অমসুং মরু ওইবা অদু উবা ফংগনি। পঞ্চমুখি শিব, মহাক্কী দামরু, সর্প, ত্রিশুল, অর্ধচন্দ অমসুং সপ্তঋসিগী অচৌবা মীতমশিং মফম অসিদা খিনখি। মসিদা লৌশিং য়াওরিবা বাস্তু অসিনা মাগী অরিবা মতিক-ময়াইগা মহাকাল লোক্কা শম্নহল্লি, মাগী মরু ওইবা হেন্না হেনগৎহল্লি।
ইচিল-ইনাওশিং,
ঐখোয়গী সাস্ত্রশিংদা হায়রম্বা অমা লৈ – ‘শিবম জ্ঞানম’। মসিগী ৱাহন্থোক্তি শিব অসি লৌশিংনি হায়বনি। অমসুং লৌশিং অসি শিবনি। তাইবংপালগী অথোইবা দর্শন অসি শিব দর্শন তৌবনা ওই। অমসুং ‘দর্শন’ অসি শিবগী বিজননি। মরম অসিনা ঐহাক্না থাজৈ মদুদি ঐখোয়গী জ্যোতিরলিঙ্গাশিং শেমগৎপা অসি ভারতকী স্পিরিচুএল লাইৎ শেমগৎপমো, ভারতকী লৌশিং অমসুং ৱাঙুলোল চাউখৎহনবনি। ভারতকী কলচরেল ফিলোসোফী অসিনা অমুক হন্না পন্দোম লোম্বা ঙম্লি অমসুং মালেমবু লমজিংনবা শেম শারি।
মরুপশিং,
ভগৱান মহাকাল অসি খা ওনবা অমত্তা ঙাইরবা জ্যোতিরলিঙ্গানি। মসি মালেম শিনবা থুংবদা মমিং লৈরবা ভস্ম আর্তিগীদমক খঙনরিবা শিবগী শকলোনশিংনি। ভক্তা খুদিংমক্না মখোয়গী পুন্সিদা ভস্ম আর্তি শোইদনা য়েংবা পাম্মি। ভস্ম আর্তিগী ধর্মগী ওইবা মরু ওইবা অসি মসিদা পুজারিশিংনা শরুক য়ারি। মসিনা হেন্না ময়েক শেংনা তাক্লগনি অদুবু ঐহাক্না চৎনবী অসিদা ঐখোয়গী ভারতকী মরু ওইবা অদুসু উবা ফংলি। ভারতকী মাইথিবা পীবা ঙমদবা মতৌ অদু ঐহাক্না উবা ফংই। মরম অসিনা শিব, ‘সোয়ম ভুতি বিভুশন’ ওইরি। মহাক অসি অমর ওই অমসুং মাইথিবা পীবা ঙমদে। মরম অসিনা মহাকাল লৈবা মফমদা মতমগী ঙমখৈ লৈতে। মহাকালদা চংজবা মতমদা হু ফাওবা অমৃত ওল্লি। মহাকালগী মমাংদা অশিবা ফাওবা হীংগৎহবা ঙম্মি। অরোইবদগী লোইনাইদ্রবা খোঙচৎ অমা হৌই। মসি ঐখোয়গী সভ্যতাগী স্পিরিচুএল কনফিদেন্সনি, মরম অসিনা ভারতনা চহি লিশিং কয়া অমর ওইবা ঙম্মি। ঙসি ফাওবদা ঐখোয়গী থাজবগী হৌরকফম অসি হীংদুনা লৈ, ভারতকী কন্সিয়সনেস হীংদুনা, ভারতকী থৱায় হীংদুনা লৈ। হৌখিবা মতমশিংদা ঐখোয়না উবা ফংখি মদুদি খোঙথাং কয়া লৌখৎখি, ফীভমদা অহোংবা লাকখি, শক্তিদা অহোংবা লাকখি, ভারত অসি মাংহনতাকহনখি, মনীং তম্বা মাংহনখি। ইলতুমিশগুম্বা লোইলম শন্দোকপা মীওইশিংনা উজ্জৈনগী শক্তি মাংহন্নবা খোঙথাংশিং