ফাইনান্স মন্ত্রী, শ্রী নিররমলাজী, কেন্দ্র মন্ত্রী মন্দলগী ঐহাক্কী মরুপ, আর.বি.আই. গবর্নর, মন্ত্রালয় কয়াগী সেক্রেতরী, লৈবাক্কী তোঙান-তোঙানবা মফমগী মুখ্য মন্ত্রী, অমসুং থৌরম অসিবু শীন-লাঙলিবা মন্ত্রী পরিসদকী মীওই, অতোপ্পা মশক নাইবা মীওই অমসুং ইচিল ইনাওশিং!
দিজিতেল বেঙ্কিং য়ুনিত ৭৫ হৌদোকপগী য়াইফরবা থৌরমসিদা লৈবাক মীয়াম্বু ঐহাক্না থাগৎচরি। ঙসিদি, লৈবাক অসিনা দিজিতেল ইন্দিয়াগী মতিক্কী শাখী অমুক হন্না ওইরি। ঙসি, লৈবাক্কী জিলা ৭৫দা দিজিতেল বেঙ্কিং য়ুনিত ৭৫ হাংদোক্লি। ঐহাক্না মিসন অসিগা মরী লৈনবা মীয়াম, ঐখোয়গী বেঙ্কিং সেক্তর অমসুং আর.বি.আই.বু হন্না হন্না থাগৎচরি।
মরূপশিং,
ভারতকী মীচম মীয়ামগী পুন্সি মহিং লাইহন্নবা লৈবাক শীনবা থুংবদা খোঙজং চত্থরি, দিজিতেল বেঙ্কিংনা মাইকৈ অসিদা থাংজিনবা অচৌবা খোঙথাং অমা ওইরি। মসিদি শুপ্নগী বেঙ্কিংগী খুদোংচাবা অমখক নত্তে, মসিদি মিনিমম দিজিতেল ইনফ্রাস্ত্রকচরদগী মেক্সিমম সেবা পীনবা থৌওং অমনি। মসিনা চে-চাং শিজিন্নবদগী নীংতমহন্দুনা হান্নদগী য়াম্না হেন্না লায়থোকহনগনি। হায়বদি, মসিনা কান্নবা পীগনি অমসুং মপাঙ্গল লৈবা দিজিতেল বেঙ্কিংগী ঙাক শেনবগী মতৌসু য়াওগনি। খুঙ্গং, শহর মচাশিংদা মীওই কয়ানা দিজিতেল বেঙ্কিংগী সেবা ফংবা মতমদা, মহাক্কী মফমদা শেল থাদোক-থাজিন তৌবা য়াম্না লায়থোকহল্লগনি, ওনলাইন্দা ওইরগনি। বেঙ্কিংগী সেবা ফংনবগীদমক্তা খুঙ্গংগী মীয়াম্না য়াম্না ৱানরম্বনি। অদুবু, ঙসিদি মখোয়না হীরমসিদা অহোংবা অমা থেংনরগনি, হেন্না নুংঙাইরগনি।
মরূপশিং,
ঐখোয়গী সরকারগী পান্দমদি মীচম মীয়াম্বু মপাঙ্গল লৈহনবনি, শক্তি লৈহনবনি। মরম অদুনা, ঐখোয়না খুন্নাইগী খ্বাইদগী মতাইদা লেপ্লিবা মীওইবুসু খন্নদুনা পোলিসী কয়া শেম্লি, সরকার অপুনবনা মদুগুম্বা খুদোংচাবা লৈবা অমসুং চাউইখৎপা লম্বীদা চৎলি। ঐখোয়না মতম অমত্তদা থবক অনি পাংথোক্লি। অহানবা – বেঙ্কিংগী সেবাবু শেমদোকপা, মপাঙ্গল লৈহনবা, মতমগা চুনহনবা। অনিশুবা – ফাইনেন্সিএল ইনক্লুজন লৈহনবা। ফাইনেন্সিএল ইনক্লুজন লৈহল্লে। মমাংদা পাংথোকখিবা খন্ন-নৈনবগী থৌরম কয়াদা বেঙ্কিং অমসুং শেন্মিৎলোনগা মরী লৈনবা অখঙ-অহৈ কয়া লাকখি, লাইরবশিংগী