নেতাজী সুভাস চন্দ্র বোস দ্বীপ্তা শাগদবা নেতাজীগী নেস্নেল মেমোরিএলগী মোদেল মাইখুম হাংদোকখ্রে
“পুৱারী শেম্লিবা অসিনা, তুংগী মীরোলশিংনা মসিবু নীংশিংবা, য়েংশিনবা অমদি নৈনবখক নত্তনা মসিদগী লেপ্পা নাইদনা পুক্নিং থৌগৎনফমসু ওইগদৌরিবনি”“নুমিৎ অসি তুংগী মীরোলশিংনা অজাদী কা অমৃৎ কালগী মশক নাইবা পন্দুপ অমা ওইনা নীংশিংনহৌরগনি”“ঙসিসু সেলুলর জেলগী কাশিংদগী কল্লবা চৈনাখোলগা লোয়ননা খন্নরুদবা মওংদা মরৈবাক নুংশিখিবশিংগী খোঞ্জেল তারি”“বেঙ্গলদগী দিল্লী, অন্দমান ফাওবদা, লৈবাকসিগী শরুক খুদিংমক্না নেতাজীনা থম্বিরম্বশিংবু কোক নোল্লি অমদি থাক ৱাংনা থাঙগত্তুনা থম্লি”“ঐখোয়গী মীয়ামগী লৈঙাক্কী ইন্সতিত্যুসনশিং অমদি কর্তব্য পথকী মমাঙদা খিল্লিবা নেতাজীগী অচৌবা মীতম অসিনা ঐখোয় পুম্নমকপু ঐখোয়গী ইথৌদাং নীংশিংহল্লি”“সমুদ্রনা তোঙান তোঙানবা ঈথৎশিং শম্নহনবগুম, ‘এক ভারত, শ্রেস্থ ভারত’কী ইহুলনা ইমা ভারতকী মচা পুম্নমকপু অমত্তা ওইনা পুনশিল্লি”“লান্মীগী থৌদাংগী লোয়ননা লৈবাক ঙাক্নবগীদমক মপুন্সি কত্থোকখিবা লান্মীশিংবু পাক শন্না মশক খঙবিবা হায়বসি লৈবাক অসিগী থৌদাংনি”“হৌজিক্তি মীয়াম্না মখোয়গী পুন্সি অমদি পুৱারী খঙনবগীদমক অন্দমান অমসুং নিকোবর ঈথত্তা লাক্নরি”নমস্কার!
থৌরমসিদা শরুক য়াবীরিবা লৈবাক্কী গৃহ মন্ত্রী, শ্রী অমিত ভাই শাহ, অন্দমান অমসুং নিকোবরগী দেপ্যুতী গবর্নর, চীফ ওফ দিফেন্সকী স্তাফ, ঐখোয়গী ফোর্স অহুমগী প্রসিদেন্ত, কোস্ত গার্দকী দাইরেক্তর জেনেরেল, কম্মান্দর ইন চীফ, অন্দমান অমসুং নিকোবর কম্মান্দ, ওফিসর পুম্নমক, পরম বীর চক্রা ফংলবা থৌনা ফবা জৱানশিংগী ইমুং-মনুংগী মীওই, অতোপ্পা মীথুংলেন অমদি ইবেম্মা অমসুং ইবুংঙোশিং!