লৌখৎখি। অদুবু ঐখোয়গী ঋসিশিংনা মহাকাল শিবতা চংজফম লৌখি। অমসুং হৌজিক ভারতনা অমুক হন্না মমিং লৈরক্লি, মহাক্কী থাজবগী ওথেন্তিক সেন্তরশিংদগী ইনর্জী অমুক হন্না লাকখি। ঐখোয়গী ইমোর্তেলিতীগী চপ মান্নবা য়ুনিভর্সেল দেক্লেরেসন ঐখোয়না অমুক হন্না তৌখি। মহাকালগী থৌজালশিংগা লোয়ননা মহাকালনা কালগী কোক্তা অমর ওইরম্বগী হক্তুনা থমলমখি। ঙসি অমুক হন্না আজাদী কা অমৃত মহোৎসব অসিদা অমর অভন্তিকানা ভারতকী কলচরেল ইমোর্তেলিতী অসি মশক তাক্লি। উজ্জৈন, চহি লিংশিং কয়াদগী ভারতকী কালক্যুলসকী ফোকেল পোইন্ত ওইরিবা অসি ভারতনা খুমাং চাউশিনবগী অনৌবা চহিচা অসিদা অমুক হন্না ঙন্থোইরি।
মরুপশিং,
ভারতকী নাৎ অসিনা ঐখোয়গী থৌদাংশিংগী অপুনবা মশক তাক্লি। ঐখোয়গী ফিরেপকী পান্দম অসি মালেমগী য়াইফবা, মীওইবা জাতিগী শেবা তৌবা হায়বা অসিনি। ঐখোয়না শিব অসুম্না হায়– নমামি বিশ্বস্য হিতে রতম তম, নমামি রুপানি বহুনি ধতে! হায়বদি লম্বী কয়াদা মালেম পুম্বগীদমক খনবীরিবা ঐখোয়না বিশ্বাপতি ভগৱান শিবদা থৌনিজৈ। মসিনা মতম চুপ্পদা ভারতকী তীর্থ য়াত্রাশিং, মন্দিরশিং, মোনাস্ত্রীশিং অমসুং লাইফমলেনশিংগী ৱাখল্লোন ওইদুনা লাকখি। লৈবাক শিনবা থুংবদগী অমসুং মালেমদগী মীওই কয়ানা মফম অসিদা মহাকাল মন্দিরদা লাকই। সমহস্থা কুম্ভ পাঙথোকপা মতমদা মীওই লাখ কয়ানা তিনখি। মন্ত্র অমা, ফিরেপ অমগা লোয়ননা অমত্তা ওইনা পুনশিনবা য়াই, মসিদগী হেন্না ফজবা খুদম অসি করিনো? অমসুং ঐখোয়না খঙই মদুদি চহি লিশিং কয়াদগী ঐখোয়গী কুম্ভ মেলাগী চৎনবী অসিনা চহি তরানিথোই পুন্না হোৎনবা অমসুং পাঙথোক্লবা মতুংদা ফংবা অমৃত অদুদগী ফিরেপ লৌখি। চহি তরানিথোইগী মতুংদা কুম্ভ পাঙথোকপা মতমদা অমুক হন্না অমৃত ফংখি। ফিরেপ লৌখি। অসুম্না চত্থখি। মমাংগী কুম্ভ মেলাদা লাকপগী খুদোংচাবা ঐহাক্না ফংজখি। মহাকালনা কৌরবা মতমদা মচানুপা ঐহাক্না করম্না লাক্তবা ঙমলোই। মতম অদুদা কুম্ভগী চহি লিশিং কয়া শুরবা চৎনবী অসি ঐহাক্কী ৱাখলদা লাকখি মতম অদুদা মসিগী ৱাখল কনখি। মা ক্ষিপ্রাগী তোর্বান্দা ৱাখল কয়া খনখি। মদুগী মনুংদা ঐহাক্কী ৱাখলদগী ৱাহৈ খরা থোরকখি, মদু কদায়দগী লাকপনো ঐহাক খঙদে, করম্না লাকপনো খঙদে অমসুং মদুনা ফিরেপ ওইখি।