মতাংদা খন্নখি। মতমদুদা, ফাইনেন্সিএল ইনক্লুজনগী ৱারী য়াম্না শানখি, অদুবু ৱাফমশিং অদু ৱারীদা অদুমক লৈখি, থবক্তা ওন্থোকখিদে। মতমদুগী ফেসিলিতীশিংনা খুদোংচাবা অসিগীদমক্তা শেম শাদুনা লৈরমদে। লাইরবনা মশানা বেঙ্কতা লাক্কনি, বেঙ্কিং সীস্তেমগী শরুক ওইগনি খন্নরম্মি। অদুবু ঐখোয়না চৎনবী অসি হোংদোকখি। বেঙ্কনা লাইরবগী মনাক্তা চৎকনি হায়না ঐখোয়না ৱারেপ লৌখি। মসিগীদমক্তা, ঐখোয়না লাইরবা অমসুং বেঙ্ককী মরক্তা লৈবা অরাপ্পা হান্না মুত্থৎপা তাবনি। ঐখোয়না হকচাংগী লাপ্নবগা লোয়ননা খ্বাইদগী মরু ওইবা ওইরিবা ৱাখল্লোন লাপ্নবগী মতৌ হান্না মুত্থৎপা তাবনি। ঐখোয়না য়ুম্থোং খুদিংদা বেঙ্কিংগী খুদোংচাবা য়ৌহনবদা অহানবা মিৎয়েং চঙখি। ঙসিদি, ভারতকী খুঙ্গংগী কিলোমীতর ৫গী অথাপ্পগী মনুংদা বেঙ্কিং মিত্রা, বেঙ্কিং করেস্পোন্দেন্ত, বেঙ্কিং আউতলেত ৯৯%গী চাংদা লৈরে। মসিদা নত্তনা, লৈবাক্কী পোস্ত ওফিসকী মপুং ওইবা নেতৱর্ক অসিদসু ইন্দিয়া পোস্তকী খুত্থাংদা বেঙ্কিংগী ইকোসীস্তেমগী শরুক ওইরে। ঙসিদি, লৈবাক্কী মীশিং লাখ ১গীদমক্তা লৈরিবা বেঙ্কিকী ব্রাঞ্চ মশিংনা জর্মনী, চাইনা অমসুং খা অফ্রিকাগুম্বা লৈবাক্তগী হেল্লে।
মরূপশিং,
মীচম মীয়ামগী পুন্সি হিংবগী স্তেন্দর্দ হোংদোক্নবা ঐখোয়না অহিং নুংথিল নাইদনা হোৎনরি। ঐখয়গী অপাম্বদি ফেসিলিতীশিংবু হেন্না ফগৎহনবা, মতমগা চুনহনবা অমসুং খ্বাইদগী মতাইদা লৈরিবা মীওইবুসু শরুক ওইহনবা হায়বসিনি। ঐখোয়না জন ধন একাউন্তকী থবক হৌদোকখিবা মতমদা, মীওই খরনা লাইরবগী বেঙ্ক একাউন্ত হাংলগা কৌদৌগনি হায়রম্মি। খোঙজং অসিগী তসেংবা ৱাহন্থোক করিনো হায়বা এক্সপর্তশিংনা ফাওবা খঙবা ঙম্লমদে। অদুবু, বেঙ্ক একাউন্ত হাংবগী মপাঙ্গল করিনো হায়বা ঙসিদি লৈবাক পুম্নমক্না উবা ফংলে। লৈবাক্কী অচম্বা মীয়াম্না মসিগী কান্নবা ফংলে, খঙলে। বেঙ্ক একাউন্ত হাংবনা মরম ওইরগা ঐখোয়না লাইরবশিংগীদমক্তা অপীকপা প্রিমিয়মগী ইন্স্যুরেন্স পীবা ঙম্লে। গেরেন্তী য়াওদনা লোন ফংবগী খুদোংচাবা পীরে। লাইরবা বেনিফিশরীশিংগী মফমদা হকথেংননা শেল পীবা ঙম্লে। লাইরবশিংগী ময়ুম শাবা ওইরো, অমাংশঙ শাবা ওইরো, গ্যাসকী সবসিদী ফংবা ওইরো, পুম্নমক ফংহল্লে। মখোয়গী