ঙসি অসি নেতাজী সুভাসকী মপোক কুমওন্নি, লৈবাক্না নুমিৎ অসিবু পরাক্রম দিবস হায়না ঙসিগুম্লবা ইথিং পীনিংঙাই ওইরবা নুমিৎ অসিবু পালন তৌরি। ঐহাক্না লৈবাক মীয়াম পুম্নমকপু মসিগুম্বা পরাক্রম দিবসকীদমক্তা য়াইফ পাউজেল পীজরি। ঙসিদি, পরাক্রম দিবস অসিদা অন্দমান অমসুং নিকোবর ইথৎ অসিদা অনৌবা অয়ুক্কী মঙালনা ঙানবীদুনা অনৌবা পুৱারী অমা শেম্লে। অদুগা পুৱারীবু শেম্লবদি, তুংগী মতমশিংনা মসিবু নিংশিংনৈ, নৈনৈ অমসুং মসিদগী লেপ্তনা ইথিল লৌই। অন্দমান অমসুং নিকোবরগী ইথৎ ২১বু ঙসি মিংথোল্লগনি। ইথৎশিং অসি পরম বীর চক্রা ফংলবশিংগী মমিংদা খঙনরগনি। নেতাজী সুভাস চন্দ্র বোসজীনা লৈরম্বা ইথৎ অসিদা মহাক্কী পুন্সি অমসুং কত্থোকশিংগী নিংশিং খুভম অমসু ঙসি উরেপ উয়ুং তম্লে। ঙসিগী নুমিৎ অসিমকপু নিংতম্বগী অমৃত কালগী মশক থোকপা তাঙ্কক অমগুম্না তুংগী চারোন-শুরোনশিংনা নিংশিংনগনি। নেতাজীগী নিংশিং খুভম, অথৌবা অমসুং থৌনা ফবা লান্মীশিংগী মমিংদা থোল্লিবা ইথৎ অসিনা ঐখোয়গী নহারোল অমসুং তুংগী চারোন-শুরোনশিংগী লেপ্তনা ইথিল ফংবা মফম অমা ওইরগনি। ঐহাক্না অন্দমান অমসুং নিকোবর ইথৎকী মীওইশিং অমসুং লৈবাক মীয়াম খুদিংবু মসিগী হন্না হন্না থাগৎচরি। ঐহাক্না নেতাজী সুভাস অমসুং পরম্বীর চক্রা ফংলবা অথৌবশিংবু অমুক্কা হন্না ইকায় খুম্নজরি।
ইচিল ইনাওশিং,
অন্দমানগী লমদম অসিদি তিরঙ্গাবু অতিয়াদা খ্বাইদগী অহানবা ওইনা পাইহনখিবা লমদম অদুনি। লমদম অসিদা নিংতম্বা ভারতকী অহানবা সরকার লিংখৎখিবনি। মসিদা নত্তনা, অন্দমানগী লৈহাও অসিদা বীর সাবর্কর অমসুং মহাক্কুম্বা মশিং থীঙমদ্রবা অথৌবশিংনা লৈবাক্কীদমক্তা কত্থোকপা, তিতিক্সাগী খ্বাইদগী অৱাংবা থৌওং পাংথোকখিবনি। সেল্ল্যুলর জেলগী কা, মসিগী ফক্লাংশিং অসিদা থৱাই নুংঙাইতবা খোল্লাও কয়া মফমসিদা লাকপা মীওইশিংদা নাদা ঙসি ফাওবা তাবা ফংলিবনি। অদুবু লাইবক থীবদি, নিংতম ইহৌগী মদুগুম্বা লান্মীশিংগী নিংশিং খুভম ওইবগী মহুত্তা মফমসিগী শক্তাক অসিবু মীখা পোল্লিঙৈগী মতম নিংশিংহন্নবা মফম ওইহল্লে। ঐখোয়গী ইথৎশিংগী মমিং ফাওবদা মীখা পোল্লম্মি হায়বগী মমি তারে। ঐহাক্বা চহি মরি-মঙাগী মমাংদা পোর্ত ব্লাইরদা চৎখিবা মতমদা মফমসিগী মরু ওইবা ইথৎ অহুম্বু ভারতকী মমিং ওইনা থোনবগী খুদোংচাবা ফংজখিবসি ঐহাক্কী লাইবক ফবনি। রোস আইলেন্দ অসি ঙসিদি নেতাজী সুভাস চন্দ্র আইলেন্দ ওল্লে। হেবলোক অমসুং নীল আইলেন্দসু স্বরাজ অমসুং শহীদ আইলেন্দ ওল্লে। মসিদা য়াম্না নুংঙাইবা ৱাফম অমনা, স্বরাজ অমসুং শহীদ হায়বা মিং অসি নেতাজী মশামক্না থোল্লম্বনি। মিংশিং অসিবু নিংতম্বা ফংলবা মতুংদা থৌশাবীরুদ্রে। হৌজিক, আজাদ হিন্দ ফৌজকী সরকারগী চহি ৭৫ মপুং ফাখ্রে, অদুনা ঐখোয়গী সরকারনা ঙসিদগী হায়রিবা মমিংশিং অমুক্কা থোল্লিবনি।