ইচিল-ইনাওশিং,
ঐখোয়গী তীর্থ য়াত্রাশিংনা চহিচা কয়াদগী জাতিদা পাউজেল পীদুনা লাকখি, অমসুং থৌনাসু পীখি। কাশীগুম্বা ঐখোয়গী কেন্তরশিং অসিনা লৌশিং, ৱাঙুলোল অমসুং কলা লোয়ননা ধর্মগী ওইবা কেপিতেল ওইদুনা লাকখি। উজ্জৈনগুম্বা মফমশিং অসিনা এস্ত্রোনোমীগা মতী লৈনবা মকোক থোংবা রিসর্চ সেন্তরশিং ওইখি। ঙসি অনৌবা ভারতনা মাগী অরিবা ভেল্যুশিংগা লোয়ননা মাংদা চংশিনবা মতম অসিদা মসিনা ধর্মগা লোয়ননা সাইন্স অমসুং রিসর্চকী চৎনবী হীংগৎহনখি। ঙসি ঐখোয়না এস্ত্রোনোমীগী লমদা মালেমগী অচৌবা শক্তিগা চপ মান্ননা ঐখোয়না লেপ্পি। ঙসি ভারতনা অতোপ্পা লৈবাকশুংগী সেতলাইৎশিং স্পেসতা লোঞ্চ তৌরি। মিসন চন্দ্রয়ান অমসুং মিসন গগনয়ানগুম্বা মিসনশিংগী খুত্থাংদা ভারতনা অতিয়াদা অনৌবা পনখৈ য়ৌনবা শেম শারে, মসিনা ঐখোয়দা পন্দোম লোম্বা ঙমহল্লগনি। ঙসি ঙাকশেলগী লমদসু ভারতনা মপুং ফাবা শক্তিগা লোয়ননা আত্মনির্ভর ভারতকী মাইকৈদা চংশিল্লি। মতৌ অসুম্না ঙসিগী ঐখোয়গী নহারোলশিংনা ভারতকী তেলেন্ত অসি অনৌবা য়ুনিকোর্নশিং, স্পোর্তসকী স্তার্তঅপশিংগা লোয়ননা লম খুদিংমক্তা খুমাং চাউশিল্লি।
অমসুং ইচিল-ইনাওশিং,
ঐখোয়না মসিসু নীংশিংবা তাই, ঐখোয়না কাওরোইদবদি ইনোভেসন লৈবদা রিবোভেসন লৈ। মীখা পোল্লিঙৈ মতমদা ঐখোয়না মাইথীখি, ঙসি ভারত অসি রিনোভেৎ তৌরি, মাগী মীংচৎ, মাগী মতিক-ময়াই অদু অমুক হঞ্জিলহল্লি। অমসুং মসিগী মহৈনা ভারতকী মীয়াম খক্তা নত্তনা মরুপশিংনা মহাকালগী খুয়া খাদা চংজরি, থাজবনা থলহনখি। অমসুং থাজবগা লোয়ননা ঐহাক্না হায়জনীংবদি মসিগী কান্নবা অসি মালেম শিনবা থুংবনা ফংলগনি, মীওইবা খুন্নাইনা ফংলগনি। মহাকালগী থৌজালশিংগা লোয়ননা ভারতকী মতিক ময়াই অসিনা মালেমগী চাউখৎ খোঙচৎতা অনৌবা ওইথোকপা য়াবশিং পীরগনি। ভারতকী দিবিনিতিনা মালেম পুম্বগী শান্তিগী লম্বী য়াৎলগনি। থাজবা অসিগা লোয়ননা ঐহাক্না ভগৱান মহাকালগী খুয়া খাদা অমুক হন্না ইকোক নোন্না খুরুমজরি। ঐহাক্কা লোয়ননা হৌনা হায়বীয়ু, জয় মহাকাল! জয় জয় মহাকল, জয় জয় মহাকাল, জয় জয় মহাকাল, জয় জয় মহাকাল, জয় জয় মহাকাল, জয় জয় মহাকাল।