একাউন্ততা শেল হকথেংননা পীবা ঙম্লে। সরকারগী স্কিমগী মখাদা ফংবা খুদোংচাবা পুম্নমক মখোয়গী বেঙ্ক একাউন্ত লৈবনা মরম ওইরগা, য়াম্না লায়না ফংহনবা ঙম্লে। অদুগা কোরোনাগী লাইচৎ লাকপা মতমদা, লাইরবা, ইমা অমসুং ইচেল ইচলশিংগী বেঙ্ক একাউন্ততা শেল য়ৌহনবা ঙমখি, ঐখোয়গী স্ত্রীত ভেন্দরশিংগীদমক্তা স্বনিধী য়োজনা হৌদোকপা ঙমখি। মতমসিদদি চাউখৎলবা লৈবাক কয়া ফাওবনা মসিগুম্বা থবকসি পাংথোকপা ঙমখিবা নত্তে। অদোম্না তারম্লগনি, আই.এম.এফ.না ভারতকী দিজিতেল বেঙ্কিং ইনফ্রাস্ত্রকচরবু য়াম্না থাগৎখ্রবনি। মসিগী মহৈদি ভারতকী লাইরবা, লৌমী অমসুং শিন্মীশিংদা পীফম থোকই, মখোয়না নিংহন্নবা লৈতনা, ভাব তানা পথাপ অসিবু য়াজখি অমসুং মখোয়গী পুন্সিগী শরুক ওইহনখি।
মরূপশিং,
ফাইনেন্সিএলকী কাঙলোনগা দিজিতেলগা খোঙলোই ওইরকপা মতমদা খুদোংচাবগী অচৌবা থোঙ কয়া হাংদোরকই। ঐখোয়গী মাঙদা য়ু.পি.আই.গুম্বা চাউরবা খুদম অমা লৈরে। মসি ভারতকী চাউথোকচনীংঙাইনি। য়ু.পি.আই.না মসিগুম্বা মখলগী ওইনা মালেমগী খ্বাইদগী অহানবা তেক্নোলোজীনি। অদুগা অদোম্না মসিবু খুঙ্গংদগী শহর ফাওবা, মনা মশিং য়োনবা থেলা অমসুং দুকান্দগীনা অচৌবা শোরুম্ফাওবদা উবা ফংগনি। মসিগা লোয়ননা ঙসিদি ভারতকী মীচম মীয়ামগী মখুত্তা রুপে কার্দসু পায়রে। ক্রেদিত কার্দ নত্ত্রগা ডেবিট কার্দ অসিদি ইনাক খুনবা মীওই খক্তনা পায়বনি হায়না খন্নরম্বা মতম অমা লৈরম্মি। মপাঙ্গল লৈবা খুন্নাইগী ফেসিলিতীনি খন্নরম্মি। কার্দসু মীরমগী পায়নরম্মি, মদুবু শিজিন্নবা মীওইশিংসু অখন্নবা মীওই খরা ওইরম্মি। অদুবু ঙসিদি, ভারত্তা মীওই করোর ৭০ হেনবনা রুপে কার্দ পায়নরে। ভারতকী মশাগী রুপে কার্দ অসি মালেম পুম্বনা শিজিন্নবা হৌরক্লে। তেক্নোলোজী অমসুং শেন্মিৎলোনগী মসিগুম্বা পুংবা অসিনা লাইরবগী মশাবু ইকায় খুম্নবগী অচৌবা পাঙ্গল অয়া ওইরক্লে। অদুগা মসিদগী লৈবাক্কী দিজিতেল দিভাইদসু লোইশিল্লক্লে।
মরূপশিং,