মরুপশিং,
নেতাজী সুভাসপু নিংতম্বা ফংলবা তুংদা কাওথোক্নবা হোৎনখিবা কয়া অদুগী তাইয়োন্নবা ওইনা লৈবাক অসিনা হৌজিক মহাকপু মিৎকুপ খুদিং নিংশিংনবা হোৎনবগী থৌওংসিংবু ২১শুবা চহি-চাগী ঙসিগী নুমিৎনা উরি। নেতাজী খ্বাইদগী অহানবা ওইনা তিরঙ্গা পাইহনখিবা অন্দমানগী মফমদুদা ঙসিদি অতিয়াবু থেংবা ঙম্বা তিরঙ্গানা আজাদ হিন্দ ফৌজকী থৌনাগী ৱারী লিরি। লৈবাক্কী কাচিন কোয়া খুদিংদগী মীওই কয়ানা মফমসিদা লাকপা মতমদা সমুদ্র তোর্বান্দা তিরঙ্গা পাইরিবসি উবদা মখোয়গী থম্মোইনুংদা লৈবাক নিংবগী ইথিলনা থলহল্লি। মহাকপু নিংশিংবা ওইনা হৌজিক অন্দমান্দা মহাক্কী ম্যুজিয়ম অমসুং নিংশিং খুভম শাগদৌরিবা অসিনা অন্দমান্দা লাকপা মতমদা হান্নদগী হেনবা নিংশিংনিংঙাই ওইবা মতম ওইহল্লগনি। নেতাজীগা মরী লৈনবা মসিগুম্বা ম্যুজিয়ম অমসু দিল্লীগী লাল কিলাদা ইং ২০১৯দা হাংদোকখ্রে। ম্যুজিয়ম অসিনা ঙসিদি লাল কিলাদা লাকপা মীওই খুদিংগী ইথিল লৌফম মফম অমা ওইরে। মান্নবা থৌওং অমগুম্না, বেঙ্গোলদসু মহাক্কী ১২৫শুবা মপোক কুমওন্দা অখন্নবা থৌরম পাংথোকখিবদুসু লৈবাক মীয়াম হরাও তয়াম্না শরুক য়ানখি। মহাক্কী মপোকপ নুমিৎপু পরাক্রম দিবস হায়না লাউথোকখি। মসিনা হায়বদি, বেঙ্গোলদগী দিল্লী অমসুং অন্দমান ফাওবদা নেজাতীবু ইকায় খুম্নদবা মফম অমত্তা লৈতে, মহাক্কী পুৱারী খঙদবা মীওই কনা অমত্তা লৈতে হায়বনি।
মরুপশিং,
নেতাজী সুভাস চন্দ্র বোসকা মরী লৈননা নিংতম্বা হেক ফংবগা পাংথোকফম থোকফম থৌওং কয়া অমা মমাংগী চহি ৮-৯ অসিদা লৈবাক অসিদা পাংথোকখ্রে। অদুবু, মতমদুদদি পাংথোকহৌদ্রে। লৈবাক্কী শরুক অমদা নিংতম্বা ভারতকী অহানবা সরকার অমা ইং ১৯৪৩দা শেমখি, লৈবাক্না ঙসিদি মতমদুবু য়াম্না চাউথোকচবগা লোয়ননা য়াজরে। আজাদা হিন্দ সরকার শেমখিবগী চহি ৭৫ মপু ফারকখিবগা লোয়ননা লৈবাক অসিনা লাল কিলাদা তিরঙ্গা পাইহন্দুনা ইকায় খুম্নখি। নেতাজীগা মরী লৈনবা ফাইল কয়া মীয়াম মাঙদা পুথোক্নবা দিকেদ কয়াদগী হায়দুনা লাক্লি। মসিগী থবক অসিসু লৈবাক অসিনা থম্মোই শেংনা খুমাং চাউশিনহল্লে। ঐখোয়গী