জে.এ.এম., হায়বদি জন ধন, আধার অমসুং মোবাইলগী ত্রিশক্তিনা পুন্দুনা অচৌবা অনাবা অমা লাইয়েংলে। হায়রিবা লাইনা অসিদি – শেঞ্জা থুমজানি। মথক্তগীদি শেল থাদৈ, অদুবু লাইরবগী মনাক্তা য়ৌদ্রিঙৈদা অদুমক মাঙখি। অদুবু, দাইরেক্ত বেনিফিত ত্রান্সফর, হায়বদি দি.বি.তি.গী খুত্থাংদা য়ৌগদৌরিবা মীওইগী মিংদা শেল হেক থাদোকখিবা মতমদদি, ফংফম থোকপগী মফমদা শোইদনা ফংলে। মতম চানা ফংলে। তোঙান-তোঙানবা স্কিমশিং ওইনা হৌজিক ফাওবদা দি.বি.তি.গী খুত্থাংদা লুপা করোর লাখ ২৫ হেন্না বেঙ্ক একাউন্ততা শেল ওইনা থাখ্রে। অদুগা হয়েংসু, লৈবাক্কী লৌমী করোর কয়াগী মফমদা করোর লিশিং ২ হেনবগী ইন্সতোলমেন্ত থাগদৌরি।
ইচিল ইনাওশিং,
ভারতকী মসিগুম্বা দি.বি.তি. অমসুং দিজিতেলগী মপাঙ্গলবু মালেম্ন পুম্বনা থাগৎনরি। মসিবু ঙসিগী মতমগী গ্লোবেল মোদেল ওইনা খন্নরি। ভারতনা দিজিতাইজেসন তৌদুনা সোসিএল সেক্যুরিতী লৈহনবগী মতাংদা মালেমগী মকোক ওইরে হায়না ৱর্ল্দ বেঙ্কনা হায়রিবনি। মালেমগী মায় পাক্লবা মীওই, অমসুং তেক্নোলোজীগী মালেমদা শক্নাইরবা মীওইশিংনা মসিবু য়াম্না থাগৎনরি। মসিগুম্বা মায় পাকপা অসিদা মখোয়না অঙকপা ফাওনরি।
ইচিল ইনাওশিং,
অদোমসু অমুক্তা খনবীয়ু, দিজিতেল অমসুং শেন্মিৎলোন্না অসুক নীংথিনা খোঙলোই ওইরিবসিদা, লৈবাক্না মসিগী ১০০%গী চাংদা খুদোংচাবা লৌরবদি, ঐখোয়না কয়া য়াম্না চাউখৎকনি? ঙসিদি, ফিন্তেক্না ভারতকী পোলিসী অমসুং তুংগী মতমগী মাইকৈ তাক্লি। দিজিতেল বেঙ্কিং য়ুনিতশিংনা ফিন্তেক্কী মসিগুম্বা কান্নবা কয়া হৌদোক্লগনি। মশিং থীঙমদবা বেঙ্ক একাউন্তশিংনা লৈবাক্কী ফাইনেন্সিএল ইনক্লুজনগী য়ুম্বী শেম্বগা লোয়ননা ফিন্তেক ফাইনেন্সিএল রিভোল্যুসনগী ফম্বাক অমসু শেম্লি।
সরকারনা হন্দক্তা ব্লোকচেন তেক্নোলোজীদা য়ুম্ফম ওইবা দিজিতেল করেন্সী হৌদোক্কনি লাউথোকখ্রে। লাক্কদৌরিবা মতমগী দিজিতেল করেন্সী ওইরো, নত্ত্রগা ঙসিগী মতমদা পাংথোক্লিবা দিজিতেল ত্রাঞ্জেক্সন ওইরো, শেন্মিৎলোন্দখক নত্তনা অতোপ্পা মরু ওইবা হীরম কয়াগসু মসিগা মরী লৈনরি। খুদম ওইনা হায়রবদা, করেন্সী নম্বগী শেল তিংলরোই, লৈবাক্কী শেল কনবা ঙমগনি। করেন্সী নম্বগী চে অমসুং মুকশিং অসি মীরমদগী চেনবা ঙাক্তনি। ঐখোয়না মসিবু দিজিতেল ইকোনোমীগী খুত্থাংদগী কান্থোকপা য়াগনি। মসিনা আত্মানির্ভর ভারত্তা বেঙ্কিং সেক্তর অমসুং আর.বি.আই.গী চাউরবা থৌদাংনি হায়না ঐহাক্না খল্লি। মসিদা নত্তনা, চে শিজিন্নবা হন্থবনা অকোয়বগী ফিভমদসু য়াম্না কান্নবা ফংগনি।
মরূপশিং,
বেঙ্কিংনা ফাইনেন্সিএল ত্রাঞ্জেক্সন্দগী হেন্দোক্তুনা ‘গুদ গবর্নেন্স’ অমসুং ‘বেত্তর সর্ভিস দিলিবরী’গী পাম্বৈ অমসু ওইরবনি। মসিনা প্রাইভেত সেক্তর অমসুং স্মোল স্কেল ইন্দস্ত্রীশিংগী শাহৌ লৌবগী খুদোংচাবা কয়াসু শেম্লে। তেক্নোলোজী শিজিন্নদুনা প্রদক্ত অমসুং সর্ভিস দিলিবরীগী অনৌবা ইকোসীস্তেম শেমদবা সেক্তর অমত্তা ঙসি ভারত্তা লৈরম্লোই। অদোম্না অমুক্তা য়েংবীয়ু, অদোম্না বেঙ্গোলদগী খোইহী পাম্লবা, অসমগী ৱাগী পোত্থোক তঙাই ফরক্তবা মতমদা, নত্ত্রগা কেরলাগী হবর্স পাম্লকপা অমসুং লোকেল রেস্তোরেন্ততগী অপাম্বা চিঞ্জাক অমা চানীংলকপা মতমদা, অদুগা হকশেলগী পাউতাক পাম্লকপা মতমদা, লিগেলগী পাউতাক পাম্লকপা মতমদা, খুঙ্গংদা ফমদুনা শহরগী ওজাদগী মহৈ তম্নীংবা মতমদা, অদোমগী পাউখুম খুদিংমক দিজিতেল ইন্দিয়ানা পীবা ঙম্লগনি, মসি ঐখোয়না চহি খরগী মমাংদা খনবা ফাওবা ঙম্লম্বা নত্তে।
মরূপশিং,
দিজিতেল ইকোনোমী হায়বসি ঙসিদি ঐখোয়গী অমসুং স্তার্ত-অপ মালেমগী ইকোনোমী ওইরবনি, মেক ইন ইন্দিয়া অমসুং আত্মানির্ভর ভারতকী মপাঙ্গল চাউনা লৈরবনি। ঐখোয়গী ইন্দস্ত্রী অপীকপা, এম.এস.এম.ই., জি.ই.এম.গুম্বা খুদোংচাবা কয়াগী খুত্থাংদা সরকারগী তেন্দর তৌবদা শরুক য়াবা য়াহল্লি। মখোয়না কারবার তৌবগী অনৌবা খুদোংচাবা ফংনরি। হৌজিক ফাওবগী ওইনা, জি.ই.এম.দা করোর লাখ অমা মখায় হেনবগী ওর্দর পীরকখ্রে। মসিনা লৈবাক্কী শেন্মিৎলোন, ভোকেল ফোর লোকেল মিসন্দা কান্নবা কয়া য়াম্না পীগনি হায়বা অদোমসু খঙলম্লগনি। দিজিতেল বেঙ্কিং য়ুনিতকী খুত্থাংদা মসিগী মাইকৈ অসিদা অনৌবা খুদোংচাবা কয়া লৈরক্লগনি। ঐখোয়না মাইকৈ অসিদা ইন্নোভেসন তৌবা তাই, অনৌবা ৱাখল্লোনগা লোয়ননা খুদোংচাবশিং অসিবু তরাম্না ওকপা তাবনি।
মরূপশিং,
লৈবাক অমগী বেঙ্কিং সীসতেম্না মপাঙ্গল কল্লিবমখৈ, লৈবাক্তুগী শেন্মিৎলোন চাউখৎকনি। ঙসিদি, ভারতকী শেন্মিৎলোন্না লেপ্পা লৈতনা শাহৌ লৌরি। লৈবাক অসিদা মমাংদা লৈরম্বা ফোন বেঙ্কিং সীস্তেমদগী ঐখোয়না মমাংগী চহি ৮ অসিদা দিজিতেল বেঙ্কিংদা হোংদোকপদগী ঙসিগী মায় পাকপা অসি ফংবা ঙম্লিবনি। ইং ২০১৪গী মমাংগী ফোন বেঙ্কিংগী মরমদা অদোম্না নীংথিনা