গনতন্ত্রিক লুপসিংগী মমাঙদা ঙসিদি, কর্তব্যা পথতা লৈরিবা নেতাজীগী নিংথিরবা মীতম অসিনা ঐখোয়দা ঐখোয়গী থৌদাংশিং নিংশিংহল্লি। ঐহাক্না খনবদা মসিগুম্বা থবক অসি দিকেদ কয়াগী মমাংদা তৌফম থোকপনি খল্লি। মসিগী মরমদি, মশাগী লৈবাক্কী শক্নাইরবা মীওইশিংগা মরী তৎনহন্দনা, শেন্নদুনা লৈরকখিবা লৈবাকশিংদি চাউখৎ-থৌরাংগী লমদা য়াম্না মাঙজিল হেন্না থাদুনা চাউখৎখ্রে। মরম অদুনা, থবক অসিমক নিংতম্বগী অমৃত কাল অসিদা ভারতনা পাংথোক্লিবনি, থৱাই হকচাং য়াওনা পাংথোক্লি।
মরুপশিং,
ঙসি অনৌবা মমিং ফংলিবা ইথৎ ২১ অসিগী মমিংদসু য়াম্না মরু ওইবা পাউজেল য়াওরি। পাউজেল অসিদি “এক ভারত, স্রেস্থ ভারত”কী ৱাখল্লোন্নি। পাউজেল অসিদি “লৈবাক্কীদমক্তা কত্থোকখিবশিং অসি অমর ওইদুনা লৈ” হায়বনি। ব্যম অমৃতস্য পুত্রা। অমসুং পাউজেল অসিদি “ভারতকী লান্মীশিংগী তোপ-তোপ্পা মথৌনা”গী পাউজেলনি। ইমা লৈবাক্কী হীরম খুদিংনা পুম্নমক্তগী হেল্লি হায়না খনখিবা পরম বীর চক্রা ফংখ্রবা অথৌবা ২১গী মিংদা ইথৎ ২১ অসিবু খঙনরগনি। মখোয়না ইমা লৈবাক্কীদমক্তা থৱাই থাখিবনি। ভারত ইমাগী মথৌনা লৈরবা লান্মীশিং অসি তোঙান-তোঙানবা রাজ্যশিংদগীনি। তোঙানবা লোল ঙাংবা, ফিজেৎ-চাকচা অমসুং পুন্সি মহিং তোঙানবা মীওই ঙাক্তনি। অদুবু, ইমা লৈবাক্কী সেবা অমসুং ইমা লৈবাক্কীদমক্তা চেনবা ৱাখল্লোন্না মখোয়বু অমত্তা ওইহনখিবনি। পান্দম অমা, মিৎয়েং অমা, লম্বী অমদা খোঙফম চেৎপনি।
মরুপশিং,
সমুদ্রবু তোঙানবা ইথৎ কয়ানা পুন্সিনবগুম্না “এক ভারত, স্রেস্থ ভারত”কী ৱাখল্লোন্না ইমা ভারতকী মচাশিংবু অমত্তা ওইহল্লিবনি। মেজর সোম্নাথ শর্মা, পীরু সিংহ, মেজর শৈতান সিংহদগী হৌরগা কেপ্তেন মনোজ পান্দে, সুবেদার জোগিন্দর সিংহ অমসুং লান্স নায়ক অলবর্ত এক্কা ফাওবা, থৌনা লৈরবা অবদুল হমীদ অমসুং মেজর রামাস্বামী পর্মেস্বরমদগী হৌদুনা পরম্বীর চক্রা ফংলবা অথৌবা ২১মক্কী পান্দম অসুং অপাম্বদি “লৈবাক্না খ্বাইদগী হেল্লি, ইন্দিয়ানা খ্বাইদগী মমাঙদা লাকই” হায়বসিনি। মখোয়গী অপাম্বা অসিবু ইথৎশিং অসিগী মমিংদা মতম পুম্বগী নিংশিংলগনি। কার্গিল লান্দা য়েহ দিল মাঙ্গে মোরগী মায় পাকপগী খোল্লাও লাওরম্বা কেপ্তেন বিক্রমগী মমিংদা অন্দমানগী চিঙ অমসু মিংথোনখ্রে।
ইচিল ইনাওশিং,
অন্দমান নিকোবরগী ইথৎশিংবু মমিং থোনবগী থৌওং অসিনা পরম্বীর চক্রা ফংলবা অথৌবা ২১ অসিবু ইকায় খুম্নবখক্তা নত্তনা, ভারতকী লান্মীশিংবু ইকায় খুম্নবগী থৌওং অমসু ওইরি। অৱাংদগী খা, নোংপোক্তগী নোংচুপ ফাওবদা, লাপ্লবা মফম ওইরো, ৱাংলবা চিংজাও ওইরো, মী তাদবা নত্ত্রগা মনুং হঞ্জিনবা মফম ওইরো, ভারতকী লান্মীশিংনা লৈবাক ঙাক শেন্নবা মিৎ-না শিংনা লেপ্তুনা লৈরি। ঐখোয়গী লান্মীশিংনা নিংতম্বা হেক ফংবগা লান মাইয়োক্নবা তাখি। তাঞ্জা খুদিংনা মখোয়না মশাগী মথৌনা উৎখি। লৈবাক্কীদমক্তা পাংথোকপা থৌদাংনি খন্দুনা মশাগী মপুন্সি কত্থোকখিবা লান্মীশিংবু ঐখোয়না মতম পুম্বদা নিংশিংফম থোকই। ঙসিদি, লৈবাক অসিনা মসিগুম্বা থৌদাংশিংবু মপুং ফানা পাংথোকপা ঙম্নবা লেপ্তনা হোৎনরি। ঙসিদি, লান্মী অমসুং ফোর্সশিংগী মমিংদগী লৈবাকপু শকখঙহল্লি।
মরুপশিং,
অন্দমান অসিদি ঈশিং মাইশিং, মহৌশাগী লন, অকোয়বগী ফিভম, থৌনা, চৎনবী, লমকোয়ফম, লৌশিংগী মঙাল ফংফম অমসুং ইথিল পীবগী মতৌ পুম্নমক চেনবা লমদম্নি। অন্দমান্দা চৎনিংবা মীওই অমত্তা লৈবাক অসিদা লৈরমগদ্রা? অন্দমানগী রিসোর্স য়াম্না লৈ, মশিং থীঙমদবা খুদোংচাবা লৈ। ঐখোয়না পুম্নমক অসি মশক খঙদোক্কদবনি, রিসোর্সশিং অসি খঙগদবনি। মমাংগী চহি ৮-৯ অসিদা লৈবাক্না মাইকৈ অসিদা লেপ্তনা থবক পায়খৎলি। হায়রিবা হোৎনজমন অসিনা মরম ওইরগা কোরোনাগী চৈথেং ফংলবা মতুংদা ফাওবা, তুরিজমগী লমদা অফবা মহৈ উবা ফংলি। ইং ২০১৪দা লৈবাক পুম্বদগী মফমসিদা লাকখিবা তুরিস্ত মশিংদগী ইং ২০২২দা লাকখিবা মশিংনা চাউরাক্না শরুক ২মুক হেনখি। হায়বদি, তুরিস্তকী মশিং শরুক ২ হেনগৎলে হায়বনি, অদুনা থবক অমসুং চাগা তানবসু হেনগৎলে। মসিগা লোয়ননা, অতোপ্পা অচৌবা অহোংবা অমসু মমাংগী চহি খরদা লাকখ্রে। মীয়াম্না মফমসিগী মহৌশাগী ফজবা অমসুং মফমসিগী সমুদ্র তোর্বানশিংগী খন্দুনা মমাংদা অন্দমান্দা লাক্নরম্মি। অদুবু, মখোয়গী শক্তাক অসি হৌজিক্তি হেনগৎলে। হৌজিক্তি, অন্দমান অসি নিংতম ইহৌগী পুৱারীগসু মরী লৈনরে। মীয়াম্না পুৱারী খঙনবা মফমসিদা লাকপা হৌনরে। ইশাগী হেরিতেজকীদমক্তা চাউথোকচবগী অনৌবা মতৌ অমসু মফমসিনা লাকহল্লে। নেতাজী সুভাস চন্দ্রগা মরী লৈনবা নিংশিং খুভম অমসুং লান্মীগী থৌনাবু ইকায় খুম্নবগী থৌওংনা লৈবাক মীয়াম্বু মফমসিদা চিংদুনা পুরক্লগনি, মফমসিদা লাক্নিংবা ফাওরগনি। হীরম অসিনা তুংগী মতমশিংদা তুরিজমগী য়াম্লবা খুদোংচাবা লৈহল্লগনি।
মরুপশিং,