খঙলমগনি। বেঙ্কতগী ফোন কয়া য়াম্না লাক্লম্মি, বেঙ্কনা করম্না মথৌ তৌগনি, কনাদা শেল পীগনি হায়বা বেঙ্কনা লেপ্পম্বনি। মসিগুম্বা ফোন বেঙ্কিংগী চৎনবীনা বেঙ্কশিংগী সেক্যুরিতী য়াম্না হন্থহল্লমি, লৈখা তাহল্লম্মি, ৱাথোক অমগী মথংদা ৱাথোক অমা থোকপগী ই-পাউনা ৱাই চাইরম্মি। অদুবু, হৌজিক্তি দিজিতেল বেঙ্কিং নীংথিনা মথৌ তৌরে। ঐখোয়না এন.পি.এ. মশক খঙদোক্নবা মোদর্নিতীগী মাইকৈদা থবক পাংথোকখি। বেঙ্কিং সীস্তেমদা লুপা করোর লাখ কয়া অমুক হল্লক্লে। ঐখোয়না বেঙ্কশিংবু রিকেপিতেলাইজ তৌখি, মশানা খঙনা দিফোল্ত তৌবশিংগী মাইয়োক্তা থবক লৌখৎখি, প্রিভেন্সন ওফ করপ্সন এক্ততসু অহোংবা পুরকখি। এন.পি.এ.গা মরী লৈনবা শিংনবা কয়া লোইশিন্নবা আই.বি.সি.গী মতেং খোঙজেল থুনা পুরকখি। ঐখোয়না লোন পীনবগীদমক্তা তেক্নোলোজী অমসুং এনালাইতিক্স শিজিন্নবা হেনগৎখি, মসিদগী মোদর্ন ওইবা অমসুং সাইন্তিফিক ওইবা ফেসিলিতী কয়া শেমগৎপা ঙমখি। বেঙ্ক পুন্সিনবগুম্বা মরু ওইবা ৱারেপ লৌবগী পোলিসী মতম কুইনা থবক তৌবা ঙম্লমদ্রে, লৈবাক্না মদুবুসু মপাঙ্গল কনখৎহল্লে। ঙসি ৱারেপ লৌরে, থবক থুনা হৌরে। ৱারেপশিং অসিগী মহৈ ঐখোয়গী মাঙদা লৈরে। মালেম্না মসিবু থাগৎনরি। দিজিতেল বেঙ্কিং য়ুনিতকুম্বা অনৌবা থৌওং হৌদোকপা অমসুং ফিন্তেকপু ইন্নোভেতিব ওইবা মওংদা শিজিন্নবদগী বেঙ্কিং ফেসিলিতীগীদমক্তা সেল্ফ দ্রিভন তেক্নোলোজী অনৌবা অমা শেম্লি। মসিদা কস্তমরশিংগী ওতোনোমী য়াম্না লৈগনি, বেঙ্কিং সীস্তেম য়াম্না সেক্যুর ওইরগনি অমসুং মতমগা চুনবসু ঙম্লগনি। মসিগুম্বা ফেসিলিতীশিংবু হেন্না চাউখৎহনবা করম্না ওইগনি, লার্জ স্কেলদা পাংথোকপা করম্না ঙমগনি হায়বগী মাইকৈদা ঐহাক্না স্তেকহোলদর খুদিংনা থবক পায়খৎহন্নীংই। ঐখোয়গী বেঙ্কশিংনা দিজিতেল ফেসিলিতীদা য়ারিবমখৈ মীওই মশিং য়াম্না পুশিলহন্নবা পান্দম থমহন্নীংই। ঐহাক্না অদোমগী মফমদা করিগুম্বা খরা হায়নীংই। মরু ওইনা বেঙ্কিং সেক্তরগী মীওইশিংদা। অদুগা বেঙ্ককা মরী লৈনবা খুঙ্গং কয়াদা লৈরিবা অপীকপা কারবার তৌরিবা মীওইশিংগী মফমদসু হায়জনীংই। নীংতম্বগী অমৃত কালগী মতমসু ওইরি। ঐহাক্না লৈবাক মীয়ামদা হীরম অসি খঙহন্দুনা অদোম্না ইনগনি হায়বগী থাজবা থম্মি। ঐখোয়গী বেঙ্ক অমসুং অপীকপা কারবারশিংনা পুন্দুনা থবক অমা পাংথোকপা য়াদবরা? ঐখোয়গী বেঙ্ককী ব্রাঞ্চ কয়া লৈরিবা, শহরদা নত্ত্রগা খুঙ্গংদা লৈবা ওইরো, মখোয়গী মফম্না কোনবা মফমশিংগী য়ামদ্রবদা ১০০বু, ঐহাক য়াম্না হায়দ্রবনি, দিজিতেল ত্রাঞ্জেক্সনগী শরুক ওইহনবা ঙমগদরা? অদোম্না অমুক্তা খল্লগা য়েংবীয়ু, ঐখোয়না কয়া য়াম্না চাউবা ইহৌ অমা পুরকপা ঙমগনি।
ইচিল ইনাওশিং,
মসিনা লৈবাক্কী ওইনা অনৌবা অহৌবা অমা ওইবা য়াগনি। মসিগীদমক্তা লো, কাঙলোন অমত্তা শেম্বা য়ারোই, অদুবু অদোম্না মসিগী কান্নবা উরকপা মতমদা, ঐহাক্না মশিং অসি ১০০দগী ২০০দা হেনগৎহন্সি হায়না অমুক হন্না হায়বগী মথৌ তাররোই খল্লি।
মরূপশিং,
ব্রাঞ্চ খুদিংনা কারবার তৌবা মীওই ১০০ মখোয়গী মখাদা পুরক্নবা পান্দম থম্বীয়ু। ঙসি জন ধন একাউন্তনা মায় পাক্লি। মসিগী মরমদি, বেঙ্কতা ফম্লিবা মীওইশিংনা, ফম পীকপা ঐখোয়গী মরুপ পুম্নমক, ওইথোকহনবনি। মখোয়না লাইরবশিংগী ময়ুম ময়ুমদা চৎখিবনি, থাংজা নোংমাইজিং ফাওবা মখোয়না থবক তৌখিবনি। মসিনা মরম ওইরগা জন ধন মায় পাক্লিবনি। জন ধনবু মায় পাকহনখিবা বেঙ্ককী মরুপ খুদিংগী পাঙ্গল ঙসিদি লৈবাক্না উরে। বেঙ্ককী ফেসিলিতী শেন্নরিবা, ব্রাঞ্চপু শেন্নরিবা মীওইশিংনা মখোয়গী কম্মান্দ মখাদা কারবার তৌবা মীওই ১০০বু পুক্নিং থৌগৎপীয়ু, মখোয়বু অদোমগা পুলহনবীয়ু। অদোম্না চাউরবা ইহৌ অমা লমজিংগদৌরিবনি। মসিগী অহৌবসিনা ঐখোয়গী বেঙ্কিং সীস্তেম অমসুং শেন্মিৎলোনবু ফ্যুচর রেদী ওইবা অমসুং গ্লোবেল ইকোনোমীবু লমজিংবা ঙম্বগী মতিক লৈবা মশক নাইবা থাক অমদা পুবা ঙমগনি হায়না ঐহাক্না থাজৈ। মসিগুম্বা য়াইফ পাউজেলশিংগা লোয়ননা, ঐহাক্না ভারতকী ফাইনান্স মন্ত্রী, ফাইনান্স মন্ত্রালয়, ঐখোয়গী আর.বি.আই. গবর্নর, আর.বি.আই. তীম, বেঙ্কিং সেক্তরগা মরী লৈনবা ঐখোয়গী ফম পীকপা মরুপ খুদিংমকপু পুম্নমক্না ইকায় খুম্নফম থোকই হায়জরি। অদোম্না লৈবাক্কীদমক্তা অচৌবা খুদোল অমা পীবিরে। মতম অমত্তদা লৈবাক মীয়ামগী মসিগুম্বা মমল নাইদ্রবা খুদোল, দিৱালী মমাংগী মসিগুম্বা খুদোল, নীংতম্বগী চহি ৭৫ মপুং ফাবগী মসিগুম্বা খুদোল ফংবসি য়াম্না তান চান্নবনি। পুম্নমকপু হন্না হন্না থাগৎচরি!