ঐখোয়গী লৈবাক্কী খ্বাইদগী অহানবা সরকারশিংদা, মরু ওইনা, অরিবা ৱাখল্লোন চেনবা রাজনিতীনা মরম ওইরগা, ইশাদা থাজবা ৱাৎপা অমসুং ইশাবু হন্থনা খঞ্জবগী মতৌশিংনা মরম ওইরগা লৈবাক অমসুং লৈবাক্কী তৌবা ঙম্বগী মতিকপু দিকেদ কয়াদগী য়াম্না তানা লৌদুনা লাকখি। ঐখোয়গী হিমালয়গী রাজ্যশিং, মরু ওইনা, অৱাং নোংপোক্কী মফমশিং, নত্ত্রগা অন্দমানগুম্বা সমুদ্রগী ইথৎ ওইরো, অথাপ্পা অমসুং মনুং হঞ্জিনবা লমদম্নি হায়না মখোয়শিংবু মতম পুম্বদা লৌদুনা লাকখি। মসিনা মরম ওইরগা, লমদমশিং অসিদা দিকেদ কয়াদগী মিৎয়েং চঙবীদনা লাকখি। চাউখৎ থৌরাংগী খুদোংচাবা পীবিদনা লাকখি। অন্দমান নিকোবরনা ৱাফম অসিগী ময়েক লারবা খুদম অমা ওইরি। অন্দমান্দগী হেন্না পীকপা চাউখৎপা ইথৎ কয়া মালেমদা লৈ। সিঙ্গাপোর, মালদিব, সেচেলগুম্বা লৈবাকশিংনা মখোয়গী রিসোর্স নিংথিনা শিজিন্নদুনা তুরিজমগী মশক নাইবা লৈবাক ওইহনবা ঙম্লি। মালেমগী মীপুম খুদিংনা মফমশিং অসিদা লমকোয়বা চৎলি অমসুং মসিগা লোয়ননা কারবারগা মরী লৈনবা খুদোংচাবা কয়া পুদুনা লাক্নৈ। মসিগুম্বা মতিক অসিমকসু ঐখোয়গী ইথৎশিংদা লৈ। ঐখোয়সু মালেমদা করিগুম্বা খরা শোইদনা পীবা ঙম্মি, অদুবু, মসিদা ঐখোয়না মমাংদা মিৎয়েং অমত্তা চঙলমদে। ঐখোয়গী ইথৎ কয়া অমা লৈ হায়বা ঐখোয় ফাওবনা নিংথিনা খঙজদবগী ফিভম ওইনা লৈরম্মিবনি। অদুবু, লৈবাক অসিনা হীরম অসিগী মাইকৈদা মাঙজিল থানা চঙশিনবা হৌরে। হৌজিক্তি, লৈবাক অসিদা মহৌশাগী খল ঙাক্তুনা, মতমগা চুনবা ইনফ্রাস্ত্রকচর কয়াগা লোয়ননা অমত্তা ওইনা তুংলমচত্তা চঙশিনবা হৌরে। ঐখোয়না ‘সবমেরিন ওপ্তিকেল ফাইবর’গী খুত্থাংদা অন্দমান্দা হাই স্পীদ ইন্তর্নেত য়ৌহনবগী থবক হৌখ্রে। মালেমগী অতোপ্পা লৈবাক্কুম্না হৌজিক্তি অন্দমান্দা হাই স্পীদ ইন্তর্নেত য়ৌরগনি। দিজিতেল পেমেন্ত অমসুং দিজিতেলগী অতোপ্পা সেবা কয়া মফমসিদা খোঙজেল য়াঙনা শিজিন্নবা হৌরে। অন্দমান্দা লম কোয়বা মীওইশিংনা মসিগী অচৌবা কান্নবা ফংগদোইনি।
মরুপশিং,
মমাংগী মতমদা, অন্দমান নিকোবরনা নিংতম ইহৌদা অনৌবা মাইকৈ পীখিবনি, মতৌ অসুম্না, তুংগী মতমদসু, লৈবাক্কী মসিগী মফমসিনা চাউখৎ থৌরাংদা অনৌবা খোঙজেল হাপকনি। মতিক লৈবা অমসুং পাংথোকপা ঙম্বা ভারত অমা ঐখোয়না শেমগনি অমসুং মতমগা চুননা চাউখৎপগী অনৌবা থাক য়ৌবা ঙমগনি হায়না ঐহাক্না থাজবা থম্লি। মসিগী থাজবা অসিগা লোয়ননা, ঐহাক্না নেতাজী সুভাস অমসুং ঐখোয়গী থৌনা ফবা লান্মীশিংগী খুয়াখাদা ইকায় খুম্নজরি। অদোম পুম্নমকপু পরাক্রম দিবসকীদমক্তা ঐহাক্না য়াইফ পাউজেল পীজরি। হন্না হন্না থাগৎচরি!
